BIBLE VERSE WEY THEM DON EXPLAIN
Joshua 1:9—“Dey Strong and Get Strong Heart”
“I never command you before? Get strong heart and dey strong. No shake and no allow fear catch you, because Jehovah your God dey with you any place wey you go”—Joshua 1:9, New World Translation.
“I never command you before? Dey strong and get strong heart. No fear and no tire, because the LORD your God go dey with you anywhere wey you go.”—Joshua 1:9, New International Version.
Wetin Joshua 1:9 Mean?
Jehovaha God use wetin dey this verse to make the heart of im faithful worshipper, Joshua, strong. Jehovah make-am clear to Joshua say e fit “get strong heart and dey strong” even as e de face some big-big problems wey be like mountain. So Joshua no get any reason to fear wetin go happen for future if e obey wetin God talk, because e go just be like say Jehovah dey there with-am to help-am succeed. God dey with Joshua as e de tell-am wetin e go do and help-am win im enemies.
How Joshua fit “get strong heart and dey strong”? The things wey Jehovah don move people to write that time fit encourage-am and make am strong. Part of this things na all “the Law wey Moses [Jehovah] servant don give [Joshua].”b (Joshua 1:7) Jehovah tell Joshua make e de ‘sofri read-am [“think deep about-am” New International Version] day and night.’ (Joshua 1:8) As Joshua de sofri read and think deep about God Word, this one de give-am power to fit do wetin Jehovah want. Then, e go need to do wetin e don learn for God Word ‘so that e go really follow all the things wey them don write for inside.’ If e do like that, e go fit de do things with sense and e go succeed. And na exactly wetin happen be that. Even though say Joshua face plenty problems, Jehovah really bless-am and e enjoy life as e continue to use all im heart worship Jehovah.—Joshua 23:14; 24:15.
Wetin Jehovah tell Joshua that time still de encourage us today. E de show how Jehovah de really care for all the people wey de worship-am, especially when them de face problem. E want make them succeed like Joshua! And like Joshua, them fit “get strong heart and dey strong” as them de always read Bible and de think deep about wetin them read and practice wetin them learn.
Things wey dey around Joshua 1:9
After Moses die, Jehovah tell Joshua say make e lead the nation of Israel. (Joshua 1:1, 2) Around that time, Israel people de prepare to enter Promise Land, wey be the land of Canaan. But them go need to fight their enemies wey get power well-well. For example, Joshua go need to fight Canaan people wey be people wey wicked well-well.c (Deuteronomy 9:5; 20:17, 18) Canaan people plenty pass Israel people and get wetin them take de fight pass Israel people. (Joshua 9:1, 2; 17:18) But Joshua get strong heart and follow wetin Jehovah talk say make e do. And God dey with-am as Israel people win plenty of the Promise land for just six years.—Joshua 21:43, 44
a The name Jehovah na the English translation of the Hebrew name for God, wey be four letters יהוה (YHWH), wey them still de call Tetragrammaton. For Joshua 1:9, the New International Version call-am “the LORD.” To know more about Jehovah and why some Bible no use that name, check the article “Who Be Jehovah?”
b The part of the Word of God wey dey for Joshua time and wey don be part of Bible now, fit be the five books of Moses (Genesis, Exodus, Leviticus, Numbers, and Deuteronomy), the book of Job, and one or two psalms.
c To know more about why Israel people need to fight war that time, check the article, “Why Did God Wage War Against the Canaanites?” for the January 1, 2010, Watchtower.