Nyuwo Munniluttuweliwa “Ovara Miteko Sorera”?
“Yesu Kristu . . . ahìvahererya mwaha wa hiyo, wira . . . anikhalihe nloko norerihiwa, nikhale awawe, niphavelexaka ovara miteko sorera”.—TITO 2:13, 14.
MWAAROWA OHIMYA SAI?
Xeeni munoona anyu okhala nttittimiho oluttuweliwa muteko woolaleerya?
Moota xeeni Daniyeli 2:41-45 onooniherya awe otthuneya waya oluttuweliwa miteko sooreera?
Mutthokiherye moota mweettelo ahu wooloka oniwiiriha aya atthu omukokhorela Yehova mwekeekhai.
1, 2. Eparakha xeeni yuulupale Anamoona a Yehova arina aya, nto nyuwo munoonela sai?
ANAMUNCEENE anoona okhala eparakha yuulupale otthuveliwa nuumala ovara muteko wowooneya vanci. Mwa ntakiheryo, akina aavahiwa ntthuvelo nle nuulupale nniihaniwa Prémio Nobel mwaha wa okumiherya murettele mooluttuweliwa eriyari ya maloko manli aniwana. Nto, nri nttittimiho nuulupale mutthu orummwa ni Muluku wira aakhaliherye atthu otthikela okhalana murettele ni Mpattuxa aya!
2 Hiyo anamoona a Yehova, nookhalana eparakha ela yuulupale. Muhina wa olamulela wa Muluku ni Kristu, hiyo ninnaavekela atthu “otthikela watàna ni Muluku”. (2 aKor. 5:20) Hiyo ninrumeeliwa ni Yehova wira niwataanihe atthu nuuwo. Ela ti etthu ewiirinhe atthu imilyau sinceene ilapo sowiiraka 235 okhaliheriwa wataana saana ni Muluku wira ekhalane nlipelelo na okumi woohimala. (Tito 2:11) Ni murima wotheene, hiyo ninnaalattula wira “ale amphavela màsi èkumi, evahiweke mahala”. (Wis. 22:17) Nthowa na othokorerya yoothanleliwa ela yootthuneya ni ovara moowiimananiha, hiyo moomalela ninrowa okhala atthu “aniphavelexa ovara miteko sorera”. (Tito 2:13, 14) Nto nrowe nithokorerye moota oluttuweliwa wahu ovara miteko sooreera onrowa aya onikhaliherya owataaniha atthu ni Yehova. Etthu emosa ori muteko ahu woolaleerya.
MUTAKIHEKE OLUTTUWELIWA WA YEHOVA NI WA YESU
3. Exeeni ‘[Yehova], mwanene ikuru’ onnilipiherya awe?
3 Olavulaka sa ele olamulelo wa mwaana a Muluku onrowa aya omaleliha, Yesaya 9:6 onihimya so: “Itthu iya sothene sintthuna wiriwa n’uphenta wa [Yehova], mwanene ikuru”. Masu ala anttittimiherya miteko sa Tiithi ahu a wiirimu ophavela wawe owoopola atthu. Ntakiheryo na Yehova na oluttuweliwa nnooniherya wira muteko Muluku onivanhe awe ntoko anamalaleerya, onivekela oluttuweliwa ni okhaliherya ni murima wotheene. Ophavela wahu wakhaliherya atthu omusuwela Muluku onooniherya oluttuweliwa wa Yehova. Ntoko anamuteko a Muluku, niireke noolakela wiirela mpantta moomalela olaleya ihapari sooreera akhala wira mikhalelo sahu sinnineemererya?—1 aKor. 3:9.
4. Yesu aavanhe sai ntakiheryo na oluttuweliwa muteko woolaleerya?
4 Muthokorerye-tho oluttuweliwa wa Yesu. Owo aahivaha ntakiheryo noomalela na oluttuweliwa muteko woolaleerya. Nnakhala okathi aalupatthiwa awe, owo aahivikaniha ovara muteko woolaleerya mooluttuweliwa mpakha wiiviwa wawe valaponi. (Yoh. 18:36, 37) Okathi waattamela aya okhwa wawe, yoolakela ya Yesu yoowakhaliherya atthu omusuwela Yehova yaanincerereya.
5. Yesu aakhanle sai moovarihana ni nlikanyiho nawe na mwiri wa ifiigu?
5 Mwa ntakiheryo, elimwe ya 32 E.C., Yesu aahihimya nlikanyiho na mulopwana aarina mwiri mmosa wa ifiigu yoowo wahiimiha mihokorokho iyaakha tthaaru. Nuumala oleeliwa wira uuhe mwiri ole, nto mulipa ookhapelela evidera, aahivekela wira alimele mwiri ole wira wuuttelane opuro ole. (Mmusome Luka 13:6-9.) Okathi ole, egrupu yaamukhaani paahi ya awiixutti, ti yaari sowiima sa muteko wa Yesu. Masi, ntoko sinihimya aya nlikanyiho nle na mulipa oolima evidera, Yesu aahirumeela okathi vakhaani waahanle, etthu yowiiraka myeeri 6 wira alipiherye muteko awe oYudeya ni oPereiya. Mahiku vakhaani ahinatthi okhwa, Yesu aahiwunlela aYuda akhwaawe a elapo emosa yaawo ‘yattiyela maru aya’ ehinaphavela wiiwa.—Math. 13:15; Luka 19:41.
6. Xeeni vanitthuneya ahu oluttuweliwa ni muteko ahu?
6 Okhala wira niri mahiku ookiserya, nto khahiyo vooloka wuncererya muteko ahu woolaleerya? (Mmusome Daniyeli 2:41-45.) Eparakha yuulupale okhala Namoona a Yehova! Hiyo paahi, ti niri atthu ari valaponi anilaleya nlipelelo na moota sinrowa aya omala-malihiwa mixankiho valaponi. Mutthu onimakela olepa myaha mujornaleni, mahiku ala oopaka nikoho noovila waakhuliwa nni: “Xeeni itthu sootakhala sinaakhumelela aya atthu ooloka?” Ori muteko ahu wa eKristau nave eparakha yuulupale owooniherya othene yaale aniphavela owiriyana moota Biibiliya onaakhula awe makoho. Vano aakhala tthiri mathowa anniiriha “oluttuweliwa [mmunepani]” vaavo ninvara ahu muteko orummwale ahu ni Muluku. (aRom. 12:11) Ni mareeliho a Muluku, oluttuweliwa wahu olaleerya onimwaakhaliherya akina omusuwela ni omphenta Yehova.
MUNEPA WA WIILEVA ONNIMUTTITTIMIHA YEHOVA
7, 8. Okhalana munepa wowiileva oninvuwiha sai Yehova?
7 Ntoko enoonihereya aya ni yowiiraneya ya murummwa Paulo, muteko ahu pooti “onojelihaka orupa” ni ‘ovoliwa etala’. (2 aKor. 6:5) Moolumo awo annooniherya saana ele eniwiiraneela atthu aniileva, ntoko mapioneero yaale aniivahererya vanci muteko woolaleerya yiikhaliheryaka mmensaya. Nkahaya nwuupuwele mamisionaario yaawo ‘ephome aya eniheliwa’ ntoko mukuttho vaavo aniivahererya aya orumeela ilapo sikina. (aFil. 2:17) Ankhi voohimya sa axitokweene ahu yaawo anivara muteko mowiilipiha, ehinakhalana okathi wa olya, wala orupa ephavelaka okhaliherya ipwittipwitthi sa Yehova? Nookhalana nave annihu owunnuwela, aniwereiwa, masi anivara eniwerya aya wira erowe omuthukumanoni ni olaleerya. Mirima sahu sinnixukhurela vaavo nniwuupuwela ahu arumeyi ala aniileva ovara muteko wa Muluku. Wiimananiha iwo, onnaakhaliherya akina okhalana moonelo wooloka ni muteko ahu.
8 Epaphelo emosa yaaroihiwe oLincolnshire Boston Target, Reino Unido, mulopwana onisoma iliivuru sahu ohikhanle Namoona onihimya so: “Atthu aapacerya oyeleela waamini waya . . . Itthu xeeni ahooleli awo a itiini animakela aya opaka? Awosa khanirowa ota ovaanelaka ni atthu ntoko Yesu siira awe wira akumane ni atthu. . . Etiini enivara miteko iyo, ti Anamoona a Yehova yaawo anirowa waalaleerya atthu ikeekhai”. Olumwenku ola wootakhala, wiiveleela wahu ni murima wotheene onninvuwiha Yehova Muluku.—aRom. 12:1.
9. Exeeni enrowa onikhaliherya ooluttuweliwa ni miteko sooreera mmuteko ahu woolaleerya?
9 Nto ninrowa opaka exeeni, akhala wira ninniyeleela oluttuweliwa wahu olaleerya? Enrowa onikhaliherya oweha moota Yehova onaakhwaniherya awe itthu orweela mwa muteko woolaleerya. (Mmusome aRoma 10:13-15.) Wira mutthu oopowe, ohaana oromolaka ni waamini nsina na Yehova; masi atthu awo khaniwerya opaka eyo ehilaleeriwe. Osuwela ela, enniniiriha oluttuweliwa ni miteko sooreera ni ovara saana muteko woolaleya ihapari sooreera sa Omwene.
MWEETTELO WOOLOKA ONNIWATAANIHA ATTHU NI MULUKU
10. Xeeni vanihimmwa aya wira mweettelo ahu wooloka onniwaataaniha atthu ni Yehova?
10 Okhala wira muteko ahu woolaleerya ohaana efaita, masi oluttuweliwa paahi khoniphiyerya mutthu wataana ni Muluku. Etthu ekina enihela muhina oluttuweliwa miteko sooreera, ori mweettelo wooloka wa muKristau yoowo oniwaataaniha atthu ni Muluku. Paulo aahittittimiherya efaita orina aya mweettelo ahu vaavo aalempe awe wira: ‘Nihiphavele omukwattuliha mutthu mwaha wetthu pitthu, wira muteko ahu ohinyemuliwe’. (2 aKor. 6:3) Olavula enamuna yooloka ni mweettelo wooloka, onnireeriha sowiixuttiha sa Muluku, wira niwiiriheke atthu akina omukokhorela Yehova. (Tito 2:10) Ekeekhai wira ikwaha sinceene ninniiwa nilavuliwaka saana mwaha wa mweettelo ahu wa eKristau.
11. Xeeni vanitthuneya aya othokorerya ni mavekelo mweettelo ahu?
11 Nnaamwi nisuwelaka wira miteko sahu pooti owiiriha atthu opaka sooloka, nave-tho okhalana mweettelo woohiloka onnihonona. Pooti niryeene omutekoni, owaani, ni oxikola, nto nihaana osyaka owiiriha atthu akina ohicalela muteko ahu woolaleerya. Akhala wira ninnipaka etampi moolakelela, anooniphwanya maxakha maalupale. (aHéb. 10: 26, 27) Nto wuupuwela eyo, enooniiriha othokorerya ni mavekelo etthu enipaka ahu, ni ele mweettelo ahu oniwooniherya aya akina. Vaavo makhalelo a elapo ela anitepa aya ohiloka, atthu ooloka anrowa otepaka woona ovirikana wa ‘ale animurumela Muluku ni ale ahinimurumela’. (Mal. 3:18) Tthiri mweettelo ahu wooloka onnivara muteko wira niwaataanihe atthu ni Muluku.
12-14. Moota xeeni ovilela wahu soweeha onaakhaliherya aya akina othokorerya muteko ahu woolaleerya? Nvahe ntakiheryo.
12 Aalepelaka maKristau oKorinto Paulo aahihimya wira yaahimphwanya maxakha ntoko, mixankiho, omaniwa ni otthukweliwa. (Mmusome 2 aKorinto 6:4, 5.) Okathi nroromelo nahu nneehereriwa aya, ovilela wahu onimwaakhaliherya akina weemererya ekeekhai. Moone ntakiheryo nna: Iyaakha soovira, aakhala atthu yaaphavela waamalamaliha Anamoona a Yehova muttetthe mmosa wAngola. Anamoona anli oobatiziwa ni atthu 30 yaamusoma Biibiliya yaarowa omuthukumanoni, yaahivariwa. Nto, atthu a muttetthe ole, yaanithukumana enaaweha anna ale yahaatthenke etthu emaniwaka ni anyokhani mpakha okhuma ephome. Hata anamwane ni athiyana khiyooneliwe othunku. Awosa yaaphavela owoopopiha atthu wira ahikhale mutthu oniweemererya Anamoona a Yehova yaalaleeryaka. Masi nuumala omaniwa yooniwaka, anamunceene a muttetthe ole yaahaavekela Anamoona Yehova yoosoma ya Biibiliya! Nuumala-vo, muteko wa Olaleiwa Omwene waahivikaniha, ni wookumiherya mareeliho manceene.
13 Ntakiheryo nla nnooniherya wira ovilela ni olipiherya wahu sooruma sa Biibiliya, onnaakhaliherya akina. Hiyo pooti wiikohaka moota atthu akina yaatthikenle aya wataana ni Muluku mwaha wa olipa murima wa Pedru ni atthareli akina. (Mit. 5:17-29) Nto hiyo, ni ale aneettana ahu oxikola, anivarana ahu muteko, wala amusi ahu pooti weemererya ekeekhai vaavo anniweha aya nivarexexaka ekeekhai.
14 Khula okathi, anna akina annilupatthiwa. Mwa ntakiheryo, wArmênia anna oowiiraka 40, aatthukweliwa mwaha wa ohiirela mpantta myaha sa epoliitika, ni waaniheryasa anna akina anivikana 10 anrowa otthukweliwa myeeri sinrwa. WEritreia, arumeyi a Yehova oowiiraka 55, aatthukweliwa akina anivikana iyaakha 60. OKoreia do Sul, etthu yoowiraka Anamoona 700 aatthukweliwa mwaha wa waamini waya. Vano soovira iyaakha 60 siiraneyaka mixankiho iya, nto etthu yowiiraka anna 5 ahookhwa mwaha wa ohaaxiwa okhuma iyaakha sa 1970 ni sa 1980. Nivikaniheke ovekela wira axinnihu oororomeleya anilupatthiwa ilapo sinceene, anvuwiheke Muluku ni waakhaliherya ale aniphenta exariya weemya okokhorela wekeekhai.—Esal. 76:9-11.
15. Nvahe ntakiheryo moota mweettelo ahu woororomeleya oniwiiriha aya akina otthara ekeekhai.
15 Nave okhalana mweettelo woororomeleya onniwiiriha akina weettela ekeekhai. (Mmusome 2 aKorinto 6:4, 7.) Mwa ntakiheryo, muthokorerye yowiiraneya ela: Murokora mmosa, iira ahelaka musurukhu mukaaxani ya ebilyeti yooliverya karera vaavo mpatthani awe, aahimyale awe wira khivaatthuneya oliva ebilyeti okhala wira owo aarowa okhuruwa vakhiviru. Murokora ole aahitthokiherya wira ti vooloka oliva ebilyeti pooti ekwaha ehirakamme. Nuumala-vo mwaapara awe ola aahikhuruwa. Okathi owo, mulipa oomweettiha karera aahimukoha murokora ola wira: “Nyuwo mwa Namoona a Yehova?” Murokora aahaakhula wira: “Aayo, xeeni munkoha anyu siiso?” “Kanwiiwani nvaanelaka voohimya sa oliva ebilyeti, nto koosuwela wira Anamoona a Yehova paahi, tari oororomeleya wa itthu sotheene”. Nuuvira myeeri vakhaani mulopwana mmosa aahimwaattamela omuthukumanoni onamukoha wira: “Munnikisuwela? Tiyoomi kaamweettiha karera yoole aalavula anyu voohimya sa oliva ebilyeti. Oweha mweettelo anyu wookiiriha ophavela omusoma Biibiliya ni Anamoona a Yehova”. Tthiri mweettelo ahu wa ororomeleya onniniiriha okhala anamuteko a Muluku oororomeleya.
KHULA OKATHI MOONIHERYEKE MIKHALELO SININVUWIHA MULUKU
16. Nthowa xeeni mikhalelo ntoko opixa murima, ophenta, ni oreera murima onivara aya mirima sa atthu? Nvahe ntakiheryo.
16 Ninniwiiriha-tho atthu wataana ni Yehova mwaha wa wooniherya wahu mikhalelo ntoko, opixa murima, ophenta, ni oreera murima. Ale anniweha pooti ophavela omusuwela Yehova ni osuwela yoolakela awe ni atthu awe. Mweettelo ni mukhalelo wa maKristau ekeekhai, onnivirikana vanceene ni atthu yaale aniipaka omwaamini Muluku masi eriki moothererya paahi. Itiini sikina ahooleli aya aathaaciri mwaha wa owiiyerya musurukhu atthu a mukereja ni enarumeela musurukhu munceene wira ethumeke itthu siniphavela aya ntoko ipa, ikaaro ni mihakhu sikina, ni empa emosa ya alapwa erina ar-condicionado. Nto anamunceene yaale anoothererya okhala aKristu, khanwerya ‘ovaha mahala’. (Math. 10:8) Ntoko alipa a mukuttho a wIsarayeli a khalai, awo ‘aniwixuttiha atthu yakhelaka miyavulo’; masi itthu aniixuttiha aya khahiyo sa mBiibiliyani. (Mik. 3:11) Mweettelo owo woohiloka khoniwaataaniha atthu ni Muluku.
17, 18. (a) Okhalana mikhalelo sa Yehova mookumini mwahu oninvuwiha sai Muluku? (b) Exeeni eniwiirihani ovikaniha ovara miteko sooreera?
17 Mwa enamuna ekina, mirima sinnivariwa ni sowiixuttiha sa maKristau ekeekhai ni miteko sooloka siniwiirela ahu anamwaattamananiihu. Mwa ntakiheryo, okathi aalaleerya awe empa ni empa, pioneero mmosa aahoomoliwa mowaakuveya ni naamukhweli mmosa oowuuluvala. Naamukhweli owo onihimya wira okathi pioneero aamanne awe mukhora, owo iira amuturukaka lampada okozinya. Nto munna pioneero ole aahilavula wira: “Etthu yowoopiha nyuwo ovarakasa mekhinyu energia”. Nuumala-vo, pioneero owo aahimuturuka lampada anarowa. Okathi mwaana mwammiravo a naamukhweli ole aarwaale awe khisuwela etthu yiiraneyale, owo aahitikiniheya ni osiveliwa nto anaphavela okumana ni munna owo wira amuxukhurele. Nto mmiravo ole aaheemya omusoma Biibiliya.
18 Xeeni muniphavela anyu ovikaniha ovara miteko sooreera? Waaniheryasa mwaha woowi moosuwela wira okathi oniluttuweliwa ahu muteko ahu, ni ovara itthu moovarihana ni yootthuna ya Muluku, ninnimuttittimiha Yehova ni waakhaliherya akina ophwanya woopowa. (Mmusome 1 aKorinto 10:31-33.) Oluttuweliwa miteko sooreera ntoko olaleya ihapari sooreera ni weettela ekeekhai onniniiriha omphenta ni murima wotheene Yehova ni atthu akhwiihu. (Math. 22:37-39) Akhala wira ninniluttuweliwa miteko sooloka ninrowa otthuveliwa vanceene ni ohakalala vano. Nto, niwehereryeke okathi apinaatamu otheene anrowa aya oluttuweliwaka okokhorela wekeekhai ni onvuwiha Mpattuxa ahu, Yehova.
[Elatarato epaaxina 8]
[Elatarato epaaxina 10]
Orowa wanyu mmuteko woolaleerya onnaavaha onamoona akina anoowehani
[Elatarato epaaxina 12]
Ororomeleya wanyu ni wiilipiha ovara muteko onniwehiwa ni atthu akina