Ne Aqo Laggee Pornograafiyaa Beꞌikko Neeni Waatana Danddayay?
“Ta azinay darotoo wodiraa laammidabadan qoppaas.”
“Taani kawuyyidabadan, loꞌꞌennabadaaninne pattenna asa gididabadan qoppaas.”
“Hegaabaa oonaaranne haasayana danddayabeykke. Taani tarkka waayettaas.”
“Yihooway tawu qoppennabadan taayyo siyettiis.”
Issi machchiyaa I azinay pornograafiyaaa beꞌiyo wode A ay keenaa unꞌꞌettanaakko qommoora deꞌiya qofay qonccissees. Geella I daro aginatussi woy layttatussi hegaa geeman oottikko, A ba azinaa mule ammanettennan aggana danddayawusu. Issi machchiyaa hagaadan gaasu: “Ta azinaa mule erennabadaaninne I taappe qottido harabay deꞌiyaabadan qoppaas.”
Ha huuphe yohoy azinay pornograafiyaa beꞌiyo machcheessi giigiis.b A minettanaadan Yihooway O siiqiyoogaanne maaddanawu koyiyoogaa A ammanettanaadan, qassi sarotettaa demmanaadaaninne Yihoowakko shiiqada deꞌanaadan maaddana danddayiya Geeshsha Maxaafay yootiyo maarata ha huuphe yohoy qonccissees.c
MOORABEENNA AQO LAGGIYAA WAATANA DANDDAYAY?
Ne azinay oottiyo ubbabaa neeni teqqana danddayennaba gidikkonne, sarotettaa demmanawu neeni oottana danddayiyoobay deꞌees. Kaallidi deꞌiyaabata beꞌa.
Nena mooranchchadan xeelloppa. Issi machchiyaa ta azinay pornograafiyaa beꞌiyoy taani mooridobay deꞌiyo gishshataassa gaada qoppana danddayawusu. Aliisa A loꞌꞌenna gishshawu I azinay pornograafiyaa beꞌiyaabadan qoppaasu. A, ‘Ta azinay tana aggidi hara maccaasaa xeellanawu koyiyoy aybissee?’ gaada qoppaasu. Issi issi machchoti hanotay yaa iitanaadan oottididabadan qoppiyoogan banttana mooranchchadan xeelloosona. Daaniyeelad hagaadan gaasu: “Taani Kiristtaanetuppe koyettenna iita eeshshaa bessiya, nu aqo deꞌuwaa laaliya iita macca asadan tana xeellaas.”
Neenikka hegaadan qoppikko, ne azinay oottidobawu Yihooway nena oychchennaagaa akeeka. Yaaqooba 1:14y hagaadan gees: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees.” (Roo. 14:12; Pili. 2:12) Yihooway nena mooranchchadan xeelliyoogaappe neeni awu ammanettada deꞌiyoogaa nashshees.—2 Odi. 16:9.
Issi machchiyaa taani loꞌꞌenna gishshawu ta azinay pornograafiyaa beꞌees gaada qoppana danddayawusu. Hegaabaa xannaꞌida eranchchati pornograafee issi uri inddan gayttiyoogan ay maccaasankka ufayttennaadan oottiyoogaa yootidosona.
Keehi unꞌꞌettoppa. Katirina I azinay pornograafiyaa beꞌiyoogaabaa ubbatoo qoppiyoogaa yootaasu. Franssa hagaadan gaasu: “Ta azinaa hanotaa taani mule erenna gishshawu unꞌꞌettaas. Taani ubba galla keehi hirggays.” Issi issi machchoti bantta azinatu metuwaa erana danddayiya ishanttuura woy michchonttuura gayttiyo wode yeellatidoogaa yootidosona. Harati eta hanotaa akeekiya ooninne baa giidi qoppiyo gishshawu banttarkka attidabadan etawu siyettiyoogaa yootidosona.
He ubbabay wottin deꞌiyaaba. SHin neeni hegaabaa qoppiyoogan ne wodiyaa ubbaa wurssikko, keehi unꞌꞌettana. Yaatiyoogaappe, Yihoowaara neeni dabbotido dabbotaabaa ubbatoo qoppanawu baaxeta. Yaatiyoogee neeni genccanaadan maaddana.—Maz. 62:2; Efi. 6:10.
Yihoowa woossiyoogan minttettuwaa demmida maccaasatubaa Geeshsha Maxaafay yootiyo taarikiyaa nabbabiyoogeenne wotti dentti qoppiyoogee nena maaddana danddayees. I eta metuwaa ubbatoo qaarana xayikkonne, eti woppu gaanaadan oottiis. Leemisuwawu, Haanna bana gakkidaban ‘keehi mishettaasu.’ SHin A sinttappe aybi hananaakko erana xayikkonne, Yihoowa ‘adussa woosaa woossa’ simmada woppu gaasu.—1 Sam. 1:10, 12, 18; 2 Qor. 1:3, 4.
Azinaykka machchiyaakka cimata maaduwaa oychchiyoogee koshshana danddayees
Gubaaꞌe cimata maaduwaa oychcha. Eti “carkkuwaappe geemmiyo soho, gotiyaappe baqatiyo soho gidana” danddayoosona. (Isi. 32:2) Xuuraa naagananne nena minttettana danddayiya issi michcheera neeni gayttanaadan eti yootana danddayoosona.—Lee. 17:17.
NEENI A MAADDANA DANDDAYAY?
Pornograafiyaa beꞌiyo meeziyaa agganaadan neeni ne azinaa maaddana danddayay? Geella maaddana danddayaasa. Metuwaa pagalanawu woy wolqqaama morkkiyaa xoonanawu, “issuwaa gidiyoogaappe naa77a gidiyoogee lo77o” gidiyoogaa Geeshsha Maxaafay yootees. (Era. 4:9-12) Azinaynne machchiyaa hashetidi oottiyo wode, darotoo azinay pornograafiyaa beꞌiyo meeziyaa aggana danddayiyoogaanne machchiyaa zaarettada an ammanettana danddayiyoogaa eranchchati akeekidosona.
Hegee ne azinay pornograafiyaa beꞌennan agganawu wozanappe baaxetanawu koyiyoogaara woy koyennaagaara gayttidaba. I minotettaa demmanawu Yihoowa mintti woossidee, qassi maaduwaa cimata oychchidee? (2 Qor. 4:7; Yaaq. 5:14, 15) I pornograafiyaa beꞌiyoogaa agganawu maaddiyaabaa halchchidee? Leemisuwawu, I ba elektronike miishshaa goꞌettiyoogaara gayttidaagaaninne A paacciya hanotaappe naagettii? (Lee. 27:12) I ne maaduwaa ekkanawu koyii, qassi neessi tumaa yootii? Yaatikko, neeni A maaddana danddayaasa.
Waatada? Issi hanotaa beꞌa. Feelisha naatettaappe doommidi pornograafiyaa beꞌiyoogee awu amale gidido Eetaana gelaasu. Feelisha I pornograafiyaa beꞌanawu qaaqqatiyo wode hegaabaa iira haasayanawu metootennaadan oottaasu. Eetaani hagaadan giis: “Taani ta machcheera qoncciyan haasayays. Paacciyaabaappe naagettanaadan A tana siiquwan maaddawusunne taani oottaydda deꞌiyoobaa A tana ubbatoo oychchawusu. Qassi taani Interneettiyaa daro wodiyawu goꞌettennaadan maaddaasu.” Eetaani pornograafiyaa beꞌanawu qaaqqatiyoogan Feelesha qohettiyoogee attennaba. A hagaadan gaasu: “SHin taani yiillotiyoogeenne azzaniyoogee I ha iita meeziyaa agganaadan oottenna. Nuuni A metuwaabaa haasayi simmin, I taani azzaniyoogaa agganaadan maaddanawu koyiis.”
Hegaadan haasayiyoogee, issi azinay pornograafiyaa beꞌiyoogaa agganaadan oottiyoogaa xalla gidennan, A machchiyaa zaarettada an ammanettanaadankka maaddees. Qassi I shugo gididobaa, I biyoosaanne oottiiddi deꞌiyoobaa ba machcheessi yootiyo wode, ippe aybanne qosenna gishshawu machchiyaa an ammanettanawu metootukku.
Hegaadan neeni ne azinaa maaddana danddayays gaada qoppay? Yaatikko, ha huuphe yohuwaa issippe nabbabananne tobbana danddayeeta. I pornograafiyaa beꞌiyoogaa agganawu halchchiyoogee neeni an ammanettanaadan oottees. Nena qofissiyaaban yiillotiyoogaappe he metoy nena ay keena qofissidaakko I akeekanaadan ootta. He meeziyaa agganawu I baaxetiyo baaxiyan neeni maaddana koshshees; qassi I ammanettiya asa gidanaadan hanotaa injjeya. Asay pornograafiyaa beꞌanawu koyiyo gaasuwaanne he metuwaa xoonana danddayiyo ogiyaa intte naaꞌꞌaykka erana bessees.e
Neeninne ne aqo laggee hegaabaa haasayiyo wode ooshshay merettaneeshsha gaada yayyikko, intte hegaabaa haasayiyo wode intte dosiyo cimay amarida wodiyawu inttenaara issippe gidanaadan oychchana danddayaasa. Aqo laggee pornograafiyaa beꞌiyo meeziyaa aggi simminkka, zaarettidi an ammanettiyoogee adussa wodiyaa ekkiyaaba gidana danddayiyoogaa akeeka. Gidikkonne hidootaa qanxxoppa. Intte issippetettay minnanaadan oottiya guuttabaakka koya. Intte danddayanchcha gidikko, wodeppe intte aqo deꞌoy zaarettidi minnanaagaa hidootan naaga.—Era. 7:8; 1 Qor. 13:4.
I HE AMALIYAA AGGENNAN IXXIKKO SHIN?
Ne aqo laggee pornograafiyaa beꞌiyoogaa amarida wodiyawu aggi simmidi, beꞌiyoogaa zaaretti doommikko hegaa giyoogee I zilꞌꞌettibeenna woy he amaliyaa mule aggana danddayenna giyoogee? Gidennan aggana danddayees. Ubba pornograafiyaa beꞌiyoogee awu amale gidikko, ba deꞌo ubban hegaa agganawu baaxetana danddayees. I daro layttawu aggi simmidikka zaarettidi pornograafiyaa beꞌana danddayees. He metuwaa xoonidaba milatiyo wodekka ubbatoo bana naaganawu, elekitronke miishshaa goꞌettiyoogaara gayttidaagaaninne paacciya hanotaappe naagettanawu baaxetana koshshees. (Lee. 28:14; Maa. 5:29; 1 Qor. 10:12) I ba wozanaanne qofaa muleera ooraxissana koshshees; qassi pornograafiyaanne mastterbeeshiniyaa mala hara tunabaa gujjin, ‘iitabaa ixxana’ koshshees. (Efi. 4:23; Maz. 97:10; Roo. 12:9) I hegaadan baaxetana koyii? Yaatikko, I wodeppe ha amaliyaa muleera aggana danddayees.f
Neeni Yihoowaara dabbotido dabbotaa ubbatoo qoppa
Yaatin, ne aqo laggee ba metuwaa xoonanawu koyennaba gidikkoshin? Neeni darotoo unꞌꞌettiyoogee, hanqqettiyoogee qassi ne aqo laggee nena kaddidabadan neeyyo siyettiyoogee garamissiyaaba gidenna. Nena hirggissiyaabaa Yihoowa bolli oliyoogan sarotettaa demmana danddayaasa. (1 PHe. 5:7) Xannaꞌiyoogan, woossiyoogaaninne wotta dentta qoppiyoogan Yihoowakko shiiqada deꞌa. Neeni yaatikko, ikka neekko shiiqanaagaa ammanettana danddayaasa. Mazamure 34:18y yootiyoogaadan, Yihooway “wozanai me77idoogeetussi mataana;” qassi eti zaarettidi ufayttanaadan maaddanawu koyees. Neessi danddayettida keenan gooba Kiristtaane gidanawu baaxeta. Cimata maaduwaa oychcha. Qassi amarida wodiyaappe simmin ne azinay wozanappe laamettana danddayiyoogaa hidootan naaga.—Roo. 2:4; 2 PHe. 3:9.
a “Pornograafe” giya qaalay beꞌiya, nabbabiya woy siyiya ura denttettanawu giigida inddaa woy asho gaytettaa qonccissi bessiya biidota, misileta, xuufetanne ezggiyoobata bessiyaaba.
b Ha huuphe yohuwan azinay pornograafiyaa beꞌiyaabadan qoncciis. SHin ha huuphe yohuwan odettida daro maarati pornograafiyaa beꞌiya machchiyaa deꞌiyo azinaakka maaddana.
c Pornograafiyaa beꞌiyoogee Geeshsha Maxaafay yootiyoogaadan paraman shaahettanaadan oottenna.—Maa. 19:9.
d Asatu sunttay laamettiis.
e Hegawu maaddiya qofaa jw.org saytiyaappenne nu xuufetuppe demmana danddayaasa. Leemisuwawu, “Pornograafee Ne Aqo Deꞌuwaa Qohana Danddayees” giyaagaa jw.org saytiyan beꞌa; Hosppune 1, 2014, Wochchiyo Keelaa sinttaa 10-12n “Neeni Paacciyaabaa Eqettana Danddayaasa!” (Amaarattuwaa) giya huuphe yohuwaa xeella; qassi Naase 1, 2013, Wochchiyo Keelaa, sinttaa 3-7n “Pokko Misilee—Qohiyaabee?” giya huuphe yohuwaa xeella.
f Pornograafiyaa beꞌiyoogee wolqqaama amale gidana danddayiyo gishshawu, issi issi aqo laggeti cimatuppe maaduwaa demmiyoogaa bolli eranchchatu maaduwaakka demmanawu kuuyidosona.