MWAANISUWELA ELA?

Xeeni oNinive wa khalai wiihaniwa aya okhala esidade ya oyeehi ephome wala ‘wiva’?

Ninive yaari ekapitaali ya Olamulelo wa Elapo Yotheene wa Asiria. Yaari esidade yuulupale yaarina ipa suulupale sa okokhorela, ni iphiro suulupale ni ixiri soorakama soolipa. Profeta Nahumi yoowo aari muHeeberi aahilavula wira eyo yaari esidade ya ‘wiva’ wala yoyeehi ephome.​—Nahumi 3:1.

Ela yaari etthu yiiraneya, wira Senakeribi awerye okhapelela muttetthe awe wa oNiinive, nto owo aaniwiiriha Asiiriya okhala ootakhala. Elatarato emosa enooniherya moota saahaaxiwa aya atthu, ennimooniherya namutthukiwa othoroliwe nlumi anakhomeliwa vatthayani. Soolepa sikina sinihimya wira atthu yaavariwa okhottoni yaanikuxiwa ni mikhoyi saatthukweleliwa ekweco yaathorola ephula wala iyano. Anamutthukiwa yaari makhulupale, yaaniwarihiwa muxikoni mwaya, ntoko ekolaari yootakhalexa, miru sa atthu oohitiwa yaari mamwene aya.

Mulipa oolavula sowiiraneya sa atthu a oSiiriya, oniihaniwa Archibald Henry Sayce, onnihimya mixankiho saakhumelenle okathi yaatupheliwe aya esidade ariki: “Saanuukeliwa miru sinceene sa atthu yiiviha; Amiravo ni aximwali yaanipahiwa yoonaka, aahiiso yaaniirihiwa itthu sikina sootakhalexa, alopwana yaanikhomeliwa vamwirini, operiwa exapala yoonaka, ophuliwa maitho, okwasiwa ikatha, ilipwi, maaru ni iphula saya”.

Xeeni okathi aYuda yaateka aya empa yaaxirya aya osulu wa etarato?

Ayuda yaahirummwa ni Muluku wira: ‘Yateka empa esya, exireke osulu etarato, yahiire siso vano mutthu athowa vasulu, khukhwa, yamukumiheriwa mulattu mwaha wa mutthu ole okhwiye’. (Otumererya 22:8) Oxira osulu wa etarato waari wootthuneya mwaha wa okhapelela okumi, okhala wira imusi sa aYuda okathi wa khalai, saanirumeela etarato ya inupa saya ntoko opuro woopaka itthu sinci.

Ipa sinceene sa aIsarayeli vasulu vaya vaakhala vowaataleya. Okhala vasulu va empa, vaanaasivela atthu ale wira yooreke nsuwa, ovira epheyo ni ovara miteko sikina sa vate. Okathi wa elimwe atthu yanoona oreera orupa vataratoni-vo. (1 Samuweli 9:26) Alipa oolima yaanirumeela vasulu va empa wira yaaneyeke-vo ipyo saya, ntoko ifiigu ni uva.​—Yoxuwa 2:6.

Osulu wa etarato ya empa, waanirumeeliwa-tho wira akokhoreliweke Muluku, ekeekhai wala eethiru. (Nehemiya 8:16-18; Yeremiya 19:13) Murummwa Pedru aahiwela vasulu va etarato ya empa ohiyu okathi wa mweeri wira avekele. (Miteko 10:9-16) Akhala wira vate wala mpaani soosareya mihokorokho sa evidera, wala makhuku a korooro, nto vasulu va empa ti waakhala opuro wooloka okhala.

Eliivuru emosa eniihaniwa The Land and the Book enihimya wira inupa sa aIsarayeli saanikhalana ephiro wala exikata yaarowa vasulu va ‘empa’. Nto mutthu aaniwerya okhuruwa vataratoni va empa ohivinre muhina mwa empa. Nto ela ennooniherya nthowa naya Yesu aalavunle awe wira: ‘ale ari vaté [wala osulu wa enupa] ehikele mpani okuxa itthu saya’.​—Matheyo 24:17.

[Elatarato epaaxina 10]

Exiri yookhakiwa ya anakhotto ateexale miru sa awanani aya yaavariwe nto khiyarihela opuro onuukeliwa aya

[Masu a elatarato]

Erich Lessing/Art Resource, NY

[Elatarato epaaxina 10]