Nwehereryeke Omwene ni Nroromelo Noolipa
“Wamini ti enamuna y’okhalana itthu sinlipelelahu”.—AHÉ. 11:1.
MUULUULE MURUMEELAKA EKAAXA ENI “MOOTA MULUKU ONROWA AWE WAAKHWANIHERYA YOOLAKELA AWE” YA . . .
Nivarihano naapakiwe wEedeni.
Mataana wa Muluku ni Abrahamu ni Davidi.
Wataana wa orowa okhala mulipa a mukuttho mwa enamuna ya Melikhisedeki.
1, 2. Exeeni enrowa olipiha ororomela wahu wira Omwene onrowa waakhwaniherya yoolakela ya Muluku wa apinaatamu, ni nthowa xeeni? (Nwehe elatarato yoopacerya.)
HIYO nikhanle Anamoona a Yehova, nimmakela ohimya wira Omwene wa Muluku tekhanle enamuna emosa paahi ya omaliha mixankiho sahu sotheene, ni hiyo ninnaatumererya atthu anceene wira yaaminiki ekeekhai ela yuulupale ya mBiibiliyani. Ni hiyo ninnoona okhala yoomaaliha yuulupale osuwela wira Omwene owo onimoorwa. Nto niireke mookhalana nroromelo noolipa wira Omwene onoomaleliherya sotheene sileihenrye awe? Exeeni ekhanle oonikhaliherya okhalana nroromelo noolipa voohimya sa Omwene?—aHé. 11:1.
2 Omwene wa oMesiya mulokiheryo mmosa otikitheriwe ni Muluku Oowerya Sotheene wira waakhwaniherye yoolakela awe wa soopattuxiwa sawe. Omwene tori mathipelo a nroromelo noolipa noowi Yehova ookhalana ehakhi yoomalela ya olamulela. Vano ti pani ori mwene a Omwene owo? Niireke owo onrowa olamulelaka mekhawe? Onrowa waalamulelaka apani ni woowi? Yehova onnooniherya waakhuliwa wa makoho awo orumeelaka mavarihano wala wataana wa Omwene. Mavarihano awo wala wiiwanana iwo, waapakiwe ni Yehova wala Mwanawe, Yesu Kristu. Othokorerya inamuna iyo sa wataana iwo onrowa onikhaliherya wiiwexexa moota yoolakela ya Muluku enrowa aya wiiraneya ni onrowa onikhaliherya woona wira marehereryo awo toororomeleya.—Mmusome aÉfeso 2:12.
3. Ninrowa othokorerya exeeni muru ola ni muru onittharelana?
3 Biibiliya onniromola inamuna 6 suulupale sa wataana, seiyo sinivarihana ni Omwene wa Mesiya yoowo ovahereriwe Yesu Kristu. Inamuna iyo tiiya (1) nivarihano na Abrahamu, (2) Nlamulo na wataana, (3) nivarihano na Davidi, (4) nivarihano na orowa okhala alipa a mukuttho mwa enamuna ya Melikhisedeki, (5) wataana wa naanano, ni (6) wataana wa Omwene. Vano nrowe nithokorerye moota khula wataana onivarihana aya ni yoolakela ya Muluku voohimya sa elapo ni apinaatamu.—Nwehe ekaaxa eni “Moota Muluku Onrowa Awe Waakhwaniherya Yoolakela Awe”.
YOLEIHERYA YEEYO ENOONIHERYA MOOTA YOOLAKELA YA MULUKU ENIROWA AYA WAAKHWANELA
4. Moovarihana ni eliivuru ya Maphattuwelo, exeeni Yehova aahimmye awe wa apinaatamu?
4 Nuumala olokiherya elapo ela yooreera wira ekhaliweke ni apinaatamu, Yehova aahihimya itthu iya tthaaru: Muluku ahu aahaapaka apinaatamu ailattanihaka, apinaatamu yaahaana wunnuuherya mikano sa eParayiisu ni waayara anamwane mpakha osareya elapo ela, ni apinaatamu yaahikhoottiheriwa olya mwiri waasuweliha yooloka ni yoohiloka. (Maph. 1:26, 28; 2:16, 17) Moolumo awo yaari oomalela ni khiivo etthu ekina yaatthuneya. Nuumala opattuxiwa pinaatamu, waatthuneya paahi ottharihela soohimmwa iye piili saahanle wira yaakhwaneleke yootthuna ya Muluku. Nto xeeni vaatthuneya aya opakiwa mavarihano ala?
5, 6. (a) Moota xeeni Satana aamananinhe awe opahula yoolakela ya Muluku? (b) Yehova aakhunle sai ovaanyihiwa wawe wEedeni?
5 Mwa enamuna yootakhala, Satana aaheererya opahula yoolakela ya Muluku khaatumereryaka apinaatamu ommwareela. Owo aapanke eyo opahulaka nlamulo nenne naavekela wira apinaatamu yiiweleleke. Owo aahimweehererya muthiyana oopacerya, Eva, wira ohiiwelele nlamulo naakhoottiha olyiwa mwiri waasuweliha yooloka ni yootakhala. (Maph. 3:1-5; Wis. 12:9) Mwa enamuna eyo, Satana aahivaanyiha ehakhi ya olamulela wa Muluku wa soopattuxiwa sawe. Muhoolo mwaya, Satana aahiwootherya arumeyi oororomeleya a Muluku wira yaamurumeela mwaha wa mireerelo saavaha awe.—Yobi 1:9-11; 2:4, 5.
6 Yehova aakhunle sai ovaanyihiwa wawe ni Satana wEedeni? Waapwetexa anammwareya ale, tthiri wammaliha omwareya iwe. Masi eyo yaarowa wooniherya-tho wira yoolakela ya Muluku yoowi elapo ela yaarowa osareiwa ni osuulu woowiiwananeya wa Adamu ni Eva khiyaarowa waakhwanela. Ohiya owiivakasa anammwareya okathi ene yoole, Mpattuxa ahu a ankhili aakhunle okumiheryaka eprofesia emosa yuulupale, eyo piiyo, Nivarihano na wEedeni wira khula etthu yaaleihenrya awe yaamwiiraneya.—Musome Maphattuwelo 3:15.
7. Nlipiheryo xeeni ninvahiwa ahu ni nivarihano naapakiwe wEedeni voohimya sa enowa ni osuulu aya?
7 Orumeelaka nivarihano na wEedeni, Yehova aahilaleya ophukeliwa wa enowa ni osuulu aya, yeeyo enitaphulela Satana Diabo ni atthu otheene yaale yaarowa weemererya omukhaliherya ovaanyiha ehakhi ya olamulelo wa Muluku. Muluku a ekeekhai aahivahererya osuulu wa muthiyana a wiirimu, owerya wa ompwetexa Satana. Tthiri nivarihano na wEedeni nahittittimiherya itthu piili: ele yaarowa omwiiranela mulipa aakumihenrye omwareeliwa Muluku ni itthu sotheene soohiloka saakhumelenle mwaha wa omwareya iwo; ni omusuwanyeiha ole aarowa ompwetexa Satana.
8. Onisuwanyeihiwa sai muthiyana ni osuulu awe?
8 Ti pani onrowa okhala osuulu wa muthiyana? Okhala wira vanihimmwa wira osuulu owo onrowa onyakatta muru wa enowa, eyo piiyo, “opwetexa” yoopattuxiwa yoomunepani Satana Diabo, nto osuulu ola waahaana okhala-tho mutthu oomunepani. (aHéb. 2:14) Nave muthiyana onrowa oyara osuulu owo ohaana okhalana makhalelo oomunepani. Nnaamwi osuulu wa enowa waamwarenle mulaponi motheene, saahivira iyaakha sinaattamela 4.000 nuumala Yehova opaka nivarihano na wEedeni, nlelo ohisuweliwaka muthiyana ole. Mwa okathi aya, Yehova aahipaka mavarihano manceene yaawo anisuwanyeiha osuulu wa muthiyana ni waaroromeliha arumeyi awe wira Muluku aarowa ovarihela muteko osuulu owo, wira omalamalihe ehasara ekumiheriwe ni Satana wa emusi yotheene ya apinaatamu.
NIVARIHANO NINSUWANYEIHA OSUULU WA ABRAHAMU
9. Exeeni ekhanle nivarihano na Abrahamu ni nipacenrye silini ovara muteko aya?
9 Nuuvira iyaakha ikonto piili nuumala Yehova ompwapwela Satana, owo aahimuruma muhavinre Abrahamu wira othaame elapo awe ya Uri oMesopotamia orowaka elapo ya oKanani. (Mit. 7:2, 3) Yehova aamuhimeryale so: “Mukhume mulaponi mwanyu, mwahiye amusi anyu n’itthoko y’atith’inyu, muthamele elapo enrowaka wothonyeryani. Miyo kinimokhalihani nloko nulupale, kinimorerihani, kinimwinnuwiha nsina nanyu. Atthu anoreriwa mwaha wa nyuwo. Miyo kinimwareriha ale anrowa worerihani, kinimwatakhaliha ale anrowa wotakhalihani. Maloko othene a mulaponi anrowa orerihiwa mwaha wa nyuwo”. (Maph. 12:1-3) Nno waari oromoliwa woopacerya wa Nivarihano na Abrahamu, eyo piiyo, nivarihano Yehova aapanke awe ni Abrahamu. Khonisuwelexiwa okathi ene Yehova aapanke awe nivarihano nla ni Abrahamu. Masi ninnisuwela wira nivarihano nle naapacenrye ovara muteko aya mwaakha wa 1943 AEC, okathi Abrahamu aarina awe iyaakha 75, aakhumale awe muttetthe wa oHarani khulapuwa Muro Eufrate.
10. (a) Moota xeeni Abrahamu oonihenrye awe okhalana nroromelo noolipa voohimya sa sooleiherya sa Muluku? (b) Itthu xeeni Yehova saahimmye awe wira osuwanyeihe osuulu wa muthiyana?
10 Yehova aahitthikela omuhimeerya Abrahamu nivarihano nla ikwaha sinceene, khula ekwaha ohimyaka itthu saiwanyeiha oratteene. (Maph. 13:15-17; 17:1-8, 16) Nto nuumala Abrahamu wooniherya ororomela wawe woolipa yooleiherya ele ya Muluku, okathi aakhulenle awe ompaka mukuttho mwanawe mmosa ene, Yehova aahimulipiherya wira khaarowa wooceela waakhwaniherya khula etthu yaaleihenrye awe. (Musome Maphattuwelo 22:15-18; aHéberi 11:17, 18.) Nuumala nivarihano na Abrahamu opacerya ovara muteko aya, Yehova aahipacerya ohimya itthu kamosa-kamosa saarowa osuwanyeiha osuulu wa muthiyana. Osuulu ole waarowa oyariwa ni anamwane a Abrahamu, waarowa okhala wowaatta, waarowa ovahiwa omwene, waarowa waapwetexa anyokhani aya otheene ni waarowa okhala mareeliho wa maloko otheene a valaponi.
11, 12. Moota xeeni Biibiliya onooniherya awe wira nivarihano na Abrahamu nookhalana waakhwanela waya wuulupale, ni eyo enitaphulela exeeni wa hiyo?
11 Nnaamwi nivarihano na Abrahamu naakhwanenle mwa enamuna yowooneya, okathi yoole osuulu awe Abrahamu waakhenle aya Elapo Yooleiheriwa, Biibiliya aahooniherya-tho wira nivarihano nle naahikhalana waakhwanela waya wa omunepani. (aGal. 4:22-25) Waakhwanela nno wuulupale wa nivarihano nla, murummwa Paulo aahuupuxeriwa ni Muluku khuhimya wira mpantta woopacerya wa osuulu owo wa Abrahamu ti Kristu ni mpantta wa nenli anihimmwa a 144.000, yaawo ari maKristau oowoottihiwa ni munepa wootteela. (aGal. 3:16, 29; Wis. 5:9, 10; 14:1, 4) Nto muthiyana aarowa okumiherya osuulu owo ti “Yerusalemu a wirimu”, eyo piiyo, mpantta wa wiirimu wa nikhuuru na Muluku nenno nniirela aya mpantta soopattuxiwa soororomeleya sa omunepani. (aGal. 4:26, 31) Ntoko saaleiheriwe awe Abrahamu, osuulu ole, niire so: anamwane ale a muthiyana yaarowa waaruuhela mareeliho apinaatamu otheene.
12 Nivarihano na Abrahamu naamuhimya Mwene ni ale yaarowa awe olamulelaka hoothe Momweneni wa Muluku ni awo tari mathipelo a Omwene wa wiirimu. (aHé. 6:13-18) Nivarihano nle naarowa ovara muteko mpakha lini? Maphattuwelo 17:7, onihimya wira “watàna nno onrowa okhala watàna wohimala”. Eyo enooniherya wira wataana nno onrowa ovaraka muteko mpakha Omwene wa Mesiya waapwetexa anyokhani otheene a Muluku ni oreeliha maloko otheene a atthu ari valaponi. (1 aKor. 15:23-26) Nto ale anrowa wiiraka akhalaka valaponi okathi owo, anrowa ophwanya mareeliho oohimala a inamuna soovirikana. Tthiri nivarihano na Abrahamu ninnooniherya wira Yehova ori oolikanela waakhwaniherya yoolakela awe ya wira elapo yotheene ‘esareye’ apinaatamu owiiwelela!—Maph. 1:28.
NIVARIHANO NENNO NNOONIHERYA WIRA OMWENE OWO WAAROWA OKHALA WOOHIMALA
13, 14. Moota xeeni nivarihano na Davidi nryaaya nlipiheryo na olamulelo wa Mesiya?
13 Nivarihano na wEedeni ni nivarihano na Abrahamu, aaniiwanyeiha eponto yuulupale yoowi olamulelo wa Yehova yoowo onilamuleliwa ni Omwene wa Mesiya onnittharihela malamulo a exariya a Muluku. (Esal. 89:15) Niireke vanniweryaneya olamulelo wa Mesiya opahuliwa wala opwetexiwa? Eyo etthu emosa enittittimiheriwa ni nivarihano nikina na omwene wira khenrowa wiiraneya.
14 Vano nrowe nithokorerye ele Yehova aamuleihenrye awe mwene Davidi a wIsarayeli a khalai okathi waapanke awe Nivarihano na Davidi. (Mmusome 2 Samuweli 7:12, 16.) Yehova aapanke nivarihano nla ni Davidi okathi yoole Davidi aalamulela awe oYerusalemu, omuleiheryaka wira Mesiya aarowa okhala mutthu a nloko nawe. (Luka 1:30-33) Tthiri, Yehova aahiiwanyeiha oratteene voohimya sa ole aarowa okhala osuulu ni aahihimya wira mutthu a nloko na Davidi taarowa okhalana ‘ehakhi’ ya okilaathela ehice ya Omwene wa Mesiya. (Ezek. 21:25-27, Tradução do Novo Mundo) Orweela mwa Yesu, olamulelo wa Davidi “onrowa otikitheriwa voohimala”. Tthiri, osuulu wa Davidi ‘onimwettiha omwene vohimala-tho, omwene awe onolekela ntoko nsuwa’. (Esal. 89:35-38) Olamulelo wa Mesiya khonirowa opwetexiwa ni khula etthu enrowa awe opaka enrowa okhala yoohimala!
NIVARIHANO NNAAKHWANIHERYA OTTHUNEYA WA ANAMUKUTTHO
15-17. Ntoko sinooniherya aya nivarihano na onamukuttho mwa enamuna ya Melikhisedeki, muteko xeeni mukina anivahiwa aya ale anrowa olamulelaka Momweneni, ni nthowa xeeni?
15 Nnaamwi nivarihano na Abrahamu ni na Davidi, nilipiheryaka wira osuulu wa muthiyana onrowa okhala mwene, emwene paahi kheniwerya okumiherya mareeliho wa atthu a maloko otheene. Wira awerye waakhela mareeliho, atthu a maloko anitthuneya woopoliwa makhalelo aya ntoko anamattheka wira awerye okela mweemusini yuulupale ya Yehova. Nto wira owerye waakhwaniherya eyo, osuulu ole onivekeliwa-tho okhala anamukuttho. Mpattuxa ahu a ankhili ookumiherya nivarihano nikina, eyo piiyo, nivarihano na onamukuttho mwa enamuna ya Melikhisedeki.
16 Yehova mwaneene aahimuhimeerya Davidi wira aarowa opaka nivarihano ni Yesu, nenlo naarowa okhalana soolakela piili: omukilaathiha ‘mono wolopwana wa Muluku’, mpakha waaxintta awanani awe ni okhala “mulipa a mukuttho wa mahiku othene, enamuna y’onamukuttho wa Melikhisedeki”. (Musome Esalimo 110:1, 2, 4.) Xeeni ohimmwaka wira mwa “enamuna y’onamukuttho wa Melikisedeki”? Okhala wira khalai osuulu wa Abrahamu ohinatthi okela Elapo Yooleiheriwa, Melikisedeki, mwene oSalemi aahikhala “mulipa a mukuttho a Muluku Mulupalexa”. (aHé. 7:1-3) Owo aathanliwe ni Yehova mwaneene wira avareke muteko ole. Owo ti mutthu mmosa paahi oniromoliwa ni Soolempwa sa eHeeberi aatonko ovara miteko soomiili, emwene ni onamukuttho. Nto okhala wira khaatonko okhala mutthu mukina ottuli wala ohoolo wawe, tivonto vanihimmwa awe okhala “mulipa a mukuttho a mahiku othene” wala ohinimala.
17 Yesu nave oothanliwa ni Muluku wira okhale namukuttho, mwaha wa nivarihano Yehova aapanke awe ni yena, ni owo onrowa okhala “mulipa a mukuttho a mahiku othene, enamuna y’onamukuttho wa Melikhisedeki”. (aHé. 5:4-6) Eyo enninikhaliherya woona wira Yehova oolakela oruma Omwene wa Mesiya wira aakhwaniherye yoolakela awe yoopacerya wa apinaatamu ni elapo.
MAVARIHANO AKUMIHENRYE IPACERERYO SOOLOKA SA OMWENE
18, 19. (a) Mavarihano athokorenrye ahu anooniherya exeeni voohimya sa Omwene? (b) Nikoho xeeni ninreerela waakhuliwa nlelo?
18 Ntoko soonale ahu mavarihano athokorenrye ahu, hiyo nihoona moota awo anivarihana aya ni Omwene wa Mesiya ni moota marehereryo a Omwene anivarihana aya ni anatiri awo. Nivarihano na wEedeni noomwiiriha Yehova ophavela waakhwaniherya yoolakela awe ya elapo ela ni apinaatamu orumeelaka osuulu wa muthiyana. Nto ti pani aarowa okhala osuulu owo, ni muteko xeeni waarowa aya ovara? Nivarihano na Abrahamu ninniiwanyeiha oratteene mwaha ola.
19 Nivarihano na Davidi ninniiwanyeiha mookhweya emusi ya ole aarowa okhala mpantta woopacerya wa osuulu ole; ni yoowo aarowa ovahiwa ehakhi ya olamulela elapo yotheene ni wira khula etthu enrowa opakiwa ni Omwene owo enrowa okhala yoohimala. Nivarihano na onamukuttho mwa enamuna ya Melikhisedeki takhanle mapacereryo anrowa wiiriha osuulu ovara muteko wa onamukuttho. Tthiri Yesu khonirowa ovara mekhawe muteko wa waattikiherya apinaatamu okhala oomalela oloka. Aakhala atthu akina oowoottihiwa anrowa orumeela nave ntoko mamwene ni anamukuttho. Atthu awo anrowa okhuma vai? Eyo enrowa otthokiheriwa muru onittharelana.
[Ekaaxa epaaxina 12]
MOOTA MULUKU ONROWA AWE WAAKHWANIHERYA YOOLAKELA AWE
Nivarihano na wEedeni ninnooniherya wira Omwene ti ekaruma yuulupale Muluku enirumeela awe wira aakhwaniherye yoolakela awe yoopacerya ya waasarya atthu valaponi. Vathi-vo aakhala mavarihano 6 anooniherya moota yoolakela ya Muluku enaakhwanela aya:
NIVARIHANO NA ABRAHAMU
WATAANA WA: Yehova ni Abrahamu
YOOLAKELA AYA: Eyo ennikumiherya enamuna yoweemereriwa ya “osuulu” wa “muthiyana” onihimmwa va Maphattuwelo 3:15 wira olamuleleke Momweneni
NLAMULO NA WATAANA
WATAANA WA: Yehova ni Isarayeli a khalai
YOOLAKELA AYA: Waakiherya “osuulu” ni oweettiha apinaatamu mpakha okathi wa Mesiya
NIVARIHANO NA DAVIDI
WATAANA WA: Yehova ni Davidi
YOOLAKELA AYA: Wooniherya wira Omwene wa Mesiya waarowa okhumelela munlokoni na Davidi ni wira ele enrowa awe okumiherya enrowa okhala yoohimala
NIVARIHANO NA OKHALA NAMUKUTTHO MWA ENAMUNA YA MELIKHISEDEKI
WATAANA WA: Yehova ni Yesu
YOOLAKELA AYA: Omphwanyiha ehakhi Yesu yoowo ori mpantta woopacerya a “osuulu” wa muthiyana onrowa okhala mwene ni namukuttho
WATAANA WA NAANANO
WATAANA WA: Yehova ni Isarayeli omunepani
YOOLAKELA AYA: Eyo ennikumiherya marehereryo a maKristau 144.000 okhalihiwa aana a Muluku ni okhala mpantta wa nenli wa “osuulu”
WATAANA WA OMWENE
WATAANA WA: Yesu ni Isarayeli omunepani
YOOLAKELA AYA: Eyo enniweemererya maKristau oowoottihiwa orowa okhala vamosa ni Yesu, wira yakhale mamwene ni anamukuttho wiirimu