Proverbs 16:3​—“Put Everything Wey You De Do for the Hand of the Lord”

“Put everything wey you de do for the hand of Jehovah, and your plans go succeed.”​—Proverbs 16:​3, New World Translation.

“Put everything wey you de do for the hand of the LORD, and e go make your plans stand well.”​—Proverbs 16:3, New International Version.

Wetin Proverbs 16:3 mean?

This proverb de help the people wey de worship God know say their plans go succeed if them trust God as them de look for im advice and follow-am.

“Put everything wey you de do for the hand of Jehovah” People wey de worship Jehovaha de carry body down to check wetin Jehovah think about any matter before them make decision. (James 1:5) Why? The truth be say, human being no get the power to control everything wey de affect their life. (Ecclesiastes 9:11; James 4:​13-15) Another thing be say, them fit no get the sense wey go help them do wetin them want do. Because of this one, many of them don see say e better make them put everything wey them want do for God hand. Them de do this one as them de pray to Jehovah make e guide them, and as them de do their best to follow wetin God want as e dey for im Word, wey be Bible.​—Proverbs 3:​5, 6; 2 Timothy 3:​16, 17.

The words wey them translate as “put everything wey you de do for the hand of the LORDb” still mean “roll wetin you want do give the LORD.” One book talk say this word be like “one man wey carry the heavy load wey dey im back give another person wey get power pass-am and wey fit carry-am.” People wey carry body down and trust God fit dey sure say e go help them.​—Psalm 37:5; 55:22.

The word “everything wey you de do” as e dey for this verse, no mean say God go agree with or bless everything wey people want do. To fit get Jehovah blessing, wetin we want do must agree with wetin Bible talk and wetin Jehovah want. (Psalm 127:1; 1 John 5:14) God no de bless people wey no de obey-am. In fact, “e de scatter wicked person plan.” (Psalm 146:9) But e de help people wey put theirself under-am as them de follow the things wey God want as e dey for Bible.​—Psalm 37:23.

“And your plans go succeed.” Some people translate this word as “e go make your plans stand well.” For the part of the Bible wey them use Hebrew language write, wey many people de call Old Testament, the word wey them translate as “stand well” still de give the idea of foundation, and many times, them de use-am to show how the things wey God create stand well. (Proverbs 3:19; Jeremiah 10:12) Na so God go make the plans of people wey de do wetin correct for im eye stand well. God go protect them and e go help them dey happy for life and nothing go fit shake them.​—Psalm 20:4; Proverbs 12:3.

Things wey dey around Proverbs 16:3

Na King Solomon write this proverb and na im still write plenty other parts of the book of Proverbs. Na God give-am sense to fit talk plenty-plenty proverbs.​—1 Kings 4:​29, 32; 10:​23, 24.

For beginning of chapter 16, Solomon praise the sense wey God get and e talk about how God really hate people wey dey proud. (Proverbs 16:​1-5) This chapter and other chapters for Proverbs help people wey de read-am understand say na only when people carry body down and allow God to direct them, them go fit get real sense and succeed for life (Proverbs 16:​3, 6-8, 18-23) We still see this one for many other place for Bible.​—Psalm 1:​1-3; Isaiah 26:3; Jeremiah 17:​7, 8; 1 John 3:22.

Watch this short video to see wetin dey the book of Proverbs.