Nabbabanawu Metootiyaageeta Waati Maaddana Danddayiyoo?

1. Nabbabanawu metootiyaageeta Geeshsha Maxaafaabaa tamaarissiyoogee metiyoy aybissee?

¹ Nuuni haasayissiyo issoti issoti nabbabanawu metootiyaaba gidikkokka, ayyaanaabaa eranawu koyana danddayoosona; shin eti Geeshsha Maxaafaanne hara maxaafaa dosennan aggana danddayoosona. Hegaa mala asatuyyo Geeshsha Maxaafay Tamaarissiyoy giya maxaafaa, ubba qassi koyro gallassi immiyoogee loꞌꞌo ayfee demissenna. Yaatin, eta ayyaanaaban waati maaddana danddayiyoo? Hegaa mala asata waati maaddiyaakko 20ppe dariya biittan deꞌiya, haggaazuwan loꞌꞌo meezee deꞌiyo ishata oychida. Eti yootidobay hagaappe kaallidi deꞌees.

2. Nabbabanawu metootiya uraa xannaꞌissanawu keehi maaddiya xuufeti awugeetee?

² Xannaꞌissiyo uri nabbabanawu metootiyaaba woy nabbabana danddayennaba gidikko, Xoossay Yootiyoobaa Siya woy Xoossay Yootiyoobaa Siya Yaatada Merinau Deꞌa giya brooshuretuppe issuwaa xannaꞌissana danddayaasa. Amarkkan deꞌiya issi aqinyee haasayissiyo uraa he naaꞌꞌu brooshureta bessidi, izaawu keehi dosiyoy awugaakko oychees. Keeniyan deꞌiya macara biiroy, Afirkkan asay issoy oychiyo wode haray zaarin tobbiyoogan gidennan, taarikiyaa yootiyo wode siyidi tamaariyoogaa meezetido gishshawu, ha brooshureti he biittaa asaa keehi goꞌꞌiyoogaa yootiis. Xannaꞌiyoobaa nabbabissidi oychiyoogee tamaarida asaa ufayssana danddayikkokka, darin tamaaribeenna asaa hegaadan xannaꞌissiyoogee ufayssennan aggana danddayees. Daro ishati guuttaa guuttaa nabbabiya uraa Xoossaappe Yiya Mishiraachuwaa! woy Xoossaa Dabbo Gidana Danddayaasa! giya brooshureta woy Geeshsha Maxaafaa Taariketa Tamaariyo Maxaafaa goꞌettidi xannaꞌissiyoogaa doommoosona.

3. Nabbabana danddayennaageeta loytti tamaarissanawu nuuni etabaa ay eriyoogee maaddii?

³ Galata: Nabbabiyoogaa danddayenna asati yeellatana danddayoosona; qassi daroti banttana ziqqi oottidi xeelloosona. Hegaa gishshawu, tumaa tamaarissanaappe kase eta minttettiyoogee loꞌꞌo. Nabbabana danddayenna daroti akeekancha, qassi tamaarana danddayoosona. Eta bonchuwaaninne ashkketettan oyqqa. (1 PHe. 3:15) Eti oottana bessiyaabaa oottiiddi deꞌiyoogaanne ayyaanaaban dicciiddi deꞌiyoogaa eriyo wode, xinaatiyan sinttawu suganawu koyana danddayoosona. Hegaa gishshawu, eta galatiyoogaa aggoppa.

4. Nabbabanawu metootiya uri xinaatiyawu giigettanaadan waati minttettana danddayiyoo?

⁴ Xannaꞌissiyo uri nabbabanawu metootiyaaba gidikkokka, xinaatiyawu kasetidi giigettanaadan minttetta. Tohossa Afirkkan deꞌiya issi issi ishati bantta xinaateti loytti nabbabiya dabboy woy laggee banttana maaddanaadan oychana mala minttettoosona. Birttaaniyan deꞌiya issi ishay ba xinaateta xannaꞌissiyo wode amarida menttota ba maxaafaa etayyo immidi xannaꞌissees; hegee, giigettiyo wode hegaadan xuufiyaa bolli malaatiyoogee xannaꞌiyo wode zaaruwaa sohuwaara demmanawu maaddiyoogaa eti akeekanaadan oottees. Hindde biittan deꞌiya issi ishay qassi ba xinaateti kaalliya saaminttan xannaꞌanaban deꞌiya misileta kaseti beꞌidi, hegaa wotti denttidi qoppanaadan minttettees.

5. Xannaꞌissiyo wode danddayancha gidiyoogaa waati bessana danddayiyoo?

⁵ Danddayancha Gida: Neeni xannaꞌissiyo xuufee awugaanne gidin, waanna qofaa loytta akeeka; qassi xannaꞌissiyo uri hegaa loytti akeekanaadan maadda. Koyro heeran, 10ppe biidi 15 daqiiqa gidiyaagaa tobbiyoogee loꞌꞌo gidana danddayees. Issi kutti darobaa xannaꞌissoppa; amarida menttota xannaꞌissiyoogaa xallay gidana danddayees. Xannaꞌissiyo uri geeshshidi nabbabennaba gidikko, danddayancha gida. I Yihoowa nashshiyoogaa doommiyo wode, geeshshidi nabbabanawu koyana danddayees. Neeni xannaꞌissiyo uri Yihoowa nashshanaadan, xinaatiyaa doommosaara a gubaaꞌe shiiquwawu shoobbiyoogee loꞌꞌo.

6. Asay nabbabanaadan waati maaddana danddayiyoo?

⁶ Xinaateti nabbabiyoogaa danddayiyo wode, ayyaanaaban eesuwan diccana danddayoosona. (Maz. 1:1-3) Daroti bantta xinaateta xannaꞌissi simmidi, amarida daqiiqawu Nabbabanaunne Xaafanau Minnada Tamaara giya xuufiyaa goꞌettidi tamaarissiyoogan maaddidosona. Neeni xannaꞌissiyo uri hidootaa qanxxikko, i kaseegaappe shaakki eridobaa yootada minttettana danddayaasa. Yihooway a baaxiyaa anjjanaagaa ayyo yoota; qassi maaduwaa demmanawu woossanaadan minttetta. (Lee. 16:3; 1 Yoh. 5:14, 15) Birttaaniyan deꞌiya issi issi ishati bantta xinaateti wodiyaappe wodiyan bessiyaagaadan diccanaadan, koyro, pitaliyaa shaakki eranaadan, kaallidi issi issi xiqiseta kessidi nabbabanaadan, qassi wurssettan Geeshsha Maxaafaa qofay deꞌiyo, nabbabanawu wayssenna xuufeta nabbabanaadan minttettoosona. Asay nabbabanaadan maaddanawu, nabbabiyoogaa tamaarissiyoogaa xalla gidennan, darotoo eti nabbabanawu koyanaadan denttettana koshshees.

7. Nabbabanawu metootiya asawu nuuni tumaa yootanawu guyye gaana bessennay aybissee?

⁷ Yihooway darin tamaaribeennaageeta ziqqi oottidi xeellenna. (Iyy. 34:19) I asaa wozanaa xeelliya Xoossa. (1 Odi. 28:9) Hegaa gishshawu, nabbabanawu metootiya asawu tumaa yootanawu guyye gooppa. Hegaa mala asaa xannaꞌissiyoogaa doommanawu nena maaddiya keehi loꞌꞌo gidida daro miishshati deꞌoosona. Wurssettan, Geeshsha Maxaafay Tamaarissiyoy giya maxaafaa xannaꞌissiyoogan ne xinaatee Geeshsha Maxaafaa qofaa loytti akeekanaadan maaddana danddayaasa.