Ne Qofaa Minttada Naaga

¹ Yesuusi ba erissiyo ashkkarati bantta kumetta wozanaappe, shemppuwaappenne qofaappe Yihoowa siiqanaadan azaziis. (Maa. 22:​37, 38) Ha laytta gita shiiquwaa prograameti nu garssa asatettaa mintti naaganaadan maaddanau giigidosona. Awuraajjaa shiiquwaa huuphe yohoy, “Ne Wozanaa Minttada Naaga!” yaagiyaagaa. Haggaazo layttaa 2013 dumma shiiquwaa gallassaa prograamiyaa huuphe yohoy, “Ne Zoriya Wozanaa Minttada Naaga” yaagiyaagaa. Kaalliya aginan doommiya woradaa shiiquwaa huuphe yohoy, “Ne Qofaa Minttada Naaga” yaagiyaagaa; hegee Maatiyoosa 22:37​ppe ekettiis. Ha prograamee giigidoy nuuni qoppiyoobay Yihoowa keehippe ufayssiyaagaa gidanaadan huuphiyan huuphiyan nu qofaa pilgganaadan maaddanaassa.

² Tamaaranabata: Nuuni woradaa shiiquwaa ezggiyo wode, waanna qofaa qonccissiya, kaallidi de⁠ꞌiya oyshatu zaaruwaa akeekana koshshees:

• Nuuni ‘asi qoppiy⁠o’ ogiyan qoppiyoogaa aggana danddayiyoy ayba ogiyaanee?

• Ammanenna asaa qofaa goozidabay qaarettanaadan nuuni waatidi maaddana danddayiyoo?

• Nuuyyo de⁠ꞌanaadan nuuni koyiyo qofay awugee?

• Bessiya ogiyan wotti dentti qoppiyoogee demissiyo go⁠ꞌ⁠ꞌati aybee?

• Yihooway nu qofaa loyttanaadan paqqadana danddayiyoy ayba ogiyaanee?

• Azinati, machoti, yelidaageetinne naati so asay ufayttanaadan oottana danddayiyoy ayba ogiyaanee?

• Nuuni Yihoowa gallassau giigetti uttana danddayiyoy ayba ogiyaanee?

• Oosuwaa oottanau qoppi uttiyoogaa giyoogee woygiyoogee?

• Tamaaridobaa oosuwan peeshshiyaageeti demmiyo go⁠ꞌ⁠ꞌay aybee?

³ Seexaanay nu qofaa mooranau olettiiddi de⁠ꞌees. (2 Qor. 11:⁠3) Yaatiyo gishshau, nu qofaa mintti naagana bessees. Nuuni ubbatoo Kiristtoosaagaa mala qofaa qoppana koshshees; qassi ha iita alamee nu qofaa mooranau oottiyoobaa eqettana koshshees. (1 Qor. 2:16) Yaatiyo gishshau, woradaa shiiquwaa naa⁠ꞌ⁠ꞌu gallassikka shiiqanau intte prograamiyaa giigissite. Loyttidi ezggite. Tamaariyo waanna qofaa oosuwan peeshshiyoogee, nuuni Kawotettaa oosuwaa mishettidi oottanau qoppi uttanaadan maaddees.​—⁠1 PHe. 1:⁠13.

[Oyshaa]

1. Haggaazo layttaa 2013 woradaa shiiquwaa huuphe yohoy woygiyaagee, qassi he prograamee giigidoy aybissee?

2. Woradaa shiiquwan nuuni zaaruwaa demmana oyshati awugeetee?

3. Nuuni naa⁠ꞌ⁠ꞌu gallassi shiiqidi, loytti ezggiyoogeenne tamaaridobaa oosuwan peeshshiyoogee keehippe koshshiyoy aybissee?