Omarssan Markkattana Danddayay?
1. Issi eranchay giidoogaadan, PHauloosi sooppe soo biidi haggaazidoy awudee?
1 Kiitettida PHauloosi “tammu saatiyaappe biidi qammaa gakkanaashin” sooppe soo biidi haggaazidoogaa issi maxaafay qonccissiis. PHauloosi ubbatoo he saatiyan haggaazidaakkonne nuuni erennaba gidikkokka, i ‘wonggeliyaa anjjuwaa shaakkanau wonggeliyaa gishshau, ubbabaa hanidoogaa’ eroos. (1 Qor. 9:19-23) Hegaa gishshau, i daro asaa haasayissana danddayiyo saatiyan sooppe soo biidi haggaazanau ba hanotaa giigissiis.
2. Haggaazanau omarssay loꞌꞌo saate gidiyoy aybissee?
2 Daro heeran deꞌiya ishatinne michoti ooso gallassatun wonttaara sooppe soo biidi haggaazoosona. SHin intte heeran haꞌꞌikka he saatiyan haggaaziyoogan loꞌꞌo ayfiyaa demmeetii? Ba haggaazo moottaa xeelliyaagan issi ishay, “Gallassi gallassi asi son deꞌenna. SHin omarssa heeran daro asay son deꞌees” yaagiis. Omarssan markkattiyoogee asaa demmidi mishiraachuwaa yootanau keehi maaddana danddayees. He saatiyan keettaaway darotoo woppu giidi nunaara haasayana danddayees. Haniyaaba gidikko, gubaaꞌiyaa cimati omarssan haggaazuwaa kiyanaappe kase shiiqiyo hanotaa giigissana koshshees.
3. Hara ayba ogiyan omarssan markkattana danddayiyoo?
3 Giyan Markkatta: Omarssan giyaa biya asaunne giyan deꞌiya asau markkattiyoogeekka loꞌꞌo. Nuuni wonttaara sooppe soo biidi demmenna daro attuma asaa, omarssan giyaa biishin woy giyan demmana danddayoos. He saatiyan haasayissiyo wode eti woppu giidi nunaara haasayana danddayoosona. Omarssankka naaꞌꞌaa naaꞌꞌaa gididi haggaaziyoogee loꞌꞌo. Giyan bayzziiddi woy shammiiddi deꞌiya asau markkattiyoogaappe bantta laggetuura eqqida asau woy kaaꞌiiddi deꞌiya asau markkattiyoogee loꞌꞌo. (2 Qor. 6:3) Giyaappe simmiya asay uyidaagaa gidana danddayiyo gishshau, he saatiyan markkattiyoogaappe giya biyo saatiyaaninne giyan markkattiyoogee loꞌꞌo.—Lee. 22:3.
4. Omarssan markkattiyoogan ayba anjjuwaa demmiyoo?
4 Anjjuwaa: Nuuni asau markkattiyoogee keehi ufayttanaadan oottees. Nuuni daro asau markkattido payduwan, asay “attanaadaaninne tumatettaa eranaadan” maaddiyo daro injjiyaa demmoos. (1 Xim. 2:3, 4) Omarssan haggaazanau ne hanotaa giigissana danddayay?