[moono woolopwana] Marcelo, Yomara ni Hiver. Khula mmosa omukunxe ene Biibiliya Tradução do Novo Mundo ebraile nttaava na Espanyola
Awo Yaahoona Wiira Muloko Waanaaphenta
YOMARA ni axirokora awe anli, Marcelo ni Hiver, anikhala muttetthe wa oGuatemala. Yomara taapacenrye omusoma Biibiliya ni Anamoona a Yehova, nuumala-vo axirokora awe anli yaahipacerya omusoma. Masi yaahikhalanasa muxankiho mmosa. Ooraaru aya khiyoona nave khiyaasuwela osoma iliivuru sa ebraile, (iliivuru apakeliwe atthu ahinoona). Nto munna aasomiha, aanisoma ittima ni iversiikulu sa mbiibiliyani ya khula yoosoma.
Nave yaahikhalasa-tho muxankiho mukina, wa ohiwerya orowa omuthukumanoni. Maana mekhaya khiyaawerya orowa Empa ya Omwene yoowaattamela. Nto anna yaanaakhaliherya orowa oweha mithukumano sootheene. Okathi yiilepinhe aya ipantte sa anaxikola, anna yaanaakhaliherya ohela mmuru sowooniherya saya.
Maio a 2019, mithukumano saahipacerya opakiwa muttetthe yaakhalasa aya. Okathi owo, anamathelana amosa yaawo yaari mapioneero, yiira athaamenle ene muttetthe owo. Anamathelana ale yaahiivahererya wiira yaakhaliherye anna ale araru, osuwela osoma ni olepa iliivuru sa ebraile, nnaamwi anamathelana ale yaahaasuwela ebraile. Wiira awerye opaka eyo, awo yaanisoma iliivuru sinceene wiira yiixutte ebraile ni inamuna sa moota wowaakhaliherya anna ale wiixutta ebraile.
Marcelo ovahaka ekomentaario mmuthukumanoni
Mwa miyeeri vakhaani, Yomara ni axirokora awe ale anli, yaaniwerya osoma ebraile moowaakuveya ni eyo yahaakhaliherya olipiha waataana waya ni Yehova. Vano Yomara, Marcelo vamosa ni Hiver, anirumeelasa ntoko mapioneero ookilaatheya. Nto Marcelo murumeyi ookhaliherya. Owo onniluttuweliwa ni miteko sa Muluku khula esumana. Ohakalala waya nave onniniiriha hiyo okhala oohakalala.
Yomara vamosa ni axirokora awe anli, annixukhurela vanceene nikhaliheryo anna anaavaha aya. Yomara onihimya so: “Okhuma nihiku naasuwenle ahu Anamoona a Yehova, awo annooniherya niphento neekeekhai na ekristau”. Nave Marcelo onnincererya oriki: “Nookhalana apatthani anceene ooreera murima a mmulokoni, nave ninniirela mpantta emusi ya olumwenku wootheene eri yoowiiraana mwaha wa niphento”. Yomara ni axirokora awe annilipelela nihiku elapo yootheene enrowa aya okhala eparayiisu yooreera. — Esal. 37:10, 11; Yes. 35:5.