Isiine

Nu woosay zaaruwaa demmanaadan nuuni Yesuusaara dabbotiyoogee koshshana danddayees. Hegawu “Yesuusa sunttan” woossiyoogaa xallay gidenna. Nu woosaa zaaranawu Yihooway Yesuusa waati goꞌettiyaakko nuuni erana bessees. Yesuusi ba erissiyo ashkkarata hagaadan giis: “Ta sunttan intte woossiyo ubbabaa taani intteyyo polana.” (Yoh. 14:13) Nu woosaa siyiyaageenne zaariyaagee Yihoowa gidikkonne, Yihooway ba kuuyidobaa Yesuusi polanaadan maataa immiis. Hegaa gishshawu, Xoossay nu woosaa zaaranaappe kase, Yesuusi zorido zoriyaa nuuni oosuwan peeshshidaakkonne beꞌees. Leemisuwawu, Yesuusi hagaadan giis: “Intte inttena naaqqida hara asaa naaquwaa atto giikko, saluwan de7iya intte Aawaikka intteyyo atto gaana. SHin intte inttena naaqqida hara asaa naaquwaa atto gaana xayikko, intte Aawaikka intte naaquwaa atto geenna.” (Maa. 6:14, 15) Yaatikko, Yihoowaynne Yesuusi nuna oyqqidoogaadan nuunikka harata oyqqiyoogee keehi koshshiyaaba! w20.04 22 ¶6

Kiitettida PHawuloosi asaa ufayssiyaabaa akeekiis; yaatidi eta haasayissiyo ogiyaa hanotaadan laammiis. Leemisuwawu, Lisxxiran I yootiyoobaa siyiya cora asay Geeshsha Maxaafaabaa darin erenna woy mule erenna. Hegaa gishshawu, PHawuloosi eti akeekiyo ogiyan haasayiis. I muruta ayfe ayfida kattaabaanne deꞌuwan ufayttiyoogaabaa yootiis. I yootiyoobaa ezggiyaageeti akeekanawu metootenna qaalatanne leemisota goꞌettiis. Ne haggaazo moottan deꞌiya asaa ufayssiyaabaa loytta akeeka; qassi ne haasayissiyo ogiyaa hanotaadan laamma. Issi ura haasayissiyo wode woy A son deꞌiyaabaa beꞌiyo wode A ufayssiyaabaa waata akeekana danddayay? Akeekan xeella. I ataakilttiyaa tokkiiddi, maxaafaa nabbabiiddi, moorettida kaamiyaa giigissiiddi, woy harabaa oottiiddi deꞌana danddayees. I oottiiddi deꞌiyoobaa goꞌettada haasayissiyoogaa doommana danddayaasa. (Yoh. 4:7) Issi uri maayiyo maayoy I awu biittaa asakko, A oosoy aybakko woy I dosiyo ispportte citay awugaakko bessana danddayees. w20.04 11 ¶11-12

Amarida ishanttinne michchontti keehi unꞌꞌettiyo gishshawu, hara asaara eta gattiya hanotatun eti keehi yayyoosona. Daro asaara walahettiyoogee eta metiyaaba gidikkonne, eti gubaaꞌiyaa shiiqotanne gita shiiqota aggennan shiiqoosona. Erenna asaara haasayiyoogee eta metiyaaba gidikkonne, eti haggaazuwan harata haasayissoosona. Ne hanotay hegaa mala gidikko, hegee ne xallaa gakkiyaabaa gidennaagaa ammanetta. Daro asay neegaadan qoppees. Neeni ne kumetta shemppuwaappe oottiyoogee Yihoowa ufayssiyoogaa hassaya. Neeni hidootaa qanxxabeennaagee I nena anjjiyoogaanne neessi koshshiya wolqqaa immiyoogaa bessees. (Pili. 4:6, 7) Neessi abbee pacci uttidaashin woy neeni unꞌꞌettaydda Yihoowawu haggaaziyaagaa gidikko, hegan Yihooway ufayttiyoogaa ammanettana danddayaasa. Nuuppe daroti sahoy caddiyoogeeta gidikkonne, genccoos. (2 Qor. 4:16) Yihooway maaddin, nuuni ubbay wottaa woxxidi wurssana! w20.04 31 ¶20-21

Xoossay saꞌaa medhdhido ogiyaa nuuni qoppiyo wode, I aadhdhida eranchcha gidiyoogaa akeekoos. (Ibr. 3:4) Saꞌay asaa deꞌuwawu koshshiya ubba hanotaa kunttiyo gishshawu keehi dumma. Nuuni salo gufanttuwan deꞌiya saꞌaa ano abban deꞌiya wolwoluwaara geeddarssana danddayoos. SHin asay kumido wolwoluwaappe saꞌay dummatiyo keehi gitabati deꞌoosona. Leemisuwawu, asay banttawu okisijiniyaa, qumaanne haattaa medhdhana koshshiyaakko, qassi moorettidabaa wolwoluwaappe gaxi olana xayikko hegan ay keena wodiyaa paxa deꞌanee? He wolwoluwan deꞌiya asay sohuwaara hayqqana. SHin, biilooniyan qoodettiya asaynne mehee doꞌay saꞌan deꞌees. Saꞌay nuussi koshshiya okisijiniyaa, qumaanne haattaa ubbaa medhdhiyo gishshawu he koshshiyaabati nuuyyo awudenne wuri erokkona. Moorettidabay ubbay saꞌan attiyaaba gidikkonne, saꞌay deꞌanawu loꞌꞌiya soho. Hegaadan waani hanana danddayii? Saꞌay moorettidabaa haranttuwaa goꞌettana danddayiyo loꞌꞌobawu laammanaadan oottidi Yihooway saꞌaa medhdhiis. w20.05 20 ¶3-4

Seexaanay Yihooway worddotiis giidi Hewaanissi yootiis giyoogaa mala. Yaatiyoogan, Seexaanay Dabloosa woy sunttaa mooriyaagaa gidiis. Hewaana keehi cimettaasu; A Seexaanaa ammanaasu. (1 Xim. 2:14) A Yihoowappe aattada Seexaanaa ammanaasu. Hegee Hewaana aybippenne iitabaa sohuwaara kuuyanaadan oottiis. A Yihoowawu azazettennan agganawu kuuyaasu. Yihooway meennaadan diggido mittaa teeraa A maasu. Yaatada, amaridaagaa Addaameyyo immaasu. (Doo. 3:6) Hewaana Seexaanaayyo yootana koshshishin aggidobaa ane qoppa. A hagaadan gaana danddayawusu shin gaada qoppa: “Neeni oonakko ta erikke, shin taani ta Aawaa, Yihoowa erays; qassi A siiqaysinne aani ammanettays. Addaamessinne taassi deꞌiya ubbabaa I immiis. Neeni abaa iitabaa yootiyoy aybissee? Hagaappe kichcha!” Ammanettiyoogaa bessiya hegaa mala qaalaa ba siiqiyo naꞌeeppe siyidaakko Yihooway ay keena ufayttanddeeshsha! (Lee. 27:11) SHin Addaameekka Hewaanakka Yihoowawu aggenna siiquwaa bessibookkona. Eti bantta Aawawu hegaa mala siiquwaa bessibeennaagee A sunttay moorettiyo wode awu exatennaadan oottiis. w20.06 4 ¶10-11

Yihoowa haggaazuwan nu michchontti oottiyo ubbabawu etawu galatay bessees. He oosoy keexxiyoogaanne bottokoniyoogaa, hara qaalan sabbakiya citaara haggaaziyoogaa, qassi bantta dosan Beeteelen oottiyoogaa gujjees. Daafaban qohettidaageeta maaddiyo oosuwaaninne nu xuufeta birshshiyoogan eti maaddoosona; qassi aqinyenne misoonaawe gididi haggaazoosona. Hegaa bollikka, bantta azinati gubaaꞌiyaaninne dirijjitiyan banttawu imettida aawatettaa ubbaa polanaadan machchoti maaddoosona. Machchoti eta maaddana xayikko, he “imota” gidida aawatettay deꞌiyo ishantti loytti oottana danddayokkona. (Efi. 4:8) Akeekanchcha cimati bantta dosan oottiya “maccaasati daro” gidiyoogaanne darotoo eti mishiraachchuwaa sabbakiyoogan gooba gidiyoogaa eroosona. Qassi ammanettida kayma michchontti yelaga michchontti paaciyaa xoonanaadan maaddiyoogan gooba gidiyoogaa cimati akeekoosona. (Tii. 2:3-5) Nu michchonttussi galatay bessiyoogee qoncce! w20.09 23-24 ¶13-14

Guutta wodiyawu A asaara hashetiyoogaa aggikkonne, Yihooway bawu kase haggaazidaageeta dogenna; eti awu haggaaziyoogan oottidobaakka I dogenna. (Ibr. 6:10) Hananabaa yootiya Isiyaasi Yihooway ba asawu ay keenaa qoppiyaakko keehi ufayssiya leemisuwan qonccissiis. Isiyaasi, “I ba wudiyaa henttanchchaadan mizees; ba dorssa maratakka ba qesiyan shiishshidi, ba kiyuwan idimmana” yaagiis. (Isi. 40:11) A ashkkaratuppe issoy haggaaziyoogaa aggiyo wode nu Gita Henttanchchawu Yihoowawu aybi siyettii? Yesuusi ba erissiyo ashkkarata kaallidi deꞌiyaagaadan oychchido wode Yihoowawu siyettiyaabaa qonccissiis: “Issi asayyo xeetu dorssati de7iyaageetuppe issoi bayikko, uddufun tammanne uddufunaa deriyan yeggi bayidi, he bayidaagaa koyanau beennee? Intte woigeetii? Taani intteyyo tumaa gais; i demmikko, bayibeenna uddufun tammanne uddufun dorssatuppe aattidi, he issi dorssan ufaittees.”—Maa. 18:12, 13. w20.06 19-20 ¶8-9

Nuuni danddayiyo ayba ogiyankka Yihoowawu haggaaziyoogaa gita maatadan xeelloos. (Maz. 27:4; 84:10) Issi ishay Yihoowa dirijjitiyan kaseegaappe aaruwan ba dosan eeno giidi oottiyo maataa demmikko, hegee keehi loꞌꞌo. SHin I aawatettaa ekkiyo wode haratuppe aadhdhiya asadan qoppana bessenna. (Luq. 17:7-10) A halchchoy ba huuphiyaa ziqqi oottidi harata haggaaziyoogaa gidana koshshees. (2 Qor. 12:15) Geeshsha Maxaafay banttabaa bessiyaagaappe aaruwan qoppida asatubaa yootees. Diyotirefeesi ashkke gidenna gishshawu, gubaaꞌiyan “halaqa” gidanawu baaxetiis. (3 Yoh. 9) Ooziyaani otorettidi Yihooway awu immibeenna oosuwaa oottanawu maliis. (2 Odi. 26:16-21) Abeseloomi kawo gidanawu koyido gishshawu, asay A kaafanaadan eta siiqiyaaba milatiis. (2 Sam. 15:2-6) Ha Geeshsha Maxaafaa taariketi yootiyoogaadan, bantta bonchchuwaa koyiya asatun Yihooway ufayttenna. (Lee. 25:27) Guyyeppe, otorettiyaageetanne haratun nashettanawu koyiyaageeta metoy gakkana.—Lee. 16:18. w20.07 4 ¶7-8

Kiristtaane gidida amarida so asay bantta biittan merettida metuwaa woy oosuwaa gaasuwan hara biitti boosona. Hegaa gishshawu, eta naati haꞌꞌi tamaariyoy eti biido biittaa qaalaana gidana danddayees. Yelidaageetikka oosuwaa demmanawu he qaalaa tamaariyoogee koshshana danddayees. Eti deꞌiyoosan eta qaalaa goꞌettiya gubaaꞌee woy citay deꞌikko shin? So asay shiiqana koshshiya gubaaꞌee awugee? Eti he biittaa qaalaa haasayiyo gubaaꞌiyan shiiqana koshshiiyye bantta biittaa qaalaa haasayiyo gubaaꞌiyan shiiqana koshshii? So asawu huuphe gidida uri ba so asay ay gubaaꞌiyan shiiqanaakko kuuyana koshshees. He izaawu allaalle gidiyo gishshawu, ba so asawu koshshiya loꞌꞌobay aybakko I kuuyana bessees. So asawu huuphe gididaagee kuuyidobaa nuuni bonchchana koshshees. I kuuyidobay ayba gidikkonne, he so asaa mokki ekkiyoogaaninne siiqiyoogan eti kuuyidobaa maayettiyoogaa bessoos.—Roo. 15:7. w20.08 30 ¶17-18

Nuuni Yihoowappe wolqqaa demmanawu koyikko, nu minotettay, timirttee, diccido wogaynne duretettay haratuppe nuuni aadhdhiyaabadan qoppanaadan oottana koshshenna. Hegeeti nuuni Yihoowawu maaddiya asa gidanaadan oottokkona. Xoossaa asa giddon, asa qofan “aadhdhida eranchchati, wolqqaamatinne xoqqa sheeshshati daro gidokkona.” (1 Qor. 1:26) Hegaa gishshawu, ha menttuwaa doomettan odettidabati neessi baynnaba gidikkokka, Yihoowawu haggaazana danddayaasa. Yihooway ba wolqqan nena kaafanawu goꞌettiyo ogiyaa he hanotatun akeekana danddayaasa. Leemisuwawu, ne ammanuwaa eqettiya asatuyyo neeni yayyikko, ne ammaniyoobaa yootanawu Yihooway xalatettaa immanaadan woossa. (Efi. 6:19, 20) Caddi oyqqiya sahuwaa neeni genccaydda deꞌikko, danddayettida keenan awu haggaaziyoogan oosoy daridoogaa gidada deꞌanawu Yihooway neessi koshshiya minotettaa immanaadan woossa. Ubba wode Yihooway nena maaddiyoogaa, ne ammanoy dicciyoogaanne neeni kaseegaappe minniyoogaa akeekaasa. w20.07 16 ¶9

Nuuni nu deꞌuwan Xoossaa Kawotettaa kaseyanawu koyikko, Xoossaa ufayssanawu ba goꞌꞌaa ba dosan aggida Abrahaama mala gidana bessees. (Mar. 10:28-30; Ibr. 11:8-10) Nena metoy gakkenna gaada naagoppa. Bantta deꞌo laytta ubban Yihoowayyo haggaazanawu murttidaageetakka metoy gakkees. (Yaaq. 1:2; 1 PHe. 5:9) Ha wodiyan, nuuni sinttanaaban xeelaa wottanaadan oottiya awudeegaappenne daro gaasoy deꞌees. Nuuni ha alamiyaa xayoy keehi matido wodiyan deꞌiyoogaa haniiddi deꞌiyaabay loytti qonccissees. Xoossaa Kawotetta haaruwan nuuni ufayttanaadan oottiya darobatuppe issoy nu siiqiyo hayqqidaageeti hayquwaappe denddanaagaa. He wode, Yihooway Abrahaama ammanuwaanne A danddayaa gishshawu inne A soo asay saꞌan deꞌanaadan hayquwaappe denttiyoogan woytana. Neeni eta mokkanawu he sohuwan deꞌanee? Neeni Abrahaamaagaadan Xoossaa Kawotetta gishshawu ne goꞌꞌaa ne dosan aggabayikko, metoy gakkishinkka ne ammanuwaa naagada deꞌikko, qassi Yihoowa danddayan naagiyoogaa tamaarikko, ee mokkana danddayaasa.—Mik. 7:7. w20.08 5-6 ¶13-14; 7 ¶17

Nu morkketi nuna worikko, Yihooway nuna denttanaagaa eroos. Eti oottiyo aybinne nuuni Yihoowawu haggaaziyoogaa agganaadan oottana danddayennaagaa ammanettoos. (Roo. 8:35-39) Yihooway dendduwaa hidootaa nuussi immiyoogan, keehi aadhdhida eranchchaa gidiyoogaa bessiis. Hegaappe denddidaagan, Seexaanaara hashetiyaageeti yootiyoobaa nuuni oottennan aggikko eti nuna woranawu yashissiyo wode, nuuni yayyokko. Qassi hegee nuuni kaseegaappe aaruwan xalidi Yihoowawu ammanettidi deꞌanaadan oottees. Yihoowa morkketi nena woranawu yashissikko, Yihooway nena hayquwaappe denttanaagaa ammanettay? Neeni he wode Yihoowan ammanettanaagaa waata erana danddayay? Issi ogee nena hagaadan oychchiyoogaa: ‘Taani galla galla kuuyiyo guuttabati ta Yihoowan ammanettiyoogaa bessiyoonaa?’ (Luq. 16:10) Hara oyshay qassi, ‘Taani Kawotettaa kaseyikko aquwawu peeshshawu tawu koshshiyaabaa Yihooway kunttanawu qaalaa gelidobaa ta ammanettiyoogaa, ta wodiyaanne ta miishshaa goꞌettiyo ogee bessii?’ giyaagaa gidana danddayees. (Maa. 6:31-33) Ha oyshata ee gaada zaarikko, sinttappe nena gakkana ay paaciyawukka neeni giigettidaagaa gidana.—Lee. 3:5, 6. w20.08 17-18 ¶15-16

Nuuni Xoossaa Qaalaa goꞌettiyoogan qara gidana koshshees. Nuuni nu shiiqotun hegaadan oottiyo amarida ogeta tamaaroos. SHin Geeshsha Maxaafaa tumay alꞌꞌo gidiyoogaa harata ammanttanawu koyikko, nuuni Geeshsha Maxaafaa ubbatoo buzo xannaꞌana koshshees. Nu ammanuwaa minttanawu Xoossaa Qaalaa goꞌettana koshshees. Hegawu Geeshsha Maxaafaa nabbabiyoogaa xallay gidenna. Nuuni loytti akeekanawunne Geeshsha Maxaafaa zoriyaa oosuwan peeshshanawu nabbabidobaa wotti dentti qoppananne nu xuufetuppe pilggana koshshees. (1 Xim. 4:13-15) Yaatiyo wode Xoossaa Qaalaa goꞌettidi harata tamaarissana danddayoos. Hegaa giyoogee etawu Geeshsha Maxaafaappe xiqisiyaa nabbabiyoogaa xalla gidenna. Nu yootiyoobaa ezggiyaageeti xiqisiyaa akeekanaadaaninne hegaa oosuwan waati peeshshanaakko nuuni eta maaddanawu koyoos. Hegaa gishshawu, nuuni ubbatoo Geeshsha Maxaafaa xannaꞌiyo wode, Geeshsha Maxaafaa tamaarissiyoogan gooba gidana danddayoos.—2 Xim. 3:16, 17. w20.09 28 ¶12

Yihooway nuna maaddanawu oottido ubbabaa wotti dentti qoppikko, nuuni ubbatoo sabbakiyo oosuwaa kaseyana danddayoos. Leemisuwawu, I attamettidanne elektiroonike xuufetun, cenggurssaaninne biiduwan giigidaageetun, qassi JW Brodkastingiyan gidi palahiya ayyaanaa qumaa nuussi giigissees. Hagaa qoppa: Nu websaytiyan 1,000ppe dariya doonan giigidabay deꞌees! (Maa. 24:45-47) Sabbakiyoogaa kaseyidi deꞌana danddayiyo hara ogee Yesuusa leemisuwaa kaalliyoogaa. I Mishiraachchuwaa sabbakiyoogaappe aybinne ba qofaa shaakkanaadan eeno gibeenna. (Yoh. 18:37) Seexaanay “sa7an de7iya kawotetta ubbaanne eta bonchchuwaa” immanawu shoobbido wodenne harati A kawo kessanawu koyido wode, I cimettibeenna. (Maa. 4:8, 9; Yoh. 6:15) I aquwan duretiyoogaa amottidi cimettibeenna woy wolqqaama yedetaa yayyibeenna. (Luq. 9:58; Yoh. 8:59) Nu ammanoy paacettiyo wode, nuuni kiitettida PHawuloosi ha gallassa xiqisiyan zoridobaa qoppikko, sabbakiyo oosuwaa kaseyidi deꞌana danddayoos. w20.09 9-10 ¶6-7

Gubaaꞌiyan minnidi oottiya daro michchontti deꞌiyoogee ayba ufayssiyaabee! Eti shiiqotuninne mishiraachchuwaa sabbakiyoogan minnidi oottoosona. Issoti issoti SHiiquwaa Addaraashaa bottokoniyoogan, harati qassi bantta ishanttussinne michchonttussi koshshiyaabaa kunttiyoogan maaddoosona. Paacee eta gakkiyoogee qoncce. Issoti issoti banttana yelida cimidaageeta heemmoosona. Harati qassi soo asaappe gakkiya yedeta genccoosona. Issoti issoti banttarkka bantta naatussi koshshiyaabaa kunttanawu minnidi oottoosona. Nuuni nu michchontta minttettana koshshiyoy aybissee? Alamee darotoo maccaasata bessiyaagaadan bonchchenna gishshataassa. SHin nuuni eta minttettanaadan Geeshsha Maxaafay nuna zorees. Leemisuwawu, kiitettida PHawuloosi Roomen deꞌiya gubaaꞌee Peebo mokkanaadan yootido wode, “A intteppe koyiyoobai aiba gidikkokka, o maaddite” giis. (Roo. 16:1, 2) PHawuloosi maccaasa kariya wogan dicciis. SHin, I Kiristtaane gidi simmidi Yesuusaagaadan, maccaasata bonchchuwaaninne kehatettan oyqqiis. w20.09 20 ¶1-2

Nu xinaateti mishiraachchuwaa haratussi yootanawu koyanaadan nuuni maaddanawu ha oyshata eta oychana danddayoos: “Neeni Geeshsha Maxaafaappe tamaaridobaa oosuwan peeshshido gishshawu ne deꞌoy waani giiga gididee? Harati hegaa mala timirttiyaa siyana koshshees gaada qoppay? Neeni eta maaddanawu ay oottana danddayay?” (Lee. 3:27; Maa. 9:37, 38) Harati Yesuusi azazidobaa ‘ubbaa naagana mala’ nuuni tamaarissanaadan I azazidoogaa hassaya. Hegee Xoossaanne shooruwaa siiqa giya ubbaappe aadhdhiya naaꞌꞌu azazota gujjees. (Maa. 22:37-39) Mishiraachchuwaa yootanaadan denttettiya waannabay siiquwaa. Issi issi xinaateti sabbakiyo oosuwaa oottiyoogaa qoppiyo wode yayyana danddayiyoogee qoncce. SHin he xinaateti asawu yayyiyoogaa Yihooway maaddin loddan loddan aggana danddayiyoogaa ammanettanaadan maaddana danddayoos.—Maz. 18:1-3; Lee. 29:25. w20.11 3 ¶6-8

Geeshsha Maxaafaa xannaꞌissanawu neeni giigettiyo wode, ne xinaatiyaanne awu koshshiyaabaa xeelliyaagan Yihoowa woossa. He ura wozana denttettiya ogiyan Geeshsha Maxaafaappe tamaarissanawu Yihooway nena maaddana mala woossa. Ne halchchoy I diccidi xammaqettanaadan maaddiyoogaa gidiyoogaa hassaya. Qassi xinaatee Yihoowaara haasayana bessees. Waatidi? Yihooway yootiyoobaa siyiyoogaaninne aara haasayiyoogan. I galla galla Geeshsha Maxaafaa nabbabiyoogan Xoossay yootiyoobaa siyana danddayees. (Yaas. 1:8; Maz. 1:1-3) I galla galla woossiyoogan Yihoowaara haasayana danddayees. Yaatiyo gishshawu, xinaatiyaa doommiyoonne wurssiyo wode wozanappe woossa; qassi he woosan ne xinaatiyaabaa qonccissa. I ne woossiyoogaa siyiyo wode, wozanappe waati woossanaakko tamaarana, qassi I Yesuus Kiristtoosa sunttan Xoossaa Yihoowakko wozanappe woossana bessees. (Maa. 6:9; Yoh. 15:16) Geeshsha Maxaafaa galla galla nabbabiyoogee (Yihooway yootiyoobaa siyiyoogaa) qassi woossiyoogee (Yihoowaara haasayiyoogaa) ne xinaatee kaseegaappe aaruwan Xoossaakko shiiqanaadan maaddana!—Yaaq. 4:8. w20.10 8 ¶8; 9 ¶10-11

Koyro xeetu layttan deꞌida Kiristtaanetudan, ha wodiyan Yihoowa dirijjitee maaraanne sarotettaa ubbatoo naagidi deꞌanawu minni oottees. (Oos. 16:4, 5) Leemisuwawu, neeni Wochiyo Keelaa Xinaatiyaa hara gubaaꞌiyan, ubba qassi hara biittan shiiqikko, he xinaatee waani xannaꞌettiyaakko qassi huuphe yohoy awugaakko akeekana. Sohuwaara ne gubaaꞌiyan deꞌiyaabadan neeyyo siyettana! Hegaa mala issippetettay deꞌanaadan oottiyay Xoossaa ayyaana xalla! (Sof. 3:9) Ay oottana danddayay? Nena hagaadan oychcha: ‘Taani gubaaꞌiyaa issippetettaanne sarotettaa minttiyaaba oottiyaanaa? Aawatettay deꞌiyoogeetussi taani azazettiyaanaa? Gubaaꞌiyan taassi aawatettay deꞌikko, harati tana ammanettiyoonaa? Taani saatiyaa naagiyaanaa, harata maaddiyaanaa qassi minnada haggaaziyaanaa?’ (Yaaq. 3:17) Neeni giigissana danddayiyo amaridabay deꞌiyoogaa akeekikko, geeshsha ayyaanaa demmanawu woossa. Geeshsha ayyaanay ne eeshshaanne ne oottiyoobaa kaseegaappe aaruwan loyttanaadan neeni eeno giyo wode, ishanttinne michchontti nena loytti siiqana; qassi neeni gubaaꞌiyawu oottiyoobaa eti galatana. w20.10 23 ¶12-13

Xoossaa Qaalay nuuyyo herega mala. (Yaaq. 1:23-25) Nuuppe daroti maallado sooppe kiyanaappe kase nu meraa heregan xeelloos. Yaatiyoogan, harati nuna beꞌanaappe kase nuuni giigissana koshshiyaabati deꞌiyaakkonne beꞌana danddayoos. Hegaadankka, nuuni Geeshsha Maxaafaa ubba galla nabbabiyo wode, nu qofaanne nu xeelaa laammana danddayiyo ogeta akeekana. Daroti maallado sooppe kiyanaappe kase gallassa xiqisiyaa nabbabiyoogee maaddiyoogaa akeekidosona. Eti nabbabidoban bantta qofaa laammanawu eeno giidosona. Yaatidi eti kumetta gallassan, Xoossaa Qaalaappe demmido zoriyaa oosuwan peeshshiyo ogiyaa koyoosona. Qassi nuuni Xoossaa Qaalaa ubba galla xannaꞌananne wotti dentti qoppana bessees. Hegaadan oottiyoogee metennaba milatana danddayees; shin deꞌuwawu efiya xuntta ogiyaappe kiyennaadan nuna maaddiya keehi koshshiyaabaappe hegee issuwaa. Xoossaa Qaalay bolla gidduwaa bessiya eraajiyaadan nuuni nu garssa asatettaa beꞌanaadan oottees. SHin Geeshsha Maxaafaappe woy Xoossay sunttidoogeetuppe nuuni demmiyo zoriyan goꞌettanawu nuna ziqqi oottana koshshees. w20.11 18 ¶3; 20 ¶8

Beni Kiristtaaneta darotoo yedetay gakkikkokka, eti sarotettan deꞌidosona. Eti he wodetun ay oottidonaa? He ammanettida asati aggennan mishiraachchuwaa sabbakidosona. Oosuwaa maxaafay eti, ‘Yihoowassi yayyiyoogaa’ yootees. Eti aggennan mishiraachchuwaa sabbakido gishshawu, “qoodankka dari dari biidosona.” Sarotettay deꞌiyo wodiyan mishiraachchuwaa eti minnidi sabbakin, Yihooway eta anjjidoogee qoncce. (Oos. 9:26-31) Beni Kiristtaaneti danddayiyo wode ubban mishiraachchuwaa sabbakidosona. Leemisuwawu, PHawuloosi Efisoonan deꞌiya darotuyyo sabbakana danddayiyoogaa akeekido wode, I he kataman sabbakiiddi takkiis. (1 Qor. 16:8, 9) Erissiyo ashkkarati ‘Godaa qaalaa mishiraachchuwaa’ minnidi sabbakidosona. (Oos. 15:30-35) Yaatin, ayba ayfee beettidee? Ha gallassa xiqisee beettida ayfiyaabaa yootees. w20.09 16 ¶6-8

Addaamee nagaraa oottido wode ba bollinne ba zerettatu bolli hayquwaa ehiis. I azazettibeenna gishshawu nuna hanno gakkanawu tuggayiyaabay gakkiiddi deꞌees. SHin Xoossay ba Naꞌaa hayquwaappe denttido gishshawu, nuuyyo ufayssiya hidootay deꞌees! “Haiqqidaageetu denddoikka qassi issi asa [Yesuusa] baggaara yiis.” Kiitettida PHawuloosi hagaadan giis: “Aissi giikko, asai ubbai Addaameera dabbotido gishshau haiqqidoogaadan, Kiristtoosaara dabbotido gishshau, ubbai de7uwaassi denddana.” (1 Qor. 15:21, 22) PHawuloosi “asai ubbai Addaameera dabbotido gishshau [hayqqiyoogaa]” yootidoy woyganaassee? PHawuloosi Addaameppe nagaraa laattida ubba asaabaa yootiiddi deꞌees; hegaa gishshawu eti hayqqana. (Roo. 5:12) ‘Deꞌuwaassi denddanaageetu’ giddon Addaamee deꞌenna. Addaamee Xoossawu azazettennan ixxida wottiyoobi baynna asa gidiyo gishshawu, I Kiristtoosa wozuwaappe goꞌettenna. Addaame bolli gakkidabay, “merinaa qaxxayuwau baana” giidi ‘Asa Naꞌay’ pirddana ‘deeshshatu’ bolli gakkanabaara issi mala.—Maa. 25:31-33, 46; Ibr. 5:9. w20.12 5 ¶13-14

Nuuyyo issi aawatettay imettana xayikko, ammanettida kiitanchchatu hanotaa qoppiyaageeta gidoos. Leemisuwawu, issi wode Yihooway iita Kawuwaa Akaaba waati balettanaakko kiitanchchati bantta qofaa yootanaadan eta oychchiis. Daro kiitanchchati bantta qofaa yootidosona. SHin Xoossay issi kiitanchchaa dooridi A qofay hananaagaa awu yootiis. (1 Kaw. 22:19-22) Ammanettida hara kiitanchchati hidootaa qanxxidi, ‘Taani ta wodiyaa xuuggidoynne ta qofaa yootidoy aybissee,’ giidi geella qoppidonaa? Akkay. Kiitanchchati tumuppe banttana ziqqi oottiyaageeta, qassi bonchcho ubbaa Yihooway ekkanaadan koyoosona. (Daan. 13:16-18; Ajj. 19:10) Nuuni Yihoowa Markka gidiyoogeenne A Kawotettaabaa sabbakiyoogee gita maataa gidiyoogaa hassaya. Xoossaa sinttan nuna alꞌꞌo oottiyay aawatettaa gidenna. Nuuni nuna ziqqi oottikko, Yihoowayyo, qassi nu ishanttuyyo alꞌꞌo gidana. Yaatiyo gishshawu, nena ziqqi oottada deꞌanaadan Yihooway maaddana mala woossa. Etabay Geeshsha Maxaafan odettido banttana ziqqi oottiyoogan loꞌꞌo leemiso gidiya Yihoowa ashkkaratu ubbatubaa qoppa. Neeni danddayiyo oge ubban ne ishanttussi ne dosan ootta.—1 PHe. 5:5. w20.12 26 ¶16-17

Atotettaa birata qophee Yihooway nuussi immido hidootaa. Hegee A sheniyaa oottiyaageeta ubbaa I woytanaagaanne eti hayqqikkokka I eta denttanaagaa bessiyaaba. (1 Tas. 5:8; 1 Xim. 4:10; Tii. 1:1, 2) Atotettaa hidootay nu qofaa naagees. He hidootay nuuni Xoossay qaalaa gelidoban xeelaa wottanaadan oottees; qassi nu metuwan unꞌꞌettennaadan maaddees. Nuuni Xoossay qoppiyoogaadan qoppiyoogan nu huuphiyan he birata qophiyaa wottana danddayoos. Leemisuwawu, nuuni ammanttenna duretettan gidennan, Xoossan hidootaa wottoos. (Maz. 26:2; 104:34; 1 Xim. 6:17) Ayyaanaa bisoy Xoossaa Qaalaa, Geeshsha Maxaafaa. He bisoy worddoy qonccanaadan oottees; qassi worddo timirttetuppenne qohiya meezetuppe asaa laꞌa kessees. (2 Qor. 10:4, 5; 2 Xim. 3:16, 17; Ibr. 4:12) Buzo xinaatiyaaninne Xoossaa dirijjitee immiyo loohissuwan he bisuwaa loytti goꞌettiyoogaa tamaaroos.—2 Xim. 2:15. w21.03 27 ¶4; 29 ¶10-11

Kiitettida Yohaannisi Yesuusabaa sabbakido gishshawu qashettido wodekka harata siiqiyoogaa bessiis. Leemisuwawu, Ajjuutaa maxaafaa xaafidi gubaaꞌeti “eesuwan hananau bessiyaabaa” erana mala hegaa etawu kiittiis. (Ajj. 1:1) Hegaappe guyyiyan, Yohaannisi Paaximo giyo haruuruwaappe birshshetti simmidi Yesuusa deꞌuwaabaanne haggaazuwaabaa yootiya ba Wonggeliyaa xaafiis. I ba ishanttanne michchontta minttettanawunne maaddanawu heezzu dabddaabbetakka xaafiis. Neeni deꞌuwan issi issibaa aggabayiyoogaaninne ne deꞌuwan oottanawu dooriyooban harata siiqiyoogaa bessiyoogan Yohaannisa leemisuwaa kaallana danddayaasa. Neeni ne wodiyaanne ne wolqqaa ubbaa miishshaa demmanawu woy erettida asa gidanawu baaxetiyoogan wurssanaadan Seexaanaa alamee koyees. SHin kumetta saꞌan deꞌiya Kiristtaaneti mishiraachchuwaa sabbakiyoogan asay Yihoowakko shiiqanaadan maaddiyoogan banttawu danddayettida keenan daro saatiyaa aattoosona. w21.01 10 ¶9-10

Yonaataani Daawita qanaatana danddayees. Yonaataani Kawuwaa Saaꞌoola naꞌaa gidiyo gishshawu, kaalliya kawo gidana bessiyay tana gaana danddayees. (1 Sam. 20:31) Gidoppe attin, Yonaataani bana ziqqi oottiya asa gidiyo gishshawu, Yihoowawu ammanettidi deꞌiis. Yaatiyo gishshawu, Saaꞌoolappe kaallidi kawotanaadan Yihooway Daawita doorido wode I keehi maaddiis. Saaꞌooli hegan keehi hanqqettikkokka, Yonaataani Daawitawu ammanettidi deꞌiis. (1 Sam. 20:32-34) Yonaataani Daawita wozanappe siiqiyo gishshawu, A qanaatibeenna. Yonaataani wonddafiyaa dukkiyoogan keehi gooba; qassi xala olanchcha. Asay anne A aawaa, “argganttaappekka aadhdhida eeso,” qassi “gaammuwaappekka aadhdhida mino” yaagees. (2 Sam. 1:22, 23) Hegaa gishshawu, Yonaataani ba minotettan oottidoban ceeqettana danddayees. SHin, I Daawitappe leqqanawu malibeenna; qassi Daawiti oottido loꞌꞌoban A qanaatibeenna. Ubba qassi, Daawiti xalanne Yihoowan ammanettiya asa gidido gishshawu Yonaataani A nashshiis. Leemisuwawu Daawiti Gooliyaada wori simmin, Yonaataani Daawita keehi siiqiyoogaa doommiis. w21.01 21 ¶6; 22 ¶8-9

Ubba Kiristtaanetikka wottiyoobi baynna ogiyan kaalettiya Yesuus Kiristtoosa aawatettaa garssan deꞌoosona. Gidoppe attin, issi maccaasiyaa aqo oyqqiyo wode nagaranchcha gidida attuma asa aawatettaa garssan deꞌawusu. Hegee ubbatoo metennaba gidenna. Yaatiyo gishshawu, A issi ishaa gelanawu qoppiyo wode hagaadan bana oychchana koshshees: ‘Ha ishay so asaa loytti kaalettiyaagaa gidanaagaa bessiyaabay aybee? Ba deꞌuwan Yihoowawu haggaaziyoogaa kaseyii? Yaatana xayikko, nuuni aqo oyqqi simmin, I ayyaanaaban loytti kaalettiyaagaa gidana gaada taani qoppanaadan oottiyaabay aybee?’ Issi michchiyaa hagaadan gaadakka bana oychchana bessiyoogee qoncce: ‘Nu aqo deꞌuwan ufayttanawu tawu deꞌana koshshiya eeshshati aybee? Taani danddayanchchee, qassi kehee? Taayyo Yihoowaara mino dabbotay deꞌii?’ (Era. 4:9, 12) Issi maccaasiyaa aqo oyqqanaappe kase loꞌꞌobaa kuuyikko, hegee I aqo deꞌoy giiga gidanaadaaninne A ufayttanaadan maaddana danddayees. Miilooniyan qoodettiya nu michchontti bantta azinawu azinawu haarettiyoogan loꞌꞌo leemiso gidoosona. Eta keehi galatoos! w21.02 8 ¶1-2

Mata wodeppe haa simmin, aassiyaageetuppe daroti kaseegaappe aaruwan haggaazanawunne aassiyaageeti keehi koshshiyo gubaaꞌiyan haggaazanawu hara qaalaa tamaaranawu halchchidosona. Hegee issi uri Yihoowawu kaseegaappe aaruwan haggaazanawu bawu kuuyiyooba. Eti he ooratta qaalaa loytti haasayana gakkanaashin daro layttay aadhdhikkonne, eti gubaaꞌiyaa daro ogiyan maaddoosona. Eta loꞌꞌo eeshshaynne eta deꞌuwan hanidabay gubaaꞌiyan deꞌiya ishanttanne michchontta minttettees. Bantta goꞌꞌaa aggi bayiya he ishanttanne michchontta bonchchoos. Issi ishay gubaaꞌee goꞌettiyo qaalaa loytti haasayenna gishsha xallawu I gubaaꞌe cima woy gubaaꞌiyawu oottiyaagaa gidennaadan Gubaaꞌe cimati kuuyana bessenna. Cimati issi ishay gubaaꞌee goꞌettiyo qaalaa ay keena loytti haasayiyaakko qoppidi gidennan, cimatinne gubaaꞌiyawu oottiyaageeti ay mala gidana bessiyaakko Geeshsha Maxaafay yootiyooban he ishaa hanotaa yiggana.—1 Xim. 3:1-10, 12, 13; Tii. 1:5-9. w20.08 30 ¶15-16

Asay bawu payyatettay, daro miishshaynne son ufayssay deꞌana xayikko, ufayttana danddayennabadan qoppees. SHin Yaaqoobi yootido ufayssay Xoossaa ayyaanay demissiyooba gidiyo gishshawu, nu deꞌuwan aybi gakkikkonne ufayttana danddayoos. (Gal. 5:22) Issi Kiristtaanee I Yihoowa ufayssiyoogaanne Yesuusa leemisuwaa kaalliyoogaa erikko, tumuppe ufayttana danddayees. (Luq. 6:22, 23; Qol. 1:10, 11) Nu ufayssay paanoosiyaa lacuwaa mala gaana danddayoos. Carkkin woy bukkinkka, he lacoy toꞌennan eexxees. Nuunikka nu deꞌuwan aybi gakkikkonne, awudekka ufayttana danddayoos. Nuuni sahettiyo wode woy miishshi baynna wodekka, ufayttiyoogaa aggokko. Asay nuna boriyo wode, woy nu soo asay woykko harati eqettiyo wodekka, nuuni ufayttana. Nuuni ufayttennaadan oottanawu asay maliyo wode ubban, nu ufayssay yaa gujjees. Nu ammanuwaa gaasuwan nuna gakkiya paacee nuuni tumuppe Kiristtoosa kaalliyaageeta gidiyoogaa bessiyaaba. (Maa. 10:22; 24:9; Yoh. 15:20) Yaaqoobi hachchi gallassa xiqisiyaa giidi xaafidoy hegaassa. w21.02 28 ¶6

Woppu giyoogeenne Yihoowan ammanettiyoogee keehi koshshiyaaba gidiyoogaa qonccissiya xiqiseta neeni demmiyo wode, hegeeta hassayanawu mala. Neeni he xiqiseta hassayanawu, cenggurssaa xoqqu ootta nabbabiyoogee woy xaafa oyqqiyoogeenne ubbatoo eta nabbabiyoogee maaddana danddayees. Yaasu nabbabidobaa oosuwan peeshshana mala Higgiyaa maxaafaa ubbatoo saasukkidi nabbabanaadan Yihooway ayyo yootiis. He nabbabidobay I yayyennan xala gididi Xoossaa asaa kaaletanawukka A maaddana. (Yaas. 1:8, 9) Darotoo neeni hirgganaadan woy yayyanaadan oottiya hanotati merettiyo wode woppu gaanaadan maaddiya daro xiqiseti Xoossaa Qaalan deꞌoosona. (Maz. 27:1-3; Lee. 3:25, 26) Nuuni nu shiiqotun, shiiqiya haasayatuppe, ezggiyaageeti yootiyo qofaappenne ishanttuuranne michchonttuura minttettiyaabaa haasayiyoogaappe goꞌettoos. (Ibr. 10:24, 25) Nuuyyo siyettiyaabaa gubaaꞌiyan deꞌiya ammanettida laggetussi yootiyo wode keehi minettanakka danddayoos. w21.01 6 ¶15-16

Inttena ziqqi oottidi deꞌite, qassi ubbatoo Yihoowan ammanettite. Intte xammaqettido wode, intteyyo mino ammanoy deꞌiyoogaanne Yihoowan ammanettiyoogaa bessideta. Qassi Yihooway intte A keettaa asa gididoogan keehi ufayttiis. Waannabay haꞌꞌi intte aggennan Yihoowan ammanettiyoogaa. Intte issi gitabaa kuuyiyo wode Yihoowan ammanettiyoogee metennaba milatana danddayees. SHin hara wode waatuuteetii? Intte aybin allaxxanaakko, ayba ooso oottanaakkonne intte deꞌuwawu ay halchchanaakko kuuyiyo wodekka, Yihoowan ammanettiyoogee keehi koshshiyaaba! Intte eratettan ammanettoppite. Geeshsha Maxaafay yootiyo maarati intte issibaa kuuyanaadan maaddana; qassi he kaaletuwaa oosuwan peeshshite. (Lee. 3:5, 6) Intte yaatiyo wode, Yihooway ufayttana; qassi gubaaꞌiyan deꞌiyaageeti inttena bonchchana. Nu ubbaadan inttekka nagaranchcha gidiyo gishshawu, issi issitoo balana danddayiyoogee qoncce. SHin hegee Yihoowawu haggaaziyoogan inttiyo danddayettida ubbabaa oottiyoogaa diggana koshshenna. w21.03 6 ¶14-15

Neeni Yihoowawu haggaaziyo gishshawu so asay nena eqettii? Woy neeni deꞌiyoy Yihoowa Markkatu oosoy muleera woy amaridaagee teqettido biittaanee? Yaatikko, 2 Ximootiyoosa 1:12-16; qassi 4:6-11, 17-22 nabbabiyoogan neeni minettana danddayaasa. Kiitettida PHawuloosi ha qofaa xaafidoy I qashettido wode. He taarikiyaa nabbabanaappe kase, ne metuwaabaanne hegaa xeelliyaagan neeyyo siyettiyaabaa Yihoowayyo geeshshada yoota. Yaatada, PHawuloosa gakkidabaa yootiya taarikiyaappe neeni oottana bessiyaabaa akeekanaadan maaddiya maarata eranaadan Yihooway nena maaddana mala oychcha. PHawuloosi Kiristtaane gidiyo gishshawu A gakkiya yedetaa genccanaadan Yihooway awu yootiis. (Oos. 21:11-13) Yihooway PHawuloosa waati maaddidee? I PHawuloosa woosaa zaariis; qassi ayyo wolqqaa immiis. PHawuloosi minnidi oottidobawu I woytuwaa demmanaagee ayyo odettiis. Ammanettida A laggeti PHawuloosa maaddanaadankka Yihooway eta goꞌettiis. w21.03 17-18 ¶14-15, 19