MWAHA WA VAKAAPANI | NIIREKE ENOOKHALA EGUVERNU YOOROROMELEYA?

OMWENE WA MULUKU TI EGUVERNU YOOROROMELEYA

Mukhulupale oniwehaweha musurukhu wa elapo ya oNicaragua aahimyale so: “Anamuteko a guvernu anoolikana ni atthu akina. Akhala wira atthu annaavaha makhwankwa, nto anamuteko awo annikhala oohiroromeleya”. Mukhulupale owo aahilavula moolumo awo ophavelaka otthokiherya nthowa naya onuupuwela awe wira iguvernu khisinwerya omaliha makhwankwa.

Nto akhala wira atthu toohiroromeleya, khamunikupali wira iguvernu sotheene ti soohiroromeleya? Nto eguvernu yoororomeleya ehaana okhuma wiirimu. Biibiliya onihimya wira eguvernu eyo ti Omwene wa Muluku, yoowo Yesu aawiixuttihe awe atthareli awe ovekela.​—Matheyo 6:9, 10.

Omwene wa Muluku ti eguvernu enilamulela wiirimu. Eyo enoopwetexa iguvernu sotheene. (Esalimo 2:8, 9; Wisupulula 16:14; 19:19-21) Omwene owo onoomaliha makhwankwa ni onookumiherya mareeliho manceene. Moone itthu 6 sinooniherya wira Omwene onoopaka eyo.

1. OWERYA

MUXANKIHO: Iguvernu sa apinaatamu sinikhaliheriwa ni atthu, yaawo aniliva mipoosito ni itthu sikina. Nto musurukhu oniphwanyiwa, onniwiiriha anamuteko a guvernu ophavela wiiya. Akina annivahiwa makhwankwa ni atthu aniphavela ovukuliwa musurukhu waakhanle aya oomuliva guvernu. Wira guvernu oliverye opweteiwa iwo, onnincererya musurukhu wa mpoosito, nto eyo ennitepiha muxankiho ola. Nto olumwenku ntoko owo, atthu oororomeleya annihaawa.

ELE ENROWA OMALIHA: Owerya wa Omwene wa Muluku onikhuma wa Yehova, Muluku oowerya-sotheene.a (Wisupulula 11:15) Omwene ola khonlipa ni mpoosito wa atthu. Masi, ‘owerya wulupale’ wa Muluku ni ovaha wawe ni murima wotheene, onnilipiherya wira Omwene onimwaavaha atthu aniiwelela itthu sotheene sootthuneya.​—Yesaya 40:26; Esalimo 145:16.

2. NAMALAMULELA

MUXANKIHO: Susan Rose-Ackerman, oromoliwe wanipacerya, onihimya wira muxankiho wa waakhela makhwankwa “ohaana okhala woopacerya omalihiwa”. Iguvernu sinniyeleela owerya waya vaavo sinimananiha aya omaliha muxankiho ola eriyari ya mapoliisia ni mafiskaali, maana mweettelo owo onniphwanyaneya eriyari ya makhulupale. Nave, hata namalamulela orina mweettelo wooloka, oorava ohimalela. Ntoko Biibiliya onihimya awe, “mulaponi khavo onìra sa xariya mahiku othene, ahiweryaka ovonya”.​—Musuweli 7:20.

ELE ENROWA OMALIHA: Moovirikana ni apinaatamu oohimalela, Yesu Kristu, yoowo othanliwe ni Muluku wira okhale Mwene, toororomeleya. Owo aahooniherya eyo vaavo aakhoottale awe makhwankwa maalupale yaarowa awe ovahiwa. Diabo aahimuleiherya onvaha “omwene wothene wa mulaponi n’uvuwa waya”, akhala wira ammukokhorela. (Matheyo 4:8-10; Yohani 14:30) Hata okathi Yesu aakhomeliwa awe vamwirini, aahikhala oororomeleya. Tivonto, aahikhootta murette woohapala waakhanle oovukula owereya aarina awe, masi-tho waarowa omwiiriha ohuupuwela saana. (Matheyo 27:34) Vano ori awe wiirimu, Yesu ohooniherya wira onniphwanela okhala Mwene a Omwene.​—aFilipi 2:8-11.

3. OROROMELEYA

MUXANKIHO: Ilapo sinceene onnipakiwa mwaathanle oniwiiriha atthu waarantteliha anamalamulela oohiroromeleya. Masi, ikampaanya ni mwaathanle ti soosareya makhwankwa, hata ilapo soothaaciri. Mutthu oothaaciri onoowerya ovaha musurukhu ni itthu sikina sinikhaliherya ikampaanya, ophavelaka ovara murima wa ole onilamulela wala ole onrowa olamulela.

Mukhulupale a Etribunaali Supremo ya EUA John Paul Stevens, olempe wira othaaciri iwo pooti ohonona “ororomeleya ni makhalelo a eguvernu eyo, ni owiiriha atthu ohiroromela eguvernu eyo”. Ti maana aya atthu anceene anoona aya wira ipartido ti ipantte sootepexa ohiroromeleya molumwenkuni.

ELE ENROWA OMALIHA: Omwene wa Muluku ti woororomeleya ni ta mahiku otheene, nto owo khonootha. (Daniyeli 7:13, 14) Okhala wira Mwene aya othanliwe ni Muluku, nto Omwene ola khonithanliwa wala okumihiwa ni atthu. Eyo enooniherya wira itthu sinrowa opakiwa ni Omwene wa Muluku, sinrowa waaphwanyiha mureerelo atthu aniiwelela.

4. MALAMULO

MUXANKIHO: Nyuwo pooti wuupuwela wira okumiherya malamulo masya pooti olokiherya itthu. Masi, asuweli anihimya wira wuncererya malamulo onootepiha owiiriha atthu okhala oohiroromeleya. Nave-tho, malamulo anivukula makhwankwa, ikwaha sinceene annivila weettela ni khanikhumela saana.

ELE ENROWA OMALIHA: Malamulo a Omwene wa Muluku annivirikana vanceene ni ale a iguvernu sa apinaatamu. Mwa ntakiheryo, ohiya opaka elista yoorakama ya malamulo, Yesu aahivaha Yooruma ya Waathokorerya Saana Atthu Akina, oriki: “Sothene sinosivelani wireliwa n’atthu akina, nyuwo-tho nwireleke seiyo akhw’inyu”. (Matheyo 7:12) Nave-tho, ehaavo etthu ekina yootepa otthuneya: Malamulo a Omwene anittittimiherya waaphenta akina. Yesu aalavunle so: “Mumphenteke mukhw’inyu ntoko sinìphentanyu”. (Matheyo 22:39) Tthiri, Muluku, yoole oniweha murima, onoowerya owiiriha atthu weettela malamulo awo.​—1 Samuweli 16:7.

5. ITTHU SINIIRIHA WAAKHELA MAKHWANKWA

MUXANKIHO: Etthu eniwiiriha atthu waakhela makhwankwa ori nrima ni ophavela mureerelo aya. Anamuteko a guvernu ni atthu anaalamulela aya ikwaha sinceene annooniherya mweettelo ola woohiloka. Alumasia ole a oSeul oromoliwe wanipacerya, aahimora mwaha woowi makhulupale a guvernu yaaheemya makhwankwa. Alipa-ooteka yaahisuwela wira ovaha makhwankwa waarowa owiiriha orumeela ikaruma sootekana sa musurukhu vakhaani ohiya ikaruma sooloka ni wiiwelela malamulo.

Wira yoolema ela emale, atthu ahaana wiixuttihiwa moota wooxintta nrima ni ohiphavela mureerelo aya paahi. Masi, iguvernu sa apinaatamu, khisinwerya ni khisiniphavela okumiherya eprograma eniixuttiha moota owo.

ELE ENROWA OMALIHA: Omwene wa Muluku onniwiixuttiha atthu ohiya yoolema ela vaavo onaakhaliherya aya ovenxa vamurimani vaya ele enikumiherya yoolema ela.b Eprograma ela yowiixuttiha ennaakhaliherya ‘wikhaliha atthu a nanano mmirukuni mwaya ni murohoni mwaya’. (aÉfeso 4:23) Awo annirantteliha nrima ni ophavela mureerelo aya paahi vaavo anipaka aya itthu soohakalaliha ni waacalela akina.​—aFilipi 2:4; 1 Timótheyo 6:6.

6. ALE ANILAMULELIWA

MUXANKIHO: Hata atthu akina ekhalaka opuro wooreera wala yiixuttihiwaka okhalana mweettelo wooloka, pooti othanla okhala oohiroromeleya. Asuweli anihimya wira ti maana aya iguvernu sa apinaatamu sihiniwerya aya omaliha makhwankwa. Masi iyo siniwerya ovukula paahi yoolema ela ni ovukula sookhumelela saya.

ELE ENROWA OMALIHA: The United Nations Convention Against Corruption (Mwiiwanano wa Nações Unidas Onimaliha Makhwankwa) onihimya wira vanooweryaneya omaliha muxankiho ola akhala wira iguvernu sinookumiherya “ororomeleya ni nthiti”. Nnaamwi mikhalelo iyo siryeene soovila, Omwene wa Muluku onnikumiherya ni waatumererya atthu a Omwene owo okhalana mikhalelo iyo. Biibiliya onihimya wira ananrima ni “anawĩye” khanrowa “okela momweneni mwa Muluku”.​—1 aKorinto 6:9-11; Wisupulula 21:8.

Atthu anoowerya weettela malamulo ala, ntoko saawenrye aya maKristau oopacerya. Mwa ntakiheryo, okathi mwiixutti Simoni aaphavela awe wira arummwa amutumiherye munepa wootteela, awo yaahikhootta waakhela makhwankwa, ariki: “Muttharuwe yotakhal’anyu ila”.​—Miteko 8:18-24.

MOOTA WOOKHALA MUTTHU A MOMWENENI

Voohicikha etthu sa elapo anyu, munoowerya okhala mutthu a Omwene wa Muluku. (Miteko 10:34, 35) Eprograma ya wiixuttihiwa enikumiheriwa ni Omwene, yeeyo eniphwanyaneya olumwenku wotheene, ennooniherya moota woopaka eyo. Hiyo nnoosiveliwa owooniheryani eprograma ahu ya omusoma Biibiliya voohiliva etthu, mwa okathi woowiiraka minutu 10. Nyuwo munimwiixutta ‘ihapari sorera sa Omwene wa Muluku’ vamosa ni moota Omwene ola onrowa aya omaliha makhwankwa. (Luka 4:43) Xontte, mulavule ni Namoona a Yehova wala murumeele esaite ahu va jw.org/vmw.

[Inoota]