Naase

Yesuusawu mata lagge gidiyaageetu xallay A wozuwaa yarshshuwaappe goꞌettana. Yesuusi “ba shemppuwaa ba laggiyaayyo aattidi” immanaagaa yootiis. (Yoh. 15:13) Yesuusi saꞌaa yaanaappe kase ammanettiyaageeta gididi deꞌida asati abaa tamaarananne A siiqana koshshees. He attuma asatinne macca asati hayquwaappe denddikkonne, Yihoowa ashkkara gidida he asati merinaa deꞌuwaa demmanawu Yesuusawu lagge gidana koshshees. (Yoh. 17:3; Oos. 24:15; Ibr. 11:8-12, 24-26, 31) Nuuni Kawotettaa mishiraachchuwaa sabbakiyoogaaninne tamaarissiyoogan ufayttiiddi Yesuusaara issippe oottoos. Yesuusi saꞌan deꞌiyo wode, tamaarissiyaagaa. Qassi Yesuusi saluwaa boosappe doommidi gubaaꞌiyawu huuphe gidiyoogaadan, sabbakiyoonne tamaarissiyo oosuwaa kaalettees. Intte intteyyo danddayettida keenan daroti anne A Aawaa eranaadan maaddanawu baaxetiyoogaa I beꞌeesinne xoqqu ootti xeellees. Nuuni ha oosuwaa polana danddayiyoy Yihoowaynne Yesuusi maaddiyoogaa xallaana.—Yoh. 15:4. w20.04 22 ¶7-8

‘Huuphessa kawuwaanne tohossa kawuwaa’ giya sunttati Israaꞌeela biittaappe huuphessa baggaaninne tohossa baggan deꞌiya biittata haariyaageeta qonccissiyaaba. (Dane. 10:14) PHenxxaqosxxe galla 33 M.L. gakkanawu, Israaꞌeela deree Xoossaa asa. He gallassaappe doommidi, Yesuusi erissiyo ammanettida ashkkarata Yihooway ba asa ootti xeelliyoogaa qonccissi bessiis. Yaatiyo gishshawu, Daaneela shemppo 11n odettida hiraagaappe dariya baggay yootiyoy Israaꞌeela deriyaabaa gidennan, Kiristtoosa kaalliyaageetubaa. (Oos. 2:1-4; Roo. 9:6-8; Gal. 6:15, 16) Dumma dumma wodetun, haariya dumma dumma asati woy kawotettati ‘huuphessa kawuwaanne tohossa kawuwaa’ gididosona. SHin ha haaridaageeti ubbay issi mala gidiyoobay deꞌees. Koyroogee, he kawoti Xoossaa asati daroti deꞌiyo biittaa haaridoogaa woy eta qohidoogaa. Naaꞌꞌanttoogee, eti Xoossaa asaa oyqqido ogiyan tumanchcha Xoossaa Yihoowa ixxiyoogaa bessidoogaa. Qassi heezzanttoogee, he naaꞌꞌu kawoti wolqqaa bessanawu issoy issuwaa eqettidoogaa. w20.05 3 ¶3-4

Yihooway ba halchchuwaa polanawu koshshiya aybanne haniyoogan aybikka hananaadan oottees. Qassi Yihooway nagaranchcha asaa I koyiyoogaadan oottiyoogan awu haggaazanaadaaninne A halchchuwaa polanaadan oottana danddayees. (Isi. 64:8) Yaatiyoogan, Yihooway ba oosoy polettanaadan oottees. I ba halchchuwaa polanawu oottiyoobaa aybinne teqqana danddayenna. (Isi. 46:10, 11) Yihooway oottidobaanne I nuussi oottana danddayiyoobaa wotti dentti qoppiyoogan saluwan deꞌiya nu Aawaa kaseegaappe aaruwan nashshana danddayoos. Leemisuwawu, Yihooway medhdhido ubbabaa nuuni qoppiyo wode, I oottido ubbaban keehi maalaalettoos. (Maz. 8:3, 4) Qassi Yihooway A sheniyaa polanaadan nuna maaddidoogaa wotti dentti qoppiyo wode, kaseegaappe aaruwan A bonchchoos. Yihoowa giyo sunttay tumukka keehi bonchcho! He sunttay nu Aawaabaa, I oottidobaanne I oottanabaa ubbaa qonccissees.—Maz. 89:7, 8. w20.06 9-10 ¶6-7

Okisijinee asaynne mehee doꞌay deꞌuwan deꞌanawu koshshiya gaaze. Deꞌuwan deꞌiyaabati layttan layttan geeshsha carkkuwaa keehi daruwaa shemppidi gelissoosona. Karbben dayokisayd giyo moorettida gaaziyaa he meretati shemppidi kessoosona. SHin ha meretati geeshsha carkkuwaa ubbaa goꞌettana xayikkonne saloy moorettida carkkuwan mule kumi erenna. Aybissi? Moorettida carkkuwa ekkidi geeshsha carkkuwaa kessiya deꞌuwan deꞌiyaabatanne yesuwan dumma dumma gidida mokkiyaabata Yihooway medhdhido gishshataassa. Ha simmi simmi haniyaabay nuuni shemppiyo carkkuwaa medhdhiyo gishshawu, hachchi gallassaa xiqisee yootiyo qofaara maayettana danddayoos. Maalaaliya nu pilaaneetiyaanne an deꞌiya loꞌꞌoba ubbaa gishshawu kaseegaappe aaruwan Yihoowa galatanaadan nuna aybi maaddana danddayii? (Maz. 115:16) Issi ogee Yihooway medhdhidobata wotti dentti qoppiyoogaa. Hegee Yihooway nuuyyo immido loꞌꞌobaa gishshawu A galla galla galatanaadan nuna denttettana. Qassi nuuyyo danddayettida keenan nu deꞌiyo heeraa geeshshatettan oyqqiyoogan saꞌaa nashshiyoogaa bessoos. w20.05 22 ¶5, 7

Seexaanay Yihoowa sunttaa mooranawu oottidobaa Yihooway aadhdhida eratettan, danddayaaninne suure pirddan giigissiis. I ubbabaa danddayiyaagaa gidiyoogaakka daro ogiyan bessiis. Ubbaappe aaruwan, I oottiyo ubbabay siiquwaa qonccissees. (1 Yoh. 4:8) Yihooway ba sunttaa geeshshanawu oottiyoogaa mule aggibeenna. Seexaanay ha wodiyankka Xoossaa sunttaa mooriiddi deꞌees. Xoossay wolqqaama, aadhdhida eranchcha, suure pirddiyaagaanne siiqiyaagaa gidiyoogaa asay siranaadan I oottiiddi deꞌees. Leemisuwawu, Yihooway Medhdhidaagaa gidenna giidi asaa ammanttanawu Seexaanay baaxetees. Xoossay deꞌiyoogaa asay ammanikkonne, Xoossaynne I kessido maarati laꞌatettaa diggoosonanne suure gidokkona giidi asay ammananaadan oottanawu Seexaanay malees. I Yihooway asaa siꞌooliyaa taman xuuggiya meqettaa iita Xoossa giidikka tamaarissees. He iita wordduwaa eti ammaniyo wode, Yihooway kessido xillotettaa maaraa xaasayanawu etawu deexxenna. Yihooway Seexaanaa xayssana gakkanaashin, I Yihoowappe nena haassanawu baaxetana. Awu ushachchanee? w20.06 5 ¶13-15

Ooratta qaalaa tamaaranawu baaxetiya ishanttinne michchontti daro gubaaꞌetun deꞌoosona. Eti qoppiyoobaa yootanawu metootana danddayoosona. SHin, nuuni eti ooratta qaalaa haasayiyo oge xallaa qoppana xayikko, eti Yihoowa siiqiyoogaanne awu haggaazanawu koyiyoogaa akeekana. Nuuni he loꞌꞌo eeshshata akeekiyo wode, he ishanttanne michchontta wozanappe siiqananne bonchchana. Nuuni eti nu qaalaa loytti haasayenna gishsha xallawu ‘intte nuussi koshshekketa’ gookko. (1 Qor. 12:21) Gubaaꞌiyan gitabaa oottiyo maataa nuuyyo ubbawu Yihooway immido gishshawu keehi galatoos. Nuuni attuma gidin macca gidin, aqo oyqqidaageeta gidin oyqqibeenaageeta gidin, cima gidin yelaga gidin woy issi qaalaa loytti haasayiyaageeta gidin loytti haasayenaageta gidin, nuuni ubbay Yihoowayyonne nu ishanttuyyo alꞌꞌo. (Roo. 12:4, 5; Qol. 3:10) Yihoowa gubaaꞌiyan nuuyyoonne haratuyyo deꞌiya sohuwaa ubbatoo xoqqu ootti xeelliyaageeta gidoos. w20.08 31 ¶20-22

Ateena asay eeqawu goynniyaaba, pokkobaa oottiyaabanne asa aadhdhida eratettan ammaniyaaba gidikkonne, kiitettida PHawuloosi etan hidootaa qanxxibeenna. PHawuloosi kase ‘cayiyaagaa, yedettiyaagaanne tuggayiyaagaa’ gidikkonne, guyyeppe Kiristtaane gidiis. (1 Xim. 1:13) PHawuloosi erissiyo ashkkara gidana giidi Yesuusi qoppidoogaadan, Ateena asaykka erissiyo ashkkara gidana giidi PHawuloosi qoppiis. I hegaadan qoppidoogee likke. (Oos. 9:13-15) Koyro xeetu layttan, ubba qommo asay Yesuusi erissiyo ashkkara gidiis. PHawuloosi Giriike katama gidida Qoronttoosan deꞌiyaageetussi xaafido wode, gubaaꞌiyan deꞌiyaageetuppe issoti issoti issi wode danobaa oottidaageeta woy shori baynna iita deꞌuwaa deꞌidaageeta gidiyoogaa yootiis. Qassi I gujjidi, “Intteppekka issi issi asai hegeetu mala. SHin . . . meecettidetanne geeyideta” yaagiis. (1 Qor. 6:9-11) Nena gidiyaakko, he asati laamettananne Yesuusi erissiyo ashkkara gidana gaada qoppuutee? w20.04 12 ¶15-16

Yihoowawu haggaaziyoogee aynne maaddenna giidi qoppiyaageetu bolli cimati eesuwan pirddana koshshenna. Cimati eta bolli pirddiyoogaappe eti hegaa ayssi haasayidaakko, qassi hegaa ayssi oottidaakko akeekanawu malana koshshees. Yaatidi, cimati eta minttettanawu Geeshsha Maxaafaa goꞌettana danddayoosona. Hananabaa yootiya Eelaasi Kawee Elzzaabeelippe baqatiis. (1 Kaw. 19:1-3) I ba oosoy aynne maaddenna giidi qoppiis; qassi hayqqanawu koyiis. (1 Kaw. 19:10) Yihooway Eelaasa bolli pirddiyoogaappe, I barkka attibeennaagaa, I Xoossay immiyo wolqqan ammanettana danddayiyoogaa, qassi biron darobaa oottanaagaa awu yootiis. Yihooway Eelaasa qofissiyaabaa loytti siyi simmidi awu ooratta oosuwaa immiis. (1 Kaw. 19:11-16, 18) Nu ay tamaariyoo? Nuuni ubbaykka, ubba qassi cimati Yihoowa ashkkarata kehatettan oyqqana koshshees. Issi uri keehi yiillotinkka woy qassi Yihoowa maarotaa mule demmennabadan qoppinkka, I ba wozanaabaa qonccissiyo wode cimati ezggoosona. Yaatidi, he bayida dorssay A Yihooway siiqiyoogaa ammanettanaadan oottanawu eti baaxetoosona. w20.06 22 ¶13-14

Nuuni nu laggetuuranne nu so asaara wodiyaa aattiyoogan ufayttanaadan Yihooway koyees. (Maz. 133:1) Yesuusassi loꞌꞌo laggeti deꞌoosona. (Yoh. 15:15) Nuussi loꞌꞌo laggeti deꞌiyoogaa goꞌꞌaa Geeshsha Maxaafay yootees. (Lee. 18:24) Haratuppe nuna shaakkiyoogee loꞌꞌo gidennaagaakka yootees. (Lee. 18:1) Sooshal miidee daro laggeta demmanaadaaninne haratuppe shaahettennaadan maaddiya oge giidi daroti qoppoosona. SHin nuuni sooshal miidiyaa goꞌettiyo wode naagettana koshshees. Asay sooshal miidiyan xaafidobaanne yan wottido pootuwaa beꞌiyoogan daro wodiyaa aattiyaageetussi haratuppe shaahettidabadan siyettananne unꞌꞌettana danddayiyoogaa xinaateti qonccissoosona. Aybissi? Hegawu issi gaasoy, asay darotoo sooshal miidiyan wottiyo poototi bantta deꞌuwan aattido ufayssiyaa wodiyaabaa bessiyo, eti bantta laggetunne biido keehi loꞌꞌiyaa sohota bessiya pootota xalla gidiyo gishshataassa. He pootota beꞌiya uri ba deꞌuwaa etaagaara geeddarissidi bana pattennaabadan xeellidi unꞌꞌettana danddayees. w20.07 5-6 ¶12-13

Xiqimitaa 1, 1988 Wochchiyo Keelay (Inggilizettuwaa) hagaadan gees: “Issi hanotan ay oottanaakko woy keehi koshshiya issiban ay kuuyanaakko maaddiya maaraa Geeshsha Maxaafaappe yootana mala gubaaꞌiyaa cimatu giddoppe issoy qoppanaadan Kiristtoosi geeshsha ayyaanaa baggaara kaalettana danddayiyoogaa cimati akeekana.” (Oos. 15:7-15) Gubaaꞌiyan deꞌiya issi cima xallaa gidennan, ubba cimata geeshshaa ayyaanay maaddees. Hara cimata bonchchiya issi cimay cimatu shiiquwan ubbatoo koyro haasayanawu malenna. I haasayaa darissenna; qassi I ba qofay ubbatoo likke giidi qoppenna. SHin, I qoppidobaa bonchchuwan yootees. I harati yootiyo qofaa loytti ezggees. Ubbappe aaruwan, I Geeshsha Maxaafan deꞌiya zoriyaa yootanawunne ‘ammanettida wozannaama ashkkaray’ immiyo kaaletuwaa kaallanawu koyees. (Maa. 24:45-47) Cimati issi allaalliyaa haasayiiddi issoy issuwaa siiqiyoogaanne bonchchiyoogaa bessiyo wode, Xoossaa ayyaanay etaara gidananne eti suurebaa kuuyanaadan eta kaalettana.—Yaaq. 3:17, 18. w20.08 27 ¶5-6

Kiitettida PHawuloosa morkketi appe keehi daronne wolqqaama. Eti A darotoo shocidosonanne qasho keetti yeggidosona. Qassi PHawuloosawu lagge gidana bessiya asati A qohidosona. Ubba qassi Kiristtaane gubaaꞌiyan deꞌiya issooti issotikka A eqettidosona. (2 Qor. 12:11; Pili. 3:18) SHin PHawuloosi bana eqettiya ubba asaa xooniis. Waatidi? Yedetay A gakkikkokka, sabbakiyoogaa aggibeenna. A ishanttinne michchontti azzanttido wodekka, I etawu ammanettiyoogaa aggibeenna. Ubbaappe aaruwan, I hayqqana gakkanaashin Xoossawu ammanettiis. (2 Xim. 4:8) PHawuloosi hegaa ubbaa oottana danddayidoy, ba wolqqaana gidennan, Yihoowan ammanettido gishshataassa. Cashshaa woy yedetaa neeni genccana koshshii? Nu halchchoy asay Yihoowabaanne Geeshsha Maxaafaabaa tamaaranaadan maaddiyoogan iitabaa loꞌꞌoban xooniyoogaa. Harati oychchiyo oyshawu Geeshsha Maxaafaappe zaaruwaa immiyoogan, nuna naaqqiyaageeta bonchchuwaaninne kehatettan oyqqiyoogan, qassi nu morkketa gujjin ubba asawu loꞌꞌobaa oottiyoogan he halchchuwaa polana danddayoos.—Maa. 5:44; 1 PHe. 3:15-17. w20.07 17-18 ¶14-15

Nuuni Yihooway tumuppe ashkke gaana danddayiyoo? Ee, Daawiti qommoora yootidoogaadan gaana danddayoos. (Maz. 18:35) Daawiti hegaa xaafido wode, hananabaa yootiya Sameeli sinttappe Israaꞌeela kawo gidana ura tiyanawu bantta soo yiido wodiyaa hassayennan waayi aggana. Daawiti hosppun naatuppe wurssetta kaalo naꞌa gidikkonne, Yihooway Kawuwaa Saaꞌoola sohuwan sunttanawu A dooriis. (1 Sam. 16:1, 10-13) Mazamure 113y, “I salotanne sa7aa xeellanau duge hokkees. I hiyyeesaa buhiyaappe xoqqu oottees; Metootanchchaakka . . . denttees, Denttidi . . . halaqatuura utissees” yaagidi Yihoowabaa odiyoobaa Daawiti maayettiyoogee qoncce. (Maz. 113:6-8) Yihooway nagaranchcha asaara gayttidaagan oottidobay I ashkke gidiyoogaa bessees. I nu goynuwaa ekkiyoogaa xalla gidennan, nuna ba dabbodankka xeellees. (Yaaq. 2:23) Yihooway nuuni aara dabbottana mala, kasetidi nu nagaraa gishshawu ba Naꞌaa yarshsho oottidi immiis. I nuussi keehi qarettiyoogaa bessiis! w20.08 8 ¶1-3

Ha iita alamiyaa awude xayssanaakko Yihooway kuuyiis. (Maa. 24:36) I danddayennan aggidi keerido wodiyaappe kasetidi xayssenna. I hayqqidaageeta denttanawu laamotikkonne, danddayanchcha. (Iyy. 14:14, 15) Eta denttanawu bessiya wodee gakkanaashin I naagees. (Yoh. 5:28) A danddayaa gishshawu nuuni Yihoowa galatiyo loꞌꞌo gaasoy deꞌees. Ane hagaa qoppa: Yihooway danddayido gishshawu nuna gujjin daro asay ‘nagaraappe simmiyo’ wodiyaa demmiis. Yihooway daro asay merinaa deꞌuwaa demmanaadan koyees. Nuuni A danddayaa gishshawu galatiyoogaa simi yaatikko bessoos. Waatidi? “Merinaa deꞌuwaa demmanawu suure wozanaa koshshay deꞌiyoogeeta” koyiyoogan nuussi danddayettida ubbabaa oottiyoogaananne eti Yihoowa siiqanaadaaninne awu haggaazanaadan maaddiyoogaana. (Oos. 13:48, NW) Yaatikko, Yihoowa danddayan nuuni goꞌettidoogaadan etikka goꞌettana. w20.08 18 ¶17

Issi xinaatee tamaariyoobay guuggiyaa era xallassa gidennan, A wozanaa denttettana koshshees. Aybissi? Nu wozanay hegeekka, nu koyiyoobaynne nuussi siyettiyaabay issibaa oottanaadan nuna denttettiyo gishshataassa. Yesuusi daro asa tamaarissiis; qassi eti appe tamaariyoogaa dosidosona. Eta wozanaa denttettido gishshawukka asay A kaalliis. (Luq. 24:15, 27, 32) Ne xinaatee issi uraara dabbotana danddayiyoogaadan Yihooway ayfiyan beettiyaagaa keena awu qoncce gidiyoogaa akeekananne Yihoowa baa Aawadan, Xoossaadaaninne Dabbodan xeellana koshshees. (Maz. 25:5) Geeshsha Maxaafaa xannaꞌissiyo wode, Xoossaa eeshshati beettiyaagaa keena qoncce gidanaadan ootta. (Kes. 34:5, 6; 1 PHe. 5:6, 7) Intte xannaꞌiyo huuphe yohuwaa ubban hegaa ootta. Yihoowa siiquwaa, kehatettaanne qaretaa akeekanaadan ne xinaatiyaa maadda. Yesuusi, “Ubbaappe gitatiya azazonne qassi ubbaappe aadhdhiya” azazoy “neeni Godaa ne Xoossaa ne kumetta wozanaappe . . . siiqa” yaagiis. (Maa. 22:37, 38) Ne xinaatee Yihoowa siiqanaadan maaddanawu baaxeta. w20.10 10 ¶12

Yesuusi maccaasata ubbaa bonchchuwan oyqqiis. (Yoh. 4:27) Ubba qassi Yesuusi ba Aawaa sheniyaa poliya maccaasata keehi bonchchiis. Yesuusi ayyaanaaban ba so asata oottidi xeelliyoogeetuubaa yootido wode attuma asatubaakka maccasatubaakka yootiis. (Maa. 12:50) Yesuusi ayyaanaaban ba michchontta ubbatoo maaddanawu koyees. Qassi Yesuusi etawu loꞌꞌo lagge gidiis. Geella aqo oyqqibeenna Mayraamiiranne Marttiira Yesuusi dabbotido dabbotaaba qoppa. (Luq. 10:38-42) Yesuusi haasayiyoobaaninne oottiyooban eta minttettidoogee qoncce. Leemisuwawu, Mayraama erissiyo ashkkaratudan Yesuusa tohuwaa matan uttanawu yayyabeykku. Qassi qumaa kattishin Mayraama maaddabeenna gishshawu Martta hanqqettido wode bawu siyettiyaabaa Yesuusawu yootanawu yayyabeykku. He wode, Yesuusi he naaꞌꞌu maccaasati keehi koshshiyaabaa akeekanaadan maaddiis. Qassi I hara wodekka etanne eta ishaa Alꞌꞌaazara biidi oychchiyoogan etawu qoppiyoogaa bessiis. (Yoh. 12:1-3) Hegaa gishshawu, Alꞌꞌaazari keehi sahettido wode Marttanne Mayraama Yesuusa maaduwaa oychchana danddayiyoogaa eridosona.—Yoh. 11:3. w20.09 20 ¶3; 21 ¶6

Yesuusa kaalliyaageeti Kawotettay ‘matan’ yaananne Rooma haaruwaappe eta laꞌa kessana giidi hidootidosona. Xoossaa Kawotettay iitatettaa xayssiyo wodiyaanne xillotettay kumido ooratta alamiyaa laattiyo wodiyaa yeemuwan naagoos. (2 PHe. 3:13) SHin, nuuni danddayanchcha gidananne Yihooway keerido wodiyaa naagana koshshees. Markkabiyaa keexxanawunne ‘xillotettaabaa yootanawu’ Noheyyo gidiya wodiyaa Yihooway immiis. (2 PHe. 2:5; 1 PHe. 3:20) Iitatettay kumido Sadoomanne Gamoora katamaa xayssanawu Yihooway kuuyidobaa xeelliyaagan Abrahaami zaari zaari oychchido wode I danddayan ezggiis. (Doo. 18:20-33) Keehi daro layttawu, ammanettibeenna Israaꞌeelata Yihooway daro danddayiis. (Nah. 9:30, 31) ‘Bantta nagaraappe simmidi’ A dabbo gidanawu koyiya ubba asawu gidiya wodiyaa immido gishshawu, Yihooway danddayanchcha gidiyoogaa nuuni akeekoos. (2 PHe. 3:9; Yoh. 6:44; 1 Xim. 2:3, 4) Yihoowa leemisoy, nuuni aggennan sabbakanawunne tamaarissanawu danddayanchcha gidanaadan maaddees. w20.09 10 ¶8-9

Yihooway hayqqidaageeta denttiyo wode, eti kaseegaadan hassayanaadaaninne kaseegaa mala asa gidanaadan oottana. Hegee woygiyoogaakko qoppa. Yihooway nena keehi siiqiyo gishshawu neeni qoppiyo, yootiyo, oottiyoonne neeyyo siyettiya ubbabaa I akeekeesinne hassayees. Yaatiyo gishshawu, I nena denttikko, aynne metootennan ne qofaa, ne xeelaanne ne eeshshaa zaarettidi neessi immana danddayees. Yihooway nuna ubbaa huuphiyan huuphiyan loytti eriyoogaa Kawuwaa Daawiti eriis. (Maz. 139:1-4) Yihooway nuna loytti eriyoogaa nuuni akeekiyo wode nuuyyo aybi siyettii? Yihooway nuna loytti eriyoogaa nuuni wotti dentti qoppiyo wode hirggana koshshenna. Aybissi? Yihooway nuuyyo keehi qarettiyoogaa hassaya. I nuna ubbaa alꞌꞌobadan xeellees. Nu deꞌuwan nuna gakkida ubbabaa Yihooway hassayees. Hegee keehi minttettiyaaba! Nuuni nurkka deꞌiyaabadan mule qoppana koshshenna. Yihooway ubbatoo nunaara deꞌeesinne nuna maaddanawu koyees.—2 Odi. 16:9. w20.08 17 ¶13-14

Yihooway ba asaa tamaarissiyoogaa dosees. Yihooway eti ba siiqiyo naatudan A eranaadan, siiqanaadaaninne merinawu deꞌanaadan koyees. I tamaarissiyo timirttee baynnaakko ha ubbabay hanana danddayenna. (Yoh. 17:3) Yihooway ba asaa tamaarissanawu koyro xeetu layttan deꞌida Kiristtaane gubaaꞌiyaa goꞌettiis. (Qol. 1:9, 10) Yesuusi qaalaa gelido ‘minttettiya’ woy maaddiya geeshsha ayyaanay erissiyo ashkkaratakka maaddiis. (Yoh. 14:16) Erissiyo ashkkarati Xoossaa Qaalaa akeekanaadaaninne Yesuusi yootidonne oottido ubbabay guyyeppe Wonggeliyan xaafettidaagaa nabbabidi hassayanaadan geeshsha ayyaanay eta maaddiis. He eray koyro xeetu layttan deꞌida Kiristtaanetu ammanuwaa, qassi eti Xoossaa siiqiyo siiquwaa, A Naꞌaa siiqiyo siiquwaanne eti issoy issuwaara siiqettiyo siiquwaa minttiis. Ha wodiyan, Yihooway “wurssetta gallassatun,” ubba biittaa asay A ogiyaabaa tamaaridi leemiso hanotan ba deriyaakko zulanaagaa kasetidi yootiis. (Isi. 2:2, 3) Ha hiraagay ha wodiyan polettishin beꞌoos. w20.10 24 ¶14-15

Issi uri siiqiya laggee zoriyo loꞌꞌo zoriyaa siyennaadan oottana danddayiyaabay aybee? Otoruwaa. Otorettiya asay ‘tumu yohuwaa siyiyoogaa aggidi, bana ufayssiyaabaa’ xallaa siyees. (2 Xim. 4:3, 4) Eti banttana haratuppe eranchcha woy aadhdhoos giidi qoppiyo gishshawu banttawu zoree koshshiyaabadan qoppokkona. Gidoppe attin, kiitettida PHawuloosi, “Issi urai ainne hanennan de7iiddi, aibakko i hanidobaa ayyo milatikko, ba huuphiyaa cimmees” yaagiis. (Gal. 6:3) Kawuwaa Solomoni hegaa loytti qonccissiis. I, “Lo77o zoriyaa ekkenna ceega kawuwaappe hiyyeesa gidikkonne, aadhdhida eranchcha yelagai keha” yaagiis. (Era. 4:13) PHawuloosi haratu sinttan A zorido wode PHeexiroosawu aybi siyettidaakko qoppa. (Gal. 2:11-14) PHawuloosi A haasayissido ogeenne hegaa haratu sinttan yootidoogee PHeexiroosa yiilloyana danddayees. SHin PHeexiroosi aadhdhida eranchcha. I PHawuloosi zoridobaa ekkiis; qassi uluwan lancciyaa oyqqibeenna. PHeexiroosi guyyeppe A ‘siiqo ishaa’ yaagiis.—2 PHe. 3:15. w20.11 21 ¶9, 11-12

Xinaateti ayyaanaaban diccanaadan keehi maaddanabay aybee? Gubaaꞌe shiiqota shiiqiyoogaa. SHiiqotun Geeshsha Maxaafaappe tamaariyoobay etawu eraa gujjees, eta ammanuwaa mintteesinne Xoossaa eti loytti siiqanaadan maaddees. (Oos. 15:30-32) Qassi issi ishay Yihoowa loytti siiqiyoogee Xoossaa azazota azazettanaadan bana waati denttettidaakko xinaatiyawu yootana danddayees. (2 Qor. 7:1; 2 Qor. 4:7) Xinaateti ammanettida daro Yihoowa Markkatuura erettiyo wode, Xoossaanne shooruwaa siiqanaadan Kiristtoosi yootido azazuwaa Yihoowa Markkati waati azazettiyaakko eta leemisuwaappe xinaateti tamaaroosona. (Yoh. 13:35; 1 Xim. 4:12) Eti Kiristtoosi erissiyo ashkkara gidanawu aybin laamettana koshshiyaakko banttaagaa mala paaciyaa xoonida aassiyaageetuppe tamaarana danddayoosona. (Zaa. 30:11) Xinaateti ayyaanaaban diccanaadan gubaaꞌiyan deꞌiya ubbay issi issiban maaddana danddayees.—Maa. 5:16. w20.11 5 ¶10-12

PHawuloosi Efisoonan deꞌiya isttaadeemiyan tumu doꞌaara baaxettidoogaabaa yootennan aggenna. (2 Qor. 1:8; 4:10; 11:23) Woy I doꞌaa mala gidida Ayhudatinne hara asati bana eqettidoogaa odennan aggenna. (Oos. 19:26-34; 1 Qor. 16:9) PHawuloosa wolqqaama metoy gakkiis. Gidikkonne I sinttappe ufayssiyaaba demmanaagaa ammaniyoogaa aggibeenna. (1 Qor. 15:30, 31; 2 Qor. 4:16-18) Nuuni keehi iita wodiyan deꞌoos. Nu ishanttuppe amaridaageeti danobay gakkin qohettidosona. Harati olay deꞌiyo heeran deꞌiyo gishshawu hirggoosona. Issi issi biittatun Yihoowa asay laꞌatettan sabbakenna, qassi eti hegaa gaasuwan qashettana woy hayqqana danddayikkonne aggennan awu haggaazoosona. SHin he ubba ishanttinne michchontti aggennan Yihoowawu goynniyoogan nuussi loꞌꞌo leemiso. Eti ha wodiyan hayqqiyaaba gidikkonne, Yihooway sinttappe etawu keehi loꞌꞌobaa immanawu qaalaa gelidoogaa eriyo gishshawu aybanne yayyokkona. w20.12 9 ¶3-4

Asay mishiraachchuwaa siyanawu koyenna gishshawu woy son daro asaa demmabeenna gishshawu issi isstoo hidootaa qanxxadii? Hegaa mala hanotatun, ufayttiiddi deꞌanawu woy kaseegaappe aaruwan ufayttanawu ay oottana danddayiyoo? Haggaazuwaa bessiyaagaadan xeelliyoogee keehi koshshiyaaba. Hegaa giyoogee woygiyoogee? Nu sabbakiyo waanna gaasoy Xoossaa sunttay erettanaadan oottiyoogaanne A Kawotettaabaa asayyo yootiyoogaa gidiyoogaa hassaya. Yesuusi guutta asati bana kaallanaagaa geeshshidi yootiis. (Maa. 7:13, 14) Nuuni haggaaziyo wode, Yihoowaara, Yesuusaaranne kiitanchchatuura oottiyo maataa demmoos. (Maa. 28:19, 20; Ajj. 14:6, 7) Yihooway bawu haggaazanawu koyiya asata baakko ehees. (Yoh. 6:44) Yaatiyo gishshawu, issi uri nu yootiyoobaa haꞌꞌi siyanawu koyennaba gidikko, haroode nu A haasayissiyo wode I siyana danddayees. Diboora, “Hidootaa qanxxiyoogee Seexaanay nuna yashissanawu goꞌettiyo wolqqaama miishsha” yaagaasu. SHin, Xoossaa Yihooway Seexaanaappenne I goꞌettiyo ay miishshaappekka keehi darees. w20.12 26 ¶18-19; 27 ¶21

Daro Kiristtaaneti banttawunne bantta so asawu koshshiyaabaa kunttanawu ubba wode oottana koshshees. SHin he aassiyaageeti banttawu danddayettida ubban Xoossaa dirijjitiyaa ammanettidi maaddoosona. Leemisuwawu, amaridaageeti qohettidaageeta maaddoosona, harati keexuwaa oosuwaa oottoosona, qassi kumetta saꞌan oottiyo oosuwaa ubbaykka miishshan maaddana danddayoosona. Eti hegaa oottiyoy Xoossaanne harata siiqiyo gishshataassa. Saaminttan saaminttan, gubaaꞌe shiiqota shiiqiyoogaaninne yan qofaa yootiyoogan nu ishanttanne michchontta siiqiyoogaa bessoos. Nuuni daafurikkonne he shiiqota shiiqoos. Nuuni qofaa yootanawu yayyikkonne yootoos. Qassi nuussi ubbawu metoy deꞌikkonne shiiquwaappe kase woy shiiquwaappe simmin harata minttettoos. (Ibr. 10:24, 25) Nu alꞌꞌo ishanttinne michchontti oottido oosuwaa gishshawu nuuni eta keehi galatoos! w21.01 10 ¶11

Otorettiya asati banttawu sabettanawu koyiyo gishshawu, harata galatanawu metootoosona. Eti darotoo banttana haratuura geeddarssoosona qassi haratuppe aadhdhanawu baaxetoosona. Harata loohissiyoogaappenne etawu aawatettaa immiyoogaappe, eti hagaadan gaana danddayoosona: ‘Issi uri issibay I koyiyoogaadan maara oosettanaadan koyikko, hegaa baayyo oottana koshshees.’ Otorettiya uri darotoo haratuppe aadhdhanawu koyeesinne eti aagaappe loꞌꞌobaa oottiyo wode qanaatees. Nuuni otorettiyoogaa akeekikko, he iita eeshshay nu wozanan xaphuwaa yeddennaadan ‘nu qofaa muumeera dummayanawu’ Yihooway nuna maaddana mala A wozanappe woossana bessees. (Roo. 12:2) Yihooway nuussi leemiso gidido gishshawu keehi galatoos! (Maz. 18:35) I ba ashkkaratuura gayttidaagan oottidobaappe ashkke gidiyoogaa akeekida; qassi nuuni A leemisuwaa kallana koyoos. Hegaa bollikka, banttana ziqqi oottidi Yihoowawu haggaazidaageetu leemisuwaa kaallanawu koyoos. Nuuni ubbatoo awu bessiya bonchchuwaanne sabaa immiyaageeta gidoos.—Ajj. 4:11. w20.08 13 ¶19-20

Aqo deꞌoy Xoossay immido wottiyoobi baynna imota; shin asay nagaranchcha. (1 Yoh. 1:8) Aqo oyqqidaageeti “bantta bolli waayiyaa ehaana” giidi, metoy eta gakkanaagaa Xoossaa Qaalay yootiyoy hegaassa. Issi azinay so asawu ayyaanaaban, qofaaninne asatettan koshshiyaabaa kunttanaadan Yihooway appe koyees. (1 Xim. 5:8) Gidikkonne, machchoti Xoossaa Qaalaa galla galla nabbabanawu, qassi hegaa wotti dentti qoppanawunne wozanappe Yihoowakko woossanawu wodiyaa bazzana koshshees. Hegee metiyaaba gidana danddayees. Machchotussi oosoy daro gidikkonne, hegawu wodiyaa bazziyoogee keehi koshshiyaaba. Aybissi? Nuuni ubbay Yihoowaara dabbotanaadaaninne he dabbotaa minttanaadan I koyiyo gishshataassa. (Oos. 17:27) Issi machchiyaa nagaranchcha gidida ba azinaassi haarettanawu baaxetana koshshiyoogee tuma. Gidikkonne, A haarettana koshshiyo gaasuwaa Geeshsha Maxaafay yootiyoy aybissakko akeekiyoonne ammaniyo wode, Yihooway iyyo immido aawatettaa polanawu metootukku. w21.02 9 ¶3, 6-7

Paacee birataappe qara mashshaa medhdhanawu eettiyo tamaa mala. Taman xuuggidi irxxissiyo wode he qara mashshay minnees. Hegaadankka, nuuni paacee gakkishin gencciyo wode, nu ammanoy minnees. Yaaqoobi, “Intte danddayai . . . inttena zawatidaageetanne paci bainnaageeta oottidi, ba oosuwaa polo” yaagidoy hegaassa. (Yaaq. 1:4) Nuuni paacee gakkishin nu ammanoy minniyoogaa beꞌiyo wode, ufayssan genccana danddayoos. Nuuni ufayttiyoogaa agganaadan oottana danddayiya amaridabaakka Yaaqoobi ba dabddaabbiyan yootiis. Metiya issibay ay oottanaakko erennaagaa. Nuna metoy gakkiyo wode, Yihoowa ufayssiyaabaa, nu ishanttanne michchontta maaddiyaabaanne nuuni ayyo ammanettidi deꞌanaadan maaddiyaabaa kuuyanaadan Yihooway maaddana mala woossana koshshees. (Erm. 10:23) Nuuni ay oottanaakko, qassi nuna eqettiyaageetussi woyganaakko eranawu aadhdhida eratettay koshshees. Nuuni ay oottanaakko erana xayikko hidootaa qanxxana danddayoos, qassi ufayttiyoogaa sohuwaara aggana danddayoos. w21.02 28 ¶7-9

Yaatanawu Yihooway nuuyyo loꞌꞌo leemiso gidees. A siiqoy keehi mino gidiyo gishshawu, nuuni ayyo ammanettidi deꞌikko, I nuna siiqiyoogaa mule aggenna. (Roo. 8:38, 39) “Minttidi” giya qaalay issi uri siiqanawu keehi baaxetiyoogaa qonccissees. Nu ishanttanne michchontta siiqiyoogee issi issitoo nuna metana danddayees. Harati nuna yiilloyiyo wode, nuuni ‘siiquwan issoy issuwaa danddayidi’ deꞌana koshshees; qassi ‘issippe gatti qachchiya sarotettan geeshsha ayyaanay immiyo issippetettaa naaganawu keehi baaxetana’ bessees. (Efi. 4:1-3) Nuuni nu ishanttuuranne balan xeelaa wottokko, qassi Yihooway xeelliyoogaadan nu ishantta xeellanawu nuussi danddayettida ubbabaa oottoos. (1 Sam. 16:7; Maz. 130:3) Nu ishanttanne michchontta wozanappe siiqiyoogee, ubba qassi eta balaa akeekiyo wode hegaadan oottiyoogee issi issitoo metiyaaba. Hegee koyro xeetu layttan deꞌida amarida Kiristtaaneta, hegeetikka Ewodanne Sinxxiiko metidaba milatees. Kiitettida PHawuloosi eti “issi qofan . . . Godan de7anaadan” eta zoriis.—Pili. 4:2, 3. w21.01 22-23 ¶10-11

Cimidaageeti banttanaara “issippe” Yihoowawu haggaaziya yelaga attumaageeta xoqqu ootti xeelloosona. (Sof. 3:9) Intteyyo imettida oosuwaa intte minnidi oottiyoogaa eti dosoosona. Qassi eti inttena nashshoosona. Yelaga ishanttoo, Yihooway inttena siiqiyoogaanne inttenan ammanettiyoogaa mule dogoppite. Wurssetta gallassatun, bantta dosan eeno giya yelaga attuma olanchchati deꞌanaagaa I kasetidi yootiis. (Maz. 110:1-3) Intte A siiqiyoogaanne intteyyo danddayettida ubban ayyo loytti oottanawu koyiyoogaa erees. Hegaa gishshawu, harata danddayite, qassi inttebaakka danddayite. Intte baliyo wode, intteyyo imettiya loohissuwaanne seeraa ekkite. Hegee Yihooway immiyooba gidiyoogaa akeekite. (Ibr. 12:6) Inttessi imettida ay oosuwaanne minnidi oottite. Qassi ubbaappe aaruwan, intte oottiyo ubbaban saluwan deꞌiya intte Aaway ufayttanaadan oottite.—Lee. 27:11. w21.03 7 ¶17-18

Nuuni daroban hegeekka amaridaageeti nu gaasuwan, amaridaageeti harati gattiyooban hidootaa qanxxana danddayoos. Hegeetuppe amaridaageeti nu oottiyo balaa, nu shugo gididobaa woy nu sahuwaa. Woy Yihoowa haggaazuwan nu koyido aawatettaa ekkibeenna gishshawu woy nu yootiyoobaa daro asay siyenna moottan sabbakiyo gishshawu hidootaa qanxxana danddayoos. Nubaa iitabaa qoppiyoogeenne balabaa oottiyoogee metennaba. Hegaa gishshawu, nu oottiyo balabaa gaasuwan Yihooway nuna Gannatiyaa gelissanawu koyenna giidi qoppana danddayoos. Hegaadan qoppiyoogee keehi qohees. Geeshsha Maxaafay Yesuusappe attin asay ubbay “nagaraa” oottidoogaa yootees. (Roo. 3:23) SHin Yihooway nu balan xeelaa wottenna woy wottiyoobi baynnaageeta gidanaadan naagenna. I nuna maaddanawu koyiya siiqiya Aawaa. Qassi I danddayanchcha. Suurebaa oottiyoogeenne nubaa iitabaa qoppennan aggiyoogee nuna metiyoogaa Yihooway erees; qassi I nuna maaddanawu giigi uttiis.—Roo. 7:18, 19. w20.12 22 ¶1-3

Nuuni ubbay oge biya asa mala. Nu gakkanawu halchchiyoosay siiquwan Yihooway haariyo ooratta alamiyan deꞌanaagaa. Deꞌuwawu efiya ogiyaara baanawu nuuni galla galla baaxetoos. SHin Yesuusi yootidoogaadan, he ogee xuntta, qassi issi issitoo hegaara baanawu metees. (Maa. 7:13, 14) Nuuni nagaranchcha gidiyo gishshawu, he ogiyaappe sherꞌꞌi gaana danddayoos. (Gal. 6:1) Deꞌuwawu efiya xuntta ogiyaappe kiyennan deꞌanawu, nu qoppiyoobaa, dosiyoobaanne ixxiyoobaa, qassi oottiyoobaa laammanawu eeno gaana koshshees. Kiitettida PHawuloosi nuuni aggennan ‘laamettanaadan’ minttettiis. Nu qofaanne nuuyyo siyettiyaabaa pilggiyoogee metiyaaba. Aybissi? Nu wozanay cimmiyo gishshataassa; qassi nuuni ay oottanaadan I denttettana danddayiyaakko eriyoogee metana danddayees. (Erm. 17:9) “Worddoban gaasoyidi” nuna cimmiyoogee metiyaaba gidenna. (Yaaq. 1:22, NW.) Yaatiyo gishshawu, nuna pilgganawu Xoossaa Qaalaa goꞌettana koshshees. Xoossaa Qaalay nu garssa asatettaa hegeekka, nu wozanan deꞌiya “koshshaanne qofaa” qonccissees.—Ibr. 4:12, 13. w20.11 18 ¶1-3

Nuna ziqqi oottiyo wode keehi ufayttana danddayoos. Aybissi? Nuuni oottana danddayennabay deꞌiyoogaa ammaniyo wode, harati nuna maaddiyoobaa aybanne galatidinne ufayttidi ekkiyo gishshataassa. Leemisuwawu, inchchirichchay oyqqido tammu asata Yesuusi pattido wode hanidabaa qoppa. Etappe issoy ba wolqqan aynne oottana danddayennabaa Yesuusi oottidi, iita harggiyaappe A pattido gishshawu he bitaniyaa xallay galatanawu simmiis. Bana ziqqi oottiya he bitanee demmido maaduwaa gishshawu galatiis; qassi hegawu Xoossaa bonchchiis. (Luq. 17:11-19) Banttana ziqqi oottiyaageeti darotoo haratuura sarotettan deꞌananne etawu mata lagge gidana danddayoosona. Aybissi? Haratussi loꞌꞌo eeshshati deꞌiyoogaa akeekiyoogaaninne etan ammanettiyoogan eti ufayttiyo gishshataassa. Banttana ziqqi oottiyaageeti harati banttawu imettida oosuwaa loytti oottiyo wode ufayttoosona, qassi sohuwaara eta galatoosonanne bonchchoosona. w20.08 12 ¶17-18