Te ʼu Gaue ʼa Te Kau Apositolo

13 ʼI Atiokia, neʼe ʼi ai te kau polofeta pea mo te kau faiako ʼi te kokelekasio:+ ko Palenapa, mo Simeone ʼae ʼe toe higoa ko Nisele, mo Lusiusi mai Silene, mo Manaene ʼae neʼe ako fakatahi mo Helote te pule ʼo te tisitilike, pea mo Saulo. 2 Neʼe natou tauhi kia Sehova* mo sesunio, pea neʼe ui leva e te laumalie maʼoniʼoni: “Kotou tuku keheʼi maʼaku ia Palenapa mo Saulo+ ke nā fakahoko te gaue ʼae neʼe au hinoʼi naua ki ai.”+ 3 Koia ʼi tanatou ʼosi sesunio mo faikole, neʼe natou hili ʼonatou nima kia naua pea natou fekauʼi leva ke nā olo.

4 Koia ko te ʼu tagata ʼaia, ʼae neʼe fekauʼi e te laumalie maʼoniʼoni, neʼe nā hihifo ki Selesia pea nā folau vaka leva ki te motu ko Sipele. 5 ʼI tanā tau ki Salamina, neʼe nā tala te folafola ʼa te ʼAtua ʼi te ʼu sinakoka ʼo te kau Sutea. Pea neʼe tokoni ia Soane kia naua.+

6 ʼI tanā kua fakalaka ʼi te motu katoa ʼo kaku ki Pafosi, neʼe nā felaveʼi mo te tagata Sutea ʼe higoa ko Pale-Sesu. Neʼe ko he tagata gaohi meʼa fakatemonio pea ko he polofeta loi. 7 Neʼe gaue maʼa te kovana ko Selesio Paulo, te tagata ʼatamai. Neʼe fekauʼi age e te kovana ia Palenapa mo Saulo, koteʼuhi neʼe fia fagono moʼoni ki te folafola ʼa te ʼAtua. 8 Kae ko Elimase, te tagata gaohi meʼa fakatemonio (ko te fakaliliu ʼaia ʼo tona higoa) neʼe fakafeagai kia naua, ʼo faigaʼi ke ina taʼofi te kovana ke ʼaua naʼa tui ki te ʼAliki. 9 Ko Saulo, ʼae ʼe toe higoa ko Paulo, neʼe fonu leva ʼi te laumalie maʼoniʼoni pea neʼe sio fakamamaʼu ki ai, 10 ʼo ina ui: “Ia koe ʼae ʼe fonu ʼi te kaka mo te agakovi fuape, foha ʼo te Tevolo,+ fili ʼo te faitotonu fuli pe, ʼe mole ke fakagata anai koa tau kakaʼi te ʼu ala totonu ʼo Sehova?* 11 Koia ʼe fakamauʼi anai koe e Sehova* pea ʼe ke kivi anai, ʼo mole ke toe sio ki te laʼa lolotoga he temi.” ʼI te temi pe ʼaia, neʼe nenefu mo fakapoʼuli tana sio, pea neʼe taufa ʼo kumi he tahi ke ina taki ia ia. 12 ʼI te sio ʼa te kovana ki te meʼa ʼaia, neʼe tui koteʼuhi neʼe punamaʼuli ʼi te ʼu meʼa neʼe ina ako ʼo ʼuhiga mo Sehova.*

13 Neʼe mavae ia Paulo mo ʼona kaumeʼa mai Pafosi ʼo folau vaka ki Peleka ʼi Pafilia. Kae neʼe mavae leva ia Soane+ ia naua ʼo toe liliu ki Selusalemi.+ 14 Kae mai Peleka neʼe hoko atu tanā fagona ʼo nā kaku ki Atiokia ʼi Pisitia. Neʼe nā hu ki te sinakoka+ ʼi te ʼaho ʼo te Sapato pea neʼe nā heheka ai. 15 Hili te lau ʼo te Lao+ pea mo te ʼu tohi ʼo te kau Polofeta, neʼe fekauʼi e te ʼu pule ʼo te sinakoka he tahi ke ina ui kia naua: “ ʼU tagata, ʼu tehina, kapau ʼe kolua fia fakalotomalohiʼi te hahaʼi, kolua palalau.” 16 Koia neʼe tuʼu ake ia Paulo, ʼo hiki tona nima pea neʼe ina ui:

“’U tagata, hahaʼi ʼo Iselaele pea mo koutou ʼae ʼe manavasiʼi ki te ʼAtua, kotou fagono mai. 17 Ko te ʼAtua ʼo te hahaʼi ʼaeni ʼo Iselaele neʼe ina filifili ʼatatou kui. Neʼe ina fakaliliu ia natou ko he puleʼaga malohi* lolotoga tanatou maʼuʼuli matapule ʼi Esipito pea neʼe ina fakamavae natou mai ai ʼaki tona malohi.+ 18 Pea lolotoga teitei taʼu ʼe 40, neʼe ina katakiʼi natou ʼi te toafa.+ 19 ʼI tana ʼosi fakaʼauha te ʼu puleʼaga ʼe fitu ʼi te fenua ʼo Kanaane, neʼe ina foaki age tonatou fenua ko he tofiʼa.+ 20 Neʼe hoko te ʼu meʼa fuli ʼaia lolotoga teitei taʼu ʼe 450.

“Hili ia, neʼe ina foaki kia natou he ʼu tuʼi fakamau ʼo kaku ki te polofeta ko Samuele.+ 21 Kae ki muli age, neʼe natou kole honatou hau,+ pea neʼe foaki e te ʼAtua kia natou ia Saulo, te foha ʼo Kisi, te tagata mai te telepi ʼo Pesamino,+ pea neʼe hau ia taʼu ʼe 40. 22 ʼI tana ʼosi fakahifo ia ia, neʼe ina filifili leva ia Tavite ke hau kia natou.+ Neʼe ina fakamoʼoni ʼo ʼuhiga mo ia: ‘Kua au maʼu ia Tavite te foha ʼo Sese,+ ko he tagata ʼe mulimuli ki toku finegalo*+ pea ʼe ina fai anai te ʼu meʼa fuli ʼae ʼe au loto ki ai.’ 23 Pea ʼo mulimuli ki tana fakapapau, ʼe ko te hakoga ʼo te tagata ʼaia ka haʼu ai te fakamaʼuli maʼa Iselaele, ia Sesu.+ 24 ʼI muʼa ʼo tana haʼu, neʼe fakamafola fakahaha e Soane ki te hahaʼi fuli ʼo Iselaele ke natou papitema moʼo fakaha tanatou fakahemala.+ 25 Kae ʼi te katoa ʼo te gaue ʼa Soane, neʼe ina ui: ‘ ʼE mole ko au ia ia ʼae ʼe kotou manatu ki ai. Kae ko ia ʼae ʼe muli mai ʼe mole au tuha ke au veteki ʼona sulie.’+

26 “ ʼU tagata, ʼu tehina, ia koutou ʼae ko te hakoga ʼo te famili ʼo Apalahamo pea mo koutou ʼae ʼe manavasiʼi ki te ʼAtua, ko tatou ʼaeni kua foaki ki ai te folafola ʼo te fakamaʼuli.+ 27 Ko te hahaʼi ʼo Selusalemi pea mo ʼonatou pule neʼe mole natou fakamoʼoni kia ia, kae neʼe natou fakamauʼi ʼo natou fakahoko ai te ʼu folafola ʼae neʼe tala e te kau Polofeta,+ ʼae ʼe lau leʼo lahi ʼi te ʼu sapato fuli. 28 Logo la neʼe mole natou maʼu hana hala ke tuha mo te mate,+ kae neʼe natou kole kia Pilato ke matehi ia.+ 29 Pea ʼi tanatou ʼosi fakahoko te ʼu meʼa fuli ʼae neʼe tohi ʼo ʼuhiga mo ia, neʼe natou fakahifo mai te pou* mo tuku ki te fale maka.*+ 30 Kae neʼe fakatuʼuake ia ia e te ʼAtua mai te kau mate,+ 31 pea neʼe lahi te ʼu ʼaho neʼe ha ai kia natou ʼae neʼe hake fakatahi mo ia mai Kalilea ki Selusalemi. ʼI te temi nei, ko natou ʼaia ko ʼana fakamoʼoni ki te hahaʼi.+

32 “Koia ʼe ma tala atu te logo lelei ʼo ʼuhiga mo te fakapapau ʼae neʼe fai ki ʼatatou kui. 33 Kua fakahoko katoa e te ʼAtua te fakapapau ʼaia kia tatou, ko ʼanatou fanau, ʼi tana fakatuʼuake ia Sesu.+ Ohage ko tona tohi ʼi te lua pesalemo: ‘Ko koe toku ʼalo, pea kua au liliu ʼi te ʼaho nei ko tau tamai.’+ 34 Neʼe fakatuʼuake ia ia e te ʼAtua mai te kau mate pea ʼe mole ina toe maʼu anai he sino ʼe feala ke pala. Neʼe Ina fakaha te faʼahi ʼaia: ‘ ʼE au fakahoko anai maʼa koutou taku fakapapau kia Tavite ʼo ʼuhiga mo toku ʼofa agatonu. Pea ʼe tuha te fakapapau ʼaia mo te falala.’+ 35 Koia ʼe toe ui ʼi te tahi pesalemo: ‘ ʼE mole ke fakagafua anai ke pala te sino ʼo tau tagata agatonu.’+ 36 Kae ko Tavite neʼe tauhi ki te ʼAtua* ʼi tona temi maʼuli, neʼe mate,* neʼe tanu mo ʼana kui pea neʼe pala tona sino.+ 37 Kae neʼe mole pala te sino ʼo ia ʼae neʼe fakatuʼuake e te ʼAtua.+

38 “Koia ke kotou iloʼi, ʼu tehina, ʼe tala atu ʼe fakamolemole anai te ʼu agahala ʼaki ia ia.+ 39 Neʼe mole feala ke kotou liliu ʼo faitotonu ʼaki te Lao ʼa Moisese,+ kae ʼaki te mate ʼo te tagata ʼaia, ko ʼae ʼe tui ʼe liliu anai ʼo faitotonu ia muʼa ʼo te ʼAtua.+ 40 Koia kotou tokakaga ke ʼaua naʼa hoko kia koutou te ʼu folafola ʼaeni neʼe fai e te kau Polofeta: 41 ‘Kotou tokagaʼi, hahaʼi fonu ʼi te lotofehiʼa, kotou punamaʼuli mo kotou pulinoa, koteʼuhi ʼe au fakahoko ʼi takotou kei maʼuʼuli he gaue ʼe mole kotou tui anai ki ai tatau aipe pe ʼe fakamatalatala atu e he tahi.’ ”+

42 ʼI te hu ki tuʼa ʼa Paulo mo Palenapa, neʼe kole mamahi age e te hahaʼi ke nā toe palalau ki te ʼu faʼahi ʼaia ʼi te Sapato ka hoa mai. 43 Koia ʼi te ʼosi mavetevete ʼa te hahaʼi ʼae neʼe fakatahitahi ʼi te sinakoka, tokolahi te kau Sutea pea mo te kau poloselite* ʼae neʼe atolasio ki te ʼAtua, neʼe natou mulimuli ia Paulo mo Palenapa. Pea ʼi tanā palalau kia natou, neʼe nā fakalotomalohiʼi natou ke nonofo ʼi te ʼofa makehe ʼo te ʼAtua.+

44 ʼI te Sapato ʼae neʼe hoa mai ki ai, neʼe teitei pe ko te kolo katoa ʼae neʼe fakatahitahi ke natou fagono ki te folafola ʼa Sehova.* 45 ʼI te sisio ʼa te kau Sutea ki te kaugamalie, neʼe natou maheheka kovi pea natou laukoviʼi mo fakafihiʼi te ʼu palalau ʼae neʼe fai e Paulo.+ 46 Pea neʼe ui fakahagatonu e Paulo mo Palenapa* kia natou: “Neʼe tonu ke fakaha atu muʼa kia koutou ia te folafola ʼa te ʼAtua.+ Kae ʼi takotou fakafisi ki ai mo takotou manatu ʼae ʼe mole kotou tuha mo te maʼuli heʼe gata, koia ʼe matou olo ai kia natou ʼae ʼe mole Sutea.+ 47 Koteʼuhi neʼe fakatotonu mai e Sehova:* ‘Kua au fakanofo koe ko he malama ʼo te ʼu puleʼaga, ke ke liliu ko he fakamaʼuli ʼo kaku ki te ʼu potu taupotu ʼo te kele.’ ”+

48 ʼI te logo ʼa natou ʼae ʼe mole Sutea ki te faʼahi ʼaia, neʼe natou fakafiafia mo fakakololiaʼi te folafola ʼa Sehova.* Pea ko natou fuli ʼae neʼe lelei ʼonatou loto ke natou maʼu te maʼuli heʼe gata, neʼe natou tui leva. 49 Pea neʼe mafola te folafola ʼa Sehova* ʼi te fenua katoa. 50 Kae neʼe fakakoviʼi e te kau Sutea ia te ʼu fafine maʼu tuʼulaga ʼae neʼe manavasiʼi ki te ʼAtua pea mo te ʼu tagata maʼuhiga ʼo te kolo. Pea neʼe fakatagaʼi+ ai ia Paulo mo Palenapa mo kapu ia naua mai tonatou kolo. 51 Koia neʼe nā tu ai te efu ʼae ʼi ʼonā vaʼe ohage ko he fakatokaga kia natou pea neʼe nā olo leva ki Ikoniome.+ 52 Pea neʼe haga fiafia aipe te kau tisipulo+ mo fonu ʼi te laumalie maʼoniʼoni.