Uddufune

Yesuusi yelagatettan deꞌiyo wode, bana yelidaageetussi azazettanawu dooriis. I bana yelidaageeti oottiyoobaappe aaruwan erays gi qoppidi etawu azazettennan mule ixxibeenna. Yesuusi bayra naꞌa gidiyo gishshawu awu amarida aawatettay deꞌees. Hegaa polanawu I bawu danddayettida ubbabaa oottennan aggenna. I anaaxetettaa oosuwaa Yooseefappe tamaaranawu minnidi oottido gishshawu so asawu koshshiyaabaa kunttanawu maaddiya miishshaa demmanaadan maaddiis. Yesuusi maalaalissiya hanotan yelettidoogaabaanne kiitanchchati abaa yootidobaa A yelidaageeti awu yootennan waayi aggana. (Luq. 2:8-19, 25-38) Yesuusi bawu odettidabaa xallay gidana gibeenna; I Geeshsha Maxaafaa buzo xannaꞌiis. Yesuusi Xoossaa Qaalaa loytti xannaꞌidoogaa waati eriyoo? I naatettan deꞌiyo wode Yerusalaamen deꞌiya asttamaareti A akeekaaninne ‘I immiyo era zaaruwan garamettido’ gishshataassa. (Luq. 2:46, 47) Qassi Yesuusawu layttay 12 gidido wode, Yihooway ba Aawaa gidiyoogaa I ba huuphen qonccissiis.—Luq. 2:42, 43, 49. w20.10 29-30 ¶13-14

Yesuusa dendduwan ammaniyoogee nu hidootaappe waannatiyaagaa. Kiitettida PHawuloosi dendduwaabaa xaafido wode heezzu tumaa qonccissiis. Hegeetikka (1) “Kiristtoosi nu nagaraa gishshau haiqqiis.” (2) I “moogettiis.” (3) I, “Xoossaa maxaafai giyoogaadankka, heezzantto gallassi haiquwaappe denddiis.” (1 Qor. 15:3, 4) Yesuusi hayqqidoogee, moogettidoogeenne hayquwaappe denddidoogee nuna waati maaddii? Hananabaa yootiya Isiyaasi Masee ‘paxa deꞌiyaageetu biittaappe kichchanaagaa,’ qassi ‘I ba hayquwan iita asatuura qoodettanaagaa’ kasetidi yootiis. SHin harabaykka hanana. Isiyaasi gujjidi Masee ‘daro asaa nagaraa tookkanaagaa’ yootiis. Yesuusi ba deꞌuwaa wozo oottidi immiyoogan hegaadan oottiis. (Isi. 53:8, 9, 12; Maa. 20:28; Roo. 5:8) Hegaa gishshawu, Yesuusa hayqoy, I moogettidoogeenne denddidoogee nuuni nagaraappenne hayquwaappe laꞌa kiyidi nu siiqiyo hayqqidaageetuura zaarettidi gayttanaagaa mintti ammananaadan oottees. w20.12 2-3 ¶4-6; 5 ¶11

Kiitettida PHawuloosi Ayhuda woosa keettan darotoo sabbakiis. Leemisuwawu, Tasalonqqen Ayhuda woosa keettan “heezzu Sambbata gallassatun Xoossaa maxaafatuppe [Ayhudatuura] haasayiis.” (Oos. 17:1, 2) Ayhudatu woosa keettan sabbakiyoogee PHawuloosa ufayssennan aggenna. I Ayhuda asa. (Oos. 26:4, 5) PHawuloosi Ayhudatu hanotaa akeekiyo gishshawu, etayyo xalatettan sabbakana danddayiis. (Pili. 3:5) Asay Tasalonqqeppenne Beeriyaappe PHawuloosa wolqqan yedettin I Ateena biis. Zaarettidikka I “Aihuda woosa keettan Aihudatuuranne Xoossaassi goinniya Aihuda gidenna asatuura” haasayiis. (Oos. 17:17) SHin, PHawuloosi giyan sabbakiyo wode hara asaara gayttiis. He asatu giddon I ‘tamaarissiyoobaa ooratta yoho’ giidi qoppida eranchchatinne Ayhuda gidenna harati deꞌoosona. Eti A hagaadan giidosona: “Neeni nuuyyo oorattabaa yootaasa.”—Oos. 17:18-20. w20.04 9 ¶5-6

Neeni shugo gididobaara baaxetaydda deꞌikko, taani pattenna asa gaada qoppoppa. Nuuni ubbay balabaa oottiyo gishshawu wozuwaa baggaara Yihooway immiyo aaro kehatettay nu ubbaayyo koshshees. (Efi. 1:7; 1 Yoh. 4:10) Qassi gubaaꞌiyan deꞌiya nu ishanttinne michchontti nuna minttettana! Nuuni haasayana koshshiyo wode eti nu yootiyoobaa siyananne nuna minttettana danddayoosona. (Lee. 12:25; 1 Tas. 5:14) Hidootaa qanxxida Joy giyo michchiyaa Nayjeeriyaa biittan deꞌiyaara hagaadan gaasu: “Ishanttu maabaray baynnaakko taani awu gelanee? Ishanttuppenne michchonttuppe taani demmido minttettoy Yihooway ta woosaa zaaridoogaa bessiyaaba. Hidootaa qanxxida harata waata minttettanaakkokka taani etappe tamaaraas.” Gidikkonne, nuussi minttettoy koshshiyo wode nu ishshanttinne michchontti ubbatoo erennan aggana danddayiyoogaa hassayana koshshees. Yaatiyo gishshawu, kayma gidida nu mala Kiristtaanetukko biidi nuussi koshshiya maaduwaabaa qoncciyan yootana koshshees. w20.12 23-24 ¶7-8

Issi uraara gayttidi mata lagge gidanawu koyro oottana koshshiyaabay issippe wodiyaa aattiyoogaa. Intte intte qofaanne inttena gakkidabaa issoy issuwaara haasayiyo wode lagge gideeta. Gidoppe attin, Yesuusawu mata lagge gidanawu metiyaabati deꞌoosona. Hegeetuppe issoy aybee? Nuuni Yesuusaara gaytti erennaagaa. Koyro xeetu layttan deꞌida daro Kiristtaaneta hegaa malabay gakkiis. Gidikkokka, kiitettida PHeexiroosi hagaadan giis: “Intte a be7ana xayikkokka, siiqeeta; intte ha77i a be7ana xayikkokka, ammaneeta.” (1 PHe. 1:8, 9) Hegaa gishshawu, Yesuusaara gaytti erana xayikkonne ayyo mata lagge gidana danddayoos. Qassi, nuuni Yesuusaara haasayana danddayennaagaa. Nuuni woossiyo wode, Yihoowa woossoos. Nuuni woosaa Yesuusa sunttan woossoos, shin nuuni A haasayissokko. Yesuusi nuuni baakko woossanaadan koyenna. Aybissi? Woosay goyno gidiyo gishshawu goynnana koshshiyoy Yihoowa xalaalaassa. (Maa. 4:10) Gidikkokka, nuuni Yesuusa siiqiyoogaa qonccissana danddayoos. w20.04 20 ¶1-3

Beni Giriike wottanchchati woxxiyo wode arggaaciyoogaanne qohettiyoogaa mala metota genccana koshshiis. SHin eti bantta loohidobaaninne bantta wolqqa xallan ammanettana koshshiis. Nuuni waani woxxanaakko he wottanchchatudan loohoos. SHin etassi baynnabay nuuyyo deꞌees. Nuuni Yihoowappe wolqqaa demmana danddayoos, qassi I nuna maaddana danddayennabi baawa. Nuuni Yihoowan ammanettikko, I nuna loohissana xallawu gidennan, minttanawukka qaalaa geliis! Kiitettida PHawuloosi daro metota genccana koshshiis. Harati A cayiyoogaanne yedettiyoogaa xalla gidennan, I issi issitoo daafuriisinne bana agunttaadan ‘caddi oyqqiis’ giidobaa genccana koshshiis. (2 Qor. 12:7) I he metota Yihoowayyo haggaaziyoogaa agganawu gaaso oottiyoogaappe, Yihoowan ammanettanawu injjetiya hanota ootti xeelliis. (2 Qor. 12:9, 10) PHawuloosi hegaadan qoppido gishshawu, A gakkida meto ubban Yihooway A maaddiis. w20.04 29 ¶13-14

Yihoowaara, Yesuusaaranne kiitanchchatuura ‘issippe oottiyo’ alꞌꞌo imotay nuuyyo deꞌees. (2 Qor. 6:1, NW) Nuuni haggaaziyo wode ubban etaara oottoos. PHawuloosi bananne ha oosuwaa oottiya harata, “Nuuni Xoossaara issippe oottiyaageeta” giis. (1 Qor. 3:9, NW) Nuuni haggaaziyo wode, Yesuusaarakka issippe oottoos. Yesuusi bana kaalliyaageeta, “Asa ubbaa tana kaalliyaageeta oottite” giidi azazi simmidi, ‘taani inttenaara deꞌays’ giidoogaa hassaya. (Maa. 28:19, 20) Kiitanchchatubaa shin? Nuuni “Sa7an de7iya asa ubbaayyo . . . merinaa wonggeliyaa mishiraachchuwaa” yootiyo wode kiitanchchati nuna kaalettiyo gishshawu, Yihoowa keehi galatoos! (Ajj. 14:6) Nuuni saluwaappe demmiyo ha maadoy nu ay polanaadan oottii? Nuuni Kawotettaa mishiraachchuwaa zeriyo wode, amarida zerettay loꞌꞌo wozanan wodhdhidi diccees. (Maa. 13:18, 23) He tumaa zerettay diccidi ayfanaadan oottiyay oonee? Yesuusi hegaa zaaruwaa hachchi gallassa xiqisiyan yootiis. w20.05 30 ¶14-15

Yelida daroti ha wodiyan paraman shaahettidosona. Issi keettan deꞌiya so asaykka issoy issuwaayyo mata lagge gidennan aggana danddayees. Leemisuwawu, so asaa zoriya issi uri hagaadan giis: “Aayyiyaa, aawaynne naati issoy issuwaara haasayokkona, eti bantta komppiyuteriyaa, taabileetiyaa woy moobayliyaa bosherettiiddi, woy biiduwaa kaassaa kaaꞌiiddi daro wodiyaa aattoosona. He so asati issi keettan deꞌikkonne, issoy issuwaa loytti erokkona.” Ha alamiyan deꞌiya daro asaadan siiqennaageeta gidanawu, nuuni koyokko. Nuuni nu so asaa, qassi gubaaꞌiyan deꞌiya nu ishanttanne michchontta kaseppe aaruwan siiqiyoogaa meezetana koshshees. (Roo. 12:10) ‘Wozanappe siiqettiyoogaa’ geetetti birshshettida Giriiketto qaalay keehi siiqettiya so asaa giddon deꞌiya laggetettaa qonccissiyaaba. Gubaaꞌiyan deꞌiya nu ishanttanne michchontta nuuni hegaadan siiqana koshshees. Nuuni wozanappe siiqiyoogaa bessiyo wode, ubba asay ufayssan Yihoowawu issippe haggaazanaadan maaddoos.—Mik. 2:12. w21.01 20 ¶1-2

Issi ispportte citan, issippetettay baynna citaappe issippetettay deꞌiyo citay xoonana danddayiyoogee qoncce. Neeni Yihoowayyo haggaaziyoogan ne qofaa, ne koshshaanne neeyyo siyettiyaabaa issuwaa oottikko, ne wozanaykka he xooniya citaa mala gidana danddayees. Seexaanay ne wozanay shaahettanaadan koyiyoogaa hassaya. I neeni oottanaadan Yihooway koyiyoogaa ne eriyoobay ne iita amuwaara ne wozanan gaaddetanaadan koyees. SHin, neeni Yihoowayyo haggaazanawu ne wozanay kumetta gidana bessees. (Maa. 22:36-38) Seexaanay ne wozanaa shaakkanaadan oottoppa! Daawiti “taani ne sunttaayyo yayyana mala, taayyo issi wozanaa imma” giidoogaadan, neenikka hegaadan Yihoowa woossa. Ha woosaa ne deꞌuwan oosuwan peeshshanawu danddayettida ubbabaa ootta. Guuttabaappe gitabaa gakkanaashin galla galla neeni kuuyiyoobay Yihoowa gita sunttaa bonchchiyoogaa bessiyaaba gidanaadan murtta. Yaatiyoogan, neeni Yihoowa Markka gidiyoogaadan, he sunttaabaa wotta dentta qoppana. (Lee. 27:11) Qassi hananabaa yootiya Mikiyaasaagaadan nuuni ubbay, “GODAA nu Xoossaa sunttan meri merinau hemettana” gaana danddayoos.—Mik. 4:5. w20.06 13 ¶17-18

Huuphessa kawoynne hara kawotettati Xoossaa asaa xayssanawu denddiyoogee Ubbaa Danddayiya Xoossay keehi hanqqettanaadan oottana, yaatin Armmageedoona olay doommana. (Ajj. 16:14, 16) He wode, huuphessa kawoynne Maagooga Googa yame gidida hara kawotettati xayana, qassi “a maaddiyaabi xayana.” (Dane. 11:45) Ha qofay huuphessa kawoynne aara hashetiyaageeti waani xayanaakko, qassi nuuni waani attanaakko loytti qonccissees. (Dane. 12:1) He xiqisee yootiyoobay aybee? Haariiddi deꞌiya nu Kawuwaa Kiristtoos Yesuusawu hara sunttay Mikaaꞌeela. I 1914n saluwan Xoossaa Kawotettawu kawo gidido wodiyaappe doommidi Xoossaa ‘asaa heemmees.’ Sinttappe mata wode, I Armmageedoona olan “denddana” woy ba morkketa xayssana. He olay Daaneeli yootido, asi deꞌido ay wodeegaappenne iita ‘meto wodiyawu’ wurssettan haniyaaba gidana.—Ajj. 6:2; 7:14. w20.05 15-16 ¶15-17

Yooseefi aylle gidido wodekka, qashettido wodekka ba hanotaa laammanawu aybanne oottana danddayenna. Ubbatoo loꞌꞌobaa qoppanaadan A maaddidabay aybee? I oottana danddayenna ubbabaa qoppiyoogaappe bawu immettida oosuwaa oottanawu danddayettida ubbabaa oottiis. Yooseefi ubbatoo Yihoowa ufayssiyaaba xallaa qoppiis. Hegaappe denddidaagan, Yooseefi oottiyo ubbabaa Yihooway anjjiis. (Doo. 39:21-23) Ha alamee meqetti baynnaagaa gidiyoogaanne asay nuna naaqqanaagaa Yooseefa taarikee nuna hassayissees. Nu mala Kiristtaaneekka nuna qohana danddayees. SHin nuuni Yihoowa nuussi Zaalla woy Qato oottidi xeellikko, hidootaa qanxxokko woy ayyo haggaaziyoogaa aggokko. (Maz. 62:6, 7; 1 PHe. 5:10) Yihooway Yooseefi he aymota aymottanaadan oottiyo wode awu layttay 17 heera gidana danddayiyoogaakka hassaya. Hegaa gishshawu, Yihooway ba yelaga ashkkaratun ammanettees. Ha wodiyan, daro yelagati Yooseefa mala. Aagaadan eti Yihoowa ammanoosona. Etappe amaridaageeti Xoossawu azazettiyoogaa aggennan ixxido gishshawu, bessenna qasho qashettidosona.—Maz. 110:3. w20.12 16 ¶3; 17 ¶5, 7

PHeexiroosinne Yohaannisi Yesuusa kaalliyo gishshawunne abaa harata tamaarissiyo gishshawu yedetettiyoogaa bonchchodan xeellidosona. (Oos. 4:18-21; 5:27-29, 41, 42) Erissiyo ashkkarati yeellatanaadan oottiyaabi baawa. Bantta huuphiyaa ziqqi oottiya beni Kiristtaaneti, eqettiyaageeti asawu oottidoogaappe aadhdhiya loꞌꞌobaa haratuyyo oottidosona. Leemisuwawu, he Kiristtaanetuppe amaridaageeti xaafido Geeshsha Maxaafaa shaahoti miilooniyan qoodettiya asaa maaddiiddinne etawu hidootay deꞌanaadan oottiiddi deꞌoosona. Qassi eti sabbakido Kawotettay haꞌꞌi saluwan haariiddi deꞌeesinne mata wode ubba asaa haarana. (Maa. 24:14) Kiristtaaneta yedettida wolqqaama kawotettati bidintta kiyidi xayidosona; shin he ammanettida Kiristtaaneti haꞌꞌi saluwan kawotidosona. SHin eta yedettidaageeti hayqqidosona; eti hayquwaappe ubba denddikko, eti ixxido Kiristtaaneti sabbakido Kawotettawu haarettana.—Ajj. 5:10. w20.07 15 ¶4

Xoossay qaalaa gelidobatun Abrahaami mintti ammanido gishshawu, Xoossaa Kawotettan Kawo gidana Tiyettidaagaa woy Masiyaa I beꞌiis giyoogaa mala. Yesuusi ba wodiyan deꞌiya Ayhudatuyyo kaallidi deꞌiyaabaa yootidoy hegaassa: “Intte aawai Abrahaami, ta gallassaa be7anau laamotiis; be7idikka ufaittiis.” (Yoh. 8:56) Abrahaami ba zaretuppe amaridaageeti Yihooway essana Kawotettaa bagga gidanaagaa eriyoogeenne Yihooway gelido he qaalaa polanaashin I ba dosan naagidoogee qoncce. Abrahaami Xoossay keexxido katamaa woy Kawotettaa naagiyoogaa waati bessidee? Koyruwan, Abrahaami saꞌan deꞌiya ay kawotettaa baggakka gidibeenna. I issisan keexxidi mule deꞌibeenna; qassi asa kawotettawu mule exatibeenna. Qassi Abrahaami bawu kawotettaa essanawu malibeenna. I Yihoowawu ubbatoo azazettiisinne qaalaa gelidobaa I polanaagaa naagiis. Hegaadan oottiyoogan, Abrahaami Yihoowan keehi ammanettiyoogaa bessiis. w20.08 3 ¶4-5

Gannatiyan ooninne “Taani harggais” geennaagaa Yihooway qaalaa geliis. (Isi. 33:24) Yaatiyo gishshawu, hayquwaappe denddiyaageeti payya gididi denddana. SHin eti sohuwaara wottiyoobi baynna asa gidokkona. Yaaniyaakko, eta so asaynne eta laggeti eta waayi shaakki erana. Kiristtoosa SHaꞌu Layttaa Haaruwaa wode asay ubbay loddan loddan wottiyoobi baynna asa gidanaba milatees. SHaꞌu layttaa haaruwaa wurssettan Yesuusi Kawotettaa ba Aawaassi immana. Asaa wottiyoobi baynnaagaa oottiyoogaa gujjin, Yihooway oottanawu koyiyo ubbabaa Kawotettay he wode polana. (1 Qor. 15:24-28; Ajj. 20:1-3) Ne siiqiyoogeetuura zaarettada gayttiyoogee ay mala gidanaakko qoppa. Neeni ufayttada miiccaneeyye yeekkanee? Neeni keehi ufayttido gishshawu Yihoowawu sabaa mazamuriyaa yexxanee? Denddoy deꞌanaadan oottida nuussi qoppiya Aawaanne siiqiya A Naꞌaa nuuni wozanappe siiqanaagaa ammanettoos. w20.08 16-17 ¶9-10

Kiristtaaneti aqo oyqqennan Yihoowawu haggaazana danddayiyaakkonne qoppanaadan Kiitettida PHawuloosi minttettiis. (1 Qor. 7:8-9) PHawuloosi aqo oyqqibeenna Kiristtaaneti aqo oyqqidaageetuppe laafa giidi qoppibeennaagee qoncce. Aqo oyqqibeenna yelaga Ximootiyoosi Yihoowa haggaazuwan gitabaa oottanaadan I dooriis. (Pili. 2:19-22) Aqo oyqqiyoogaa woy oyqqennaagaa xallaappe denddidi, issi ishay loytti oottana danddayees woy danddayenna giidi qoppiyoogee bala gidiyoogee qoncce. (1 Qor. 7:32-35, 38) Yesuusikka PHawuloosikka Kiristtaaneti aqo oyqqana woy oyqqennan aggana bessees giidi tamaarissibookkona. Yaatin, aqo oyqqiyoogaa woy oyqqennan aggiyoogaa woygana danddayiyoo? Xiqimitaa 1, 2012n kiyida Wochchiyo Keelay (Amaarattuwaa) he oyshawu loꞌꞌo zaaruwaa yootees. Hagaadan gees: “Naaꞌꞌaykka, [aqo oyqqiyoogeenne oyqqennan aggiyoogee] Xoossay immido imota gaana danddayoos. . . . Aqo oyqqennan deꞌiyoogee yeellatanaadan woy azzananaadan oottiyaabadan Yihooway xeellenna.” Hegaa gishshawu, nuuni gubaaꞌiyan deꞌiya aqo oyqqibeenna ishanttanne michchontta bonchchana bessees. w20.08 28 ¶8-9

Amarida biittatun, asay mishiraachchuwaa siyanawu ufayttees. Hegee eti siyanawu yeemottiyooba! Hara biittatun qassi, asay Xoossaabaa woy Geeshsha Maxaafaabaa siyanawu darin koyenna. Ne deꞌiyo heeran asay mishiraachchuwaa siyii? Eti siyin aggin, Yihooway sabbakiyo oosoy polettiis gaana gakkanaashin aggennan nuuni oottanaadan I koyees. Sabbakiyo oosoy polettiyo wodiyaa Yihooway kasetidi keeri wottiis. Hegaappe guyyiyan, “wurssettai gakkana.” (Maa. 24:14) Wurssetta gallassatun asaa hanotay ay mala gidanaakko qassi aybi hananaakko Yesuusi ba erissiyo ashkkaratussi yootiis. He hanotati bana kaalliyaageeti sabbakiyo oosuwaa kaseyennaadan oottana danddayiyoogaa Yesuusi eriis. Yesuusi ba erissiyo ashkkarati ‘naagi uttanaadan’ yootiis. (Maa. 24:42) Nohe wode, asay naagettanaadan I yootiyo akeekissuwaa eti siyennaadan qofaa shaakkiya darobay deꞌees. Hegaa malabati ha wodiyaankka nu qofaa shaakkana danddayoosona. (Maa. 24:37-39; 2 PHe. 2:5) Hegaa gishshawu, nuuni oottanaadan Yihooway immido oosuwaa kaseyanawu koyoos. w20.09 8 ¶1-2, 4

Seexaanay keehi ‘hanqqettiis,’ qassi A hanqqoy gattiyo qohuwaappe nuuni mule attana danddayokko. (Ajj. 12:12) Mata wode, nu ubbaa ammanoy paacettana. Qassi, “sa7ai merettoosappe hachchi gakkanaashin de7ibeennabainne qassi hagaappe sinttaukka mule de7enna iita waayee he wode de7ana.” (Maa. 24:21) He wode, nu so asay nu bolli denddananne nu oosoy muleera teqettana danddayees. (Maa. 10:35, 36) Nuuni ubbaykka Kawuwaa Aasaagaadan, maaduwaanne naaguwaa demmanawu Yihoowan ammanettanee? (2 Odi. 14:11) Nu ammanoy minnanaadan Yihooway ha wodiyan nuna loohissees. Nuuni ubbay minnidi deꞌanaadan Yihooway ‘ammanettida wozannaama ashkkaraa’ baggaara “qumaa koshshiyo wodiyan” nuussi immees. (Maa. 24:45) SHin, nuussi Yihoowan mino ammanoy deꞌanaadan nuuni ubbay nuuyyo danddayettida ubbaa oottana koshshees.—Ibr. 10:38, 39 w20.09 18 ¶16-18

Yihooway ba halchchuwaara maayettiyaaban, deriyaa haariyaageeti I koyiyoobaa oottanaadan denttettiyoogan wolqqaama gidida ba geeshsha ayyaanaa goꞌettana danddayees. Asay ba koyiyoosaa haattay gogganaadan zaarana danddayees. Hegaadankka, Yihooway deriyaa haariyaageeti A halchchuwaa polanaadan ba geeshsha ayyaanaa goꞌettana danddayees. Hegaadan haniyo wode, deriyaa haariyaageeti Xoossaa asaa goꞌꞌiyaabaa kuuyoosona. (Izi. 7:21, 25, 26ra gatta xeella.) Nuuni ay oottana danddayiyoo? Sabbakiyoonne shiiqota shiiqiyoogaara gayttidabaa eti kuuyiyo wode “kawotuyyoonne sunttatettai de7iyo ubbatuyyo” woossana danddayoos. (1 Xim. 2:1, 2; Nah. 1:11) Koyro xeetu layttan deꞌida Kiristtaanetudan, nuunikka qashuwan deꞌiya ishanttussinne michchonttussi Xoossaa wozanappe woossana koshshees.—Oos. 12:5; Ibr. 13:3. w20.11 15 ¶13-14

Neeni xannaꞌissido uri xammaqettiyo wode ne keehi ufayttaasa! (1 Tas. 2:19, 20) Yaatiyo gishshawu, xammaqettidi mati erissiyo ashkkarata gididaageeta eta xannaꞌissidaageetussi xalla gidennan, kumetta gubaaꞌiyawu eti paxa deꞌiya markkattiya dabddaabbe gaana danddayoos. (2 Qor. 3:1-3) Oyddu layttatun, kumetta alamiyan aginan aginan 10,000,000 gidiya Geeshsha Maxaafaa xinaateti deꞌiyoogaa eriyoogee ufayssees. He oyddu layttatun, 280,000 gidiyaageeti layttan layttan xammaqettidosona. He miilooniyan qoodettiyaageeti xammaqettanaadan nuuni waati maaddana danddayiyoo? Yihooway asay ba markka gidanaadan asawu injjiyaa immiiddi deꞌees. Diccidi xammaqettanaadan sohuwaara eta maaddanawu nuussi danddayettida ubbabaa nuuni oottiyoy hegaassa. Wodee wuriiddi deꞌees!—1 Qor. 7:29; 1 PHe. 4:7. w20.10 6 ¶1-2

Kawuwaa Saaꞌooli Yihoowawu azazettibeenna. I mooridoogaa Sameeli ayyo yootido wode, Saaꞌooli ba mooruwaa ammanennan ixxiis. Yaatidi hegee gita mooro gidennaagaanne asay wolqqanttin hegaa I oottidoogaa yootiis. (1 Sam. 15:13-24) Kasekka Saaꞌooli hegaa malabaa oottiis. (1 Sam. 13:10-14) I otorettidoogee azanttiyaaba. I ba qofaa suurissibeenna gishshawu, Yihooway A seeriisinne ixxiis. Nuuni Saaꞌoola mala gidana koyenna gishshawu, kaallidi deꞌiya oyshata nuna oychchana bessees: ‘Taani Xoossaa Qaalaa nabbabiyo wode, nabbabidobaa oosuwan peeshshennan agganawu gaasoyiyaanaa? Taani oottiyoobay iita gidenna gaada qoppiyaanaa? Taani oottidobaa haratun gaasoyiyaanaa?’ Nuuni ha oyshatuppe awugaanne ee giidi zaarikko, nu qofaanne nu xeelaa laammana koshshees. Yaatana xayikko, nuuni otorettana danddayiyo gishshawu, Yihooway nuna ba dabbo oottenna. w20.11 20 ¶4-5

Yelagatoo, oossi oottanaakko kuuyite. Yihooway oonakko, A shenee aybakko, qassi hegaa intte deꞌuwan waati oosuwan peeshshana danddayiyaakko loytti akeekana koshshees. (Roo. 12:2) Yaatidi intte deꞌuwan aybippenne aadhdhiyaabaa, hegeekka Yihoowassi haggaazanawu kuuyana. (Yaas. 24:15) Intte ubbatoo Geeshsha Maxaafaa nabbabiyaabanne xannaꞌiyaaba gidikko, kaseegaappe aaruwan Yihoowa siiqana; qassi intte ammanoy minnana. Intte deꞌuwan Yihoowa sheniyaa oottanawu kuuyite. Intteyyo deꞌiya eraa intte goꞌꞌa xallawu goꞌettiyo wode ufayttanaagaa Seexaanaa alamee yootees. SHin aquwaaba halchchiyoogan xeelaa wottiyaageeti ‘daro metuwan banttana qohiyoogaa’ nuuni eroos. (1 Xim. 6:9, 10) SHin, intte Yihooway yootiyoobaa siyikko, qassi intte deꞌuwan kasetidi A sheniyaa oottikko, deꞌoy intteyyo injjetananne “giigana.”—Yaas. 1:8. w20.10 30-31 ¶17-18

Koyro xeetu layttan, Yesuusi sabbakido mishiraachoy asa ubbawu hidootay deꞌanaadan oottiis. Yesuusi bana kaalliyaageeti I doommido oosuwaa ‘saꞌaa gaxaa gakkanaashin’ markkattanaadan azaziis. (Oos. 1:8) Eti he oosuwaa bantta wolqqan oottana danddayennaagee qoncce. Yesuusi etawu qaalaa gelido ‘minttettiya’ woy maaddiya geeshsha ayyaanay etawu koshshees. (Yoh. 14:26; Zak. 4:6) Yesuusa kaalliyaageeti PHenxxaqosxxe gallassi 33 M.Ln geeshsha ayyaanaa ekkidosona. Ayyaanay maaddin eti sohuwaara sabbakiyoogaa doommidosona; yaatin guutta wodiyan shaꞌan qoodettiyaageeti mishiraachchuwaa ammanidosona. (Oos. 2:41; 4:4) Yedetay gakkido wode, erissiyo ashkkarati yayyiyoogaappe Xoossay eta maaddanaadan oychchidosona. Eti, “Nuuni ne ashkkarati, ne qaalaa kumetta xalan yootanaadan, nuna danddayissa” giidi woossidosona. Yaatin eta ubban geeshsha ayyaanay kumin, “Xoossaa qaalaa xalan yootidosona.”—Oos. 4:18-20, 29, 31. w20.10 21 ¶4-5

Yihooway Yesuusa hayquwaappe denttidoogaa nuuni ammanettana danddayiyoy aybissee? Yesuusi hayquwaappe denddin daroti beꞌidosona; qassi hegaa haratuyyo markkattidosona. (1 Qor. 15:5-7) Kiitettida PHawuloosi yootido koyro markkay kiitettida PHeexiroosa (Keefa). Yesuusi denddin PHeexiroosi beꞌidoogaa hara erissiyo ashkkaratikka yootidosona. (Luq. 24:33, 34) Hegaappe guyyiyan, Yesuusi denddi simmin I kiittido ‘tammanne naaꞌꞌati’ beꞌidoogaa PHawuloosi yootiis. Hegaappe simmin, Maatiyoosa 28:16-20n odettida, geella Galiilan shiiqido keehi ufayssiya shiiquwan Kiristtoosi, “ichchashu xeetaappe dariya ishatussi issitoo qoncciis.” Yesuusi ‘Yaaqoobassikka qoncciis;’ Yaaqoobi Yesuusi Mase gidiyoogaa koyro ammanibeenna A ishaa gidennan aggenna. (Yoh. 7:5) Yaaqoobi Yesuusi denddidoogaa beꞌi simmidi ammaniis. PHawuloosi 55 M.L. heeran ha dabddaabbiyaa xaafido wode, Yesuusi denddin beꞌida daroti paxa deꞌiyo gishshawu, Yesuusi denddidoogaa siriya ooninne eta oychchana danddayees. w20.12 3 ¶5, 7-8

Nuuyyo ufayssiyaabay siyettenna wode, ubba qassi daro wodiyawu sahettikko, loꞌꞌobaa qoppiyoogee metana danddayees. Yaatiyo gishshawu, maaddana mala Yihoowa oychchana koshshees. Yihooway maalaaliya ogiyan ha wodiyan nuna pattennaba gidikkonne nuna minttetteesinne genccanaadan koshshiya wolqqaa immees. (Maz. 94:19) Leemisuwawu, I nu ishanttinne michchontti so giddon amarida oosuwaa oottiyoogan nuna maaddanaadan denttettana danddayees. I nu ishantti nunaara woossanaadan oottana danddayees. Woy ooratta alamiyan sahoynne tuggay xayin wottiyoobi baynna deꞌuwaa deꞌiyo ufayssiya hidootaa mala Xoossaa Qaalan deꞌiya minttettiya qofaa hassayanaadan I nuna maaddana danddayees. (Roo. 15:4) SHin nuuni daro haggaazana danddayennabadan qoppennan waayi aggana. Lorel giyo michchiyaa shemppanaadan maaddiya maashiniyaa giddon 37 layttaa zinꞌꞌada takkaasu! A kansseriyaa harggaawusu, darotoo shuhettaasu, qassi gogaa harggee O sakkees. SHin, haggaaziyoogaa hegee O diggibeenna. A ba soo yiida narssetussinne haratussi markkattaasu; qassi baa giishin 17 asay Yihoowabaa eranaadan maaddaasu! w20.12 24 ¶9; 25 ¶12

Kiitettida PHawuloosawu maadoy koshshiis. Asay ubbay PHawuloosa 56 M.L. heeran, Yerusalaamen deꞌiya beeta maqidasiyaappe kare goochchi kessidi woranawu maliis. Wonttetta gallassi, Sanhedirina shilootaa sintti PHawuloosa ehiidi morkketi qohidosona. (Oos. 21:30-32; 22:30; 23:6-10) He wode PHawuloosi hagaadan qoppennan aggenna: ‘Ha naaquwaa taani awude gakkanawu genccana danddayiyaanaa?’ Yesuusi PHawuloosa waati maaddidee? PHawuloosi qashettido galla qammi, “Godai” PHawuloosa lanqqiyan eqqidi: “Neeni taassi Yerusalaamen markkattidoogaadan, Roomenkka markkattanau bessees; minna; aikko baawa” yaagiis. (Oos. 23:11) Yesuusi giidobay PHawuloosa keehi minttettiis! PHawuloosi Yerusalaamen markkattido gishshawu, Yesuusi A galatiis. PHawuloosi gujjidi markkattanawu Roome saruwan gakkanaagaa Yesuusi yootiis. PHawuloosi hegaa siyi simmidi, ba aawaa kiyuwan deꞌiya naꞌay woppu giyoogaadan ikka woppu giidoogee qoncce. w20.11 12 ¶1, 3; 13 ¶4

Kawotettaa hidootay “nu shemppuwaayyo markkabiyaa oiqqiya qaaxxenna birata mala,” hegee metiya wodiyan woppu giidi deꞌanaadan nuna maaddees. Yihooway sinttanawu gelido qaalaa qoppa. He wode ooninne issibawukka hirggenna. (Isi. 65:17) Sarotettay deꞌiyo ooratta alamiyan deꞌiyaabadan qoppa; yan hirggissiya hanotati deꞌokkona. (Mik. 4:4) Ooratta alamiyaabaa neeni haratuyyo yootiyo wode ne hidootaykka minnana. Sabbakiyoogaaninne erissiyo ashkkara oottiyo oosuwan neessi danddayettida ubbabaa ootta. Neeni yaatikko, “ufaissan naagi uttido kumetta tumatettaa wurssettai gakkanaassi” mintta oyqqana danddayaasa. (Ibr. 6:11) Nuuni deꞌiyoy wurssetta wodiyan gidiyo gishshawu, hirgganaadan oottiya daro metoti nuna gakkoosona. Nuuni he metota nu wolqqan gidennan Yihoowan ammanettiyoogan genccananne woppu giidi deꞌana danddayoos. ‘Woppu giyoogeenne ammanettiyoogee intteyyo wolqqa gidana’ giidi Yihooway gelido qaalan ammanettiyoogaa oosuwan bessiyaageeta gidoos.—Isi. 30:15. w21.01 7 ¶17-18

Yaaqooba 5:11 Yihooway wozanappe siiqiyoogaa akko shiiqanaadan oottiya hara eeshshaara, hegeekka A maarotaara gattidi qonccissiyoogaa akeeka. (Kes. 34:6) Yihooway nuuni balidobaa gishshawu nuussi atto giyoogee I nuna maariyo issi oge. (Maz. 51:1) Maarotay moorida urawu atto giyoogaa xalla gidennaagaa Geeshsha Maxaafay yootees. Hegee issi asi waayettiyoogaa beꞌida uri hegan mishettidi izaawa maaddanawu baaxetiyoogaa bessiyaaba. Yihooway issi aayyiyaa ba naꞌaa maaddanawu koyiyoogaappekka aaruwan, nuna maaddanawu keehi koyiyoogaa yootiis. (Isi. 49:15) Yihooway maariyoogee nuuni waayettiyo wode nuna maaddanaadan A denttettees. (Maz. 37:39; 1 Qor. 10:13) Nu ishanttinne michchontti nuna yiilloyiyo wode, nuuni lancciyaa uluwan oyqqennan etawu atto giyoogan eta maariyoogaa bessana danddayoos. (Efi. 4:32) SHin, nuuni nu ishanttanne michchontta metoy gakkiyo wode maaddiyoogee maariyoogaa bessiya keehi koshshiyaaba. Yaatiyo gishshawu, ooppenne aaruwan wozanappe siiqiya Yihoowa milatoos.—Efi. 5:1. w21.01 21 ¶5

So asawu huuphe gidida uri naagettana bessiyo issibay deꞌees. I ba so asawu ayyaanaaban koshshiyaabaa bessiyaagaadan kunttennaadan eta loohissennaadan diggiya oosuwaa keehi daro saatiyaa oottana koshshenna. Yihooway nuna maaddanawu koyiyo gishshawu nuna loohisseesinne seerees. (Ibr. 12:7-9) Yesuusikka ba Aawaagaadan erissiyo ashkkarata siiquwan loohissiis. (Yoh. 15:14, 15) I mintti zorikkonne keha. (Maa. 20:24-28) Nuuni nagaranchcha gidiyoogaanne darotoo baliyoogaa I erees. (Maa. 26:41) Yihoowanne Yesuusa leemisuwaa kaalliya azinay ba machchiyaanne ba naati nagaranchcha gidiyoogaa hassayees. I ba machchee woy ba naatu bolli ‘hanqqettana’ bessenna. (Qol. 3:19, NW) SHin I Galaatiyaa 6:1n deꞌiya maaraa oosuwan peeshshees, qassi ikka nagaranchcha gidiyoogaa hassayidi “ashkketetta ayyaanan” eta suurissanawu baaxetees. Yesuusaagaadan, oosuwan bessiyoogee tamaarissanawu loꞌꞌo oge gidiyoogaa I akeekees. w21.02 6-7 ¶16-18

Gubaaꞌiyan deꞌiya ubbatu deꞌuwaanne Yesuusa ammaniya hara O deꞌuwaakka ‘Yihooway’ wozuwaa qanxxidi shammiis. (Mar. 10:45; Oos. 20:28, NW; 1 Qor. 15:21, 22) Yaatiyo gishshawu, ba deꞌuwaa nuussi yarshshida Yesuusa I gubaaꞌiyawu huuphe oottidi sunttidoogee bessiyaaba. Asay, so asaynne gubaaꞌiyan deꞌiya ubbay ay oottana koshshiyaakko higgiyaa kessiyo aawatettay Yesuusawu imettidoy hegaassa. Qassi he higgeta polissiyo maatay ayyo deꞌees. (Gal. 6:2) SHin Yesuusi oottiyoobay higgiyaa kessiyoogaa xalla gidenna. I nuna ubbaa loytti heemmeesinne siiqees. (Efi. 5:29) Michchontti Kiristtoosi eta heemmanaadan sunttido attumaageetussi azazettiyoogan, A bonchchiyoogaa bessoosona. Ishantti michchontta bonchchiyoogan bantta bolli aawatettay deꞌiyoogaa bonchchiyoogaa bessoosona. Gubaaꞌiyan deꞌiya ubbay haratussi Yihooway maataa immidoogaa bonchchiyo wode, gubaaꞌee sarotettan deꞌees. Hegaappekka aaruwan, nuuni saluwan deꞌiya nu Aaway Yihooway sabettanaadan oottoos. w21.02 18-19 ¶14-17

Daawiti Saaꞌoolappe baqatidi Pilisxxeema biittan deꞌiyo wode, inne A asati bantta soo asaa aggidi olettanawu biidosona. Daawita asati olettanawu bin, morkketi eta keettaa bonqqidi eta so asaa omooddidosona. Daawiti gooba olanchcha gidiyo gishshawu, omoodettidaageeta aynne metootennan zaarana danddayiyo ogiyaa qoppana danddayees. SHin Daawiti Yihooway maaddanaadan oychchiis. Daawiti, “Taani ha woraajjidaageetu geeduwaa kaallada boo?” giidi Yihoowa oychchiis. Yihooway Daawiti baana koshshiyoogaanne omooddettidaageeta zaarana danddayiyoogaa yootiis. (1 Sam. 30:7-10) Ha hanotaappe intte ay tamaarana danddayeetii? Issibaa kuuyanaappe kase harata zoriyaa oychchite. Yelagatoo, inttena yelidaageeta zoriyaa oychchite. Qassi kayma cimatuura haasayiyoogan loꞌꞌo zoriyaa demmana danddayeeta. Yihooway ha sunttettida cimatun ammanettees; qassi inttekka ammanettana danddayeeta. Yihooway eta gubaaꞌiyawu imettida “imota” oottidi xeellees. (Efi. 4:8) Intte etaagaadan ammanikko, qassi eti yootiyo loꞌꞌo zoriyaa siyikko loꞌꞌobaa kuuyana. w21.03 4-5 ¶10-11

Nuuni tamaaridobaa oosuwan peeshshennaba gidikko, ba keettaa shafiyan keexxiya uraa mala gidanaagaa Yesuusi yootiis. I minnidi oottikkonne, A daafuray mela. Aybissi? Carkkoynne diꞌoy sugikko he keettay kunddiyo gishshataassa. (Maa. 7:24-27) Hegaadan, nuuni tamaaridobaa oosuwan peeshshana xayikko mela daafuroos. Nu ammanuwaa paacciya metoy woy yedetay gakkiyo wode, nu ammanoy mino gidenna. SHin, nuuni xannaꞌiyaabanne hegaa oosuwan peeshshiyaaba gidikko, loꞌꞌobaa kuuyana, aaro sarotettaa demmana, qassi nu ammanoy minnana. (Isi. 48:17, 18) Metoy nuna gakkiyo wode Yihoowayyo ammanettidi deꞌanawu, nuuni aggennan woossananne A Qaalaa ubbatoo xannaꞌana koshshees. Qassi nuuni oottana danddayiyo keehi koshshiyaabaappe issoy Yihooway bonchchettanaadan oottiyoogaa gidiyoogaa muletoo hassayana koshshees. Yihooway nuna mule aggennaagaanne I nuna siiqennaadan aybinne diggana danddayennaagaa ammanettana danddayoos.—Ibr. 13:5, 6. w21.03 15 ¶6; 18 ¶20