Tamme

Deꞌoy amꞌꞌe maccaasiyo keehi metees; A deꞌuwawu koshshiyaabaa demmanawu baaxetennan waaya aggana. Gidikkonne, A saaxinetuppe issuwaakko baada naaꞌꞌu guutta santtimeta asi beꞌennan yeggaasu; saaxiniyan hegeeta A yeggiyo wode ayba cenggurssinne waayi siyettana. A saaxiniyan ay yeggidaakko Yesuusi erees. He wode goꞌettiyo lepta giyo keehi guutta santtimeta A yeggaasu. Maanawu asay shammiyo kafotuppe keehi hirayso gidida issi siine kafo shammanawukka he miishshay gidenna. Yesuusi he amꞌꞌee hanotan keehi maalaalettiis. Hegaa gishshawu, I ba erissiyo ashkkarata xeesiis; xeesidi he amꞌꞌeekko malaatiiddi hagaadan giis: “Muxuwaataa saaxiniyan yeggida asa ubbaappe ha hiyyeesa am77iyaa darissada yeggaasu.” Hegaappe simmidi I hagaadan giis: “Harati [dure asati] ubbai banttau palahida miishshaappe yeggidosona; shin a ba pacaappe, bau de7iya aquwaa muleera imma aggaasu.” (Mar. 12:43, 44) Ammanettida he amꞌꞌiyaa bawu deꞌiya wurssetta miishshaa he gallassi immiyo wode, baassi koshshiyaabaa Yihooway immanaagaa ammanettaasu.—Maz. 26:3. w21.04 6 ¶17-18

Yesuusi saꞌan deꞌiyo wode, I ubbatoo asawu sabbakiisinne asay I yootiyoobaa siyana giidi hidootan naagiis; qassi I erissiyo ashkkaratikka hegaadan oottanaadan koyiis. (Yoh. 4:35, 36) Yesuusi ba erissiyo ashkkaratuura deꞌiyo wode, eti minnidi sabbakidosona. (Luq. 10:1, 5-11, 17) SHin, asay Yesuusa qachchidi worido wode, erissiyo ashkkarati sabbakiyoogaa guutta wodiyawu koyibookkona. (Yoh. 16:32) Yesuusi hayquwaappe denddi simmidi, minnidi sabbakanaadan eta minttettiis. Qassi I saluwaa bi simmin, eti keehi minnidi sabbakido gishshawu eta morkketi hachchi gallassaa xiqiyan deꞌiyaagaadan giidi amassalidosona. Koyro xeetu layttan deꞌida Kiristtaaneti Yesuusi kaalettin sabbakidosona; qassi Yihooway eta maaddiis. Yaatiyo gishshawu, daro asay eti yootiyoobaa siyiis. Leemisuwawu, PHenxxaqosxxe gallassi 33 M.Ln, 3,000 gidiya asay xammaqettiis. (Oos. 2:41) Qassi erissiyo ashkkaratu qooday keehi gujji gujji biis. (Oos. 6:7) Gidikkonne, wurssetta gallassatun keehi daro asay mishiraachchuwaa siyanaagaa Yesuusi kasetidi yootiis.—Yoh. 14:12; Oos. 1:8. w21.05 14 ¶1-2

Geeshsha Maxaafaa tumaa neeni koyro tamaarido wodiyaa hassayay? Neeni ammanidobaa asay ubbay ufayttidi tamaarana gaada qoppadasa. Geeshsha Maxaafay yootiyo tumay eti haꞌꞌi ufayttidi deꞌanaadan, qassi sinttappe keehi ufayssiya hidootay etawu deꞌanaadan oottanaagaa ammanadasa. (Maz. 119:105) Hegaa gishshawu neeni tamaarido tumaa ne laggetussinne ne dabbotussi yeemuwan yootadasa. SHin aybi hanidee? Neeni yootidobaa daro asay siyennan ixxido gishshawu garamettadasa. Nuuni sabbakiyoogaa harati siyennan ixxiyo wode nu garamettana koshshenna. Yesuusi saꞌan deꞌiyo wode, I bana Xoossay maaddiyoogaa qonccissanawu maalaalissiyaabaa oottidaba gidikkonne, daroti I yootiyoobaa siyennan ixxidosona. Leemisuwawu, Yesuusi Alꞌꞌaazara hayquwaappe denttiis. He maalaalissiyaabay Yesuusa eqettiyaageeti kashi gaana danddayennaba. Gidikkonne, Ayhuda haymaanootiyaa kaalettiyaageeti Yesuusi Mase gidiyoogaa ammanibookkona. Eti Yesuusakka Alꞌꞌaazarakka woranawu koyidosona!—Yoh. 11:47, 48, 53; 12:9-11. w21.05 2 ¶1-2

SHiiqota ubbatoo shiiqanawu neessi danddayettida ubbabaa ootta. SHiiqotun neeni minettana, qassi ne ishanttuuranne michchonttuura erettana danddayaasa. Gubaaꞌiyan deꞌiya, etappe neeni tamaarana danddayiyoogeetuura laggeta. Eti neeppe bayratiyaageeta woy kaalotiyaageeta woy wogan dummatiyaageeta gidana danddayoosona. Geeshsha Maxaafay “aadhdhida eratettai cimida asatu matan” deꞌiyoogaa yootees. (Iyy. 12:12) Cimidaageeti gubaaꞌiyan deꞌiya yelagatuppekka darobaa tamaarana danddayoosona. Daawiti Yonaataanappe keehi kaalotikkonne, hegee eti issoy issuwawu mata lagge gidennaadan diggibeenna. (1 Sam. 18:1) Daawitinne Yonaataani metiyaabati deꞌishinkka Yihoowawu haggaazanawu issoy issuwaa maaddidosona. (1 Sam. 23:16-18) Ha wodiyan eta son I xallay Yihoowa Markka gidido Ayriino giyo michchiyaa hagaadan gaasu: “Gubaaꞌiyan deꞌiyaageeti ayyaanaaban nu soo asa mala woy nu ishanttunne michchonttu mala gidana danddayoosona. Eti nuuni koyiyo so asa gidanaadan Yihooway eta goꞌettana danddayees.” Ne laggeti nena minttettanawu koyoosona, shin eti waatana danddayiyaakko eranaadan neeni etawu yootana koshshees. w21.06 10-11 ¶9-11

Yesuusi issi kawuwaabaanne A ashkkaraabaa leemisuwan yootiis. Kawoy he ashkkaray mule qanxxana danddayenna daro acuwaa ayyo maari aggiis. Guyyeppe, he ashkkaray ba mala ashkkaray talꞌꞌido keehi guutta acuwaa maarennan ixxiis. Wurssettan, kawoy he qarettenna ashkkaraa qasho keetti gelissiis. He ashkkaray oottidobay A xallaa gidennan haratakka qohiis. Koyruwan, I ba lagge ashkkaraa “he acuwaa qanxxana gakkanaashin, qasho keettaa” gelissiyoogan awu kehibeennanne qarettibeenna. Naaꞌꞌanttuwan, I oottidobaa beꞌida hara ashkkaratakka qohiis. “A lagge ashkkarati hegaa be7idi, daro yiillotidosona.” (Maa. 18:30, 31) Hegaadankka, nu oottiyoobay harata qohees. Issi uri nuna qohin nuuni ayyo atto gaana xayikko, aybi hanana danddayii? Koyruwan, nuuni awu atto geennan aggiyoogan, A bonchchennaaninne siiqennan aggiyoogan qohoos. Naaꞌꞌanttuwan, nuuni he uraara siga gidennaagaa gubaaꞌiyan deꞌiya harati akeekiyo wode unꞌꞌettanaadan oottoos. w21.06 22 ¶11-12

Asay Xoossaa leemisuwan merettidaba gidikkonne, Seexaanay eti pokkobaa oottanaadan denttettiyoogaa dosees. Nohe wode ‘saꞌaa bollan deꞌiya asaa iitatettay daridoogaa’ Xoossaa Yihooway beꞌido wode, “asaa ha sa7aa bollan medhdhidoogau azzaniis; ba wozanan keehippe seelettiis.” (Doo. 6:5, 6, 11) He wodeppe haa simmin alamiyaa hanotay giigidee? Aybanne giigibeenna! Mattuman dummatiyaageetinne issi mala gididaageeti pokkobaa oottiyoogaa gujjin, daro qommo pokkobay keehi daridoogan Dabloosi keehi ufayttees! (Efi. 4:18, 19) Yihoowawu goynniyaageeti wolqqaama nagaraa oottiyo wode Seexaanay keehi ufayttees. Seexaanaa haaruwaa garssan asay “haariyo maataa hara asa qohanau go7ettiyoogaa” xalla gidennan, Yihooway eti naaganaadan etawu immido saꞌaanne mehiyaa doꞌaakka bessenna ogiyan oyqqoosona. (Era. 8:9; Doo. 1:28) Hegee kaalettidobay aybee? Asay oottiyoobaa gaasuwan mehiyaa doꞌaa qommotuppe issi miiloone gidiyaagee kaalliya amarida layttatun xayana danddayiyoogaa saynisiyaa eranchchati amaridaageeti yootoosona. w21.07 12 ¶13-14

Amarida asati kase oottido moorobaa gaasuwan azzaniyoogaa aggana danddayibookkona. Eti Yihooway atto gaanaadan oychchidabanne iitabaa oottiyoogaa aggidaba gidikkonne, Yihooway etawu haꞌꞌikka mule atto gibeennabadan qoppoosona. Yihooway neeyyo aggenna ba siiquwaa bessanawu koyiyoogaa neeni akeekiyoogee geeshsha kahan awu ufayssan haggaazanaadan maaddana. Hegee danddayettiyaaba; ayssi giikko, “Yesuus Kiristtoosa suuttai nagara ubbaappe nuna ashshees.” (1 Yoh. 1:7) Neeni oottido nagaraa gaasuwan azzanada ne nagaraappe simmikko, Yihooway atto gaanawu tumuppe koyiyoogaa hassaya. Aggenna siiquwaanne atto giyoogaa mazamuraawee Daawiti waati gattidaakko akeeka. I hagaadan giis: “Saloi sa7aappe xoqqiyoogaadan, GODAAYYO yayyiyaageetuyyo aggenna a siiqoi gita. Awai mokkiyoosaappe awai wulliyoosai haakkiyoogaadan, hegaadankka GODAI nu mooruwaa nuuppe haassees.”—Maz. 103:11, 12. w21.11 5-6 ¶12-13

Kiristtaane azinay ba machchiyo bonchchana bessees. (1 PHe. 3:7) Leemisuwawu, issi azinay ba machchiyo xoqqu ootti xeelliyoogan O bonchchiyoogaa bessees. A oottana danddayiyoogaappe aarobaa oottanaadan I koyenna. Qassi O hara maccaasaara mule geeddarssenna. Azinay hegaadan oottikko, issi maccaaseeyyo aybi siyettanee? Roozo giyo michchiyo Yihoowa Markka gidenna I azinay O hara maccaasaara ubbatoo geeddarssees. I meqetti baynnabaa haasayiyoogee Rooza babaa iitabaa qoppanaadan oottiyoogaa xalla gidennan, bana hara asi tumuppe siiqenna gaada siranaadankka oottiis. A, “Yihooway tana xoqqu ootti xeelliyoogaa ubbatoo tawu hassayisso koshshiis” yaagaasu. SHin Kiristtaane azinay ba machchiyo bonchchees. I hegaadan oottiyoogee Yihoowaarakka ba machcheerakka dabbotido dabbotaa minttiyoogaa erees. Ba machchiyo bonchchiya azinay O sabbees, siiqiyoogaa iyyo yooteesinne O galatees. w21.07 22 ¶7-8

Neessi issi asi koshshiyaabaa issiban yeggidi kiittidobay neeni naagido wodiyan gakkana xayiyaakko azzanuutii? Gidoppe attin, neeni naagido wodiyan gakkibeenna gaasuwaa ne erikko danddayanawunne naagashshanawu eeno giikkii? Nuuni danddayana koshshiyo gaasuwaa Leemiso 21:5 yootees. Hagaadan gees: “Mino oosanchchaa halchchoi dureyees; shin eesotiya ubbai hiyyeesana.” Nuuni ha xiqisiyaappe tamaariyoobay aybee? Aadhdhida eranchcha asi danddayidi akeekan issibaa oottiyoogee loꞌꞌo ayfiyaa demissees. Leemiso 4:18y “xillotu ogee gallassai seetana gakkanaashin, gujji gujji poo7iya maallado xalqqiyaa mala” gidiyoogaa yootees. He qofay Yihooway ba halchchuwaa ba asawu loddan loddan qonccissiyo hanotaa bessiyaaba. Issi Kiristtaanee ba deꞌuwan laamettiyo ogiyaanne Yihoowakko shiiqiyo ogiyaa nuuni akeekanaadankka ha xiqisee maaddees. Issi uri ayyaanaaban eesuwan diccanaadan oottana danddayokko. Hegee wode ekkiyaaba. w21.08 8 ¶1, 3-4

Ha alamee xayiyo wodee matattido gishshawu, nuussi daro oosoy deꞌees. (Maa. 24:14; Luq. 10:2; 1 PHe. 5:2) Nuuni ubbay nuussi danddayettida keenan Yihoowawu loytti haggaazanawu koyoos. Daroti kaseegaappe aaruwan haggaaziiddi doosona. Amaridaageeti aqinye gididi haggaazanawu qoppoosona. Harati qassi Beeteelen oottanawu woy Yihoowa dirijjitee goꞌettiyo keettata keexxiyoogan maaddanawu qoppoosona. Qassi gubaaꞌiyawu oottiyaagaa woy cima gidanawu halchchidi daro ishantti minnidi oottoosona. (1 Xim. 3:1, 8, 9) Yihooway ba asay awu haggaazanawu eeno giyoogaa beꞌiyo wode keehi ufayttees! (Maz. 110:3; Isi. 6:8) Neeni Yihoowayyo haggaazanawu halchchidobaa polabeennaagaa gaasuwan hidootaa qanxxadii? Yaatikko, neeyyo siyettiyaabaa Yihoowayyo yoota. (Maz. 37:5-7) Qassi neeni Xoossaayyo kaseegaappe aaruwan waata haggaazana danddayiyaakko kayma ishantta zoriyaa oychchana danddayaasa; yaatada eti zoridobaa oosuwan peeshshanawu loytta baaxeta. Neeni yaatikko, he halchchidobaa polana danddayaasa. w21.08 20 ¶1; 21 ¶4

Hananabaa yootiya amꞌꞌee Haanniyyo layttay 84 gidikkonne “Beeta Maqidasiyaappe kiyennan de7aasu.” A ubbatoo beeta maqidasiyaa biyo gishshawu guutta naꞌaa Yesuusa beꞌanaadan oottiyoogan Yihooway O anjjiis. (Luq. 2:36-38) Ha wodiyan, ammanettida daro cimati yelagatussi keehi loꞌꞌo leemiso. Nuuni takki giidi eta oychchidi eti Yihoowa dirijjitiyan demmido ufayssiyaabaa yootiyo wode siyikko, hegee nuna keehi minttettana. Cimida ishanttanne michchontta Yihoowaynne A dirijjitee nashshees. Yihooway ba dirijjitiyaanne eta huuphiyan huuphiyan daro ogiyan waati anjjidaakko eti beꞌidosona. Eti bantta balaappe maaddiyaabaa tamaaridosona. Eta ‘aadhdhida eratettaa pulttodan’ xeella, qassi etappe tamaara. (Lee. 18:4) Neeni eta loytta eranawu baaxetikko, ne ammanoy minnana. w21.09 3 ¶4; 4 ¶7-8; 5 ¶11, 13

Yihoowa asay he eraa goꞌettana danddayees; Isiyaasi “kawotettatu maattaa” giidi yootidoba. (Isi. 60:5, 16) Dumma dumma eraynne hiillay deꞌiyo alꞌꞌo attumaageetinne maccaageeti tumaa siyidi ekkiiddi deꞌoosona; nuuni mishiraachchuwaa 240 biittatun yootoosinne 1,000ppe dariya doonatun xuufeta giigissoos. Ha wurssetta wodiyan, kawotettati qaaxxiyoogee asay issibaa kuuyanaadan oottees. Eti Xoossaa Kawotettawu exataneeyye, ha alamiyaa kawotettatun ammanettanee? Hagee ubba asay doorana koshshiyooba. Yihoowa asay bantta deꞌiyo biittaa kawotettaa higgiyawu azazettiyaaba gidikkonne, ha alamiyaa polotikaaban eti oossinne exatennan deꞌoosona. (Roo. 13:1-7) Asaa metuwaa xayssana danddayiyay Xoossaa Kawotettaa xalla gidiyoogaa eti eroosona. He Kawotettay ha alamiyaa bagga gidenna.—Yoh. 18:36, 37. w21.09 17-18 ¶13-14

Neeni siiqiyo uri Yihoowa aggiyo wode, neeni nenanne son deꞌiya harata ubbatoo minttettiyoogee keehi koshshiyaaba. Neeni hegaadan waata oottana danddayay? Ubbatoo Xoossaa Qaalaa nabbabiyoogaaninne hegaa wotta dentta qoppiyoogan, qassi gubaaꞌe shiiqota shiiqiyoogan Yihoowappe minotettaa demmana danddayaasa. Aawaynne I michchiyaa tumaa aggido Joꞌaana hagaadan gaasu: “Geeshsha Maxaafan etabay odettido Abigaalibaa, Asttiribaa, Iyyoobabaa, Yooseefabaanne Yesuusabaa nabbabiyo wode taani keehi woppu gays. Eta taarikee tana minttetteesinne taani loꞌꞌobaa qoppanaadan keehi maaddees.” Neeni azzaniyo wode Yihoowakko woossiyoogaa aggoppa. Siiqiya nu Xoossay issibaa qoppiyoogaadan neeni qoppanaadan nena maaddana malanne I “nena erissananne neeni baanau bessiya ogiyaa nena tamaarissana” mala aggennan woossa. (Maz. 32:6-8) Neeyyo tumuppe siyettiyaabaa Yihoowawu yootiyoogee keehi deexxiyaaba gidana danddayees. Gidoppe attin, ne azzaniyoogaa Yihooway loytti akeekees. I ne wozanaabaa ayyo yootanaadan minttettees.—Kes. 34:6; Maz. 62:7. w21.09 28 ¶9-10

Kiitettida PHeexiroosi, Yaaqoobinne Yohaannisi 32 M.Ln Paasikaa Baalaappe simmin, keehi maalaalissiya ajjuutaa beꞌidosona. Issi gita deriyaa bolli Yesuusi eta sinttan laamettiis; hegee Hermmoone Deriyaa gidennan waayi aggana. “A som77oi awa aifiyaadan poo7iis; a maayoikka poo7uwaadan booxxiis.” (Maa. 17:1-4) Xoossay hagaadan giishin kiitettidaageeti siyidosona: “Hagee taani siiqiyo tana ufaissiya ta Na7aa; i giyoogaa siyite.” He heezzu kiitettidaageeti Yesuusi yootiyoobaa siyidoogaa bantta deꞌuwan bessidosona. Nuuni eta leemisuwaa kaallanawu koyoos. “Woosa keettaayyo huuphe” gidida Yesuus Kiristtoosa baggaara Yihooway nuuyyo siiquwan immiyo kaaletuwaa gishshawu A keehi galatoos. (Efi. 5:23) Kiitettida PHeexiroosa, Yaaqoobanne Yohaannisaagaadan nuuni ‘I giyoogaa siyanawu’ murttidaageeta gidoos. Hegaadan oottiyoogaaninne deꞌuwawu efiya xuntta ogiyaappe kiyennan aggiyoogan, nuuni haꞌꞌi daro anjjuwaa demmana, qassi sinttappe merinawu ufayttana. w21.12 22 ¶1; 27 ¶19

Qoronttoosa gubaaꞌiyan deꞌiya issi Kiristtaane ba aawaa machcheera pokkobaa oottiis. Kiitettida PHawuloosi Qoronttoosa Kiristtaaneti A bohanaadan yootiis. He bitanee oottiyo pokkobay gubaaꞌiyan deꞌiya harata qohiis. Ubba qassi amaridaageeti hegee gita nagara giidi qoppibookkona! (1 Qor. 5:1, 2, 13) Amarida wodiyaappe simmin, he bitanee tumuppe ba nagaraappe wozanappe simmidoogaa PHawuloosi siyiis. PHawuloosi cimatussi hagaadan giis: “Intte ayyo atto gaanaunne a minttettanau bessees.” “Hegaa gishshau he bitanee keehi daro azzanenna mala” giidi PHawuloosi eti hegaadan oottanaadan yootidoy aybissakko akeeka. Ba nagaraappe simmida bitaniyawu PHawuloosi qarettiis. He bitanee keehi azzanidi kase oottidobay atto geetettanaadan koyiyoogaa aggana mala PHawuloosi koyibeenna. (2 Qor. 2:5-8, 11) Yihoowagaadan, cimati maarotettaa bessiyoogaa dosoosona. Nagaraa oottida uraa koshshiyo wode eti minttidi seeroosona; shin danddayettikko eti maarotettaa keehi bessoosona. Cimati nagaraa oottida uraa mule seerennan aggikko, eti maarotettaa bessibookkona. Hegee eti iitabaa coꞌꞌu gi xeelliyoogaa bessiyaaba. w21.10 11-12 ¶12-15

Qohuwaa masunttaara geeddarssana danddayoos. Issi issi masunttati guutta; shin harati gita. Leemisuwawu, nuuni qumaa kattiyo wode nu biradhdhee guutta qanxxettana danddayees. Hegee nuna sakkana danddayees; shin issi woy naaꞌꞌu gallassappe guyyiyan, nuuni qanxxettida sohuwaakka hassayennan aggana danddayoos. Hegaadankka, nuuni guuttaban qohettana danddayoos. Leemisuwawu, issi laggee qoppennan nuna qohiyaabaa haasayaana woy oottana danddayees; shin nuuni awu coo atto gaana danddayoos. Gidoppe attin, masunttay gita gidikko, issi dottoree he masunttaa sikkananne qachchana danddayees. Nuuni masunttaa ubbatoo bochchikko, hegee paxennan aggananne yaa iitana danddayees. Issi uri keehi yiillotiyo wode hegaa malabaa oottana danddayiyoogee keehi azzanttiyaaba. I bana yiilloyidabaanne qohidabaa ubbatoo qoppana danddayees. SHin uluwan lancciyaa oyqqiyaageeti banttana qohoosona. Hachchi gallassa xiqisiyan deꞌiya zoriyaa azazettiyoogee keehi loꞌꞌoba. w21.12 12 ¶15

Issi Kiristtaanee maayiyo maayoy woy alleeqettiyoobay issi cima qofissiis gaada qoppa. Issi cimay bana hagaadan oychchana danddayees: ‘Zoranaadan oottiya Geeshsha Maxaafay yootiyo gaasoy deꞌii?’ He cimay ba qofaa yootanawu koyenna gishshawu, hara cimaa woy aassiya kayma uraa he qofaa xeelliyaagan oychchana danddayees. Maayiyoobaanne alleeqettiyoobaa xeelliyaagan PHawuloosi zoridobaa eti issippe pilggana danddayoosona. (1 Xim. 2:9, 10) PHawuloosi issi Kiristtaanee maayiyo maayiyoy bessiyaagaanne giiga gidana koshshiyoogaa xeelliyaagan amarida maarata yootiis. SHin PHawuloosi issi uri maayana danddayiyoobaa woy danddayennabaa xeelliyaagan higgiyaa kessibeenna. Ishanttinne michchontti dooriyo maayoy Geeshsha Maxaafay yootiyoobaa phalqqennaba gidikko, eti hegaa maayana danddayiyoogaa I erees. Hegaa gishshawu, cimati issi uri bessiyaanne giiga maayuwaa dooridaakkonne qoppana koshshees. Naaꞌꞌu ishantti dumma dummabaa kuuyana danddayiyoogaa hassayiyoogee keehi koshshiyaaba, shin hegaa giyoogee issoy likke hankkoy bala giyoogaa gidenna. Likkenne likke gidennabaa xeelliyaagan nu mala Kiristtaaneti nu qofaa kaallanaadan wolqqanttana koshshenna. w22.02 16 ¶9-10

Aggenna Siiquwaa nuuni issoy issuwawu bessanaadan oottiya gaasoti deꞌoosona. Hegeetuppe amaridaageeti aybee? Geeshsha ayyaanaa kaaletuwan xaafettida leemiso maxaafay ha oyshaa waati zaariyaakko akeeka: “Aggenna siiqoinne tumatettai neeppe haakkoppona; . . . Yaatikko, neeni Xoossaanne asaa sinttan sabettananne nashettana.” “Aggenna siiquwaaninne ammanettiyoogan nagarai atto geetettees.” “Xillotettaanne aggenna siiquwaa koyiya uraa baree aduqqees.” (Lee. 3:3, 4; 16:6; 21:21) Nuuni aggenna siiquwaa bessana koshshiyo heezzu gaasota leemiso maxaafay qonccissees. Koyroogee, nuuni aggenna siiquwaa bessiyo wode Xoossay nuna xoqqu ootti xeellees. Naaꞌꞌanttoogee, nuuni aggenna siiquwaa bessiyo wode goꞌettoos. Leemisuwawu, nuuni haratuura duuxxenna laggetettaa medhdhoos. Heezzanttoogee, nuuni aggenna siiquwaa bessiyo wode, merinaa deꞌuwaa gujjin, sinttappe loꞌꞌobaa demmana. Nuuni Yihooway yootiyoobata azazettanaadan oottiya gaasoti deꞌoosona: “Asappe koyettiyaagee aggenna siiquwaa.” w21.11 8 ¶1-2

Nena kase gakkida paacee woy ha wodiyan gakkiya paacee, ne ammanoy mino gidennaagaa neeni akeekanaadan oottikko, hidootaa qanxxoppa. Hegaa ne ammanuwaa minttiyo injjedan xeella. Nena gita metoy gakkiyo wodekka minttada Yihoowa woossa. Yihooway neessi koshshiya maaduwaa soo asaa baggaara woy ishanttunne michchonttu baggaara immana danddayoogaa akeeka. Ha wodiyan nena gakkiya metuwaa neeni genccanaadan Yihooway immiyo maaduwaa ekkanawu eeno giikko, sinttappe nena ayba metoy gakkikkonne neeni genccanaadan I maaddanaagaa loytta ammanettana. Yesuusi ba erissiyo ashkkarati ammanuwaa minttana koshshiyo ginaa akeekanaadan eta maaddidaba gidikkonne, sinttappe gakkana paaciyaa eti Yihoowa maaduwan genccanaagaa Yesuusi mule siribeenna. (Yoh. 14:1; 16:33) Mino ammanoy zawi baynna asay sinttappe yaana gita waayiyaappe attanawu maaddanaagaa I erees. (Ajj. 7:9, 14) Neeni haꞌꞌi ne ammanuwaa minttanawu neessi danddayettida ubbabaa oottikko, neeni eta giddon deꞌana!—Ibr. 10:39. w21.11 25 ¶18-19

Nuuni ha wodiyan maalaalissiya ogiyan naaguwaa demmana giidi qoppokko. SHin nuuni Yihoowan ammanettiya ooninne merinawu xayennaagaa eroos. Mata wode, Yihooway nuna naagana danddayiyoogaa xeelliyaagan nuuni an ammanettiyoogee paacettana. Maagooga Googi, hegeekka issippe denddiya kawotettati Xoossaa asaa qohiyo wode, eti nuna worana danddayoosona giidi nuuni qoppana danddayoos. Yihooway nuna ashshana danddayiyoogaanne ashshanaagaa nuuni ammanettana koshshees. Kawotettatu xeelan nuuni naagiyaabi baynna dorssa mala. (Hiz. 38:10-12) Nuuyyo ola miishshati baa, qassi olettanawu loohibookko. He kawotettati nuna metoottennan xoonana giidi qoppana. Yihoowa kiitanchchati nuna naaganawu giigetti uttidoogaa eti erokkona. SHin nuussi ammanoy deꞌiyo gishshawu nuuni hegaa eroos. He kawotettati Xoossaa ammanokkona. Saluwaa olanchchati nu gishshawu olettiyo wode eti keehi dagammana!—Ajj. 19:11, 14, 15. w22.01 6 ¶12-13

Nu ishanttanne michchontta ubbaa Yihooway xoqqu ootti xeelliyo gishshawu, nuunikka eta xoqqu ootti xeellana koshshees. Nuuni eti ufayttanaadan oottananne eta qohennaadan naagettana koshshees. Nuuni issi uraa qohidoogaa woy yiilloyidoogaa akeekikko, hegaa xaasayi xeellana koshshenna, qassi he uri nuuyyo atto gaananne hegaa dogana bessees giidi nuuni qoppana koshshenna. Amaridaageeti yiillotana danddayiyoy aybissee? Amaridaageeti bantta diccido hanotaappe denddidaagan haratuppe guuxxiyaabadan banttana xeellana danddayoosona. Harati tumaa mati siyidaageeta gidiyo gishshawu, eti hara uri mooriyo wode waati atto gaana bessiyaakko tamaarichchibookkona. Hanotay ayba gidikkonne, merettida metuwaa giigissanawu nuuyyo danddayettida ubbabaa oottana bessees. Qassi, haratun darotoo lancciya uri lanccennan agganawu baaxetana bessiyoogaa akeekana koshshees. Yaatikko, I ufayttananne ba ishaara dabbotaa minttana. w21.06 21 ¶7

Neessi siyettiyaabaa Yesuusi akeekees. Nuuni unꞌꞌettiyo wode, nuussi siyettiyaabaa akeekiya laggee deꞌiyoogee nuna ufayssees; ubba qassi I nuugaa mala metoy gakkido uraa gidikko nuna minttettees. Yesuusi hegaa mala lagge. Daafuriyo wode siyettiyaabaanne maadoy koshshiyoogaa I erees. I nuuni daafuriyo wode akeekees; qassi nuuyyo maadoy “koshshiyo wode” nuuni maaduwaa demmanaadan oottees. (Ibr. 4:15, 16) Geetesemaane ataakiltte sohuwan Yesuusi kiitanchchaappe maaduwaa demmidoogaadan, nuuni Yihooway nuussi immiyo maaduwaa ekkanawu eeno gaana koshshees; Yihooway nuna maaddiyoy xuufiyaa, biiduwaa, haasayaa, woy cimay woykko kayma laggee immiyo minttettuwaa baggaara gidana danddayees. (Luq. 22:39-44) Yihooway ‘Xoossaa sarotettaa’ neeyyo immana; qassi nena minttettana. Nuuni woossiyo wode “asa eratettaa ubbaappe aadhdhiya Xoossaa [sarotettaa]” demmoos.—Pili. 4:6, 7. w22.01 18-19 ¶17-19

Yihooway ubbatoo suurebaa oottees. SHin I sunttido asatun ammanettiyoogee nuussi metiyaaba gidana danddayees. ‘Yihoowa dirijjitiyan aawatettay deꞌiyoogeeti tumuppe Yihoowa kaaletuwaadan oottiyoonaayye, bantta sheniyaadan oottiyoonaa?’ giidi nuuni qoppana danddayoos. Nuuni Yihooway ammanettiyo, I saꞌan sunttidoogeetun ammanettana xayikko, Yihoowan ammanettoos gaana danddayennaagee tuma. Yihooway ‘ammanettida wozannaama ashkkaraa’ baggaara ba dirijjitiyawu saꞌaa baggaa ha wodiyan kaalettees. (Maa. 24:45) Koyro xeetu layttan bolla gididi heemmiyaagaadan, ha ashkkaray kumetta saꞌan deꞌiya Xoossaa asaa xomooseesinne gubaaꞌe cimatussi kaaletuwaa immees. Qassi cimati he kaaletoy gubaaꞌetun polettanaadan oottoosona. Nuuni dirijjiteenne cimati immiyo kaaletuwaa kaalliyoogan, Yihooway ubbatoo suurebaa oottiyoogaa ammanettiyoogaa bessoos. w22.02 4 ¶7-8

Nuuni Yihoowa Markkata gidiyo gishshawu keehi ufayttoosinne ceeqettoos! ‘Merinaa deꞌuwaa demissiya tumaa siyanawu suure wozanaa koshshay deꞌiyo uri’ Yihoowa Markka gidanaadan nuuni maaddiyo wode keehi ufayttoos. (Oos. 13:48, NW) Nuunikka Yesuusaagaadan ufayttana danddayoos. A kaalliyaageeti sabbakiyo wode demmido loꞌꞌo ayfiyaa awu yootido wode I ‘keehi ufayttiis.’ (Luq. 10:1, 17, 21) Kiitettida PHawuloosi Ximootiyoosawu hagaadan giis: “Ne huuphiyaanne ne timirttiyaa naaga.” PHawuloosi gujjidikka hagaadan giis: “Neeni hegaa oottikko nenanne neeni giyoogaa siyiyaageeta ashshiyo gishshau, aggennan ootta.” (1 Xim. 4:16) Yaatiyo gishshawu, sabbakiyo oosoy deꞌuwaa ashshees. Nuuni Xoossaa Kawotettaa asa gidiyo gishshawu, nu huuphiyaa naagana koshshees. Nuuni Yihooway sabettanaadan oottiya ogiyaaninne nu yootiyo mishiraachchuwaa ammaniyoogaa bessiya ogiyan deꞌanawu koyoos. (Pili. 1:27) Nuuni haggaazuwawu loytti giigettiyoogaaninne haratuyyo markkattanaappe kase Yihooway maaddana mala woossiyoogan ‘nu tamaarissiyoobaa naagiyoogaa’ bessoos. w21.10 24 ¶1-2

“Ooratta meretaa” maayida uri Yihoowa milatees. Issi uri Xoossaa ayyaanaa ayfiyaa ayfiyoogan, ba qofaanne oosuwaa geeshsha ayyaanay laammanaadan paqqadiyoogan ooratta asatettaa maayees. Leemisuwawu, I Yihoowanne A asaa siiqees. (Maa. 22:36-39) I metuwaa genccidi deꞌiyo wodekka ubbatoo ufayttees. (Yaaq. 1:2-4) I sigettiya asa. (Maa. 5:9) I haratuura gayttidaagan danddayanchchanne keha. (Qol. 3:13) I loꞌꞌobaa doseesinne oottees. (Luq. 6:35) I saluwan deꞌiya ba Aawaa mintti ammaniyoogaa ba oosuwan bessees. (Yaaq. 2:18) Harati bana yiilloyiyo wode woppu gees, qassi paacee gakkiyo wode bana naagees. (1 Qor. 9:25, 27; Tii. 3:2) Nuuni ooratta meretaa maayanawu, Galaatiyaa 5:22, 23​ninne Geeshsha Maxaafan hara xiqisetun odettida ubba eeshshati deꞌiyoogeeta gidana koshshees. w22.03 8-9 ¶3-4

Cimati sooppe soo biidi sabbakiyoogaa xalla gidennan, awankka awudekka sabbakanawu giigidaageeta gidiyoogan kiitettida PHawuloosa milatana danddayoosona. (Efisoona 6:14, 15) PHawuloosaagaadan, cimati haggaaziyo wodiyaa gubaaꞌiyawu oottiyaageeta gujjin, harata loohissanawu goꞌettana danddayoosona. (1 PHe. 5:1, 2) SHin Cimati sabbakanawu wode xayana gakkanaashin bantta oosuwaa bessiyaagaappe aaruwan mule oottana koshshenna. (Maa. 28:19, 20) Eti oottana koshshiya ubbabaa oottanawu wodiyaa demmana mala, gujo oosuwaa oottanawu issi issitoo eeno gaana koshshenna. Eti he oosuwaa oottanawu eeno giikko, keehi koshshiyaabata, hegeekka, so asaa goynuwaa goynniyoogaa, minni sabbakiyoogaa, woy bantta naati sabbakanaadan loohissiyoogaa malabata oottana danddayennaagaa hegaabaa woossidinne yuushshi qoppi simmidi akeekana danddayoosona. Eti he ubbabaa loytti oottanawu koyiyoogaa Yihooway akeekiyoogaa ammanettana danddayoosona. w22.03 27 ¶4, 7; 28 ¶8

Yihoowa Markka gidiyoogee nena guuttaa yashshidoogaa hassayay? Neeni sooppe soo baada sabbakanawu mule danddayennabadan qoppennan waayi aggana. Woy qassi ne soo asay woy laggeti nena eqettana gaada ne yayyennan waayi aggana. Yaatikko, neeni Geeshsha Maxaafaa xannaꞌissiyo ura hegaa mala hanotay gakkiyo wode awu siyettiyaabaa akeekana danddayaasa. Yesuusi amarida asay hegaadan yayyana danddayiyoogaa yootiis. SHin, I bana kaalliyaageeti yayyiyoogaa gaasuwan Yihoowawu haggaaziyoogaa aggennaadan minttettiis. (Maa. 10:16, 17, 27) Ne xinaatee ba ammaniyoobaa haratussi yootanaadan loddan loddan loohissa. Bana kaalliyaageeti sabbakanaadan Yesuusi kiittido wode eti yayyennan waayi aggana. SHin Yesuusi eti sabbakiyo sohuwaanne sabbakanabaa etassi yootiyoogan eta maaddiis. (Maa. 10:5-7) Neeni Yesuusa leemisuwaa waata kaallana danddayay? Ne xinaatee awude sabbakana danddayiyaakko eranaadan maadda. Leemisuwawu, Geeshsha Maxaafaa tumaa tamaariyoogan goꞌettana danddayiya ura I eriyaakkonne oychcha. Yaatada I he tumaa haratuyyo waatidi yootana danddayiyaakko bessiyoogan giigettanaadan maadda. w21.06 6 ¶15-16

“Daqiiqatu giddon suuqetinne ceega pooqeti kunddiyoogaa doommidosona.” “Asa ubbay shabbirettiis, . . . Biittay naaꞌꞌu daqiiqa gidiyaagaa qaaxxidoogaa daro asay yootees. Hegee tawu adussa wode milatiis.” He qofay Neppalen 2015n biittay qaaxxin qohettennan attida amaridaageeti yootidoba. SHin, darosan ha wodiyan dumma dummabay, alamiyan deꞌiya kawotettata ubbay qaaxxiiddi deꞌees. Hananabaa yootiya Haggee hagaadan giis: “Taani Ubbaappe Wolqqaama GODAI hagaa odais. ‘Taani qantta wodiyan issitoo gujjada, salotanne sa7aa qaattana.’” (Hag. 2:6) Haggee yootido qaattay issi heera xallaa qohiya biittaa qaattaa mala gidenna. Haggee yootido qaattay loꞌꞌobay hananaadan oottees. Yihooway nuussi hagaadan giis: “Kawotettata ubbaakka qaattana; qaattada kawotettatu ubban de7iya aqoi haa yaanaadan oottana. Taani . . . ha Beeta Maqidasiyaa bonchchuwan kunttana.” w21.09 14 ¶1-3

Neeni issi uraara laggetanawu koyiyo wode, aara darotoo haasayananne ne qofaa ayyo yootana koshshees. Nuuni Yihoowaara dabbotiyoykka hegaadaana. Nuuni nuuyyo siyettiyaabaa, nu qoppiyoobaanne nuna qofissiyaabaa ayyo woosan yootiyo wode, an ammanettiyoogaanne I nuna siiqiyoogaa eriyoogaa bessoos. (Maz. 94:17-19; 1 Yoh. 5:14, 15) Ammanettida laggetuura wodiyaa aatta; eti Yihooway nuussi immido imota. (Yaaq. 1:17) Saluwan deꞌiya nu Aaway nuna ‘mule wodekka siiqiya’ ishanttanne michchontta nuussi gubaaꞌiyan immiyoogan, nuussi qoppiyoogaa bessees. (Lee. 17:17) Kiitettida PHawuloosi Qolasiyaasa Kiristtaanetussi xaafido dabddaabbiyan, bana maaddida amarida Kiristtaaneta yootiis; I eta tana ‘daro maaddidaageeta’ woy minttettidaageeta yaagiis. (Qol. 4:10, 11) Haray atto, Kiristtoos Yesuusawukka kiitanchchatu maadoynne asaa maadoy koshshiis, qassi eta maaduwaa gishshawu, I galatiis. (Luq. 22:28, 43) Nuna qofissidabaa kayma laggiyawu yootiyoogee laafatetta gidenna; hegee qohiyaabaappe naagana danddayees. w21.04 24-25 ¶14-16

Ne mala Kiristtaanee nena keehi hanqqetissiyaabaa oottikko, ne waatana koshshii? Sigettanawu neeyyo danddayettida ubbabaa ootta. Neessi siyettiyaabaa Yihoowawu yoota. Nena yiilloyida uraa I anjjanaadaaninne he urawu deꞌiya loꞌꞌo eeshshata hegeekka Yihooway A siiqanaadan oottida eeshshata neeni akeekanaadan maaddana mala Yihoowa oychcha. (Luq. 6:28) Ne ishay oottidobaa neeni dogana xayikko, A waata haasayissanaakko qoppa. Ne ishay nena eriiddi mule qohennaagaa ubbatoo qoppiyoogee keehi loꞌꞌo. (Maa. 5:23, 24) Neeni A haasayissiyo wode, abaa loꞌꞌobaa qoppa. Sigettanawu I koyennan ixxikko shin? ‘Abaa ubbatoo danddaya.’ Ne ishan hidootaa qanxxoppa. (Qol. 3:13) Qassi, lancciyaa uluwan mule oyqqoppa; ayssi giikko, hegee Yihoowaara ne dabbotido dabbotaa moorana danddayees. Nena aybinne xubbanaadan oottoppa. Yaatiyoogan, neeni Yihoowa aybippenne aaruwan siiqiyoogaa bessaasa.—Maz. 119:165. w21.06 23 ¶15