Geeshsha Maxaafay Tamaarissiyoobay Ay Wodenne Aadhdhida Eratetta

ANE HAGAA QOPPA: Neeni beni wodiyaa hawulttee kumido muuzemiyaa yuuyada beꞌiyaabadan qoppa. Etappe daroy gaarettiis, tasiis, qassi meetettiis. Amaridaageeti keehi boroshettidosona. SHin issoy aynne moorettibeenna; hegee makkisetti giigido hanotay ubbay qoncce. Nena bessiyaagaa, “Hagee haratuppe mati oosettabee?” gaada oychchaasa. I, “CHii, hegee darotuppe kasetees; qassi mule ooraxxibeenna” yaagees. “Yaatin, moorettennaadan naagetti uttidee?” yaagaasa. I qassi, “Akkay, hagee haratuppe aaruwan iraa awaa ekkiis. Qassi iita asati daroti A mooranawu malidosona” yaagees. Neeni maalaalettada, ‘Hagee aybippe merettidee?’ gaada qoppana danddayaasa.

Geeshsha Maxaafay he maalaalissiya hawulttiyaa mala. I darotuppe kase xaafettida, keehi gamꞌꞌida maxaafa. Beni wode xaafettida hara maxaafati deꞌiyoogee tuma. SHin meetettida beni hawulttetuugaadan, beni xaafettida darobay gamꞌꞌidi keehi moorettiis. Leemisuwawu, saynisiyaara gayttidaagan he xuufetu qofay mati erettida, naqaashi deꞌiyoobaappe keehi dummatees. Akkamuwaara gayttidaagan eti yootiyoobay darotoo maaddiyaaba gidennan qohiyaaba. Qassi beni xaafettida darobaappe shaahoy xayin woy keehi moorettin duuxeretti attidaba xallay deꞌees.

SHin Geeshsha Maxaafay hegeetuppe keehi dummatees. I xaafettiyoogaa doommidoy 3,500 layttappe kase gidikkonne, aynne laamettibeenna. Daro xeetu layttaa giddon asay A xuuggiiddi, teqqiiddinne toochchiiddi keehi qohikkokka, Geeshsha Maxaafaa qofay mule laamettibeenna. Mati eridobaara geeddarssiyo wode, Geeshsha Maxaafay beni attiichchidaba gidenna; ubba I kasetidi yootiyoobay maalaaliyaaba.—“Attiichchidabeeyye Kasetidi Qonccissiyaabee?” giyo saaxiniyaa xeella.

HA WODIYAN NUUSSI KOSHSHIYA MAARATA

Gidikkokka, ‘Geeshsha Maxaafay tamaarissiyoobay ha wodiyan maaddii?’ gaada qoppana danddayaasa. Hegaa zaaranawu, ‘Ha wodiyan asaa keehi qohiya metoti awugeetee? Keehi yashshiya metoti shin?’ gaada nena oychcha. Olaa, hambbalaashuwaa, danuwaa woy balibakkuwaa qoppana danddayaasa. Geeshsha Maxaafay tamaarissiyo issi issi maaraa ane pilggoos. Yaatiyo wode, ‘Asay he maarata kaalliyaakko, saꞌay deꞌanawu injje soho gidenneeshsha?’ gaada nena oychcha.

SAROTETTAA DOSIYOOGAA

“Asa sigettiyaageeti anjjettidaageeta; aissi giikko, Xoossai eta, ba naata giidi xeesana.” (Maatiyoosa 5:9) “Asa ubbaara sarotettan de7anau, intte baggaara, intteyyo danddayettidabaa ubbaa oottite.”—Roome 12:18.

MAAROTAA, ATTO GIYOOGAA

“Maariyaageeti anjjettidaageeta; aissi giikko, Xoossai eta maarana.” (Maatiyoosa 5:7) “Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite”—Efisoona 4:32.

ZARIYAN SHAAHETTENNAN ISSIPPETETTAN DEꞌIYOOGAA

“Xoossai asa zare ubbaa issi uraappe medhdhidi, biitta ubban wottiis.” (Oosuwaa 17:26) “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa” galatees.—Oosuwaa 10:34, 35.

SAꞌAA BONCHCHUWAN OYQQIYOOGAA

“Bitanee Edene Gannatiyaa oottana malanne naagana mala, GODAI Xoossai a efiidi wottiis.” (Doomettaabaa 2:15) ‘Xoossay saꞌaa xayssiyaageeta xayssana.’—Ajjuutaa 11:18.

YAARIYAANNE SHORI BAYNNABAA IXXIYOOGAA

“Asassi daro miishshai de7ikkokka, a shemppoi he duretettan de7enna gishshau naagettite; duretetta amo ubbaappekka inttena naagite.” (Luqaasa 12:15) “Geeshshatuyyo bessiyaagaadan, intte giddon shaaramuxiyoogeenne tunatetta ubbai, woi miishsha amottiyoogee mulekka siyettoppo.”—Efisoona 5:3.

LOꞌꞌOBAA OOTTIYOOGAA, MINNI OOTTIYOOGAA

“Nuuni ubba wode lo77obaa oottanau” koyoos. (Ibraawe 13:18) ‘Wuuqqiya uray hagaappe sinttawu wuuqqoppo; shin hegaa aggidi, daafuridi ootto.’—Efisoona 4:28.

MAADOY KOSHSHIYOOGEETA MAADDIYOOGAA

“Yayyiyaageeta minttettite. Wolqqi bainnaageeta maaddite. Asa ubbaa danddayite.” (1 Tasalonqqe 5:14) “Aaya aawi bainna naatanne waayettiya am77eta” maaddite.—Yaaqooba 1:27.

Geeshsha Maxaafay he maaratu xallaa yootenna. SHin nuuni he maarata nashshidi, galla galla waati oosuwan peeshshanaakkokka tamaarissees. Daro asay he maarata oosuwan peeshshiyaakko, alamiyan metoy ha wodiyaagaa keenaa darenna. Yaatiyo gishshawu, Geeshsha Maxaafaa maaray ha wodiyan awudeegaappenne aaruwan koshshiyaabanne maaddiyaaba! SHin Geeshsha Maxaafay tamaarissiyoobay ha wodiyan nena waati maaddii?

GEESHSHA MAXAAFAA TIMIRTTETI HA WODIYAN NENA WAATI MAADDANA DANDDAYIYOONAA?

Asa ubbaappe aadhdhida eranchchay issi wode, “Aadhdhida eratettai ba oosuwan [woykko ayfiyan] tuma gididi beettees” yaagiis. (Maatiyoosa 11:19) He qofaa maayikkii? Aadhdhida eratettaa paacci beꞌiyoy oosuwan peeshshin beettiyaabaana. Hegaa gishshawu, ‘Geeshsha Maxaafay tumuppe maaddiyaaba gidikko, a goꞌettin ta deꞌuwan ayfee beettana koshshennee? Haꞌꞌi tana gakkiya metuwan hegee waati maaddii?’ gaada qoppana danddayaasa. Ane issi leemisuwaa beꞌa.

Delfiinaa kase balꞌꞌanna, ufayssiyaanne oosoy kumido deꞌo deꞌaasu. SHin, akeekennan azzanttiya darobay bolli bollan O gakkiis. I geelaꞌo naꞌiyaa hayqqaasu. I aqo deꞌoy laalettiis. I aqoykka xayiis. A hagaadan gaasu: “Tawu naꞌi, azini, qassi keetti xayin, ta kase deꞌoy ta kahaappe geemmiis. Tawu aannisi baa; minotetti baa; hidootikka baa; ta deꞌoy hada gaada qoppaas.”

Ha xiqisiyaa qofay Delfiiniyyo kase hegaadan keehi qonccibeenna: “Nu de7uwaa laittai laappun tamma; woi minnikko, hosppun tamma; hegeekka metonne tugga. Nu laittai eesuwan aadhdhees; nuunikka eesuwan kichchoos.”—Mazamure 90:10.

He wayssiya wodiyan Geeshsha Maxaafay Delfiino maaddiis. Geeshsha Maxaafay O maaddido ogee maalaalees. Kaalliya heezzu huuphe yohoti bessiyoogaadan, Geeshsha Maxaafaa maaraa kaalliyoogee metuwaappe kiyanawu banttana maaddidoogaa hara darotikka akeekidosona. Eti Geeshsha Maxaafay doomettan odettida hawulttiyaa mala gidiyoogaa shaakkidosona. Geeshsha Maxaafay wodiyaara aadhdhiya hara daro maxaafatu mala gidenna. Hegee Geeshsha Maxaafay dummabaappe oosettidaba mala gidiyo gishshataassee? Asa qofa gidennan, Xoossaa qofay an deꞌanddee?—1 Tasalonqqe 2:13.

Asa baree qanttanne metuwan kumidaagaa gidiyoogaa neenikka akeekennan aggakka. Metoy cuulliyo wode, minttettuwaa, maaduwaanne ammanttiya zoriyaa awuppe demmiyoo?

Geeshsha Maxaafay nu deꞌuwan nuna maaddiyo ogetuppe anotiya heezzata ane beꞌoos. Geeshsha Maxaafaappe kaallidi deꞌiyaabaa tamaarana danddayaasa:

Ha heezzubata kaalliya huuphe yohotun beꞌana.