Kiristtoosa Hayquwaa Hassayiyo Baalaa Wode Ufayttite!
1. Kiristtoosa Hayquwaa Hassayiyo Baalaa wode nuuni kaseegaappe aaruwan ufayttanaadan maaddiya issibay aybee?
1 Laappuniyan, Hosppuniyaaninne Uddufuniyan kaseegaappe aaruwan ufayttanau koyeetii? Hegau maaddiya issibay kaseegaappe aaruwan haggaaziyoogaanne inttiyo danddayettikko kaafiya aqinye gidiyoogaa. Hegee waatidi intte keehi ufayttanaadan oottii?
2. Kaseegaappe aaruwan haggaaziyoogee waatidi keehi ufayttanaadan oottii?
2 Intte Ufayssay Gujjanaadan Oottite: Yihooway nuuni ayyo goynnidi ayyaanaaban nu koshshaa kunttiyoogan ufayttanaadan oottidi medhiis. (Maa. 5:3) Nuuni haratussi immiyoogan ufayssaa demmanaadankka oottidi medhiis. (Oos. 20:35) Haggaazoy nuuni Xoossau goynnanaadankka harata maaddanaadankka oottees. Kaseegaappe aaruwaa haggaaziyoogee keehi ufayttanaadan oottiyoogee erettidaagaa. Hegaa bollikka, nuuni daro haggaaziyo wode, kaseegaappe qara gidoos. Haggaazuwan qara gidiyo wode, yayyiyoogaa aggidi xala gidoos. Qassi darotussi mishiraachuwaa yootananne Geeshsha Maxaafaa xinaatiyaa doommana danddayoos. Ha ubbabay nuuni haggaazuwan keehi ufayttanaadan oottees.
3. Laappuneenne Hosppunee kaafiya aqinye gidanau loꞌꞌo wode gidiyoy aybissee?
3 Nuuni 30- woykko 50- saatiyaappe issuwaa doorana danddayiyo gishshau, Laappuniyaanne Hosppuniyaa aginati kaafiya aqinye gidanau loꞌꞌo wode. Hegaa bollikka, Qeera, Laappune 22ppe doommidi Saynno, Hosppune 14n Kiristtoosa Hayquwaa Hassayiyo Baalaa gallassi gakkanaashin, harati he Baalaa bonchanaadan zamachan shoobbanaagee ufayssiyaaba. Daroti danddayettida keenan daro moottan deꞌiya asaa shoobbanau “issippe” oottiyo wode gubaaꞌetun deꞌiya ubbati keehi ufayttana.—Sof. 3:9.
4. Nuuni kaafiya aqinye gidanau koyikko ay oottana koshshii?
4 Haꞌꞌi Giigettite: Hanno gakkanau hegaadan oottiichibeennaba gidikko, kaseegaappe aaruwan haggaazanau giigissana danddayiyoobaa akeekanau intte prograamiyaa zaaretti xeellitenne woossite. (Yaaq. 1:5) Intte soo asaaranne gubaaꞌiyan deꞌiya haratuura hegaa xeelliyaagan tobbite. (Lee. 15:22) Intte sahoy caddiyoogeeta woy kumetta wodiyaa oottiyaageeta gidikkonne, kaafiya aqinye gidiyoogan ufayttana danddayeeta.
5. Kiristtoosa Hayquwaa Hassayiyo Baalaa wode nuuni kaseegaappe aaruwan haggaaziyoogee ay demissii?
5 Yihooway ba ashkkarati ufayttanaadan koyees. (Maz. 32:11) Kiristtoosa Hayquwaa Hassayiyo Baalaa wode kaseegaappe aaruwan haggaazanau minnidi oottiyoogee nu xallaa gidennan, saluwan deꞌiya nu Aawaakka ufayssees.—Lee. 23:24; 27:11.