3 Metuwan Genccanawu Maaddiyaabaa

CADDI OYQQIYA HARGGIYAA

Roza, “Ta bolla giddon meretan maara oottennabaa gaasuwan tana ubbatoo keehi sakkees. Ta deꞌoy tana iitees” yaagaasu. O keehi qofissiya issibay Geeshsha Maxaafaappe xannaꞌiyoobaanne ayyaanaabaa A issi issitoo loytta qoppana danddayennaagaa. SHin “Xoossau ubbabai danddayettees” giya, Yesuusi yootido, Maatiyoosa 19:26n deꞌiya qofay O keehi maadiis. Roza xannaꞌiyo dumma dumma ogee deꞌiyoogaa akeekaasu. I sahoy A issi issitoo nabbabennaadan diggiyo gishshawu, Geeshsha Maxaafaanne A qofay deꞌiyo xuufeta duuqqidoogaa siyawusu.a A, “Hegee baynnaakko, ayyaanaaban waana minna deꞌanaakko erikke” yaagaasu.

Kase oottiyoobaa oottana danddayennaagee Rozo azzanttiyo wode, 2 Qoronttoosa 8:12n deꞌiya ha qofay O minttettees: “Issi urai Xoossau immanau keehi amottikko, Xoossai au de7ida keenaa ekkanaappe attin, au bainnabaa appe ekkenna.” Roza bawu danddayettida ubbabaa oottiyo gishshawu, Xoossay A oottiyooban ufayttiyoogaa hassayanaadan he qofay O maaddees.

KAYYUWAA

Hagaappe kase ibaa denttido Delfiina hagaadan gaasu: “Ta 18-laytta naꞌiyaa hayqqin keehi azzanido gishshawu, taani paxa deꞌana gaada qoppabeykke. Ubbabay laamettiis.” SHin mazamuraawee Xoossawu yootido, Mazamure 94:19n deꞌiya ha qofay O minttettiis: “Tana hirggai woriyo wode, neeni tana woppu oottada ufaissaasa.” A, “Ta kayyuwaappe tana woppissiyaabaa ay oottanaakko akeekanaadan tana maaddana mala Yihoowa woossaas” yaagaasu.

A keehi ufayssiyaabaa ba dosan oottiyoogaa doommaasu. Guyyeppe, A naati misiliyaa qalamiyaa tiyiyo irssaasiyaa mala gidiyoogaa yootaasu; hegee meqqidikka tiyanawu maaddees. Hegaadan, A meqqidabadan bana xeellikkokka, harata maaddana danddayiyoogaa akeekaasu. A hagaadan gaasu: “Taani tamaarissiyoogeeta minttettanawu Geeshsha Maxaafaa maaraanne qofaa goꞌettiyo wode, hegee Yihooway tana woppissiyoonne minttettiyo oge gidiyoogaa akeekaas.” A Geeshsha Maxaafan etabay odettido, keehi azzaniiddi daro takkida asata xaafa oyqqaasu. A, “eti ubbaykka woosan genccida asa” gidiyoogaa akeekasu. A “issi uri Geeshsha Maxaafaa nabbabiyoogaa xallan minettiyoogaakka” eraasu.

Geeshsha Maxaafaa xannaꞌiyoogee Delfiino haraban, hegeekka, kasebaa qoppiyoogaappe sinttanaabaa qoppanaadan maaddiis. Oosuwaa 24:15n deꞌiya, “Worddoikka xilloikka haiquwaappe denddana” giya hidootay O minttettees. A ba naꞌiyo Yihooway denttanaagaa ay keena ammanettay? A hagaadan gawusu: “Sinttappe ta naꞌiyaa deꞌana wodee tawu qoncci beettees. Yihooway keerido, nuuni zaaretti gayttana gallassay tawu beettees. A yeletto gallassi taani O beꞌada siiqidoogaadan, nu daarinchchan iira issippe kaaꞌiyoogeekka tawu beettees.”