Usuppune

Ne ishanttanne michchontta loytta era. SHiiquwaappe kasenne shiiquwaappe simmin etaara haasaya, etaara issippe haggaaza, qassi danddayettiyaaba gidikko, qumaa eta shoobba. Neeni hegaadan oottiyo wode, maalaalettana danddayaasa. Leemisuwawu, pashkki gaada haasayenna issi michchiyaa dungguuxa gidiyoogaa, daro miishshay deꞌiyo ishay miishsha siiqennaagaanne keha gidiyoogaa, woy shiiqoy doommiichchin ba naatuura gakkiya issi michchiyaa son eqettishin gencciyoogaa neeni akeekana danddayaasa. (Iyy. 6:29) Nuuni hara asa ‘yohon coo gelana’ koshshennaagee qoncce. (1 Xim. 5:13) SHin, nu ishanttubaanne michchonttubaa, qassi eti deꞌuwan beꞌido amaridabaa eriyoogee loꞌꞌo. Neeni yiillotanaadan oottiya issi ishaa woy michchiyo ne loytta eriyo wode, ayyo woy iyyo qarettana danddayaasa. Ne ishantta loytta eranawu baaxetana koshshees. SHin, neeni ne uluwaa aassa dooyanaadan Geeshsha Maxaafay yootiyo zoriyaa kaalliyo wode, ‘asa ubbaa’ siiqiya Yihoowa milataasa.—1 Xim. 2:3, 4; 2 Qor. 6:11-13. w20.04 16-17 ¶10-12

Yesuusi hayqqanaappe kase qammi, ba erissiyo ashkkarati issoy issuwaara siiqettanaadan hassayissiis. Bantta goꞌꞌaa aggi bayiyo siiqoy eti issippetettan deꞌanaadaaninne alamiyaa ixuwaa genccanaadan maaddanaagaa I erees. Tasalonqqe gubaaꞌiyaa hanotaa qoppa. He gubaaꞌee eqqido wodiyaappe doommidi, yedetay eta gakkiis. Gidikkokka, he gubaaꞌiyaa ishanttinne michchontti ammanettidi gencciyoogaaninne siiquwan leemiso gididosona. (1 Tas. 1:3, 6, 7) PHawuloosi eti “gujji gujjidi” siiqettanaadan eta minttettiis. (1 Tas. 4:9, 10) Unꞌꞌettidaageetanne shuggidaageeta minttettanaadan siiqoy eta denttettees. (1 Tas. 5:14) Issi layttaa gidiya wodiyaappe simmin, PHawuloosi etawu xaafido naaꞌꞌantto dabddaabbiyan ‘intte issoy issuwaa siiqiyo siiqoy dariis’ giidi yootidobay, eti PHawuloosa azazuwaa azazettidoogaa bessees. (2 Tas. 1:3-5) Eti issoy issuwaa siiqiyoogee metuwaanne yedetaa genccanaadan eta maaddiis. w21.03 22 ¶11

Nuuni merinaa deꞌuwaa woytuwaa demmanawu koyikko, Kiristtoosi bessido ogiyaa kaallana koshshees. (Oos. 20:24; 1 PHe. 2:21) Gidoppe attin, Seexaanaynne A kaalliyaageeti nuuni Kiristtoosi bessido ogiyaa kaallanaadan koyokkona; he asati nuuni kase deꞌido deꞌuwaa ogiyan etaara woxxanaadan koyoosona. (1 PHe. 4:4) Nuuni deꞌiyo deꞌuwaa qilliiccoosona, qassi eti nuugaappe kehiya, laꞌatettaa demissiya deꞌo deꞌiyoogaa yootoosona. SHin eti yootiyoobay worddo. (2 PHe. 2:19) Nuuni likke ogiyaa kaallanawu dooriyoogee keehi koshshiyaaba! Nuuni ubbay “de7uwau efiya” xuntta ogiyan woxxiyoogaa aggidi ha alamiyan deꞌiya daro asay biyo aaho ogiyaara baanaadan Seexaanay koyees. He ogee daro asay dosiyooba, qassi hemettanawu wayssenna. SHin hegee ‘bashshawu efees.’ (Maa. 7:13, 14) Ubbatoo likke ogiyan baanawunne wora simmennan agganawu, nuuni Yihoowan ammanettananne I yootiyoobaa siyana bessees. w20.04 26 ¶1; 27 ¶5, 7

Mata wodeppe haa simmin, Raasheenne aara hashetiya kawotettatikka ‘he loꞌꞌiya biittaa’ gelidosona. (Dane. 11:41) Waanidi? Raashee 2017n Yihoowa Markkatu oosuwaa teqqiis, qassi nu ishanttuppenne michchonttuppe amaridaageeta qashissiis. I Ooratta Alamiyaa Geeshsha Maxaafaa Birshshettaa gujjin, nu xuufetakka teqqiis. Hegaa bollikka, Raashiyan deꞌiya nu macara biiruwaa, SHiiquwaa Addaraashatanne Gita SHiiquwaa Addaraashata I ekkiis. Hegaadan ootti simmin, Raasheenne aara hashetiya kawotettati huuphessa kawo gidiyoogaa Bolla Gididi Heemmiyaagee 2018n yootiis. SHin, Yihoowa asay banttana ay kawotettikka yedettikkonne, eti he kawotettaara olettanawu woy hegaa laammanawu baaxetokkona. Nuuni laꞌatettan goynnana danddayiya danddayennaakko he kawotettati kuuyiyo wodekka gidin, “sunttatettai de7iyo ubbatuyyo” woossanaadan Geeshsha Maxaafay yootiyo zoriyaa kaalloos. w20.05 14 ¶9

Yelidaageetoo, Geeshsha Maxaafay tamaarissiyoobay tuma gidiyoogaa intte naati shaakki eranaadan koyikko, eti Xoossaara dabbotananne Geeshsha Maxaafay tamaarissiyoobay tuma gidiyoogaa shaakki erana bessees. Intte intte naata Xoossaabaa tumaa tamaarissanawu, intte Geeshsha Maxaafaa xannaꞌiyoogan etawu leemiso gidana bessees. Intte wodiyaa bazzidi tamaaridobaa wotti dentti qoppana koshshees. Yaatidi, intte naatikka hegaadan oottanaadan tamaarissana danddayeeta. Intte intte xinaateti xannaꞌanawu maaddiya miishshata goꞌettanaadan tamaarissiyoogaadan, intte naatikka hegeeta goꞌettanaadan tamaarissana koshshees. Intte yaatikko, intte naati Yihoowa siiqanaadan, qassi Geeshsha Maxaafaabaa nuuni akeekanaadan Yihooway ‘ammanettida wozannaama ashkkaraa’ goꞌettiyoogaakka ammananaadan maaddana. (Maa. 24:45-47) Intte intte naata Geeshsha Maxaafaa tumaa tamaarissiyoogaappe aadhdhiyaabaa oottana koshshees. Eta layttaanne eta abbiyaa hanotaadan ‘Xoossaabaa geemettida yohuwaa’ tamaarissiyoogan etawu mino ammanoy deꞌanaadan maaddite.—1 Qor. 2:10. w20.07 11 ¶10, 12-13

Nagaranchcha asaappe ha wodiyan Yihoowawu mata dabbo gididaageeti aappunee? Ha wodiyan, miilooniyan qoodettiya asati Yihoowawu mata dabbo. Eti hegaadan dabbotiyoy Yesuusa wozuwaa yarshshuwan ammaniyo gishshataassa. Wozuwaa yarshshuwaa gaasuwan nuuni Yihoowaara dabbotananne nu deꞌuwaa awu sheedhdhidi xammaqettana danddayoos. Nuuni yaatiyo wode, bantta huuphiyaa sheedhdhi xammaqettidi, saluwan saꞌan ooppenne aadhdhiya Xoossawu mata dabbo gidida miilooniyan qoodettiya Kiristtaanetuppe issuwaa gidoos! Nuuni Xoossaara dabbotido dabbotaa nashshiyoogaa waati bessana danddayiyoo? Nuuni ha alamiyan Yihoowawu haggaazido wodee ay keena gidikkonne, xeetaappe dariya layttawu Xoossawu ammanettidi deꞌida Abrahaamadaaninne Iyyoobadan ammanettidi deꞌana bessees. Nuuni Xoossaara dabbotido dabbotaa, Daaneelaagaadan nu deꞌuwaappe aattidi xeellana bessees. (Dane. 6:7, 10, 16, 22) Nuna ayba metoy gakkikkokka, Yihooway maaddin awu mata dabbo gididi deꞌanawu genccana danddayoos.—2 Qor. 4:7. w20.05 27 ¶5-6

Kawuwaa Daawiti hara ura keettaayyiyaa bollaa meecettishin beꞌiis. I, “Ne shooruwaa keettaayyiyo . . . amottoppa” giya Yihoowa higgiyaa erees. (Kes. 20:17) Gidikkonne, I xeelliyoogaa aggibeenna. Berssaabo giyo maccaasiyo amottiyoogaaninne Yihoowa ufayssanawu koyiyoogan A wozanay shaahettiis. Daawiti daro wodiyawu Yihoowa siiqidinne yayyidi deꞌidaba gidikkonne, I ba xallaa siiqiyoogaa bessiis. Hegaappe denddidaagan, Daawiti iitabaa oottiis. I Yihoowa sunttay cayettanaadan oottiis. Qassi Daawiti ba soo asaa gujjin, aynne mooribeenna asay qohettanaadan oottiis. (2 Sam. 11:1-5, 14-17; 12:7-12) Yihooway Daawita seeriis; qassi I zaarettidi Yihoowaara dabbotiis. (2 Sam. 12:13; Maz. 51:2-4, 17) Daawiti ba wozanay shaahettanaadan oottidoogaappe denddidaagan metootidoogaanne kayyottidoogaa hassayiis. I Mazamure 86:11n, “taayyo issi wozanaa imma” giido qofaykka keehi koshshiyaaba. Daawita wozanay kumetta woy issuwaa gidanaadan Yihooway maaddidee? Ee; ayssi giikko, guyyeppe Yihoowa Qaalay Daawita xeelliyaagan ‘kumetta wozanaappe Yihoowa ba Xoossaa’ siiqida asa giidi qonccissiis.—1 Kaw. 11:4; 15:3. w20.06 11 ¶12-13

Yihooway ba asaa siiqiyo siiqoy wodoro mala gidiyoogaa Geeshsha Maxaafay yootees. Xoossaa siiqoy ayba ogiyan wodoro malee? Ha leemisuwaa beꞌa: Abbaa beetay keehi wolqqaamidi nena efiiddi deꞌiyaabadan qoppa; issi uri nena ashshanawu neekko shemppuwaa ashshiyaabaa olees. Hegee neeni abban mukkettennaadan oottiyo gishshawu, he maaduwaa neeni nashshiyoogee qoncce. SHin neeni paxa attanawu shemppuwaa ashshiyaabaa xallay gidenna. Haattay keehi irxxa gidiyo gishshawu, shemppuwaa ashshiyaa wolwoloy gakkana xayikko neeni paxa attakka. Neeyyo wodoruwaa olidi shemppuwaa ashshiya wolwoluwaakko nena goochchiya ura koshshees. Hachchi gallassa xiqisiyan Yihooway yootidoogaadan, bayida Israaꞌeelata I siiquwan ‘goochchiis.’ Xoossaayyo haggaaziyoogaa aggidaageeta, qassi metuwaaninne hirggan qohettidaageeta xeelliyaagan ha wodiyankka awu hegaadan siyettees. I eta siiqiyoogaa eti eranaadaaninne eta baakko ehaanawu koyees. Qassi Yihooway eta siiqiyoogaa eti eranaadan neeni maaddanawu I nena goꞌettana danddayees. Yihoowaykka nuunikka ayyaanaaban shuggidaageeta siiqiyoogaa nuuni etawu yootiyoogee keehi koshshiyaaba. w20.06 27 ¶12-13

Erissiyo ashkkaray Isxxifaanoosi hayqqido wode, daro Kiristtaaneti Yerusalaameppe kiyidi, “Yihudaa biittaaninne Samaariyaa biittan laalettidosona;” yaatidi wurssettan Qophphiroosanne Anxxookiyaa gakkanawu haakkidi biidosona. (Oos. 7:58–8:1; 11:19) Erissiyo ashkkarata daro metoy gakkiis. Gidoppe attin, eti biido soho ubban mishiraachchuwaa yeemottidi yootidosona; qassi daro asay Kiristtaane gidin, darosan gubaaꞌeti eqqidosona. (1 PHe. 1:1) SHin hegaappe simmin, darotoo eta hegaappekka keehi iita metoy gakkiis. Leemisuwawu 50 M.L. heeran, Rooma Kawoy Qalawudeyoosi Ayhudati ubbay Roomeppe kiyanaadan azaziis. Hegaa gishshawu, Kiristtaane gidida Ayhudata eta keettaappe wolqqan kessidi, hara biitti baanaadan oottidosona. (Oos. 18:1-3) Kiitettida PHawuloosi 61 M.L. heeran, ba ishanttuppe darota asay haratu sinttan cayidoogaanne eta aquwaa bonqqidoogaa xaafiis. (Ibr. 10:32-34) Hegaa bollikka, amarida Kiristtaaneti hara asaadan hiyyeesanne hargganchcha.—Roo. 15:26; Pili. 2:25-27. w21.02 26-27 ¶2-4

Nuuni nu ammanuwaa minttanawu baaxetikko, Seexaanay woy aara hashetiyaageeti nuuni tuman deꞌennaadan diggana danddayokkona. (2 Yoh. 8, 9) Alamee nuna ixxanaagaa nuuni naagana bessees. (1 Yoh. 3:13) Yohaannisi “ha mule sa7aikka xalahe halaqan haarettidoogaa” nuna hassayissiis. (1 Yoh. 5:19) Ha alamiyaa xayoy matatti matatti biyo wode, Seexaanaa hanqqoy yaa gujji gujji bees. I pokkobaanne kaddidaageeti yootiyo worddobaa mala geema qohuwaa goꞌettiyoogaa xalla gidennan, wolqqaama yedetaa mala qoncce qohuwaakka goꞌettees. Nu sabbakuwaa oosuwaa digganawu woy nu ammanuwaa shugissanawu guutta wode xallay attidoogaa Seexaanay erees. Issi issi biittati nu oosuwaa teqqidoogee woy muleera diggidoogee garamissiyaaba gidenna. Gidikkonne, he biittatun deꞌiya nu ishanttinne michchontti genccidi deꞌoosona. Yaatiyo gishshawu, Seexaanay Yihoowa asaa bolli ay oottikkonne, nuuni ammanettidi deꞌana danddayoos! w20.07 24 ¶12-13

Yihooway I medhdhido loꞌꞌiya saꞌan asay merinawu deꞌanaadan koyiis. SHin Addaameenne Hewaana Yihoowa bolli nagaraa oottido gishshawu merinawu deꞌanawu danddayibookkona. Etinne eta zeretta ubbay wurssettan hayqqana. (Roo. 5:12) Yihooway waatanee? Sohuwaara I asaa waati ashshanaakko qonccissiis. (Doo. 3:15) Addaamenne Hewaani zerettay nagaraappenne hayquwaa aylletettaappe laꞌa kiyanaadan Yihooway wozuwaa giigissanawu halchchiis. Wurssettan, Yihooway ayyo haggaazanawu doorida asa ubbawu merinaa deꞌuwaa immana. (Yoh. 3:16; 1 Qor. 15:21) Yihooway ba naꞌaa baggaara, miilooniyan qoodettiya hayqqidaageeta denttiyo wode, eta ubbaa issi kutti denttenna giidi naagana danddayoos. Ayssi giikko, issi kutti keehi daro asay saꞌan gujettikko, maaray mankkay xayana danddayees. Qassi Yihooway maari mankki baynnabaa mule oottenna. Asay sarotettan deꞌana mala issibay maaran mankkan oosettana koshshiyoogaa Yihooway erees.—1 Qor. 14:33. w20.08 14 ¶3; 15 ¶5

Issi xinaatee Geeshsha Maxaafaa xannaꞌiyoogaa halchchoy I Yihoowa Markka gididi haggaaziyoogaa doommanaadan A maaddanaassa gidiyoogaa akeekana koshshees. Xammaqettanawu koyiya issi xinaatee oottana koshshiyo issi issibati deꞌoosona. Koyroogee, xinaatee Yihoowa erananne siiqana qassi A ammanana koshshees. (Yoh. 3:16; 17:3) Yaatidi, I Yihoowaaranne gubaaꞌiyan deꞌiya ishanttuuranne michchonttuura dabbotana bessees. (Ibr. 10:24, 25; Yaaq. 4:8) Qassi, xinaatee iita meezeta aggananne ba nagaraappe simmana koshshees. (Oos. 3:19) Kallidi, I tamaaridobaa haratussi yootana bessees. (2 Qor. 4:13) Wurssettan, bana Yihoowawu sheedhdhana, qassi hegaa bessanawu xammaqettana koshshees. (1 PHe. 3:21; 4:2) Hegee ubba asaa keehi ufayssiya gallassa! Xinaatee ba halchchuwaa polanawu hegeeta oottiyo wode, wozanappe galata, qassi hegeeta ubbatoo oottanaadan aggennan minttetta. w20.10 17-18 ¶12-13

Neeni gubaaꞌiyan deꞌiya haratuura nena geeddarssikko, neeni gubaaꞌiyan alꞌꞌo gidennabadan qoppiyoogaa doommana danddayaasa. Gubaaꞌiyan deꞌiya issoti issoti tamaarissiyo imotay deꞌiyoogeeta, loytti darajjayiyaageeta, woy loytti heemmiyaageeta gidana danddayoosona. Etaagaadan loytta oottana danddayennabadan neessi siyettana danddayees. Hegee neeni nena ziqqi oottiyoogaa bessees. (Pili. 2:3) SHin naagetta. Neeni dumma eray deꞌiyoogeetuura nena ubbatoo geeddarssikko, hidootaa qanxxana. Kiitettida PHawuloosi yootidoogaadan neeni gubaaꞌiyan aynne maaddennabadan qoppana danddayaasa. Yihooway koyro xeetu layttan deꞌida amarida Kiristtaanetussi maalaalissiya geeshsha ayyaanaa imotaa immikkonne, ubba Kiristtaanetussi issi mala imota immibeenna. (1 Qor. 12:4-11) SHin ubba Kiristtaanetikka alꞌꞌo. Ha wodiyan, maalaalissiyaabaa oottiyo geeshsha ayyaanaa imotay nuussi baawa. SHin kaallidi deꞌiya maaray haꞌꞌikka oottees. Nuussi ubbawu issi mala imotay deꞌennan aggana danddayees; shin nuuni ubbaykka Yihoowawu alꞌꞌo. w20.08 23 ¶13-15

Ne xalatettaa demmanawu woossiyo wode, Yihooway ne woosaa zaarana; qassi nena maaddiyoogaa mule aggenna. (Oos. 4:29, 31) I nena maaddanawu ubbatoo giigi uttiis. Nena gakkida metuwaa xoonanaadan, qassi ne deꞌuwan laamettanaadan neessi wolqqaa immiyoogan I nena waati maaddidaakkokka qoppa. Zoꞌo Abban ba asaa kaalettidi pinttidaagee neeni Kiristtoosi erissiyo ashkkara gidanaadan maaddana danddayiyoogee qoncce. (Kes. 14:13) Ha gallassaa xiqisiyaa xaafida mazamuraawiyaagaadan, neenikka Yihoowan ammanettana danddayaasa. Yihooway mati aassiyaageeta gididaageeti “xala” gidanaadankka maaddana danddayees. Tomoyo giyo michchee hanotaa akeeka. A sooppe soo sabbakiyoogaa doommido wode, koyro haasayissido keettaayiyaa, “Taani Yihoowa Markkatuura haasayanawu koyikke!” gaada I bolli waassaasu; yaatada kariyaa gordda aggaasu. Tomoya yayyabeykku; A banaara haggaaziya laggeessi hagaadan gaasu: “Siyadii? Taani issibaakka qaatabeykke, shin ta Yihoowa Markka gidiyoogaa A eraasu. Taani keehi ufayttaas!” Tomoya haꞌꞌi ubba wode aqinye gidada haggaazawusu. w20.09 6 ¶13-14

Aasi Yihooway “nuuyyo ubba baggaara woppaa immiis” giidi asaassi yootiis. (2 Odi. 14:6, 7) Aasi he sarotettaa wodiyaa allaxxiyo wodiyaadan qoppibeenna. Yaatiyoogaappe, I katamata, miixata, adussa gimbbetanne penggeta keexxiyoogaa doommiis. I Yihudaa asawu, “biittai ha77ikka nuussa” yaagiis. Aasi woyganawu koyidee? I bantta biittan simerettiyoogaanne keexxiyoogaa diggiya morkkee baynnaagaa etawu yootanawu koyiis. I sarotettay deꞌiyo he wodiyaa asay akeekan goꞌettanaadan minttettiis. Aasi he sarotettaa wodiyaa ba olanchchatu wolqqaa minttanawukka goꞌettiis. (2 Odi. 14:8) Hegee I Yihoowan ammanettenna giyoogee? CHii. Sinttappe gakkana danddayiya metuwawu asay giigettanaadan oottiyoogee kawuwaa aawatettaa gidiyoogaa Aasi erees. Aasi he sarotettaa wodee ubbatoo deꞌennaagaa eriis; qassi hegee tuma gidiyoogee qoncciis. w20.09 15 ¶4-5

Issi cimay Xoossaa asaa naaganawu higgiyaa kessana bessees giidi qoppana danddayees. SHin, issi cimaa aawatettay ba keettaa ayssiya ura aawatettaappe keehi dummatees. Leemisuwawu, Yihooway cimati pirddanaadan sunttiis; qassi bantta nagaraappe simmennaageeta gubaaꞌiyaappe bohanaadan I etawu aawatettaa immiis. (1 Qor. 5:11-13) SHin Yihooway bantta keettaa ayssiyaageetussi cimatussi immibeenna aawatettaa immiis. Leemisuwawu, bantta keettaa ayssiyaageeti bantta soossi higgiyaa kessanaadaaninne he higgiyaa polissanaadan I aawatettaa immiis. (Roo. 7:2) Leemisuwawu, ba keettaa ayssiya uri ba naati omarssi soo simmana koshshiyo saatiyaa kuuyanawu ayyo maatay deꞌees. Eti he higgiyaa naagana xayikko qaxxayanawukka ayyo maatay deꞌees. (Efi. 6:1) Ba keettaa siiquwan ayssiya uri ba keettaayeera “issi asa” gidiyo gishshawu, ba keettawu higge kessanaappe kase iira zorettees.—Maa. 19:6. w21.02 16-18 ¶10-13

Xoossaa Qaalan deꞌiya tumay alꞌꞌo gidido issi gaasoy Yihooway hegaa qonccissiyoy ‘suure wozanaa koshshay’ deꞌiyo, banttana ziqqi oottiyaageetu xallaassa gidiyo gishshataassa. (Oos. 13:48, NW) Ha wodiyan ammanettida wozannaama ashkkaray Geeshsha Maxaafaa tumaa nuna tamaarissiyoogaa banttana ziqqi oottiya asati ammanoosona. (Maa. 11:25; 24:45) Maadoy baynnan Geeshsha Maxaafaa akeekana danddayokko; qassi hegaa akeekiyoogaappe hara alꞌꞌobay baawa. (Lee. 3:13) Yihooway babaanne ba halchchidobaa xeelliyaagan tumaa haratussi tamaarissiyo maataakka nuussi hadara oottidi immiis. (Maa. 24:14) Nuuni sabbakanaadan Yihooway yootidobay asay A soo asaa yara gidanaadaaninne merinaa deꞌuwaa demmanaadan maaddiyo gishshawu keehi alꞌꞌo. (1 Xim. 4:16) Nuuni haggaaziyoy daro gidin guutta gidin, ha wodiyan oosettiya aybippenne aadhdhiya oosuwaa maaddoos. (1 Xim. 2:3, 4) Xoossaara issippe oottiyoogee keehi gita maata!—1 Qor. 3:9. w20.09 26-27 ¶4-5

Kiitettida PHawuloosi Roome biyo wode, Yihooway A maaddanawu darotoo ishanttanne michchontta goꞌettiis. Leemisuwawu, PHawuloosawu ammanettida laggeti Arisxxirokoosinne Luqaasi aara Roome baanawu kuuyidosona. Arisxxirokoosinne Luqaasi Roome biyo wode eti saruwan gakkanaagaa Yesuusi qaalaa gelidoogaa Geeshsha Maxaafay yootenna. Hegaa gishshawu, eti bantta shemppuwaa shenehoo giidi he wayssiya ogiyaa biidosona. SHin eti hegaadan oottiyoogan PHawuloosa maaddanawu bantta dosan eeno gidoosona. Guyyeppe, he wayssiya ogiyaa biyo wode eti saruwan gakkanaagaa akeekidosona. Sidoona giyo katamaa eti gakkido wode, Yuuliyoosi PHawuloosawu, “Ne dabboti nena maaddana mala, neeni etakko baanau danddayaasa” yaagiis. (Oos. 27:1-3) Guyyeppe, Putiyoluusa giyo kataman PHawuloosinne A laggeti ‘issi issi ammaniyaageeta demmin, he ishantti banttanaara laappun gallassaa uttana mala eta woossidosona.’ He heeran deꞌiya Kiristtaaneti PHawuloosawunne A laggetussi koshshiyaabaa kunttido wode, PHawuloosi etawu minttettiyaaba yootiyoogan eti ufayttanaadan oottidoogee qoncce.—Oos. 15:2, 3ra gatta xeella. w20.11 15-16 ¶15-17

Yelidaageetoo, Yihoowa intte wozanappe siiqiyoogaa haasayiyoobaaninne oottiyooban intte naata tamaarissite. Intte etayyo immana danddayiyo ay imotaappenne aadhdhiyaagee Yihoowa siiqanaadan eta maaddiyoogaa. Hegaa bollikka, eti ubbatoo Geeshsha Maxaafaa waati xannaꞌanaakkonne woossanaakko, qassi shiiqota shiiqanaadaaninne haggaazanaadan tamaarissiyoogee intte eta tamaarissana danddayiyo aybippenne aadhdhiya timirtte. (1 Xim. 6:6) Intte naatussi asatettan koshshiyaabaa intte kunttana bessiyoogee qoncce. (1 Xim. 5:8) SHin intte naati ha Seexaanaa alamee xayiyo wode paxa attidi Xoossay ehaana ooratta alamiyaa gelanaadan oottiyay aquwaabaa gidennan, Yihoowaara eti dabbotido mino dabbotaa gidiyoogaa hassayite. (Hiz. 7:19) Bantta naati Yihoowakko shiiqidi deꞌanaadan maaddanawu loꞌꞌobaa kuuyida keehi daro Kiristtaane aawatanne aayota beꞌiyoogee keehi ufayssiyaaba! Hegaa mala so asay dichchido naati gitaa gidiyo wode, he loꞌꞌo oosuwaa ubbatoo oottoosona; qassi yelidaageeti hegaadan dichchido gishshawu naati ufayttoosona!—Lee. 10:22. w20.10 28-29 ¶10-11

Kiitettida PHeexiroosi issi issitoo qoppennan haasayiyo woy oottiyo gishshawu, guyyeppe ba haasayidoban woy oottidoban zilꞌꞌettiis. Leemisuwawu, Yesuusi tuggatanaagaanne hayqqanaagaa ba kiittidoogeetuyyo yootiyo wode, PHeexiroosi A, “Hagee ne bolli mulekka yeenna” yaagiis. (Maa. 16:21-23) He wode Yesuusi A seeriis. Deree denddidi Yesuusa oyqqanawu yiido wode, PHeexiroosi yuushshi qoppennan qeese ubbatu halaqaa ashkkaraa hayttaa qanxxi yeggiis. (Yoh. 18:10, 11) Yesuusi haranttuwaakka PHeexiroosa seeriis. Hegaa bollikka, kiitettida harati Kiristtoosa aggidi baqatikkokka taani mule baqatikke giidi ceeqettidi yootiis. (Maa. 26:33) SHin PHeexiroosi I qoppidoogaadan mino gidenna. Guyyeppe he qammi, I keehi yayyidi Yesuusa heezzutoo kaddiis. PHeexiroosi hidootaa qanxxidi, “kare kiyidi mishettidi yeekkiis.” (Maa. 26:69-75) I Yesuusi bawu atto gaaneeshsha giidi qoppennan waayi aggana. SHin PHeexiroosi Yihoowawu haggaazennaadan diggiyaagaa keenaa hidootaa qanxxibeenna. He mooruwaappe simmin, I kiitettida haratuura aggennan Yihoowawu haggaaziis.—Yoh. 21:1-3; Oos. 1:15, 16. w20.12 20 ¶17-18

So asawu huuphe gidida issi uri bana ziqqi oottiyoogaa daro ogiyan bessana danddayees. Leemisuwawu, I ba machchiyaanne ba naati oottana danddayennabaa etappe naagenna. I ba machchiyaanne ba naati aara qofan maayettenna wodekka eti yootiyoobaa siyees. Hegaa bollikka, bana ziqqi oottiya azinay A heeraa asay so giddo oosuwaa oottiyoogaa macca asa oosodan xeellikkonne, I hegaa oottanawu eeno gees. Hegee metiyaaba gidana danddayees. Aybissi? Rachelo giyo michchiyaa hagaadan gaasu: “Taani diccido heeran, issi azinay sayne malabaa meecciyoogan woy keettaa geeshshiyoogan ba machchiyo maaddikko, A shoorotinne A dabboti I ‘attuma asa’ gidenna giidi qoppoosona. Eti I ba maccaasiyo haarana danddayenna giidi qoppoosona.” Neeni deꞌiyo heeran daro asay hegaadan qoppikko, tohuwaa meecciyoogee ashkkara oosodan xeelettikkonne, Yesuusi ba erissiyo ashkkaratu tohuwaa meeccidoogaa hassaya. So asaa loytti kaalettiya azinay harati A wolqqaama woy gooba giidi qoppanaadan oottanawu koyenna. I ba machchiyaanne ba naati ufayttiyoobaa oottanawu koyees. w21.02 2 ¶3; 4 ¶11

Loꞌꞌobaa hassayiyoogee Yihoowa imota; shin kase deꞌoy ay keenaa loꞌꞌo gidikkonne, ooratta alamiyan nuuni demmana deꞌoy hegaappe keehi aadhdhana. Harati nuna qohana danddayoosona; shin nuuni atto giikko, Yihoowawu haggaaziyoogan xeelaa wottana danddayoos. Nu mooridobawu bessiyaagaappe aaruwan zilꞌꞌettiyoogee nuuni Yihoowawu ufayssan haggaazennaadan diggana danddayees. SHin PHawuloosaagaadan, Yihooway nuuyyo atto giidoogaa nuuni ammanana koshshees. (1 Xim. 1:12-15) Nuuyyo merinawu deꞌiyo hidootay deꞌees. Nuuni ooratta alamiyan deꞌiyo wode, azzananaadan oottiya aybanne hassayokko. He wodiyaa xeelliyaagan Geeshsha Maxaafay, “Kasebai ubbai hassayettennanne qofettenna” yaagees. (Isi. 65:17) Hagaa qoppa: Nuuppe amaridaageeti Yihoowawu haggaaziiddi cimikkonne, ooratta alamiyan nuuni zaarettidi yelaga gidana. (Iyy. 33:25) Hegaa gishshawu, kase gakkida iitabaa qoppennan agganawu murttidaageeta gidoos. Nuuni ooratta alamiyan xeelaa wottanawunne yan deꞌanawu haꞌꞌi nuussi danddayettida ubbabaa oottanawu koyoos! w20.11 24 ¶4; 29 ¶18-19

Sinttappe nuna aybi naagii? Gita waayiyaa wode, Yihooway maalaalissiya naaꞌꞌu ogetun nuna ashshana. Koyro, worddo haymaanoote ubbaa xaaxa waaxiya Gita Baabiloono saꞌaa kawotettati xayssanaadan I oottiyo wode, ammanettida ba ashkkarata I ashshana. (Ajj. 17:16-18; 18:2, 4) Kaallidi, I Seexaanaa alamiyaappe attidaageeta Armmageedoona olan xayssiyo wode ba asaa ashshana. (Ajj. 16:14, 16) Nuuni Yihoowakko shiiqidi deꞌikko, Seexaanay nuna merinawu qohiyaabaa oottana danddayenna. I merinawu xayanaagee qoncce. (Roo. 16:20) Hegaa gishshawu ola miishsha ubbaa maaya; qassi ubbatoo hegaa goꞌetta. Seexaanaaranne A alamiyaara nerkka olettanawu baaxetoppa. Ne ishanttanne michchontta maadda. Qassi Yihoowa kaaletuwaa kaalla. Neeni yaatikko, saluwan deꞌiya siiqiya Aaway nena minttettanaagaanne naaganaagaa ammanettana danddayaasa.—Isi. 41:10. w21.03 30 ¶16-17

Nuuni Yihoowan ammanettiyoogaa waati bessana danddayiyoo? Yihoowa kaaletuwawu azazettiyoogan bessana danddayoos. Woppu giidi deꞌiyoogeenne Yihoowan ammanettiyoogee keehi koshshiyoogaa bessiya daro taariketa Geeshsha Maxaafay yootees. Neeni he taariketa xannaꞌiyo wode, Xoossaa ashkkarata wolqqaama yedetay gakkido wode eti woppu giidi deꞌanaadan aybi maaddidaakko qoppa. Leemisuwawu, Ayhudatu xoqqa pirdda keettay kiitettidaageeti sabbakennaadan azazido wode, eti yayyibookkona. Eti xalatettan, “Nuuni asau azazettanaappe Xoossau azazettanau bessees” yaagidosona. (Oos. 5:29) Kiitettidaageeti shocetti simmidikka yayyibookkona. Aybissi? Yihooway eta maaddidoogaa eti eriyo gishshataassa. I etan ufayttiis. Yaatiyo gishshawu, eti mishiraachchuwaa yootiyoogaa aggibookkona. (Oos. 5:40-42) Hegaadankka, erissiyo ashkkara Isxxifaanoosa asay worana haniyo wode, I woppu giidi deꞌiis; qassi A somꞌꞌoy “kiitanchchaa som77uwaa [milatiis].” (Oos. 6:12-15) Aybissi? I Yihooway banan ufayttidoogaa ammanettido gishshataassa. w21.01 4 ¶10-11

Hegaa giyoogee etawu geeshsha kahay deꞌeesinne etan Yihooway ufayttees giyoogaa. (Isi. 1:18) Eti Yesuusa yarshshuwaa mintti ammaniyaanne Yihoowaara mino dabbotaa dabbotida banttana sheedhdhidi xammaqettida Kiristtaaneta. (Yoh. 3:36; 1 PHe. 3:21) Xoossay etan ufayttiyoynne eti saꞌan “qamminne gallassi” assi geeshsha oosuwaa oottana danddayidoy hegaassa. (Ajj. 7:15) Eti Xoossaa Kawotettaa aybippenne aaruwan kaseyiyo gishshawu, ha wodiyan Kawotettaabaanne erissiyo ashkkara oottiyo oosuwaappe dariya baggaa minnidi oottoosona. (Maa. 6:33; 24:14; 28:19, 20) Gita waayiyaappe paxa attana zaway baynna daro asay Xoossay etawu koshshiyaabaa kunttanaagaa ammanettees, ayssi giikko, “ba kawotaa araatan uttidaagee eta gidduwan de7ana.” Qaalaa gelidobay wurssettan polettin beꞌanawu hara dorssati yeemuwan naagoosona: “Xoossai eta aifiyaappe afutta ubbaa quccana.—Ajj. 21:3, 4. w21.01 16 ¶9-10

Yihoowa keettaa asa gididoogee nuna ufayssees; qassi Yihooway amarida aawatettaa immidoogeeta bonchchanawu nuuyyo danddayettida ubbabaa oottoos. Yihooway macca asaakka attuma asaakka nashshiyoogaa Geeshsha Maxaafay qonccissees. Leemisuwawu, kiitettidaageetu wodiyan macca asaykka attuma asaykka dumma dumma qaalan haasayiyoogaa mala maalaaliyaabaa oottanaadan Yihooway ba ayyaanaa etawu immidoogaa Geeshsha Maxaafay yootees. (Oos. 2:1-4, 15-18) Macca asaykka attuma asaykka geeshsha ayyaanan tiyettiis, qassi eti Kiristtoosaara haarana. (Gal. 3:26-29) Macca asaykka attuma asaykka saꞌan merinaa deꞌuwaa woytuwaa demmana. (Ajj. 7:9, 10, 13-15) Qassi mishiraachchuwaa sabbakiyoonne tamaarissiyo oosoy macca asawukka attuma asawukka imettiis. (Maa. 28:19, 20) Leemisuwawu, Oosuwaa maxaafay PHirisqqilo giyo michcheebaa yootees. Anne I azinay Aqiili keehi tamaarida Aphiloosa giyo bitaniyawu tumaa loytti qonccissidosona.—Oos. 18:24-26. w21.02 14 ¶1; 15 ¶4

Cimatoo, aassiyaageeti loytti sabbakanaadaaninne tamaarissanaadan maaddiyo gita aawatettay intteyyo deꞌees. Issi uri ba xinaatiyaa inttenaara xannaꞌissanawu yayyikko, xannaꞌissanawu intte oychchana danddayeeta. Cimati xannaꞌissiyaageeta minttettanawu darobaa oottana danddayoosona. (1 Tas. 5:11) Nuuni ha wodiyan Geeshsha Maxaafaa xannaꞌissenaba gidikkonne, issi uri ayyaanaaban diccidi xammaqettanaadan maaddana danddayoos. Xannaꞌissiyo wode darobaa haasayennan, nuuni loytti giigettido qofaa yootiyoogan xannaꞌissiyaagaa maaddana danddayoos. Xinaateti SHiiquwaa Addaraashaa yiyo wode nuuni etaara laggetananne etawu loꞌꞌo leemiso gidana danddayoos. Hegaa bollikka, cimati xinaatetussi wodiyaa bazziyoogan, qassi xannaꞌissiyaageeta loohissiyoogaaninne galatiyoogan eta minttettana danddayoosona. Nuuni issi uri Yihoowa siiqanaadaaninne awu haggaazanaadan maaddanawu, guuttaba gidikkonne issibaa oottana danddayiyo wode keehi ufayttoos! w21.03 13 ¶18-19

Daawiti ammanettiya asa gidiyoogaa galla galla deꞌuwan bessiis. Leemisuwawu, I yelagatettan deꞌiyo wode ba aawaa dorssata naaganawu minni oottiis. Hegee daafaban yeggiya ooso. Daawiti guyyeppe Kawuwaa Saaꞌoolawu hagaadan giis: “Taani ne ashkkarai ta aawaa dorssata heemmais; gaammoi woikko beere giyo do7ai yiidi wudiyaappe dorssaa oiqqiyo wode, a kaallada taani baada a doonaappe wotta ekkais.” (1 Sam. 17:34, 35) Daawiti dorssaa loytti heemmana koshshiyoogaa akeekiis. Yelaga ishantti banttawu imettida ay oosuwaakka minnidi oottiyoogan Daawita leemisuwaa kaallana danddayoosona. Yelaga Daawiti Yihoowawu keehi mata dabbo gididi deꞌiis. He dabbotettay Daawitawu deꞌiya xalatettaappe woy I diittaa diixxiyo eraappe keehi aadhdhees. Yihooway Daawita Xoossaa; qassi ayyo mata Dabbo. Yelaga ishanttoo, intte Yihoowaara dabbotaa minttiyoogee aybippenne aadhdhiyaaba. w21.03 3 ¶4-5