‘Molumo Ala . . . Ahana Okhala Vamurimani Vanyu’
Anamuyari anilikana ni amakampusi. Awo ahaana waakhapelela oratteene anaaya okhala wira anamwane awo waakuva othweelela ni waakuva owokiwa. (Mir. 27:23) Anamuyari anrowa owerya sai ovara muteko owo? Awo ahaana oviriha okathi munceene khula nihiku avaanelaka ni anaaya wira asuwele itthu siri mmuupuweloni ni vamurimani vaya. (Mir. 20:5) Tivonto anamuyari anitthuneya aya olipiha waamini wa anaaya arumeelaka ikaruma sihinivya ni mooro. (1 aKor. 3:10-15) Eviidiyu eni ‘Estas Palavras . . . Têm de Estar sobre o Seu Coração’, ennittittimiherya otthuneya waya Omulompa Muluku Vatthokoni. Nuumala atthu otheene oweha eviidiyu ela, moottharelana muthokorerye makoho ala.
(1) Exeeni yiirinhe etthoko ya munna Thomas okhala yoohilipa omunepani? (2) Xeeni wiimanani wa Munna Thomas wira omulompe Muluku vatthokoni wahaakhumenle aya saana wanipacerya? (3) Malakiheryo xeeni ari mBiibiliyani anikhaliherya waahuwa oratteene anamwane? (Otum. 6:6, 7) (4) Exeeni enrowa okhaliherya emusi olavulihana oratteene? (5) Itthu xeeni anamwane aniphavela aya ovahiwa ni anamuyari aya? (6) Moota xeeni Munna Martin ni amwaarawe yaakhalihenrye aya etthoko ya munna Thomas? (Mir. 27:17) (7) Exeeni muhooleli a etthoko enitthuneya awe opaka vahinatthi wira ohoolele omulompa Muluku wooloka vatthokoni? (8) Exeeni Munna Thomas yaapanke awe wira olokiherye itthu vatthokoni vawe? (9) Moota xeeni ohicompela omulompa Muluku vatthokoni oryaaya wooloka? (aÉf. 6:4) (10) Miruku xeeni soovareleya muteko sikhanle oorumeeliwa okathi woomulompa Muluku vatthokoni? (11) Moota xeeni Munna Thomas aawenrye awe okhala oopixa murima okathi waamukhaliherya awe Marcos wiixutta opaka itthu sooloka? (Yer. 17:9) (12) Moota xeeni Munna Thomas ni amwaarawe yaamukhalihenrye aya Rebecca wira opake yoothanla yooloka voohimya sa ompatthani awe ni Justin? (Mar. 12:30; 2 Tim. 2:22) (13) Moota xeeni Munna Thomas ni amwaarawe yoonihenrye aya waamini okathi yaapaka aya malokiheryo mweekumini mwaya? (Math. 6:33) (14) Moota xeeni eviidiyu ela ettittimihenrya aya otthuneya waya ahooleli a itthoko waavaha yoolya ya omunepani atthu a vatthokoni vaya? (1 Tim. 5:8) (15) Ahooleli a etthoko akhalaneke yoolakela xeeni?
MALAKIHERYO WA AHOOLELI A ITTHOKO: Edrama ela enihimya itthu sa mahiku yaala, yaakumiheriwe muthukumano wa muttetthe waapakiwe mwaakha wa 2011. Okathi ole, nyuwo mwaahoona etthu yaareerela olokiheriwa voohimya sa omukokhorela Muluku vatthokoni? Ankhi olelo-va? Vakhala wira annitthuneya opakiwa marukunuxo makina, xontte mpake mavekelo wira nwerye opaka marukunuxo anrowa okumiherya mireerelo soohimala emusi anyu.—aÉf. 5:15-17.