Xoossay Koyiyo Ogiyan Ayyo Goynna

YESUUSI Xoossaakko woossido woosan: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagiis. (Yohaannisa 17:3) Ay mala eray? ‘Xoossay, Asay ubbay attanaadaaninne tumatettaa eranaadan [“suure eraa demmanaadan,” NW] koyees.’ (1 Ximootiyoosa 2:3, 4) Zi Amplifayd Baybil giyo maxaafay ha qofaa: “[Xoossaa] Tumaa geeshshidi nne suuretettan eriyoogaa” yaagidi birshshees.

Yaatiyo gishshau, Xoossaa tumaara moggiya hanotan, nuuni anne a halchuwaa suure eranaadan Xoossay koyees. Qassi Xoossaa Qaalay, Geeshsha Maxaafay he tumau pultto. (Yohaannisa 17:17; 2 Ximootiyoosa 3:16, 17) Geeshsha Maxaafay Xoossaabaa yootiyoobaa suure tamaariyo wode, Roome 10:1, 2n odettida, “eti Xoossau oottanau keehi koyiyo koshshai tumu eratettaappe gidenna” yaagido asatuugaa mala hanotaappe asay haakkees. Woykko Yesuusi: “Intte erennabau goinneeta” giido Samaariyaa asaa mala gidiyoogaappekka haakkees.—Yohaannisa 4:22.

Hegaa gishshau, Xoossan nashettanau koyikko: Bana xeelliyaagan Xoossay woygii? Ayba ogiyan baayyo goynnanaadan koyii? A halchoti aybee? Nuuni etaara waanidi moggana danddayiyoo? yaagidi nuna oychana koshshees. Tumaa suure eray hegaa mala oyshatuyyo nuuni bessiya zaaruwaa demmanaadan oottees. Yaatikko nuuni Xoossaayyo i koyiyo ogiyan goynnana danddayoos.

Xoossaa Kawushshiyaaba

XOOSSAY, “Tana bonchchiyaageeta taani bonchchana” yaagees. (1 Sameela 2:30) Oonanne Xoossaara issi lagge giyoogee a bonchiyoogee? Niwu Kaatolik Insaykilooppidiya giyo maxaafay giyoogaadan, Mayraamo “Xoossaa aayyiyo” giyoogee qassi “Medhidaagaappenne A meretatuppe gidduwan . . . Gaannatiyaaro” giyoogee Xoossaa bonchiyoogee? CHii; hegaa mala qofay Xoossaa cayiyooba. Ooninne Xoossaara issi lagge gidenna; assi yelida ayyiyaa deꞌukku. Ayssi giikko, Yesuusi Xoossaa gidenna. “Xoossaappenne asaappe gidduwan gididi gaannatiya issoi,” Xoossay sunttido Yesuusa xalla gidiyo gishshau, Mayraama “Gaannatiyaaro” gidukku.—1 Ximootiyoosa 2:5; 1 Yohaannisa 2:1, 2.

Sillaasiyaa timirttee, Xoossau deꞌiya tumu sohuwaa xeelliyaagan, asau kirqqi gaanaadaaninne qofay moorettanaadan oottidoogau siree baawa. Hegee, asay Ubbaappe Bollaara Haariya Xoossaa Yihoowa suure ogiyan erennaadaaninne i koyiyo ogiyan ayyo goynnennaadan oottees. Haymaanootiyaa eranchay Hans Kunggi giidoogaadan: “Xoossay issuwaanne dumma gidiyoogaa qonccissiya qofaa moorana woy goꞌꞌennaba oottana danddayiyaaba gujjana koshshidoy aybissee?” SHin Sillaasiyaa ammanoy hegaadan oottiis.

Sillaasiyan ammaniyaageeti suure ogiyan ‘Xoossaa erokkona.’ (Roome 1:28) He xiqisee qassi: “Xoossai eti bessennabaa oottana mala, etau pattenna qofaa immiis” yaagees. Paydo 29⁠ppe biidi 31n, ‘shemppo woriyo qofaa, palamaa, cimuwaanne iita qofaa, iitabaa oottanau koyiyaagaa, siiqoy baynnaagaanne haratussi qarettennaagaa’ mala issi issi ‘bessennabata’ yootees. Hagaa malabati Sillaasiyaa ammaniya haymaanooteti oottiyoobata.

Leemisuwau, Sillaasiyan ammaniyaageeti Sillaasiyaa timirttiyaa ekkennaageeta darotoo yedettidosona; ubba woridosona. Qassi eti hegaappekka aadhiyaabaa oottidosona. Ola wode banttaagaadan Sillaasiyan ammaniyaageeta woroosona. Kaatoliketi Kaatoliketa, Orttodookiseti Orttodookiseta, Protesttantteti Protesttantteta woriyoogaappe—ubbay issi mala Sillaasiyaa Xoossaa sunttan woriyoogaappe aadhiya ‘bessennabi’ deꞌana danddayii?

SHin, Yesuusi Qonccissidi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Xoossaa Qaalay hegaa aassidi: “Xoossaa naatu giddooninne xalahe halaqaa naatu giddon de7⁠iya dummatettai hagan erettees; xillobaa oottenna urai woikko ba ishaa siiqenna urai ooninne Xoossaa Na7a gidenna” yaagees. Geeshsha Maxaafay, “Qaayeeli xalahe halaqaassa; yaanidi ba ishaa woriis” yaagidi bantta ayyaana ishata woriyaageeti, a mala gidiyoogaa yootees.—1 Yohaannisa 3:10-12.

Hegaa gishshau, Xoossaa xeelliyaagan kirqqi gaanaadan oottiya timirttee a higgiyaa kanttiyo oosuwau kaalettees. Kiristtaane giyo haymaanootee deꞌiyo ubbasan hanidabay, Denmarke biitta asa gidida, haymaanootiyaa eranchaa Sooren Kirikgriidi: “Kiristtaane giyo haymaanootee erennan Kiristtaane ammanuwaa xayssiis” giidoogaadaana gidiyoogee tuma.

Ayyaanaaban Kiristtaane giyo haymaanootetu hanotay, Kiitettida PHauloosi: “Banttau eti Xoossaa eriyoogaa qoncciyan yootoosona; shin eti sheneyiyaageeta, azazettennaageetanne lo77⁠o ooso ubbaukka giigennaageeta gidiyo gishshau bantta oosuwan a erokko goosona” giidi xaafidoogaara issi mala.

Matan, Xoossay ha iita siraataa xayssiyo wode, Sillaasiyan ammaniya Kiristtaane giyo haymaanooteti oyshettana. Qassi eti Xoossaa bonchissenna iita oosuwaanne timirttiyaa gishshau pirddettana.—Maatiyoosa 24:14, 34; 25:31-34, 41, 46; Ajjuutaa 17:1-6, 16; 18:1-8, 20, 24; 19:17-21.

Sillaasiyaa Ixxa

XOOSAA tumay asaa qofaara maayanau laamettana danddayenna. Hegaa gishshau, i koyiyo ogiyan Xoossaayyo goynniyoogee Sillaasiyaa timirttiyaa ixxiyoogaa giyoogaa. Sillaasiyaa timirttee hananabaa yootiyaageeti, Yesuusi, kiitettidaageetinne beni wode Kiristtaaneti ammanidobaappenne tamaarissidobaappe phalqqettiyaaba. Xoossay ba ayyaanan xaafissido Qaalan babaa yootidobaappekka phalqqettees. Yaatiyo gishshau i: ‘Taani Xoossaa; hari baawa. Taani Xoossaa; ta mali ooninne baawa; hegaa hassayite’ yaagidi zorees.—Isiyaasa 46:9.

Xoossaabay kirqqi gaanaadaaninne geemmanaadan oottiyoogee a koshshaa poliyooba gidenna. Hegaappe dumma hanotan, Xoossaabaynne a halchuwaabay asau keehippe kirqqi giyoogee, Xoossaa Morkkiyau, ‘ha saꞌaa xoossau,’ Seexaanaa Dabloosau loꞌꞌo injjiyaa medhees. “Ammanenna asatu qofaa” jallissanau hagaa mala worddo timirttiyaa aassiyay a. (2 Qoronttoosa 4:4) Haymaanootiyaa kaalettiyaageeti haymaanootiyaabaa xaannaꞌiyaageetu xallay Sillaasiyaa timirttiyaa akeekana danddayiyaaba milatissiyo gishshau, hegee asaa oyqqanau koyiyo eta qofaa poliyaaba.—Yohaannisa 8:44 xeella.

Xoossaa xeelliyaagan suure eraa demmiyoogee gita woppaa demissees. Hegee nuna Xoossaa Qaalaappe phalqqettiya timirttetuppenne kaddida dirijjitetuppe naxa kessees. Yesuusi giidoogaadan, ‘neeni tumatettaakka erana; qassi tumatettay nena aylletettaappe kessana.’—Yohaannisa 8:32.

Xoossay ubbaappe bolla gidiyoogaadan a bonchiyoogaaninne i koyiyo ogiyan ayyo goynniyoogan, i mata wodiyan Kiristtaane giyo kaddida haymaanootiyaa bolli ehiyo pirddaappe nuuni attana danddayoos. Qassi, ha siraatay xayiyo wode Xoossan nashettanau hidootana danddayoos: “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana.”—1 Yohaannisa 2:17.

[Sinttaa 31n deꞌiya misiliyaa]

Paransaayen daro xeetu laytta deꞌida ha misilee “geelaꞌiyo” Mayraamo Sillaaseti kallachaa goxissishin bessees. Sillaasiyan ammaniyoogee Mayraamo “Xoossaa Aayyiyo” oottidi bonchiyoogaa kaalettiis