Hosppune

Wolqqaama metoy nena gakkiiddi deꞌii? Gubaaꞌiyan deꞌiya issi uri nena yiilloyana danddayees. (Yaaq. 3:2) Woy qassi nenaara oottiyaageeti woy tamaariyaageeti neeni Yihoowawu haggaaziyo gishshawu ne bolli qilliiccana danddayoosona. (1 PHe. 4:3, 4) Qassi so asay neeni shiiqota shiiqennaadan woy ne ammanuwaabaa haratuyyo yootennaadan digganawu malana danddayees. (Maa. 10:35, 36) Nena wolqqaama metoy gakkikko, hidootaa qanxxana danddayaasa. Nena gakkiya metoy ayba gidikkonne, neeni loꞌꞌobaa kuuyanaadan Yihooway neessi aadhdhida eratettaanne metuwaa genccanawu wolqqaa immana. Yihooway nagaranchcha asay metuwaa waani genccidaakko qonccissiya darobay ba Qaalan xaafettanaadan oottiis. Aybissi? Nuuni hegaappe tamaaranaadaana. Kiitettida PHawuloosi hegaa xaafanaadan Yihooway denttettiis. He taariketa nabbabiyoogee nuuni minettanaadaaninne nuussi hidootay deꞌanaadan oottees. SHin nuuni Geeshsha Maxaafaa coo nabbabiyoogaappe aarobaa oottana bessees. Geeshsha Maxaafay nu qofaa laammanaadaaninne nu wozanaa denttettanaadan eeno gaana bessees. w21.03 14 ¶1-2

Neeni etawu sabbakiyo asaa cahaa bessida kattaadan xeellay? Yaatikko, heezzubay hanana. Koyroogee, kaseegaappe eesuwan sabbakana. Cahaa wodee guutta; coo hada aattiyo wodee baawa. Naaꞌꞌanttoogee, asay mishiraachchuwaa siyiyoogaa beꞌiyoogee nena ufayssana. Geeshsha Maxaafay, “Asai kattaa cakkiyo wode [ufayttees]” yaagees. (Isi. 9:3) Qassi heezzanttoogee, ne haasayissiyo asa ubbay sinttappe erissiyo ashkkara gidana gaada neeni qoppana; yaatiyo gishshawu ne haasayissiyo qofaa asaa ufayssiya ogiyan laammana. Yesuusa kaalliyaageetuppe amaridaageeti Samaare asay mule erissiyo ashkkara gidana danddayenna giidi qoppikkonne, Yesuusi hegaadan qoppibeenna. I eta erissiyo ashkkara gidana asa oottidi xeelliis. Nuunikka nu haggaazo moottan deꞌiya asay sinttappe Kiristtoosi erissiyo ashkkara gidana giidi qoppana koshshees. Kiitettida PHawuloosi nu kaallana bessiyo loꞌꞌo leemiso. I etawu sabbakido asaa ammanuwaabaa eriis, eta ufayssiyaabaa akeekiis, qassi eta Yesuusi erissiyo ashkkara gidana asadan xeelliis. w20.04 8-9 ¶3-4

Hara asi oottidoban issibaa kuuyiyoogaappe, awu aybi siyettiyaakko akeekanawu baaxeta. Nu hanotaa wurssidi eriyay Yihoowa xalla. Yaatiyo gishshawu, I harata xeelliyoogaadan neeni xeellanawunne etawu waata qarettanaakko akeekanawu maaddana mala akko woossa. Nu ishanttuppenne michchonttuppe amaridaageeti nuuni qarettana bessiyoogeeta, qassi harati bessennaageeta giidi nuuni qoppana koshshenna. Eta ubbaakka Yoonaasadan, Eelaasadan, Aggaaridaaninne Looxedan metoy gakkiis. Daro hanotatun, eti he metuwaa bantta bolli ehiidosona. Nuuni ubbaykka issi wode hegaadan oottida. Hegaa gishshawu, nuuni issoy issuwawu qarettanaadan maaddana mala Yihoowa oychchiyoogee bessiyaaba. (1 PHe. 3:8) Nuuni Yihoowawu azazettiyo wode, kumetta saꞌan deꞌiya nu ishanttu issippetettay minnanaadan oottoos. Yaatiyo gishshawu, nuuni nu ishanttinne michchontti yootiyoobaa ezgganawu, eta eranawunne etawu qarettanawu murttanaadan amottoos. w20.04 18-19 ¶15-17

Yihoowawu azazettiyoogan Yesuusi wottiyoobi baynna leemiso. Yaatiyo gishshawu, nuussi danddayettida keenan Yesuusa leemisuwaa kaalliyoogee nuuni Yihoowawu azazettiyo keehi koshshiya oge. (Yoh. 8:29) Nuuni tuman deꞌanawu, Yihooway ubbatoo tumaa yootiyoogaanne I ba Qaalan Geeshsha Maxaafan yootiyo ubbabay tuma gidiyoogaa ammanana bessees. Qassi, Yesuusi qaalaa gelido Mase gidiyoogaakka nu ammanana bessees. Yesuusi Xoossaa Kawotettaa Kawo gididi tiyettidoogaa ha wodiyan daroti ammanokkona. Yihoowabaanne Yesuusabaa yootiya tumaa minttidi ammanennaageeta cimmana danddayiya “balettiya daro asati” he wode deꞌiyoogaa Yohaannisi yootiis. (2 Yoh. 7-11) Yohaannisi hagaadan giis: “Yesuusa giyoogee Kiristtoosa gidin erikke giya urappe attin, worddanchchi oonee?” (1 Yoh. 2:22) Nuuni cimettennan aggana danddayiyoy Xoossaa Qaalaa xannaꞌiyoogaa xallaana. Yaatikko, nuuni Yihoowanne Yesuusa erana. (Yoh. 17:3) Qassi nuuni tumaa eriyoogaa ammanettana. w20.07 21 ¶4-5

Nu ishanttanne michchontta ‘xubbennaadan’ nuuni naagettiyo issi ogee, danddayettiyo wode ubban eti nu koyiyoogaadan oottiyoogaa aggidi bantta koyiyoogaadan oottana mala eeno giyoogaa. (Roo. 14:19-21; 1 Qor. 8:9, 13) Nuuni woytuwaa banttawu ekkanawu wottan annaacettiya wottanchchatu mala gidokko. He wottanchchati xoonanaadan banttana maaddanabaa aybippenne aaruwan qoppoosona. Hegaa gishshawu, eti woxxiya harata sugidi sinttawu aadhdhanawu baaxetana danddayoosona. SHin, nuuni issoy issuwaara annaacettokko. (Gal. 5:26; 6:4) Nu halchchoy danddayettida keenan daroti Xoossay ehaana ooratta alamiyan merinaa deꞌuwaa demmanaadan maaddiyoogaa. Hegaa gishshawu, nuuni harata “go77iyaabaa koyanaappe attin, [nu] huuphe xalaalaa go77iyaabaa” koyennaadan geeshsha ayyaanaa kaaletuwan xaafettida zoriyaa oosuwan peeshshanawu baaxetoos. (Pili. 2:4) Nuuni woxxiyo wottaa wurssiyo wode, saluwan woy gannate gidida saꞌan merinaa deꞌuwaa woytuwaa kehatettan immanawu Yihooway ba asawu qaalaa geliis. w20.04 28 ¶10; 29 ¶12

Miilooniyan qoodettiya Kiristtaaneti xayuwaappe attidi ooratta alamiyaa gelana. Beni hayqqida biilooniyan qoodettiya asay denddiyo wode, paxa kanttidaageeti hayqoy xoonettiyo hara xoonuwaa beꞌana. He maalaalissiyaabay haniyo wode, nuuni ay keena ufayttanaakko qoppa! (Oos. 24:15) Qassi Yihoowawu kumetta wozanan ammanettidi deꞌida ubbay Addaameppe laattido hayquwaa xoonana. Eti merinawu deꞌana. PHawuloosi dendduwaa xeelliyaagan Qoronttoosan deꞌiyaageetuyyo xaafido minttettiya qofaa gishshawu ha wodiyan deꞌiya Kiristtaaneti ubbay galatana koshshees. “Godaa oosuwaa” oottanaadan PHawuloosi zoridobaa azazettanawu ha wodiyan nuussi danddayettida ubbabaa oottiyo loꞌꞌo gaasoy deꞌees. (1 Qor. 15:58) Nuuni nuuyyo danddayettida ubban he oosuwaa oottikko, sinttappe demmana keehi ufayssiya deꞌuwaa yeemuwan naagana danddayoos. He wodee nuuni qoppana danddayiyo aybippenne aadhdhiya ufayssiyaagaa gidana. Hegee Godaara gayttidaagan nu oottido oosoy hada gidennaagaa nuussi qonccissana. w20.12 13 ¶16-17

Hizqqeela 38:10-23n, Daaneela 2:43-45n, 11:44–12:1n, qassi Ajjuutaa 16:13-16ninne 21n deꞌiya hiraagati issi malabaa yootiyaaba milatoosona. Hegaadaana gidikko, kaallidi deꞌiyaabay hanana giidi naagoos. Gita waayee doommi simmin takkennan, ‘saꞌaa kawoti ubbay’ issippe denddana. (Ajj. 16:13, 14) He issippe denddiya kawotettata Geeshsha Maxaafay ‘Maagooga biittan deꞌiya Googa’ yaagees. (Hiz. 38:2) Issippe denddiya he kawotettati Xoossaa asaa ubbaa bolli denddidi eta muleera xayssanawu malana. Kiitettida Yohaannisi Xoossaa morkketa wolqqaama shachchay shocanaagaa he wodiyaabaa qonccissiya hiraagan kasetidi yootiis. He shachchay Yihoowa asay yootiyo wolqqaama pirddaa kiitaa qonccissiyaaba gidana danddayees. Maagooga Googi Xoossaa asaa ubbaa bolli denddidi eta muleera xayssanawu malanaadan oottiyay he kiitaa gidana danddayees.—Ajj. 16:21. w20.05 15 ¶13-14

Nuuni xoqqu ootti xeellana koshshiyo ayfiyan beettenna imotay Xoossaa geeshsha ayyaanaa. Geeshsha ayyaanay ha wodiyan oottiiddi deꞌiyoobaa nuuni qoppiyoogan, geeshsha ayyaanaa gishshawu Yihoowa kaseegaappe aaruwan galatana danddayoos. Yesuusi bana kaalliyaageetuyyo saluwaa baanaappe kase hagaadan giis: “Geeshsha Ayyaanai intte bolli wodhdhiyo wode, wolqqaa intte ekkana; ekkidi . . . sa7aa gaxaa gakkanaashinkka taassi markkattiyaageeta gidana.” (Oos. 1:8) Geeshsha ayyaanay maaddin, kumetta alamiyaappe hosppun miiloonenne bagga gidiya asay Yihoowayyo goynniyaagaa gidiis. Qassi siiquwaa, ufayssaa, sarotettaa, danddayaa, kehatettaa, loꞌꞌotettaa, ammanuwaa, ashkketettaanne nu huuphiyaa naagiyoogaa mala keehi loꞌꞌo eeshshati nuussi deꞌanaadan Xoossaa ayyaanay nuna maaddido gishshawu, nuuni Xoossaa asa gididi ishanttudan sarotettan deꞌoos. ‘Geeshsha ayyaanaa ayfe’ geetettiyaageeti ha eeshshata. (Gal. 5:22, 23) Geeshsha ayyaanay keehi alꞌꞌo imota! w20.05 28 ¶10; 29 ¶13

Hayquwaappe denddiyaageeta nuuni shaakki erana giidi naagana danddayiyo daro gaasoy deꞌees. Leemisuwawu, Yihooway asaa beni hayquwaappe denttido ogiyaappe, asay hayqqanaappe guuttaa kasetiya wodiyaagaa mala gidanaadan, he wodeegaadan haasayanaadaaninne qoppanaadan oottidi Yihooway eta zaarettidi medhdhana giidi naagana danddayoos. Yesuusi hayquwaa xiskkuwaara qassi dendduwaa xiskkuwaappe beegottissiyoogaara geeddarssidoogaa hassaya. (Maa. 9:18, 24; Yoh. 11:11-13) Issi ura meray, A haasayaynne I hassayiyoobay I xiskkuwaappe denddiyo wodekka xiskkanaappe kase wodiyaagaara issi mala. Alꞌꞌaazara leemisuwaa beꞌa. I hayqqoosappe oyddu gallassa gidido gishshawu musiis. Gidikkonne, Yesuusi hayquwaappe A denttido wode, A michchontti sohuwaara A shaakkidi eridosona; qassi Alꞌꞌaazari eta hassayidoogee qoncce.—Yoh. 11:38-44; 12:1, 2. w20.08 14 ¶3; 16 ¶8

Tiyettidaageetinne hara dorssati amarida ogetun issi mala. Yihooway issi citaa hankkuwaappe aattidi siiqenna. Xoossay tiyettidaageetakka hara dorssatakka xoqqu ootti xeellees. Naaꞌꞌu citaakka I issi lagge siiqees. I tiyettidaageetanne hara dorssata ba siiqiyo Naꞌaa deꞌuwan wozido gishshawu nuuni hegaa eroos. Naaꞌꞌu citatu giddon deꞌiya dummatettay eta hidootay dumma dumma gidiyoogaa. SHin naaꞌꞌu citaykka Xoossawunne Kiristtoosawu ammanettidi deꞌana bessees. (Maz. 31:23) Xoossaa ayyaanay nu ubbawu issi mala wolqqaa immiyoogaa hassayoos. Hegaa giyoogee Yihooway ba geeshsha ayyaanay koshshiyo ubbawu immees giyoogaa. Yihooway banttana sheedhdhida ba ashkkaratu ubbaayyo sinttappe demmana maalaalissiya hidootaa immiis. (Erm. 29:11) Nuuni merinaa deꞌuwaa demmanaadan Xoossaynne Kiristtoosi nuuyyo oottidobaa gishshawu eta sabbanaadan Kiristtoosa hayquwaa hassayiyo baalay tiyettidaageetussinne hara dorssatussi dumma gallassa. Godaa Kahuwaa baalay tumu Kiristtaaneti kumetta layttan shiiqiyo ay shiiquwaappenne aadhdhees. w21.01 18 ¶16; 19 ¶19

Godaa Kahuwaa bonchchanawu shiiqiya daroti saꞌan deꞌanawu hidootoosona. Yaatin eti shiiqiyoy aybissee? Eti shiiqiyo gaasoy asay ba laggiyaa bullachchaa shiiqiyoogaara issi mala. He laggeti aqo oyqqiyaageeta kaafiyoogaanne siiqiyoogaa bessanawu koyoosona. Hegaadankka, hara dorssati Kiristtoosanne tiyettidaageeta siiqiyoogaanne kaafiyoogaa bessanawu koyiyo gishshawu Godaa Kahuwaa bonchchanawu shiiqoosona. Hara dorssati Kiristtoosa yarshshuwaa gishshawu keehi galatiyoogaa bessanawukka shiiqoosona; he yarshshoy eti saꞌan merinawu deꞌanaadan oottees. Hara dorssati Godaa Kahuwaa bonchchanawu shiiqiyo keehi koshshiya hara gaasoy Yesuusi azazido azazuwawu azazettanaassa. Yesuusi ammanettida ba kiittidoogeetuura he dumma baalaa essido wode, “Hagan tana hassayite” giidi etawu yootiis. (1 Qor. 11:23-26) Hegaa gishshawu, amarida tiyettidaageeti ha saꞌan deꞌido wode ubban, hara dorssati Godaa Kahuwaa baalaa bonchchanawu shiiqoosona. w21.01 17-18 ¶13-14

Nuuni asaa wozanaappe siiqiyaaba gidikko, loꞌꞌobaa oottiyoogan eta siiqiyoogaa bessana koshshees. (Yaaqooba 2:17, 26ra gatta xeella.) Leemisuwawu, Yihooway nuna siiqees. (1 Yoh. 4:19) Qassi I nuna siiqiyoogaa Geeshsha Maxaafan ufayssiyaabaa xaafissiyoogan qonccissiis. (Maz. 25:10; Roo. 8:38, 39) Gidoppe attin, Xoossay nuna siiqiyoogaa yootiyoogaa xalla gidennan oottiyoobankka bessidoogaa nuuni eroos. Yihooway ba siiqiyo Naꞌay nu gishshawu waayettanaadaaninne hayqqanaadan eeno giis. (Yoh. 3:16) Yaatiyo gishshawu, Yihooway nuna siiqiyoogaa nuuni ammanettoos. Nuuni Yihoowawunne Yesuusawu azazettiyoogan eta siiqiyoogaa bessoos. (Yoh. 14:15; 1 Yoh. 5:3) Qassi Yesuusi nuuni issoy issuwaara siiqettanaadan azaziis. (Yoh. 13:34, 35) Nuuni nu ishanttanne nu michchontta siiqiyoogaa etawu yootana bessikkonne hegaa oottiyoogan bessana koshshees.—1 Yoh. 3:18. w21.01 9 ¶6; 10 ¶8

Geeshsha ayyanan tiyettidaageetussi Xoosssaa Kawotettan Yesuusaara merinawu haariyo hidootay deꞌees. Eti A beꞌana, aara haasayananne wodiyaa aattana. (Yoh. 14:2, 3) Yesuusi saꞌaa hidootay deꞌiyoogeetakka siiqiyoogaanne etawu qoppiyoogaa bessana. Eti Yesuusa beꞌana xayikkonne, Yihoowaynne Yesuusi etawu giigissido ufayssiya deꞌuwaa demmiyo wode, awu mata lagge gidana. (Isi. 9:6, 7) Nuuni Yesuusa lagge gidanaadan I shoobbido shoobiyaa ekkiyo wode daro anjjota demmoos. Leemisuwawu, nuuni I nuna siiqiyoogaanne maaddiyoogaa beꞌoos. Nuuni merinawu deꞌana danddayoos. Ubbaappe aaruwan, Yesuusaara dabbotiyoogee A Aawaa Yihoowaara mino dabbotay deꞌanaadan oottees; he dabbotaara laggetiyaabi baawa. Nuuni Yesuusa lagge geetettiyoogee gita maata! w20.04 25 ¶15-16

Kiitettida PHawuloosi saluwaa baanawu denddana Qoronttoosan deꞌiya tiyettida Kiristtaanetussi ha dabddaabbiyaa xaafiis. He Kiristtaaneti ‘Yesuus Kiristtoosan, geeshsha gidanawu xeesettidaageeta.’ Qassi PHawuloosi ‘Kiristtoosa ammanidi hayqqidaageetubaakka’ yootiis. (1 Qor. 1:2; 15:18; 2 Qor. 5:17) PHawuloosi ayyaanay denttettin xaafido hara dabddaabbiyan, Yesuusi “haiqqidoogaadan haiqqidi, aara issuwaa” gididaageeti, ‘hayquwaappe I denddidoogaadan denddidi, aara issuwaa’ gidanaagaa yootiis. (Roo. 6:3-5) Yesuusi ayyaana mereta gididi denddiisinne saluwaa biis. Hegaa gishshawu ‘Kiristtoosaara deꞌiya’ ubbay, hegeetikka tiyettida Kiristtaaneti ubbay denddana. Kiristtoosi “haiqqidaageetu dendduwaassi baira” gidiyoogaa PHawuloosi yootiis. (1 Qor. 15:20) Merinaa deꞌuwaa demmanawu ayyaana mereta gididi denddiyoogan bayray Yesuusa. w20.12 5-6 ¶15-16

Ha wodiyan hayqqiya tiyettida Kiristtaaneti saluwan deꞌanawu liphida ayfee xeellanaashin baana. Kiitettida PHawuloosi 1 Qoronttoosa 15:51, 52n yootidobay hegee tuma gidiyoogaa bessees. Ha Kiristtoosa ishantti denddi simmidi, keehi ufayttana. ‘Liphida ayfee xeellanaashin’ laamettiyaageeti saluwan oottanabaa Geeshsha Maxaafay yootees. Yesuusi etawu hagaadan giis: “Xoonidaagaayyoonne wurssettai gakkanaassi ta oosuwaa naagidaagaayyo, asa zare ubbaa haarana mala, taani ta Aawaappe ekkido maataa malaa ayyo immana; i eta birata dullan haarananne urqqa miishsha menttiyoogaadan menttana.”—Ajj. 2:26, 27. w20.12 12 ¶14-15

Kiitettida PHawuloosi Yesuusa “baira” giidi xeesidoogee, Yesuusappe simmin hayquwaappe denddidi saluwan deꞌana harati deꞌiyoogaa bessiyaaba. Yesuusaagaadan, kiitettidaageetinne harati ‘Kiristtoosaara deꞌanawu’ denddidi saluwaa baana. (1 Qor. 15:18) PHawuloosi Qoronttoosan deꞌiyaageetuyyo xaafido wode, ‘Kiristtoosaara deꞌanaageeti’ saluwaa baanawu denddiyoogaa doommibookkona. PHawuloosi hegee sinttappe polettanaagaa yootiis: “Ubbaikka ba kayan kayan denddana. Kiristtoosi ubbaappe kasetidi denddiis; hegaappe guyyiyan, Kiristtoosaageeti Kiristtoosi yiyo [qoncciyo] wode denddana.” (1 Qor. 15:23; 1 Tas. 4:15, 16) Nuuni kasetidi odettida Kiristtoosi ‘qoncciyo wodiyan’ deꞌoos. Kiitettidaageetinne hayqqida hara tiyettida Kiristtaaneti saluwaa woytuwaa ekkanawunne ‘hayquwaappe I denddidoogaadan denddidi, [Yesuusaara] issuwaa gidanawu’ Kiristtoosi qoncciyo wodee gakkanaashin naagana koshshiis.—Roo. 6:5. w20.12 5 ¶12; 6 ¶16-17

Kiitettida PHawuloosi saluwan deꞌanawu ‘ayyaana bollaara’ denddiya uraabaa yootiis. (1 Qor. 15:43, 44) Yesuusi saꞌan deꞌiyo wode, ayyo ashuwaa bollay deꞌees. SHin I hayquwaappe denddido wode ‘deꞌuwaa immiya ayyaana gididi’ saluwaa simmiis. Hegaadankka, tiyettida Kiristtaaneti ayyaana mereta gididi denddana. PHawuloosi hagaadan giis: “Nuuni biittaappe merettidaagaa meraa maayidoogaadan, saluwaappe yiidaagaa meraakka qassi maayana.” (1 Qor. 15:45-49) Yesuusi asaagaa mala bollaara denddibeennaagaa hassaya. PHawuloosi hagaadan giis: “Ashoinne suutti [saluwan] Xoossaa kawotettaa laattana danddayenna.” (1 Qor. 15:50) Kiitettidaageetinne tiyettida harati musana danddayiya ashoynne suuttay deꞌiyo bollaara saluwaa bookkona. w20.12 10-11 ¶10-12

Saluwan deꞌanawu denddiyo hidootaabaa koyro xeetu layttan deꞌida Yesuusi erissiyo ashkkaratuppe amaridaageeti xaafanaadan Xoossay denttettiis. Kiitettida Yohaannisi hagaadan giis: “Ha77i nuuni Xoossaa naata; nuuni ai hananaakko biron erettibeenna; shin Kiristtoosi qoncciyo wode, nuuni a milatanaagaa eroos.” (1 Yoh. 3:2) Hegaa gishshawu, tiyettida Kiristtaaneti hayquwaappe denddidi saluwaa biyo wode yan deꞌoy ay mala gidanaakko erokkona. Gidoppe attin, eti bantta woytuwaa ekkiyo wode Yihoowa beꞌana. Geeshsha Maxaafay hegaabaa amaridabaa yootees. Kiristtoosi ‘halaqatetta ubbaa, godatetta ubbaanne wolqqa ubbaa’ xayssiyo wode tiyettidaageeti aara gidana. Eti wurssetta ‘morkkiyaa hayquwaakka’ xayssana. Wurssettan, Yesuusinne aara haaranaageeti Yihoowawu haarettana. (1 Qor. 15:24-28) Hegee keehi ufayssiya wode gidana! w20.12 8 ¶2

Kiristtoosaara saluwan deꞌiyo hidootay baynna ammanettida Kiristtaanetussikka dendduwaa hidootay deꞌees. Geeshsha Maxaafay Kiitettida PHawuloosinne saluwaa baana harati ‘hayquwaappe koyro dendduwaa denddanaagaa’ yootees. (Pili. 3:11, NW) Hegaappe simmin hara denddoy deꞌanaagaa hegee bessees. Iyyoobi babaa xeelliyaagan sinttappe hananabaa yootidobaara hegee maayettees. (Iyy. 14:15) ‘Kiristtoosi yiyo [qoncciyo] wode Kiristtoosaageeta’ gidiyaageeti Yesuusi halaqatetta ubbaa, godatetta ubbaanne wolqqa ubbaa xayssiyo wode aara saluwan deꞌana. Wolqqaama ‘morkkee hayqoykka’ xayana. Saluwaa baanawu denddida ubbay mule hayqqenna. (1Qor. 15:23-26) Saꞌan deꞌanawu hidootiyaageeti PHawuloosi ha gallassa xiqisiyan yootidobaappe goꞌettana danddayoosona. Worddanchcha uri saluwaa baana danddayennaagee qoncce; yaatiyo gishshawu ha xiqisee saꞌan sinttappe denddoy deꞌanaagaa bessees. w20.12 6-7 ¶18-19

Nuuni ‘Yihooway tana aggibeennaagaa waata erana danddayiyaanaa?’ giidi qoppana danddayoos. Neeni he oyshaa oychchikko, hegee Yihooway neeyyo atto gaana danddayiyoogaa bessees. Daro layttaappe kase, Wochiyo Keelay hagaadan giis: “Nuuni bala gidida issibaa zaari zaaridi oottana danddayoos. Hegee nuuni Xoossawu haggaaziyoogaa doommanaappe kasekka oottiyo xoonanawu nuna metidaba gidana danddayees. . . . Ta oottido nagaraa Yihooway mule atto gaana danddayenna gaada qoppoppa. Seexaanay neeni hegaadan qoppanaadan koyees. Neeni he balaa oottiyo wode azzanaasanne unꞌꞌettaasa. Hegee neeni iita asa gidennaagaanne Yihooway neeyyo atto gaana danddayiyoogaa bessees. Ubbatoo nena ziqqi ootta; qassi Xoossay neeyyo atto gaanaadan, zaarettada geeshsha kahaa demmanaadaaninne he balaa zaarettada oottennan agganawu I nena maaddana mala ubbatoo woossa.” Kiitettida PHawuloosi Kiristtaane gidanaappe kase, keehi daro iitabaa oottiis. PHawuloosi ba oottidobaa hassayees. (1 Xim. 1:12-15) SHin wozoy I baayyo buzo qanxxettidabadan qoppiis. Hegaa gishshawu, PHawuloosi I mooridobawu ubbatoo zilꞌꞌettiyoogaappe Yihoowawu haggaazanawu bawu danddayettida ubbaa oottiyoogan xeelaa wottiis. w20.11 27 ¶14; 29 ¶17

Seexaanay iitabaa oottanaadan nuna daroban paaccees. Nuuni waatanee? Hagee darin iitaba gidenna giidi qoppiyoogee metenna. Leemisuwawu, hagaadan qoppana danddayoos: ‘Taani hagaa oottiyoogan bohettenna gishshawu, hegee gita nagara gidenna.’ Hegaadan qoppiyoogee gita bala. Nuna kaallidi deꞌiyaagaadan oychchiyoogee loꞌꞌo: ‘Seexaanay ta wozanay shaahettanaadan oottanawu ha paaciyaa goꞌettiiddi deꞌii? Taani pokkobaa amottiyoogee Yihoowa sunttay borettanaadan oottanee? Ha hanotay taani Xoossaakko shiiqanaadan oottaneeyye appe haakkanaadan oottanee?’ Ha oyshata wotta dentta qoppa. Nena nerkka cimmennan, hageeta zaaranawu aadhdhida eratettaa demmana mala woossa. Yaatiyoogee nena naagana danddayees. Hegee Yesuusi paacettido wode, “Laa ha Seexaanau haakka” giidoogaadan neenikka paaciyaa minnada eqettanawu maaddana danddayees. (Maa. 4:10) Nu wozanay shaahettiyoogee loꞌꞌo gidenna. w20.06 12-13 ¶16-17

Nuuni nu huuphiyaa ziqqi oottidi Yihoowawu azazettiyo gaasoy I ubbatoo nuuyyo loꞌꞌobay aybakko eriyo gishshataassa. (Efi. 4:22-24) Nuuni nu huuphiyaa ziqqi oottiyoogee, nu koyiyoobaappe Yihooway koyiyoobaa kaseyanaadaaninne haraati nuuppe aadhdhoosona giidi qoppanaadan oottees. Hegaappe denddidaagan, Yihoowaara, qassi gubaaꞌiyan deꞌiya nu ishanttuuranne michchonttuura dabbotaa minttoos. (Pili. 2:3) SHin nuuni naagettana xayikko, otorettiyaanne ba xallaa siiqiya ha alamiyaa asaagaadan hanana danddayoos. Kiitettida PHawuloosi, “Taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite” giidi Roome Kiristtaanetuyyo xaafidoy koyro xeetu layttan deꞌiya amarida Kiristtaaneti alamiyaagaadan haniyo gishshawu gidennan aggenna. Nuuni amarida ogiyan nubaa qoppana koshshiyoogaa PHawuloosi erees. Gidoppe attin, nuuni nu huuphiyaa ziqqi oottiyoogee, nubaa bessiyaagaadan qoppanaadaaninne otoruwaappe naagettanaadan nuna maaddana. w20.07 2 ¶1-2

Kawuwaa Aasa wode deꞌiya sarotettay guyyeppe xayiis. Issi miilooneppe dariya olanchchati Toophphiyaappe yiidosona. Zeraaha giyo olanchchatu gadaawaynne A olanchchati Yihudaa xoonanaagaa ammanettidosona. SHin Aasi asaa qoodan gidennan, Yihoowan ammanettiis. Aasi hagaadan woossiis: “Abeet GODAU, nu Xoossau, nuuni nenan ammanettidi, ha cora olanchchatuura ne sunttan olettanau yiido gishshau, neeni nuna maadda.” (2 Odi. 14:11) Toophphiyaa olanchchati Aasa olanchchatuppe dakkuwaa gidiyaagaa daroosona; shin Aasi Yihooway wolqqaama gidiyoogaanne I ba asaa maaddana danddayiyoogaa erees. Qassi Yihooway ba asaa maaddiis. Toophphiyaa olanchchati xoonettidosona. (2 Odi. 14:8-13) Nuna ubbaa sinttappe aybi gakkanaakko nuuni wurssi erokko, shin ha wodiyan Yihoowa ashkkaratussi deꞌiya sarotettaa wodee takkennaagaa eroos. Wurssetta gallassatun, Yesuusi ba erissiyo ashkkaratuyyo “dere ubbai inttena ixxana” giidi kasetidi yootidoogaa hassaya.—Maa. 24:9. w20.09 17-18 ¶14-16

Nuuppe ooninne cayettanawu koyenna. Gidoppe attin, nu morkketi nuna cayin, nuuni keehi hanqqettikko, hidootaa qanxxana danddayoos. (Lee. 24:10) Yaatin, eqettiyaageeti nuna cayiyoogaa nuuni waati xeellana bessii? Kiitettida PHawuloosaagaadan, nuuni ‘cayettiyoogan ufayttana’ danddayoos. Aybissi? Asay nuna cayiyoynne eqettiyoy nuuni Yesuusi erissiyo ashkkarata gidiyo gishshataassa. (1 PHe. 4:14) Yesuusi bana kaalliyaageeta yedetay gakkanaagaa yootiis. (Yoh. 15:18-20) Hegee beni wode Kiristtaanetu bolli gakkiis. He wode, Giriike wogaa kaalliyaageeti Kiristtaaneta tamaaribeennanne laafa asadan xeelloosona. Qassi Ayhudatuppe issoti issoti kiitettida PHeexiroosanne Yohaannisa “tamaaribeenna coo” asa giidoogaadan, Kiristtaanetakka hegaadan xeelloosona. (Oos. 4:13) Kiristtaaneti polotikaara woy wotaaddara gidiyoogaara gayttidabaa aybanne oottenna gishshawu, qassi hara asaappe shaahettidabadan asay eta qoppiyo gishshawu daafuranchcha milatana danddayoosona. Eqettiyaageeti yootiyo iitabay beni Kiristtaaneti Yesuusa kaallennaadaaninne sabbakennaadan diggibeenna. w20.07 14-15 ¶3-4

Kiitettida Yohaannisi ba ishanttanne michchontta keehi siiqiyo gishshawu, etawu mino ammanoy deꞌana mala koyiis. I ba heezzu dabddaabbetun eta zorido zoree I eta siiqiyoogaanne etawu qoppiyoogaa loytti qonccissees. Yesuusaara saluwan haarana attumaageetinne maccaageeti Yohaannisaagaadan siiqiyaageetanne qoppiyaageeta gidiyoogaa eriyoogee keehi minttettiyaaba! (1 Yoh. 2:27) I yootido zoriyaa wozanan wottoos. Tuman deꞌanawu, hegeekka, nu oottiyo ubbaban Yihoowawu azazettanawu murttoos. A Qaalaa xannaꞌitenne hegaa ammanite. Yesuusa mintti ammanite. Asa qofaanne kaddidaageetu qofaa ixxite. Iitabaa oottiiddi Yihoowawu haggaaziyaaba mule milatoppite, qassi nagaraa intte oottanaadan inttena zoriyaageetu zoriyaa siyoppite. Yihooway kandduwawu kessido maaratudan deꞌite. Nuna yiilloyidaageetussi atto giyoogaaninne maadoy koshshiyoogeeta maaddiyoogan nu ishantti minnidi deꞌanaadan maaddoos. Yaatikko, metoy deꞌishinkka, nuuni ubbatoo tuman deꞌana. w20.07 24-25 ¶15-17

Yihooway ammanettida ba ashkkarata ubbaa siiqidi eti ba gubaaꞌiyaa yara gidanaadan oottiis. Nuuni ubbay gubaaꞌiyan oottiyoobay dumma dummaba gidikkonne, nuuni ubbay alꞌꞌo; qassi nuuni ubbay issoy issuwawu koshshoos. Kiitettida PHawuloosi nuuppe ooninne Yihoowa ashkkara gidida ura, “Neeni taassi koshshakka” gaana danddayennaagaa yootiis. (1 Qor. 12:21) Nuuni gubaaꞌiyan sarotettay deꞌanaadan koyikko, issoy issuwaa bonchchananne hashetidi issippe oottana koshshees. (Efi. 4:16) Nuuni hashetidi issippetettan oottiyo wode, gubaaꞌiyan deꞌiya ubbay bana harati siiqiyoogaa akeekana; qassi gubaaꞌee minnana. Gubaaꞌiyan deꞌiya ubba cimati Yihoowa geeshsha ayyaanan sunttettidosona. SHin eta ubbawu dumma dumma imotay deꞌees. (1 Qor. 12:17) Amaridaageeti mati cima gidido gishshawu, oosuwaa hara cimatuugaa keena meezetennan aggana danddayoosona. Harati qassi cimatettaa woy payyatettaa gaasuwan darobaa oottana danddayokkona. SHin issi cimay hara ay cimanne qoppidi, “Neeni taassi koshshakka” gaana bessenna. PHawuloosi Roome 12:10n zoridobaa cimati ubbay oosuwan peeshshana koshshees. w20.08 26 ¶1-2; 27 ¶4

Yihooway ba dirijjitiyawu saꞌaa baggaa goꞌettidi nuna deꞌuwaa ogiyan kaalettees. Xoossaa dirijjitee Geeshsha Maxaafaa timirttiyaa ooratta ogiyan akeekidobaa nuuyyo qonccissiyo wode woy kandduwaa maaraa xeelliyaagan kaaletuwaa yootiyo wode, nuuni siyidi oosuwan peeshshoos. SHin shiiqiyo Addaraashaa bayzziyoogaa mala nu deꞌuwan hara ginaara gayttiyaabaa Xoossaa dirijjitee laammiyo wode, nu waatiyo? Nuuni oottiyo ubbabay Yihoowassa gidiyoogaanne I ba dirijjitiyaa kaalettiyoogaa hassayikko, nu ubbatoo ufayttana. (2 Qor. 6:1) Kawuwaa Daawiti beetamaqidasiyaa keexxanawu miishshaa immiyoogan nuussi loꞌꞌo leemiso gidees. I hagaadan giis: “Nuuni hagaa keenabaa immanau taanne ta asainne oonee? Aissi giikko, ubbabai neeppe yees; nuuni ne kushiyaappe ekkidobaa neeyyo zaaretti immida.” (1 Odi. 29:14) Nuuni miishshaa immiyo wode, Yihoowappe ekkidobaa ayyo zaaridi immoos. SHin nuuni Yihoowa oosuwawu nu wodiyaa, nu wolqqaanne nu miishshaa goꞌettiyo wode I keehi ufayttees.—2 Qor. 9:7. w20.11 22-23 ¶14-16

Nuuni Yihoowa Markka gidiyo gidiyoogaadan nuna, gooba woy laafa giissiyay daro asay Yihoowa Markka gidanaadan maaddiyoogaa gidenna. (Luq. 8:11-15) Mishiraachchuwaa sabbakiyoogaanne harata tamaarissiyoogaa aggennan nuuni oottikko, Yihooway nuna gooba oosanchchadan xeellees. Aybissi? Yihoowaynne A naꞌay oottanaadan koyiyoobaa aggennan nuuni oottiyo gishshataassa. (Mar. 13:10; Oos. 5:28, 29) Nuuni ha alamiyaa wurssettay keehi matidoogaa eriyoogee ha wodiyan sabbakanaadan nuna denttettiya hara gaaso! Asaa ashshiyaa mishiraachchuwaa sabbakiyo oosoy guutta wodiyaappe simmin attana. Ha keehi koshshiya oosuwaa oottanaappe kase ne deꞌuwan ubbabay injjetana gakkanaashin naagoppa. Ha wodiyan, sabbakanawu mintta koya, Geeshsha Maxaafay yootiyoobaa loytta tamaara, xalatettaa mintta qassi nena seera. Kumetta alamiyan mishiraachchuwaa sabbakiya hosppun miilooniyaappe dariya asaara hashetada ootta; yaatikko Yihooway immiyo ufayssaa demmana. (Nah. 8:10; Luq. 5:10) Sabbakanawu neessi danddayettida ubbabaa oottanawunne Yihooway he oosoy wuriis gaana gakkanaashin aggennan oottanawu murtta. w20.09 7 ¶18-20

Nuuni aquwaabaa keehi koyana bessenna. “Duretetta siiqiyoogee” Yihoowa loytti siiqennaadan, Xoossaa Qaalaa nashshennaadaaninne hegaa haratussi yootanawu koyiyoogaa agganaadan oottees. (Maa. 13:22) Yihooway nuuyyo hadaraa immidobata nuuni naaganawu koyikko, qohiyaabaa beꞌiyo wode sohuwaara issibaa oottana koshshees. Nuuni Intternneetiyaa goꞌettiyo wode, woykko pilimiyaa woy Televizhiiniyaa beꞌiyo wode qoppennan pokkobaa, danobaa, woy kaddidaageeti giigissidobaa beꞌikko, waatana bessiyaakko kasetidi halchchana koshshees. Hananabawu nuuni giigettikko, Yihoowaara dabbotido dabbota mintti naagana, qassi Yihoowa sinttan geeshsha gididi deꞌana danddayoos. (Maz. 101:3; 1 Xim. 4:12) Yihooway nuussi immido alꞌꞌobata nuuni naagana koshshees; hegeetikka alꞌꞌo gidida Geeshsha Maxaafaa tumatanne hegaa haratuyyo tamaarissiyo maata. Nuuni yaatiyo wode, nuussi geeshsha kahay deꞌana, nu deꞌuwan ufayttana, qassi harati Yihoowa eranaadan maaddiyoogan ufayttana. w20.09 30 ¶16-19

Neeni xammaqettadii? Yaatikko, neeni xammaqettido wode, Yihoowa ammaniyoogaanne A dirijjitiyaara hashetada haggaazanawu koyiyoogaa haratu sinttan bessadasa. Ha wodiyan, Yihooway ba eeshshaa, ba halchchuwaanne ba kessido maarata qonccissiya ogiyan ba dirijjitiyaa kaalettees. Yihoowa eeshshatuppe heezzati A dirijjitiyan qonccidaagaa akeeka. Koyroogee, “Xoossai asa som77o xeellenna.” (Oos. 10:34, 35) Yihooway “asaa ubbaa wozanau” ba Naꞌaa immanaadan siiqoy A denttettiis. (1 Xim. 2:6; Yoh. 3:16) Siyanawu koyiya asa ubbawu mishiraachchoy sabbakettanaadan Yihooway ba asaa goꞌettees. Yaatiyoogan, wozuwaappe goꞌettanawu, hegeekka attanawu koyiyaageeta ubbaa I maaddees. Naaꞌꞌanttoogee, Yihooway maaraanne sarotettaa Xoossaa. (1 Qor. 14:33, 40) Hegaa gishshawu, awu goynniyaageeti maaraaninne sarotettan awu haggaazanaadan I koyees giidi qoppiyoogee bessiyaaba. Heezzanttoogee, nu gita “asttamaaree” Yihoowa. (Isi. 30:21) Yihoowa dirijjitee gubaaꞌiyaaninne haggaazuwan A Qaalaa, Geeshshaa Maxaafaa harata tamaarissanawu minni oottiyoy hegaassa. w20.10 20 ¶1-3