Study Book for Our Life and Preaching Meeting

JULY 4-10

FINE-FINE LESSON FROM BIBLE | 2 SAMUEL 18-19

“Barzillai Na Better Example of Person Wey No De Do Pass E Power”

w07 7/15 14 ¶5

Barzillai Know Where E Power Reach

King David really happy for the way Barzillai help-am, so e tell Barzillai to come de stay for the palace. But David no do this one just because e want help Barzillai the way Barzillai help-am. Barzillai na rich man so e no need that kind help. E fit be say David do this one because of the better character wey this old man get. To live for the palace for be big honor to Barzillai, and e for still give-am the chance to be tight friend with King David.

w07 7/15 14 ¶7

Barzillai Know Where E Power Reach

One reason why Barzillai no gree go live for the palace, fit be because of e age and the problem wey de follow old age. Barzillai fit de feel say e no get plenty years to live again. (Psalm 90:10) E don do wetin e fit do to support David, and e know say e no go fit do plenty things again because of old age. Barzillai no allow big position and the respect wey e go get make-am accept wetin big pass e power. Barzillai get better sense, e no be like Absalom wey de find position. Instead, e show say e know where e power reach.​—Proverbs 11:2.

w07 7/15 15 ¶1-2

Barzillai Know Where E Power Reach

The story of Barzillai show why e dey important make we know where our power reach. But this one no mean say we go reject work wey them give us for congregation. Or no do things wey go make us qualify for more work, just because we no want wetin go disturb us or we de fear say we no go fit do the work. God go fit give us wetin we need to do the work if we trust-am to give us the power and sense wey we need.​—Philippians 4:13; James 4:17; 1 Peter 4:11.

But e still good make we know where our power reach. For example, they want add more work join for one brother wey don already get plenty work for congregation. E come see say if e accept the work, that one fit make-am no get time to do other things wey Bible talk say make e do, like to care for e family. If this kind thing happen, the brother go show say e de do things with sense and e know where e power reach, if e no accept more work that time.​—Philippians 4:5; 1 Timothy 5:8.

Fine-Fine Things Wey You See for Bible

w20.04 30 ¶19

“Run the Race Reach the End”

¹⁹ If you no de fit do things wey you de do before and you feel say people no de understand you, the example of Mephibosheth go fit encourage you. (2 Sam. 4:4) Mephibosheth na cripple, and e no get the correct judgment from King David. No be e fault say e de face this things. Even with that one, e no vex. Instead, e enjoy the good things wey e see for e life. Mephibosheth dey happy for the good wey David show-am sometime ago. (2 Sam. 9:6-10) So when David judge Mephibosheth for wrong way, Mephibosheth try to understand the whole situation. E no begin vex because of the mistake wey David make. And e no blame Jehovah for wetin David do. Mephibosheth put e mind for the thing wey e fit do to support the person wey Jehovah don choose as king. (2 Sam. 16:1-4; 19:24-30) Jehovah arrange make this fine example of Mephibosheth dey for Bible so that we go fit learn from the example.​—Rom. 15:4.

JULY 11-17

FINE-FINE LESSON FROM BIBLE | 2 SAMUEL 20-21

“Jehovah Na God Wey De Judge Well”

it-1 932 ¶1

Gibeon

Gibeon people wey Joshua make agreement with still dey alive all those years, even though say King Saul try to kill all of them. But Gibeon people dey patient. Them wait make Jehovah expose this wicked thing wey Saul do. And this one happen when Jehovah allow serious hunger dey for the land of Israel for three years. That time David don be king. When David ask Jehovah why hunger dey the land, Jehovah tell-am say na because Saul kill some Gibeon people. So, David call Gibeon people and ask them wetin e go do to pay them for wetin Saul do. Gibeon people tell David say this matter no be wetin them fit pay with “silver or gold.” Because the Law talk say person wey open eye kill another person must die, make they no exchange the person life with anything. (Nu 35:30, 31) They still know say they no get authority to kill any Israel person. Na when David come tell them say anything wey them want e go do for them, before they talk say make e give them seven men from Saul pikin them. As Bible talk say blood dey the hand of Saul and e family, e show say even though say na Saul dey front for this wicked thing, e fit still be say e “sons” join-am somehow. (2Sa 21:1-9) So for this matter, them no kill the pikin them because of the wicked thing wey their papa do. (De 24:16) But they kill this seven men to pay for wetin them do just as the law talk say make they use “life pay for life.”​—De 19:21.

Fine-Fine Things Wey You See for Bible

w13 1/15 31 ¶14

Elders De Help Us Worship Jehovah With Joy

¹⁴ For the whole world, Jehovah people still de worship-am even though say Satan and e people de make life hard for them. Some of us don face problem wey be like giant. But because we trust Jehovah with all our heart, we don fit win all this problem the way David win Goliath. But we fit tire sometimes, because we de always fight against Satan and this wicked world. When this one happen, e fit easy for us to fall for problem wey we suppose fit handle. But many brothers and sisters don see say when elders notice their condition and help them that time, their joy and power de come back. One sister wey don pass 60 years and wey be pioneer talk say: “E get one time wey my body no too strong, and I de quick tire when I go field service. One elder see say I no too strong and e come meet me. E use one place for Bible encourage me. I do the things wey e advice me to do, and e work.” The sister still talk say: “I really happy say the elder notice my condition and give me the help wey I need!” True-true, e really de sweet us say we get elders wey love us and wey ready to ‘come help us’ the way Abishai help David.

JULY 18-24

FINE-FINE LESSON FROM BIBLE | 2 SAMUEL 22

“Trust Jehovah Say E Go Help You”

cl 19 ¶11

You and God Fit Be Tight Friend?

¹¹ We fit don read for Bible say Jehovah ‘really get power.’ (Isaiah 40:26) But we go really fit understand how Jehovah get power reach, when we read about how e use e power save Israel people for the Red Sea, and how e care for them for 40 years for wilderness. As you de read the story, just imagine how the plenty water divide into two, how about 3,000,000 Israel people waka pass the bottom of the Red Sea wey don turn to dry ground, and how the water wey don divide, just stand for the two side like big-big wall. (Exodus 14:21; 15:8) You go see many things wey show say Jehovah protect and care for them for wilderness. E give them water from rock, and e give them manna wey resemble white seed to chop. (Exodus 16:31; Numbers 20:11) From this story, we see say no be only say Jehovah get power, but e de use e power help e people. Our mind de really come down as we know say the God wey we de pray to, na God wey really get power, and na God wey “de protect us and de give us power. E ready to help us when we de face problem.”​—Psalm 46:1.

w10 6/1 26 ¶4-6

Jehovah ‘No Go Leave Person Wey Hold-am Tight’

This thing wey David talk, wetin e really mean? The Hebrew word wey they translate as “no go leave person wey hold you tight” fit still mean to show person “special love.” To fit really hold person tight, you must love the person. Jehovah de show strong love to people wey hold-am tight.

Another thing wey we learn be say to hold person tight no be just how we de feel about the person, we must show-am for wetin we de do. David see-am for e own life say, Jehovah no de leave people wey hold-am tight. Jehovah help-am all the years wey e face different-different problem for e life. And because David love Jehovah, Jehovah hold-am tight, protect-am and direct-am. David really thank Jehovah as e save-am ‘from the hand of all e enemy.’​—2 Samuel 22:1.

Wetin we fit learn from this thing wey David talk? Jehovah no de change at all! (James 1:17) Jehovah de follow the laws wey e don set and e de always do wetin e promise. For psalm 37 David write say: “Jehovah . . . no go leave the people wey hold-am tight.”​—Psalm 37:28.

Fine-Fine Things Wey You See for Bible

w12 11/15 17 ¶7

Train Your Mind to Dey Humble

⁷ When David see how Jehovah humble reach, e really touch-am and e sing to Jehovah say: “You give me your shield wey de save me, and the way you dey humble de make me great.” (2 Sam. 22:36) David know say wetin make-am fit do all the things wey e do for Israel na because Jehovah dey humble. Jehovah bring e self down to help David. (Ps. 113:5-7) Na so e still be for us. Everything wey we get whether na better character, things wey we fit do, or work wey we get for congregation, na Jehovah give us all this things. (1 Cor. 4:7) When Jesus talk say na the person wey dey humble among e disciples “big pass,” e mean say na this kind person Jehovah go like to de use pass for e work. (Luke 9:48, ftn.) Make we see how this one de happen.

JULY 25-31

FINE-FINE LESSON FROM BIBLE | 2 SAMUEL 23-24

“Your Worship De Cost You Anything?”

it-1 146

Araunah

Araunah tell David say make e take the threshing floor (the place wey them de separate chaff from seed), the animal, and the wood wey e go use do sacrifice to Jehovah, free of charge. But David no gree, e talk say e must pay for everything. For 2 Samuel 24:24, Bible talk say David use 50 silver shekels ($110) buy the place and the animal. But 1 Chronicles 21:25 talk say na 600 gold shekels (about $77,000) David use buy the place. Why e be like that? The person wey write Second Samuel only talk about the money wey David use buy the place wey e build the altar and the things wey e use do the sacrifice. But the person wey write First Chronicles talk about things wey concern the temple wey they later build for that land and the money wey they spend to build the temple. (1Ch 22:1-6; 2Ch 3:1) The land wey they build the temple na really big land. So the 600 gold shekels no fit be the money wey David use buy the small part of land wey e build the altar. But na money wey e use buy the big area of land wey they later build the temple.

w12 1/15 18 ¶8

Wetin We Fit Learn From the Law of Moses?

⁸ E no go hard for any Israel person to choose better animal wey e go sacrifice to Jehovah, if e really want thank Jehovah from e heart or e want beg Jehovah for help. The person go happy to give Jehovah the best animal wey e get. Na true say servants of Jehovah today no de do the kind sacrifice wey the Law talk about, but we still de do sacrifice. How? We de do this one when we use our time, power and things wey we get to worship Jehovah. Apostle Paul talk say when we de preach the good news, ‘de do good things for people and de share wetin we get with them,’ we de do sacrifice wey de make God happy. (Heb. 13:15, 16) The way we de use all our heart do Jehovah work, de show say we really de thank Jehovah for everything wey e don give us. So just like Israel people that time wey use all their heart do sacrifice to Jehovah, we need to de think about the kind mind wey we de use serve Jehovah and why we de serve-am.

Fine-Fine Things Wey You See for Bible

w05 5/15 19 ¶6

Lessons From the Book of Second Samuel

23:15-17. David get deep respect for the law wey Jehovah give about life and blood. Na e make, when three of e soldiers risk their life to fetch water for-am, e no gree drink the water because e no want do anything wey go be like say e don break Jehovah law. Na this kind mind we suppose get for everything wey Jehovah don command us.

AUGUST 1-7

FINE-FINE LESSON FROM BIBLE | 1 KINGS 1-2

“You De Learn From Your Mistake?”

it-2 987 ¶4

Solomon

The place wey Adonijah dey with the people wey join-am to take over the throne, no too far from Gihon. So when they hear the sound of music from Gihon, and as the people de shout say: “King Solomon go live long,” fear catch them and they run comot. But Solomon no kill Adonijah for wetin e do. This one show the kind peace wey Israel people go enjoy as Solomon don start to rule. If to say na Adonijah become king, e for kill Solomon. Adonijah run go temple make Solomon no kill-am. So King Solomon send people to go carry Adonijah come. When Adonijah reach where King Solomon dey, the king tell-am say e no go kill-am if e continue to behave well. Then, Solomon allow Adonijah go back to e house.​—1Ki 1:41-53.

it-1 49

Adonijah

But after David die, Adonijah do wetin put-am for trouble. E go meet Bathsheba and beg-am say make e tell Solomon to give-am Abishag as wife. Abishag na the young woman wey care for David when e don old. Adonijah tell Bathsheba say: “You know say na me suppose become king, and all the people for Israel don de expect say na me go become their king.” Even though say Adonijah gree say na Jehovah choose Solomon as king, this thing wey e talk show say e de feel say them give wetin e suppose get to Solomon. (1Ki 2:13-21) Adonijah fit don do this thing so that e no go be like say e lose everything. But the truth be say, e show say to take over the kingdom still dey e mind. This na because that time, na only the person wey get the right to take over the kingdom go fit marry the wife of the former king. (Compare 2Sa 3:7; 16:21.) Solomon see-am say to take the kingdom still dey Adonijah mind, so e send Benaiah make e kill Adonijah, and Benaiah no waste time to do-am.​—1Ki 2:22-25.

Fine-Fine Things Wey You See for Bible

w05 7/1 30 ¶1

Lessons From the Book of First Kings

2:37, 41-46. We de put our life for danger if we de think say we go fit disobey Jehovah command and go free. People wey decide say they go comot from ‘the road wey de lead to life,’ go really suffer for their bad decision.​—Matthew 7:14.

AUGUST 8-14

FINE-FINE LESSON FROM BIBLE | 1 KINGS 3-4

“To Get the Sense Wey God De Give Really Dey Important”

w11 12/15 8 ¶4-6

Solomon Example Na Warning for You or Na Better Example?

⁴ When Solomon just become king, God appear to-am for dream and tell Solomon say make e talk anything wey e want. Because Solomon know say e dey young and e no get experience as king, e beg God to give-am sense to fit rule well. (Read 1 Kings 3:5-9.) Jehovah really happy say Solomon beg for sense instead of money and property. Because of this one, Jehovah give Solomon the sense wey e ask for and still make-am rich. (1 Ki. 3:10-14) As Jesus talk, King Solomon get sense sotey when queen of Sheba hear about-am, e travel from e country to come see Solomon by e self.​—1 Ki. 10:1, 4-9.

⁵ We no de expect make Jehovah use miracle give us sense the way e do for Solomon. Solomon talk say: “Na Jehovah de give sense,” but e still talk say make we do our best to get this sense wey Jehovah de give. E say: ‘Listen with your ear so that you go get sense and de use your mind reason.’ When Solomon de talk about sense from Jehovah, e use some word like “do your best to get-am,” “continue to look for-am,” and “no stop to look for-am.” (Prov. 2:1-6) So e clear say we fit really get sense from God.

⁶ E good make we ask ourself say, ‘I be like Solomon wey show say e value the sense wey Jehovah de give?’ Because things hard, plenty people de put all their mind for their work and to make money. This one don still affect the type of education wey them de choose and where them choose to go school reach. What about you and your family? The things wey wuna don choose de show say wuna value the sense wey Jehovah de give and de do wuna best to get-am? You think say wuna go need to adjust some things for wuna life to fit get this sense more and more? The truth be say, if we get the sense wey God de give and use-am, e go help us for the rest of our life. Solomon talk say: ‘Then you go understand how to do the correct thing, how to judge well and no de do partial, and how to do everything wey good.’​—Prov. 2:9.

Fine-Fine Things Wey You See for Bible

w98 2/1 11 ¶15

Jehovah Na God Wey De Keep Agreement

¹⁵ Jehovah do everything wey e promise Abraham. E make e pikin them become big nation, give them Law wey them go follow and still bless them. For 1473 B.C.E., Joshua wey take over from Moses lead Israel people enter the Promise Land. And when Israel people share the land of Canaan for the 12 tribes, e show say Jehovah do as e promise Abraham say e pikin them go take over the land of Canaan. When Israel people obey Jehovah, e help them win all their enemy just as e promise them. This one really happen the time wey David be king. By the time Solomon become king, the third part of the agreement wey Jehovah make with Abraham, don happen. 1 Kings 4:20 talk say: “The people of Judah and Israel really plenty like the sand wey dey the side of the sea; them de chop, de drink and de happy.”

AUGUST 15-21

FINE-FINE LESSON FROM BIBLE | 1 KINGS 5-6

“Them Use Their Heart and Power Build for Jehovah”

w11 2/1 15

You Know?

Many people for Bible time know say the wood from the cedar tree for Lebanon de last well-well, e fine, e get better scent and insect no de chop-am. So e clear say na the best wood Solomon use build the temple. Today if you go the mountains of Lebanon, the cedar tree no plenty again like before.

it-1 424

Cedar

Because of the big building work wey they use the cedarwood do, na thousands of people do the work. Them cut the trees down, carry the wood pass waterside for Mediterranean Sea go Tyre or Sidon. From there, they go tie the wood together, and arrange them so that they go fit float ontop sea go Joppa or other place. Then they go carry the wood pass land go Jerusalem. For this work to fit go well, Solomon and Hiram make agreement and work together. (1Ki 5:6-18; 2Ch 2:3-10) After Solomon don build the temple finish, e continue to bring cedarwood come Jerusalem, na e make Bible talk say Solomon make “cedarwood plenty like sycamore tree,” when e be king for Israel.​—1Ki 10:27; compare Isa 9:9, 10.

it-2 1077 ¶1

Temple

To fit build the temple, Solomon force 30,000 men for Israel to go de cut wood for Lebanon. E divide them into three groups and each group get 10,000 men. Each group go work for Lebanon for one month and come back house stay for two months. Then the other group go go replace them. (1Ki 5:13, 14) Solomon get 70,000 people wey de carry load, and another 80,000 people wey de cut stones, all of them na people wey e force to do the work and them no be Israel people. (1Ki 5:15; 9:20, 21; 2Ch 2:2) King Solomon choose 550 men to supervise the work and 3,300 men to be their assistants. (1Ki 5:16; 9:22, 23) E be like say na only 250 men among them be Israel people but the other 3,600 men no be Israel people but them de stay for the land of Israel.​—2Ch 2:17, 18.

Fine-Fine Things Wey You See for Bible

g 5/12 17, box

Things Wey Bible Talk De Happen as Bible Talk-am​—Part 1

CORRECT RECORD OF TIME AND YEAR

One example wey show say Bible de keep correct record of time and year na wetin dey 1 Kings 6:1. This verse talk about the time wey King Solomon start to build the temple for Jerusalem. E talk say: “Solomon start to build the house of Jehovah the year wey make-am 480 years [complete 479 years] wey Israel people comot from Egypt, wey be the fourth year wey Solomon start to rule Israel, for the month of Ziv (wey be the second month).”

Bible record show say na the year 1034 B.C.E. be the fourth year wey Solomon rule Israel. If you count from 1034 B.C.E., to 1513 B.C.E. (the year wey Israel people comot from Egypt), you go get complete 479 years.

AUGUST 22-28

FINE-FINE LESSON FROM BIBLE | 1 KINGS 7

“Wetin We Fit Learn From the Two Copper Pillars?”

w13 12/1 13 ¶3

‘Wuna Go Get Copper From Mountain’

King Solomon use plenty copper when them de build the temple for Jerusalem. Plenty of the copper wey e use na the one wey e papa David get from Syria people wey e win for war. (1 Chronicles 18:6-8) The big copper basin (“molten sea”) wey the priest them de use de fit contain 17,500 gallons (66,000 L) of water and e fit be say the weight na 30,000kg. (1 Kings 7:23-26, 44-46) Two big-big copper pillar dey for the front of the temple. The pillar them high reach 26 feet (8 m), and the round design wey dey ontop them high reach 7.3 feet (2.2 m). The pillars get hole for inside from top to bottom. The body of the pillar thick reach 3 inch (7.5 cm) and the measurement round the pillar na about 17.5 feet (5.3 m). (1 Kings 7:15, 16; 2 Chronicles 4:17) Person fit really surprise when e think about the plenty copper wey Solomon use make all this things wey they put for the temple.

it-1 348

Boaz, II

Solomon put two big-big copper pillar for the front of the fine temple wey e build. The name of the one wey dey left na Boaz, and e fit be say e mean “With E Power.” And the name of the one wey dey for the right side na Jachin, wey mean “Make [Jehovah] Make-am Last.” So if you read the two of them together from right to left, e go mean ‘Make [Jehovah] make [the temple] last with e power.’​—1Ki 7:15-21; go check CAPITAL.

Fine-Fine Things Wey You See for Bible

it-1 263

To Bath

To fit worship Jehovah well and dey clean for e eye, we must dey clean for body and dey neat. The way Jehovah arrange how Israel people go de work for the tabernacle and the way e later arrange-am for the temple, show say to dey clean really dey important. The day wey they make Aaron and e pikin them priest, them first bath before them wear their priest cloth. (Ex 29:4-9; 40:12-15; Le 8:6, 7) When the priests want wash their hand and leg, them de use the water wey dey the copper basin for the courtyard of the tabernacle. And later them start to use water from the big copper basin (molten sea) for Solomon temple. (Ex 30:18-21; 40:30-32; 2Ch 4:2-6) For the Day of Atonement the high priest de bath two times. (Le 16:4, 23, 24) Everybody wey go outside the camp that day, must bath and wash their cloth before they enter the camp again. Whether na the person wey carry the goat of Azazel comot, person wey carry the red cow wey they want sacrifice, or the one wey carry any part wey remain from the animal wey they sacrifice.​—Le 16:26-28; Nu 19:2-10.

AUGUST 29–SEPTEMBER 4

FINE-FINE LESSON FROM BIBLE | 1 KINGS 8

“Prayer Wey Solomon Pray Wey Show Say E Dey Humble”

w09 11/15 9 ¶9-10

Personal Bible Study Go Make Your Prayer Better

⁹ If we want make Jehovah answer our prayer, the prayer must come from our heart. For 1026 B.C.E. when them de dedicate the temple wey Solomon build to Jehovah, Solomon pray with all e heart for front of all Israel people for Jerusalem just as they write-am for 1 Kings chapter 8. Cloud from Jehovah cover the temple after they put the ark of the covenant inside the Most Holy, this one make Solomon praise Jehovah.

¹⁰ Study Solomon prayer and see wetin e talk about to pray from our heart. Wetin Solomon talk show say na only Jehovah know wetin dey person heart. (1 Ki. 8:38, 39) That prayer still show say hope dey for person wey repent with all e heart. If the enemy of Israel people carry them go another land, Jehovah go hear their prayer if they repent and start to worship-am again with all their heart. (1 Ki. 8:48, 58, 61) This one show say e dey important make our prayer de come from our heart.

w99 1/15 17 ¶7-8

Show Say You Dey Humble When You De Pray

⁷ Whether we de pray make people hear or de pray alone, one important advice from Bible wey we must remember na say we need to show say we dey humble when we de pray. (2 Chronicles 7:13, 14) The way King Solomon pray when them de dedicate the temple for Jerusalem show say e dey humble. Even though say the temple wey Solomon build that time na one of the building wey fine and big pass for the whole earth, e still show say e dey humble when e pray say: “God go fit really live for this earth? See! The heavens, even the heaven of heavens no fit contain you, na this house wey I build go fit contain you?”​—1 Kings 8:27.

⁸ Just like Solomon, we need to dey humble when we de pray public prayer. Na true say when we de pray we no de do like say na we holy pass, but the way we de talk fit show if we dey humble. If we dey humble, we no go use big-big grammar or de form voice wey no be our real voice. We go help people to put mind for Jehovah, no be to show ourself. (Matthew 6:5) The things wey we de talk for prayer fit still show whether we dey humble. If we dey humble, we no go pray like say we de tell God make e do things the way we want-am. But we go beg Jehovah make e do wetin we de pray for, the way wey e want. David show us how we fit bring body down when we de pray when e beg Jehovah say: “Jehovah, we de beg you, abeg save us! Jehovah, abeg help us make we win.”​—Psalm 118:25; Luke 18:9-14.

Fine-Fine Things Wey You See for Bible

it-1 1060 ¶4

Heaven

King Solomon wey build the temple for Jerusalem talk say, “the heavens, even the heaven of heavens no fit contain” God. (1Ki 8:27) Since na Jehovah make everything for heaven, na e position high pass and “na only e name really dey high. E glory high pass earth and heaven.” (Ps 148:13) E dey easy for Jehovah to measure everything for heaven the way e easy for person to use e fingers measure something. (Isa 40:12) Wetin Solomon talk no mean say Jehovah no get where e de stay. Or say e dey everywhere and inside everything. We know this one because Solomon still talk say Jehovah de hear our prayer “from heaven for where [e] de stay.” This one na the heaven where angels de stay.​—1Ki 8:30, 39.