Study Book for Our Life and Preaching Meeting
SEPTEMBER 6-12
FINE-FINE LESSON FROM BIBLE | DEUTERONOMY 33-34
“Trust Jehovah Say E Go Help You With E Power Wey No De Fail”
it-2 51
Jeshurun
Jeshurun na the better title wey Jehovah give Israel people. For Greek Septuagint they translate “Jeshurun” as “beloved.” This one show say Jehovah really love Israel people. This title suppose make them remember their agreement with Jehovah. And still make them de live their life the way Jehovah want. (De 33:5, 26; Isa 44:2) But Deuteronomy 32:15 show say Israel people no live their life according to this better name wey Jehovah give them. They start to live useless life, they forget the God wey make them. They reject their Savior!
rr 120, box
Jehovah Go Help You Stand Again
Make we remember say many years before Ezekiel time, Moses talk wetin show say Jehovah no only get power, but e still ready to use e power help e people. Moses write say: “From olden days, God na where we fit hide, e de carry e people with e hand wey no de fail.” (Deut. 33:27) True-true, we dey sure say if we beg Jehovah to help us when we get problem, Jehovah go use e hand, sofri carry us up and help us stand again.—Ezek. 37:10.
w11 9/15 19 ¶16
De Endure as You De Run
16 Just like Abraham, Moses die before the thing wey God promise, happen. Small time before Israel people enter the Promised Land, Jehovah tell Moses say: “You go see the land from far, but you no go enter the land wey I go give Israel people.” Why Jehovah tell Moses this kind thing? Na because before this time, Moses and Aaron no honor Jehovah when they want give Israel people water for Meribah. They allow the way Israel people behave vex them sotey them do wetin Jehovah no like. (Deut. 32:51, 52) Wetin Jehovah talk make Moses faith weak? No. Instead, e bless the people and tell them say: ‘Israel people, wuna de really enjoy! Which people be like wuna wey Jehovah de save? E de cover wuna when trouble dey, and de fight for wuna.’—Deut. 33:29.
Fine-Fine Things Wey You See for Bible
it-2 439 ¶3
Moses
Moses dey 120 years when e die. Even though Moses dey that age, Bible show say e still strong. Bible talk say: ‘Moses eye still sharp, and power still dey e body.’ When Moses die, Jehovah bury-am by e self. And up till today nobody don see or know the place wey Jehovah bury-am. (De 34:5-7) E fit be say Jehovah do this one, so that Israel people no go turn Moses grave to shrine and start to worship-am. From wetin Jude, the half brother of Jesus write, e clear say na that kind thing Devil want use Moses body do. E write say: “When Michael wey be the archangel de argue with Devil about the body of Moses, e no judge or tell Devil bad word. Instead, e talk say: ‘Na Jehovah go judge you.’ ” (Jude 9) Israel people cry for 30 days as Moses die before Joshua carry them enter the land of Canaan.—De 34:8.
SEPTEMBER 13-19
FINE-FINE LESSON FROM BIBLE | JOSHUA 1-2
“How You Fit Succeed for Life?”
w13 1/15 8 ¶7
No Fear Because Jehovah Dey With You!
7 If we want get the mind to do wetin God want, we must study Bible and de do wetin we learn. When Joshua start to lead Israel people after Moses die, that na wetin Jehovah tell-am make e do. Jehovah tell-am say: ‘No fear, make your heart really strong, and make sure say you do everything wey Moses my servant don command you. . . . Make you no ever stop to read this book of the law, and de think deep about-am day and night, so that you go fit do everything wey they write for inside. Then you go succeed for wetin you de do and you go do things with sense.’ (Josh. 1:7, 8) Joshua follow the advice, and e succeed for the things wey e do. If we follow e example, we no go de fear-fear and we go succeed as we de serve Jehovah.
w13 1/15 11 ¶20
No Fear Because Jehovah Dey With You!
20 For this wicked world wey trouble full, e really hard to live our life the way Jehovah want, when we de face problem. But make we know say we no dey alone, God dey with us. And e Son Jesus wey be Head of the congregation, still dey with us. We still get more than 7,000,000 servants of Jehovah for the whole world, wey dey with us. Make we join them de show say we get faith and de preach the good news. And make we always remember our 2013 yeartext wey talk say: ‘Get strong heart and dey strong because Jehovah your God dey with you.’—Joshua 1:9.
Fine-Fine Things Wey You See for Bible
w04 12/1 9 ¶1
Lessons From the Book of Joshua
2:4, 5—Why Rahab deceive the men wey the king send to find the two spy? Rahab risk e life to protect the two spy because of e strong faith for Jehovah. So, e no dey under any law to tell the men wey want kill Jehovah servants, where them dey. (Matthew 7:6; 21:23-27; John 7:3-10) Bible even talk say Rahab na righteous person because of the things wey e do. And one of this things na when e deceive the men wey the king send.—James 2:24-26.
SEPTEMBER 20-26
FINE-FINE LESSON FROM BIBLE | JOSHUA 3-5
“Jehovah De Bless People Wey De Show Say They Get Faith”
it-2 105
Jordan
Normally the part of River Jordan wey dey the south of the Sea of Galilee, deep reach 1 to 3 m (3 to 10 ft) and wide reach about 27 to 30 m (90 to 100 ft). But for rainy season, River Jordan de over full. And this one dey make-am wide and deep pass e normal size. (Jos 3:15) As River Jordan over full, e go be danger for Israel people to cross-am with women and children, especially for the area wey dey near Jericho. The current for there high sotey for this our time, e don carry people wey go swim for there. But Jehovah use miracle dry River Jordan so that Israel people go fit pass-am. (Jos 3:14-17) After plenty years, this kind miracle happen for Elijah when e dey with Elisha and e still happen for Elisha when e dey alone.—2Ki 2:7, 8, 13, 14.
w13 9/15 16 ¶17
Make E De Sweet You to Obey Jehovah Command
17 When we de do wetin Jehovah organization de tell us, we de show say we get faith. How this one de help us trust Jehovah more-more? Think of wetin happen when Israel people want enter the Promise Land. Jehovah tell the priests wey carry the ark of the covenant say make them march straight enter River Jordan. But as the people near the river, they see say the river don over full. So wetin them go do now? They go form camp near the river and wait for some weeks or months make the water come down? No, they show say they really trust Jehovah. They follow wetin e tell them. And wetin come happen? Bible talk say: “As the leg of the priests touch the water, the river stop to flow, . . . and the priests stand for the center of the dry river near Jericho as all the people de pass.” (Josh. 3:12-17, Contemporary English Version) Imagine the kind joy wey Israel people go don get as they see say the river don stop to flow! Because they trust Jehovah and follow e direction, their faith for Jehovah come really strong pass before.
w13 9/15 16 ¶18
Make E De Sweet You to Obey Jehovah Command
18 Na true say today Jehovah no de do this kind miracle for e people. But e de bless us when we show faith and follow e direction. Jehovah spirit de give us the power to fit preach the good news for the whole world. And Jesus Christ wey be the number one servant of Jehovah, promise us say e go dey with us as we de do this important work. E talk say: ‘So make wuna go make disciples of people for the whole world and I go dey with wuna all the days until the ending part of the time.’ (Matt. 28:19, 20) Jehovah spirit don really help many of us wey de shame and de fear to talk to people. Now, we no de fear again to talk with people wey we no know as we de preach.—Read Psalm 119:46; 2 Corinthians 4:7.
Fine-Fine Things Wey You See for Bible
w04 12/1 9 ¶2
Lessons From the Book of Joshua
5:14, 15—Who be “the prince of Jehovah army”? The prince wey come encourage Joshua as Israel people start to take over the Promise Land, na Jesus Christ wey Bible call “the Word.” That time Jesus never come this earth. (John 1:1; Daniel 10:13) E really de make us happy to know say Jesus Christ our King, dey with us today as we de struggle to make our faith strong.
SEPTEMBER 27–OCTOBER 3
FINE-FINE LESSON FROM BIBLE | JOSHUA 6-7
“Run From Useless Things”
w10 4/15 20 ¶5
Comot Eye From Useless Things!
5 Plenty years after, the same thing happen to Achan when Israel people destroy Jericho. E thief some of the good things wey e see for the city. Jehovah don first tell them say make they destroy everything for the city, except some things wey they go keep as Jehovah own. Jehovah even warn them say: “Make wuna no near the things wey I say make wuna destroy so that wuna no go begin like them” and take some of them. Because Achan no obey wetin Jehovah talk, Ai people win Israel people for war and kill some of them. Achan no gree confess say e thief until them catch-am. E talk say: “As I see the things, I come like them, and I take them.” Because e no gree comot eye from wetin no be e own, they destroy-am with e family and everything wey e get. (Josh. 6:18, 19; 7:1-26) The problem be say na wetin Jehovah say make they no touch, really hungry Achan to take.
w97 8/15 28 ¶2
Why E Good Make We De Report Bad Thing?
One reason why e good make we de report bad thing be say e de help the congregation continue to dey clean. Jehovah na clean and holy God. And e want make e people de worship-am for the correct way and de live clean life. E advice us for Bible say: ‘As children wey de obey, make wuna stop to live the kind life wey wuna de live before wuna learn the truth, but like the Holy Person wey call wuna, make wuna dey holy for all wuna character, because they don write-am say: “Wuna must dey holy because I dey holy.” ’ (1 Peter 1:14-16) If person no stop to live bad life or do bad, e fit make congregation no clean again for Jehovah eye. This one go make Jehovah no happy with the whole congregation unless they correct the problem or remove the person from the congregation.—Still check Joshua, chapter 7.
w10 4/15 21 ¶8
Comot Eye From Useless Things!
8 No servant of Jehovah fit talk say wetin e eye want and wetin e body want, no fit ever control-am. Na e make Bible advice us say make we de control how we de look and wetin we de like. (1 Cor. 9:25, 27; read 1 John 2:15-17.) Job for Bible understand say wetin we de see really de affect wetin dey our mind. E talk say: ‘I don make agreement with my eye. So how I go de look young woman and de think wetin no clean?’ (Job 31:1) Job no only decide say e no go touch woman wey no be e wife, but e no ever allow that kind thing enter e mind. And Jesus still talk say our mind must dey clean from bad things. E talk say: “Any man wey continue to look woman sotey e want sleep with-am, that man don already sleep with-am for e heart.”—Matt. 5:28.
Fine-Fine Things Wey You See for Bible
w15 11/15 13 ¶2-3
Question Wey Some People Don Ask
For Bible time, e dey common for people wey want attack city wey get fence, to surround the city. And when they finally win the city, no matter how long e take them to win-am, they must collect all the good things wey dey the city, and any food wey remain. But for the case of Jericho, people wey de dig things come out from ground see plenty food wey remain for the city. The book wey be Biblical Archaeology Review talk say: “Apart from things wey they mold, na food be the next thing wey plenty pass. . . . But no be wetin them de normally see for other city for Palestine area wey they destroy like this. They fit see only one or two container of food. But as they see plenty food for Jericho, e no really dey normal.”
Bible talk the reason why Israel people no take any food from Jericho. Jehovah command them say make they no take-am. (Josh. 6:17, 18) Israel people attack Jericho small time after harvesttime, when they don gather plenty food. (Josh. 3:15-17; 5:10) This plenty food wey they see for Jericho really show say just as Bible talk, Israel people no surround Jericho for long time.
OCTOBER 4-10
FINE-FINE LESSON FROM BIBLE | JOSHUA 8-9
“Wetin We Fit Learn From Gibeon People?”
it-1 930-931
Gibeon
Joshua and Gibeon People. For Joshua time, na people wey them de call Hivites de stay for the city of Gibeon. This Hivites na one of the seven tribes for Canaan wey Jehovah say make Israel people destroy. (De 7:1, 2; Jos 9:3-7) Another name wey Bible call Gibeon people na Amorites. E be like say sometimes, na all the people of Canaan, them de call Amorites. (2Sa 21:2; still check Ge 10:15-18; 15:16.) Gibeon people no be like other Canaan people. They know say even though their army strong and their city big, they no fit win Israel people because Jehovah de fight for them. Na e make, after Israel people don destroy Jericho and Ai, Gibeon people send some men to go meet Joshua for Gilgal and make peace. E be like say the men of Gibeon wey go meet Joshua still represent Hivite people from three other city wey be Chephirah, Beeroth, and Kiriath-jearim. (Jos 9:17) This men wear tear-tear cloth and sandal. They still carry wine skin bottle wey don burst, tear-tear bag, and dry bread wey don de break-break. They tell Joshua say them come from far place. So, e come be like say they no dey part of the nations wey Israel people suppose destroy. They talk say they know say na Jehovah help Israel people win Egypt, and the two Amorite kings wey be Sihon and Og. But they use sense, they no talk about wetin happen to Jericho and Ai. They know say the news of wetin happen to Jericho and Ai, no go don reach their “far land” wey they tell Joshua say they come from. So, the elders for Israel check wetin they carry, and believe wetin they talk. And they make agreement with them say they no go kill them.—Jos 9:3-15.
w11 11/15 8 ¶14
No Trust Yourself!
14 All of us get sin for body. So, even if we be elder wey get experience for the work, make we no ever forget to beg Jehovah to direct us when we want make decision. For example, think about wetin happen to Joshua and the elders for Israel. When Gibeon people come meet them to make agreement of peace with them, they no ask Jehovah for direction. Even though say the city of Gibeon no far, the people pretend like say they come from far place. So, Joshua and the elders of Israel make agreement with them. Na true say Jehovah support the agreement, but e still make sure say they write their mistake for Bible make we learn from-am.—Josh. 9:3-6, 14, 15.
w04 10/15 18 ¶14
“Waka Go All Part of the Land”
14 The people from Gibeon tell Joshua say: “We be your servant and where we come from really far, we come because we de respect the name of Jehovah.” (Joshua 9:3-9) Their cloth and the food wey they carry, make-am be like say they really come from far place. But Gibeon no far, na just about 20 miles [30 km] from Gilgal. Joshua and the elders for Israel believe them and make agreement of peace with them, and other city wey near them. Why Gibeon people do this thing, na just because them no want die? No! E show say them want make the God of Israel bless them. Jehovah support the arrangement say Gibeon people go de gather firewood and fetch water for Israel people and Jehovah altar. (Joshua 9:11-27) Gibeon people continue to show say they ready to do slave work to support Jehovah work. E fit be say, some Gibeon people dey among the temple servants wey come back from Babylon, and do their work for the temple wey Israel people rebuild. (Ezra 2:1, 2, 43-54; 8:20) We fit copy their example when we dey do our best to make sure say nothing spoil our friendship with Jehovah. And when we ready to do any type of work for Jehovah, even if e be like slave work.
Fine-Fine Things Wey You See for Bible
it-1 1030
To Hang Person
For the law wey Jehovah give Israel people, after they kill some kind criminal, they fit still hang them for pole as ‘people wey God don curse.’ As people de see the dead body for the pole, e go be warning for them. But they must bring the dead body down, and bury-am before night come. If they leave the body for the pole till the next day, the land no go dey clean again for Jehovah eye. (De 21:22, 23) Israel people still follow this law even if the person wey they kill, no be Israel person.—Jos 8:29; 10:26, 27.
OCTOBER 11-17
FINE-FINE LESSON FROM BIBLE | JOSHUA 10-11
“Jehovah Fight for Israel People”
it-1 50
Adoni-zedek
Adoni-zedek na king of Jerusalem when Israel people de take over the Promise Land. Adoni-zedek invite other kings from the small-small kingdom wey dey the west side of River Jordan, to join-am fight Joshua and Israel people. (Jos 9:1-3) But the Hivites for the city of Gibeon make peace with Joshua. So Adoni-zedek gather four other Amorite kings to fight Gibeon. They surround Gibeon to fight against-am. Then Jehovah do miracle wey make Joshua fit save Gibeon people and destroy the army of the five kings. This one make the five kings run go Makkedah and hide for inside cave. So Joshua use big stone block the cave make they no go escape. Joshua kill Adoni-zedek and the other four kings for front of e army and hang them for pole. They later throw their dead body inside the cave, na there come be their grave.—Jos 10:1-27.
it-1 1020
Hail (Ice wey de fall like rain)
Jehovah use hail. Jehovah don use hail before to make wetin e talk happen and to show the kind power wey e get. (Ps 148:1, 8; Isa 30:30) The first time wey e use-am, na when e de punish Egypt. E send hail or ice block as the number seven punishment to Egypt people. The hail destroy things wey they plant, their trees, and kill people and animal wey dey outside that day. But e no affect Israel people wey dey the land of Goshen. (Ex 9:18-26; Ps 78:47, 48; 105:32, 33) After, for the Promise Land when Joshua carry Israel people go help Gibeon people, Jehovah send plenty hailstones to destroy the five Amorite kings wey attack Gibeon people. The people wey hailstones kill that day plenty pass people wey Israel people kill.—Jos 10:3-7, 11.
w04 12/1 11 ¶1
Lessons From the Book of Joshua
10:13—How that kind thing fit ever happen? “E get anything wey too big for Jehovah” wey make heaven and earth to do? (Genesis 18:14) If Jehovah want, e fit control the way this earth de move, so that person wey dey this earth go feel say the sun and moon no de move. Or Jehovah fit still allow the earth and moon to de move but e go make the light from the sun and moon continue to shine. No matter how Jehovah do-am, the truth be say since God make man for this earth, ‘no day be like that day.’—Joshua 10:14.
Fine-Fine Things Wey You See for Bible
w09 3/15 32 ¶5
Question Wey Some People Don Ask
Because say Bible talk about some books and say people use them that time, no mean say na God direct them to write the books. But Jehovah don make sure say e word wey be Bible, don survive reach our time and e ‘go last forever.’ (Isa. 40:8) The truth be say, everything wey Jehovah put for the 66 books for Bible, na just wetin we need to ‘really ready for all kind of good work.’—2 Tim. 3:16, 17.
OCTOBER 18-24
FINE-FINE LESSON FROM BIBLE | JOSHUA 12-14
“Use All Your Heart Do Wetin Jehovah Want”
w04 12/1 12 ¶2
Lessons From the Book of Joshua
14:10-13. Even though say Caleb dey 85 years, e tell Joshua to give-am the land of Hebron. This one no be easy work because na there Anak people wey be giant, de stay. But Jehovah help Caleb win this people, and Hebron later come be city of protection. (Joshua 15:13-19; 21:11-13) Caleb example teach us say make we no run from any work for Jehovah organization even if e hard.
w06 10/1 18 ¶11
To Get Faith and Fear God De Give Person Strong Heart
11 That kind faith de grow. E de grow when we see the good result wey de come because we de live our life the way Jehovah want, how Jehovah de answer our prayer, and de see Jehovah hand for our life. (Psalm 34:8; 1 John 5:14, 15) We dey sure say as Joshua and Caleb de see the good things wey Jehovah do for them, their faith come strong pass before. (Joshua 23:14) For example: Just as Jehovah promise, they survive the 40 years wey Israel people trek for wilderness. (Numbers 14:27-30; 32:11, 12) They do special work for the six years wey Israel people use take over the land of Canaan. They still life long life and enjoy good health. And they still get their own share of land wey Jehovah promise them. True-true, Jehovah de bless people wey de serve-am with all their heart and wey no de fear to do wetin e want.—Joshua 14:6, 9-14; 19:49, 50; 24:29.
Fine-Fine Things Wey You See for Bible
it-1 902-903
Gebal
When Joshua still dey alive, Jehovah tell-am say “the land of Gebal” dey among the lands wey remain for Israel people to take over. (Jos 13:1-5) Some people talk say this land no dey among the land wey Israel people suppose get. Why? Because the city of Gebal really far from the north side of Israel. E dey about 100km [60 mi] from the north side of Dan. And e fit be say Israel people no ever take over Gebal. Some professors talk say e be like say the part of the scroll wey they write this verse for the original Hebrew language, don spoil. And they talk say e fit be say wetin dey there na, “the land wey de share boundary with Lebanon,” or ‘go reach the land wey get boundary with Gebal.’ But, make we remember say for Israel people to get the promise wey dey Joshua 13:2-7, they must obey Jehovah. So e fit be say Israel people no ever get Gebal because they no obey Jehovah.—Go check Jos 23:12, 13.
OCTOBER 25-31
FINE-FINE LESSON FROM BIBLE | JOSHUA 15-17
“Protect Wetin Jehovah Don Give You”
it-1 1083 ¶3
Hebron
As Israel people continue their fight with people for the south of Canaan, they destroy the people of Hebron and even their king (e fit be say na this king take over from Hoham). (Jos 10:36, 37) Joshua and Israel people fight and win plenty place for Canaan. Because of that one, Canaan people no come get power again to fight them. But e be like say Israel people no put soldiers at once to protect all the place wey they don first win. This one make Anak people take the city of Hebron again when Israel people de fight with other people for Canaan. Because of this one, Caleb later (or Caleb later carry Judah people) go fight them and take the city back. (Jos 11:21-23; 14:12-15; 15:13, 14; Jg 1:10) Na Caleb Jehovah first give the city of Hebron. After, Hebron become city of protection. And they still use-am as one of the city wey priests de stay. But they leave the community wey dey outside the city and the farm land for Caleb.—Jos 14:13, 14; 20:7; 21:9-13.
it-1 848
To Force People to Work
For Bible time, na common thing to use force make people work (Heb., mas). And na people wey they catch as slave for war, them de use pass. (De 20:11; Jos 16:10; 17:13; Es 10:1; Isa 31:8; La 1:1) When Israel people be slave for Egypt, their wicked masters de force them to work. This masters force them to build big-big place where them de keep things for Pithom and Raamses. (Ex 1:11-14) When they enter the Promise Land, they no kill all Canaan people as Jehovah command them. But they force the ones wey remain to de work for them and become their slave. This one spoil Israel people and make them start to worship other gods. (Jos 16:10; Jg 1:28; 2:3, 11, 12) King Solomon still continue to force the children-children of this Canaan people wey be Amorites, Hittites, Perizzites, Hivites, and Jebusites, to work as slave.—1Ki 9:20, 21.
it-1 402 ¶3
Canaan
Many people for Canaan survive when Israel people come fight to take the Promise Land and some no gree make Israel people control them. Even with this one, we fit still talk say ‘Jehovah give Israel people all the land wey e promise their papa-papa them and e give them peace everywhere. All the promise wey Jehovah promise them happen, no one fail.’ (Jos 21:43-45) All the enemy wey dey around Israel people come weak and they no come get any power to fight Israel people. God don first talk say e go pursue Canaan people comot small-small so that wicked animals no go come plenty because people no dey the area again. (Ex 23:29, 30; De 7:22) Even though say Canaan people get strong-strong weapon to take fight war, like chariot wey get sharp iron blade for the wheel, we no go fit talk say Jehovah no keep e promise because Israel people no finally fit take over some part of the land. (Jos 17:16-18; Jg 4:13) But Bible show say the only time wey Canaan people win Israel people na when they no do things the way Jehovah want.—Nu 14:44, 45; Jos 7:1-12.
Fine-Fine Things Wey You See for Bible
w15 7/15 32
You Know?
Na true say forest plenty for Israel that time as Bible talk?
BIBLE talk say some place for the Promise Land na forest and tree plenty for there. (1 Ki. 10:27; Josh. 17:15, 18) But because say tree and forest no dey for plenty part of Israel today, some people fit de doubt whether wetin Bible talk na true.
One book wey be Life in Biblical Israel talk say: “Before-before, plenty forest dey for Israel pass as e dey now.” The kind tree wey plenty for the side wey mountain dey na Aleppo pine (Pinus halepensis), evergreen oak (Quercus calliprinos), and terebinth (Pistacia palaestina). And that time, sycamore tree (Ficus sycomorus) plenty for Shephelah, wey be the area wey small-small hill dey, between mountains for Israel and Mediterranean Sea.
Another book wey be Plants of the Bible talk say now some part of Israel no get tree again. Wetin cause-am? This book talk say na small-small e happen. E say: “People start to cut the trees so that them go get space to farm, to train animals, to get wood to build house and firewood to cook.”