Tumaa Koyiyoogaa
Tumaa eriyoogee shemppuwaa ashshees. Leemisuwawu, asay kaallidi deꞌiya oyshawu zaaruwaa demmido gishshawu waani maadettidaakko qoppa: Asaappe asaa oyqqiya harggee waanidi eesuwan darosaa gakkii?
He oyshaa zaaroy aybakko shaꞌan qoodettiya layttawu asay eribeenna. He wodetun, wurssiya harggee miilooniyan qoodettiya asaa woriis. SHin guyyeppe, saynttistteti he harggee waati oyqqiyaakko tumaa eridosona. Harggiyawu darotoo bakiteeriyaanne bayresiya mala, ayfiyan beettenna jarmeti gaaso gidiyoogaa eti akeekidosona. Hegaabaa tumaa eridoogee asaa harggiyaappe pattanawunne akkamanawu maaddiis; hegaappe denddidaagan, miilooniyan qoodettiya asay daro wodiyawu payyatettan deꞌana danddayiis.
Hara keehi koshshiya oyshati shin? Kaallidi deꞌiya oyshatu zaaruwaa demmiyoogee nena waati maaddanee?
Xoossay oonee?
Yesuus Kiristtoosi oonee?
Xoossaa Kawotettay aybee?
Sinttappe aybi hananee?
Miilooniyan qoodettiya asati he oyshatu zaaruwaa eridoogan bantta deꞌuwan daro maaduwaa demmidosona. Neenikka hegaa zaaruwaa eriyoogan goꞌettana danddayaasa.
TUMAA DEMMANA DANDDAYAY?
Neeni, ‘Ubbabaa xeelliyaagan tumaa waata demmana danddayiyaanaa?’ gaada oychchana danddayaasa. Qassi darobaa xeelliyaagan tumaa demmiyoogee yaa metiyaabaa milatana danddayees. Aybissi?
Daro asay kawotettatinne, zalꞌꞌe woy oduwaa dirijjiteti tumaa odana giidi ammananawu metootees. Issi uri odiyoobay tumakkonne woy coo A qofaakko, woy bagga tumakkonne woy mule worddokko shaakki eranawu asay metootees. Asay issoy issuwaa ammanenna gishshawunne daro odoy worddo gidiyo gishshawu, tumay aybakko, ubba qassi A goꞌꞌay aybakko asay maayenna.
Metiya hegaa malabay deꞌishinkka, deꞌuwan nu oychchiyo keehi koshshiya oyshatu tumu zaaruwaa demmana danddayoos. Waatidi? Darin koshshenna oyshatu zaaruwaa demmanawu oottiyoogaa malabaa oottiyoogaana.
TUMAA DEMMANAWU KOYIYOOGAA
Nuuni tumaa demmanawu galla galla pilggiyo issi issi hanotati deꞌoosona. Jesiki hanotaabaa qoppa. A, “Ocholonee ta naꞌeeyyo sifenna; ubbaa qiiba ocholoniyaa ta naꞌiyaa miikko O worana danddayees” yaagaasu. Hegaa gishshawu Jesika issibaa shammanaappe kase ba naꞌiyo qohiyaabaa gidennaadan loytta xeellada shammawusu. A hagaadan gaasu: “Ubbaappe kasetada taani he qumay aybippe giigidaakkonne qonccissiya xaafettidabaa nabbabays. Qassi gujjada hegaabaa pilggays; ubbaa qassi qiiba ocholoneekkonne walahettibeennaagaa shaakka eranawu hegaa giigissiya paabirkkaa oychchays. He paabirkkay giigissidobay tumukka ammanttiyaakkonne eranawu hara naqaashaa demmanawu pilggays.”
Galla galla ne deꞌuwan neeni oychchiyo oyshatu tumu zaaruwaa demmanawu koyiyo koshshay Jesikiigaadan keehi qofissiyaaba waayi gidana; shin Jesika oottidoogaadan neeni ne oyshatu zaaruwaa demmanawu kaallidi deꞌiyaaba oottana danddayaasa:
Tuma gididabaa shaakka.
Gujjada pilgga.
He qofaa pulttoy ammanttiyaakkonne loytta era.
Yaatiyoogee deꞌuwan neeni oychchiyo keehi koshshiya oyshatu zaaruwaa demmanaadan maaddees. Waatidi?
TUMAA DEMMIYO DUMMA MAXAAFAA
Jesika Geeshsha Maxaafaa tumaa koyiyo wodekka, ba naꞌiyo qohiya quma qommuwaa shaakka eranawu oottidobaara issi malabaa oottaasu. A hagaadan gaasu, “Loyttada nabbabidoogeenne minnada pilggidoogee taani Geeshsha Maxaafaa tumaa eranaadan maaddiis.” Jesikiigaadan, miilooniyan qoodettiya asay kaallidi deꞌiya oyshatubaa Geeshsha Maxaafay woygiyaakko eriis:
Nuuni merettidoy aybissee?
Asay hayqqiyo wode waanii?
Metoy nuna gakkiyoy aybissee?
Xoossay metuwaa ubbaa xayssanawu oottanabay aybee?
Soo asaa deꞌuwan waani ufayttana danddayiyoo?
Geeshsha Maxaafaa nabbabiyoogaaninne jw.org web saytiyan gujjada pilggiyoogan he oyshatunne hara oyshatu tumu zaaruwaa demmana danddayaasa.