Geeshsha Maxaafaanne Ne Sinttanaa Deꞌuwaa

NEENI issi galla qammi xuman ogiyan hemettiyaabadan qoppa. Away wulloosappe takkikkokka, pozhzhattiya baatiriyaa oyqqido gishshawu, ogiyaappe deshays gaada qoppakka. Duge xommppiyo wode, ne sinttan deꞌiyaabay neeyyo qoncci beettees. Qassi sinttawu xomppiyo wode, wolqqaama pooꞌoy haahuwan deꞌiyaabaa bessees.

Amarida ogiyan, Geeshsha Maxaafay he baatiriyaa mala. Hagaappe kasetiya huuphe yohotun beꞌidoogaadan, ha ammanttenna alamiyan galla galla nuna gakkiya, nu sinttan deꞌiyaabaa mala metuwawu Xoossaa Qaalay maaddees. SHin Geeshsha Maxaafay maaddiyoy hegaa xallaana gidenna. Nuuni ufayttidinne woppu giidi deꞌiyo ogiyaa akeekanaadan oottiyoogan nu sinttanaa deꞌuwaabaakka loytti qonccissees. (Mazamure 119:105) Waatidi?

Geeshsha Maxaafay nuuni sinttanaabaa hidootanaadan oottiyo naaꞌꞌubaa ane beꞌoos: 1 Ufayssiya loꞌꞌo deꞌuwaa deꞌanaadan oottees, qassi 2 nuna Medhdhidaagaara waanidi merinawu dabbotanaakko tamaarissees.

UFAYSSIYA LOꞌꞌO DEꞌUWAA

Geeshsha Maxaafay nu metuwawu maaddiya ammanttiya zoriyaa yootees; shin I asi bawu maadettana xallawu nabbabiyo maxaafatuppe keehi dumma. Geeshsha Maxaafay nuna qofissiyaaba xallaa qoppiyoogaappe nuuni gita misiliyaa giddon deꞌiyaaba mala oottidi qooppanaadan tamaarissees. Yaatikko, nuuni ufyassiya loꞌꞌo deꞌuwaa deꞌana danddayoos.

Leemisuwawu, “Ekkiyaagaappe immiyaagee anjjettidaagaa” giya Geeshsha Maxaafaa maaraa qoppa. (Oosuwaa 20:35) Neeni metootida uraa maaddido wodiyaa hassayay? Woykko ne laggee ba wozanaabaa yootin loytta ezggido wodiyaa hassayay? Hegaadan issi uraa maaddido gishshawu ufayttabeykkii?

Kushe zaaranaadan qoppennan nuuni issi urawu immiyo wode keehi ufayttoos. Issi xaafee hagaadan giis: “Kushe zaaranaadan qoppennan neeni immikko, immidoogaappe aaruwaa demmiyoogee attenna.” SHin, haratuyyo, ubba qassi kushe zaarana danddyennaageetuyyo immiyo wode, woytuwaa demmoos. Nuuni gita misiliyaa giddon deꞌiyaaba mala gidoos. Ubba hegaadan kehidi immiyoobaa awu talꞌꞌiyoobadan xeelliya Xoossaara issippe oottoos. (Leemiso 19:17) Nuuni hiyyeesawu oottiyoobaa I keehi nashshees; qassi saꞌay gannate gidin merinaa deꞌuwaa immanawu qaalaa geliis; hegee keehi ufayssiya hidoota!—Mazamure 37:29; Luqaasa 14:12-14.a

Ubbaappe aaruwan, nuuni tumu Xoossaa Yihoowawu goynniyoogan ufayssiya loꞌꞌo deꞌuwaa deꞌana danddayiyoogaa Geeshsha Maxaafay tamaarissees. Xoossaa Qaalay nuuni ayyo bessiya sabaanne bonchuwaa immanaadan, qassi ayyo azazettanaadan yootees. (Eranchchaa 12:13; Ajjuutaa 4:11) Yaatiyo wode, nuna Medhdhidaagaa ufayssoos; hegee, qoppiyo wode maalaalissiyaaba. I, “Neeni aadhdhida eranchcha gida. Yaatiyaakko taani [ufayttana]” yaagidi nuna zorees. (Leemiso 27:11) Ane qoppa—nuuni Geeshsha Maxaafaa maaraa kaallidi issibaa kuuyiyo wode, saluwan deꞌiya, siiqiya nu Aawaa ufayssoos. Ayssi giikko, I nuussi qoppees; qassi nuuni A kaaletuwaa kaallidi goꞌettanaadan koyees. (Isiyaasa 48:17, 18) Saluwaa saꞌaa Haariyaagawu goynniyoogaappenne A ufayssiyoogaappe aadhdhiyaabi aybi deꞌii?

NUNA MEDHDHIDAAGAARA DABBOTIYOOGAA

Geeshsha Maxaafay nuuni nuna Medhdhidaagaara dabbotanaadankka tamaarissees. Geeshsha Maxaafay, “Xoossaakko shiiqite; ikka inttekko shiiqana” yaagees. (Yaaqooba 4:8) Nuna medhdhida, Ubbaa Danddayiyaagaara dabbotana danddayettiishsha giidi issi issitoo qoppana danddayoos. SHin nuuni ‘Xoossaa koyikko, A demmanaagaa’ Geeshsha Maxaafay yootees; ayssi giikko, “Xoossai nuuppe ooyyoonne haaho gidenna.” (Oosuwaa 17:27) Geeshsha Maxaafay nuuni Xoossaara dabbotanaadan zoriyoobay sinttanaa deꞌuwawu nuna keehi maaddees. Waatidi?

Hagaa qoppa: Nuuni ay keena baaxetikkonne, wurssetta morkkiyaa hayquwaappe nu wolqqan attana danddayokko. (1 Qoronttoosa 15:26) SHin, Xoossay merinawu deꞌees. I mule hayqqenna; qassi I ba dabbotikka merinawu deꞌanaadan koyees. Yihooway bana koyiyaageetussi immanabaa Geeshsha Maxaafay hagaadan giidi ufayssiyaabaa yootees: “Eti merinau duretana [woykko ufayttidi deꞌana].”—Mazamure 22:26.

Xoossaara waanada hegaadan merinawu dabbotana danddayay? A Qaalaa Geeshsha Maxaafaappe abaa tamaariyoogaa aggoppa. (Yohaannisa 17:3; 2 Ximootiyoosa 3:16) Geeshsha Maxaafaa akeekanaadan nena maaddana mala A woossa. Geeshsha Maxaafay nuuni aadhdhida eratettaa demmanawu ubbatoo ‘Xoossaa woossikko,’ I immanaagaa yootees.b (Yaaqooba 1:5) Wurssettan, Xoossaa Qaalay ‘ne gediyaassi xomppe,’ qassi ‘ne ogiyaassi pooꞌo’ gidana mala, tamaariyoobaa oosuwan peeshshanawu baaxeta.—Mazamure 119:105.