Yesu Onnooniherya Moota—Woophwanya Okumi Woohakalaliha

‘Muhana wettela makhalelo yettelawe Yesu’.​—1 Yohani 2:6.

NTOKO soonale ahu mmyaha sivinre, Yesu aahikhalana okumi wootepexa ohakalaliha. Tivonto akhala wira nimphavela okhalana okumi wootepexa ohakalaliha nihaana omutakiha ni weettela miruku sawe.

Tthiri Yehova oniphavela wira neetteke ntoko sinihimya aya yoolepa vasulu-vo. Weetta ntoko seettale awe Yesu, onivekela otthara ntakiheryo na mweettelo ni sowiixuttiha sa Yesu, okumi ahu wotheene. Opaka eyo onoomwiiriha aka Muluku oniphenta ni okhalana okumi wohakalaliha.

Sowiixuttiha sa Yesu saahela mpuwa sooruma suulupale siniwerya onikhaliherya weetta ntoko seettale awe. Ninniphwanya sooruma iyo suulupale mwa ele Yesu yiixuttihale awe va-mwaako. Nrowe nthokorerye, sooruma suulupale vakhaani wira noone moota woweettela.

YOORUMA YUULUPALE: ‘Òreriwa t’ale ari amasikhini [omunepani] mwaya’.​—Matheyo 5:3.

MOOTA YOORUMA ELA YUULUPALE ENIKUMIHERYA AYA OKUMI WOOHAKALALIHA: Yesu aahooniherya wira okhala wene apinaatamu anniphavela omusuwela Muluku. Hiyo ninniphavela waakhuliwa makoho ntoko ala: Nikhalenleni valaponi? Xeeni atthu anceene vanihaawa aya valaponi? Niireke tthiri Muluku onninthokorerya? Niireke nuumala okhwa ohaavo-tho okumi? Nihaana osuwela waakhuliwa wa makoho awo, wira nikhalane okumi woohakalaliha. Yesu aanisuwela wira Nuulumo na Muluku ti etthu emosa yoororomeleya eniwerya waakhula makoho awo. Okathi aamulompa awe Tiithi awe, Yesu aahimyale so: ‘[Nuulumo nanyu ti] ekekhai’. (Yohani 17:17) Nto niireke nuulumo na Muluku tthiri nnoowerya onikhaliherya ophwanya sotthuneya sahu somunepani?

NTAKIHERYO NA ETTHU YIIRANEN’YE: Ntoko muhooleli a egrupu emosa yoovuwa ya muusika, Esa aanikhumela saana ni muusika awe a rock, khuhala vakhaani okhala oovuwa mulaponi. Masi, Esa aanoona wira yahaavo etthu ekina yaamuhalela. Owo onihimya so: “Nnaamwi waakisivela wiipa ni egrupu ele, yahaavo etthu ekina yaaphavelaka, okumi woohakalaliha”. Nuuvira okathi, nto Esa aahikumana ni Anamoona a Yehova. Owo onitthokiherya so: “Okathi owo kaahipaka makoho manceene; masi waakhula wawe wowiiweya omurumeelaka Biibiliya waahikuxa murima aka, nto khupacerya omusoma Biibiliya ni yena. Etthu yaaxuttale awe mBiibiliyani yaahivara murima awe mpakha ovahererya okumi awe wa Yehova. Vano, onihimya so: “Khalai okumi aka waari wooxanka, masi vano kihaana okumi orina ni yoolakela yohakalaliha”.a

YOORUMA YUULUPALE: “Òreriwa t’ale òmoriwa ikharari”.​—Matheyo 5:7.

MOOTA YOORUMA ELA YUULUPALE ENIKUMIHERYA AYA OKUMI WOOHAKALALIHA: Omoriwa ikharari, onihela mpuwa owoonela othunku akina, okhala oohakalaliha murima ni waathokorerya saana akina. Yesu ahaamorela ikharari atthu yaareerela. Mwaha wa owoonela othunku, owo khaalipelela ovekeliwa wira aakhaliherye ale yahaawa. (Matheyo 14:14; 20:30-34) Okathi onimutakiha ahu Yesu, naamorelaka ikharari akina, hiyo ninnincererya etthu yoohakalaliha okumi ahu, ohiya-vo, eyo ennikumiherya ohakalala. (Miteko 20:35) Nirumeeleke moolumo ohakalaliha vamosa ni sowiira sahu, wira naamorele ikharari akina, ni waaphumuriha mixankiho ale anixanka. Niireke waamorela ikharari akina onnimwiiriha tthiri mutthu okhala saana?

NTAKIHERYO NA ETTHU YIIRANENʼYE: Maria ni iyawe, Carlos, ari ntakiheryo na omoriwa ikharari. Paapa awe Maria ti naamukhweli, ni khoreere owereiwa mahiku ala. Maria ni Carlos aamukuxa amuroihaka vapuwani vaya ni khiyathokorerya oretta awe. Yaanikhala mahiku yahaarupa aya ohiyu. Ikwaha sikina mwaha wa otepa oretta awe wa diabeti (oretta onikhumelela mwaha wowaatta esukhiri murutthuni) yahaana orowa hospitaali etthimakaka. Awo annaakhulela wira okathi mukina yaanitemwa. Masi awosa toohakalala, siisaale saahimyale awe Yesu, awo annihakalala mwaha woosuwela wira annaakhwaniherya itthu sotheene sinitthuneya wa paapa awe Maria.

YOORUMA YUULUPALE: “Òreriwa t’ale amphavela wiwanana ni murettele”.​—Matheyo 5:9, Biblia Solempwa sa Muluku.

MOOTA YOORUMA ELA YUULUPALE ENIKUMIHERYA AYA OKUMI WOOHAKALALIHA: Moolumo oowi ‘ophavela wiiwanana ni murettele’ onimuhimya mutthu oniphavela okumiherya murettele. Moota xeeni ophavela okumiherya murettele onimwiiriha aya mutthu okhalana okumi woohakalaliha? Okathi onimananiha ahu okhala a murettele, eyo enniwiiriha atthu akina woonaka oreera okhala ni hiyo. Tivonto nnimwiira saana otthara miruku iya: “Vaweryaneyaka, mphaveleke n’ikuru sanyu sothene wiwanana n’atthu othene”. (aRoma 12:18) ‘Atthu othene’ aniheliwa mpuwa amusi ni atthu yaale ahirina ahu waamini omosaru. Nto niireke okhala a murettele ni atthu otheene onimwiiriha okumi ahu okhala woohakalaliha tthiri?

NTAKIHERYO NA ETTHU YIIRANEN’YE: Nithokorerye yowiiraneya ya muthiyana mmosa oniitthaniwa Nair. Mwa iyaakha sinci, owo aahikumanana mixankiho seeherenrye owerya wawe okhala a murettele vanceenexa ni atthu a vatthokoni vawe. Okhuma okathi yoole iyawe aamuhiyale awe ni anamwane anli khuvira iyaakha muloko, Nair, tonaahuwa ekhawe anamwane ale. Mwanawe mmosa mulopwana aahipahuwa ni mirette soohapala khiyapaka itthu sowoopiha, samwiiriha woova owo ni mwanawe muthiyana. Nair onikupali wira ele yaaxuttale awe mBiibiliyani, yaahinvaha ikuru wira ophaveleke murettele, nnaamwi aakumanana itthu sooxankiha vanci. Nair aaheererya ohinyakulihana wala ohiwana-wana. Ni aahimananiha okhala ooreera murima, oothunku, ni waareerela murima akina. (aÉf. 4:31, 32) Vano onnikupali wira wiixutta okhala mutthu a murettele woomwiiriha okhala mutthu a saana wa emusi awe ni wa atthu akina.

WUUPUWELELA ITTHU SA MUHOOLO

Natthara miruku sa Yesu, ninrowa okhala oohakalala. Masi, wira nikhalane okumi woohakalaliha nihaana osuwela itthu sa muhoolo. Tthiri ninrowa okhalana sai okumi woohakalaliha, nisuwelaka wira muhoolo ninrowa wuuluvala, owereiwa ni okhwa? Ekeekhai wira itthu iyo sinniiraneya tthiri olumwenku ola.

Masi, sihaavo ihapari soohakalaliha! Yehova ohaasukerya itthu sinci sohakalaliha atthu yaale animananiha ‘wettela makhalelo yettelawe Yesu’. Yehova onnileiherya wira moohipisa onooruuha elapo esya ya exariya, wira atthu ekhaleke ntoko Yehova salaihenrya awe, eyo piiyo, ekumi yooloka wa mahiku otheene. Nuulumo nawe nihimyale so: ‘Empa ya Muluku [eri] variyari v’atthu. Muluku onokhala ni awo, awo anrowa okhala atthu awe. Muluku onrowa okhala vamosá ni awo. Owo onopuputtha maithori aya othene, khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalayi wovira’.​—Wisupulula 21:3, 4.

Maria, muthiyana yoole ohimmwale wanipacerya orina iyaakha 84, onnihakalala mwaha woolipelela wiiraneya wa masu awo. Sai voohimya sa nyuwo? Niireke munniphavela osuwela ele enrowa okhala ‘okumi wekeekhai’, niire so, okumi wa elapo enilamuleliwa ni Omwene wa Muluku? (1 Timótheyo 6:19) Wira musuwele, mwaavekele Anamoona a Yehova opuro onikhala anyu, wala mulepe yooveka anyu muroihaka wa ale alempe erevista ela.b

[Inoota]

[Elatarato epaaxina 7]

Maria ni Carlos

[Elatarato epaaxina 7]

Nair