Nilokiherye Inamuna Sahu Soolaleerya​—Nipakeke Marukunuxo

XEENI VARI AYA VOOLOKA OPAKA EYO: MaKristau oothanliwa vamosa ni ipwittipwitthi sikina, annaalattula atthu a maloko otheene wira arweeke evahiweke moohiliva etthu “màsi èkumi”. (Wis 22:17) Maasi awo a nthoonyeryo, antaphulela mareheryo otheene Yehova onipaka awe wira owoopole apinaatamu oowiiwelela wira ehiye okhala epottha ya etampi ni okhwa. Wira niwerye waakhaliherya atthu arina soolema ni sookupali soovirikana, nihaana waalaleerya “èhapari yorera” mwa enamuna enrowa waavara murima.​—Wis 14:6.

MOOTA WOOPAKA EYO:

• Muthanleke mwaha ni yoolepa enrowa waavara murima atthu a muttetthe anyu. Nyuwo pooti othanlela mpantta wa ovaanela voohimya sa Biibiliya, wala mwaha mwaatonko anyu orumeela mookhumela saana. Myaha xeeni ni soolepa xeeni sinaasivela atthu vanceene? Niireke yookhala etthu ekhumelenle niinaano atthu awo animakela aya wuupuwelela ni olavula? Myaha xeeni sinaasivela alopwana wala athiyana?

• Muheleke muhina inamuna sookoha ihaali ni soolema soolimaleliwa mmuttettheni mmo.​—2 aKor 6:3, 4

• Musuweleke saana myaha sinithokoreriwa ni iliivuru sahu ni iviidiyu ninrumeela ahu wira niixuttihe, wira nwerye ovaanela ni mutthu osiveliwe ekeekhai

• Mbaxariki iliivuru ni iviidiyu sa nttaava na atthu munaaphwanya anyu mmuttettheni mwanyu

• Muturukeke mwaha anyu moovarihana ni makhalelo a mwaneene etthoko. (1 aKor 9:19-23) Mwa ntakiheryo, exeeni mwaarowa anyu ohimya vaakhanle wira moosuwela wira mwaneene etthoko ookhweliwa okathi vakhaani ovinre?

NWEHE EVIIDIYU, NUUMALA-VO MWAAKHULEKE MAKOHO ALA ANITTHARELANA:

• Mwaha xeeni namalaleerya opacerinhe awe ovaanela ni mwaneene etthoko?

• Exeeni yiiraneya mookumini mwa mwaneene etthoko?

• Yoolepa xeeni yaari yooreerela vanceene orumeela okathi ole, ni nthowa xeeni?

• Munrowa orukunuxa sai inamuna sanyu soovaanela wira saasiveleke atthu a muttetthe anyu?