Naase

Yesuusi ba tohuwaanne kushiyaa misimaariyan xishiya Rooma wotaaddaratubaa yootennan aggenna. Yesuusi hayqqana bessenna. Gidoppe attin, I hanqqettidi, bana yedettiyaageetussi atto giikke gibeenna. (1 PHe. 2:23) Nuunikka Yesuusadan nu dosan haratussi atto gaana koshshees. (Qol. 3:13) Nu dabbota gujjin, amaridaageeti nu ammanuwaabaanne nuuni deꞌiyo deꞌuwaabaa akeekenna gishshawu, nuna eqettana danddayoosona. Eti nubaa wordduwaa yootana, haratu sinttan nuna kawushshana, nu xuufeta xayssana, woy ubba nuna qohana giidi yashissana danddayoosona. Nuuni nuna eqettiyaageetussi uluwan lancce oyqqiyoogaa aggidi, eti tumaa ammananaadan Yihooway eta wozanaa dooyana mala woossana danddayoos. (Maa. 5:44, 45) Eti nuna keehi naaqqidaba gidikko, atto gaanawu issi issitoo metootana danddayoos. SHin nuuni hanqqettidi aggennaageetanne atto geennaageeta gidikko, qohettoos. (Maz. 37:8) Nuuni atto gaanawu kuuyiyo wode, qohettidoban yiillotiiddi deꞌennaadan dooroos.—Efi. 4:31, 32. w21.04 8-9 ¶3-4

Neeni siiqiyo uri gubaaꞌiyaappe bohetti erii? Hegee keehi azzanttiyaaba gidana danddayees! Yihoowa so asa yara gidida kiitanchchatuppe amaridaageeti A bolli makkalido wode I ay keena azzanidaakko qoppa! (Yih. 6) Qassi I siiqiyo Israaꞌeelati A bolli darotoo makkalido wode I ay keena azzanidaakko qoppa. (Maz. 78:41) Neeni siiqiyo uri awu haggaaziyoogaa aggiyo wode saluwan deꞌiya siiqiya Aawaykka azzaniyoogee qoncce. Nena azzanttiyaabaa Yihooway akeekees. I neessi qarettidi koshshiya minttettuwaanne maaduwaa immana. Yelidaageeti darotoo siiqiyo naꞌay woy naꞌiyaa Yihoowawu haggaaziyoogaa aggiyo wode bantta naꞌi Yihoowawu haggaaziyoogaa aggennaadan loytti maaddana koshshi shin attiis giidi qoppoosona. Issi ishay hagaadan giis: “Hegee ta bala gaada qoppaas. Ubba qassi hegaabaa taani iitabaa aymottaas.” I naꞌaykka bohettido giyo michchiyaa darotoo hagaadan qoppawusu: “Taani aayo gidiyoogaadan darobaa moorennan aggikke. Ta naꞌay Yihoowa siiqanaadan taani loytta tamaarissabeennabadan tawu siyettiis.” w21.09 26 ¶1-2, 4

Haymaanootiyaabaa tamaarissiya xoqqa timirtte keettatun Yihoowa Markkati tamaaribeenna gishshawu, eti Geeshsha Maxaafaabaa tamaarissana danddayennabadan amarida asay qoppees. SHin asay issibaa xeelliyaagan tumaa akeekanawu pilggana koshshees. Wonggeliyaa xaafee Luqaasi hegaadan oottanawu loytti baaxetiis. I ‘koyruwaappe doommidi ubbabaa akeekan qoridi’ loytti xannaꞌiis. Nabbabiyaageeti Yesuusabaa siyidoogaa I xaafido ‘yohuwaappe geeshshidi erana mala’ koyiis. (Luq. 1:1-4) Beeriyan beni deꞌiya Ayhuda asati Luqaasa mala. Yesuusabaa yootiya mishiraachchuwaa eti koyro siyido wode, siyidobay tumakkonne akeekanawu Ibraawetto Geeshsha Maxaafaara geeddarissidosona. (Oos. 17:11) Hegaadan, asay ha wodiyan issibay tumakkonne eranawu pilggana koshshees. Xoossaa asay tamaarissiyoobaa Geeshsha Maxaafay yootiyoobaara eti geeddarissana koshshees. Eti ha wodiyan Yihoowa asay oottidobaakka xannaꞌana koshshees. Eti issibaa loytti akeekikko, coo ixxokkona woy siyidobaa xallan kuuyokkona. w21.05 3 ¶7-8

Neeni imatuwaa shoobbana danddayiyo uri ne gubaaꞌiyan deꞌii? Nu mala Kiristtaanetuura nuuni issi issitoo wodiyaa aattikko, eti keehi ufayttana danddayoosona. Worddo haymaanootiyaara gayttida baalata Yihoowa Markka gidenna so asay bonchchiyo wode etaara deꞌiyoogee amaridaageetussi deexxana danddayees. Harati issibay hanido gallassaa, leemisuwawu, siiqiyo uri hayqqido gallassaa hassayidi keehi azzanana danddayoosona. Hegaa mala metoy gakkido ishanttuuranne michchonttuura wodiyaa aattanawu nuuni eta shoobbiyo wode, etawu ‘wozanappe hirggiyoogaa’ woy qoppiyoogaa bessoos. (Pili. 2:20) Issi Kiristtaanee boorasanaadan oottana danddayiya daro gaasoy deꞌees. SHin, Yihooway hegaa mala hanotaa loytti eriyoogaa nuuni mule dogana bessenna. Nuussi koshshiyaabaa kunttanawu I ubbatoo nu ishanttanne michchontta goꞌettees. (Maa. 12:48-50) Qassi nuuni nu ishanttanne michchontta maaddanawu nuuyyo danddayettida ubbabaa oottiyo wode, gubaaꞌiyaa immido gishshawu Yihoowa galatiyoogaa bessoos. Issi issitoo nuuyyo siyettiyaabay ayba gidikkonne, Yihooway ubbatoo nunaara deꞌiyo gishshawu nuuni mule nurkka gidokko! w21.06 13 ¶18-20

Yesuusi I yootiyoobaa issoti issoti siyanawu koyana xayikkonne aggennan sabbakiis. Aybissi? Asay tumaa siyana koshshiyoogaa I erees; qassi I bawu danddayettida ubban daro asaa maaddanawu koyiis. Issi issi asay koyro heeran siyana xayikkonne guyyeppe siyanaagaa I erees. Eta son hanidabaa qoppa. Yesuusi heezzu layttanne baggaa haggaazido wode, A ishanttuppe ooninne I erissiyo ashkkara gidibeenna. (Yoh. 7:5) SHin, I hayquwaappe denddi simmin, eti Kiristtaane gididosona. (Oos. 1:14) Yihoowa ashkkara gidanay oonakko nuuni erokko. Issoti issoti tumaa tamaaranawu haratuugaappe daro wodiyaa ekkana danddayoosona. Ubba qassi nuuni yootiyoobaa siyanawu koyennaageeti nu loꞌꞌo eeshshaanne nuuni aggennan sabbakiyoogaa akeekoosona; qassi eti wurssettan ‘Xoossaa bonchchana’ danddayoosona. w21.05 18 ¶17-18

Yesuusi saꞌan deꞌiyo wode, bana kaalliyaageeti naaꞌꞌu oosota oottanaadan eta azaziis. Kawotettaa mishiraachchuwaa sabbakanaadan etawu yootiis, qassi waati sabbakanaakko eta bessiis. (Luq. 8:1) Leemisuwawu, Yesuusi bana kaalliyaageeti Kawotettaa mishiraachchuwaa asay siyiyo wodenne siyenna wode waatanaakko etawu yootiis. (Luq. 9:2-5) I bana kaalliyaageeti ‘asa ubbawu markkattanaagaa’ odido wode eti cora asawu daro sohuwan sabbakanaagaakka yootiis. (Maa. 24:14; Oos. 1:8) Gujjidikka, I azazido ubbabaa asay azazettanaadan bana kaalliyaageeti tamaarissana mala etawu yootiis. Yesuusi ha gita oosoy nu wodiyaa gakkanaashin hegeekka, ‘wodiyaa wurssettay gakkanaashin’ oosettanaagaa yootiis. (Maa. 28:18-20) Qassi Yohaannisi ajjuutaa beꞌanaadan Yesuusi oottido wode bana kaalliya ubbay harati Yihoowabaa tamaaranaadan maaddana mala I koyiyoogaa loytti qonccissiis.—Ajj. 22:17. w21.07 2-3 ¶3-4

Alamiyan ha wodiyan, daro asay haratuppe aadhdhiyaaba milatanawu ubbatoo baaxetees, qassi eti oottiyoobay harata ay keena qohiyaakko qoppokkona. Leemisuwawu, issi zalaꞌꞌanchchay hara zalꞌꞌanchchatuppe keehi gooba gidanawu koyiyo gishshawu, harata qohiyaabaa oottennan waayi aggana. Issi atileetee ispporttiyan xoonanawu hara citaa kaassanchchaa eriiddi qohees. Issi tamaaree keehi erettida yuniversttiyaa gelanawu paaciyaa wuuqqees. Nuuni Kiristtaane gidiyo gishshawu, hegaa malabati bala gidiyoogaa eroos; qassi hegee ‘asatettaa ooso.’ (Gal. 5:19-21) SHin amarida ishanttinne michchontti eti haratuppe aadhdhiyaaba milatanawu maliyoogaanne haratikka hegaadan oottanaadan eti denttettiyoogaa akeekiyoonaa? Hegee keehi koshshiya oysha; ayssi giikko, annaacettiyoogee ishanttu giddon deꞌiya issippetettaa moorana danddayees. Yaatiyo gishshawu, haratuppe aadhdhiyaaba milatanawu baaxetibeenna, Geeshsha Maxaafan etabay odettido Yihoowa ashkkaratubaa nuuni pilggiyoogee bessiyaabaa. w21.07 14 ¶1-2

Nuuni aggenna siiquwaa bessikko, azzanidaageeta woy hidootaa qanxxidaageeta maaddanawu baaxetoos. Ha wodiyankka keha gidida daro ishanttinne michchontti gubaaꞌiyan deꞌiya azzanidaageeta woy hidootaa qanxxidaageeta aggennan maaddoosona. Eti bantta ishanttanne michchontta siiqoosonanne eta maaddanawu banttawu danddayettida ubbabaa oottanawu koyoosona. (Lee. 12:25; 24:10) Kiitettida PHawuloosi, “Yayyiyaageeta [“unꞌꞌettidaageeta,” NW] minttettite. Wolqqi bainnaageeta maaddite. Asa ubbaa danddayite” giidi yootidobaa nuuni oosuwan peeshshanaadan I minttettiis.(1 Tas. 5:14.) Azzanida ishantti woy michchontti yootiyoobaa siyiyoogeenne neeni eta siiqiyoogaa eti eranaadan oottiyoogee darotoo eta maaddana danddayiya aybippenne aadhdhiya oge. Yihooway siiqiyo A ashkkarata maaddanawu neeni oottiyoobaa I nashshees. Leemiso 19:17y hagaadan gees: “Hiyyeesaassi kehiya asi GODAASSI tal77ees; GODAI he lo77o oosuwaa acuwaa qanxxees.” w21.11 10 ¶11-12

Sinttappe gakkanabawu nuuni haꞌꞌi giigettanawu ay oottana danddayiyoo? Nuuni nuussi deꞌiyaabay gidana giidi deꞌiyaageetanne nuuni Yihoowaara dabbotidoogan keehi ufayttiyaageeta gidana koshshees. Nuuni nu Xoossaa loytti erikko, Maagooga Googi qohuwaa gattiyo wode I nuna naagana danddayiyoogaa mintti ammanoos. Hachchi gallassaa xiqisiyaa qofay Daawiti Yihoowa maaduwaa ammanettana danddayidoy aybissakko eriyoogaa qonccissees. Daawiti ubbatoo Yihoowan ammanettiis, qassi A Xoossay ubbatoo A maaddiis. Daawiti yelagatettan, wogga wolqqaama asa gidida Pilisxxeemiyaa Gooliyaadaara olettiis; qassi he gooba olanchchawu hagaadan giis: “Hachchi GODAI nena ta kushiyan aatti immana.” (1 Sam. 17:46) Guyyeppe, Daawiti Saaꞌoolawu haggaaziyo wode Saaꞌooli A woranawu darotoo maliis. SHin ‘Yihooway Daawitaara deꞌees.’ (1 Sam. 18:12) Daawiti Yihoowa maaduwaa kase demmido gishshawu, bana gakkiya metuwan Yihooway maaddanaagaa erees. w22.01 6 ¶14-15

Oottiyoobaa wurssanawu ay keena wode koshshikkonne, Yihooway ubbabaa danddayan oottees. I ba sunttaa bonchchissanawunne harata maaddanawu hegaadan oottees. Leemisuwawu, Yihooway saꞌaa asawu loddan loddan waati giigissidaakko qoppa. Hegaa Geeshsha Maxaafay qonccissiyo wode ‘saꞌay ay keenakko, saꞌaa tuuqeti eqqidoogaanne saꞌaa baasuwaa shuchchay wodhdhidoogaa’ yootees. (Iyy. 38:5, 6) I takki giidi ba oottidobaa wotti denttidi qoppiis. (Doo. 1:10, 12) Yihooway medhdhidobati lodda loddan giigi giigi biyoogaa beꞌiyo wode kiitanchchatussi aybi siyettidaakko qoppana danddayay? Hegee eta keehi ufayssiis! Hegaa gishshawu eti ‘ufayssan ililidosona.’ Nuuni hegaappe ay tamaariyoo? Yihooway medhdhiyoogaa wurssanawu daro shaꞌu layttaa wurssidaba gidikkonne, Yihooway ba medhdhido ubbabaa xeellidi, hegee “daro lo77o” yaagiis.—Doo. 1:31. w21.08 9 ¶6-7

Yesuusi leemisuwan yootido bitanee oge baanawu giigi uttiis. Baanaappe kase, I ba ashkkarata xeesidi eti zalꞌꞌana mala etawu huuphiyan huuphiyan taalanttiyaa immiis. Bitanee ba ashkkaratu abbiyaa eriyo gishshawu, issuwawu ichchashu taalanttiyaa, issuwawu naaꞌꞌu taalanttiyaa, qassi heezzanttuwawu issi taalanttiyaa immiis. Koyro odettida naaꞌꞌu ashkkarati bantta godaassi miishshaa worissanawu minnidi oottidosona. SHin heezzantto ashkkaray bawu imettida miishshan aybanne oottibeenna gishshawu, goday A yedettiis. Koyro ashkkaraagaadan naaꞌꞌantto ashkkaraykka ba goday awu gita aawatettaa immidoogaa akeekido gishshawu, ba godawu minnidi oottiis. Hegaappe denddidaagan, goday immido taalanttiyaa I naaꞌꞌu kushe worissiis. Goday he ashkkaray minnidi oottido gishshawu A woytiis. Goday A sabbiis; qassi ayyo hara aawatettaakka immiis! w21.08 21 ¶7; 22 ¶9-10

Ha wurssetta gallassatun Yihooway keehi danddayiis. I ooninne xayanaadan koyenna. (2 PHe. 3:9) I asa ubbay nagaraappe simmanaadan wodiyaa immiis. SHin I merinawu danddayenna. Xoossaa Kawotettawu exatennaageeta Muuse wodiyan Paaroona bolli gakkida boshaa malabay gakkana. Yihooway Paaroonawu hagaadan giis: “Taani hannoode ta kushiyaa yeddada, nenanne ne asaa boshan ha sa7aa bollappe mulluccu oottargganashin. Taani nena ta wolqqaa bessanaunne ta sunttai sa7a ubbaa bollan odettanau, hegau taani nena paxa wottaas.” (Kes. 9:15, 16) Kawotettati ubbay tumanchcha Xoossay Yihoowa xalaala gidiyoogaa wurssettan erana. (Hiz. 38:23) Hachchi gallassaa xiqisiyan odettida qaattay Paaroonaagaadan Yihoowawu haarettanawu ixxidaageeti merinawu xayanaagaa bessiyaaba. w21.09 18-19 ¶17-18

Neeni siiqiyo uri bohettido gishshawu wozanan keehi azzanay? Gidoppe attin, gubaaꞌiyan deꞌiya amaridaageeti hanotay neeyyo yaa iitanaadan oottiyaabaa haasayiyaakko neeni waatana danddayay? Ubba asay muletoo likkebaa haasayana giidi nuuni qoppana danddayokko. (Yaaq. 3:2) Nuuni nagaranchcha gidiyo gishshawu, issoti issoti woyganaakko erana xayikko, woy eti qoppennan haasayiyoobay nena qohikko garamettoppa. Kiitettida PHawuloosi yootido zoriyaa hassaya: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago.” (Qol. 3:13) Ammanettida so asaa ubbatoo maadda. Awudeegaappenne aaruwan haꞌꞌi etawu ne siiqoynne minttettoy koshshees. (Ibr. 10:24, 25) Bohettida uraa so asaakka bohettidabadan qoppidi gubaaꞌiyan deꞌiya amaridaageeti eta haasayissennaagaa issi issitoo eti akeekidosona. Nuuni etawu hegaadan siyettanaadan koyokko! Yelidaageeti Yihoowawu haggaaziyoogaa aggido yelagata nuuni galatananne minttettana koshshees. w21.09 29 ¶13-14; 30 ¶16

Cimida urinne yelaga uri issippe haasayiyo wode, naaꞌꞌaykka minettoosona. (Roo. 1:12) Yelagatoo, Yihooway ba asawu koshshiyaabaa kunttiyoogaakka intte loytti akeekana; qassi cimidaagee bonchchettidabadan qoppana. I Yihooway bana waati anjjidaakko neeyyo yootiyoogan ufayttana. Cimiyo wode asatettaa puulay xayiyaaba gidikkonne, Yihoowawu ammanettiyaageeti puulaa yaa gujji gujji boosona. (1 Tas. 1:2, 3) Hegee tuma giyoy aybissee? Daro layttatu giddon, Xoossaa ayyaanay banttana loohissanaadan eti eeno giido gishshataassanne loꞌꞌo eeshshati deꞌiyoogeeta gidanaadan eta maaddido gishshataassa. Cimida alꞌꞌo ishanttanne michchontta nuuni loyttidi eriyo wode, eta bonchchoos, etappe tamaaroos, qassi kaseegaappe aaruwan eta keehi alꞌꞌobadan xeelloos! Yelagati cimata nashshiyo wodenne cimati yelagata nashshiyo wode gubaaꞌee minni minni bees. w21.09 7 ¶15-18

“Nuuni meqettaa iita gidennaadan ubbatoo naagettana koshshees, qassi “maarotettai daro” gidido nu Xoossaa milatanawu baaxetana koshshees. (Efi. 2:4) Maariyaageeta gidikko, haratussi qarettiyoogaappe aarobaa oottoos. Maariya asay harata maaddiyaabaa oottees. Yaatiyo gishshawu, nuuni ubbay nu son, nu gubaaꞌiyaaninne nu heeran maadoy koshshiyoogeeta koyana danddayoos. Maarotettaa bessana danddayiyo daro injjeti deꞌoosona! Nuuni minttettana danddayiyo metootida uri deꞌii? Geella qumaa efiiyoogan woy issi issibaa oottiyoogan maaddana danddayiyoo? Bohetti simmida Kiristtaaniyawu A minttettiya loꞌꞌo lagge koshshii? Minttettiya mishiraachchuwaa haratussi yootana danddayiyoo? (Iyy. 29:12, 13; Roo. 10:14, 15; Yaaq. 1:27) Issi urawu hegaa malabay koshshiyoogaa akeekikko, nu yuushuwan deꞌiya ubbawu nuuni maarotaa bessiyo injje hanotay deꞌiyoogaa eroos. Nuuni maarotettaa bessikko, ‘maarotettay kumidoogaa’ gidida saluwan deꞌiya nu Aawaa keehi ufayssoos! w21.10 13 ¶20-22

Daawiti Mazamure 23​n keehi koshshiyaabata, hegeekka I Yihoowa ba Henttanchchaadan xeellido gishshawu Yihooway awu immido loꞌꞌobata yootiis. Yihooway A “xillotettaa ogiyan” kaalettees, qassi loꞌꞌo wodetuuninne iita wodetun I Daawita ubbatoo maaddees. Daawiti Yihoowa “aaca qooruwan” deꞌikkonne bana metoy gakkanaagaa I erees. I “haiquwaa milatiya xumaa giddoora” biido gishshawunne ayyo morkketi deꞌiyo gishshawu, I issi issitoo hidootaa qanxxennan waayi aggana. SHin Yihooway A Henttanchchaa gidiyo gishshawu ‘iitabawu yayyibeenna.’ Daawitawu ‘aybinne paccibeennay’ ayba ogiyaanee? I Yihoowaara dabbotido dabbotaa naagidi deꞌanawu koshshiya ubbabay awu deꞌees. A ufayssay assi deꞌiyaabaara gayttidaba gidenna. Daawiti Yihooway immidoban ufayttidi deꞌiis. Yihooway A anjjidoogaanne naagidoogaa I xoqqu ootti xeelliis. Nuuni aquwaa bessiyaagaadan xeelliyoogee keehippe koshshiyaaba gidiyoogaa Daawiti yootidobaappe akeekana danddayoos. w22.01 3-4 ¶5-7

Asi deꞌido wode ubban, Yihoowa ashkkaratuppe daroti siyanawu koyenna asawu sabbakidosona. Leemisuwawu, Nohee 40 woy 50 gidiya layttawu ‘xillotettaabaa yootiis.’ (2 PHe. 2:5) Nohee I yootiyoobaa asay siyana giidi qoppidoogee qoncce, shin eti siyanaagaa Yihooway yootibeenna. Nohee markkabiyaa keexxanaadan Xoossay azazido wode, hagaadan giis: “Neeni ne keettaayyiyo, ne attuma naatanne ne attuma naatu maccaasata nenaara ekkada markkabiyaa giddo gelana.” (Doo. 6:18) Qassi Yihooway Nohee ay keena markkabiyaa keexxanaakko yootido wode, Nohee daro asay I yootiyoobaa siyennaagaa akeekennan waayi aggana; ayssi giikko, he markkabee asa ubbawu gidenna. (Doo. 6:15) Nu eriyoogaadan, Nohee yootiyoobaa issi urinne siyibeenna. (Doo. 7:7) Nohee loytti sabbakibeennabadan Yihooway qoppidee? Hegaadan mulekka qoppibeenna! Nohee ubbabaakka Yihooway azazidoogaadan oottido gishshawu, Yihooway an keehi ufayttiis.—Doo. 6:22. w21.10 26 ¶10-11

Naaꞌooma hegaadan haasayiyoogaa siyido wode, Urutissi aybi siyettidaakko qoppa! Uruta Naaꞌoomo maaddanawu bawu danddayettida ubbabaa oottaasu. Uruta iraa yeekkaasu, O minttettaasunne daro gallassaa iraa hemettaasu. He ubbabay deꞌishinkka Naaꞌooma hagaadan gaasu: “GODAI tana mela zaariis.” Uruta he wode Naaꞌoomippe shaahettabeennaba gidikkonne Naaꞌooma haasayidobay Uruti maaduwaa A nashshabeennaagaa bessees. Hegee Uruta keehi azzananaadan oottennan aggenna! SHin A Naaꞌoomippe shaahettabeykku. (Uru. 1:3-18) Ha wodiyan, unꞌꞌettida issi michchiyo maaddanawu nuuni darobaa oottikkonne nuna qohiyaabaa A haasayana danddayaawusu. SHin yiillotennan agganawu baaxetoos. Maadoy koshshiyo nu michchiyo aggennan maaddoos, qassi O minttettiyo ogiyaa demmana mala Yihooway nuna maaddanaadan woossoos. (Lee. 17:17) Maadoy koshshiyo issi michchiyaa nu maaduwaa ekkanawu koyro koyennan aggana danddayawusu. Gidikkonne, aggenna siiqoy nuuni O maaddanawu nuussi danddayettida ubbabaa oottanaadan denttettana—Gal. 6:2. w21.11 11 ¶17-19

Geeshsha Maxaafan “geeshshatettaa” geetettida qaalay kandduwaaninne haymaanootiyaara gayttidaban geeshsha gidiyoogaa qonccissees. Xoossawu haggaazanawu dummatiyoogaakka he qaalay qonccissana danddayees. Qassi nuuni kandduwan geeshsha gidikko, Yihoowa ufayssiya ogiyan goynnikko, qassi awu mata dabbo gididi deꞌikko nuuni geeshsha. Nuuni nagaranchcha gidikkonne, keehi geeshsha gidida Yihooway nuuni ayyo mata dabbo gidanaadan I koyiyoogan maalaalettoos. Yihooway ubbaban geeshsha. Yihoowa araataa matan deꞌiya suraafeelati woy kiitanchchati yootidobay hegaa qonccissees. Etappe amaridaageeti hagaadan giidosona: “Geeshshai, geeshshai, geeshshai Ubbaappe Wolqqaama GODAATTENNEE!” (Isi. 6:3) He kiitanchchatussi geeshsha gidida Xoossaara mino dabbotettay deꞌiyo gishshawu eti geeshsha. w21.12 3 ¶4-5

Darotoo yelagati bantta deꞌuwan waati loꞌꞌobaa oottanaakko qoppoosona. Issi ginan, asttamaaretinne Yihoowa Markka gidenna so asay eti xoqqa timirttiyaa tamaaridi loꞌꞌo oosuwaa oyqqanaadaaninne duretanaadan zorana danddayoosona. He timirttiyaa tamaaranawu etawu daro wodee koshshana danddayees. SHin, yelagatu aawati, aayetinne gubaaꞌiyan deꞌiya eta laggeti eti bantta deꞌuwan Yihoowawu haggaazanaadan zorana danddayoosona. Yihoowa siiqiya yelagay loꞌꞌobaa kuuyanaadan aybi maaddanee? Efisoona 5:15-17 nabbabidi hegaa loytti qoppiyoogee A maaddana danddayees. Issi yelagay ha xiqiseta nabbabidi bana hagaadan oychchana danddayees: ‘Yihooway “koyiyoobai” aybee? Taani ay kuuyiyaakko Yihooway ufayttanee? Ta wodiyan keehi loꞌꞌobaa oottanawu taani ay kuuyiyoogee maaddanee?’ “Wodee iita” gidiyoogaanne Seexaanay haariyo alamee mati xayanaagaa hassaya. w22.01 27 ¶5

Yaaqoobi Yesuusa ammanettidi kaalliyaagaa gididoy awudee? Yesuusi hayquwaappe denddi simmidi, “Yaaqoobassi qoncciis; guyyeppe ba kiittido ubbatussi, qoncciis.” (1 Qor. 15:7) Yaaqoobi Yesuusaara gaytti simmidi I erissiyo ashkkara gidiis. Kiitettidaageeti Yerusalaamen deꞌiya issi pooqiyan geeshsha ayyaanaa ekkanawu naagiyo wode Yaaqoobikka yan deꞌees. (Oos. 1:13, 14) Guyyeppe, Yaaqoobi bolla gididi heemmiyaagaa yara gididi haggaaziis. (Oos. 15:6, 13-22; Gal. 2:9) Qassi 62 M.Lppe, guutta kasetidi ayyaanay kaalettin tiyettida Kiristtaanetussi dabddaabbiyaa I xaafiis. Nu hidootay saluwan woy saꞌan gidin ha wodiyan he dabddaabbee nuna maaddees. (Yaaq. 1:1) Ayhuda Qeese Ubbatu Halaqaa Haanna naꞌay Hanaanee azazin Yaaqooba woridoogaa Ayhudatu taarikiyaa eranchchay Josefesi xaafiis. Yaaqoobi saꞌaa deꞌuwaa wurssana gakkanaashin Yihoowawu ammanettidi deꞌiis. w22.01 8 ¶3; 9 ¶5

Hachchi gallassaa xiqisiyaappe nuuni tamaariyoobaappe issoy nu ammanuwaa paacciya metotuppe Yihooway nuna naagees giidi qoppana koshshennaagaa. Yesuusi wurssettay gakkanaashin paacettidoogaadan, nuunikka koshshikko hayqqana gakkanaassi ammanettidaageeta gidanawu giigi uttana bessees. (Maa. 16:24, 25) Gidoppe attin, nuuni danddayiyoogaappe aaruwan paacettanaadan Xoossay eeno geennaagaa ammanettoos. (1 Qor. 10:13) Harabaakka tamaaroos; nuuni aynne moorana xayikkokka, Yesuusaagaadan waayettana danddayoos. (1 PHe. 2:19, 20) Nuna eqettiyaageeti nuuni mooridobi deꞌiina gidennan, nuuni alamiyaa bagga gidenna gishshawunne tumaa markkattiyo gishshawu eqettoosona. (Yoh. 17:14; 1 PHe. 4:15, 16) Yesuusi I waayettanaadan Yihooway eeno giidoy aybissakko akeekiis. SHin ammanettidi goynniyaanne waayee gakkiyo harati Yihooway issi issibay gakkanaadan eeno giidoy aybissakko akeekanawu issi issitoo metootoosona. (Ibr. 1:3) Maariyaanne danddayiya nu Xoossay etawu ammanoy paccibeennaagaa erees. A xalaalay immana danddayiyo minttettoy etawu koshshees.—2 Qor. 1:3, 4. w21.04 11 ¶9-10

Nuuni Yihoowa sheniyaa oottanawu baaxetikko, qassi A siiqikkonne bonchchikko I goynuwan ufayttana. Nuuni Yihoowawu goynoy bessiyoogaa eroos, qassi keehi loꞌꞌo ogiyan awu goynnana koyoos. Nuuni Yihoowa woossiyo wode hegee awu goynniyo issi oge. Xoossaa Dunkkaaniyaaninne guyyeppe beeta maqidasiyan shiiqida loytti giigissido ixaanaara Geeshsha Maxaafay nu woosaa geeddarssees. He ixaanan Xoossay ufayttiis. Hegaadankka, nuuni akeekanawu metenna qaalata goꞌettikkonne, wozanappe nu woossiyo woosay A “ufaissees.” (Lee. 15:8; Zaa. 33:10) Nuuni A siiqiyoogaanne galatiyoogaa qonccissiyo wode Yihooway siyidi ufayttees. Nuuni nuna qofissiyaabaa, nu hidootaanne nuuni koyiyoobaa awu yootanaadan I koyees. Neeni woosan Yihoowa haasayissanaappe kase, woossanaabaa loyttada qoppiyoogee loꞌꞌo. Yaatiyoogan, neeni saluwan deꞌiya ne Aawawu keehi loꞌꞌo “ixaanaa” shiishshana. w22.03 20 ¶2; 21 ¶7

Armmageedoona olaa wode, Yihoowa maarotay oossi bessiyaakko, qassi oossi bessennaakko kuuyiyay nuna gidokko. (Maa. 25:34, 41, 46) Nuuni Yihooway kuuyiyoobaa ammanettanee, woy I kuuyiyoobaa nuuni maayettenna gishshawu awu haggaaziyoogaa agganee? Nuuni sinttappe Yihoowan loytti ammanettana mala ha wodiyan an mintti ammanettana koshshiyoogee qoncce. Xoossay ehiyo ooratta alamiyan nuussi aybi siyettanaakko qoppa. Worddo haymaanootee xayana, qassi yaaretiya zalꞌꞌanchchati woy asi deꞌido wode ubban naaquwaa gattidanne asay tuggatanaadan oottida kawotettati deꞌokkona. Sahoynne cimatettay deꞌenna, qassi nuuni siiqiyoogeeti hayqqokkona. Seexaanaynne daydanttati shaꞌu layttawu qashettana. Eti makkalidoogaa gaasuwan gakkida iitaba ubbay xayana. (Ajj. 20:2, 3) Nuuni Yihooway ubbatoo suurebaa oottiyoogaa ammanettiyoogan he wode keehi galatiyaageeta gidana! w22.02 6-7 ¶16-17

Yesuusi saruwan deꞌiis; qassi harati sigettanaadan minttettiis. Eti Yihooway bantta goynuwan ufayttanaadan koyikko, bantta ishanttuura sigettana koshshiyoogaa I eta tamaarissiis. (Maa. 5:23, 24) Qassi kiitettidaageeti bantta giddon ubbaappe ooni gitakko palamettiyoogaa agganaadan Yesuusi eta darotoo maaddiis. (Luq. 9:46-48; 22:24-27) Nuuni sigettiyaageeta gidanawu, ooshshay merettennaadan naagettiyoogaappe aarobaa oottana koshshees. Nuuni sigettanawunne nu ishanttinne michchontti bantta giddon merettidabaa giigissanaadan minttettanawu baaxetana koshshees. (Pili. 4:2, 3; Yaaq. 3:17, 18) Nuuni nuna hagaadan oychchana danddayoos: ‘Taani haratuura sigettanawu ay agga bayanawu eeno giyaanaa? Issi ishay woy michchiyaa tana azzanttiyo wode, taani uluwan lancciyaa oyqqiyaanaa? Hara uri tanaara sigettanaashin naagiyaanaayye, metuwawu gaasoy hara uraa gaada taani qoppikkonne, kasetada sigettiyaanaa? w22.03 10 ¶10-11

Xoossaa asay Yesuusa kaaletuwaa kaallidi Yihoowawu oottanawu bantta dosan ‘eeno gaanaagaa’ Geeshsha Maxaafay kasetidi yootiis. (Maz. 110:3) He hiraagay ha wodiyan tumuppe polettiiddi deꞌees. Layttan layttan, Yihoowa ashkkarati sabbakiyo oosuwaa daro xeetu miilooniyan qoodettiya saatiyawu minnidi oottoosona. He oosuwaa oottanawu etawu miishshi qanxxettenna, qassi eti hegaa oottanawu koyiyo gishshawu oottoosona. Eti bantta ishantti koshshiyaabaa demmanaadan maaddanawu, eta minttettanawunne eta ammanuwaa minttanawu wodiyaa bazzoosona. Sunttettida ishantti banttawu imettida kifileta giigettiyoogan, qassi bantta ishanttanne michchontta minttettanawu biidi oychchiyoogan daro saatiyaa aattoosona. Yihoowa asay ha ubba oosuwaa oottiyoy aybissee? Eti Yihoowanne asaa siiqiyo gishshataassa. (Maa. 22:37-39) Yesuusi I koyiyoobaappe harati koyiyoobaa kaseyiyoogan nuussi loꞌꞌo leemiso. Nuuni A kottiyaa kaallanawu nuussi danddayettida ubbabaa oottanawu baaxetoos. (Roo. 15:1-3) A leemisuwaa kaalliyaageeti goꞌettana. w22.02 20 ¶1-2

Israaꞌeela biittan daro asay goshshanchcha; qassi keraa oottiyaageetu damoozay he gallassi qanxxettana koshshees. Issi oosanchchawu he gallassa damoozay qanxxettana xayikko, he gallassan ba soo asaa mizanawu koshshiyaabaa demmana danddayeenna. Yihooway hagaadan giis: “I metootanchcha gidiyo gishshawu A deꞌuwawu damoozay koshshees.” (Zaa. 24:14, 15, NW; Maa. 20:8) Ha wodiyan daro oosanchchatussi damoozay galla galla gidennan, aginan issitoo woy naaꞌꞌutoo qanxxettees. SHin, Wogaabaa 19:13n deꞌiya maaray ha wodiyankka oottees. Ootissiya issoti issoti bantta oosanchchatussi koshshiyaabaappe keehi guutta miishshaa qanxxiyoogan eta qohoosona. He oosanchchatussi qanxxettiya miishshay keehi guutta gidikkonne, azzaniiddikka oottiyoogaa aggennaagaa eti eroosona. Hegaa giyoogee, ootissiya hegaa mala asati ‘keraa oottiya bitaniyaa damoozaa diggoosona’ giyoogaa. Hara asata ootissiya issi Kiristtaanee ba oosanchchatussi I likkebaa oottiyaakkonne shaakkana bessees. w21.12 10 ¶9-10

Yesuusi waayetti simmidi, saamettanaagee qoncce. Saamuwaa alanawu ayyo maadoy koshshiis. Yesuusi bawu siyettiyaabaa yootiyoogee bala giidi qoppibeenna; nuunikka nuussi siyettiyaabaa yootana koshshees. Nuuppe amaridaageeti harati maaddanadan oychchanawu waayi dosana. SHin nuussi maaduwaa koshshikko, harati maaddanaadan oychchanawu mammottana koshshenna. Leemisuwawu, nuuni cimikko woy sahettikko, koshshiyaabaa shammanawu woy aakimee keerido gallassi aakime keetti issi ishay nuna efaanaadan oychchana danddayoos. Nuuni hidootaa qanxxikko, ‘shonggaara deꞌiya haasayaa’ haasayiyoogan nuna minttettanaadan gubaaꞌe cimaa woy hara kayma Kiristtaane laggiyaa oychchiyoogee koshshana danddayees. (Lee. 12:25) Nu ishanttinne michchontti nuna siiqiyoogaanne “metuwaa wode” nuna maaddanawu koyiyoogaa hassayiyaageeta gidoos. (Lee. 17:17) SHin nuuni ay qoppiyaakko eti erana danddayokkona. Nuuni yootennan eti nuussi koshshiyaabaa erana danddayokkona. w21.04 11-12 ¶11-12

Nu hanotay laamettiyoogee nuuppe darotussi deexxiyaaba. Daro layttawu Yihoowawu haggaazida misoonaawetuppe, keexuwaa oosuwan, Beeteelen woy hara ogetun oottiyaageetuppe amaridaageetu hanotay laamettiis. Harati qassi keehi dosiyo bantta haggaazo maataa cimatettaa gaasuwan aggana koshshiis. Hegaadan nu hanotay laamettiyo wode, nuuni azzaniyoogee wottin deꞌiyaaba. Nuuni hanotaa Yihoowaagaadan xeellikko, laamettidabaa maayoos. I ha wodiyan gitabaa oottiiddi deꞌees, qassi aara issippe oottiyo gita maatay nuussi deꞌees. (1 Qor. 3:9) Yihooway nuna siiqiyo siiqoy laamettenna. Hegaa gishshawu, dirijjitiyan laamettiyaabay ne hanotaara gayttidaba gidikko, laamettanaadan gaaso gidida ubbabaa qoppiyoogan daro wodiyaa wurssoppa. Neeni ‘kase aadhdhida wodiyaa’ amottiyoogaappe, laamettidabay demissido loꞌꞌobaa akeekanaadan Yihooway nena maaddana mala woossa. (Era. 7:10) Neeni oottana danddayennabaa qoppiyoogaappe, oottana danddayiyoobaa qoppa. Ubbatoo loꞌꞌobaa qoppa. Yaatikko, nu hanotay laamettiyo wodekka ufayttidinne ammanettidi deꞌana. w22.03 17 ¶11-12

Yihooway aggenna siiquwaa oossi bessii? Nuuni darobaa siiqana woy dosana danddayiyoogaa Geeshsha Maxaafay yootees; hegeetuppe amaridaageeti “goshshaa,” ‘woyne eessaanne zaytiyaa,’ ‘seeraa,’ “eratettaa,” qassi “aadhdhida eraa.” (2 Odi. 26:10; Lee. 12:1; 21:17; 29:3) SHin aggenna siiqoy harabawu mule bessiyooba gidenna; hegee asa xallawu bessiyooba. Gidoppe attin, Yihooway aggenna siiquwaa ubba asawu bessenna. I hegaa ba mata dabbotussi bessees. Nu Xoossay ba dabbotussi ammanettees. I etawu loꞌꞌobaa halchcheesinne eta siiqiyoogaa mule aggenna. Yihooway asa ubbawu siiquwaa bessiis. Niqoodimoosa giyo issi bitaniyawu Yesuusi hagaadan giis: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa [asaa] keehi siiqido gishshau, ba mexi issi Na7aa immiis.”—Yoh. 3:1, 16; Maa. 5:44, 45. w21.11 2 ¶3; 3 ¶6-7

Ha iita alamiyan deꞌoy metiyo gishshawu, keehi deexobaa nuuni genccana koshshennan waayi aggana. (Maa. 24:21) Ha meto ubbay attin, nuuni eta dogiyo wodiyaanne zaarettidi hegaa malabay mule deꞌenna wodiyaa yeemuwan naagoos! (Isi. 65:16, 17) Yaatiyo gishshawu, loytti genccanawu nuuni ubbatoo tamaarana koshshees. Aybissi? Yesuusi genccan woy “danddayan intte intte shemppuwaa ashshana” giido gishshataassa. (Luq. 21:19) Nuugaa mala metuwaa harati waati gencciyaakko nuuni yuushshi qoppikko, loytti gencciyaageeta gidana. Gencciyoogan keehi loꞌꞌo leemiso gidiyaagee oonee? Xoossaa Yihoowa. He zaaruwan neeni maalaalettennan waayi aggana. Hegaabaa neeni hanno gakkanawu loytta qoppennan aggakka. Ha iita alamiyaa Dabloosi haariyo gishshawu, alamiyan metoy kumiis. Ha metota awudenne xayssanawu Yihoowawu wolqqay deꞌiyaaba gidikkonne, I hegaa sinttappe oottanawu naagees. (Roo. 9:22) Qassi ha iita alamiyaa xayssiyo wodee gakkanaashin nu Xoossay ubbatoo genccees. w21.07 8 ¶2-4