Neeni Sillaasiyaa Ammanana Bessii?

NEENI Sillaasiyaa (Aaway, Naꞌaynne Geeshsha Ayyaanay issi Xoossa giyoogaa) ammanay? Kiristtaane giyo haymaanootetun deꞌiya daro asay hegaa ammanees. Ubba qassi, hegee daro xeetu layttau woosa keettatu waanna timirtte gididi deꞌiis.

Hegaappe denddidaagan, ammaniyoogee sirissenna gaada qoppana danddayaasa. SHin sirissiyaabi deꞌees; hegaa ammaniyaageetikka mata wode palamaa gujjiyaabaa oottidosona.

Sillaaseenne hegaa mala timirttee coo aggi bayiyooba gidana bessennay aybissee? Yesuusi ba huuphe: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagido gishshataassa. Hegaa gishshau, nu sinttanaa hanotay baasettidoy Xoossaabaa tumaa eriyoogaana; qassi hegaa giyoogee Sillaasiyaa palamau doometta gididabaa eriyoogaa giyoogaa. Yaatiyo gishshau, hegaa ne huuphe ayssi pilggikkii?—Yohaannisa 17:3.

Sillaasiyaa xeelliyaagan dumma dumma qofay deꞌees. SHin xaaxi waaxi xeelliyo wode, Sillaasiyaa timirttee issi Xoossan heezzu bollay, Aaway, Naꞌaynne Xillo Ayyaanay deꞌees; gidikkokka, eti heezzay issi Xoossa giyoogaa. He timirttee eti heezzaykka issi lagge, ubbaa danddayiyaageetanne issi Xoossa gididi merinaappe merinau deꞌiya merettibeennaageeta yaagees.

Gidikkokka, harati Sillaasiyaa timirttee worddo gidiyoogaa, Ubbaa Danddayiya Xoossay meri merinau deꞌiya, ubbaappe aadhiya wolqqaama gididi dummatidi deꞌiyoogaa yootoosona. Eti Yesuusi asa gidanaappe kase, kiitanchatudan Xoossay medhido bana danddayida ayyaana mereta gidiyo gishshau, ayyo doomettay deꞌana bessees yaagoosona. Eti Yesuusi ayba ogiyankka ubbaa danddayiya Xoossaara issi lagge gidi erennaagaa tamaarissoosona; i ubbatoo Xoossau haarettidi deꞌiis; qassi haꞌꞌikka haarettees. Eti xillo ayyaanay deꞌoy deꞌiyooba gidennan, Xoossaa ayyaana, a wolqqa gidiyoogaakka ammanoosona.

Sillaasiyaa ammaniyaageeti, hegee haymaanootiyaa woga xallan gidennan, Geeshsha Maxaafaanikka baasettidoogaa yootoosona. He timirttiyaabaa pilggiyaageeti hegee Geeshsha Maxaafaa timirtte gidennaagaa yootoosona; issi taarike maxaafay ubba: “[Sillaasiyaa] timirttee muleera doommidoy eeqa goynuwaappe” yaagees.—The Paganism in Our Christianity.

Sillaasee tuma gidikko, Yesuusi issi Xoossaa bagganne aara issi lagge gidi erenna giyoogee a kawushshiyaaba. SHin Sillaasee worddo gidikko, oonanne Ubbaa Danddayiya Xoossaara issi lagge giyoogee, hegaappekka aadhi iitidi Mayraamo “Xoossaa Aayyiyo” giyoogee a kawushshiyaaba. Sillaasee worddo gidikko, Kaatolisiizim yaagiya maxaafan deꞌiyaagaadan: “[Asay] ha ammanuwaa muleera geeshsha oottidi naagana xayikko, [eti] merinau xayanaagee sirissenna. Kaatolike Ammanoy: nuuni issi Xoossaa Sillaasiyaa ammanoos yaagiyaagaa” giyoogee Xoossaa toochiyooba.

Hegaa gishshau, neeni Sillaasiyaabaa tumaa eranau koyana bessiya loꞌꞌo gaasoti deꞌoosona. SHin Sillaasiyaa doomettaanne hegau naqaasha giyoobata pilgganaappe kase, ha timirttiyaa loyttidi qonccissiyoogee maaddees. Tumuppe Sillaasee aybee? Hegaa ammaniyaageeti woygidi qonccissiyoonaa?

[Sinttaa 2n deꞌiya misiliyaa]

Haddirssa: Naaꞌꞌantto shaꞌu layttan (K.K) Gibxxetu misiliyaa; Amon-Ra, Ramses II, nne Mut sillaasiyaa. Ushacha: Tammanne oyddantta xeetu layttan (K.S.) Yesuus Kirsttoosa, Aawaanne geeshsha ayyaanaa sillaasiyaa misiliyaa. Heezzu bolla shin oyddu toho xallay deꞌiyoogaa akeeka.