Geeshsha Maxaafay Tamaarissiyoy Giyo Maxaafan Loytti Goꞌettite
Issi tamaaree Geeshsha Maxaafay tumuppe tamaarissiyoy aybakko akeekidi hegaa oosuwan peeshshiyo wode, ayyaanaaban dicceesinne ayfees. (Maz. 1:1-3) Geeshsha Maxaafay Tamaarissiyoy giyo maxaafan deꞌiya issi issibaa loytti goꞌettiyoogan tamaaree diccanaadan maaddana danddayoos.
Doomettan Deꞌiya Oyshata: Ubba shemppotu doomettankka he shemppuwan zaaruwaa demmiyo oyshati deꞌoosona. Tamaaree ba qofaa yootanaadan koyennan, kaallidi xannaꞌanabawu a wozanaa denttettanawu he oyshata oychana danddayaasa. Woy oyshaa oycha simmada tamaaree qantta qofaa yootanaadan minttettana danddayaasa. Geella tamaaree balabaa zaarikko, he saatiyan a balaa suurissana koshshenna. A zaaroy neeni xannaꞌissiyo wode ayyo loytta qonccissana bessiyaabay aybakko akeekanawu maaddees.—Lee. 16:23; 18:13.
Gujo Timirttiyaa: Tamaaree xannaꞌidobaa akeekiyaabanne ammaniyaaba gidikko, hegaara gayttida gujo timirttiyaa bawu xannaꞌidi akeekanaadan odana danddayaasa. I gujo qofaa akeekidaakkonne eranawu kaalliya xinaatiyan amaridabaa aara zaarettana danddayaasa. SHin gujo timirttiyan deꞌiya qofay tamaariyaa keehi maaddiyaaba gidikko, gujo timirttiyaa kumettaa woy appe amaridaagaa xinaatiyaa wode tobbiyoogee loꞌꞌo; hegaadan oottanawu menttota nabbabidi neeni kasetada giigissido oyshata tobbana danddayeeta.
Zaareto Oyshaa Saaxiniyaa: Ubba shemppotu wurssettan deꞌiya zaareto oyshay deꞌiyo saaxiniyan he shemppuwaa doomettan deꞌiya oyshatu zaaroy deꞌees. Hegaa gishshawu, tamaaree waanna qofaa loytti akeekidaakkonne qonccissana danddayiyaakko beꞌanawu hegaa goꞌettana danddayaasa. He saaxiniyan deꞌiya qofaanne xiqiseta ubbaa issippe nabbabite. Yaatada, hegan deꞌiya xiqiseti tamaaridobay tuma gidiyoogaa waati qonccissiyaakko yootanaadan tamaariyaa oycha.—Oos. 17:2, 3.