Laappune

Nuuni nuna asay ixxanaadan koyokko. Nu ammanuwaa gaasuwan asay yedettiyoogee nuna ufayssenna. Yaatin asay ixxiyo wode nuuni ufayttana danddayiyoy aybissee? Heezzu gaasota beꞌa. Koyroogee, nuuni gencciyo wode, Xoossay nunan ufayttees. (1 PHe. 4:13, 14) Naaꞌꞌanttoogee, nu ammanoy geeyeesinne minnees. (1 PHe. 1:7) Heezzanttoogee, nuuni keehi alꞌꞌo woytuwaa, hegeekka merinaa deꞌuwaa demmana. (Roo. 2:6, 7) Yesuusi hayquwaappe denddi simmin takkennan, I yootidoogaadan kiitettidaageeti ufayttidosona. Eta garafidi sabbakiyoogaa eti agganaadan azazikkonne, ufayttidosona. Aybissi? ‘Yesuusa sunttaa gishshawu, eti kawuyyana bessiyo gishshataassa.’ (Oos. 5:40-42) Eti banttana ixxiya morkketa yayyiyoogaappe bantta Godaa siiqiyo siiqoy aadhdhees. Qassi eti aggennan mishiraachchuwaa sabbakiyoogan bantta siiquwaa bessidosona. Nu ishanttuppe daroti metiyaabay deꞌishinkka ha wodiyan ammanettidi haggaaziyoogaa aggibookkona. Eti oottido oosuwaanne A sunttaa gishshawu bessido siiquwaa Yihooway dogennaagaa eroosona. w21.03 25 ¶18-19

Tiyettida Kiristtaaneti saluwaa hidootaara yelettibookkona. He hidootaa etawu Xoossay immees. Eti bantta hidootaabaa qoppoosona, hegaabaa woossoosonanne saluwan bantta woytuwaa ekkanawu yeemuwan naagoosona. Eti saluwan bantta bollay ay mala gidanaakko erokkona. (Pili. 3:20, 21; 1 Yoh. 3:2) Gidikkonne, eti saluwaa Kawotettan etaara gidanawu laamotan naagoosona. Hara dorssati saꞌan merinawu deꞌanawu yeemuwan naagoosona. Hegee ubba asay koyiyooba. Eti kumetta saꞌaa gannate oottiyoogan maaddana danddayiyo wodiyaa yeemuwan naagoosona. Eti keettaa keexxiyo, mittaa ayfiyaa tokkiyo, qassi wottiyoobi baynna payya gidida bantta naata dichchiyo wodiyaa yeemuwan naagoosona. (Isi. 65:21-23) Eti daro sohota manddariyoogan, deriyaa, woraanne abbaa beꞌanawu, qassi Yihooway medhdhido ubbabaa pilgganawu laamotan naagoosona. Ubbaappe aaruwan, eti Yihoowaara dabbotido dabbotay kaseegaappe aaruwan minnanaagaanne akko shiiqanaagaa eriyoogan keehi ufayttoosona. w21.01 18-19 ¶17-18

Baabilooneti woraajjidi he biittaa xayssi simmin, asay gaana danddayiyoobay hagaa xalla: “Ha biittai asaikka meheekka de7enna, baisa biittaa gidana; i Baabiloonetussi imettiichchiis.” (Erm. 32:43) Yuuꞌeeli hiraagaa yootoosappe 200 layttay aadhdhi simmin, ha qohuwaa xeelliyaagan amaridabaa kasetidi yootanaadan Yihooway Ermmaasa goꞌettiis. Woraajjiyaageeti iitabaa oottida Israaꞌeelata loytti koyanaagaanne eta ubbaa oyqqanaagaa Yihooway yootiis. “‘GODAI hagaadan yaagees’; Be7ite; oiqqiya daro asatussi kiittais; eti eta oiqqana. Hegaappe guyyiyan, taani daro shankkanchchatussi kiittana; shankkanchchati dere ubbaappe, kera ubbaappenne shuchchaa kooppotuppe eta shankkatidi kessana. Taani eta iitatettaanne eta nagaraa gishshaa etau naa77u kushiyaa zaarana.” Bantta nagaraappe simmibeenna Israaꞌeelata Baabilooneti woraajjennaadan ano abbaykka woraykka qottana danddayenna.—Erm. 16:16, 18. w20.04 5 ¶12-13

Looxee ba deꞌuwan keehi koshshiya wodiyan Yihoowa azazuwaa azazettanawu gamꞌꞌiis. Yihooway yootidobay Looxa qofissibeenna woy I azazettibeenna giidi nuuni qoppana danddayoos. SHin, Yihooway A ashshanawu maliyoogaa aggibeenna. ‘Yihooway ayyo qarettido gishshawu,’ kiitanchchati A soo asaa kushiyaa oyqqidi, katamaappe eta kessidosona. (Doo. 19:15, 16) Yihooway Looxeyyo qarettanaadan oottida daro gaasoti deꞌennan waayi aggana. Looxee ba sooppe eesuwan kiyibeennay, katamaappe gaxan deꞌiya asaa yaayyido gishshataassa gidennan aggenna. I hirgganaadan oottiya harabatikka deꞌoosona. Matan deꞌiya wombban shidaadan oyqqiyaabay kumido ollan kunddida naaꞌꞌu kawotubaa Looxee erennan aggenna. (Doo. 14:8-12) Looxee azinanne aawa gidiyo gishshawu, ba soo asawu hirggennan waayi aggana. Hegaa bollikka, Looxee dure gidiyo gishshawu, Sadooman ayyo keehi loꞌꞌiya keettay deꞌennan aggenna. (Doo. 13:5, 6) Hegeetuppe awugeenne Looxee Yihoowawu eesuwan azazettennaadan oottiyaaba gidenna. Gidoppe attin, Yihooway Looxe mooruwaa xeellibeenna, shin A ‘xillo asadan’ xeelliis.—2 PHe. 2:7, 8. w20.04 18 ¶13-14

Yelagatoo, inttena naatettan eriyaageeti intte gitatidoogaa eesuwan akeekennan aggana danddayoosona. Gidoppe attin, Yihooway intteyyo bolla baggaara beettiyaaba xallaa xeellennaagaa ammanettana danddayeeta. I inttena loytti ereesinne intte oottana danddayiyoobaa akeekees. (1 Sam. 16:7) Xoossaara dabbotaa minttite. Daawiti Yihooway medhdhidobata loytti xeellidi hegaadan oottiis. Hegeeti Medhdhidaagaabaa A ay tamaarissiyaakko Daawiti wotti dentti qoppiis. (Maz. 8:3, 4; 139:14; Roo. 1:20) Intte oottana danddayiyo harabay Yihooway intteyyo koshshiya minotettaa immanaadan A oychchiyoogaa. Leemisuwawu, intte Yihoowa Markka gidiyo gishshawu inttenaara tamaariyaageeti inttena qilliicciyoonaa? Yaatikko, he paaciyaa genccanaadan Yihooway maaddana mala woossite. Hegaa bollikka, A Qaalan qassi Geeshsha Maxaafaa qofay deꞌiyo nu xuufetuuninne biidotun deꞌiya maaddiya zoriyaa oosuwan peeshshite. Intte metootido issibaa giigissanaadan Yihooway maaddiyoogaa intte akeekiyo wode ubban, metiya harabatakka giigissanaadan I maaddanaagaa intte keehi ammanettana. Qassi Yihoowan intte ammanettiyoogaa harati akeekiyo wode, eti inttenan ammanettana. w21.03 4 ¶7

Mata laggeti bantta qofaanne banttawu siyettiyaabaa issoy issuwaara haasayiyoogaa dosoosona. Nuuni Yihoowaara dabbotiyo dabbotaara gayttidaagankka hanotay hegaa mala. Yihooway ba Qaalaa baggaara nuna haasayissees, qassi he Qaalan ba qofaanne bawu siyettiyaabaa qonccissees. Nuuni woossiyoogan aara haasayoos, qassi nu wozanan deꞌiyaabaanne nuuyyo siyettiyaabaa awu yootana danddayoos. Yihooway siiqiya dabbo gidiyo gishshawu, nu woosaa siyiyoogaa xalla gidennan, hegaa zaarees. Issi issitoo eesuwaara zaarees. Haroode qassi nuuni issibawu darotoo woossana koshshennan waayi aggana. Gidikkonne, I bessiya wodiyaaninne keehi loꞌꞌo ogiyan zaaranaagaa ammanettana danddayoos. Xoossay zaariyoobay nuuni qoppidoogaappe dummatana danddayees. Leemisuwawu, I nu metuwaa qaariyoogaappe, nuuni hegaa ‘danddayanaadan’ nuuyyo aadhdhida eratettaanne wolqqaa immana danddayees. (1 Qor. 10:13) Ha alꞌꞌo imota gidida woosaa gishshawu nuuni Yihoowa galatiyoogaa waati bessana danddayiyoo? ‘Ubba wode woossanaadan’ Yihooway yootidoogaa azazettiyoogan hegaa bessoos.—1 Tas. 5:17. w20.05 27-28 ¶7-8

Annaaciyan adussa wottaa woxxiyaageeti xubettenna mala woxxiyo ogiyaa xeelloosona. Eti kunddikkokka, denddidi aggennan woxxoosona. Eti tishshi ootti xeelliyo waannabay xubbidabaa gidennan, wottaa wurssiyoogaanne xoonidi woytuwaa ekkiyoogaa. Nu wottan nuuni haasayiyooban woy oottiyooban baliyoogan darotoo xubettana danddayoos. Woy qassi nunaara woxxiyaageeti nuna qohiyaabaa oottana danddayoosona. Hegaadan hanikko nuuni garamettana koshshenna. Nuuni ubbaykka nagaranchcha, qassi deꞌuwawu efiya xuntta ogiyan woxxoos. Yaatiyo gishshawu, nuuni issoy issuwaa ‘hanqqetissiyaabaa’ issi issitoo oottoos. (Qol. 3:13) SHin nuuni nuna xubbiyaaban xeelaa wottiyoogaa aggidi sinttappe demmana woytuwan xeelaa wottana koshshees; qassi denddidi aggennan woxxana bessees. Nuuni Yihoowayyo haggaaziyoogaa hanqqettidi aggikko, nu wottaa wurssokkonne woytuwaa ekkokko. Qassi, deꞌuwawu efiya xuntta ogiyan woxxanawu baaxetiyaageetuyyo xube gidana danddayoos. w20.04 26 ¶1; 28 ¶8-9

Xoossaa asaa yedettiya kaalli kaalli denddiya kawotettatubaa Daaneeli yootiis. Eti birataappe oosettida issi gita misiliyawu dumma dumma kifiledan qonccidosona. He kaalli kaalli denddiya kawotettatuppe wurssetta kawotettay misiliyaa tohodan qoncciis; he tohoy birataappenne urqqaappe merettiis. He tohoy Birttaaniyaanne Amarkkaa qonccissees. Xoossaa Kawotettay asa kawotetta ubbaa xayssana gakkanaashin Birttaaniyaanne Amarkkaa waatta kawotettay haaranaagaa he hiraagay yootees. Yihoowa asaa haarana kawotettatubaa kiitettida Yohaannisikka yootiis. Yohaannisi he kawotettata laappun huuphee deꞌiyo doꞌadan qonccissiis. He doꞌawu laappuntta huuphee Birttaaniyaanne Amarkkaa waatta kawotettaa qonccissees. Hegaappe hara huuphee baynna gishshawu hegee keehi gitabaa qonccissiyaaba. Kiristtoosinne saluwaa olanchchati doꞌaanne appe attida harata xayssana gakkanaashin he doꞌawu laappuntta huuphee haarana.—Ajj. 13:1, 2; 17:13, 14. w20.05 14 ¶11-12

Deꞌuwaa immidaagee Xoossaa gidiyoogaa nuuni eroos. SHin ha xiqisee siiqoy appe yiyoogaa nuuni hassayanaadan maaddees. Yihooway nuna siiqees! A siiqoy nuuni woppu gaanaadaaninne ufayttanaadan oottees. Kiristtaaneti siiquwaa bessanaakko woy agganaakko doorana danddayokkona. Hegee azazo. (Maa. 22:37-40) Nuuni Yihoowa loytti eriyo wode koyro azazuwaa azazettiyoogee metennaba gidana danddayees. Ayssi giikko, Yihooway wottiyoobi baynnaagaa. I nuussi qoppeesinne kehees. SHin naaꞌꞌantto azazuwaa azazettiyoogee nuna metana danddayees. Aybissi? Nu mata shooro gidida nu ishanttinne michchontti nagaranchcha gidiyo gishshataassa. Issi issitoo nuussi qoppiyoogaa woy nuna siiqiyoogaa bessenna ogiyan haasayananne oottana danddayoosona. He azazuwawu azazettiyoogee nuna metanaagaa Yihooway erees. Hegaa gishshawu, I nuuni issoy issuwaa siiqana koshshiyoy aybissakko qassi waati siiqanaakko tamaarissanawu amarida asati Geeshsha Maxaafaa shaahota xaafanaadan oottiis. He xaafidaageetuppe issoy kiitettida Yohaannisa.—1 Yoh. 3:11, 12. w21.01 8 ¶1-2

Nuuni Yihoowawu haggaaziyoogaa mati doommidaageeta gidin, woy daro layttawu haggaazidaageeta gidin, nuna hagaadan oychchana koshshees: ‘Seexaanay ta wozanay shaahettanaadan oottanawu paacciyo wode eqettiyaanaa?’ Leemisuwawu, neeni pokkobaa qoppanaadan oottana danddayiya misiliyaa Televizhiiniyan woy Interneettiyan beꞌikko waatuutee? He misilee woy biidoy pokkobaa bessiyaaba gidenna gaada qoppana danddayaasa. SHin hegee ne wozanay shaahettanaadan Seexaanay oottiyoobeeshsha? He misilee issi uri ordde mittaa qooꞌanawu goꞌettiyo kobbiyaa mala. Koyro kobbiyawu leeꞌe baggan mittaa caddees. Yaatidi kobbiyaa wolqqan giddo gelissiyo wode mittay phalqqettees. Televizhiiniyan woy Interneettiyan beꞌiyo mattumaa gaytettaa qaaqqatanaadan oottiya misilee he kobbiyawu lochchatiyaasaa mala gidana danddayennee? Qohiyaaba milatenna hegaa malabaa beꞌiyoogee issi uri guuttaa takkidi Yihoowa bolli nagaraa oottanaadan denttettana danddayees. Hegaa gishshawu bessennabaa aybanne ne wozanaa giddo gelissoppa! Yihoowa sunttawu yayyana mala ne wozanaa issuwaa ootta! w20.06 11-12 ¶14-15

Ayyaanaaban shuggidaageeta nuuni aggennan maaddana koshshees. Yesuusi yootido leemisuwan qonccida bayida naꞌaadan, eti qofan qohettidaageeta gidana danddayoosona. (Luq. 15:17-24) Qassi eti Seexaanaa alamiyaappe banttana gakkidabaa gaasuwan ayyaanaaban shuggidaageeta gidana danddayoosona. Eti zaarettidi Yihoowaara dabbotanaadan nuuni eta maaddana koshshees. Yesuusi bayida dorssaabaa yootido leemisuwan, henttanchchay dorssaa hashiyan tookkidi wudiyaakko efiyoogaa qonccissiis. Henttanchchay bayida dorssaa koyiiddi wodiyaanne wolqqaa wurssiis. SHin, dorssaayyo daro maadoy koshshiyoogaa I erees. Dorssay barkka wudiyaakko guyye hemetti baana danddayenna gishshawu, I tookkidi A efiis. (Luq. 15:4, 5) Ayyaanaaban shuggidaageeti Yihoowayyo zaaretti haggaazanaadan etawu meto gididabaa eti xoonanaadan nuuni maaddanawu daro wodiyaanne wolqqaa koshshana danddayees. SHin, Yihoowa ayyaanaa, A Qaalaanne A dirijjitee giigissido xuufeta goꞌettidi ayyaanaaban minnanaadan nuuni eta maaddana danddayoos. Hegaa gishshawu, ayyaanaaban shuggida uraa neeni xaanꞌissanaadan issi cimay nena oychchiyo wode, neeni danddayikko he aawatettaa ufayssan ekkana koshshees. w20.06 28 ¶14-15

Nuuni tumu Kiristtaaneta gidiyoogaa asay eranaadan siiquwaa bessana koshshees. SHin, nuuni ‘tumu eratettaanne akeekaakka’ demmana koshshees. (Pili. 1:9) Yaatana xayikko, kaddidaageeta gujjin, “asaa bala ogiyaa kaalettiya gene asaa timirtte carkko ubban” nuuni qohettana danddayoos. (Efi. 4:14) Koyro xeetu layttan deꞌida Kiristtaanetuppe daroti Yesuusa kaalliyoogaa aggido wode, kiitettida PHeexiroosi “merinaa de7uwaa qaalai” Yesuusayyo deꞌiyoogaa mintti ammaniyoogaa yootiis. (Yoh. 6:67, 68) PHeexiroosi he wode Yesuusi yootidobaa ubbaa erana xayikkonne, Yesuusi Kiristtoosa gidiyoogaa akeekido gishshawu I ammanettidi deꞌiis. Geeshsha Maxaafay tamaarissiyooban neenikka ne ammanuwaa minttana danddayaasa. Neeni yaatikko, paacee gakkiyo wodiyan ne ammanoy minnana, qassi haratu ammanoy minnanaadan neeni oottana.—2 Yoh. 1, 2. w20.07 8 ¶2; 13 ¶18

Nu ishanttinne michchontti tuman deꞌanaadan maaddanawu, nuuni qarettana bessees. (1 Yoh. 3:10, 11, 16, 17) Nuuni loꞌꞌo wode xallan gidennan, metoy merettiyo wodekka issoy issuwaa siiqana koshshees. Leemisuwawu, siiqiyo uri hayqqin minttettoy woy hara maadoy koshshiyo ura eray? Woy qassi meretay daafabaa gattin etawu daro aqoy xayido gishshawu, eta SHiiquwaa Addaraashata woy keettata zaaretti keexxanawu maadoy koshshiyo amarida ishanttubaa siyadii? Nuuni nu ishanttanne michchontta keehi siiqiyoogaanne etawu qarettiyoogaa haasayiyoogaa xallan gidennan, oosuwan bessiyoogee keehi koshshiyaaba. Nuuni issoy issuwaa siiqiyo wode saluwan deꞌiya nu siiqo Aawaa milatoos. (1 Yoh. 4:7, 8) Nuuni issoy issuwawu atto giyoogee siiquwaa bessiyo issi oge. Leemisuwawu, issi uri nuna yiilloyikko, awu atto giyoogaaninne A mooruwaa dogiyoogan A siiqiyoogaa bessana koshshees.—Qol. 3:13. w20.07 24 ¶14-15

Ha wodiyan nuuni Geeshsha Maxaafaa xannaꞌissiyo ogiyaadan, he wodekka denddida uraa xannaꞌissanay issi asee? He oorattati gubaaꞌetun maddabettidi etappe simmin hayquwaappe denddanaageeta tamaarissanawu loohanee? Nuuni hegaa sinttappe beꞌana. SHin nuuni Kiristtoosa SHaꞌu Layttaa Haaruwaa wurssettan “sa7ai GODAA eriyoogan [kumanaagaa]” eroos. (Isi. 11:9) Kiristtoosa shaꞌu layttaa haaruwaa wode oottanawu keehi ufayssiya daro oosoy nuussi deꞌana! Kiristtoosa SHaꞌu Layttaa Haaruwaa wode, Yihoowa asay ubbay A ufayssanawu laamettana bessees. Hegaa gishshawu, hayquwaappe denddiyaageeti iita qofaanne amuwaa aggidi Yihooway kessido maaraadan deꞌana mala maaddanawu, eti ubbay wozanappe qarettana. (1 PHe. 3:8) Yihoowa asati banttana ziqqi oottiyoogaanne Yihoowa ufayssanawu laamettiiddi deꞌiyoogaa hayquwaappe denddiyaageeti akeekananne etaara issippe Yihoowawu goynnanawu koyana.—Pili. 2:12. w20.08 16 ¶6-7

Kiitettida PHawuloosi geeshsha ayyaanay denttettin zoridobaa nuuni oosuwan peeshshiyaabanne nu oosuwaa qoriyaaba gidikko, haratuyyo baynna imotay nuussi deꞌiyoogaa akeekiyoogaa doommana danddayoos. Leemisuwawu, issi cimay madirakiyaappe tamaarissiyo wode gooba gidennan aggana danddayees; shin erissiyo ashkkara oottiyo oosuwan I keehi gooba gidana danddayees. Woy I ba gubaaꞌiyan deꞌiya hara cimati oottiyoogaadan loytti darajjayiyaagaa gidennan aggana danddayees; shin I kehanne siiqiyaagaa, qassi ishanttinne michchontti Geeshsha Maxaafaappe zoriya A oychchanawu deexxennaagaa gidana danddayees. Woy I imattaa mokkiyoogan loytti erettiyaagaa gidana danddayees. (Ibr. 13:2, 16) Nuuni nu imotaa loytti eriyo wode, gubaaꞌiyawu nu oottana danddayiyoobay deꞌiyo gishshawu ufayttana. Qassi nuugaappe dummatiya imotay deꞌiyo nu ishantta qanaatennan aggana danddayoos. Gubaaꞌiyan nuuyyo deꞌiya aawatettay ayba gidikkonne, nuuni ubbay kaseegaappe loytti haggaazanawunne nu eraa gujjanawu keehi koyana bessees. w20.08 24 ¶16-18

Amarkkan Washingten D.S giyo kataman 1935n shiiqido gita shiiquwan Razerforddi “Zaway Baynna Daro Asaa” giya huuphe yohuwan haasayaa haasayiis. Ajjuutaa 7:9n odettida ‘zaway baynna daro asay’ oonakko Ishaa Razerforddi ba haasayan qonccissiis. He wode gakkanaashin, Geeshsha Maxaafaa tamaareti zaway baynna daro asay saluwaa biikkonne eti tiyettidaageetuppe ammanuwan guuxxoosona giidi qoppidosona. Ishaa Razerforddi zaway baynna daro asay saluwan deꞌanawu doorettibeennaba gidikkonne, eti ‘gita waayiyaappe’ paxa attidi saꞌan merinawu deꞌana Kiristtoosa hara dorssata gidiyoogaa Geeshsha Maxaafaappe qonccissiis. (Ajj. 7:14) Yesuusi hagaadan giis: “Ha wudiyan bainna hara dorssatikka tau de7oosona. Taani etakka ehaanau bessees. Qassi eti ta qaalaa siyana; issi wudee de7ana; heemmiyaageekka issuwaa gidana.” (Yoh. 10:16) Ha xiqisiyan hara dorssata geetettidaageeti gannate gidiya saꞌan merinawu deꞌanawu hidootiya Yihoowa Markkata qonccissoosona.—Maa. 25:31-33, 46. w21.01 14 ¶1-2

Nuuni nuna seeriyaageeta gididi yelettibookko. Nuuni darotoo issibaa metenna ogiyan oottanawu koyoos. (Maa. 28:19, 20) Gidikkonne, oottana bessiya oosoti issi issitoo oottanawu deexxiyaageeta. Hegaa gishshawu, nuuni nuna seerana koshshees. Qassi, oottanawu nuna metana danddayiyaabaa oottanawu nuna loohissanawu maadoy koshshees. Yihooway he maaduwaa ba geeshshaa ayyaanaa baggaara nuussi immees. (Gal. 5:22, 23) Kiitettida PHawuloosi bana seeriya asa. SHin likke gididaabaa oottanawu I ba bolla ‘yimppana’ koshshiyoogaa akeekiis. (1 Qor. 9:25-27) I harati banttana seeranaadaaninne oottiyo ubbabaa “wogaaninne maaran” oottanaadan zoriis. (1 Qor. 14:40) Yihoowawu aggennan goynnanawu minnidi oottana koshshees; hegee mishiraachchuwaa ubbatoo sabbakiyoogaanne tamaarissiyoogaa gujjees.—Oos. 2:46. w20.09 6-7 ¶15-17

Daro biittatun, nuuni laꞌatettan sabbakana danddayoos. Neeni deꞌiyoy hegaa mala biittaanee? Yaatikko, ‘Taani ha laꞌatettaa waata goꞌettaydda deꞌiyaanaa?’ gaada nena oychcha. Ha ufayssiya wurssettaa gallassan, Yihoowa dirijjitee awudeegaappenne aaruwan sabbakiyoonne tamaarissiyo oosuwaa minnidi oottiiddi deꞌees. Ha oosuwan nuuni oottana danddayiyo darobay deꞌees! Sarotettay deꞌiyo wodiyaa akeekan waata goꞌettana danddayay? (2 Xim. 4:2) Neeni woy ne so asay kaseegaappe aaruwan haggaazanawu, ubba qassi aqinye gidanawu hanotaa giigissana danddayiyaakkonne qoppa. Ha wodiyan nuuni duretanawu baaxetana koshshenna; ayssi giikko, nuuyyo deꞌiyaabay nunaara gita waayiyaa pinnenna. (Lee. 11:4; Maa. 6:31-33; 1 Yoh. 2:15-17) Aassiya daroti Yihoowabaa asaa tamaarissanawu ooratta qaalaa tamaaridosona. Eta maaddanawu Xoossaa dirijjitee Geeshsha Maxaafaa qofay deꞌiyo xuufeta 1,000ppe dariya qaalatun giigees! w20.09 16 ¶9-11

Loꞌꞌo wotaaddaray ammanettidaagaa. I dosiyo issi uraa woy xoqqu oottidi xeelliyo issibaa naaganawu minnidi olettana. PHawuloosi Ximootiyoosi Xoossaa milatanaadan, hegeekka Xoossaayyo ammanettidi deꞌanaadan minttettiis. (1 Xim. 4:7) Nuuni kaseegaappe aaruwan Xoossaa siiqiyo wode, tumaakka kaseegaappe aaruwan mintti oyqqana. (1 Xim. 4:8-10; 6:6) Issi wotaaddaray olawu ubbatoo giigi uttanawu bana loohissana koshshees. Ayyaanay denttettin PHawuloosi Ximootiyoosi iita amuwaappe baqatanaadan, Xoossaagaa mala eeshshaa kaallanaadaaninne Kiristtaanetuura laggetanaadan zoridobaa oosuwan peeshshido gishshawu ayyaanaaban minnidi deꞌiis. (2 Xim. 2:22) Yaatanawu issi uri bana loohissana koshshees. Nuuni iita amuwaara olettidi xoonanawu nuna loohissana koshshees. (Roo. 7:21-25) Hegaa bollikka, ceega asatettaa xayssidi ooratta asatetta maayanawu ubbatoo nuna loohissana koshshees. (Efi. 4:22, 24) Qassi gallassa kumettaa daafuri peꞌidi, shiiquwaa shiiqanawu baaxetiyoogee koshshana danddayees.—Ibr. 10:24, 25. w20.09 28 ¶9-11

Issi xinaatee bana sheedhdhidi xammaqettanaadan maaddanawu nuuni danddayanchcha gidana koshshees. SHin I Xoossaa Yihoowawu oottanawu koyiyaakkonne nuuni akeekana koshshees. Xinaatee Yesuusa azazuwaa azazettanawu baaxetiyoogaa bessii? Woy Geeshsha Maxaafaa eraa demmanawu xalla koyii? Xinaatee dicciiddi deꞌiyaakkonne loytta akeeka. Leemisuwawu, I bawu siyettiyaabaa Yihoowawu yootii? I Yihoowakko woossii? (Maz. 116:1, 2) I Geeshsha Maxaafaa nabbabiyoogan ufayttii? (Maz. 119:97) I ubbatoo shiiqota shiiqii? (Maz. 22:22) I ba deꞌuwan laamettana koshshiyaaban laamettidee? I tamaariyoobaa ba so asassinne ba dabbotussi yootiyoogaa doommidee? (Maz. 9:1) Ubbappe aaruwan, I Yihoowa Markka gidanawu koyii? (Maz. 40:8) Xinaatee ha ginatun dichchaa bessennaba gidikko, aybissakko hiillan eranawu mala, qassi hegaabaa aara kehatettan gidikkonne qoncciyan haasaya. w20.10 18 ¶14-15

Saluwan deꞌiya Yesuusa Aaway ubbatoo loꞌꞌobaa kuuyees; qassi saꞌan deꞌiya A dichchidaageetikka loꞌꞌobaa kuuyidosona. SHin, Yesuusi gitaa gidiyo wode, babaa I bawu kuuyana koshshiis. (Gal. 6:5) Nu ubbaagaadan, ikka ay oottanaakko doorana danddayees. I ba koyiyoobaa kaseyana danddayees. SHin, I Yihoowaara dabbotaa minttidi deꞌanawu dooriis. Yesuusi ay oottanaadan Yihooway koyiyaakko akeekido wode, A sheniyaa oottanawu dooriis. (Yoh. 6:38) I daro asay bana ixxanaagaa erikkonne, Yihoowayyo azazettanawu dooriis. Yesuusi 29 M.Ln, xammaqetti simmin, ayyo aybippenne aadhdhiyaabay Yihoowa sheniyaa poliyoogaa. (Ibr. 10:5-7) Yesuusi mittan kaqettidi hayqqiyo wodekka, aggennan ba Aawaa sheniyaa polanawu murttiis.—Yoh. 19:30. w20.10 29 ¶12; 30 ¶15

Sahuwaa woy hara metuwaa gaasuwan unꞌꞌettiya ishanttanne michchontta eray? Woy eti siiqiyo uri hayqqennan waayi aggana. Maadoy koshshiyo uri deꞌiyoogaa nuuni erikko, loꞌꞌobaa haasayanaadan woy oottanaadan Yihooway nuna maaddana mala woossana danddayoos. Bessiya wodiyan nu haasayiyoobay woy oottiyoobay issi ishaa woy michchiyo minttettana danddayees. (1 PHe. 4:10) Yihooway nunaara deꞌiyo gishshawu, nuuni minnana danddayiyoogaa eroos. I Yesuusa baggaaranne kiitanchchatu baggaara nuna maaddees. Qassi, Yihooway ba halchchuwaara maayettiyaaban deriyaa haariyaageetu baggaara nuna maaddana danddayees. Nuuppe daroti nu deꞌuwan beꞌidoogaadan, Yihooway nu ishanttinne nu michchontti nuna maaddanaadan denttettanawu ba geeshsha ayyaanaa goꞌettees. Hegaa gishshawu, Kiitettida PHawuloosaagaadan nuuni ammanettidi, Yihooway “tana maaddiyaagaa; taani yayyikke. Asi tana ai oottii?” gaana danddayoos.—Ibr. 13:6. w20.11 17 ¶19-20

Kiitettidaageeti Yihooway etaara deꞌiyoogaa bessiya qoncce naqaasha. Maalaalissiyaabaa oottanaadan Yihooway etawu wolqqaa immiis. (Oos. 5:12-16; 6:8) Ha wodiyan, maalaalissiyaabaa oottanaadan Yihooway nuussi wolqqaa immenna. Gidikkonne, xillotettaa gishshawu nuna yedetay gakkiyo wode, Yihooway nunan ufayttiyoogaanne A ayyaanay nunaara deꞌiyoogaa I ba Qaalaa baggaara nuussi yootees. (1 PHe. 3:14; 4:14) Yaatiyo gishshawu, sinttappe nuna yedetay gakkiyo wode, nuuni ay oottanaakko hirggana koshshenna. Yihooway nuna maaddananne ashshana danddayiyoogaa mintti ammananawu kaseegaappe aaruwan nuussi danddayettida ubbabaa oottana koshshees. Nuuni Yesuusi hagaadan giidi yootidoban ammanettana koshshees: “Intte morkketuppe ooninne inttenaara eqettanaunne palamettanau danddayenna haasayaa minotettaanne aadhdhida eratettaa taani inttessi immana.” Yesuusi, “Danddayan intte intte shemppuwaa ashshana” giidi nuussi qaalaa geliis. (Luq. 21:12-19) Qassi Yihooway bawu ammanettidi hayqqida ba ashkkaratubaa ubbabaa hassayiyo gishshawu eta mule dogenna. I eta eriyo gishshawu hayquwaappe denttana. w21.01 4 ¶12

Kiitettida PHawuloosi dendduwaa hidootaabaa yootida koyro asa gidenna. Iyyoobikka hegaabaa yootiis. Xoossay A hassayanaagaanne zaarettidi denttanaagaa I ammanettiis. (Iyy. 14:7-10, 12-15) ‘Denddoy’ ubba Kiristtaaneti ammaniyo ‘doometta’ woy ‘koyro timirttiyaappe’ issuwaa. (Ibr. 6:1, 2) PHawuloosi dendduwaabaa yootido qofay 1 Qoronttoosa shemppo 15n deꞌees. I xaafidobay A wode deꞌiya Kiristtaaneta keehi minttettidoogee qoncce. Neeni dendduwaa hidootan ammanaydda ay keenaa takkikkokka, 1 Qoronttoosa shemppo 15n deꞌiya qofay nena minttettana, qassi hegee polettanaagaa neeni mintta ammananaadan oottana. Yesuus Kiristtoosi hayquwaappe denddidoogee nu siiqiyoogeeti hayqqikko, dendduwaa hidootay deꞌiyoogaa nuuni ammanettanaadan oottees. Yesuus Kiristtoosa denddoy PHawuloosi Qoronttoosan deꞌiyaageetuyyo yootido “wonggeliyaa” mishiraachchuwaappe issuwaa. (1 Qor. 15:1, 2) Issi Kiristtaanee dendduwan ammanana xayikko, A ammanoy mela gidiyoogaa I yootiis.—1 Qor. 15:17. w20.12 2 ¶2-4

Kiitettida PHawuloosi zaarettidi loꞌꞌobaa qoppanaadan maaddidabay aybee? Issibay PHeexiroosa ammanoy minnanaadan Yesuusi woossidoogaa. Yihooway Yesuusa woosaa siyiis. Guyyeppe, Yesuusi PHeexiroosawu qonccidoy A minttettanaassa gidennan aggenna. (Luq. 22:32; 24:33, 34; 1 Qor. 15:5) Kiitettidaageeti qamma kumettaa moliyaa oyqqanawu baaxetikkonne aynne oyqqibeenna gishshawu azzani simmin, Yesuusi etawu qoncciis. He wode, PHeexiroosi ay keena Yesuusa siiqiyaakko yootanaadan Yesuusi A oychchiis. Yesuusi ba siiqo laggiyawu atto giisinne awu gujo oosuwaa immiis. (Yoh. 21:15-17) Yesuusi PHeexiroosa oyqqido ogee I ba Aawaadan kehatettan maariyaagaa gidiyoogaa bessees. Yaatiyo gishshawu nuuni baliyo wode, Yihooway nuussi mule atto geenna giidi qoppana koshshenna. Nuuni hegaadan qoppanaadan Seexaanay koyiyoogaa hassaya. SHin Yihooway nuna ay keenaa siiqiyaakko, nu shugo miyyiyaa ay keenaa akeekiyaakkonne, nuussi atto gaanawu ay keenaa koyiyaakko nuuni loytti qoppana koshshees. Harati nuna qohiyaabaa oottiyo wode, nuunikka aagaadan atto giyaageeta gidana koshshees.—Maz. 103:13, 14. w20.12 20-21 ¶17-19

Woppu giidi deꞌibeennaageetunne Yihoowan ammanettibeennaageetu hanotaappe tamaarana danddayoos. Iitabaa oottidaageetubaa xannaꞌiyoogee nuunikka etaagaa mala mooruwaa oottennaadan maaddana. Leemisuwawu, Kawuwaa Aasi Yihudan haariyoogaa doommido heeran metoy bana gakkido wode Yihooway maaddanaadan oychchiis. SHin I guyyeppe maaduwawu Xoossan ammanettibeenna. I ba metuwaa barkka giigissanawu maliis. (2 Odi. 16:1-3, 12) Aasi Israaꞌeelata woraajjanawu Sooriyaa kawuwaa maaduwaa oychchiyoogee loꞌꞌo giidi qoppiis. Gidikkonne, Yihudaa biittan sarotettay daro takkibeenna. Yihooway hananabaa yootiyaagaa baggaara, “Neeni Sooriyaa kawuwan ammanettada, GODAN, ne Xoossan, ammanettabeenna gishshau, Sooriyaa kawuwaa olanchchati ne kushiyaappe kessi ekkidosona” giidi Aasayyo yootiis. (2 Odi. 16:7) Nuuni Yihoowa Qaalaa baggaara kaaletuwaa A oychchennan, nu metuwaa nurkka giigissana giidi qoppennaadan naagettana koshshees. Nuuni issibaa sohuwaara kuuyana koshshiyo wodekka, woppu giidi Yihoowan ammanettana koshshees; qassi nuuni likkebaa kuuyanaadan I nuna maaddana. w21.01 6 ¶13-15

Ha wodiyan, Yihoowa asaappe amaridaageeti banttawu koshshiya qumaa shammanawu etawu gidiya miishshi baynna gishshawu, woy olay gattiyo metuwaappe denddidaagan namisettoosona. Harati bantta ammanuwaa gaasuwan qashettidosona. SHin zaway baynna daro asay ha iita alamiyaa xayuwaappe aattiyoogaa eriyo gishshawu keehi ufayttees; eti asatettaabaaninne ayyaanaaban gidi palahiya qumaa ubbatoo demmana. Yihooway Seexaanaa iita alamiyaa xayssiyo wode, zaway baynna daro asaa ‘awaa’ mala gidida ba hanqquwaappe ashshana. Gita waayiyaappe simmin, Yesuusi saꞌan attidaageeta ‘merinaa deꞌuwaa haattaakko’ kaalettana. (Ajj. 7:17) Hagaa qoppa: Zaway baynna daro asawu maalaalissiya hidootay deꞌees. Biilooniyan qoodettiya asay mule hayqqenna! (Yoh. 11:26) Hara dorssati Yihoowanne Yesuusa galatiyo maalaalissiya hidootay etawu deꞌees! w21.01 16-17 ¶11-12

Yesuusi saꞌan deꞌido wurssetta qammi, I erissiyo ashkkarata gakkana metuwaabaa qoppiis. Erissiyo ashkkarata I siiqiyo gishshawu, ba Aaway “xalahiyaappe eta naagana mala” Yesuusi A oychchiis. (Yoh. 17:14, 15) I mata wode saluwaa baanaagaanne Yihoowawu oottana koyiya oonaaranne Seexaanaa Dabloosi aggennan olettanaagaa Yesuusi eriis. Yaatiyo gishshawu, Yihoowa asawu naagoy koshshees. Nuussi awudeegaappenne aaruwan ha wodiyan Yihoowa maadoy koshshees. Seexaanay ‘wolqqaama hanqquwan’ duge wodhdhiis. (Ajj. 12:12) I nuna yedettiya issi issi asay ‘Xoossawu oottoos’ giidi qoppanaadan oottiis. (Yoh. 16:2) Nuuni ha alamiyaa asaappe dumma gidiyo gishshawu, Xoossaa ammanenna harati nuna yedettoosona. Asay nuna yedettiyo gaasoy ayba gidikkonne, nuuni yayyokko. Aybissi? Hachchi gallassa xiqisee hegaa zaaruwaa yootees. w21.03 26 ¶1, 3

Yihooway ubbabaa siiqoy denttettin oottees. Yihooway siiqoy denttettin nuussi wozuwaa giigissiis. Qassi Yesuusi nuna keehi siiqiyo gishshawu ba deꞌuwaa nuussi immiis. (Yoh. 3:16; 15:13) Yihoowaynne Yesuusi banttawu ammanettidaageeta siiqennaadan eta aybinne diggana danddayenna. (Yoh. 13:1; Roo. 8:35) Hegaadankka, so asawu huuphe gidida uri ubbabaa siiqoy denttettin oottana bessees. Hegee keehi koshshiyoy aybissee? Hegaa zaaruwaa kiitettida Yohaannisi hagaadan giis: “Be7ido ba ishaa [woy so asaa] siiqennaagee be7ibeenna Xoossaa siiqanau waani danddayii?” (1 Yoh. 4:11, 20) Ba so asaa siiqiyaanne Yihoowanne Yesuusa milatanawu koyiya azinay, ba so asay Yihoowaara dabbotaa minttanaadaaninne woppu gaanaadan oottana; qassi etawu asatettan koshshiyaabaa kunttana. (1 Xim. 5:8) I ba naata tamaarissananne seerana. Hegaa bollikka, I ubbatoo Yihoowa bonchchissiyaabaanne ba so asaa goꞌꞌiyaabaa kuuyana. w21.02 5 ¶12-13

Nu bolli gakkida iitabay nuuni nubaa iitabaa qoppanaadan oottana danddayiyoogaa saluwan deꞌiya siiqiya nu Aaway erees. SHin, nuussi loꞌꞌo eeshshay aybinne baawa giidi nu qoppikkonne, Yihooway nuussi deꞌiya loꞌꞌo eeshshaa beꞌees. (1 Yoh. 3:19, 20) Issi uri balabaa oottiyoogaa agganawu keehi baaxetana danddayees. SHin, I he balaa zaarettidi oottana danddayees; qassi hegee hidootaa qanxxanaadan oottees. Nuuni nagaraa oottiyo wode, nuussi darotoo iitabay siyettees. (2 Qor. 7:10) Gidikkonne, nuuni oottido balabaa xeelliyaagan nuussi iitabay siyettido gishshawu, ‘Taani pattikke. Yihooway tawu mule atto geenna’ giidi qoppana bessenna. Hegaadan qoppiyoogee likke gidenna; qassi hegee Yihoowawu haggaaziyoogaa agganaadan oottana danddayees. SHin, he balaa xeelliyaagan Yihoowakko woossananne I nuussi atto gaanaadan oychchana danddayoos. (Isi. 1:18) Yihooway neeni wozanappe zilꞌꞌettidoogaanne laamettanawu baaxetiyoogaa beꞌiyo wode, I neessi atto gaana. Qassi cimati maaddanaadan oychcha. Neeni ayyaanaaban zaarettada minnanaadan eti nena danddayan maaddana.—Yaaq. 5:14, 15. w20.12 23 ¶5-6

Yesuusi macca asaa bonchchiis. Macca asay attuma asaappe laafa giidi qoppiya Parisaawetu leemisuwaa I kaallibeenna. Eti asaa sinttan macca asaara haasayokkona, qassi Geeshsha Maxaafaabaa etawu yootokkona. SHin Yesuusi keehi koshshiya tumaa macca asaakka attuma asaakka tamaarissiis. (Luq. 10:38, 39, 42) Qassi sabbakanawu biyoosaa macca asata ekkidi biis. (Luq. 8:1-3) Hegaa bollikka, Yesuusi hayquwaappe denddidoogaa macca asati kiitettidaageetussi yootanaadan oottidi eta bonchchiis. (Yoh. 20:16-18) Ximootiyoosi macca asaa bonchchanaadan kiitettida PHawuloosi ayyo yootiis. PHawuloosi “geeshsha maxaafata” Ximootiyoosa koyro tamaarissidaageeti A aayyiyoonne A aayee aayyiyo gidiyoogaa yootiis. (2 Xim. 1:5; 3:14, 15) PHawuloosi Roome Kiristtaanetussi xaafido dabddaabbiyan michchonttu sunttaa xeesidi eta sarotiis. PHawuloosi michchontti oottidobaa akeekiis, qassi eti oottidobawu eta galatiis.—Roo. 16:1-4, 6, 12; Pili. 4:3. w21.02 15 ¶5-6