Uddufune

Yihooway nuuni ba Naꞌaa eranaadan maaddanawu ba Qaalan oyddu Wonggeleta siiquwan xaafissiis. He Wonggeleti Yesuusa deꞌuwaabaanne A haggaazuwaabaa yootoosona. He maxaafati Yesuusi yootidobaa, I oottidobaanne awu siyettidabaa qonccissoosona. Ha oyddu maxaafati Yesuusi leemiso gidiyoogaa loytti ‘qoppanaadan’ nuna maaddoosona. He maxaafati nuuni kaallana bessiyo Yesuusa kottiyaabaa yootoosona. Yaatiyo gishshawu, he Wonggeleta xannaꞌiyoogan Yesuusa loytti erana danddayoos. Yaatikko, nuuni A kottiyaa loytti kaallana danddayoos. Nuuni Wonggeletuppe loytti goꞌettanawu eta nabbabiyoogaappe aarobaa oottana koshshees. Nuuni takki giidi eta loytti xannaꞌananne wotti dentti qoppana koshshees. (Yaasa 1:8ra gatta xeella.) Wonggelee yootiyo taarikee neessi loytti qonccanaadan ootta. Haniyaabaa beꞌanawu, siyanawunne akeekanawu qoppiyo ne imotaa goꞌetta. Yihoowa dirijjitee giigissido xuufetun amaridabaa pilgga. w21.04 4-5 ¶11-13

Yesuusi saꞌaa yaanaappe xeetan qoodettiya layttatuppe kase, Masiyaa 30 biran aatti immanaagaa Yihooway ba Qaalan yootiis. (Zak. 11:12, 13) Yesuusa mata laggetuppe issoy A aattidi immana. (Maz. 41:9) Hananabaa yootiya Zakkaariyaasi hagaadankka giis: “Dorssati laalettanaadan, dorssaa heemmiyaagaa [shoca].” (Zak. 13:7) Wozanaa suure asati he hanidabatu gaasuwan Yesuusi yootiyoobaa siyennan ixxokkona. He hiraagati Yesuusa bolli polettidoogaa beꞌiyo wode eta ammanoy minnees. Ha wodiyan hegaa mala metoy deꞌiyoogaa akeekiyoo? Ee. Ha wodiyan, keehi erettiya amarida Yihoowa Markkati ayyo haggaaziyoogaa aggidosona, kaddidosona, qassi haratakka tumaappe wora zaaranawu malidosona. Eti balettiya iita oduwaa, cimmiya taariketanne Yihoowa Markkata xeelliyaagan worddobaa gaazeexan, raadoniyan, televizhiiniyaaninne Intternneetiyan aassoosona. SHin wozanaa suure asati cimettokkona. Qassi, hegaa malabay hananaagaa Geeshsha Maxaafay kasetidi yootidoogaa eti eroosona.—Maa. 24:24; 2 PHe. 2:18-22. w21.05 11 ¶12; 12-13 ¶18-19

Tumaa eray wodiyaappe wodiyan gujji gujji baanaagaa Geeshsha Maxaafay qoncciyan yootees. (Qol. 1:9, 10) Yihooway tumaa loddan loddan qonccissees, qassi nuuni tumaa loytti akeekana gakkanaashin danddayan naagana koshshees. Bolla Gididi Heemmiyaagee nuuni kase eridobaa woy issibaa oottiyo ogiyaa laammana koshshiyoogaa akeekiyo wode, sohuwaara laammees. Ha wodiyan daro woosa keettati bantta asaa ufayssanawu woy alamee eta dosanaadan koyiyo gishshawu, bantta timirtteta laammoosona. SHin Yihoowa Markkati kaseegaappe aaruwan Xoossaakko shiiqanawunne Yesuusaagaadan awu goynnanawu koyiyo gishshawu laammoosona. (Yaaq. 4:4) Nuuni laammiyoy alamiyaa asaa qofay laamettido gishshataassa gidennan, Geeshsha Maxaafaa loytti akeekido gishshataassa. Nuuni tumaa siiqoos!—1 Tas. 2:3, 4. w21.10 22 ¶12

Neeni boorasikko waatana danddayay? Yihooway nena waati maaddiyaakko qoppa. (Maz. 55:22) Hegee neeni nerkka deꞌennaagaa akeekanaadan maaddana. Boorasiya ishanttanne michchontta Yihooway waati maaddiyaakkokka loytta qoppa. (1 PHe. 5:9, 10) Eta son daro layttawu Yihoowa Markkay A xalla gidido Hirosha giyo ishay hagaadan giis: “Nuuni ubbay Yihoowawu haggaazanawu nuuyyo danddayettida ubbabaa oottiyoogaa eroos, qassi hegee so asaappe ooninne Yihoowa Markka gidennaageeta minttettana danddayees.” Qassi ubbatoo woossa, Geeshsha Maxaafaa nabbabanne shiiqota shiiqa. Neeyyo siyettiyaabaa aybanne qottennan Yihoowayyo yootana bessees. Xoossaa Qaalaa ubbatoo nabbabiyoogee, qassi Yihooway nena siiqiyoogaa qonccissiya taariketa yuushsha qoppiyoogee keehippe koshshiyaaba. Amarida Kiristtaaneti Mazamure 27:10nne Isiyaasa 41:10 mala keehi minttettiya xiqiseta hassayoosona. Harati qassi cenggurssan giigidabata nu websaytiyaappe siyiyoogee boorasiyoogaa eti agganaadan maaddiyoogaa akeekidosona. w21.06 9-10 ¶5-8

Neeni siiqiyo asi hayqqin kayyottaydda deꞌay? Geeshsha Maxaafay hayquwaappe denddidaageetubaa yootiyo taariketa nabbabiyoogan dendduwaa hidootan ne ammaniyo ammanuwaa minttanawu takki gaada qoppa. Intte soo asaappe issi uri bohettido gishshawu azzanaydda deꞌay? Xoossaa seeray ubbatoo loꞌꞌo gidiyoogaa akeekanawu xannaꞌa. Nena gakkiya metoy ayba gidikkonne, ne ammanuwaa minttanawu hegaa loꞌꞌo injjedan goꞌetta. Neessi siyettiyaabaa Yihoowawu yoota. Haratuppe shaahettoppa; qassi ne ishanttuuranne michchonttuura matattada deꞌa. (Lee. 18:1) Neeni ne bolli gakkidabaa qoppiyoogee yeekkanaadan oottiyaaba gidikkonne, neeni genccanaadan maaddiyaabata ootta. (Maz. 126:5, 6) SHiiqota shiiqiyoogaa, sabbakiyoogaanne Geeshsha Maxaafaa nabbabiyoogaa aggoppa. Qassi Yihooway sinttappe neeyyo immanawu qaalaa gelido ufayssiyaabata ubbatoo qoppa. Yihooway nena waati maaddiyaakko neeni akeekiyo wode, ne A ammaniyo ammanoy kaseegaappe aaruwan minnana. w21.11 23 ¶11; 24 ¶17

Yesuusa kaalliyaageeti ‘guuttatu’ mala gididoy ayba ogiyaanee? Alamiyaa asay xoqqu ootti xeelliyoy oonee? Dureta, loytti erettiyaageetanne maatay deꞌiyoogeeta. SHin, Yesuusa kaalliyaageeti awudenne hegeetu mala gidokkona. Hegaa gishshawu, alamiyaa asay eta laafa, pattenna ‘guutta’ asadan xeellees. (1 Qor. 1:26-29) Gidoppe attin, Yihooway eta hegaadan xeellenna. Yesuusi ‘ha guuttatubaa’ yootidoy aybissee? A kaalliyaageeti A hagaadan oychchidosona: “Saluwaa kawotettan ubbaappe aadhdhiyaagee oonee?” (Maa. 18:1) Daro Ayhudati banttana harati xoqqu ootti xeellanaadan koyoosona. Issi eranchchay hagaadan giis: “Haratun bonchchettiyaageetanne loytti erettiyaageeta gidiyoogee eti bantta deꞌuwan xoqqu ootti xeelliyooba.” Daro Ayhudati haratuppe aadhdhanawu baaxetiyo gishshawu, Yesuusi bana kaalliyaageeti qoppiyo ogiyaa laammanawu baaxetana koshshiyoogaa erees. w21.06 20 ¶2; 21 ¶6, 8; 22 ¶9

Kiitettida PHawuloosi cimatuyyo loꞌꞌo leemiso gidiis. Leemisuwawu, Tasalonqqen deꞌiya ishanttuyyo zoree koshshido wode PHawuloosi zoranawu mammottibeenna. SHin, PHawuloosi eti ammanuwan oottido oosuwaa, eta siiquwaanne genccaa gishshawu eta koyro galatiis. Hegaa bollikka I eta deꞌuwaa xeelliyaagan qoppiis; qassi eti metootidoogaanne ammanettidi yedetaa gencciiddi deꞌiyoogaa eriyoogaa yootiis. (1 Tas. 1:3; 2 Tas. 1:4) I he ishantti hara Kiristtaanetuyyo leemiso gidiyoogaakka etawu yootiis. (1 Tas. 1:8, 9) PHawuloosi wozanappe galatido gishshawu eti keehi ufayttidosona! PHawuloosi ba ishantta keehi siiqiyoogee qoncce. I Tasalonqqe Kiristtaanetuyyo xaafido naaꞌꞌu dabddaabbetunkka loꞌꞌo zoriyaa zoridoy hegaassa.—1 Tas. 4:1, 3-5, 11; 2 Tas. 3:11, 12. w22.02 15 ¶6

Yihooway meqettaa iitanne asay waayettanaadan oottees giidi Seexaanay yootanawu worddo haymaanootiyaa kaalettiyaageeta goꞌettees. Ubba qassi amaridaageeti, naati hayqqiyo wode, saluwan Xoossawu hara kiitanchchati koshshido gishshawu I eta efiis yaagoosona. Hegee Xoossaa keehi kariyoogaa bessiyaaba! SHin Yihooway siiqiya Xoossaa gidiyoogaa nuuni eroos. Nuna wolqqaama harggee sakkiyo wode woy nu siiqiyoogeeti hayqqiyo wode, nuuni Xoossan mule gaasoyokko. Qassi, issi galla ubbabaa I giigissanaagaa ammanoos. Xoossaa Yihooway siiqiyaagaa gidiyoogaa nu yootiyoobaa siyiya ubbawu yootana danddayoos. Yaatiyo wode Yihooway bana boriyaageetuyyo zaarees. (Lee. 27:11) Yihooway qarettiya Xoossaa. Nuuni yedetaa, harggiyaa woy nagaranchcha gidiyoogaa gaasuwan waayettiyoogaa I beꞌiyo wode, keehi azzanees. (Maz. 22:23, 24) Yihooway nu waayiyaa akeekees, I hegaa xayssanawu koyees, qassi xayssana.—Kessaabaa 3:7, 8 Isiyaasa 63:9ra gatta xalla. w21.07 9-10 ¶9-10

Mata wode, azazettiya asay merinawu Yihoowa siiqiyoonne awu goynniyo aybippenne aadhdhiya gita maataa demmana! Addaameenne Hewaana Xoossaa soo asa gidiyoogaa agganawu kuuyidoogaa gaasuwan gakkida meto ubbaa Yesuusi xayssana. Yihooway miilooniyan qoodettiyaageeta hayquwaappe denttidi gannate gidida saꞌan payya gididi eti merinawu deꞌanaadan oottana. (Luq. 23:42, 43) Yihoowawu goynniya asay wottiyoobi baynnaagaa gidiyo wode, Daawiti yootido “bonchchuwaanne gitatettaa” eti ubbay demmana. Neeni ‘zawi baynna daro asaa’ bagga gidikko, ufayssiya hidootay neessi deꞌees. (Ajj. 7:9) Xoossay nena siiqees; qassi neeni ba soo asa gidanaadan I koyees. Yaatiyo gishshawu, A ufayssanawu neessi danddayettida ubbabaa ootta. Xoossay qaala gelidobata ubbatoo hassaya. Saluwan deꞌiya siiqiya nu Aawawu goynniyo maataa xoqqu ootta xeella; qassi merinawu A sabbiyoogan ufaytta! w21.08 7 ¶18-19

Hananabaa yootiya Ermmaasi yootiyoobaa asay siyennabanne A eqettiyaaba gidikkonne, 40ppe dariya layttawu sabbakiis. Eqettiyaageeti A cayidonne ‘qilliiccido’ gishshawu I azzanidi baayyo imettida oosuwaa agganawu qoppiis. (Erm. 20:8, 9) SHin Ermmaasi hidootaa qanxxibeenna! I hidootaa qanxxennaadaaninne ba haggaazuwan ufayttanaadan A aybi maaddidee? I keehi koshshiya naaꞌꞌubata loytti qoppiis. Koyruwan, Ermmaasi asawu yootiyo Xoossaa kiitay etawu ‘sinttanaa wodee ufayssiyaagaa’ gidanaadan oottees. (Erm. 29:11) Naaꞌꞌanttuwan, Yihooway ba gishshaa Ermmaasi asawu kiitaa yootanaadan dooriis. (Erm. 15:16) Nuunikka ufayssiya mishiraachchuwaa asawu yootoosinne Yihoowa Markkata gidiyo gishshawu A sunttan xeegettoos. Nuuni keehi koshshiyaabata qoppiyaaba gidikko, asay nu yootiyoobaa siyin siyana xayin ufayttana danddayoos. Yaatiyo gishshawu eti dicciyo hanotay nuuni qoppidoogaappe daro wodiyaa ekkikko, azzanana woy hidootaa qanxxana bessenna. Ayssi giikko, erissiyo ashkkara oottanawu danddayanchcha gidana koshshees.—Yaaq. 5:7, 8. w21.10 27 ¶12-13

Nuuni Yihoowawu daro layttaa haggaazidaageeta gidin aggin, Yihoowa ammaniyo nu ammanuwaa ubbatoo minttana bessees. Ayssi giikko, nuuni naagettana xayikko, nu ammanoy shuggana danddayees. Nuuni xannaꞌidoogaadan, ammanuwawu denddo gidiya naqaashaa beꞌana danddayokko. Nuuni beꞌana danddayennabaa eesuwaara dogana danddayoos. Hegaa gishshawu, ammanuwan shuggiyoogee eesuwan ‘baqqi oyqqiya nagara’ gidiyoogaa PHawuloosi yootiis. Yaatin, nuuni ha piriyaappe waani naagettana danddayiyoo?​ (2 Tas. 1:3) Koyro, Yihooway ba geeshsha ayyaanaa immanaadan ubbatoo woossa. Ayssi giikko, ammanoy geeshsha ayyaanaa ayfiyaa macaratuppe issuwaa. (Gal. 5:​22, 23) Xoossaa geeshsha ayyaanay maaddennan, Medhdhidaagaa ammaniyo nu ammanuwaa ubbatoo minttana danddayokko. Yihooway ba geeshsha ayyaanaa immanaadan nuuni ubbatoo woossikko, I nuuyyo hegaa immana. (Luq. 11:13) “Nuussi ammanuwaa gujja” giidikka woossana danddayoos.​ (Luq. 17:5) Qassi, Xoossaa Qaalaa ubbatoo xannaꞌa.—Maz. 1:2, 3. w21.08 18-19 ¶16-18

Cimidaageeti Yihoowa dirijjitiya daro ogiyan maaddana danddayoosona. Etayyo kaseegaa keena wolqqay baynnaba gidikkonne, eti daro layttan demmido keehi darobay etawu deꞌees. Yihooway eta ubbatoo dumma dumma ogiyan goꞌettana danddayees. Leemisuwawu, Cimido wodekka Yihoowawu aggennan minni oottiyoogan ammanettida asatubaa Geeshsha Maxaafay yootees. Leemisuwawu, Muusee Yihooway kiittin hananabaa yootiyaagaa gididi oottiyoogaa doommido wodenne Israaꞌeela deriyaa kaalettiyaagaa gidanaadan doorettido wode ayyo layttay 80 heera. Hananabaa yootiya Daaneelayyo layttay 90ppe darennan waayi aggana, gidikkonne Yihooway ba gishshaa haasayanaadan A goꞌettiyoogaa aggibeenna. Qassi kiitettida Yohaannisi ayyaanay denttettin Ajjuutaa maxaafaa xaafiyo wode ayyo layttay 90ppe darennan waayi aggana. “Xoossau yayyiya xillo asa” giidi Geeshsha Maxaafay Simoonabaa guuttaba xallaa yootikkonne, Yihooway abaa erees; qassi guutta naꞌaa Yesuusa beꞌiyo, he naꞌaanne A aayyiyo xeelliyaagan hananabaa yootiyo maataa ayyo immiis.—Luq. 2:22, 25-35. w21.09 3-4 ¶5-7

Yelidaageeti issi naꞌa haraara geeddarssennaadan woy issi naꞌi oottana danddayiyoogaappe aarobaa oottanaadan koyenna mala naagettana koshshees. Yelidaageeti hegaadan oottikko, eti bantta naata hidootaa qanxxissana danddayoosona. (Efi. 6:4) Sachiko giyo michchiyaa hagaadan gaasu: “Ta aayyiyaa taani timirtte keettaa paaciyan 100ppe 100 ehanaadan koyawusu, shin hegee danddayettennaba. Taani timirttiyaa wurssoosappe daro layttay aadhdhiis, shin taani tawu danddayettidaagaa keena oottikkonne Yihooway tanan waayi ufayttana gaada haꞌꞌikka issi issitoo qoppays.” Kawuwaa Daawiti ‘gitabaa’ woy I oottana danddayennabaa amottibeennaagaa yootiis. I bana ziqqi oottido gishshawu, bawu deꞌiyaaban ufayttidi saruwan deꞌiis. (Maz. 131:2) Yelidaageeti Daawiti yootidobaappe ay tamaarana danddayiyoonaa? Yelidaageeti banttana ziqqi oottiyaageeta gidikko, banttappekka bantta naatuppekka keehi darobaa naagokkona. Yelidaageeti bantta naati loytti oottana danddayiyoobaanne danddayennabaa akeekidi, eti gakkana danddayiyo halchchuwaa halchchiyoogan naati pattikke giidi qoppennaadan maaddana danddayoosona. w21.07 21-22 ¶5-6

Yihooway nuussi ubbawu koyidobaa dooriyo maataa immidoogaa nuuni hassayana koshshees. Hegaa giyoogee nuuni Yihoowawu azazettanawu woy azazettennan agganawu doorana danddayoos giyoogaa. Issi issi naatussi loꞌꞌo leemiso gidiya aawi woy aaya baynnaba gidikkonne, eti Yihoowawu haggaazanawunne awu ammanettidi deꞌanawu kuuyidosona. Qassi harati Yihoowa siiqanaadan eta yelidaageeti minni tamaarissidoogeeta gidikkonne, eti guyyeppe Yihoowawu haggaaziyoogaa aggidosona. Yaatiyo gishshawu, Yihoowawu haggaazanawu woy agganawu nuuni ubbay kuuyana koshshees. (Yaas. 24:15) Hegaa gishshawu, intte naꞌi Yihoowawu haggaaziyoogaa aggido gishshawu azzaniya yelidaageetoo, hegee intte mooro giidi qoppoppite! Issi issitoo, aaway woy aayyiyaa Yihoowawu haggaaziyoogaa aggana danddayoosona, ubba qassi I woy A so asaa aggi bayana danddayoosona. (Maz. 27:10) Hegee banttana yelidaageeta bonchchiyaanne eta nashshiya naatussi keehi azzanttiyaaba gidana danddayees. Yelagatoo, intte aaway woy aayyiyaa bohettidaba gidikko, hegee inttena keehi qohidoogaa Yihooway eriyoogaa intte ammanettana danddayeeta. I inttena siiqeesinne ammanettidi intte ayyo haggaaziyoogan ufayttees. Inttena yelidaageeti kuuyiyooban oyshettiyay inttena gidennaagaakka hassayite. w21.09 27 ¶5-7

Issi Kiristtaanee bohettikko, A wudiyaa qohana danddayiya harggida dorssaadan qoppana danddayoos. I ayyaanaaban harggiis. (Yaaq. 5:14) Ayyaanaabaa harggee, hara harggiyaadan asappe asa eesuwan oyqqana danddayees. Hegaa gishshawu, nagaraa oottida uraa issi issi hanotatun gubaaꞌiyaappe bohiyoogee bessiyaaba. Ha seeray gubaaꞌiyan deꞌiya ammanettidaageeta Yihooway siiqiyoogaa qonccissiyaaba, qassi nagaraa oottida uri ba mooruwaa akeekanaadaaninne hegaappe simmanaadan oottana danddayees. Bohettida uri ayyaanaabaa qumaa maananne ayyaanaaban bana minttana danddayiya shiiqota shiiqana danddayees. I nabbabanawunne xannaꞌanawu xuufiyaa ekkananne JW Brodkastingiya beꞌana danddayees. Qassi cimati I laamettiyoogaa beꞌidi, ayyaanaaban kaseegaadan minnanaadaaninne zaaretti Yihoowa Markka gidanaadan maaddanawu issi issitoo zorananne assi kaaletuwaa immana danddayoosona. w21.10 10 ¶9, 11

Nuuni goynuwaara gayttidaagan koyro xeetu layttan deꞌida Kiristtaanetu leemisuwaa kaalloos. Leemisuwawu, nuuni darajjayettido ogee beni Kiristtaanetuugaara issi mala. Etaagaadan, nuussikka yuuyidi xomoosiyaageeti, cimatinne gubaaꞌiyawu oottiyaageeti deꞌoosona. (Pili. 1:1; Tii. 1:5) Qassi etaagaadan, Yihooway mattumaa gaytettawunne aqo deꞌuwawu kessido maarata, qassi suuttaa goꞌettiyoogaa xeelliyaagan Xoossay yootiyoobaa azazettoos; Xoossaa higgiyawu azazettana koyennaageetuppe gubaaꞌiyaa naagoos. (Oos. 15:28, 29; 1 Qor. 5:11-13; 6:9, 10; Ibr. 13:4) Geeshsha Maxaafay Xoossaa ufayssiya ‘issi ammanoy’ woy haymaanootee deꞌiyoogaa geeshshidi yootees. (Efi. 4:4-6) Yihoowa asa gidiyoogee, qassi Yihoowabaanne I halchchidobaa tumaa eriyoogee nuussi gita maataa! Hegaa gishshawu, nuuni tuman deꞌiyoogaa mintti ammananawu nuussi danddayettida ubbabaa oottanawu koyiyaageeta gidoos. w21.10 22-23 ¶15-17

Kawuwaa Yoosaafixa gita metoy gakkiis. Amoonatu, Mooꞌaabatunne Seꞌiira Deriyaa heeran deꞌiyaageetu daro olanchchati A, A soo asaanne A deriyaa yashissidosona. (2 Odi. 20:1, 2) Yoosaafixi waatidee? I Yihooway maaddanaadaaninne wolqqaa immanaadan woossiis. Yoosaafixi bana ziqqi oottidi woossido 2 Hanidabaa Odiya 20:5-12n deꞌiya woosay I Yihoowan keehi ammanettiyoogaa bessees. Leewa zare gidida Yahaaziꞌeela baggaara Yihooway Yoosaafixa haasayissidoogaa, hachchi gallassa xiqise yootees. Yoosaafixi Xoossan wozanappe ammanettidi he azazota azazettiis. Inne A asay bantta morkketuura gayttanawu kiyido wode, I wotaaddaratu sinttan eqqiis, eti olaa miishshaa gixxennan mazamuriyaa yexxiyaageetappe attin, gooba olanchchata gidokkona. Yihooway Yoosaafixassi gelido ba qaalaa naagiis; Yoosaafixi morkketu olanchchata xooniis.—2 Odi. 20:18-23. w21.11 15-16 ¶6-7

Nuna metoy gakkiyo wode ubban, nuuni Yihoowawu ammanettidi deꞌanaadan I nuna maaddanaagaa ammanettana danddayoos. (2 Qor. 4:7-9) Geeshsha Maxaafay “GODAA aifeti ayyo yayyiyaanne aggenna a siiquwan ufaissaa oottiya asatu bollaana” giyo gishshawu, Yihooway nuussi ubbatoo aggenna siiquwaa bessanaagaa ammanettana danddayoos. (Maz. 33:18-22) Nuuni Yihoowawu haggaaziyoogaa doommanaappe kase, Xoossay ubba asawu bessiyo siiquwaa beꞌida. SHin nuuni awu goynniyaageeta gidiyo gishshawu, aggenna A siiquwankka goꞌettoos. He siiqoy denttettin, Yihooway ba ashshiya kushetun nuna oyqqees. I nuna ubbatoo baakko shiishsheesinne nuussi gelido ba qaalaa naagees. Nuuni merinawu A dabbo gidanaadan I koyees! (Maz. 46:1, 2, 7) Yaatiyo gishshawu, nuna ayba metoy gakkikkokka, nuuni Yihoowawu ammanettidi deꞌanaadan koshshiya wolqqaa I nuussi immana. w21.11 7 ¶17-18

Banaara oottiya, tamaariya woy bantta so asappe issuwaa bolli amarida layttawu uluwan lancce oyqqida asa nuuppe daroti eroos! Yooseefa ishantti tammati A bolli uluwan lancciyaa oyqqidoogee guyyeppe eti A ixxanaadan oottidoogaa hassaya. (Doo. 37:2-8, 25-28) SHin Yooseefi eta bolli iitabaa oottibeenna! I ba ishanttu bolli haluwaa kiyana danddayiyo wodekka, I eta maariis. Yooseefi uluwan lancciyaa oyqqibeenna. Guyyeppe, Wogaabaa 19:18n xaafettida zoriyaara maayettiyaabaa I oottiis. (Doo. 50:19-21) Xoossaa ufayssanawu koyiya Kiristtaaneti Yooseefa leemisuwaa kaallana koshshees; I ba ishanttu bolli haluwaa kiyiyoogaappe etayyo atto giis. Hegee nuuni nuna naaqqidaageetuyyo atto gaanaadan Yesuusi tamaarissiis. (Maa. 6:9, 12) Qassi kiitettida PHawuloosi ba mala Kiristtaaneta hagaadan zoriis: “Ta ishatoo, intte intte huuphen asau halo kessoppite.”—Roo. 12:19. w21.12 11 ¶13-14

Niisaana 14, 33 M.Ln, qammi Yesuusi Geetesemaane ataakiltte sohuwaa biis. I bawu siyettiyaabaa yan Yihoowawu yootiis. (Luq. 22:39-44) Yesuusi he waayissiya wodiyan ‘keehi yeekkidinne afuxxidi woossiis.’ (Ibr. 5:7) Yesuusi I hayqqanaappe kase qammi ay demmanawu woossidee? Yihoowawu ammanettidi deꞌanawunne A sheniyaa oottanawu wolqqaa demmanawu woossiis. Yihooway ba Naꞌay wozanappe woossido woosaa siyidi A minttettanawu kiitanchchaa kiittiis. Yesuusi ba Aawaa sunttay geeyanaadan oottiyoogee keehi koshshiyaaba gidiyoogaa erees. Yesuusi wozanappe woossido woosaa Yihooway siyiis. Aybissi? Ba Aawawu ammanettidi deꞌiyoogeenne A sunttay geeyanaadan oottiyoogee Yesuusa qofissida waannaba gidiyo gishshataassa. Nuna qofissiya waannabay hegaa gidikko, maaduwaa demmanawu nuuni woossiyo woosaa Yihooway zaarana.—Maz. 145:18. w22.01 18 ¶15-17

Nuuni polotikaaban oossinne exatenna gishshawu ha wodiyan daroti nuuni yootiyoobaa siyokkona. Yihoowa Markkati dooruwaa wode doorana koshshees eti giidi qoppoosona. SHin, nuuni asi nuna haaranaadan doorikko, Yihooway nuna haaranaadan koyokko giyoogaa. (1 Sam. 8:4-7) Asay nuuni timirtte keettatanne hosppitaaleta keexxanaadan, qassi deretettaa maaddiya harabaakka oottanaadan koyees. Nuuni ha alamiyaa metuwaa giigissanawu malennan, sabbakiyo oosuwaa minni oottiyo gishshawu eti nu yootiyoobaa siyokkona. Nu ammanoy xayennaadan nuna aybi maaddanee? (Maa. 7: 21-23) Yesuusi nu oottanaadan azazido oosuwaa nuuni keehi xoqqu oottidi xeellana koshshees. Ha alamiyaa metuwaa giigissanawu baaxetiyoogan nu wodiyaa mule wurssana koshshenna. Nuuni asaa siiqiyo gishshawu eta metoy nuna qofissees, shin nuuni nu shoorota Xoossaa Kawotettaabaa tamaarissiyoogeenne eti Yihoowaara dabbotanaadan maaddiyoogee aybippenne aadhdhiyaaba gidiyoogaa eroos. w21.05 7 ¶19-20

Kawotettatun haariyaageetuppe daroti ha wodiyan Xoossawu oottays giyaaba gidikkonne, bantta maataa agganawu koyokkona. Yaatiyo gishshawu, Yesuusa wode haaridaageetuugaadan, ha wodiyan haariyaageeti Yihooway tiyidoogaa ammanettidi kaalliyaageeta qohiyoogan A eqettoosona. (Oos. 4:25-28) Yihooway waatii? Mazamure 2:10-12y hagaadan gees: “Hegaa gishshau, inttenoo kawotoo, eeyyoppite; ha sa7aa haariyaageetoo, inttena ye77e! GODAAYYO bonchcho yashshatettan oottite; yashshaa kokkoriyoogan ufaittite. GODAI hanqqettin, ogiyan intte xayennaadan na7aa yerite; aissi giikko, hanqquwaa eesuwan i eexxi kiyana. Akko baqati attiya ubbati anjjettidaageeta.” Yihooway keha gidiyo gishshawu eti likkebaa kuuyanaadan etawu wodiyaa immiis. Eti haꞌꞌi laamettananne Yihoowa Kawotettawu haarettanawu doorana danddayoosona. SHin wodee wuriiddi deꞌees. (Isi. 61:2) Tumaa eriyoogaappenne Yihoowawu haggaaziyoogaappe aaruwan asaa eesoyiyaabi mule baawa. w21.09 15-16 ¶8-9

PHawuloosi nuussi deꞌiyaabay ayba gidikkonne, hegee gidana giidi nuuni deꞌana koshshiyoogaa yootiis. (Pili. 4:12) Nuussi deꞌiya aquwaappe keehi alꞌꞌobay nuuni Xoossaara dabbotido dabbotaa. (Imb. 3:17, 18) Israaꞌeelati bazzuwan 40 layttawu takki simmin Muusee etawu yootidobaa qoppa: “GODAI intte Xoossai intte oottidobaa ubbaa anjjiis; . . . Ha oitamu laitta ubban GODAI intte Xoossai inttenaara de7iis. Aibanne intteyyo pacissibeenna.” (Zaa. 2:7) He 40 layttatun, Israaꞌeelati maanaadan Yihooway mannaa immiis. Yihooway eta maayoy wurennaadan oottiis. Yaatiyo gishshawu, eti Gibxxeppe kiyo wode maayido maayuwaa he wodekka goꞌettoosona. (Zaa. 8:3, 4) Nuuni nuussi deꞌiyaabay gidana giidi deꞌiyo wode Yihooway ufayttana. I nuussi immido guuttabaa gishshawukka nuuni A galatanaadaaninne hegaa immidaagee A gidiyoogaa nuuni akeekanaadan I koyees. w22.01 5 ¶10-11

Azinatoo, intte soo asawu koshshiyaabaa kunttiyo aawatettay inttessi deꞌiyo gishshawu, qohuwaappe eta naaganawunne maaddanawu intte minni ootteeta. Inttena metoy gakkiyo wode, hegaa intterkka giigissana danddayiyaabadan qoppennan waayi aggana. SHin intte wolqqan mule ammanettoppite. Yaatiyoogaappe, Yihooway maaddana mala buzo woossite. Hegaa bollikka, intte machchotuura woossite. Geeshsha Maxaafaanne Xoossaa dirijjitee giigissido xuufeta xannaꞌiyoogan Yihoowa kaaletuwaa koyite, qassi intte demmido zoriyaa oosuwan peeshshite. Geeshsha Maxaafaa maaran intte kuuyiyoobaa harati maayettennan aggana danddayoosona. Eti miishshaynne miishshan shammana danddayiyoobay qohuwaappe intte soo asaa loytti naagana giidi yootana danddayoosona. Gidoppe attin, Kawuwaa Yoosaafixa taarikiyaa hassayite. (2 Odi. 20:1-30) I Yihoowan ammanettiisinne hegaa ba oottidobatun bessiis. Yihooway he ammanettida bitaniyaa aggibeenna; qassi nenakka aggenna.—Maz. 37:28; Ibr. 13:5. w21.11 15 ¶6; 16 ¶8

Xoossay nuna ba leemisuwan medhdhido gishshawu, nuuni asay maaraa oyqettiyoogaa beꞌanawu koyoos. (Doo. 1:26) Gidoppe attin, nuuni nagaranchcha gidiyo gishshawu, ubbabaa eroos giidi qoppiyo wodekka issibaa xeelliyaagan balabaa kuuyana danddayoos. Leemisuwawu, Yihooway Nanawe asaa maaranawu kuuyido gishshawu, Yoonaasi keehi azzanidoogaa hassaya. (Yona. 3:10–4:1) SHin, Yihooway etawu maarotaa bessido gishshawu, hanidabaa qoppa. Bantta nagaraappe simmida 120,000ppe dariya Nanawe asay xayuwaappe attiis! Wurssettan, Yoonaasi asaabaa balabaa kuuyiis; shin Yihooway hegaadan oottibeenna. Yihooway issibaa kuuyido gaasuwaa asawu yootana koshshenna. Yihooway ba ashkkarati I kuuyidobaa woy kuuyanabaa xeelliyaagan banttawu siyettiyaabaa yootanaadan beni oottidoogee tuma. (Doo. 18:25; Yona. 4:2, 3) Qassi issi issitoo I ba kuuyidobaa yootiis. (Yona. 4:10, 11) SHin, Yihooway issibaa oottanaappe kase woy ootti simmidi nuuni hegaa maayettanaadan nuna oychchana koshshenna.—Isi. 40:13, 14; 55:9. w22.02 3-4 ¶5-6

Nuuni haratuppe aadhdhoos woy ‘gitatoos yaagidi qoppiyoogaa’ aggiyo wode ‘guuttatu’ mala gidoos. (Pili. 2:3) Nuuni hegaadan loytti qoppikko, harata qohennan aggana danddayoos. Nu ishanttinne michchontti ubbay nuuppe issi issiban aadhdhoosona. Nuuni eta loꞌꞌo eeshshata qoppiyo wode hegaa akeekiyoogee metenna. Kiitettida PHawuloosi Qoronttoosa Kiristtaanetuyyo yootido zoriyaa nuuni akeekana koshshees: “Haratuppe nena oonee xoqqissidai? Neeni Xoossaappe ekkabeennabai neessi aibee de7iyai? Yaatin, neeni ekkidabaa gidikko, aissi ekkabeennabaadan ceeqettai?” (1 Qor. 4:7) Yaatiyo gishshawu, harati nuna nashshanaadan woy haratuppe aadhdhiyaabadan xeellanaadan nuuni mule koyana koshshenna. Leemisuwawu, haasayata loytti haasayiya ishantti woy daro xinaateta demmiyoogan gooba gidida michchontti Yihooway eti oottiyooban ubbatoo sabettanaadan oottana koshshees. w21.06 22 ¶9-10

Asaa eta son demmanaagee daro Yihoowa Markkata kaseppe keehi metees. Amarida aassiyaageeti deꞌiyo heeran direttida heerati deꞌoosona. Issi keettaaway shoobbenna uri gelennaadan teqqiya naagiyaagee hegan deꞌana danddayees. Hara sohotun, Yihoowa Markkati son demmiyo asay darenna. Aassiyaageeti issi uraa demmanawu keehi adussa saatiyaa hemettikkonne, eti he uraa son demmennan aggana danddayoosona. Nuuni haggaaziyoy hegaa mala moottatun gidikko, aggennan sabbakana bessees. Dumma dumma saatiyan asaa demmanawu mala. Asay son deꞌana danddayiyo saatiyan nuuni sabbakikko, daro asaa demmana danddayoos. Ayssi giikko, oonikka ba soo simmennan aggenna! Daro ishanttinne michchontti saateppe guyyiyan woy omarssan daro asaa demmiyo gishshawu he saatiyan sabbakoosona. Hegaa bollikka, keettaawati he saatiyan pashkki giidi haasayissana danddayoosona. w21.05 15 ¶5, 7

Ha wodiyan hegaa mala metoy deꞌiyoogaa akeekiyoo? Ee. Yeleta gallassaanne ufayssa masqqalaa mala Geeshsha Maxaafay yootenna baalata Yihoowa Markkati bonchchenna gishshawu daroti yiillotoosona. Xoossaa Qaalay bala giidi yootiyo, asay ba biittaa siiqiyo gishshawu bonchchiyo baalata woy baliyaa kessiyoogaara gayttida meezeta Yihoowa Markkati kaallenna wode harati hanqqettoosona. Hegeetu gaasuwan Yihoowa Markkatu bolli lancciyaageeti Xoossaa ufayssiya ogiyan goynniyaabadan qoppana danddayoosona. SHin eti Geeshsha Maxaafay yootiyo qoncce timirttiyaa aggidi asa wogaa kaallanawu doorikko, Xoossaa ufayssokkona. (Mar. 7:7-9) Nu ammanoy xayennaadan nuna aybi maaddanee? Nuuni Yihooway kessido higgetanne maarata loyttidi siiqana koshshees. (Maz. 119: 97, 113, 163-165) Nuuni Yihoowa siiqiyo gishshawu, A ufayssenna wogata kaallokko. Nuuni Yihoowa siiqiyoogaappe harabaa xoqqu oottidi xeellana koshshenna. w21.05 6 ¶15-16

Nuuni kiitettida PHawuloosa zoriyaa waatidi oosuwan peeshshana danddayiyoo? Nuuni ubbatoo xannaꞌiyoogan, aggennan woossiyoogaaninne nuuni oottanaadan Yihooway immido oosuwaa minnidi oottiyoogan nu ammanuwaa ubbatoo minttana koshshees. (2 Xim. 4:4) Nuussi ammanoy deꞌikko Yihoowa Markkata xeelliyaagan odettiya iita oduwaa siyiyo wode yayyokko. (Isi. 28:16) Nuuni Yihoowa, A Qaalaanne nu ishantta siiqiyoogee Yihoowayyo haggaaziyoogaa aggidaageetun cimettennaadan nuna maaddana. Koyro xeetu layttan, daroti Yesuusan xubettido gishshawu I yootiyoobaa siyennan ixxidosona. SHin, hara daroti I yootiyoobaa siyidosona. Hegeetu giddon Ayhuda Sanhedirina pirdda keettaa yame gididaageenne “daro qeeseti” deꞌoosona. (Oos. 6:7; Maa. 27:57-60; Mar. 15:43) Hegaadan, miilooniyan qoodettiya asati Yesuusa kaallanawu kuuyidosona. Aybissi? Eti Geeshsha Maxaafan deꞌiya tumaa eriyo gishshataassanne siiqiyo gishshataassa. Xoossaa Qaalay hagaadan gees: “Ne higgiyaa siiqiyaageetau kumetta sarotettai de7ees; eta mulekka aibinne [xubbana] danddayenna.”—Maz. 119:165. w21.05 13 ¶20-21

PHawuloosi Yihoowa haggaazuwan oottido ubbabaa ba minotettan gidennan, Xoossay wolqqaa immin oottidoogaa akeekiis. PHawuloosa yedetay, qashoynne hara metoti gakkishinkka I ba haggaazuwaa loytti polanaadan Yihooway Ba geeshsha ayyaanaa baggaara wolqqaa immiis. PHawuloosa lagge gidida yelaga Ximootiyoosikka ba haggaazuwaa polanawu Xoossaa wolqqay koshshiyoogaa ammanettiis. Ximootiyoosi PHawuloosaara misoonaawe oosuwawu haahosaa biis. Qassi, Ximootiyoosi gubaaꞌeta xomoosanaadaaninne minttettanaadan PHawuloosi haranttuwaa A kiittiis. (1 Qor. 4:17) Ximootiyoosi taani danddayikke giidi qoppennan waayi aggana. PHawuloosi kaallidi deꞌiyaagaadan yootidoy hegaassa gidana danddayees: “Neeni yelaga gidiyo gishshau, nena ooninne karoppo.” (1 Xim. 4:12) Qassi, he wode, Ximootiyoosa agunttadan caddi oyqqiya sahoy ‘ubba wode sakkees.’ (1 Xim. 5:23) SHin, Ximootiyoosi mishiraachchuwaa sabbakanawunne ba ishanttuyyo oottanawu koshshiya minotettaa baassi Yihoowa geeshsha ayyaanay immanaagaa erees.—2 Xim. 1:7. w21.05 21 ¶6-7

Yaaqooba 1:19n deꞌiya maaray zoriyaageetuyyookka hanees. Yaaqoobi hagaadan giis: “Asai ubbai siyanau eesoto; shin haasayanaunne hanqqettanau eesotoppo.” Issi cimay ubbabaa eriyaabadan qoppana danddayees, shin I tumuppe erii? Leemiso 18:13y hagaadan gees: “Siyennan de7iiddi zaariyoogee, hegee he uraayyo eeyyatettanne yeella.” Hanotaa yootanaadan he uraa oychchiyoogee loꞌꞌo. Hegaa gishshawu, issi cimay haasayanaappe kase siyana koshshees. Cimay hagaadan giidi oychchana danddayees: “Ne ay malee?” “Taani nena ay maaddana danddayiyaanaa?” Cimati takki giidi hanotaa oychchikko, eti bantta ishanttanne michchontta kaseppe aaruwan maaddananne minttettana danddayoosona. Maaddiya zoriyaa zoriyoogee amarida xiqiseta nabbabiyoogaa woykko issi woy naaꞌꞌu qofaa yootiyoogaa xalla gidenna. Nuuni nu ishanttuyyoonne michchonttuyyo qoppiyoogaa, eta hanotaa akeekiyoogaanne eta maaddanawu koyiyoogaa eti erana koshshees. w22.02 17 ¶14-15