Isiine

Bohiyoogee Yihoowa giigissotuppe issuwaa. Yihoowawu haggaaziyoogaa aggida ura aybippenne aaruwan maaddees; qassi hara ubba asawukka loꞌꞌo. Cimati issi ura bohanawu kuuyidoogee likke gidenna giidi gubaaꞌiyan issoti issoti haasayana danddayoosona. SHin, hegaa mala asati moorobaa oottida uraabaa iitabaa haasayanawu darotoo koyennaagaa hassaya. Nuuni ubbabaa erokko. Hegaa gishshawu, pirdda konttiyan oottiya cimati Geeshsha Maxaafay yootiyoobaa mintti kaalliyoogaanne ‘Yihoowawu’ pirddiyoogaa ammanetta. (2 Odi. 19:6) Ne siiqiyo uri bohettiyo wode, cimati kuuyidobaa maayettiyoogan, I Yihoowakko simmanaadan maaddana danddayaasa. Elzabeta hagaadan gaasu: “Nu bayra naꞌaara aynne gayttennaagee keehi deexxiyaaba. SHin I Yihoowakko simmi makkidi, I bohettidoogee bawu bessiyaaba gidiyoogaa yootiis. Loꞌꞌo gidida darobaa tamaaridoogaa I guyyeppe yootiis.” w21.09 28-29 ¶11-12

He amꞌꞌeebaa qoppa. A Yihoowayyo hegaappe darobaa immanawu koyennan waaya aggana. Gidikkonne, A immana danddayiyoobaa immaasu; Yihoowayyo baassi deꞌiya keehi alꞌꞌobaa immaasu. Qassi A immidobaa ba Aaway alꞌꞌobadan xeelliyoogaa Yesuusi erees. Hegaappe nuuni keehi koshshiyaabaa tamaaroos: Nuuni nuussi deꞌiya alꞌꞌoban hegeekka, nu kumetta wozanaappenne kumetta shemppuwaappe awu haggaaziyo wode Yihooway ufayttees. (Maa. 22:37; Qol. 3:23) Yihooway nuuni nuussi danddayettiya ubbabaa oottiyoogaa beꞌiyo wode ufayttees. Nuuni haggaaziyoogaaninne shiiqota shiiqiyoogan ayyo goynnanawu goꞌettiyo wodiyaanne wolqqaa malabawukka he maarati hanoosona. Neeni amꞌꞌeebaa yootiya taarikiyaappe tamaariyoobaa waata oosuwan peeshshana danddayay? Eti Yihoowawu oottidoban I ufayttiyoogaa neeni eta hassayissiyo wode, minettana danddayiya asaa qoppanawu mala. Issi cima michchiya payyatettaa pacaa gaasuwan woy kaseegaadan haggaazanawu wolqqay baynnaagaa gaasuwan bana mooranchchadan woy pattenna asadan xeellana danddayawusu. w21.04 6 ¶17, 19-20

Ha iita alamiyaa xayssanawu loꞌꞌo wodiyaa Yihooway erees. A danddayaa gaasuwan, daro asay A eriis, qassi miilooniyan qoodettiya keehi cora asay haꞌꞌi awu goynnees. Eti yelettidi A siiqiyoogaa tamaarananne banttana ayyo sheedhdhana gakkanaashin Yihooway daro wodiyawu genccido gishshawu ubbay ufayttoosona. Yihooway genccanawu kuuyidoogee likke gidiyoogee, wurssettay gakkanawu genccida miilooniyan qoodettiya asaa I woytiyo wode loytti qonccana! Seexaanaa gaasuwan gakkiya azzanttiyaabaynne waaye ubbay deꞌishinkka, Yihooway ubbatoo “ufayttiya Xoossa.” (1 Xim. 1:11, NW) Yihooway ba sunttaa geeshshiyo, I ubbabaa haariyo ogee suure gidiyoogaa qonccissiyo, iitatetta ubbaanne haꞌꞌi nuna gakkiya meto ubbaa xayssiyo wodiyaa danddayan naagikko, nuunikka ubbatoo ufayttana danddayoos. Saluwan deꞌiya nu Aawaykka gencciyoogaa eriyoogan nuuni genccanawunne minettanawu murttidaageeta gidoos. w21.07 13 ¶18-19

Koyro xeetu layttan deꞌiya daroti Yesuusa ammanibookkona. Eti A hiyyeesa anaaxe naꞌa xalla oottidi xeelloosona. Qassi I daro asay xoqqu oottidi xeellenna Naazireete kataman dicciis. Ubba qassi guyyeppe Yesuusi erissiyo ashkkara gidida Naatinaaꞌeeli, koyro hagaadan giis: “Naazireete katamaappe payyabi kiyanau danddayii?” Masee Naazireete kataman gidennan, Beetaliheemen yelettanaagaa, Mikiyaasa 5:2n odettida hiraagaa I qoppennan aggenna. Yesuusa morkketi ‘Masiyaa yeletaabaa’ akeekennaagaa hananabaa yootiya Isiyaasi kasetidi odiis. (Isi. 53:8, NW) He asati suurebaa eranawu takki giidi qoppiyaakko, Yesuusi Beetaliheemen yelettidoogaanne Kawuwaa Daawita zare giyoogaa akeekana shin. (Luq. 2:4-7) Gidoppe attin, Yesuusi Mikiyaasa 5:2n kasetidi odettido sohuwan yelettiis. Yaatin metoy aybee? Asay issibaa kuuyanawu eesotiyoogaa. Eti ubbabaa wurssi eribeenna gishshawu, Yesuusa kaallibookkona. w21.05 2-3 ¶4-6

Zoriyaa siyido gishshawu anjjettida loꞌꞌo leemiso gidiyaageetubaa Geeshsha Maxaafay yootees. Iyyooba hanotaa qoppa. I Xoossaa siiqiyaanne A ufayssanawu koyiya asa gidikkonne, nagaranchcha. Wolqqaama paacee gakkido wode, I bala gidida amaridabaa haasayiis. Hegaa gaasuwan, Eelihunne Yihooway A sittan zoridosona. Yaatin Iyyoobi waatidee? I hagaadan giis: “Tumuppe taani taayyo gelibeennabaa haasayaas; . . . taani haasayidobai tana yeellayiis. Yaatin, taani bidinttaaninne baanan uttada paaxais.” (Iyy. 42:3-6, 12-17) Eelihu appe yelaga gidikkonne, Eelihu immido zoriyaa siyiyoogan I bana ziqqi oottiya asa gidiyoogaa bessiis. (Iyy. 32:6, 7) Hegaadankka, nuuni nuussi zoree koshshenna giidi qoppiyo wode woy zoriyaa immiyaagee nuuppe yelagiyo wodekka he zoriyaa oosuwan peeshshanaadan nuna ziqqi oottiyoogee maaddees. Nuuni ubbay ayyaana ayfiyaa kaseppe aaruwan ayfiyaageetanne mishiraachchuwaa sabbakiyoogaaninne tamaarissiyoogan qara gidana koshshees. w22.02 11 ¶8; 12 ¶12

Gubaaꞌee sarotettay deꞌiyo soho gidanaadan oottiyoonne ooninne boorasenna mala yan deꞌiya ubbaa siiqiyo aawatettay gubaaꞌiyan deꞌiya ubbawu deꞌees. Nuuni oottiyoobaynne haasayiyoobay harata keehi minttettana danddayees! Eta soo asay Yihoowa Markka gidennaageeta gubaaꞌiyaa ishanttinne michchontti siiqiyoogaa eti akeekanaadan maaddanawu waatana danddayay? Oorattatuura laggetanawu mala. Oorattati gubaaꞌiyaa yiyo wode eta ufayttada mokka ekkiyoogan doommana danddayaasa. (Roo. 15:7) SHin, nuuni eta ufayttidi sarotiyoogaa xallay gidenna. Nuuni loddan loddan laggetettaa minttanawu koyoos. Yaatiyo gishshawu, oorattatussi kehiyaagaanne wozanappe qoppiyaagaa gida. Yeellayiya oyshata oychchennan, eta gakkiya metuwaa akeekanawu mala. Banttawu siyettiyaabaa neeyyo yootiyoogee amaridaageetussi deexxana danddayiyo gishshawu yootanaadan eta wolqqanttoppa. Qassi, eti pashkki giidi yootanaadan hiillan oychcha, yaatada eti zaariyoobaa danddayan ezgga. Leemisuwawu, eti tumaa waati siyidaakko oychchana danddayaasa. w21.06 11 ¶13-14

Nuuni nu ishanttuuranne michchonttuura ‘heemmiya issuwaa’ kaalliya ‘issi wude’ gididi Yihoowawu haggaaziyoogan ufayttoos. Yihoowa SHeniyaa Oottanawu Giigettidaageeta (Amaarattuwaa) giyo maxaafaa sinttaa 165n deꞌiya qofay hagaadan gees: “Neeni hegaadan issippetettan deꞌiyo gishshawu, he issippetettay moorettennaadan naaganawu neeyyo danddayettida ubbabaa oottana koshshees.” Hegaa gishshawu, nuuni “nu ishanttanne michchontta Yihooway xeelliyoogaadan xeelliyoogaa” tamaarana koshshees. Yihooway nuna ubbaa ‘guuttatudan’ xoqqu ootti xeellees. Neeni ne ishanttanne michchontta hegaadan xeelliyoogee keehi loꞌꞌo. Neeni eta maaddanawunne etawu koshshiyaabaa kunttanawu oottiyo ubbabaa Yihooway akeekeesinne xoqqu ootti xeellees. (Maa. 10:42) Nuuni nu ishanttanne michchontta siiqoos. Yaatiyo gishshawu nuuni ‘issi ishaa xubbiyaabaa woykko nagaran onggiyaabaa oottennaadan qofaa qachchoos.’ (Roo. 14:13) Nu ishanttinne michchontti nuuppe aadhdhiyaabadan qoppoos, qassi etassi wozanappe atto gaanawu koyoos. Nuuni haratun xubettana koshshenna. “Ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos.”—Roo. 14:19. w21.06 24 ¶16-17

Nuuni Xoossaa Qaalaappenne A dirijjitiyaappe demmiyo zoriyaa loyttidi xannaꞌiyaabanne oosuwan peeshshiyaaba gidikko, loddan loddan Kiristtoosaagaa mala eeshshay deꞌiyoogeeta gidoos. Qassi Xoossaa kaseegaappe loyttidi eroos. Nuuni sabbakiyo Kawotettaa mishiraachchoy ashkke asatu wozanan guutta zerettaadan loddan loddan waanidi dicciyaakko qonccissanawu Yesuusi issi leemisuwaa goꞌettiis. I hagaadan giis: “I ba huuphen waaniyaakkonne erennan, he zerettai mokkeesinne diccees. Biittai kattaa barkka mokkeesinne aifees; koiro carshshai caarees; guyyeppe aifanau kukkumees; qassi wurssettan kumetta aifiyaa aifees.” (Mar. 4:27, 28) Yesuusi kattay loddan loddan dicciyoogaadan, Kawotettaa mishiraachchuwaa siyiya uri ayyaanaaban loddan loddan dicciyoogaa qonccissiis. Leemisuwawu, nuuni Geeshsha Maxaafaa xannaꞌissiyoogeeti Yihoowakko shiiqiyo wode, eti daroban laamettiyoogaa nuuni akeekiyoogaa doommoos. (Efi. 4:22-24) SHin he guutta zerettay diccanaadan oottiyay Yihoowa gidiyoogaa nuuni hassayana bessees. w21.08 8-9 ¶4-5

Nuuni ufayssaa demmanawu suure sohuwaappe koyikko demmana danddayoos. ‘Ayfiyan beꞌiyooban’ xeelaa wottiya uri bawu deꞌiyaaban hegeekka, haꞌꞌi I deꞌiyo hanotan ufayttees. SHin demmana danddayennabaa ubbatoo amottiya uri mule ufayttenna. Yaatin, nuuni hegaappe ay tamaariyoo? Nuuni ufayttanawu nuuyyo deꞌiyaabaanne tumuppe nu demmana giidi hidootan naagana danddayiyoobaa ubbatoo qoppana koshshees. Neeyyo deꞌiyaaban ufayttiyoogee tumuppe danddayettiyaabee? Oorattabaa oottiyo ogiyaa nuuni ubbatoo tamaaranawu koyiyo gishshawu, daro asay hegee danddayettennaba giidi qoppees. SHin, hegee tumuppe danddayettiyaaba. Nuuni nuuyyo haꞌꞌi deꞌiyaaban tumuppe ufayttana danddayoos. Waani ufayttana danddayiyoo? Hegaa eranawu, Yesuusi Maatiyoosa 25:14-30n yootido taalanttiyaa leemisuwaa, qassi ufayttana danddayiyo ogiyaanne haꞌꞌi nu deꞌiyo hanotan waanidi loytti ufayttanaakko tamaarana. w21.08 21 ¶5-6

Yihooway ‘wozanay meꞌꞌidoogeetussinne bantta ayyaanan liiqidaageetuyyo’ loytti qoppees. Cimatu xalla gidennan, nuuni ubbay nu siiqo ishanttanne michchontta minttettana danddayoos. Nuuni eta minttettana danddayiyo issi ogee etawu qoppiyoogaa bessiyoogaana. Yihooway eta keehi siiqiyoogaa nuuni bessanaadan koyees. (Efi. 5:1, 2) Nuuni nuna ziqqi oottiyaageetanne nu eran ceeqettennaageeta gidiyoogankka nu ishanttanne michchontta maaddana danddayoos. Harati nuna qanaatanaadan nuuni koyenna gishshawu, asay nunan xeelaa wottanaadan koyokko. Qassi nuuni ubbay haasayiyoobaaninne oottiyooban nu ishantta minttettanawu koyoos. (1 PHe. 4:10, 11) Nuuni Yesuusi bana kaalliyaageeta oyqqido ogiyaa loytti qoppiyoogan harata waati oyqqanaakko darobaa tamaarana danddayoos. Saꞌan deꞌida ay asappenne I aadhdhees. Gidikkonne, I “ashkkenne wozanappe kauyyiyaagaa” woy bana ziqqi oottiyaagaa. (Maa. 11:28-30) Asaa I tamaarissido wode, akeekanawu metenna qaalatanne leemisota goꞌettiis; qassi hegee ashkke asatu wozanaa denttettiis.—Luq. 10:21. w21.07 23 ¶11-12

Cimidaageeta kasetada haasayissa. Eti loytti xeellennaageeta, loddan heemettiyageetanne haasayiyaageeta gidana danddayoosona. SHin eti haꞌꞌikka minnidi oottanawunne Yihoowa sinttan “lo77o sunttai” deꞌiyoogeeta gidanawu koyoosona. (Era. 7:1) Yihooway eta nashshiyo gaasuwaa hassaya. Eta ubbatoo bonchcha. Elssaaꞌa mala gida. I Eelaasaara issippe deꞌido wurssetta gallassan appe shaahettennan agganawu minttidi woossiis. Elssaaꞌi heezzutoo hagaadan giis: “Taani neeppe shaahettikke.” (2 Kaw. 2:2, 4, 6) Cimidaageeta kehatettan oyshata oychchiyoogan etassi qoppiyoogaa bessa. (Lee. 1:5; 20:5; 1 Xim. 5:1, 2) Hagaa mala oyshata oychcha: “Neeni yelagatettan deꞌiyo wode, tumaa demmidoogaa ammananaadan oottidabay aybee?” “Nena gakkidabay neeni Yihoowakko shiiqanaadan waati maaddidee?” “Yihoowa haggaazuwan neeni ufayttada deꞌanaadan nena maaddidabay aybee?” (1 Xim. 6:6-8) Yaatada eti bantta taarikiyaa yootiyo wode loytta ezgga. w21.09 5 ¶14; 7 ¶15

Sabbakanaadaaninne erissiyo ashkkara oottanaadan yootido azazuwaa azazettanawu neeyyo danddayettida ubbabaa oottiyo wode, neeni Xoossaa siiqiyoogaa bessaasa. (1 Yoh. 5:3) Hagaa qoppa: Neeni asawu sabbakiyoy Yihoowa siiqiyo gishshataassa. He azazuwaa azazettiyoogee metennabee? Metana danddayees. Neeni sabbakanawu koyro biido wode yayyadii? Yayyidoogee qoncce! SHin ha oosuwaa neeni oottanaadan Yesuusi koyiyoogaa eriyo gishshawu, he azazuwaa azazettadasa. Qassi amarida wodiyawu sabbaka simmada neeni kaseegaadan yayyennan aggana danddayaasa. SHin Geeshsha Maxaafaa xannaꞌissiyoogaa xeelliyaagan neeyyo aybi siyettii? Hegaabaa qoppiyoogee nena yashshii? Yashshennan waayi aggana. Gidoppe attin, neeni xalanaadaaninne harata Geeshsha Maxaafaa xannaꞌissanawu oychchanaadan Yihooway maaddana mala woossikko, erissiyo ashkkara oottanawu neeni koyanaadan I nena maaddana. w21.07 3 ¶7

Beni wode aylleti oogeetakko bessiya malaatay eta bolli wodhdhees. Hegaadankka, ha wodiyan deꞌiya asa ubbay oossi exatiyaakko bessiyo wodiyaa naagees. Eti oogeetakko, qassi polotikaara gayttidaagan oossi exatiyaakko qoppiyoobaaninne oottiyooban ubba asaa bessanawu koyoosona. Nuuni ha leemiso malaataa wottidi polotikaa kawotettatussi exatanee? He malaataa wottennan ixxiyaageeta metoy gakkananne eti qohettana. Ajjuutaa maxaafay hagaadan gees: “He do7aa sunttai woi a sunttaa paidoi de7iyo malaati bainna asi ooninne baizzanaunne shammanau danddayenna.” (Ajj. 13:17) SHin Ajjuutaa 14:9, 10 yootiyoogaadan malaatay wodhdhidoogeeta Xoossay waatanaakko A asay erees. He malaataa wottiyoogaappe, eti bantta kushiyaa bollan “Taani GODAAGAA” yaagidi xaafana. (Isi. 44:5) Hagee nuuni kaseegaappe aaruwan Yihoowawu ammanettiyo wode. Nuuni baageeta gidiyoogaa yootiyoogan Yihooway ufayttana! w21.09 18 ¶15-16

Nu haggaazuwaa polanawu haratuppe demmiyo maaduwan goꞌettana danddayoos. Ximootiyoosi sabbakanaadaaninne tamaarissanaadan PHawuloosi A tamaarissiis; qassi Ximootiyoosi harata hegaadan maaddanaadan I minttettiis. (1 Qor. 4:17) Ximootiyoosaagaadan, nuunikka nu gubaaꞌiyan deꞌiya kaymatuppe tamaarana danddayoos. Yihooway maaddana mala nuunikka woossana koshshees. Sabbakiyo wode ubban Yihooway maaddana mala oychcha. Nuuni oottiyo ubbaban maaddana mala A geeshsha ayyaanay nuussi koshshees. (Maz. 127:1; Luq. 11:13) Yihooway nena maaddana mala woossiyo wode, ne koyiyoobaa qonccissada oychcha. Leemisuwawu, abaa tamaaranawu koyiya uraaranne siyanawu giigetti uttida uraara gayttanaadan maaddana mala oychcha. Nuuni buzo xinaatiyawukka wodiyaa bazzana koshshees. Xoossaa Qaalay hagaadan gees: “Intte Xoossai koyiyoobi, lo77obi, a ufaissiyaabinne qassi kumettabi aibakko erana.” (Roo. 12:2) Nuuni xannaꞌiyo wode, Xoossaa gujji gujjidi eroos. Qassi nuuni abaa haratuyyo yootiyo wode, nu yootiyoobaa wozanappe ammaniyoogaa eti akeekana. w21.05 18 ¶14-16

Neeni Geeshsha Maxaafaa issi uraa xannaꞌissaydda deꞌennan waayi aggana. Neeni gooba asttamaare gidanawu baaxetaasanne ne xinaatiyawu darotoo woossaasa. SHin tamaariyoobaa I oosuwan peeshshenna gishshawu neeni A xannaꞌissiyoogaa aggana koshshees. Woy qassi neeni xannaꞌissin xammaqettida uri deꞌennan aggana danddayees. Hegaa giyoogee neeni mooridobay deꞌees giyoogee, qassi Yihooway ne haggaazuwaa anjjibeenna giyoogee? Yihooway nu haggaazoy muruta gidiyoogaa woy gidennaagaa waati eriyaakko akeeka. Yihooway nu baaxetiyo baaxiyaanne nuuni hidootaa qanxxennaagaa akeekees. Asay siyanawu koyennaba gidikkonne, nuuni Yihoowa siiqiyo gishshawu minnidi sabbakiyo wode I nunan ufayttees. PHawuloosi hagaadan giis: ‘Intte oottido oosuwaanne qassi ammaniyaageeta maaddidoogaanne Xoossaa siiqido siiquwaa Xoossay doganawu worddanchcha gidenna.’ (Ibr. 6:10) Nuuni xannaꞌissin xammaqettida uri baynnaba gidikkonne, Yihooway nu oottiyoobaanne nu siiquwaa hassayees. Yaatiyo gishshawu PHawuloosi hachchi gallassaa xiqisiyan yootidobaa oosuwan peeshshana danddayaasa. w21.10 25 ¶4-6

Yesuusi bana kaalliyaageeta oyqqido hanotan kehanne siiqiyaagaa gidiyoogaa bessiis. Eta eraynne eta hanotay dumma dumma gidiyoogaa I erees. Yaatiyo gishshawu, eti ubbay issi malabaa oottana woy haggaazuwan issi mala ayfiyaa demmana danddayokkona. SHin, eti ubbay banttawu danddayettidaagaa keenaa oottiyoogan I ufayttiis. Biraabaa yootiya leemisuwan Yesuusi hegaa qonccissiis. He leemisuwan, goday ashkkaratu ubbawu “eta wolqqaa keenaa” oosuwaa immiis. Naaꞌꞌu gooba ashkkaratuppe issoy haratuugaappe aaruwan worissiis. SHin goday eta naaꞌꞌakka hagaadan giidi issi mala qaalan galatiis: “Hayyanaashsho! Neeni lo77onne ammanettiya ashkkara!” (Maa. 25:14-23) Yesuusi nuna ubbatoo siiqeesinne nuuyyo kehees. Nu eraynne nu hanotay dumma dumma gidiyoogaa I erees, qassi nuuni nuuyyo danddayettida ubbabaa oottiyo wode ufayttees. Nuuni Yesuusa milatana koshshees. w21.07 23 ¶12-14

Kawuwaa Daawiti muletoo maaribeenna. Leemisuwawu, meqettaa iita asa gidida Naabaali Daawita cayiis, qassi Daawitassinne A asatussi qumaa immennan ixxiis. Hegan Daawiti keehi hanqqettidi Naabaalanne A son deꞌiya attuma asa ubbaa woranawu kuuyiis. SHin, Naabaala machchiyaa Abigaala kehanne danddayanchcha gidiyo gishshawu Daawitassi qumaa eesuwan immaasu. Yaatiyo gishshawu Daawiti Naabaalanne A asata woribeenna. (1 Sam. 25:9-22, 32-35) Daawiti keehi hanqqettido wode, Naabaalinne A attuma asa ubbay hayqqana bessees giidi kuuyiis. Guyyeppe, Naataani yootido leemisuwan qonccida dure bitanee oottidobaa gishshawu hayqqana koshshees giidi Daawiti pirddiis. SHin, Daawiti keha asa, yaatin I he kaysuwaa bolli meqettaa iitidi pirddidoy aybissee? Daawita deꞌuwan gakkidabaa ane qoppa. He wode, Daawiti bana mooranchchadan xeellees. Issi uri hara urawu meqettaa iitidi pirddikko, hegee I ayyaanaaban loꞌꞌo gidennaagaa bessees. w21.10 12 ¶17-18; 13 ¶20

Nuuni geeshshatettan ooppenne aadhdhiya leemiso gidida Yihoowa milatana danddayiyoogaa hachchi gallassa xiqisiyaappe tamaaroos. Nuuni nu oosuwan geeshsha gidana bessees, qassi yaatana danddayoos. Nuuni nagaranchcha gidiyo gishshawu hegee nuussi danddayettennaba milatana danddayees. Kiitettida PHeexiroosi darotoo balidaba gidikkonne, A hanotay nuuni ‘geeshsha gidana’ danddayiyoogaa qonccissees. Geeshsha giyo uraabaa daro asay qoppiyo wode, eti mule noocu geenna uraa, haymaanootiyaa kaalettiyaageetu maayuwaa maayiyaanne mule pashkki geenna uraa qoppoosona. SHin hegee likke gidenna. Geeshsha gidida Yihooway ufayttiya woy ‘anjjettida Xoossaa’ geetettees. (1 Xim. 1:11) Awu goynniyaageeti “anjjettidaageeta” woy ufayttiyaageeta geetettoosona. (Maz. 144:15) Yesuusi dumma maayuwaa maayiyaageetanne asay banttana beꞌana mala asaa sinttan loꞌꞌobaa oottiyaageeta seeriis. (Maa. 6:1; Mar. 12:38) Geeshsha Maxaafay geeshshatettaabaa yootiyo gishshawu tumu Kiristtaaneti geeshshatettay aybakko eroosona. Xoossay nuna siiqiyoogaanne nuuni oottana danddayennabaa oottanaadan I nuna mule azazennaagaa eroos. w21.12 2 ¶1, 3

Xoossay nuussi kehatettan immido imota ubbaappe aadhdhiyaagee ayyo goynniyoogaa. Nuuni ‘Yihoowa azazota naagiyoogan’ A siiqiyoogaa bessoos. (1 Yoh. 5:3) Nuuni azazettanaadan Yihooway koyiyo azazotuppe issoy erissiyo ashkkara oottidi asaa xammaqanaadan Yesuusi azazido azazuwaa. (Maa. 28:19) Nuuni issoy issuwaa siiqanaadankka azaziis. (Yoh. 13:35) Yihooway azazettiya asati kumetta alamiyan ayyo goynniya soo asa gidanaadan oottees. (Maz. 15:1, 2) Harata siiqa. Siiqoy Yihoowawu waanna eeshsha. (1 Yoh. 4:8) Yihooway nuuni A eranaappe kase nuna siiqiis. (1 Yoh. 4:9, 10) Nuuni harata siiqiyo wode A milatoos. (Efi. 5:1) Asay wodee deꞌishin Yihoowabaa tamaaranaadan maaddiyoogee nuuni eta siiqiyoogaa bessana danddayiyo keehi loꞌꞌo oge. (Maa. 9:36-38) Nuuni eta maaddiyo wode, eti Xoossaa soo asa gidanawu ay oottana koshshiyaakko tamaarana danddayoosona. w21.08 5-6 ¶13-14

Yesuusi Yihoowa keehi siiqiyo gishshawu, ba Aawaassinne nuussi bana yarshshiis. (Yoh. 14:31) Yesuusi asaa keehi siiqiyoogaa saꞌan deꞌido deꞌuwan bessiis. Amaridaageeti A eqettikkonne, I ubba galla asaa siiqiisinne asawu qarettiis. I asaa siiqiyoogaa bessido waanna ogee Xoossaa Kawotettaabaa asaa tamaarissiyoogaa. (Luq. 4:43, 44) Yesuusi tuggatanawunne nagaranchchatu kushiyan hayqqanawu eeno giyoogan Xoossaanne asaa ba goꞌꞌaa aggi bayidi siiqiyoogaakka bessiis. Yaatiyoogan, nuuni ubbay merinaa deꞌuwaa demmanaadan ogiyaa dooyiis. Nuuni saluwan deꞌiya nu Aawaa siiqiyo gishshawu, nuna awu sheedhdhidi xammaqettida. Yaatiyo gishshawu, nuuni asaa Yesuusaagaadan oyqqiyoogan Yihoowa siiqiyoogaa bessana koshshees. Kiitettida Yohaannisi hagaadan giis: “Be7ido ba ishaa siiqennaagee be7ibeenna Xoossaa siiqanau waani danddayii?”—1 Yoh. 4:20. w22.03 10 ¶8-9

Nuuni woossiyoogaanne Geeshsha Maxaafaa nabbabiyoogaa dosikkonne, hegee metennaba gidenna. Deꞌoy nuna bichchaarissiyoogee, Yihoowawu goynniyo wodiyaa demmanawu metootanaadan oottana danddayees. Nu oosoy, nu soo asaabaynne nuuni oottana koshshiya harabay daro wodiyaa wurssiyo gishshawu, woossanawu, xannaꞌanawu, woy wotti dentti qoppanawu nuussi wodee baawa giidi qoppana danddayoos. Nu wodiyaa wurssana danddayiya harabaykka deꞌees. Nuuni naagettennaba gidikko, bala ooso gidana xayikkonne, Yihoowaara dabbotaa minttanawu wode xayssiyaabaa oottana danddayoos. Leemisuwawu, nuuni allaxxanawu wodiyaa bazzana koshshees. Gidoppe attin, nuuni loꞌꞌoban allaxxikkonne, an daro wodiyaa wurssikko, Yihoowawu goynnana danddayiyo wodee darenna. Allaxxiyoogee nuussi keehi koshshiyaaba gidennaagaa hassayana bessees.—Lee. 25:27; 1 Xim. 4:8. w22.01 26 ¶2-3

Israaꞌeelati harata siiqanaadan Yihooway azazido wode eti bantta zare woy bantta biittaa asa xalla siiqana koshshees giidi yootibeenna. Eti banttanaara deꞌiya betetakka siiqanaadan yootiis. Wogaabaa 19:33, 34y yootiyoobay qoncce. Israaꞌeelati bete uraa bantta “biittaa asadan,” xeellanaadaaninne ‘bantta huuphedan siiqanaadan’ Yihooway koyees. Leemisuwawu, Israaꞌeelati bantta gaden deꞌiya poshiluwaa betetussinne hiyyeesatussi aggana koshshiyoogaa Higgee yootees. (Wog. 19:9, 10) Beteta siiqanaadan odettida maaray ha wodiyan Kiristtaanetussikka oottees. (Luq. 10:30-37) Waanidi? Miilooniyan qoodettiya beteti deꞌoosona; qassi amaridaageeti ne heeran deꞌennan aggokkona. Nuuni ha attuma asata, macca asatanne naata bonchchuwan oyqqiyoogee bessiyaaba. w21.12 12 ¶16

Nuuni ha wodiyan Yihoowa kaaletuwan mintti ammanettikko I nuna sinttappe ashshana danddayiyoogaa loytti ammanettana. Nuuni gita shiiqota shiiqanawu nuna ootissiyaagaa piqaadiyaa oychchiyoogee, woy gubaaꞌe shiiqota ubbaa shiiqanawunne kaseegaappe aaruwan haggaazanawu nu oosuwaa prograamiyaa laammanaadan nuna ootissiyaagaa oychchiyoogee koshshana danddayees. Yaatanawu, nuuni ammanoy deꞌiyoogeetanne Yihoowan ammanettiyaageeta gidana koshshees. Nuna ootissiyaagee nuuyyo paqqadibeennabadaaninne nuuni nu oosuwaappe yedetettidabadan qoppa. Yihooway nuna mule yeggennaagaa woy aggennaagaanne I nuussi koshshiyaabaa ubbatoo kunttiyoogaa ammanettiyoo? (Ibr. 13:5) Ubba wode haggaaziya darotuyyo keehi maadoy koshshido wode, Yihooway eta waati maaddidaakko eti yootana danddayoosona. Yihooway ammanettiyaagaa. Yihooway nunaara deꞌiyo gishshawu sinttanaabaa nuuni yayyiyo gaasoy baa. Nuuni nu deꞌuwan A Kawotettaabaa kaseyikko, Xoossay nuna mule aggenna. w22.01 7 ¶16-17

Nuuni cimatun ammanettiyoogee waani paacettana danddayii? Bohettida uri nuussi mata lagge giidi qoppoos. Cimati ubbabaa qoribookkona giidi hirggana danddayoos, woy eti he yohuwaa Yihoowaagaadan kuuyidonaashsha giidi qoppana danddayoos. Kuuyidobaa maayettanaadan nuna aybi maaddana danddayii? Bohiyoogee Yihooway giigissidoba, qassi hegee gubaaꞌiyaa maaddiyoogaanne nagaraa oottida uraa goꞌꞌana danddayiyoogaa nuuni hassayana koshshees. Ba nagaraappe simmibeenna uri gubaaꞌiyaa yame gididi deꞌanaadan paqqadikko, haratikka nagaraa oottanaadan I denttettana danddayees. (Gal. 5:9) Hegaa bollikka, I gita nagaraa oottidoogaa akeekennan aggana danddayees, qassi Yihoowan sabettanawu ba qofaanne ba oottiyoobaa laammanawu darin waayi koyenna. (Era. 8:11) Issi uri bohettana koshshiya koshshennaakko kuuyiyo wode, cimati bantta aawatettaa maara poliyoogaa nuuni ammanettana danddayoos. w22.02 5-6 ¶13-14

Geeshsha Maxaafay yootiyoobaa issi uri koyro heeran oosuwan peeshshanawu koyana xayikko, danddayanchchanne keha gidiyoogee keehi koshshiyaaba. Zoree imettido ishay woy michchiyaa zoriyaa siyana woy oosuwan peeshshana xayikko, issi cimay hanqqettana koshshenna. Yaatiyo gishshawu, issi cimay ba buzo woosaa woossiyo wode, zoree koshshiyo uraa Yihooway maaddanaadaaninne he uri zoree imettiyo gaasuwaa akeekanaadan, qassi zoriyaa oosuwan peeshshanaadan Yihooway maaddana mala oychchana danddayees. Zoree imettiyo ishay he zoriyaabaa qoppanawu wodee koshshana danddayees. Cimay danddayidi kehatettan haasayiyoogee he ishay zoriyaa metoottennan siyanaadan oottees. Zoree ubbatoo Xoossaa Qaalaappe imettana koshshees. Nu zoree maaddiyaagaa xalla gidennan, ‘ufayssiyaagaa’ gidanaadankka koyoos.—Lee. 27:9. w22.02 18 ¶17; 19 ¶19

Metuwaa woy nuuni shugo gididobaa genccanawu minotettaa immana mala woossiyo wode, nuuni qoppido wodiyan woppaa demmibeennabadan nuussi siyettana danddayees. Nuuni woossiyo woosa ubbaa Yihooway eesuwan zaarennay aybissee? Nuuni wozanappe woossiyo woosaa I nu ammanuwaa qonccissiyaabadan xeellees. (Ibr. 11:6) Yihooway nuuni nu woosaara maayettiya ogiyan deꞌanawunne A sheniyaa oottanawu keehi murttidoogaa beꞌiyoogankka ufayttees. (1 Yoh. 3:22) Yaatiyo gishshawu, nuuni iita meeziyaa woy nu shugo gididobaa xoonanawu baaxetiyo wode ubban danddayanchchanne nu woosaara maayettiya ogiyan deꞌiyaageeta gidana koshshees. Yesuusi nuuni woossiyo amarida woosay eesuwan zaaruwaa demmennaagaa nu akeekanaadan maaddiis. I hagaadan giis: “ Woossite; intte ekkana. Koyite; intte demmana. Kare yiidi xeesite; intteyyo karee dooyettana. Aissi giikko, woossiya ubbai ekkana; koyiya urai demmana; qassi kare yiidi xeesiya urau karee dooyettana.”—Maa. 7:7, 8. w21.08 8 ¶1; 10 ¶9-10

Medhdhidaagaa ne ammaniyo ammanuwaa minttanawu Xoossaa Qaalaa ubbatoo xannaꞌana koshshees. (Yaas. 1:8) Geeshsha Maxaafaa hiraagatanne Geeshsha Maxaafay yootiyoobay issoy issuwaara maayettiyoogaakka qoppa. Yaatiyoogee siiqiya aadhdhida eranchcha gidida Medhdhidaagaanne Geeshsha Maxaafaa I nuussi xaafissidoogaa ne ammaniyo ammanuwaa minttana danddayees.​ (2 Xim. 3:14; 2 PHe. 1:21) Xoossaa Qaalaa xannaꞌiyo wode, an deꞌiya zoree keehi maaddiyoogaa akeeka. Leemisuwawu, miishshaa siiqiyoogee qohiyoogaanne hegee ‘daro metuwaa’ kaalettiyoogaa Geeshsha Maxaafay daro wodiyaappe kasetidi yootiis. (1 Xim. 6:9, 10; Lee. 28:20; Maa. 6:24) Yaatiyo gishshawu, nuuni miishshaa siiqennaadan Geeshsha Maxaafay yootiyoobay keehi loꞌꞌo zore! Geeshsha Maxaafan deꞌiya nena maaddida hara zoriyaa hassayay? Geeshsha Maxaafay yootiyo zore ubbaa nuuni loytti qoppikko, nuussi keehi loꞌꞌo gididabaa nuna medhdhida siiqiyaagee eriyoogaa akeekananne zoriyaa demmanawu an ubbatoo ammanettana. (Yaaq. 1:5) Yaatiyoogee nuuni keehi ufayttanaadan oottees.—Isi. 48:17, 18. w21.08 17-18 ¶12-13

Intte cimidaba gidikko, kase oottidobaa Yihooway hassayiyoogaa ammanettite. Sabbakiyo oosuwaa intte minnidi oottideta. Keehi azzanttiya metootakka intte genccideta. Geeshsha Maxaafay yootiyo xillotettaa maarata intte naagidetanne etawu exatideta, keehi koshshiya oosota Yihoowa dirijjitiyan ammanettidi oottidetanne harata loohissideta. Yihoowa dirijjitee laammido darobaa meezetanawu intteyyo danddayettida ubbabaa oottideta. Ubba wode haggaaziya harata intte minttettideta. Intte ammanettiyaageeta gidiyo gishshawu Xoossaa Yihooway inttena keehi siiqees. ‘Xoossay ba asata yeggennan’ agganawu qaalaa geliis. (Maz. 37:28) I hagaadan giis: “Intte puulummana gakkanaashinkka, taani inttena maaddana.” (Isi. 46:4) SHin, intte cimido gishshawu hagaappe simmin Yihoowa dirijjitiyan maaddikke giidi qoppoppite. Intte keehi maaddeeta! w21.09 3 ¶4

Yihooway zawi baynna ba aadhdhida eratettaa gaasuwan maarotettaa bessees. ‘Bollappe yiya aadhdhida eratettay maarotettay kumidoogaa’ gidiyoogaa Geeshsha Maxaafay yootees. (Yaaq. 3:17) Siiqiya aawaagaadan, Yihooway ba maarotay ba naata maaddiyoogaa erees. (Isi. 49:15) Eti nagaranchcha gidikkonne, Xoossaa maarotettay etassi hidootay deꞌanaadan oottees. Yaatiyo gishshawu, zawi baynna Yihoowa aadhdhida eratettay I maaranaadan oottiyaabi deꞌiyo wode awudenne maaranaadan A denttettees. SHin, Yihooway maarotaa awude bessennan agganaakko erees. I aadhdhida eranchchaa gidiyo gishshawu, maariyoogee iitabaa xaasayi xeellanaadan oottiyo wode I mule maarenna. Xoossawu oottiya issi uri shori baynna deꞌuwaa deꞌanawu kuuyiis giidi qoppite. Yaatikko nuuni waatana bessii? Gubaaꞌee he uraara ‘issippe gayttiyoogaa agganaadan’ PHawuloosi yootana mala Yihooway azaziis. (1 Qor. 5:11) Ba nagaraappe simmenna uri gubaaꞌiyaappe bohettees. Yaatiyoogee ammanettida ishanttanne michchontta qohuwaappe naaganawunne Yihooway geeshshatettawu kessido maaraa kaallanawu bessiyaaba. w21.10 9-10 ¶7-8

Kawotettaa oosuwaa nu miishshan maaddiyo wode Yihoowawu goynnoos. Israaꞌeelati Yihoowa sintti mela kushe yaana koshshenna. (Zaa. 16:16) Eti bantta wolqqa keena imotaa immana koshshiis. Yaatiyoogan, eti Yihooway banttawu oottido ubbabaa gishshawu A galatiyoogaa bessidosona. Nuuni Yihoowa siiqiyoogaanne I nuuyyo oottiiddi deꞌiyo ubbabaa gishshawu A nashshiyoogaa waati bessana danddayiyoo? Nu wolqqa keenan nu gubaaꞌiyaanne kumetta saꞌan oosettiya oosuwaa maaddanawu miishshaa immiyoogee nashshiyoogaa bessiyo issi oge. Kiitettida PHawuloosi hegaa xeelliyaagan hagaadan giis: “Issi urai Xoossau immanau keehi amottikko, Xoossai au de7ida keenaa ekkanaappe attin, au bainnabaappe ekkenna.” (2 Qor. 8:4, 12) Nuuni immiyoobay daro gidana xayikkonne, nu danddayiyoogaa keenaa immikko Yihooway keehi ufayttees.—Mar. 12:42-44. w22.03 24 ¶13

Yihoowa asaa gakkiya meto ubbaa cimati diggana danddayokkona. Gidoppe attin, Yihooway ba asaa cimati minttettanawunne naaganawu oottana danddayiyoobaa oottanaadan koyees. Daro oosoy deꞌiyo cimati ishanttanne michchontta maaddanawu koshshiya wodiyaa waati demmana danddayiyoonaa? Kiitettida PHawuloosaleemisuwaanaa kaallite. PHawuloosi ba ishantta nashshiyoonne minttettiyo ogiyaa ubbatoo koyiis. Cimati bantta ishanttanne michchontta siiqiyoogaaninne etawu kehiyoogan A leemisuwaa kaalliyoogee loꞌꞌo. (1 Tas. 2:7) PHawuloosi ba ishanttanne michchontta siiqiyoogaanne Yihoowaykka eta siiqiyoogaa etassi yootiis. (2 Qor. 2:4; Efi. 2:4, 5) PHawuloosi gubaaꞌiyan deꞌiyaageeta laggedan xeelliyo gishshawu etaara wodiyaa aattiis. I bana yashshiyaabaanne I shugo gididobaa etassi qoncciyan yootiyoogan etan ammanettiyoogaa bessiis. (2 Qor. 7:5; 1 Xim. 1:15) Gidikkonne, PHawuloosi ba metuwan xeelaa wottibeenna. Qassi I ba ishantta maaddanawu koyiis. w22.03 28 ¶9-10