BIBLE VERSE WEY THEM DON EXPLAIN
Genesis 1:26—“Make We Make Man for Our Image”
“Then God talk say: ‘Make we make man for our image, to be like us, and make them de control the fish for the sea, the things wey de fly for the heavens, the animals wey fit live with people, the whole earth, and all the animals wey de crawl for the earth.’ ”—Ge 1:26. New World Translation.
Wetin Genesis 1:26 mean?
God create human being for im image and this one mean say we go fit get and show the better-better character wey God get. For example, we fit show love and pity, and we fit show say we no de do partial. Because God create us for im image, we fit copy God example.
“God talk say: ‘Make we make man for our image.’ ” Before Jehovah Goda make anybody or anything, e first create one powerful angel wey we know today as Jesus. Jehovah use Jesus “make all other things for heaven and for earth.” (Colossians 1:16) Jesus get the better-better character wey Jehovah get. In fact, Bible talk say Jesus “na the image of the God wey people no fit see.” (Colossians 1:15) Na im make God fit tell Jesus say: “Make we make man for our image.”
“Make them de control . . . the animals wey fit live with people, [and] the whole earth.” God no create animals for im image. E no create them to fit show better-better character wey human being get like love, and them no get conscience too. Even with this one, God really care about animals. Na this one make-am talk say make human being de “control” animals. The word “control” for here fit still mean to “rule over” (New International Version) or “dey in charge” (Common English Bible). So Jehovah tell human being to care for animals. (Psalm 8:6-8; Proverbs 12:10) Jehovah expect human being to care for the earth and everything wey de live for inside.
Things wey dey around Genesis 1:26
The first two chapters for the book of Genesis talk about how God create heaven and earth, and the things wey dey inside. Everything wey Jehovah create dey wonderful, but among the things wey dey for this earth, na the way e create human being really dey wonderful pass. When God create everything finish, “God look everything wey e don make and see! e really dey good.”—Genesis 1:31.
Watch this short video to learn more about how God create the heavens and earth as the book of Genesis talk-am.
Wrong Ideas about Genesis 1:26
Wrong Idea: Some people de talk say na only men God create for im image and say e no create women for im image.
The truth: The word “man” for this verse fit make some people think say God no create women for im image but say na only men e create for im image. But the Hebrew word wey them translate as “man” for this verse, de talk about human being, both men and women. Both men and women fit get and show better-better character like God. And them get the same chance to be God friend and to fit get everlasting life.—John 3:16.
Wrong Idea: God get body wey be like our own.
The truth: “God na Spirit” im own body different from our own, and e no de live for this world. (John 4:24) Sometimes, Bible de talk about God say e get face, hands, heart, and other part of body, but e de use this one so that we go fit understand wetin e de talk about.—Exodus 15:6; 1 Peter 3:12.
Wrong Idea: Genesis 1:26 show say Jesus na God.
The truth: God and Jesus na papa and pikin and them really dey close, but them no be the same person. Jesus teach people say God big pass-am. (John 14:28) To know more about this topic, watch the video wey the topic na Jesus Christ na God? or you fit read the article “Why Bible call Jesus the Son of God?”
Watch this video wey de talk about the things wey dey the book of Genesis.
a Jehovah na the real name of God. (Psalm 83:18) Check the article wey the topic na “Who Be Jehovah?”