Darotoo Kunddikkokka Wurssettan Denddaas

KASE DEꞌUWAA:

Ta aaway 1949n Jarmaneppe Awusttiraaliyaa biis. I alꞌꞌo shuchaa bookkanawunne korinttiyaa oosuwaara gayttidabaa oottanawu Viktooriyaa gaxare heeran deꞌiyoogaa doommiis. Yan i ta aayyiyo ekkiis; yaatin taani 1953n yelettaas.

Amarida layttappe simmin, ta aayyiyaa Yihoowa Markkatuura Geeshsha Maxaafaa xannaꞌiyoogaa doommaasu; hegaa gishshawu, naatettaappe doommada taani Geeshsha Maxaafaabaa erays. Gidikkokka, ta aaway ay haymaanootenne koyenna. I makkalanchanne yashissiya asa gidiyo gishshawu, ta aayyiyaa a keehi yayyaasu. A qosettada Geeshsha Maxaafaa xannaꞌiyoogaa aggabeykku; qassi tamaariyooban keehi ufayttaasu. Ta aaway son baynna wodiyan, a tamaaridobaa taassinne ta micheessi yootawusu. Sinttappe ha saꞌay gannate gidanaagaanne Geeshsha Maxaafan deꞌiya kandduwaa maaraa kaalliyaaba gidikko nuuni ufayttanaagaa yootaasu.—Mazamure 37:10, 29; Isiyaasa 48:17.

Ta aaway makkalancha gidiyo gishshawu taayyo layttay 18 gidiyo wode sooppe kiyaas. Ta aayyiyaa Geeshsha Maxaafaappe tana tamaarissidobay tuma gidiyoogaa erikkonne, hegee ay keena maaddiyaakko akeekabeykke. Hegaa gishshawu, he maaraa naagada deꞌabeykke. Kasaliyaa kessiyoosan korinttiyaara gayttida oosuwaa oottiyoogaa doommaas. Taayyo layttay 20 gidiyo wode macho ekkaas. Heezzu layttappe simmin nu bayra naꞌiyo yelida; qassi ta deꞌuwan taani xoqqu oottada xeelliyoobaa zaarettada qoppiyoogaa doommaas. Geeshsha Maxaafay nu soo asaa maaddanaagaa eriyo gishshawu, issi Yihoowa Markkaara Geeshsha Maxaafaa xannaꞌiyoogaa doommaas. SHin ta keettaayiyaa Yihoowa Markkata keehi ixxawusu. Taani Yihoowa Markkatu shiiquwaa bin a keehi hanqqettada, Geeshsha Maxaafaa xannaꞌiyoogaa aggiyoogaappenne so asaa aggada biyoogaappe taani issuwaa dooranaadan yootaasu. Taani yayyada, a giidobaa siyada Yihoowa Markkatuura gayttiyoogaa aggabayaas. Taani oottana koshshiyaabaa eraydda oottabeenna gishshawu, guyyeppe zilꞌꞌettaas.

Issi galla, tanaara oottiyaageeti pokkobaa bessiyaabaa tana bessidosona. Hegee ufayssiyaaba milatikkokka, taani guyyeppe keehi zilꞌꞌettanaadan oottiis. Geeshsha Maxaafaappe tamaaridoogaa hassayada Xoossay tana qaxxayana gaada qoppaas. SHin, pokkobaa bessiya misiliyaa zaara zaarada beꞌido gishshawu, hegaa beꞌiyoogaa qohennabadan qoppiyoogaa doommaas. Guyyeppe, hegaa beꞌiyoogee tawu meeze gidiis.

Hegaappe simmin deꞌiya 20 layttan, ta aayyiyaa tana tamaarissido Geeshsha Maxaafaa maaraappe keehi haakkaas. Ta beꞌiyoobay ta eeshshay laamettanaadan oottiis. Ta haasayaynne naachay shori baynnaagaa gidiis. Asho gaytotettaa bessenna ogiyan xeelliyoogaa doommaas. Taani ta macheera deꞌikkokka, hara maccaasatuurakka gayttays. Taani ta huuphiyaa ixxiyoogaa doommaas. Tana bonchiyoogaa aggada shenetaas.

Ta keettayeeppe shaahettaas, qassi ta deꞌoy shoraa xayiis. Yaatin, wozanappe Yihoowa mintta woossaas. Geeshsha Maxaafaa xannaꞌiyoogaa aggada laatamu laytta takkaas; shin zaarettada xannaꞌiyoogaa doommaas. He wode ta aaway hayqqiis; qassi ta aayyiyaa xammaqettada Yihoowa Markka gidaasu.

TAANI LAAMETTANAADAN GEESHSHA MAXAAFAY MAADDIIS:

Taani xoqqa gidida Geeshsha Maxaafaa maaraara mule maayettenna iita deꞌuwaa deꞌaas. Gidikkokka, Geeshsha Maxaafay tamaarissiyoogaa mala woppa deꞌuwaa deꞌanawu keehi koyaas. Iitabaa haasayiyoogaanne hanqquwaa suulliyoogaa agganawu murttaas. Qassi taani shori baynna deꞌuwaa deꞌiyoogaa, ceeriyaa kaaꞌiyoogaa, daro ushshaa uyiyoogaanne ta halaqaappe wuuqqiyoogaa agganawu qofaa qachaas.

Tanaara oottiyaageeti taani hegaadan keehi laamettanawu koyidoy aybissakko akeekibookkona. Taani kaseegaadan deꞌanaadan eti heezzu layttawu aggennan denttettidosona. Taani guuttakkonne hanqqettiyo wode woy iitabaa haasayiyo wode eti, “Poora! Yozefi kaseegaadan haniyoogaa doommiis” yaagidi tana baceessoosona. Hegee tana keehi qohiis! Darotoo taani laamettana danddayennabadan qoppaas.

Ta oottiyo sohuwan pokkobaa bessiya biidoynne xuufee kumiis. Tanaara oottiyaageeti taani kase oottiyoogaadan pokkobaa bessiya misiliyaa ubbawu kiittoosona. Taani ta iita eeshshaa agganawu baaxetays, shin eti taani iitabaa oottanaadan ubbatoo denttoosona. Geeshsha Maxaafaa tana xannaꞌissiyaagee maaddanaadaaninne minttettanaadan oychaas. Taani tawu siyettiyaabaa ubbaa awu yootiyo wode loytti siyiis. I taani ta iita eeshshaa xoonanaadan maaddana danddayiya Geeshsha Maxaafaa qofaa bessiis; qassi Yihooway tana maaddanaadan aggennan woossana mala minttettiis.—Mazamure 119:37.

Issi galla tanaara oottiyaageeta xeesada shiishshaas. Eti shiiqin, eta giddoppe ushshaa keehi uyiyoogaa meeze oottida naaꞌꞌu asati bantta dosan nuna giidi yootikko etawu biiraa immanaagaa yootaas. Eti ubbay bantta cenggurssaa xoqqu oottidi, “Hegaadan oottoppa! He asati ushshaa uyiyoogaa agganawu baaxetiiddi deꞌoosona!” yaagidosona. Taani “Ee, taanikka hegaadan baaxetaydda deꞌays” yaagada etawu zaaraas. He gallassaappe simmin, pokkobaa bessiyaabaa beꞌiyo meeziyaa taani agganawu baaxetaydda deꞌiyoogaa akeekidosona; qassi taani pokkobaa bessiyaabaa beꞌanaadan oottiyoogaa aggidosona.

Takkada, Yihooway tana daroban maaddido gishshawu, pokkobaa bessiyaabaa beꞌiyo meeziyaa aggaas. Taani 1999n xammaqettaas; taani Yihoowa Markka gidada zaarettada maara deꞌuwaa deꞌana danddayido gishshawu ufayttays.

Taani daro layttawu dosido iitabaa Yihooway ayssi ixxiyaakko haꞌꞌi akeekaas. Pokkobaa bessiyaabaa beꞌiyoogee gattiyo qohiyaabaappe siiqiya Aawadan tana ashshanawu koyiis. “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana” yaagiya, Leemiso 3:5, 6n deꞌiya qofay tuma gidiyoogaa akeekaas. Geeshsha Maxaafaa maaray nuuni iitabaappe naagettidi deꞌanaadan maaddiyoogaa xalla gidennan, nuuyo ubbabay injjetanaadankka oottees.—Mazamure 1:1-3.

TAANI GOꞌETTIDO HANOTAA:

Kase tana pattenna asadan xeellays, shin haꞌꞌi tana bonchaysinne woppa deꞌuwaa deꞌays. Taani geeshsha deꞌuwaa deꞌays, qassi Yihooway maariyaagaanne maaddiyaagaa gidiyoogaa akeekaas. Yihoowa taagaadan keehi siiqiya Karoleno giyo puulancha michiyo 2000n ekkaas. Nuuni sarotettan ufayttidi deꞌoos. Kumetta saꞌan deꞌiya, geeshshanne siiqiya ishanttu maabaraa yara gidiyoogaa keehi gita maatadan xeelloos.