TE LUA TOHI ʼO TE ʼU HAU

1 Hili te mate ʼo Akapo,+ neʼe agatuʼu leva ia Moape ki Iselaele.

2 ʼI te temi ʼaia, neʼe to ia Akasia ʼi he pu neʼe pupunu ʼaki he meʼa vagavaga ʼi tona koga fale fata ʼi Samalia ʼo lavea ai. Koia, neʼe ina ui leva ki he ʼu tagata ʼave logo: “Kotou olo ʼo fakafehuʼi ia Paale-sepu, te ʼatua ʼo Ekelone+ ke iloʼi ai pe ʼe au toe lelei anai.”+ 3 Kae neʼe ui e te ʼaselo ʼa Sehova kia Elia,*+ te tagata Tisipe: “Tuʼu ake pea ke alu ʼo fakafelaveʼi ki te ʼu tagata ʼave logo ʼa te hau ʼo Samalia pea ke ui age kia natou: ‘ ʼE mole ʼi ai koa la he ʼAtua ʼi Iselaele ʼae ʼe kotou olo ai ʼo fakafehuʼi ia Paale-sepu, te ʼatua ʼo Ekelone?+ 4 Koia, koʼeni te folafola ʼa Sehova: “ ʼE mole ke tuʼu ake anai mai te palepale ʼae ʼe ke takoto ai, he ʼe ke mate moʼoni anai.” ’ ” Pea neʼe alu leva ia Elia.

5 ʼI te toe liliu ʼa te ʼu tagata ʼave logo ki te hau, neʼe ina fehuʼi atu aipe kia natou: “He koʼe kua kotou toe liliu mai?” 6 Neʼe natou tali age ki ai: “Neʼe haʼu he tagata ʼo fakafelaveʼi mai kia matou, pea neʼe ina ui mai: ‘Kotou toe liliu ki te hau ʼae neʼe ina fekauʼi mai koutou, pea kotou ui age ki ai: “Koʼeni te folafola ʼa Sehova: ‘ ʼE mole ʼi ai koa la he ʼAtua ʼi Iselaele ʼae ʼe ke fekauʼi ai he ʼu tagata ke olo ʼo fakafehuʼi ia Paale-sepu, te ʼatua ʼo Ekelone? Koia, ʼe mole ke tuʼu ake anai mai te palepale ʼae ʼe ke takoto ai, he ʼe ke mate moʼoni anai.’ ” ’ ”+ 7 Neʼe ina fehuʼi leva kia natou: “Neʼe feafeaʼi te tagata ʼae neʼe alu atu ʼo fai atu te ʼu palalau ʼaia?” 8 Pea neʼe natou tali age: “Neʼe ko he tagata neʼe ina tui hona kofu fuluʼi manu+ pea neʼe haʼi ʼi tona koga loto tona kiliʼi pipi.”+ Neʼe ina ui atu aipe: “Ko Elia, te tagata Tisipe.”

9 Pea neʼe fekauʼi leva e te hau he pule solia mo ʼana tagata ʼe toko 50 ke natou olo kia ia. ʼI te alu ʼa te pule solia ki ai, neʼe nofo ia ʼi te tumutumu ʼo te moʼuga. Pea neʼe ina ui age ki ai: “Tagata ʼa te ʼAtua moʼoni,+ neʼe ui mai e te hau ke ke hifo age.” 10 Kae neʼe tali age e Elia ki te pule solia ʼo te toko 50: “ ʼIo, kapau ko au ʼe ko he tagata ʼa te ʼAtua, ke hifo mai te lagi he afi,+ ʼo tutu ia koe mo ʼau tagata ʼe toko 50.” Pea neʼe hifo mai te lagi he afi ʼo tutu ia ia mo ʼana tagata ʼae ʼe toko 50.

11 Pea neʼe toe fekauʼi leva e te hau he tahi age pule solia mo ʼana tagata ʼe toko 50 ke natou olo kia ia. Neʼe alu ai te pule solia pea neʼe ina ui age ki ai: “Tagata ʼa te ʼAtua moʼoni, neʼe ui mai e te hau ke ke hifo fakavilivili age.” 12 Kae neʼe tali age e Elia: “Kapau ko au ʼe ko he tagata ʼa te ʼAtua moʼoni, ke hifo mai te lagi he afi, ʼo tutu ia koe mo ʼau tagata ʼe toko 50.” Pea neʼe hifo mai te lagi he afi ʼa te ʼAtua ʼo tutu ia ia mo ʼana tagata ʼae ʼe toko 50.

13 Pea neʼe toe fekauʼi leva e te hau he tahi age pule solia mo ʼana tagata ʼe toko 50, neʼe ko te tolu pule solia ʼaia. Kae neʼe alu te pule solia ʼaia ʼo te toko 50 ʼo tuʼutuli ifo ia muʼa ʼo Elia pea mo kole tona manavaʼofa, ʼo ina ui age ki ai: “Fakalelei siʼou loto, tagata ʼa te ʼAtua moʼoni, ke maʼuhiga kia koe toku maʼuli* pea mo te maʼuli* ʼo ʼau tagata faifekau ʼaeni ʼe toko 50. 14 Neʼe kua hifo mai te lagi he afi ʼo tutu te ʼu ʼuluaki pule solia ʼe lua mo ʼanā tagata ʼae ʼe toko 50, kae ʼi te lakaga leva ʼaeni, ke maʼuhiga kia koe toku maʼuli.”*

15 Pea neʼe ui e te ʼaselo ʼa Sehova kia Elia: “Hifo mo ia. ʼAua naʼa ke mataku ia ia.” Neʼe tuʼu ake ai ʼo alu mo ia ki te hau. 16 Pea neʼe ui e Elia ki te hau: “Koʼeni te folafola ʼa Sehova: ‘Neʼe ke fekauʼi he ʼu tagata ʼave logo ke natou olo ʼo fakafehuʼi ia Paale-sepu, te ʼatua ʼo Ekelone.+ ʼE mole ʼi ai koa la he ʼAtua ʼi Iselaele?+ He koʼe koa neʼe mole ke fakafehuʼi ia ia? Koia, ʼe mole ke tuʼu ake anai mai te palepale ʼae ʼe ke takoto ai, he ʼe ke mate moʼoni anai.’ ” 17 Pea neʼe mate leva te hau, ohage pe ko tona fakaha age e Sehova ʼaki ia Elia. Kae neʼe mole hona foha, koia neʼe hau leva ia Solame*+ ʼo fetogi ia ia, ʼi te lua taʼu ʼo te pule ʼa te hau ʼo Suta ko Solame,+ te foha ʼo Sosafate.

18 Pea ko te toe ʼo te hisitolia ʼo Akasia,+ te ʼu meʼa ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele?

2 ʼI te temi ʼae neʼe ʼamanaki ʼave ai e Sehova ia Elia+ ki te lagi ʼi he tuʼani matagi,+ neʼe mavae ia Elia mo Eliseo+ mai Kilekale.+ 2 Pea neʼe ui e Elia kia Eliseo: “Fakalelei siʼou loto, kae ke ke nofo ʼi heni he neʼe fekauʼi au e Sehova ki Petele.” Kae neʼe tali age e Eliseo: “ ʼE au tala moʼoni atu kia koe pea ia muʼa ʼo Sehova, ʼe mole au liʼaki anai koe.” Neʼe nā olo ai ki Petele.+ 3 Neʼe ʼomai leva te ʼu foha ʼo te kau polofeta* ʼae ʼi Petele kia Eliseo ʼo natou ui age: “ ʼE ke iloʼi koa ʼe ʼave anai e Sehova ʼi te ʼaho nei tou pule, pea ʼe mole toe pule anai kia koe?”+ Neʼe ina tali age kia natou: “ ʼEi, kua au ʼosi iloʼi pe. Kotou fakalologo.”

4 Neʼe ui leva e Elia kia Eliseo: “Fakalelei siʼou loto, kae ke ke nofo ʼi heni he neʼe fekauʼi au e Sehova ki Seliko.”+ Kae neʼe ina tali age: “ ʼE au tala moʼoni atu kia koe pea ia muʼa ʼo Sehova, ʼe mole au liʼaki anai koe.” Neʼe nā olo ai ki Seliko. 5 Neʼe fakaovi age te ʼu foha ʼo te kau polofeta ʼae ʼi Seliko kia Eliseo ʼo natou ui age ki ai: “ ʼE ke iloʼi koa ʼe ʼave anai e Sehova ʼi te ʼaho nei tou pule, pea ʼe mole toe pule anai kia koe?” Neʼe ina tali age kia natou: “ ʼEi, kua au ʼosi iloʼi pe. Kotou fakalologo.”

6 Pea neʼe ui leva e Elia ki ai: “Fakalelei siʼou loto, kae ke ke nofo ʼi heni he neʼe fekauʼi au e Sehova ki te Solotane.” Kae neʼe ina tali age: “ ʼE au tala moʼoni atu kia koe pea ia muʼa ʼo Sehova, ʼe mole au liʼaki anai koe.” Neʼe nā olo ai. 7 Neʼe muliʼi naua e te ʼu foha ʼo te kau polofeta ʼe toko 50 pea neʼe natou tutuʼu mai mamaʼo ʼo sioʼi mai tanā tutuʼu ovi ki te Solotane. 8 Neʼe toʼo leva e Elia tona pulupulu,+ ʼo ina takatakai, pea ina taʼi ʼaki te vai. Neʼe vaelua ai te vai, pea neʼe nā fakalaka leva ʼi he kele moamoa.+

9 ʼI tanā kua ʼosi fakalaka, neʼe ui leva e Elia kia Eliseo: “Kole mai te meʼa ʼae ʼe ke loto ke au fai maʼa koe ʼi muʼa ʼo toku ʼave e te ʼAtua.” Pea neʼe kole age e Eliseo: “Fakalelei siʼou loto, kae ʼe feala la ke au maʼu he ʼu vahe ʼe lua+ ʼo te laumalie maʼoniʼoni+ ʼae ʼe ke maʼu?”* 10 Neʼe ina tali age: “ ʼE faigataʼa foki te meʼa ʼae ʼe ke kole mai. Kae kapau ʼe ke sio ki toku ʼave, pea ʼe hoko anai te meʼa ʼae neʼe ke kole mai. Pea kapau ʼe mole ke sio ki ai, pea ʼe mole hoko anai ia.”

11 ʼI tanā haʼele faipalalau ʼaia, fokifa pe neʼe ha he saliote tau mo he ʼu hosi neʼe hage ko he afi+ ʼi te vaha ʼo naua, pea neʼe ʼave ia Elia ki te lagi ʼi he tuʼani matagi.+ 12 Neʼe mamata ia Eliseo ki ai, pea neʼe kalaga: “Siʼaku tamai, siʼaku tamai! Te saliote tau ʼa Iselaele pea mo ʼana tagata heka hosi!”+ ʼI tana mole kei sio leva kia Elia, neʼe ina hae lua ʼona kofu.+ 13 Hili ʼaia, neʼe ina toʼo ake te pulupulu+ ʼo Elia ʼae neʼe to ifo, pea neʼe toe liliu ʼo tuʼu ʼi te kauvai ʼo te Solotane. 14 Neʼe ina toʼo leva te pulupulu ʼo Elia ʼae neʼe to ifo ʼo ina taʼi ʼaki te vai pea mo ina ui: “ ʼE ʼifea ia Sehova, te ʼAtua ʼo Elia?” ʼI tana taʼi ʼaia te vai, neʼe vaelua ai pea neʼe fakalaka leva ia Eliseo.+

15 ʼI te sisio ʼa te ʼu foha ʼo te kau polofeta ʼae ʼi Seliko kia ia mai mamaʼo, neʼe natou ui: “Kua maʼu e Eliseo te laumalie maʼoniʼoni ʼae neʼe maʼu e Elia.”+ Neʼe natou olo ai leva ʼo fakafelaveʼi kia ia pea mo tulolo ki te kele ʼi ʼona muʼa. 16 Pea neʼe natou ui age ki ai: “ ʼE ʼi ai ni tagata lototoʼa ʼe toko 50 ʼe fakatahi ʼi heni mo matou ʼaeni ko ʼau tagata faifekau. Fakalelei siʼou loto, kae ke tuku ke natou olo ʼo kumi tou pule. Naʼa meʼa age pe neʼe toʼo ake ia ia e te laumalie* ʼo Sehova ʼo li ki he moʼuga, peʼe ki he potu fenua laulelei.”+ Kae neʼe ina tali age: “ ʼAua naʼa kotou fekauʼi ia natou ke olo ʼo kumi.” 17 Kae ʼi tanatou faiga malohi age ki ai, neʼe ufiufi ai leva ʼo ina ui: “Fekauʼi ke olo.” Neʼe natou fekauʼi ai te ʼu tagata ʼe toko 50 ke olo. Neʼe natou kumi ai ia Elia lolotoga ʼaho ʼe tolu kae neʼe mole pe natou maʼu. 18 ʼI tanatou toe liliu mai kia Eliseo, neʼe kua nofo ia ʼi Seliko.+ Pea neʼe ina ui age kia natou: “Neʼe mole au ui atu koa la ke mole kotou olo?”

19 Ki muli age, neʼe ui e te hahaʼi tagata ʼo te kolo kia Eliseo: “Siʼomatou pule, ʼe ke sio ki te tuʼuʼaga lelei ʼo te kolo,+ kae ʼe ʼuli te vai pea ʼe ko he fenua ʼe kele kaka.”* 20 Neʼe ina ui age kia natou: “Kotou ʼaumai he kiʼi ipu foʼou neʼe ʼai ki ai he moʼi masima.” Neʼe natou ʼaumai ai ki ai. 21 Pea neʼe alu leva ki te matapuna vai ʼo li ki ai he moʼi masima+ pea neʼe ina ui: “Koʼeni te folafola ʼa Sehova: ‘ ʼE au fakamaʼa te vai ʼaeni. ʼE mole toe ʼi ai anai ni mate mo ni fafine paʼa* ʼuhi ko te vai ʼaia.’ ” 22 Pea neʼe maʼa ai te vai ʼo kaku mai ki te ʼaho nei, ohage pe ko tona fakaha e Eliseo.

23 Pea neʼe mavae leva mai ai ʼo alu ki Petele. ʼI tana alu ʼi te ala, neʼe ʼomai te tamaliki tagata mai te kolo ʼo vaʼi ia ia.+ Neʼe natou ui: “Hake, ʼulu tula! Hake, ʼulu tula!” 24 Neʼe maliu leva ʼo sio kia natou, pea neʼe ina kole kia Sehova ke ina tauteaʼi natou. Pea neʼe ʼomai mai te vao matuʼa te ʼu uluso fafine ʼe lua+ ʼo nā hae liki te ʼu tamaliki ʼe toko 42 ʼi te tamaliki ʼaia.+ 25 Neʼe alu leva ki te Moʼuga ʼo Kalemelo,+ pea neʼe toe liliu ai ki Samalia.

3 Neʼe hau leva ia Solame,+ te foha ʼo Akapo, ki Iselaele ʼi Samalia, ʼi te 18 taʼu ʼo te pule ʼa Sosafate, te Hau ʼo Suta. Pea neʼe pule lolotoga taʼu ʼe 12. 2 Neʼe ina haga fai pe te meʼa ʼae ʼe kovi kia mata ʼo Sehova, kae neʼe mole hage leva ko tana tamai peʼe ko tana faʼe, he neʼe ina maumauʼi te pou maka taputapu ʼo Paale ʼae neʼe faʼu e tana tamai.+ 3 Kae neʼe ina fai te ʼu agahala ʼae neʼe uga e Selopoamo, te foha ʼo Nepate, ke fai e Iselaele.+ Neʼe mole maliu kehe mai ai.

4 Neʼe maʼu e Mesa, te hau ʼo Moape ni faga ovi. Pea neʼe ko tana agamahani ko te totogi ki te hau ʼo Iselaele he ʼu akeno ʼe 100 000 pea mo he ʼu ovi tagata neʼe mole tele ʼe 100 000 ohage ko he tukuhau. 5 ʼI te ʼosi mate pe ʼo Akapo,+ neʼe agatuʼu leva te hau ʼo Moape ki te hau ʼo Iselaele.+ 6 Koia, neʼe mavae ai te Hau ko Solame ʼi te ʼaho ʼaia mai Samalia pea neʼe ina fakamaʼopoʼopo ia Iselaele katoa. 7 Neʼe ina toe fakaha foki kia Sosafate, te Hau ʼo Suta: “Kua agatuʼu mai kia au te hau ʼo Moape. ʼE ke haʼu anai koa mo au ʼo tauʼi ia Moape?” Neʼe ina tali age: “ ʼEi, ʼe au alu anai mo koe.+ ʼE au hage pe ko koe. ʼE hage pe taku hahaʼi ko tau hahaʼi pea ʼe hage pe ʼaku hosi ko ʼau hosi.”+ 8 Pea neʼe ina fehuʼi age: “Ko te ala fea ʼae ʼe tonu ke tou olo ai?” Neʼe ina tali age: “ ʼI te ala ʼo te toafa ʼo Etome.”

9 Neʼe olo ai leva te hau ʼo Iselaele, mo te hau ʼo Suta pea mo te hau ʼo Etome.+ Kae hili ʼaho ʼe fitu ki tanatou haʼele, neʼe mole kei ʼi ai he moʼi vai maʼa te kau solia pea mo te ʼu manu ʼae neʼe natou ʼave. 10 Pea neʼe ui e te hau ʼo Iselaele: “ ʼI malaʼia foki! Neʼe fakatahiʼi e Sehova ia tatou, te ʼu hau ʼaeni ʼe toko tolu, kae neʼe ina tuku leva tatou ki te ʼu nima ʼo te kau Moape!” 11 Pea neʼe ui e Sosafate: “ ʼE mole ʼi ai koa la he polofeta ʼa Sehova ʼi heni ke tou fakafehuʼi ai ia Sehova ʼaki ia ia?”+ Neʼe tali e he tahi ʼo te hahaʼi faifekau ʼa te hau ʼo Iselaele: “ ʼEi, ko Eliseo,+ te foha ʼo Sapate, ʼae neʼe ina huaʼi tuʼumaʼu te vai ki te ʼu nima ʼo Elia.”*+ 12 Neʼe ui leva e Sosafate: “ ʼE feala ke ina fakaha mai te meʼa ʼae ʼe loto ki ai ia Sehova.” Neʼe olo leva ki ai te hau ʼo Iselaele, mo Sosafate pea mo te hau ʼo Etome.

13 Neʼe ui e Eliseo ki te hau ʼo Iselaele: “He koʼe ʼe ke haʼu kia au?+ Alu ki te ʼu polofeta ʼo tau tamai pea mo te ʼu polofeta ʼo tau faʼe.”+ Kae neʼe ui age e te hau ʼo Iselaele: “Kailoa ia, he ʼe ko Sehova ʼae neʼe ina fakatahiʼi matou, te ʼu hau ʼaeni ʼe toko tolu, ke ina tuku matou ki te ʼu nima ʼo te kau Moape.” 14 Neʼe tali e Eliseo ki ai: “ ʼE au tala moʼoni atu ia muʼa ʼo Sehova ʼo te ʼatu kautau ʼae ʼe au tauhi ki ai,* ka na neʼe mole au fakaʼapaʼapa la kia Sosafate+ te Hau ʼo Suta, ʼe mole au tokagaʼi anai koe.+ 15 ʼI te lakaga nei, kotou ʼaumai he tagata ta alepa.”*+ Pea ʼi te temi pe ʼae neʼe ta ai e te tagata tana alepa, neʼe hifo te laumalie* ʼo Sehova kia Eliseo.+ 16 Pea neʼe ina ui leva: “Koʼeni te folafola ʼa Sehova: ‘Kotou keli he ʼu tafega vai ʼi te vai tafe* ʼaeni, 17 koteʼuhi koʼeni te folafola ʼa Sehova: “ ʼE mole kotou sisio anai ki he matagi, pea ʼe mole kotou sisio anai ki he ʼua, kae ʼe fonu anai te vai tafe* ʼaeni ko te vai.+ Pea ʼe kotou inu anai ki ai, ia koutou, mo ʼakotou faga manu pea mo ʼakotou ʼihi atu manu.” ’ 18 ʼE mole faigataʼa te meʼa ʼaia kia mata ʼo Sehova,+ he ʼe ina toe tuku atu anai mo te kau Moape ki ʼokotou nima.+ 19 Pea ʼe tonu anai ke kotou maumauʼi te ʼu kolo tau fuli+ mo te ʼu kolo maʼuhiga fuli, mo kotou taʼaga te ʼu fuʼu ʼakau lelei fuli, mo pupunu te ʼu matapuna vai fuli, pea mo laku ni maka ki te ʼu moʼi kele lelei fuli ke mole feala hona gaueʼi.”+

20 Pea ʼi te uhu ake, ʼi te temi ʼae ʼe momoli ai te molaga meʼa kai ʼo te uhu,+ neʼe tafe fakafokifa mai te vai mai Etome pea neʼe lofia ai te fenua.

21 Neʼe logo leva te kau Moape fuli ki te ʼomai ʼa te ʼu hau ʼo tauʼi natou. Koia neʼe natou fakatahiʼi ai te ʼu tagata fuli ʼae neʼe feala ke natou fakaʼaogaʼi he ʼu mahafu,* pea neʼe natou nonofo leva ʼi te tuʼakoi ʼo tonatou fenua. 22 ʼI tanatou ʼaʼala ake kei uhuuhu, neʼe gigila te laʼa ʼi te vai, pea neʼe manatu ia te kau Moape ʼae neʼe nonofo ʼi te tahi faʼahi, neʼe kula te vai ohage ko te toto. 23 Neʼe natou ui: “ ʼE ko te toto! ʼE mahino ia neʼe kua fematematehiʼaki pe te ʼu hau ia natou ʼaki te heleta. Koia, hahaʼi ʼo Moape, tou olo ʼo toʼo maʼa tatou te ʼu koloa!”+ 24 ʼI tanatou hu ki te nofoʼaga ʼo te kau solia Iselaele, neʼe tutuʼu ake te kau Iselaele ʼo natou kamata matematehi te kau Moape, ʼae neʼe feholaki ʼi ʼonatou muʼa.+ Neʼe kaku leva te kau Iselaele ki Moape, ʼo natou matehi te kau Moape ʼi tanatou olo ʼaia. 25 Neʼe natou maumauʼi te ʼu kolo, pea neʼe tahi li e te ʼu tagata tana foʼi maka ki te ʼu moʼi kele lelei fuli, ʼo fonu maka ai. Neʼe natou pupunu te ʼu matapuna vai fuli+ mo taʼaga te ʼu fuʼu ʼakau lelei fuli.+ Pea neʼe kei tuʼu pe te ʼu kaupa maka ʼo te kolo ko Kile-aleseti.+ Neʼe olo leva te kau solia mo ʼanatou makamaka ʼo ʼa takai pea mo maumauʼi te kolo.

26 Neʼe mahino ai leva ki te hau ʼo Moape ʼe mole malo anai ʼi te tau. Koia, neʼe ina ʼave ai he ʼu tagata toʼo heleta ʼe toko 700 ke feala hana alu ki te hau ʼo Etome.+ Kae neʼe mole feala. 27 Koia, neʼe ina toʼo ai tona foha lahi ʼae neʼe tonu ke hau ʼo fetogi ia ia, ʼo ina momoli ohage ko he holokoseta*+ ʼi te kaupa. Pea neʼe lahi ʼosi te iita ki Iselaele, ʼo natou mavae mai ai mo toe liliu ki tonatou fenua.

4 Neʼe kalaga he fafine ʼi te ʼu ʼohoana ʼo te ʼu foha ʼo te kau polofeta+ kia Eliseo: “Kua mate siʼoku ʼohoana, ia tau tagata faifekau pea ʼe ke iloʼi lelei pe neʼe manavasiʼi tuʼumaʼu ia ia kia Sehova.+ Kae neʼe haʼu he tagata ʼe ma tuʼu maʼua ki ai ʼo ʼave ʼama fanau ʼe toko lua ke liliu ko hana ʼu kaugana.” 2 Pea neʼe ui age e Eliseo: “Kotea ʼae ʼe feala ke au fai maʼa koe? Fakaha mai pe kotea ʼae ʼe ke maʼu ʼi tou ʼapi.” Neʼe ina tali age: “ ʼE mole au maʼu he meʼa ʼi toku ʼapi, gata pe ki he ʼaiʼaga lolo.”+ 3 Neʼe ui age leva e te polofeta: “Alu ki ʼou vahaʼa fale fuli ʼo kole mai ai he ʼu ʼutuʼaga meʼa ʼe ʼago. Pea ke tanaki ke lahi te ʼu ʼutuʼaga meʼa ʼaia. 4 Pea ke alu mo ʼau tama ki tou ʼapi pea ke pupunu leva te matapa. Ke ke ʼuʼutu te ʼu ʼutuʼaga meʼa fuli ʼaia, pea ke tuku keheʼi leva te ʼu ʼutuʼaga meʼa ʼae kua fonu.” 5 Neʼe alu ai te fafine.

Neʼe feulufi leva mo ʼana tama ki tonatou ʼapi, pea neʼe ina pupunu te matapa. Neʼe fakatoʼo age e ʼana tama ki ai te ʼu ʼutuʼaga meʼa, pea neʼe ina ʼuʼutu.+ 6 ʼI te kua fonu ʼo te ʼu ʼutuʼaga meʼa, neʼe ina ui ki he tahi ʼo ʼana tama: “ ʼAumai he tahi ʼutuʼaga meʼa.”+ Kae neʼe ina ui age: “ ʼE mole kei ʼi ai.” Neʼe gata ai leva te hali ʼo te lolo.+ 7 Neʼe alu ai ʼo fakaha ki te tagata ʼa te ʼAtua moʼoni, pea neʼe ui age e te tagata: “Alu ʼo fakatau te lolo mo huʼi ʼou maʼua, pea ʼe feala leva kia koe mo ʼau tama ke kotou maʼuli ʼi te meʼa ʼae ka toe.”

8 ʼI te tahi ʼaho, neʼe alu ia Eliseo ki Sunemi,+ ʼae neʼe nofo ai he fafine maʼuhiga. Neʼe kole age e te fafine ʼaia kia ia ke haʼu ʼo kai ʼi tona ʼapi.+ Pea ʼi te ʼu lakaga fuli pe ʼae neʼe fakalaka ai ʼi te kolo ʼaia, neʼe afe muʼa ʼo kai ʼi ai. 9 Pea neʼe ui e te fafine ki tona ʼohoana: “ ʼE au iloʼi ko te tagata ʼae ʼe haʼu tuʼumaʼu kio taua ʼe ko he polofeta ʼa te ʼAtua. 10 Koia, fakalelei siʼou loto, kae ta fai he kiʼi koga fale ʼi te fuga fale,+ pea mo tuku ki ai hona palepale, mo he laupapa, mo he hekaʼaga pea mo he tuʼulaga malama. Ko he temi pe ʼe haʼu ai kio taua, ʼe feala ke nofo ai.”+

11 ʼI te tahi ʼaho, neʼe alu ki ai pea neʼe alu ki te koga fale ʼi te fuga fale ʼo takoto ai. 12 Pea neʼe ina ui ki tana tagata gaue ko Keasi:+ “Pauʼi te fafine Sunemi+ ke haʼu.” Neʼe ina pauʼi ai, pea neʼe haʼu te fafine ʼo tuʼu ʼi te muʼa matapa. 13 Neʼe ui leva e te polofeta kia Keasi: “Fakalelei siʼou loto, kae ke ke ui ki te fafine ʼaia: ‘Kua ke kinakina ʼuhi ko maua.+ Kotea ʼae ʼe feala ke au fai maʼa koe?+ ʼE ke loto koa ke au palalau ki te hau+ peʼe ki te pule ʼo te foʼi kautau ʼo ʼuhiga mo koe?’ ” Kae neʼe tali age e te fafine: “Kailoa ia, he ʼe au maʼuli fimalie ʼi te lotolotoiga ʼo taku hahaʼi.” 14 Pea neʼe ui e te polofeta: “Kotea la he meʼa ʼe feala ke ta fai maʼa ia?” Neʼe tali age e Keasi ki ai: “ ʼE mole hana tama,+ pea ʼe kua matuʼa tona ʼohoana.” 15 Neʼe ina ui atu aipe: “Pauʼi ia ia ke haʼu.” Neʼe ina pauʼi ai, pea neʼe haʼu ʼo tuʼu ʼi te muʼa matapa. 16 Pea neʼe ina ui age ki ai: “ ʼI te taʼu ka haʼu, ʼi te temi ʼaeni, ʼe ke fuafua anai hau kiʼi tama.”+ Kae neʼe ui age e te fafine: “Kailoa, siʼoku pule, tagata ʼa te ʼAtua moʼoni, ʼaua naʼa ke kakaʼi au.”

17 Kae neʼe faitama leva te fafine pea ʼi te taʼu ʼae neʼe hoa mai ki ai, ʼi te temi ʼaia, neʼe ina fanauʼi tana kiʼi tamasiʼi tagata, ohage pe ko tona fakaha age e Eliseo. 18 Neʼe lahilahi ake te kiʼi tamasiʼi, pea ʼi te tahi ʼaho, neʼe alu ki tana tamai ʼae neʼe nofo mo te ʼu tagata tanaki taʼukai. 19 Pea neʼe ina ui tuʼumaʼu pe ki tana tamai: “Toku ʼulu, ʼe mamahi toku ʼulu!” Neʼe ui leva e tana tamai ki te tagata gaue: “Fua ia ia ʼo ʼave ki tana faʼe.” 20 Neʼe ina fua ai ia ia ʼo ʼave ki tana faʼe. Neʼe heka ʼi te ʼu tuli ʼo tana faʼe ʼo kaku ki te fetapa, pea neʼe mate leva.+ 21 Neʼe alu leva te fafine ʼo tuku tana kiʼi tama ki te palepale ʼo te tagata ʼa te ʼAtua moʼoni.+ Neʼe ina pupunu te matapa pea alu. 22 Neʼe ina pauʼi leva tona ʼohoana pea neʼe ina ui age ki ai: “Fakalelei siʼou loto, kae ke ke fekauʼi mai he tahi ʼi te ʼu tagata gaue ke haʼu mo he asino. Pea ke fakagafua mai ke au alu fakavilivili ki te tagata ʼa te ʼAtua moʼoni pea ʼe au toe liliu mai anai.” 23 Kae neʼe ui age e tona ʼohoana: “He koʼe ʼe ke alu ki ai ʼi te ʼaho nei? ʼE mole ko te tuʼu afiafi ʼaeni ʼo te mahina+ peʼe ko he ʼaho sapato.” Kae neʼe ina ui age: “Tuku tau tuʼania, ʼe lelei pe ia.” 24 Neʼe ina teuteuʼi ai te asino pea neʼe ina ui ki tana tagata gaue: “Haʼele fakavilivili. ʼAua naʼa ke alu mamalie ʼuhi ko au, gata pe moka ʼe au kole atu.”

25 Neʼe alu ai te fafine ki te tagata ʼa te ʼAtua moʼoni ʼi te Moʼuga ʼo Kalemelo. ʼI te temi pe ʼae neʼe sio ai te tagata ʼa te ʼAtua moʼoni mai mamaʼo ki ai, neʼe ina ui ki tana tagata gaue ko Keasi: “Sio, ko te fafine Sunemi ʼae ʼe haʼu. 26 Fakalelei siʼou loto, kae ke ke lele ki ai pea mo ke fehuʼi age: ‘ ʼE ke lelei pe? ʼE lelei pe tou ʼohoana? ʼE lelei pe tau kiʼi tama?’ ” Pea neʼe tali age e te fafine: “ ʼE lelei pe ia.” 27 ʼI te kaku atu leva ʼa te fafine ki te tagata ʼa te ʼAtua moʼoni ʼi te moʼuga, neʼe ina puke atu aipe ʼona vaʼe.+ Neʼe fakaovi age ia Keasi ke ina leʼei kehe ia ia, kae neʼe ui age e te tagata ʼa te ʼAtua moʼoni: “Haganoa ki ai, koteʼuhi ʼe lotomamahi ʼaupito, kae neʼe fufu e Sehova te faʼahi ʼaia kia au, neʼe mole ina fakaha mai.” 28 Pea neʼe ui e te fafine: “Siʼoku ʼaliki, neʼe au kole atu koa haku tamasiʼi tagata? Neʼe mole au ui atu koa la: ‘ ʼAua naʼa ke kakaʼi au’?”+

29 Neʼe ina ui atu aipe kia Keasi: “Haʼi ʼou kofu ki tou koga loto,+ pea ke toʼo toku toko pea ke alu. Kapau ʼe ke felaveʼi mo he tahi, ʼaua naʼa ke fakamalo age ki ai. Pea kapau ʼe fakamalo atu he tahi, ʼaua naʼa ke tali age. Alu pea ke hili toku toko ki te fofoga ʼo te kiʼi tama.” 30 Pea neʼe ui e te faʼe ʼa te kiʼi tama: “ ʼE au tala moʼoni atu kia koe pea ia muʼa ʼo Sehova, ʼe mole au mavae anai ia koe.”+ Neʼe tuʼu ake ai ʼo alu mo te fafine. 31 Neʼe muʼamuʼa ia Keasi ia naua, pea neʼe ina hili te toko ki te fofoga ʼo te kiʼi tama, kae neʼe mole hoko he meʼa.+ Neʼe toe liliu kia Eliseo pea neʼe ina ui age: “Neʼe mole ʼala ake te kiʼi tama.”

32 Neʼe hu ia Eliseo ki te ʼapi kae neʼe tuku te sino ʼo te kiʼi tama ʼi tona palepale.+ 33 Neʼe hu ai ki te koga fale pea neʼe ina pupunu te matapa. Neʼe ko ia pe mo te kiʼi tama. Neʼe kamata faikole leva kia Sehova.+ 34 Pea neʼe tuʼutuli leva ʼi te palepale, pea neʼe takoto ki te kiʼi tamasiʼi, ʼo ina ʼai tona gutu ki te gutu ʼo te kiʼi tama, mo ʼona mata ki ʼona mata pea mo ʼona ʼalofi nima ki ʼona ʼalofi nima. Neʼe haga takoto feia ki te tamasiʼi, pea neʼe kamata mafana leva te sino ʼo te kiʼi tamasiʼi.+ 35 Neʼe fealuʼaki ʼi te loto fale, pea neʼe toe tuʼutuli ʼi te palepale pea mo takoto ki te kiʼi tamasiʼi. Neʼe mafatua tuʼa fitu te kiʼi tama pea neʼe ina avahi leva ʼona mata.+ 36 Neʼe pauʼi leva e Eliseo ia Keasi mo ina ui age: “Pauʼi te fafine Sunemi ke haʼu.” Neʼe ina pauʼi ai pea neʼe haʼu te fafine. Neʼe ina ui age leva: “Toʼo tau kiʼi tama.”+ 37 Pea neʼe haʼu te fafine ʼo tulolo ki te kele ʼi ʼona muʼa. Hili ʼaia, neʼe ina toʼo tana kiʼi tama ʼo nā olo ai.

38 ʼI te toe liliu ʼa Eliseo ki Kilekale, neʼe ʼi ai he hoge ʼi te fenua.+ Pea neʼe ina ui leva ki tana tagata gaue+ kae heheka te ʼu foha ʼo te kau polofeta:+ “Hili te kulo lahi ki te afi pea ke fai he supa maʼa te ʼu foha ʼo te kau polofeta.” 39 Neʼe alu leva he tahi ia natou ki te vao ʼo paki mai ni lauʼakau, pea neʼe ina maʼu he kiʼi fuʼu ʼakau vao pea neʼe ina toli ʼona fua, ʼo taga ki tona kofu. Neʼe toe liliu ai leva pea neʼe ina tuʼutuʼusi ʼo laku ki te kulo, kae neʼe mole ina iloʼi pe kotea. 40 Ki muli age, neʼe ʼave leva ki te ʼu tagata te supa ke natou kai, kae ʼi te temi pe ʼae neʼe natou kai ki ai, neʼe natou kalaga: “Tagata ʼa te ʼAtua moʼoni, neʼe ʼai he meʼa kona ki te kulo.” Pea neʼe mole feala hanatou kai. 41 Neʼe ina ui: “ ʼAumai he moʼi falena.” Neʼe ina ʼai ki te kulo, pea hili ʼaia, neʼe ina ui: “Kotou ʼave ki te hahaʼi.” Pea neʼe mole kei ʼi ai leva he meʼa kona ʼi te kulo.+

42 Neʼe haʼu leva he tagata mai Paale-salisa+ pea neʼe ina ʼaumai ki te tagata ʼa te ʼAtua moʼoni he ʼu foʼi pane olose+ ʼe 20 neʼe fai ʼaki te ʼu ʼuluaki fua olose, ʼo feia mo he taga neʼe ko te olose foʼou.+ Pea neʼe ui e Eliseo: “Tufa te ʼu meʼa ʼaia ke kai e te hahaʼi.” 43 Kae neʼe ui e tana tagata gaue: “ ʼE lava feafeaʼi haku tufa te ʼu meʼa ʼaia kae ʼe mole feʼauga ki he ʼu tagata ʼe toko 100?”+ Neʼe ina tali age: “Tufa te ʼu meʼa ʼaia ke kai e te hahaʼi, he ʼe koʼeni te folafola ʼa Sehova: ‘ ʼE natou kakai anai pea ʼe toe anai.’ ”+ 44 Neʼe tufa e te tagata gaue te ʼu meʼa ʼaia kia natou, ʼo natou kakai ai pea neʼe ʼi ai tona toe,+ ohage pe ko tona fakaha e Sehova.

5 Ko Naamane, te pule ʼo te foʼi kautau ʼo te hau ʼo Silia, neʼe ko he tagata maʼuhiga, pea neʼe leleiʼia ʼaupito ia ia e tona ʼaliki he neʼe foaki e Sehova te malo ki Silia ʼaki ia ia. Neʼe ko he tagata tau malohi kae neʼe kilia.* 2 ʼI te tahi ʼaho, ʼi te ulufi e te ʼu kutuga solia Silia te fenua ʼo Iselaele, neʼe natou puke ai he kiʼi taʼahine Iselaele pea neʼe liliu leva ko he taʼahine faifekau ʼo te ʼohoana ʼo Naamane. 3 Neʼe ui e te kiʼi taʼahine ki tana fafine pule: “Ka na pau la neʼe alu siʼoku ʼaliki ki te polofeta+ ʼae ʼi Samalia, ʼe ina fakamalolo anai ia ia ʼi tona kilia.”+ 4 Neʼe alu* ai ʼo fakaha ki tona ʼaliki te meʼa ʼae neʼe ui age e te kiʼi taʼahine Iselaele.

5 Pea neʼe ui e te hau ʼo Silia: “Alu! Pea ʼe au momoli anai he tohi ki te hau ʼo Iselaele.” Neʼe alu ai, pea neʼe ina ʼave he ʼu taleta* siliva ʼe hogofulu, mo he ʼu piesi aulo ʼe 6 000 pea mo he ʼu teu ʼe hogofulu. 6 Neʼe ina fakatoʼo age leva ki te hau te tohi, pea neʼe tohi ai: “ ʼE au fekauʼi atu taku tagata faifekau ko Naamane ke alu atu mo te tohi ʼaeni, pea ke ke fakamalolo ia ia ʼi tona kilia.” 7 ʼI te ʼosi lau e te hau ʼo Iselaele te tohi, neʼe ina hae atu aipe ʼona kofu, mo ina ui: “Ko au koa ko te ʼAtua, ke au matehi pea mo haofaki?+ Koteʼuhi neʼe ina fekauʼi mai te tagata ʼaeni kia au, ʼo ina kole mai ke au fakamalolo ia ia ʼi tona kilia! ʼE kotou sisio lelei pe ki tana kumi ʼae he meʼa ke tupu ai hamā tokakovi.”

8 Kae ʼi te temi ʼae neʼe logo ai ia Eliseo, te tagata ʼa te ʼAtua moʼoni neʼe hae e te hau ʼo Iselaele ʼona kofu, neʼe ina fekauʼi atu aipe he tahi ke ina ui age ki te hau: “He koʼe neʼe ke hae ʼou kofu? Fakalelei siʼou loto, kae ke tuku muʼa ke haʼu kia au ke ina iloʼi ʼe ʼi ai he polofeta ʼi Iselaele.”+ 9 Neʼe haʼu ai ia Naamane mo ʼana hosi pea mo ʼana saliote tau. Neʼe tuʼu leva ʼi te huʼaga ʼo te ʼapi ʼo Eliseo. 10 Kae neʼe fekauʼi e Eliseo he tagata ʼave logo ke ina ui age ki ai: “Alu ʼo uku tuʼa fitu+ ʼi te Solotane.+ ʼE toe lelei anai tou kili pea ʼe ke maʼa anai.” 11 Neʼe ita ai ia Naamane pea neʼe mavae ʼo ina ui: “Neʼe au manatu: ‘ ʼE haʼu anai ʼo tuʼu ʼi ʼoku muʼa, ʼo pauʼi te huafa ʼo Sehova tona ʼAtua, pea ʼe alu anai tona nima ʼi ʼoluga ʼo te faʼahi ʼae ʼe mahaki, ke toe lelei ai.’ 12 ʼE mole lelei age koa la te ʼu vai tafe ʼo Tamaso,+ ia Apana pea mo Palepale ʼi te ʼu vai fuli ʼo Iselaele? ʼE mole feala koa la ke au alu ʼo uku ai ke au toe liliu ʼo maʼa?” Neʼe maliu ai ʼo alu mo hona toe ita lahi.

13 Kae neʼe fakaovi age ʼana tagata faifekau ʼo ui ki ai: “ ʼAliki,* ka na pau la neʼe kole atu e te polofeta ke ke fai he meʼa ʼe faigataʼa, ʼe mole ke fai anai koa? Kae ʼe feafeaʼi age la ki tana ui atu pe: ‘Alu ʼo uku pea ʼe ke maʼa anai’?” 14 Neʼe alu ai ʼo uku tuʼa fitu ʼi te Solotane, ohage pe ko tona fakaha age e te tagata ʼa te ʼAtua moʼoni.+ Neʼe toe liliu leva tona kili ohage ko te kili ʼo he kiʼi tama+ pea neʼe liliu ai ʼo maʼa.+

15 Hili ʼaia, pea neʼe toe liliu mo ʼana tagata fuli* ki te tagata ʼa te ʼAtua moʼoni.+ Neʼe tuʼu leva ʼi ʼona muʼa pea neʼe ina ui age ki ai: “Kua au iloʼi leva ʼi te temi nei, ʼe mole he ʼAtua ʼi te kele katoa, gata pe ki Iselaele.+ Koia, fakalelei siʼou loto, kae ke tali taku meʼa ʼofa.”* 16 Kae neʼe ui age e Eliseo: “ ʼE au tala moʼoni atu ia muʼa ʼo Sehova ʼae ʼe au tauhi ki ai,* ʼe mole au tali anai.”+ Neʼe faiga malohi age ke ina tali, kae neʼe haga fakafisi aipe ia. 17 Neʼe ui leva e Naamane: “Kapau koia, pea fakalelei siʼou loto, kae tuku ke au ʼave he moʼi kele ʼo te fenua ʼaeni, ia te ʼamoga ʼo he ʼu asino lalahi ʼe lua, koteʼuhi ʼe mole au toe momoli anai he holokoseta peʼe ko he sakilifisio ki he tahi age ʼatua, gata pe kia Sehova. 18 Kae ʼofa pe ke fakamolemole mai ia Sehova ʼuhi ko te faʼahi ʼaeni: Ka hu toku ʼaliki ki te fale lotu ʼo Limoni ʼo tulolo ai, pea ʼe tapiki mai ki toku nima, koia ʼe tonu ke au toe tulolo mo au ʼi te fale lotu ʼo Limoni. Koia, moka ʼe au tulolo anai ʼi te fale lotu ʼo Limoni, ʼofa pe ke fakamolemole mai ia Sehova.” 19 Pea neʼe ui age e te polofeta ki ai: “Alu ʼi te fimalie.” Neʼe alu ai leva. ʼI tana kua alu mamaʼo, 20 neʼe feuiʼaki leva e Keasi,+ ʼae neʼe gaue maʼa te tagata ʼa te ʼAtua moʼoni+ ko Eliseo: ‘Neʼe tuku e toku pule ke alu ia Naamane,+ te tagata Silia ʼaia kae neʼe mole ina tali te meʼa ʼae neʼe haʼu mo ia. Koia, ʼe au fakapapau ia muʼa ʼo Sehova, te ʼAtua maʼuli, ʼe au lele anai kia ia pea ʼe au maʼu anai he meʼa mai ia ia.’ 21 Neʼe tuli ai leva e Keasi ia Naamane. ʼI te sio ʼa Naamane ki te lele mai muli ʼa he tahi ki ai, neʼe hifo ʼi tana saliote ʼo alu ʼo fakafelaveʼi kia ia pea neʼe ina ui age: “ ʼE lelei pe?” 22 Neʼe ina tali age: “ ʼE lelei pe ia. Neʼe fekauʼi mai au e toku pule ke au tala atu: ‘Koʼeni, neʼe hoki tau age pe mai te potu moʼugaʼia ʼo Efalaimi te ʼu tagata tupulaga ʼe lua ʼi te ʼu foha ʼo te kau polofeta. Koia, fakalelei siʼou loto, kae ke ke foaki age kia naua he taleta siliva ʼe tahi pea mo he ʼu teu ʼe lua.’ ”+ 23 Neʼe ui e Naamane: “Toʼo te ʼu taleta ʼaeni ʼe lua.” Neʼe faiga malohi age ke ina toʼo,+ pea neʼe ina ʼai te ʼu taleta siliva ʼaia ʼe lua mo te ʼu teu ʼe lua ki he ʼu taga ʼe lua, pea neʼe ina foaki age ki he ʼu tagata gaue ʼe toko lua ʼi ʼana tagata gaue. Neʼe nā ʼave leva te ʼu meʼa ʼaia kia muʼa ʼo Keasi.

24 ʼI tana tau atu ki Ofeli,* neʼe ina toʼo leva te ʼu taga ʼaia mai ʼonā nima ʼo tuku ki tona ʼapi. Neʼe ina fekau leva te ʼu tagata ʼaia ke olo. ʼI tanā ʼosi mavae, 25 neʼe toe liliu leva ʼo tuʼu ia tafa ʼo tona pule. Pea neʼe ui age e Eliseo: “Keasi, ʼe ke haʼu ʼaena maifea?” Kae neʼe ina tali age: “Siʼoku pule, neʼe mole au alu ki he meʼa.”+ 26 Neʼe ui age e Eliseo ki ai: “ ʼE ke ui koa la koe ʼe mole au iloʼi tau alu ʼo tuli te tagata pea mo tana hifo ʼi tana saliote ʼo alu atu ʼo fakafelaveʼi kia koe? ʼE ko te temi koa ʼaeni ke tali ai he siliva, peʼe ko he ʼu teu, peʼe ko he ʼu gaueʼaga oliveto, peʼe ko he ʼu gaueʼaga vite, peʼe ko he faga ovi, peʼe ko he faga pipi, peʼe ko he ʼu tagata faifekau peʼe ko he ʼu fafine faifekau?+ 27 Koia, ʼe pipiki anai te kilia ʼo Naamane+ ia koe mo tou hakoga, ʼo talu ai.” Neʼe mavae atu aipe, pea neʼe kilia. Neʼe hina ohage ko te nive.+

6 Neʼe ui e te ʼu foha ʼo te kau polofeta+ kia Eliseo: “Sio, ko te nofoʼaga ʼaeni ʼe matou nonofo ai mo koe ʼe kua veliveli fau maʼa matou. 2 Koia, fakalelei siʼou loto, kae tuku ke matou olo ki te Solotane. ʼE matou tahi toʼo anai ʼi ai he foʼi lalago pea ʼe matou laga anai he nofoʼaga ke matou nonofo ai.” Neʼe ina tali: “Kotou olo.” 3 Neʼe ui e te tahi ia natou: “Fakalelei siʼou loto, ʼe ke lotolelei la ke ke haʼu mo matou?”* Neʼe ina tali age: “ ʼE au alu anai mo koutou.” 4 Koia, neʼe alu ai mo natou, pea neʼe natou tau leva ki te Solotane ʼo natou kamata taʼaga te ʼu fuʼu ʼakau. 5 ʼI te lolotoga taʼaga e he tahi ia natou he fuʼu ʼakau, neʼe to leva tana kanoʼi toki ki te vai, pea neʼe kalaga: “Oie siʼoku pule, ko he toki neʼe au alu ʼo kole!” 6 Neʼe ui age e te tagata ʼa te ʼAtua moʼoni: “Neʼe to ʼifea?” Neʼe ina fakaha age te faʼahi ʼae neʼe to ai. Neʼe taʼaga leva e te tagata ʼa te ʼAtua moʼoni he koga ʼakau ʼo li ki ai, pea neʼe maʼanu ai te kanoʼi toki. 7 Pea neʼe ina ui: “Toʼo ake.” Neʼe ina faoʼi ai tona nima ʼo toʼo ake te kanoʼi toki.

8 Neʼe alu leva te hau ʼo Silia ʼo tauʼi ia Iselaele.+ Neʼe faipalalau mo ʼana hahaʼi faifekau pea neʼe ina ui: “ ʼE au fakatuʼu anai toku nofoʼaga solia ʼi te koga meʼa ʼae, pea ʼe kotou fakatahi anai mo au.” 9 Neʼe fakaha leva e te tagata ʼa te ʼAtua moʼoni+ te logo ʼaeni ki te hau ʼo Iselaele: “Tokaga naʼa kotou fakalaka ʼi te koga meʼa ʼaia, he ʼe ʼomai anai ki ai te kau Silia.” 10 Pea neʼe fekauʼi leva e te hau ʼo Iselaele he ʼu tagata ke olo ʼo fakaha te logo ki te hahaʼi ʼae neʼe ʼi te koga meʼa ʼaia. Koteʼuhi neʼe fakatokaga age e te tagata ʼa te ʼAtua moʼoni. Neʼe tuʼa lahi* te fakaha age e te tagata ʼa te ʼAtua te ʼu koga meʼa ʼae neʼe olo ki ai te kau Silia, pea neʼe fakamamaʼo mai ai te hau.+

11 Neʼe kovi ʼosi ai te ita ʼo te hau* ʼo Silia. Koia, neʼe ina pauʼi ai ʼana hahaʼi faifekau pea neʼe ina ui age kia natou: “Fakaha mai! Ko ai ia tatou ʼaeni ʼe kau mo te hau ʼo Iselaele?” 12 Pea neʼe tali age e he tahi ʼo ʼana hahaʼi faifekau: “Siʼoku ʼaliki te hau, ʼe mole ko matou. Kae ko Eliseo, te polofeta ʼae ʼi Iselaele, ʼae ʼe ina fakaha age ki te hau ʼo Iselaele te ʼu palalau ʼae ʼe ke fai ʼi tou koga fale.”+ 13 Neʼe ui e te hau ʼo Silia: “Kotou olo ʼo kumi pe ʼe nofo ʼifea. ʼE au fekauʼi anai he ʼu tagata ke olo ʼo puke mai ia ia.” Ki muli age, neʼe fakaha age ki ai: “ ʼE nofo ʼi Totane.”+ 14 Neʼe ina fekauʼi atu aipe he ʼu tagata heka hosi, mo he ʼu tagata taki saliote tau pea mo he foʼi kautau kaugamalie ke olo ki te kolo ʼaia. Neʼe natou tau poʼuli atu ki ai ʼo ʼa takai te kolo.

15 Neʼe ʼala uhuuhu te tagata gaue ʼa te tagata ʼa te ʼAtua moʼoni pea neʼe alu ki tuʼa. Neʼe sio leva ki he foʼi kautau mo he ʼu hosi pea mo he ʼu saliote tau neʼe natou ʼa takai te kolo. Neʼe ina ui atu aipe ki te tagata ʼa te ʼAtua: “Oie siʼoku pule, kotea ʼae ka ta fai anai?” 16 Kae neʼe ina ui age: “ ʼAua naʼa ke mataku!+ Koteʼuhi ʼe kaugamalie age natou ʼae ʼe kau mo taua ia natou ʼae ʼe kau mo natou.”+ 17 Neʼe faikole leva ia Eliseo ʼo ina ui: “Sehova e, fakalelei siʼou loto, ke ke avahi ʼona mata ke sio.”+ Neʼe avahi atu aipe e Sehova te ʼu mata ʼo te tagata gaue pea neʼe sio leva. Pea koʼeni neʼe fonu te potu moʼugaʼia ko he ʼu hosi mo he ʼu saliote tau neʼe hage ko he afi+ neʼe natou takatakai ia Eliseo.+

18 ʼI te hifo ʼa te kau Silia kia Eliseo, neʼe faikole ia Eliseo kia Sehova: “Fakalelei siʼou loto, ke ke fakakiviʼi te hahaʼi* ʼaeni.”+ Neʼe ina fakakiviʼi ai natou, ohage pe ko tona kole age e Eliseo. 19 Pea neʼe ui e Eliseo kia natou: “ ʼE mole ko te ala ʼaeni, pea ʼe mole ko te kolo ʼaeni. Kotou mulimuli mai ia au, pea ʼe au taki anai koutou ki te tagata ʼae ʼe kotou kumi.” Kae neʼe ina taki natou ki Samalia.+

20 ʼI tanatou tau atu ki Samalia, neʼe ui e Eliseo: “Sehova e, ke ke avahi ʼonatou mata ke natou sisio.” Neʼe avahi leva e Sehova ʼonatou mata pea neʼe natou sisio ai kua natou nonofo ʼi te lotomalie ʼo Samalia. 21 ʼI te sio ʼa te hau ʼo Iselaele kia natou, neʼe ina ui kia Eliseo: “Siʼoku ʼaliki, ʼe tonu koa ke au matehi natou, ʼe tonu koa ke au matehi natou?” 22 Kae neʼe ina tali age: “ ʼE mole tonu ke ke matehi natou. ʼE ko hau agamahani koa tau matehi ia natou ʼae neʼe ke ʼave popula ʼaki tau heleta mo tau nahau? Foaki age kia natou he moʼi pane pea mo he moʼi vai ke natou kakai pea mo iinu,+ pea ke natou toe liliu ki tonatou ʼaliki.” 23 Neʼe ina teuteuʼi ai he toe meʼa kai lahi maʼa natou, ʼo natou kakai mo iinu ai, pea neʼe ina fekauʼi leva ke natou toe liliu ki tonatou ʼaliki. Pea neʼe mole toe ʼomai leva te ʼu kutuga solia Silia+ ʼo ʼohofi te fenua ʼo Iselaele.

24 Ki muli age, neʼe fakatahiʼi e Pene-atate, te hau ʼo Silia tana foʼi kautau* katoa pea neʼe alu ʼo ʼa takai ia Samalia.+ 25 Neʼe hoko ai leva he toe hoge lahi+ ʼi Samalia. Neʼe natou ʼa takai te kolo ʼo kaku ki te totogi e te hahaʼi he foʼi ʼuluʼi asino+ kia piesi siliva ʼe 80, pea mo he faifekau veliveli* ʼa he lupe kia piesi siliva ʼe 5. 26 ʼI te haʼele ʼa te hau ʼo Iselaele ʼi te fuga kaupa, neʼe kalaga te fafine kia ia: “Siʼoku ʼaliki hau, tokoni mai kia matou!” 27 Neʼe ina ui age: “Kapau ʼe mole tokoni atu ia Sehova, pea ʼe au lava maʼu maifea he tokoni? ʼE ke manatu koa ʼe feala ke au foaki atu he meʼa kai, peʼe ko he vino, peʼe ko he lolo?” 28 Pea neʼe fehuʼi age e te hau ki ai: “Kotea ʼae ʼe ke feia ai?” Neʼe ina tali age: “Neʼe ui mai e te fafine ʼaeni: ‘ ʼAumai tau tama ke ta kai ʼi te ʼaho nei, pea ʼe ta kai anai taku tama apogipogi.’+ 29 Neʼe ma fakamoho ai taku tama pea ma kai.+ Pea ʼi te ʼaho ake, neʼe au ui age ki ai: ‘ ʼAumai tau tama ke ta kai.’ Kae neʼe alu ia ʼo fufu tana tama.”

30 ʼI te logo ʼa te hau ki te ʼu palalau ʼaia ʼa te fafine, neʼe ina hae atu aipe ʼona kofu.+ ʼI tana haʼele ʼi te fuga kaupa, neʼe sisio leva te hahaʼi ki te taga* ʼae neʼe ina tui ʼi loto. 31 Pea neʼe ina ui: “Ke tauteaʼi lahi au e te ʼAtua, mo kapau ʼe mole tuʼusi te foʼi ʼulu ʼo Eliseo, te foha ʼo Sapate ʼi te ʼaho nei!”+

32 Neʼe nofo ia Eliseo ʼi tona ʼapi, pea neʼe fakatahi te kau takitaki mo ia. Pea neʼe fekauʼi e te hau he tagata ʼave logo ke muʼamuʼa kia Eliseo. Kae ʼi muʼa ʼo te tau age ʼa te tagata ʼaia, neʼe ui e Eliseo ki te kau takitaki: “ ʼE kotou tokagaʼi koa te fekauʼi mai e te foha ʼaia ʼo te tagata faifakapo+ he tahi ke haʼu ʼo tuʼusi toku ʼulu? Ka kotou sisio ki te tau mai ʼa te tagata ʼaia, pea kotou pupunu te matapa, mo puke maʼu ke ʼaua naʼa ulu mai ki loto. Pea koʼena tona ʼaliki ʼe muli mai.” 33 ʼI tana lolotoga palalau ʼaia mo natou, neʼe tau mai leva te tagata ʼave logo. Neʼe toe tau mai leva mo te hau, pea neʼe ina ui: “ ʼE haʼu te malaʼia ʼaeni mai ia Sehova. He koʼe ʼe au fakatalitali anai ki te tokoni ʼa Sehova?”

7 Neʼe ui leva e Eliseo: “Kotou fagono ki te folafola ʼa Sehova. Koʼeni te folafola ʼa Sehova: ‘Apogipogi, ʼi te temi pe ʼaeni, ʼi te matapa* ʼo Samalia, ʼe totogi anai he fua sea* falena lelei ʼe tahi kia sikele* ʼe tahi, pea mo he fua sea olose ʼe lua kia sikele ʼe tahi.’ ”+ 2 Pea neʼe ui e te pule solia ʼae neʼe falala ki ai te hau ki te tagata ʼa te ʼAtua moʼoni: “Tatau aipe pe ʼe avahi e Sehova te ʼatu lagi,* kae ʼe feala koa ke hoko moʼoni te faʼahi* ʼaia?”+ Neʼe ina tali age ki ai: “ ʼE ke sio mata anai ki ai,+ kae ʼe mole ke kai anai.”+

3 Neʼe ʼi ai te ʼu tagata kilia ʼe toko fa ʼi te huʼaga ʼo te matapa ʼo te kolo,+ pea neʼe natou feuiʼaki: “He koʼe koa ʼe tou heheka ʼi heni ʼo kaku ki totatou mamate? 4 Kapau ʼe tou olo ki te kolo kae lolotoga to te hoge ʼi te kolo,+ ʼe tou mamate anai ʼi ai. Pea kapau ʼe tou nonofo ʼi heni, ʼe tou mamate pe anai. Koia tou olo ki te nofoʼaga ʼo te kau Silia. Kapau ʼe natou tuku tatou ke tou maʼuʼuli, pea ʼe tou maʼuʼuli anai, kae kapau ʼe natou matehi tatou, pea ʼe tou mamate anai.” 5 Koia, ʼi te malu ʼo te afiafi, neʼe natou olo ai ki te nofoʼaga ʼo te kau Silia. ʼI tanatou kaku atu ki te ʼu tafaʼaki ʼo te nofoʼaga ʼo te kau Silia, neʼe mole ʼi ai he tahi.

6 Neʼe mole ʼi ai he tahi koteʼuhi neʼe fakatupu e Sehova te logoaʼa ʼo he ʼu saliote tau mo he ʼu hosi, te logoaʼa ʼo he foʼi kautau kaugamalie, ke logo ki ai te nofoʼaga ʼo te kau Silia.+ Pea neʼe natou feuiʼaki: “Koʼeni, neʼe totogi e te hau ʼo Iselaele te ʼu hau ʼo te kau Heti pea mo te ʼu hau ʼo Esipito ke natou ʼomai ʼo tauʼi tatou!” 7 Neʼe natou tutuʼu atu aipe ʼo feholaki ʼi te malu ʼo te afiafi, kae liʼaki ʼonatou fale la, mo ʼanatou hosi, mo ʼanatou asino pea mo te nofoʼaga katoa. Neʼe natou feholaki ke haofaki ai ʼonatou maʼuli.*

8 ʼI te kaku atu ʼa te ʼu tagata kilia ʼaia ki te ʼu tafaʼaki ʼo te nofoʼaga, neʼe natou feulufi leva ki he fale la ʼo natou kamata kakai mo iinu. Neʼe natou toʼo mai ai te siliva, mo te aulo pea mo he ʼu teu, ʼo natou olo ʼo fufu. Neʼe natou toe liliu mai ʼo feulufi ki he tahi age fale la pea neʼe natou toʼo mai ai he tahi age ʼu meʼa ʼo olo ʼo fufu.

9 Ki muli age, neʼe natou feuiʼaki leva: “Ko te meʼa ʼaeni ʼe tou fai ʼe mole lelei. ʼE ko he ʼaho fiafia ʼaeni, pea ʼe tonu ke tou tala te logo lelei ʼaia ki te hahaʼi! Kapau ʼe tou nonofo fakalogologo pea mo fakatalitali ʼo kaku ki te mafoata, ʼe tonu anai ke tauteaʼi tatou. Koia, tou foimo olo ʼo fakaha ki te hahaʼi ʼo te fale hau.” 10 Neʼe natou olo ai ʼo pauʼi te ʼu tagata leʼo ʼo te matapa ʼo te kolo pea neʼe natou fakamatala age kia natou: “Neʼe matou olo ki te nofoʼaga ʼo te kau Silia, kae neʼe mole he tahi, neʼe mole matou logo ki he meʼa. Neʼe ko te ʼu hosi pe mo te ʼu asino neʼe haʼi pea neʼe natou tuku feia te ʼu fale la.” 11 Neʼe kalaga atu aipe te ʼu tagata leʼo matapa ʼo fakaha ia te logo ʼaia ki te hahaʼi ʼo te fale hau.

12 Neʼe tuʼu ake aipe te hau ʼi te poʼuli pea neʼe ina ui ki ʼana hahaʼi faifekau: “Fakalelei ʼokotou loto, kae tuku muʼa ke au fakaha atu te fakatuʼutuʼu ʼa te kau Silia. ʼE natou iloʼi lelei pe ʼe tou fia kakai,+ koia neʼe natou tuku ai te nofoʼaga kae natou olo ʼo fenonoʼi ʼi te vao, ʼo natou ui: ‘ ʼE natou mavae anai mai te kolo, pea ʼe tou puke maʼuli anai natou pea mo hu ki te kolo.’ ”+ 13 Pea neʼe ui age e he tahi ʼi ʼana hahaʼi faifekau: “Fakalelei siʼou loto, ke filifili he ʼu tagata mo he ʼu hosi ʼe nima ʼi te ʼu hosi ʼae kei toe ʼi te kolo, pea ke natou olo ʼo vakaʼi pe kotea ʼae neʼe hoko moʼoni. Tatau aipe pe ʼe natou olo peʼe natou nonofo ʼi heni, kae ʼe natou mamate anai ohage pe ko tatou ʼaeni ʼe kei toe ʼi te kau Iselaele.” 14 Neʼe natou toʼo ai he ʼu saliote ʼe lua mo te ʼu hosi, pea neʼe fekauʼi natou e te hau ke olo ki te nofoʼaga ʼo te kau Silia. Neʼe ina ui age kia natou: “Kotou olo ʼo vakaʼi.” 15 Neʼe natou olo ʼi te faʼahi ʼae neʼe olo ai te kau Silia ʼo kaku ki te Solotane. Pea neʼe leta ʼi te ala te ʼu teu mo te ʼu meʼa kehekehe ʼae neʼe liʼaki e te kau Silia ʼi tanatou feholaki ʼi tonatou matataku. Neʼe toe liliu leva te ʼu tagata ʼave logo ʼaia ʼo fakamatala age ki te hau.

16 Neʼe mavae ai te hahaʼi mai te kolo ʼo natou olo ʼo toʼo ia meʼa fuli ʼae neʼe ʼi te nofoʼaga ʼo te kau Silia. Koia, neʼe totogi ai he fua sea falena lelei ʼe tahi kia sikele ʼe tahi, pea mo he fua sea olose ʼe lua kia sikele ʼe tahi, ohage pe ko tona fakaha e Sehova.+ 17 Pea neʼe fakanofo e te hau te pule solia ʼae neʼe falala ki ai ke ina leʼo te matapa ʼo te kolo. Kae neʼe malamalaki ia ia e te hahaʼi ʼo mate ai ʼi te matapa, ohage pe ko tona fakaha e te tagata ʼa te ʼAtua moʼoni ki te hau ʼi te temi ʼae neʼe alu ai te hau ki ai. 18 Neʼe hoko te aluʼaga ʼaia ohage pe ko tona ui e te tagata ʼa te ʼAtua moʼoni ki te hau: “Apogipogi, ʼi te temi pe ʼaeni, ʼi te matapa ʼo Samalia, ʼe totogi anai he fua sea olose ʼe lua kia sikele ʼe tahi, pea mo he fua sea falena lelei ʼe tahi kia sikele ʼe tahi.”+ 19 Kae neʼe ui e te pule solia ki te tagata ʼa te ʼAtua moʼoni: “Tatau aipe pe ʼe avahi e Sehova te ʼatu lagi,* kae ʼe feala koa ke hoko moʼoni te faʼahi* ʼaia?” Neʼe tali age e Eliseo: “ ʼE ke sio mata anai ki ai, kae ʼe mole ke kai anai.” 20 Pea ʼe ko te meʼa pe ʼaia neʼe hoko kia ia, he neʼe malamalaki ia ia e te hahaʼi ʼi te matapa ʼo te kolo ʼo mate ai.

8 Neʼe ui e Eliseo ki te faʼe ʼa te kiʼi tama ʼae neʼe ina fakamaʼuli:+ “Tuʼu ake ʼo alu, ia koe mo tou loto fale, ʼo maʼuli ohage ko he matapule ʼi te koga meʼa ʼae ʼe feala ke ke nofo ai. Koteʼuhi neʼe fakaha e Sehova ʼe to anai he hoge+ ʼi te fenua lolotoga taʼu ʼe fitu.” 2 Neʼe tuʼu ake ai te fafine ʼo alu pea neʼe ina fai te meʼa ʼae neʼe ui age e te tagata ʼa te ʼAtua moʼoni. Neʼe alu mo tona loto fale ʼo nonofo ʼi te fenua ʼo te kau Filisitini+ lolotoga taʼu ʼe fitu.

3 ʼI te ʼosi ʼo te ʼu taʼu ʼaia ʼe fitu, neʼe toe liliu mai te fafine mai te fenua ʼo te kau Filisitini. Pea neʼe alu ʼo tagi ki te hau ke toe foaki age tona ʼapi pea mo tana gaueʼaga. 4 Neʼe lolotoga palalau te hau kia Keasi, te tagata gaue ʼa te tagata ʼa te ʼAtua moʼoni, ʼo ina ui: “Fakalelei siʼou loto, fakamatala mai kia au te ʼu meʼa fakaofoofo fuli ʼae neʼe fai e Eliseo.”+ 5 ʼI te temi pe ʼae neʼe fakamatala ai e Keasi ki te hau pe neʼe feafeaʼi te fakamaʼuli e Eliseo he tahi neʼe mate,+ neʼe tau age te faʼe ʼa te kiʼi tama ʼae neʼe fakamaʼuli. Pea neʼe ina kole ki te hau ke toe foaki age tona ʼapi pea mo tana gaueʼaga.+ ʼI te temi ʼaia, neʼe ui e Keasi: “Siʼoku ʼaliki te hau, koʼeni te fafine mo tana kiʼi tama ʼae neʼe fakamaʼuli e Eliseo.” 6 Neʼe fakafehuʼi e te hau ia te fafine pea neʼe ina fakamatala age te ʼu meʼa ʼae neʼe hoko. Pea neʼe pauʼi leva e te hau he tagata ʼe gaue ʼi tona fale hau, ʼo ina ui age ki ai: “Liufaki ki te fafine ʼaeni ʼana meʼa fuli. Pea foaki age ki ai ia te falā ʼae neʼe tonu ke ina maʼu ʼi tana fakatau te ʼu fua ʼo tana gaueʼaga, talu mai te ʼaho ʼae neʼe mavae ai ʼi te fenua ʼo kaku mai ki te ʼaho nei.”

7 Neʼe alu leva ia Eliseo ki Tamaso.+ ʼI te temi ʼaia, neʼe mahaki ia Pene-atate,+ te hau ʼo Silia. Neʼe fakaha age ki ai: “Kua tau mai ki te kolo ia te tagata ʼa te ʼAtua moʼoni.”+ 8 Pea neʼe ui e te hau kia Hasaele:+ “Toʼo he meʼa ʼofa pea ke alu ʼo fakafelaveʼi ki te tagata ʼa te ʼAtua moʼoni.+ Fakafehuʼi ia Sehova ʼaki ia ia, ʼo ke fehuʼi age: ‘ ʼE lelei anai koa siʼoku mahaki?’ ” 9 Neʼe alu ai ia Hasaele ʼo fakafelaveʼi ki ai mo te meʼa ʼofa. Neʼe ko te ʼu faʼahiga meʼa lelei kehekehe ʼo Tamaso pea neʼe ko te ʼamoga ʼaia ʼa he ʼu kamelo ʼe 40. ʼI tana tau atu ʼaia, neʼe tuʼu ia muʼa ʼo te tagata ʼa te ʼAtua, ʼo ui age: “Neʼe fekauʼi mai au e tou foha ko Pene-atate, te hau ʼo Silia ke au haʼu ʼo fehuʼi atu peʼe lelei anai siʼona mahaki.” 10 Neʼe tali age e Eliseo ki ai: “Alu ʼo ui age ki ai ʼe lelei moʼoni anai. Kae neʼe fakaha mai e Sehova ʼe mate moʼoni anai ia ia.”+ 11 Neʼe sio fakamamaʼu ki ai ʼo tupu ai te ufiufi ʼa Hasaele. Pea neʼe tagi te tagata ʼa te ʼAtua moʼoni. 12 Neʼe ui age e Hasaele: “Siʼoku ʼaliki, he koʼe ʼe ke tagi?” Neʼe ina tali age: “Koteʼuhi ʼe au iloʼi ʼe ke fakamamahiʼi anai te hahaʼi ʼo Iselaele.+ ʼE ke tutu anai ʼonatou kolo tau, ʼe ke matematehi anai ʼanatou tagata tau faiva ʼaki te heleta, ʼe ke laliki anai ʼanatou fanau pea ʼe ke fahiʼi anai te ʼu fatu ʼo te ʼu fafine faitama.”+ 13 Neʼe ui age e Hasaele: “Siʼoku ʼaliki, ʼe au lava fai feafeaʼi he meʼa feia? Ko au ʼaeni ʼe hage pe ko he kuli.” Kae neʼe ui age e Eliseo: “Neʼe fakaha mai e Sehova ʼe ke liliu anai ko te hau ʼo Silia.”+

14 Neʼe mavae leva mai ia Eliseo ʼo toe liliu ki tona ʼaliki. Pea neʼe ui age e tona ʼaliki ki ai: “Kotea ʼae neʼe ui atu e Eliseo?” Neʼe ina tali age: “Neʼe ina ui mai ʼe ke lelei moʼoni anai.”+ 15 ʼI te ʼaho ake, neʼe toʼo e Hasaele he tupenu, ʼo palapalaʼi pea neʼe ina hili ki te fofoga ʼo te hau, ʼo ina tege ia ia ʼo kaku ki tana mate.+ Pea neʼe hau leva ia Hasaele ʼo fetogi ia ia.+

16 Neʼe hau leva ia Solame,+ te foha ʼo te Hau ʼo Suta ko Sosafate, ʼi te nima taʼu ʼo te pule ʼa te hau ʼo Iselaele ko Solame,+ te foha ʼo Akapo kae neʼe kei hau pe ia Sosafate ki Suta. 17 Neʼe hau ʼi tona taʼu 32, pea neʼe pule lolotoga taʼu ʼe valu ʼi Selusalemi. 18 Neʼe ina faʼifaʼitakiʼi te ʼu aga ʼa te ʼu hau ʼo Iselaele,+ ohage pe ko natou ʼae ʼo te famili ʼo Akapo+ koteʼuhi neʼe ʼohoana mo te ʼofafine ʼo Akapo.+ Pea neʼe ina haga fai pe te meʼa ʼae ʼe kovi kia mata ʼo Sehova.+ 19 Kae neʼe mole fia pulihi e Sehova ia Suta ʼuhi ko Tavite, tana tagata faifekau.+ Koteʼuhi neʼe ina fakapapauʼi age ʼe ina foaki anai he malama* ki ai+ pea mo ʼona foha ʼo talu ai.

20 ʼI te temi ʼo te hau ko Solame, neʼe agatuʼu leva ia Etome ki Suta+ pea neʼe natou fakanofo honatou hau.+ 21 Neʼe alu ai ia Solame mo ʼana saliote tau fuli ki Tesaile. Pea neʼe tuʼu ake ʼi te poʼuli ʼo alu ʼo tauʼi te kau Etome ʼae neʼe natou ʼa takai ia ia mo te kau tagata pule saliote tau, pea neʼe malo ai. Neʼe feholaki leva te kau solia ki ʼonatou fale la. 22 Kae neʼe hoko atu pe te agatuʼu ʼa te kau Etome ki Suta ʼo kaku mai ki te ʼaho nei. ʼI te temi ʼaia, neʼe toe agatuʼu foki mo te hahaʼi ʼo Lipina.+

23 Pea ko te toe ʼo te hisitolia ʼo Solame, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 24 Neʼe mate leva ia Solame* pea neʼe ʼavaifo ʼi te Kolo ʼo Tavite,+ ohage ko ʼana kui. Pea neʼe hau leva tona foha ko Akasia+ ʼo fetogi ia ia.

25 Pea neʼe hau leva ia Akasia, te foha ʼo te Hau ʼo Suta ko Solame, ʼi te 12 taʼu ʼo te pule ʼa te hau ko Solame, te foha ʼo Akapo, te hau ʼo Iselaele.+ 26 Neʼe hau ia Akasia ʼi tona taʼu 22, pea neʼe pule lolotoga he taʼu katoa ʼi Selusalemi. Neʼe higoa tana faʼe ko Atelia,+ te mokopuna* ʼo Omeli,+ ia te Hau ʼo Iselaele. 27 Neʼe faʼifaʼitakiʼi e Akasia te ʼu aga ʼo te famili ʼo Akapo.+ Pea neʼe ina haga fai pe te meʼa ʼae ʼe kovi kia mata ʼo Sehova, ohage pe ko te famili ʼo Akapo, he neʼe ʼohoana ki te famili ʼo Akapo.+ 28 Koia, neʼe alu ai mo Solame, te foha ʼo Akapo ʼo tauʼi ia te Hau ʼo Silia ko Hasaele ʼi Lamoti-kileate,+ kae neʼe lavea ia Solame ʼi te kau Silia.+ 29 Neʼe toe liliu ai ia te Hau ko Solame ki Siseleele+ ʼo faitoʼo ʼona lavea he neʼe lavea ʼi Lama ʼi te kau Silia ʼi tana tauʼi ia Hasaele, te Hau ʼo Silia.+ Neʼe alu ia Akasia, te hau ʼo Suta, te foha ʼo Solame, ki Siseleele ʼo fakasiosio ia Solame, te foha ʼo Akapo he neʼe lavea.*

9 Neʼe pauʼi leva e te polofeta ko Eliseo he tahi ʼi te ʼu foha ʼo te kau polofeta pea neʼe ina ui age ki ai: “Haʼi ʼou kofu ki tou koga loto, pea ke toʼo te hina lolo ʼaeni ʼo ke foimo alu ki Lamoti-kileate.+ 2 Ka ke tau atu ki ai, pea ke kumi ia Seu,+ te foha ʼo Sosafate, te foha ʼo Nimesi. ʼE nofo fakatahi anai mo ʼona tehina. ʼE ke ui anai ki ai ke tuʼu ake pea ke ʼave ki te koga fale taupotu. 3 Pea ʼe ke toʼo anai te hina lolo ʼo tākai ʼaki tona ʼulu mo ui age: ‘Koʼeni te folafola ʼa Sehova: “ ʼE au fakanofo* ia koe ko te hau ʼo Iselaele.” ’+ Hili ʼaia, ʼe ke avahi anai te matapa pea ke foimo hola.”

4 Neʼe alu ai te tagata gaue ʼa te polofeta ki Lamoti-kileate. 5 ʼI tana tau atu, neʼe heheka te kau pule kautau. Neʼe ina ui: “Siʼoku pule, ʼe ʼi ai taku logo maʼa koe.” Neʼe fehuʼi age e Seu: “Ko te logo kia ai?” Neʼe ina tali age: “Kia koe, siʼoku pule.” 6 Neʼe tuʼu ake ai ia Seu ʼo ulu ki fale. Pea neʼe tākai lolo leva e te tagata gaue tona ʼulu mo ui age: “Koʼeni te folafola ʼa Sehova, te ʼAtua ʼo Iselaele: ‘ ʼE au fakanofo ia koe ko te hau ʼo Iselaele, te hahaʼi ʼa Sehova.+ 7 ʼE tonu anai ke ke matehi te famili ʼo Akapo, tou ʼaliki. ʼE au fai anai he lagavaka ʼo ʼuhiga mo te toto ʼo ʼaku tagata faifekau, ia te kau polofeta ʼo feia mo te hahaʼi faifekau fuli ʼa Sehova ʼae neʼe matehi e Sesapele.+ 8 Pea ʼe matehi anai te famili katoa ʼo Akapo. ʼE au pulihi katoa anai ʼi tona famili ia te hahaʼi tagata fuli,* maʼia mo ia ʼae ʼe mole hona ʼuhiga ʼi Iselaele.+ 9 Pea ʼe au fai anai ki te famili ʼo Akapo ohage pe ko taku fai ki te famili ʼo Selopoamo,+ te foha ʼo Nepate pea mo te famili ʼo Paesa,+ te foha ʼo Akisa. 10 ʼE kai anai e te ʼu kuli ia Sesapele ʼi te kele ʼae ʼe ʼi Siseleele+ pea ʼe mole ʼavaifo anai e he tahi.’ ” Pea neʼe avahi leva e te tagata gaue te matapa ʼo hola.+

11 ʼI te toe liliu mai ʼa Seu ki te ʼu tagata faifekau ʼo tona ʼaliki, neʼe natou fehuʼi age: “ ʼE lelei pe? He koʼe neʼe haʼu te tagata vale ʼaia kia koe?” Neʼe ina tali age kia natou: “ ʼE kotou iloʼi lelei pe te taʼi tagata ʼaia pea ʼe palalau vale.” 12 Kae neʼe natou ui age: “ ʼE ko tau loi! Fakalelei siʼou loto, fakaha mai pe kotea ʼae neʼe ina ui atu.” Pea neʼe fakamatala age e Seu kia natou te ʼu meʼa ʼae neʼe ui age e te tagata. Neʼe ina toe fakaha age foki mo te ʼu palalau ʼaeni ʼa te tagata: “Koʼeni te folafola ʼa Sehova: ‘ ʼE au fakanofo ia koe ko te hau ʼo Iselaele.’ ”+ 13 Neʼe natou tahi huʼi atu aipe tona kofu ʼo folahi ʼi te ʼu mata tuʼuga ke hake ai.+ Neʼe natou pupuhi leva te fakatagi pupuhi mo ui: “Kua hau ia Seu!”+ 14 Pea neʼe fakatuʼutuʼu leva e Seu,+ te foha ʼo Sosafate, te foha ʼo Nimesi ke fakafeagai kia Solame.

Neʼe nofo ia Solame mo te kautau ʼo Iselaele ʼi Lamoti-kileate,+ ʼo haofaki ia Iselaele mai ia Hasaele,+ te Hau ʼo Silia. 15 Ki muli age, neʼe toe liliu ia te Hau ko Solame ki Siseleele+ ʼo faitoʼo ʼona lavea he neʼe lavea ʼi te kau Silia ʼi tana tauʼi ia Hasaele, te Hau ʼo Silia.+

Neʼe ui e Seu: “Kapau ʼe kotou* manatu tahi mo au, ʼaua naʼa kotou tuku he tahi ke hola ʼi te kolo ʼo alu ʼo fakaha te aluʼaga ʼaeni ʼi Siseleele.” 16 Pea neʼe heka leva ia Seu ki tana saliote ʼo alu ki Siseleele he neʼe takoto mahaki ai ia Solame ʼuhi ko ʼona lavea. Neʼe haʼu ia Akasia, te Hau ʼo Suta ʼo fakasiosio ia Solame. 17 ʼI te tuʼu ʼa te tagata leʼo ʼi te tule ʼi Siseleele, neʼe sio ki te ʼomai ʼa te kau solia kaugamalie ʼa Seu. ʼI te temi pe ʼaia, neʼe ina ui: “ ʼE au sio ki he kau solia kaugamalie.” Neʼe ui e Solame: “Fekauʼi he tagata heka hosi ke alu ʼo fakafelaveʼi kia natou pea mo ui age kia natou: ‘ ʼE kotou ʼomai koa mo te tokalelei?’ ” 18 Neʼe alu ai he tagata heka hosi ʼo fakafelaveʼi kia natou pea mo ui age: “Koʼeni te folafola ʼa te hau: ‘ ʼE kotou ʼomai koa mo te tokalelei?’ ” Kae neʼe ui age e Seu: “ ʼE maʼuhiga koa kia koe te ‘tokalelei’? Haʼu ʼo muli mai ia au!”

Pea neʼe fakaha leva e te tagata leʼo: “Kua kaku te tagata ʼave logo kia natou kae ʼe mole toe liliu mai ia.” 19 Neʼe fekauʼi ai e te hau ke alu he tahi tagata heka hosi, ʼae neʼe ina ui ʼi tana kaku atu kia natou: “Koʼeni te folafola ʼa te hau: ‘ ʼE kotou ʼomai koa mo te tokalelei?’ ” Kae neʼe ui age e Seu: “ ʼE maʼuhiga koa kia koe te ‘tokalelei’? Haʼu ʼo muli mai ia au!”

20 Pea neʼe fakaha leva e te tagata leʼo: “Kua kaku te tagata ʼave logo kia natou kae ʼe mole toe liliu mai ia. Ko te faʼahiga taki saliote ʼo tonatou pule ʼe hage ko te taki saliote ʼa Seu, te mokopuna* ʼo Nimesi, he ʼe fakamataku tana taki saliote.” 21 Neʼe ui e Solame: “Teuteuʼi taku saliote!” Neʼe teuteuʼi ai tana saliote tau pea neʼe tahi heka leva ia Solame, te Hau ʼo Iselaele pea mo Akasia,+ te Hau ʼo Suta ki tana saliote tau, ʼo olo ʼo fakafelaveʼi kia Seu. Neʼe nā felaveʼi mo ia ʼi te kele ʼo Napote,+ te tagata Siseleele.

22 ʼI te temi pe ʼae neʼe sio ai ia Solame kia Seu, neʼe ina ui: “Seu, ʼe ke haʼu koa mo te tokalelei?” Kae neʼe ina tali age: “ ʼE lava maʼu feafeaʼi te tokalelei mo kapau ʼe kei fai pe te ʼu aga fakalialia* ʼa Sesapele,+ tau faʼe pea mo ʼana meʼa faifakalauʼakau?”+ 23 Pea neʼe maliu atu aipe ia Solame mo tana saliote tau ʼo hola pea neʼe ina ui kia Akasia: “Kua kakaʼi taua, Akasia!” 24 Neʼe toʼo leva e Seu tana nahau ʼo fanahi ia Solame ʼo tau ʼi tona tuʼa, pea neʼe ulu ai te kauʼi nahau ʼo ha ʼi te faʼahi ʼae ʼe tuʼu ai tona mafu. Neʼe mate ai ia Solame ʼi tana saliote tau. 25 Neʼe ui leva e Seu kia Pitekale, tana tagata pule solia: “Toʼo ia ia pea ke li ki te gaueʼaga ʼa Napote, te tagata Siseleele.+ Ke ke manatuʼi neʼe ta taki ʼatā saliote tau ʼo muliʼi mai ia Akapo, tana tamai ʼi te temi ʼae neʼe fai ai e Sehova te folafola ʼaeni ʼo ʼuhiga mo ia:+ 26 ‘ ʼE ui e Sehova: “Neʼe au sio ʼanafi ki te toto ʼo Napote+ pea mo te toto ʼo ʼona foha.” Pea ʼe toe ui e Sehova: “ ʼE au liufaki+ moʼoni atu anai kia koe ʼau aga ʼe kovi ʼi te kele ʼaeni.” ’ Koia ʼi te temi nei, toʼo ia ia pea ke li ki te gaueʼaga ʼaeni, ʼo mulimuli ki te folafola ʼa Sehova.”+

27 ʼI te sio ʼa Akasia,+ te Hau ʼo Suta ki te aluʼaga ʼaia neʼe hoko, neʼe hola ʼi te ala ʼae ʼe alu ki te fale ʼo te ʼoloto. (Ki muli age, neʼe tuli ia ia e Seu pea mo ui: “Kotou toe matehi mo ia ʼaeni!” Koia, neʼe fanahi ai ia ia e te kau solia ʼi tana saliote tau ʼi te ala ʼae ki Kule, ʼae ʼe ovi ki Sipeleami.+ Neʼe hoko atu pe te hola ʼa Akasia ʼo kaku ki Mekito pea neʼe mate ai. 28 Neʼe ʼave leva e ʼana hahaʼi faifekau ia ia ʼi he saliote ki Selusalemi, ʼo tuku ki tona fale maka ʼi te Kolo ʼo Tavite,+ ohage ko ʼana kui. 29 Neʼe hau ia Akasia+ ki Suta ʼi te 11 taʼu ʼo te temi pule ʼa Solame, te foha ʼo Akapo.)

30 Neʼe logo ia Sesapele+ ki te kua tau mai ʼa Seu ki Siseleele.+ Neʼe ina pena ʼuli ai ʼona mata, mo teuteuʼi tona ʼulu pea neʼe sio ifo mai te matapa fakamalama. 31 ʼI te temi ʼae neʼe ulu ai ia Seu ʼi te matapa ʼo te kolo, neʼe ui age e Sesapele ki ai: “Kotea la ʼae neʼe hoko kia Simili, ʼae neʼe ina fakapogi tona ʼaliki?”+ 32 ʼI tana hiki ake ʼona mata ʼo sio ki te matapa fakamalama, neʼe ui e Seu: “Ko ai ʼae ʼe kau mo au? Ko ai?”+ ʼI te temi pe ʼaia, neʼe sisio ifo he ʼu tagata ʼe toko lua peʼe toko tolu ʼe gaue ʼi te fale hau, mai te matapa fakamalama ki ai. 33 Neʼe ina ui: “Kotou li mai ia ia ki lalo.” Neʼe natou li ai ia ia ki lalo ʼo pihi ai tona toto ki te kaupa mo te ʼu hosi pea neʼe malamalaki ia ia e ʼana hosi. 34 Hili ʼaia, neʼe ulu ai ki loto ʼo kai mo inu. Pea neʼe ina ui: “Fakalelei ʼokotou loto, kotou olo ʼo toʼo te fafine fehiʼaʼinaʼi ʼaena pea mo ʼavaifo, he ʼe ko te ʼofafine ʼo he hau.”+ 35 Kae ʼi tanatou olo atu ke ʼave ʼo ʼavaifo, neʼe natou maʼu pe tona ʼulu, mo ʼona vaʼe pea mo ʼona nima.+ 36 ʼI tanatou toe liliu mai ʼo fakaha kia Seu, neʼe ina ui: “Kua hoko te folafola ʼa Sehova+ ʼae neʼe ina ui ʼaki tana tagata faifekau ko Elia, te tagata Tisipe: ‘ ʼE kai anai e te ʼu kuli ia te sino ʼo Sesapele+ ʼi te kele ʼae ʼi Siseleele. 37 Pea ʼe liliu anai te sino ʼo Sesapele ko he meʼa fakagakokele ʼo te ʼu gaueʼaga, ʼi te kele ʼae ʼi Siseleele, ke mole feala ai he ui: “Ko Sesapele ʼaeni.” ’ ”

10 Neʼe ʼi ai he ʼu foha ʼe toko 70 ʼo Akapo+ neʼe nonofo ʼi Samalia. Neʼe fai ai e Seu he ʼu tohi ʼo momoli ki Samalia ki te kau ʼaliki ʼo Siseleele, mo te kau takitaki+ pea mo natou ʼae neʼe natou taupau te ʼu fanau ʼa Akapo. Neʼe tohi ai: 2 “ ʼE nonofo ʼi hena te ʼu foha ʼo tokotou ʼaliki, pea ʼe kotou toe maʼu foki mo he ʼu saliote tau, mo he ʼu hosi, mo he kolo tau pea mo ni mahafu. Ka kotou maʼu te tohi ʼaeni, 3 kotou filifili he tahi ʼi te ʼu foha ʼo tokotou ʼaliki ʼe lelei mo faitotonu age, pea kotou fakanofo ia ia ki te hekaʼaga fakahau ʼo tana tamai. Pea kotou tau leva maʼa te fale ʼo tokotou ʼaliki.”

4 Kae neʼe natou matataku ʼaupito pea neʼe natou ui: “Koʼeni, neʼe mole feala ki te ʼu hau ʼe lua ke tutuʼu ʼi ʼona muʼa,+ ʼe feafeaʼi age la kia tatou ʼaeni?” 5 Neʼe fekauʼi leva e te pule ʼo te fale hau,* mo te kovana ʼo te kolo, mo te kau takitaki pea mo te kau taupau fanau, he tahi ke alu ʼo fakaha te logo ʼaeni kia Seu: “Ko matou ko ʼau hahaʼi faifekau pea ʼe matou fai anai ia meʼa fuli ʼe ke ui mai. ʼE mole matou fakanofo anai he tahi ke hau. Ke ke fai te meʼa ʼae ʼe lelei ki ʼou mata.”

6 Pea neʼe ina toe fai leva he tahi tohi kia natou, ʼo ui: “Kapau ʼe kotou kau mo au pea mo fia fakalogo mai kia au, kotou ʼaumai kia au te ʼu foʼi ʼulu ʼo te ʼu foha ʼo tokotou ʼaliki. Pea kotou ʼomai apogipogi, ʼi te hola pe ʼaeni, ʼi Siseleele.”

Neʼe nonofo te ʼu foha ʼe toko 70 ʼo te hau ʼi te ʼu fale ʼo te kau tagata maʼuhiga ʼo te kolo, ʼae neʼe natou taupau natou. 7 ʼI tanatou maʼu ia te tohi ʼaia, neʼe natou toʼo leva te ʼu foha ʼe toko 70 ʼo te hau ʼo matematehi.+ Pea neʼe natou ʼai ʼonatou foʼi ʼulu ki he ʼu kato ʼo ʼave kia Seu ʼi Siseleele. 8 Neʼe fakaha leva e te tagata ʼave logo kia ia: “Kua natou ʼaumai te ʼu foʼi ʼulu ʼo te ʼu foha ʼo te hau.” Pea neʼe ina ui age: “Ke fai ʼaki te ʼu foʼi ʼulu ʼaia he ʼu tuʼuga ʼe lua ʼi te huʼaga ʼo te matapa ʼo te kolo pea ke tuku ai ʼo kaku ki te uhu.” 9 ʼI te uhu ake ʼi tana hu ki tuʼa, neʼe tuʼu ia muʼa ʼo te hahaʼi fuli ʼo ui: “Neʼe mole kotou fai he meʼa ʼe kovi.* Kae neʼe au fakatuʼutuʼu ke au fakafeagai ki toku ʼaliki pea neʼe au matehi ia ia.+ Kae ko ai ʼae neʼe ina matehi te ʼu tagata fuli ʼaeni? 10 Ke kotou iloʼi ʼe mole to noa anai* he folafola ʼe tahi ʼa Sehova ʼi te ʼu folafola fuli ʼae neʼe fai e Sehova ʼo ʼuhiga mo te famili ʼo Akapo.+ Pea neʼe fakahoko e Sehova te meʼa ʼae neʼe ina ui ʼaki tana tagata faifekau ko Elia.”+ 11 Pea neʼe matehi e Seu ia natou fuli ʼae neʼe toe ʼi te famili ʼo Akapo ʼi Siseleele, ʼo feia mo ʼana tagata maʼuhiga fuli, mo ʼona feilo, mo ʼana pelepitelo,+ ʼo mole ina tuku ke hao he tahi.+

12 Pea neʼe tuʼu ake ai leva ʼo alu ki Samalia. ʼI tana alu ʼi te ala, neʼe ʼi ai he fale neʼe haʼi ai e te ʼu tagata tauhi ovi ʼanatou ovi.* 13 Neʼe felaveʼi ʼi ai ia Seu mo te ʼu tehina ʼo Akasia,+ te Hau ʼo Suta, pea neʼe ina ui age: “Ko ai ia koutou?” Neʼe natou tali age: “Ko matou ko te ʼu tehina ʼo Akasia, pea ʼe matou olo ʼo vakaʼi pe ʼe lelei pe te ʼu foha ʼo te hau mo te ʼu tama ʼa te fineʼaliki.” 14 Neʼe ina ui atu aipe: “Kotou puke maʼuli ia natou!” Neʼe puke maʼuli ai natou pea mo matehi ʼi te tane vai ʼo te fale ʼae neʼe haʼi ai e te ʼu tagata tauhi ovi ʼanatou ovi. Neʼe ko tagata ʼe toko 42 pea neʼe mole ina tuku ke hao he tahi ia natou.+

15 ʼI tana mavae mai ai, neʼe felaveʼi mo te foha ʼo Lekape+ ko Sonatape,+ ʼae neʼe haʼu ʼo fakafelaveʼi mai ki ai. ʼI tana fakamalo age ki ai,* neʼe ina fehuʼi age: “ ʼE katoa* koa tou loto kia au ohage ko te katoa ʼo toku loto kia koe?”

Neʼe tali age e Sonatape: “ ʼEi.”

Neʼe ui age e Seu: “Kapau koia, ʼaumai tou nima.”

Pea neʼe ina ʼavage leva tona nima, pea neʼe tohoʼi ake e Seu ia ia ki tana saliote. 16 Pea neʼe ina ui: “Haʼu mo au pea ʼe ke sio anai ki taku mole tali ia natou ʼae ʼe fakafeagai kia* Sehova.”+ Neʼe alu ai mo Sonatape ʼi tana saliote tau. 17 Pea neʼe tau leva ki Samalia pea neʼe ina matematehi ia natou fuli ʼae neʼe toe ʼi te famili ʼo Akapo ʼi Samalia ʼo kaku ki tana pulihi katoa ia natou,+ ohage pe ko tona fakaha e Sehova kia Elia.+

18 Pea neʼe fakatahiʼi e Seu ia te hahaʼi katoa mo ui age kia natou: “Neʼe veliveli pe te tauhi ʼa Akapo kia Paale,+ kae ʼe lahi age anai taku tauhi ki ai. 19 Kotou fakamaʼopoʼopo mai kia au te ʼu polofeta fuli ʼa Paale,+ mo tana kau atolasio fuli pea mo tana kau pelepitelo fuli.+ Ke ʼaua naʼa puli he tahi he ʼe au fai anai he sakilifisio lahi maʼa Paale. Pea ko natou ʼae ka pupuli, ʼe matehi anai.” Kae neʼe fai kaka ia Seu he neʼe ina fia pulihi te kau atolasio ʼa Paale.

20 Pea neʼe hoko atu e Seu: “Kotou tala he fakatahi taputapu maʼa Paale.” Neʼe natou tala ai. 21 Hili ʼaia, neʼe fekauʼi e Seu he ʼu tagata ʼave logo ke olo ʼi Iselaele katoa pea neʼe ʼomai ai te kau atolasio fuli ʼa Paale. Neʼe mole puli he tahi. Neʼe natou ulu ki te fale lotu ʼo Paale+ pea neʼe fonu te fale lotu ʼo Paale mai te tahi potu ki te tahi potu. 22 Neʼe ina ui kia ia ʼae ʼe tokaga ki te fale ʼae ʼe tuku ai te ʼu mutuʼi meʼa: “ ʼAumai he ʼu teu maʼa te kau atolasio fuli ʼa Paale.” Neʼe ina ʼaumai ai he ʼu teu maʼa natou. 23 Pea neʼe ulu ia Seu mo Sonatape,+ te foha ʼo Lekape ki te fale lotu ʼo Paale. Neʼe ina ui age leva ki te kau atolasio ʼa Paale: “Kotou kumi fakalelei pea mo vakaʼi pe ʼe mole nonofo ʼi heni he kau atolasio ʼa Sehova. Ke ʼateaina pe heni ko te kau atolasio ʼa Paale.” 24 Pea neʼe natou olo ai ʼo momoli he ʼu sakilifisio pea mo he ʼu holokoseta. Neʼe fakatuʼu e Seu ʼana tagata ʼe toko 80 ʼi tuʼa pea mo ui age: “Kapau ʼe hola he tahi ʼi te ʼu tagata ʼaia neʼe au tuku atu ki ʼokotou nima, ʼe kotou mamate anai moʼo fetogi ʼaki tona maʼuli.”*

25 ʼI tana ʼosi momoli pe te holokoseta, neʼe ui e Seu ki te kau tagata leʼo* pea mo te kau pule solia: “Kotou feulufi mai ʼo matehi natou! ʼAua naʼa kotou tuku ke hola he tahi!”+ Neʼe matehi ai natou e te kau tagata leʼo pea mo te kau pule solia ʼaki te heleta pea neʼe natou li ʼonatou sino ki tuʼa. Pea neʼe natou hoko atu ʼo kaku ki te potu tapu* ʼo te fale lotu ʼo Paale. 26 Pea neʼe natou ʼave leva ki tuʼa te ʼu pou maka taputapu+ ʼo te fale lotu ʼo Paale ʼo tutu fuli ai.+ 27 Neʼe natou toe maumauʼi te pou maka taputapu+ ʼo Paale ʼo feia mo te fale lotu ʼo Paale,+ ʼo natou fakaliliu ko he fale mamaʼo ʼo kaku mai ki te ʼaho nei.

28 Neʼe pulihi katoa ai e Seu ia te tauhi kia Paale ʼi Iselaele. 29 Kae neʼe mole maliu kehe ia Seu mai te ʼu agahala ʼae neʼe uga e Selopoamo, te foha ʼo Nepate ke fai e Iselaele, ʼae ke natou tauhi ki te ʼu ʼuhiʼi pipi aulo ʼae neʼe ʼi Petele pea mo Tane.+ 30 Neʼe ui leva e Sehova kia Seu: “Neʼe ke fai te meʼa ʼae ʼe lelei mo totonu ki ʼoku mata ʼaki tau fakahoko te ʼu meʼa fuli ʼae neʼe au loto ke fai ki te famili ʼo Akapo.+ Koia, ʼe heka anai ʼou foha ki te hekaʼaga fakahau ʼo Iselaele, ʼo kaku ki te fa taʼi tupu.”+ 31 Kae neʼe mole faiga ia Seu ke haʼele ʼi te Lao ʼa Sehova, te ʼAtua ʼo Iselaele ʼaki tona loto katoa.+ Pea neʼe mole maliu kehe mai te ʼu agahala ʼae neʼe uga e Selopoamo ke fai e Iselaele.+

32 ʼI te temi ʼaia, neʼe tuku e Sehova ke maʼu mamalie e te ʼu fili he ʼu kolo ʼo Iselaele. Koia neʼe haga tauʼi pe e Hasaele ia te fenua katoa ʼo Iselaele,+ 33 mai te potu esite ʼo te Solotane, ʼi te fenua katoa ʼo Kileate, ʼae ʼe nonofo ai te kau Kate, mo te kau Lupeni pea mo te kau Manase,+ pea mai Aloele, ʼae ʼe ovi ki te Vai Tafe* ʼo Alenone, ʼo kaku ki Kileate mo Pasani.+

34 Pea ko te toe ʼo te hisitolia ʼo Seu, te ʼu meʼa fuli ʼae neʼe ina fai, mo ʼana malo fuli ʼi te tau, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 35 Neʼe mate leva ia Seu* pea neʼe ʼavaifo ʼi Samalia. Neʼe hau leva tona foha ko Seoase+ ʼo fetogi ia ia. 36 Ko te temi* ʼae neʼe pule ai ia Seu ki Iselaele ʼi Samalia neʼe ko taʼu ʼe 28.

11 ʼI te sio leva ʼa Atelia,+ te faʼe ʼa Akasia ki te kua mate ʼo tana tama,+ neʼe alu ai ʼo pulihi katoa te hologa hau.+ 2 Kae neʼe toʼo fakafufu* leva e Sosepa, te ʼofafine ʼo te Hau ko Solame mo te tokolua ʼo Akasia, ia Seoasi+ te foha ʼo Akasia mai te ʼu foha ʼo te hau ʼae neʼe tonu ke matehi. Pea neʼe ina fakanono ia ia mo tana fafine taupau ʼi he koga fale taupotu, ke mole maʼu. Neʼe mole feala ai ke matehi e Atelia. 3 Neʼe nā fenonoʼi lolotoga taʼu ʼe ono ʼi te fale ʼo Sehova, kae lolotoga pule ia Atelia ʼi te fenua.

4 ʼI te fitu taʼu, neʼe pauʼi leva e Seosata te kau pule ʼo he toko teau ʼo te kau tagata leʼo ʼo te hau* mo te kau tagata leʼo ʼo te fale hau,*+ ke ʼomai kia ia ʼi te fale ʼo Sehova. Neʼe ina fai he fuakava mo natou ʼi te fale ʼo Sehova pea mo ina kole ke natou fakapapau age ʼe natou agatonu anai ki te fuakava ʼaia. Pea neʼe ina fakaha age leva kia natou te foha ʼo te hau.+ 5 Neʼe ina fakatotonu kia natou: “Koʼeni te meʼa ʼae ʼe tonu ke kotou fai: Kotou fai ni kutuga ʼe tolu. ʼE gaue anai te tahi kutuga ʼi te ʼaho ʼo te Sapato pea ʼe natou leʼo fakalelei anai te fale hau.+ 6 ʼE tuʼu anai te tahi kutuga ʼi te Matapa ʼo Te Fakatafito pea ʼe tuʼu anai te tahi kutuga ʼi te matapa ʼae ʼi muli ʼo te kau tagata leʼo ʼo te fale hau. ʼE kotou fesuisuiʼaki anai ʼo leʼo te fale. 7 ʼE tonu anai ki te ʼu kutuga ʼe lua ʼae ʼe mole gaue ʼi te ʼaho ʼo te Sapato ke natou leʼo fakalelei te fale ʼo Sehova moʼo puipui te hau. 8 ʼE tonu anai ke kotou ʼa takai te hau, ʼo kotou tahi toʼo ʼana mahafu. Ko he tahi pe ʼe hu ki te fale ʼe matehi anai. Kotou nonofo mo te hau ʼi te ʼu faʼahi fuli pe ʼae ʼe alu ki ai.”

9 Neʼe mulimuli fakalelei te kau pule ʼo he toko teau+ ki te ʼu meʼa ʼae neʼe fakatotonu age e te pelepitelo ko Seosata. Koia, neʼe natou tahi toʼo ai ʼana tagata ʼae neʼe tonu ke gaue ʼi te ʼaho ʼo te Sapato, ʼo feia mo natou ʼae neʼe mole gaue ʼi te ʼaho ʼo te Sapato ʼo natou ʼomai ki te pelepitelo ko Seosata.+ 10 Neʼe foaki age e te pelepitelo ki te kau pule ʼo he toko teau te ʼu tao pea mo te ʼu meʼa tali tau takafuafua ʼa te Hau ko Tavite ʼae neʼe tuku ʼi te fale ʼo Sehova. 11 Pea neʼe tutuʼu leva te kau tagata leʼo ʼo te fale hau+ ʼi ʼonatou tuʼuʼaga, ʼo natou tahi toʼo ʼana mahafu, mai te faʼahi mataʼu ki te faʼahi hema ʼo te fale, ʼo ovi ki te ʼaletale+ pea mo te fale. Neʼe natou ʼa takai ai te hau. 12 Neʼe ʼaumai leva e Seosata ki tuʼa te foha ʼo te hau+ pea neʼe ina hili ki tona ʼulu te pale pea mo te Lao.*+ Neʼe natou fakanofo* ai ia ia ke hau. Neʼe natou pasipasi leva pea mo ui: “Ke fua manuʼia te ʼafio ʼo totatou hau!”+

13 ʼI te logo ʼa Atelia ki te feleleʼi ʼa te hahaʼi, neʼe alu atu aipe ki te hahaʼi ʼi te fale ʼo Sehova.+ 14 Neʼe sio ai ki te tuʼu ʼa te hau ʼo ovi ki te pou, ʼo mulimuli ki te agaʼi fenua.+ Neʼe fakatahi mo te hau ia te kau pule pea mo te kau puhi fakatagi pupuhi,+ pea neʼe fakafiafia te hahaʼi fuli ʼo te fenua pea mo pupuhi te ʼu fakatagi pupuhi. Neʼe hae leva e Atelia ʼona kofu pea mo kalaga: “Ko he kaka! Ko he kaka!” 15 Kae neʼe fakatotonu e Seosata te pelepitelo ki te kau pule ʼo he toko teau,+ ʼae neʼe natou takitaki te foʼi kautau: “Kotou ʼave ki tuʼa, pea ko he tahi pe ʼe mulimuli ia ia, kotou matehi ʼaki te heleta!” Koteʼuhi neʼe ui e te pelepitelo: “ ʼAua naʼa kotou matehi ia ia ʼi te fale ʼo Sehova.” 16 Neʼe natou puke ai, pea ʼi tana kaku atu ki te koga meʼa ʼae ʼe fakahu ai te ʼu hosi ki te fale hau,+ neʼe natou matehi ai ia ia.

17 Neʼe fai leva e Seosata he fuakava neʼe kau ki ai ia Sehova, mo te hau pea mo te hahaʼi,+ ke natou faʼufaʼu tuʼumaʼu pe te hahaʼi ʼa Sehova. Pea neʼe ina toe fai he fuakava neʼe kau ki ai te hau mo te hahaʼi.+ 18 Hili ʼaia, neʼe olo te hahaʼi fuli ʼo te fenua ki te fale lotu ʼo Paale pea neʼe natou laliki ʼona ʼaletale,+ mo maumauʼi katoa ʼana fakatata+ pea neʼe natou matehi ia Matani te pelepitelo ʼa Paale+ ia muʼa ʼo te ʼu ʼaletale.

Neʼe hinoʼi leva e te pelepitelo he ʼu tagata ke tokakaga ki te fale ʼo Sehova.+ 19 Tahi ʼae meʼa, neʼe ina toʼo te kau pule ʼo he toko teau,+ mo te kau tagata leʼo ʼo te hau,* mo te kau tagata leʼo ʼo te fale hau,+ pea mo te hahaʼi fuli ʼo te fenua ke natou olo fakatahi mo te hau mai te fale ʼo Sehova ki te fale hau. Neʼe natou olo ʼi te ala ʼo te matapa ʼo te kau leʼo ʼo te fale hau. Neʼe heka leva ia Seoasi ki te hekaʼaga fakahau ʼo te ʼu hau.+ 20 Neʼe fakafiafia ai te hahaʼi fuli ʼo te fenua pea neʼe fimalie leva te kolo he neʼe matehi ia Atelia ʼaki te heleta ʼo ovi ki te fale hau.

21 Neʼe hau ia Seoasi+ ʼi tona taʼu fitu.+

12 ʼI te fitu taʼu ʼo te pule ʼa Seu,+ neʼe hau ia Seoasi,+ pea neʼe pule lolotoga taʼu ʼe 40 ʼi Selusalemi. Neʼe higoa tana faʼe ko Tesipesa, mai Pele-sepa.+ 2 Neʼe haga fai pe e Seoasi te meʼa ʼae ʼe lelei kia mata ʼo Sehova ʼi te temi ʼae neʼe akoʼi ai ia ia e te pelepitelo ko Seosata. 3 Kae neʼe mole ina pulihi te ʼu faʼahi maʼoluga,+ pea neʼe kei fai pe e te hahaʼi ni sakilifisio mo tutu ke kohu ni sakilifisio ʼi te ʼu faʼahi maʼoluga.

4 Neʼe ui e Seoasi ki te kau pelepitelo: “Kotou toʼo te falā fuli ʼae neʼe foaki ki te fale ʼo Sehova maʼa te ʼu molaga taputapu,+ ia te falā ʼo te tukuhau ʼae neʼe tonu ke totogi e te hahaʼi takitokotahi,+ mo te falā ʼae neʼe foaki e te hahaʼi ʼae neʼe natou fai he fakapapau, pea mo te falā ʼae neʼe foaki e te hahaʼi takitokotahi ʼaki he lotolelei ki te fale ʼo Sehova.+ 5 ʼE toʼo anai e te kau pelepitelo te falā ʼae ʼe foaki age e te hahaʼi* pea ʼe natou fakaʼaogaʼi anai moʼo toe gaohi te fale, ia te ʼu faʼahi fuli ʼae kua maumau.”*+

6 ʼI te 23 taʼu ʼo te pule ʼa te Hau ko Seoasi, neʼe heʼeki gaohi e te kau pelepitelo ia te ʼu faʼahi ʼae neʼe kua maumau ʼo te fale.+ 7 Koia, neʼe pauʼi ai e te Hau ko Seoasi ia te pelepitelo ko Seosata+ mo te tahi kau pelepitelo, pea neʼe ina ui age kia natou: “He koʼe neʼe heʼeki kotou gaohi te ʼu faʼahi ʼae kua maumau ʼo te fale? ʼE mole kotou toe toʼo anai te falā ʼae ʼe foaki atu e te hahaʼi. ʼE hoki kotou toʼo pe anai te falā ʼaia mo kapau ʼe kotou fakaʼaogaʼi ki te gaohi ʼo te fale.”+ 8 Neʼe manatu tahi ai leva ia te kau pelepitelo ke ʼaua naʼa natou toe toʼo te falā mai te hahaʼi pea ke mole natou toe tokakaga ki te gaohi ʼo te fale.

9 Neʼe toʼo leva e Seosata te pelepitelo he puha+ ʼo ina pūhi tona tapunu. Pea neʼe ina tuku ovi ki te ʼaletale, ʼi te faʼahi mataʼu moka hu atu ki te fale ʼo Sehova. Neʼe ʼai fuli ki ai e te kau pelepitelo ʼae neʼe natou leʼo te ʼu matapa te falā ʼae neʼe ʼaumai ki te fale ʼo Sehova.+ 10 Ka natou sisio leva kua lahi te falā ʼi te puha, neʼe haʼu te sikalaipe ʼa te hau pea mo te pelepitelo lahi ʼo tanaki* pea mo lau te falā ʼae neʼe ʼaumai ki te fale ʼo Sehova.+ 11 Neʼe nā foaki leva te falā ʼae neʼe nā lau kia natou ʼae neʼe tokakaga ki te gaue ʼae neʼe fai ʼi te fale ʼo Sehova. Pea ko natou ʼaia neʼe natou totogi leva ʼaki te falā ʼaia te kau tufuga ʼakau pea mo te kau laga fale ʼae neʼe gaue ʼi te fale ʼo Sehova,+ 12 ʼo feia mo te kau tufuga maka pea mo te kau ta maka. Neʼe natou toe totogi foki mo he ʼu ʼakau pea mo he ʼu maka neʼe kua taʼataʼaga moʼo toe gaohi te ʼu faʼahi ʼae neʼe kua maumau ʼi te fale ʼo Sehova. Neʼe natou toe fakaʼaogaʼi te falā ʼaia moʼo totogi ʼaki te tahi age ʼu meʼa neʼe ʼaoga ki te toe gaohi ʼo te fale.

13 Kae neʼe mole fakaʼaogaʼi te falā ʼae neʼe ʼaumai ki te fale ʼo Sehova moʼo faʼu he ʼu pesini siliva, peʼe ko he ʼu faʼahiga pipi,* peʼe ko he ʼu ipu lalahi, peʼe ko he ʼu fakatagi pupuhi,+ peʼe ko ni faʼahiga meʼa kehekehe neʼe fai ʼaki te aulo peʼe ko te siliva maʼa te fale ʼo Sehova.+ 14 Neʼe foaki pe te falā ʼaia kia natou ʼae neʼe tokakaga ki te gaue, pea neʼe natou fakaʼaogaʼi te falā ʼaia ki te gaohi ʼo te fale ʼo Sehova. 15 Neʼe mole kumi pe neʼe fakaʼaogaʼi feafeaʼi e te ʼu tagata ʼaia te falā ʼae neʼe foaki age ke natou totogi ʼaki te kau gaue, koteʼuhi neʼe natou tuha mo te falala.+ 16 Kae neʼe mole ʼaumai ki te fale ʼo Sehova te falā ʼae neʼe foaki ki te ʼu sakilifisio fakatokatoka*+ pea mo te ʼu molaga ʼo te agahala. Neʼe ko te falā ʼaia ʼa te kau pelepitelo.+

17 Neʼe alu ai leva ia Hasaele,+ te hau ʼo Silia ʼo tauʼi te kolo ko Kiete+ pea neʼe ina maʼu. Hili ʼaia, neʼe ina fakatuʼutuʼu leva ke alu ʼo tauʼi ia* Selusalemi.+ 18 Pea neʼe toʼo e Seoasi, te Hau ʼo Suta ia te ʼu molaga taputapu fuli ʼae neʼe fakamaʼoniʼoniʼi e ʼana kui, ia Sosafate, mo Solame pea mo Akasia, te ʼu hau ʼo Suta. Neʼe ina toe toʼo mo ʼana molaga taputapu pea mo te aulo fuli ʼae neʼe ina maʼu ʼi te ʼu tanakiʼaga koloa ʼo te fale ʼo Sehova pea mo te fale hau pea neʼe ina ʼave kia Hasaele, te hau ʼo Silia.+ Neʼe mavae leva te hau ʼo Silia mai Selusalemi.

19 Pea ko te toe ʼo te hisitolia ʼo Seoasi, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 20 Kae neʼe fonofono ʼana tagata faifekau ke natou fakafeagai kia ia.+ Pea neʼe natou matehi leva ia Seoasi ʼi te tule ʼo Milo,*+ ʼi te ala ʼae ʼe hifo ki Sula. 21 Neʼe matehi ia ia e ʼana tagata faifekau ko Sosakale, te foha ʼo Simeate pea mo Seosapate, te foha ʼo Somele.+ Neʼe ʼavaifo leva ia ia ʼi te Kolo ʼo Tavite ohage ko ʼana kui, pea neʼe hau leva tona foha ko Amatesia ʼo fetogi ia ia.+

13 ʼI te 23 taʼu ʼo te pule ʼa Seoasi,+ te foha ʼo Akasia+ te hau ʼo Suta, neʼe hau ia Seoase, te foha ʼo Seu+ ki Iselaele ʼi Samalia, pea neʼe pule lolotoga taʼu ʼe 17. 2 Neʼe ina haga fai pe te meʼa ʼae ʼe kovi kia mata ʼo Sehova, pea neʼe hoko atu pe tana fai te agahala ʼae neʼe uga e Selopoamo, te foha ʼo Nepate ke fai e Iselaele.+ Neʼe mole maliu kehe ia mai te agahala ʼaia. 3 Koia, neʼe kovi ʼosi ai te ita ʼo Sehova+ ki Iselaele,+ ʼo ina tuku ai natou ki te ʼu nima ʼo Hasaele,+ te Hau ʼo Silia pea mo Pene-atate,+ te foha ʼo Hasaele pea neʼe ina tuku ke fakamamahiʼi tuʼumaʼu natou.

4 Ki muli age, neʼe kole mamahi leva e Seoase te manavaʼofa* ʼo Sehova, pea neʼe fagono ia Sehova ki tana kole, he neʼe sio ki te fakamamahiʼi e te hau ʼo Silia ia Iselaele.+ 5 Koia, neʼe foaki ai e Sehova he tagata ke ina haofaki ia Iselaele,+ ke fakaʼateainaʼi natou mai te ʼu nima ʼo te kau Silia. Pea neʼe feala ai ke maʼuʼuli fimalie ia te kau Iselaele ohage pe ko te temi muʼa. 6 (Kae neʼe mole natou maliu kehe mai te agahala ʼae neʼe fai e te famili ʼo Selopoamo, ʼae neʼe ina uga ke fai e Iselaele.+ Neʼe hoko atu pe tanatou fai te agahala ʼaia,* pea neʼe kei tuʼu pe te pou ʼakau taputapu*+ ʼi Samalia.) 7 Neʼe kei toe pe ʼi te foʼi kautau ʼa Seoase te ʼu tagata heka hosi ʼe toko 50, mo te ʼu saliote tau ʼe 10 pea mo te kau solia neʼe haʼele lalo ʼe toko 10 000, he neʼe matehi e te hau ʼo Silia te tahi kau solia,+ ʼo ina malamalaki natou ohage ko te efu ʼi te temi ʼae ʼe haha ai te fulumeto.+

8 Pea ko te toe ʼo te hisitolia ʼo Seoase, te ʼu meʼa fuli ʼae neʼe ina fai pea mo ʼana malo ʼi te tau, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 9 Neʼe mate leva ia Seoase* pea neʼe ʼavaifo ʼi Samalia.+ Pea neʼe hau tona foha ko Seoasi ʼo fetogi ia ia.

10 ʼI te 37 taʼu ʼo te pule ʼa Seoasi, te Hau ʼo Suta, neʼe hau ia Seoasi,+ te foha ʼo Seoase ki Iselaele ʼi Samalia, pea neʼe pule lolotoga taʼu ʼe 16. 11 Neʼe ina haga fai pe te meʼa ʼae ʼe kovi kia mata ʼo Sehova, pea neʼe mole maliu kehe mai te ʼu agahala fuli ʼae neʼe uga e Selopoamo, te foha ʼo Nepate ke fai e Iselaele.+ Neʼe ina haga fai pe* te ʼu agahala ʼaia.

12 Pea ko te toe ʼo te hisitolia ʼo Seoasi, te ʼu meʼa fuli ʼae neʼe ina fai, mo ʼana malo ʼi te tau pea mo tana tauʼi ia Amatesia, te Hau ʼo Suta,+ ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 13 Neʼe mate leva ia Seoasi* pea neʼe heka ia Selopoamo*+ ʼi tona hekaʼaga fakahau. Pea neʼe ʼavaifo ia Seoasi ʼi Samalia ohage ko te ʼu hau ʼo Iselaele.+

14 Neʼe mahaki leva ia Eliseo+ pea neʼe ko te mahaki ʼaia ʼae neʼe mate ai ki muli age. Neʼe alu ki ai ia Seoasi, te hau ʼo Iselaele pea neʼe tagi, ʼo ui: “Siʼaku tamai, siʼaku tamai! Te saliote tau ʼa Iselaele pea mo ʼana tagata heka hosi!”+ 15 Neʼe ui age leva e Eliseo ki ai: “ ʼAumai he nahau pea mo he ʼu kauʼi nahau.” Neʼe ina ʼaumai ai he nahau pea mo he ʼu kauʼi nahau. 16 Neʼe ina ui age leva ki te hau ʼo Iselaele: “Toʼo te nahau.” Neʼe ina toʼo ai te nahau, pea neʼe hili leva e Eliseo ʼona nima ki te ʼu nima ʼo te hau. 17 Pea neʼe ina ui age: “Avahi te matapa fakamalama ki te potu esite.” Pea neʼe ina avahi. Neʼe ui age e Eliseo: “Fanahi!” Pea neʼe ina fanahi. Neʼe ina ui leva: “Te kauʼi nahau ʼo te malo ʼa Sehova, te kauʼi nahau ʼo te malo ʼi* te kau Silia! ʼE ke malo anai ʼi te kau Silia ʼi Afeke,+ pea ʼe ke malo katoa anai ia natou.”

18 Neʼe ina hoko atu: “Toʼo te ʼu kauʼi nahau,” pea neʼe ina toʼo. Neʼe ina ui age leva ki te hau ʼo Iselaele: “Taʼi te ʼu kauʼi nahau ki te kele.” Neʼe ina taʼi tuʼa tolu ai ki te kele pea neʼe ina tuku. 19 Neʼe ita leva te tagata ʼa te ʼAtua moʼoni ki ai pea neʼe ina ui age: “Neʼe tonu ke ke taʼi tuʼa nima peʼe tuʼa ono ki te kele! Neʼe feala ai hau malo ʼi te kau Silia pea mo malo katoa ia natou, kae ʼi te lakaga ʼaeni, ʼe ke malo tuʼa tolu pe anai ʼi te kau Silia.”+

20 Hili ʼaia, neʼe mate leva ia Eliseo pea neʼe ʼavaifo. Kae neʼe ʼi ai he ʼu kutuga solia Moape+ neʼe natou ʼohofi te fenua ʼi te kamata ʼo te taʼu fuli.* 21 ʼI te tahi ʼaho, neʼe ʼavaifo e ʼihi hahaʼi he tagata. ʼI tanatou sisio ki te kutuga solia ʼaia, neʼe natou li fakavilivili te sino ʼo te tagata ki te fale maka ʼo Eliseo kae natou feholaki. ʼI te temi ʼae neʼe lave ai te sino ʼo te tagata ʼaia ki te ʼu hui ʼo Eliseo, neʼe toe maʼuli ai te tagata+ pea mo tuʼu ki ʼoluga.

22 Neʼe fakamamahiʼi e Hasaele,+ te Hau ʼo Silia ia Iselaele+ lolotoga te temi katoa ʼae neʼe pule ai ia Seoase. 23 Kae neʼe fakaha e Sehova tona ʼofa, mo tona manavaʼofa+ pea mo tana tokaga kia natou ʼuhi ko te fuakava ʼae neʼe ina fai mo Apalahamo,+ mo Isaake+ pea mo Sakopo.+ Neʼe mole ina fia pulihi katoa ia natou, pea neʼe mole ina liʼaki natou ʼo kaku mai ki te ʼaho nei. 24 ʼI te mate ʼa Hasaele, te Hau ʼo Silia, neʼe hau leva tona foha ko Pene-atate ʼo fetogi ia ia. 25 Pea neʼe toe toʼo e Seoasi, te foha ʼo Seoase mai ia Pene-atate, te foha ʼo Hasaele te ʼu kolo ʼae neʼe toʼo e Hasaele ʼi tana tauʼi ia Seoase. Neʼe malo tuʼa tolu ia Seoasi ia Pene-atate,+ pea neʼe ina toe maʼu te ʼu kolo ʼo Iselaele.

14 Neʼe hau ia Amatesia, te foha ʼo Seoasi,+ te Hau ʼo Suta ʼi te lua taʼu ʼo te pule ʼa Seoasi, te foha ʼo Seoase, te hau ʼo Iselaele. 2 Neʼe hau ʼi tona taʼu 25 pea neʼe pule lolotoga taʼu ʼe 29 ʼi Selusalemi. Neʼe higoa tana faʼe ko Soatine, te fafine mai Selusalemi.+ 3 Neʼe haga fai pe e Amatesia te meʼa ʼae ʼe lelei kia mata ʼo Sehova, kae neʼe mole hage ko Tavite,+ tana kui. Neʼe ina fai ia meʼa fuli ohage pe ko Seoasi tana tamai.+ 4 Kae neʼe mole ina pulihi te ʼu faʼahi maʼoluga,+ pea neʼe kei fai pe e te hahaʼi ni sakilifisio mo tutu ke kohu ni sakilifisio ʼi te ʼu faʼahi maʼoluga.+ 5 ʼI te temi pe ʼae neʼe malohi ai te puleʼaga ʼi tana takitaki, neʼe ina matehi ʼana hahaʼi faifekau ʼae neʼe natou matehi tana tamai, te hau.+ 6 Kae neʼe mole ina matehi te ʼu foha ʼo te hahaʼi faifakapo ʼaia, ʼo mulimuli ki te fakatotonu ʼaeni ʼa Sehova ʼae ʼe tuʼu ʼi te tohi ʼo te Lao ʼa Moisese: “ ʼE mole tonu ke matehi te ʼu tamai ʼuhi ko ʼonatou foha, pea ʼe mole tonu ke matehi te ʼu foha ʼuhi ko ʼanatou tamai. Kae ʼe matehi anai te tagata takitokotahi ʼo mulimuli pe ki tana agahala.”+ 7 Neʼe ina matehi te kau Etome+ ʼe toko 10 000 ʼi te Potu Fenua ʼo Te Masima,+ pea neʼe ina maʼu te kolo ko Selea ʼi te tau.+ Neʼe higoa leva te kolo ʼaia ko Soketeele ʼo kaku mai ki te ʼaho nei.

8 Neʼe fekauʼi leva e Amatesia he ʼu tagata ʼave logo ke olo kia Seoasi, te foha ʼo Seoase, foha ʼo Seu te hau ʼo Iselaele, pea ke natou ui age ki ai: “Haʼu ke ta tau.”+ 9 Neʼe fekauʼi leva e Seoasi, te Hau ʼo Iselaele he tahi ke alu ʼo fakaha kia Amatesia, te Hau ʼo Suta: “Neʼe poapoaki e te vao talatala ʼo Lipane ki te fuʼu sete ʼo Lipane: ‘Foaki mai tou ʼofafine ke ʼohoana mo toku foha.’ Kae neʼe fakalaka he manu fekai ʼo Lipane ʼo ina malamalaki te vao talatala. 10 ʼE moʼoni, neʼe ke matehi te kau Etome,+ ʼo ke liliu ai ʼo fiameʼalahi. Koia, ke ke fiafia ʼi tou kololia ʼaia, kae ke ke nofo ʼi tou fale hau. He koʼe koa ʼe ke kumi anai tou malaʼia kae ʼe ke to anai, ʼo feia mo Suta?” 11 Kae neʼe mole fakalogo ia Amatesia.+

Koia, neʼe alu ai ia Seoasi, te Hau ʼo Iselaele ʼo tau mo Amatesia, te Hau ʼo Suta ʼi Pete-semesi,+ ʼae ʼi Suta.+ 12 Neʼe malo leva ia Iselaele ʼi Suta, pea neʼe tahi feholaki te kau solia ʼo Suta ki tona ʼapi.* 13 Pea ʼi Pete-semesi neʼe puke ai e Seoasi, te Hau ʼo Iselaele ia Amatesia, te Hau ʼo Suta, te foha ʼo Seoasi, foha ʼo Akasia. Neʼe olo ai leva ki Selusalemi, pea neʼe ina maumauʼi te kaupa ʼo Selusalemi, mai te Matapa ʼo Efalaimi+ ʼo kaku ki te Matapa ʼo Te Tuliki,+ neʼe fasiga nima 400.* 14 Neʼe ina toʼo te aulo mo te siliva fuli pea mo te ʼu meʼa kehekehe fuli ʼae neʼe tuku ʼi te fale ʼo Sehova pea mo te ʼu tanakiʼaga koloa ʼo te fale hau, mo ina toe ʼave popula mo niʼihi. Pea neʼe toe liliu leva ki Samalia.

15 Pea ko te toe ʼo te hisitolia ʼo Seoasi, te ʼu meʼa ʼae neʼe ina fai, mo ʼana malo ʼi te tau pea mo tana tauʼi ia Amatesia, te Hau ʼo Suta, ʼe mole tuʼu koa la ʼi te tohi ʼo te ʼu hau ʼo Iselaele? 16 Neʼe mate leva ia Seoasi* pea neʼe ʼavaifo ʼi Samalia+ ohage ko te ʼu hau ʼo Iselaele. Pea neʼe hau tona foha ko Selopoamo*+ ʼo fetogi ia ia.

17 Neʼe maʼuli leva ia Amatesia,+ te foha ʼo Seoasi, te hau ʼo Suta lolotoga taʼu ʼe 15 ʼi te ʼosi mate ʼa Seoasi,+ te foha ʼo Seoase, te hau ʼo Iselaele.+ 18 Pea ko te toe ʼo te hisitolia ʼo Amatesia, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 19 Ki muli age, neʼe fonofono niʼihi ʼi Selusalemi ke natou fakafeagai kia ia.+ Neʼe hola ai ki Lakisi, kae neʼe natou fekauʼi he ʼu tagata ke natou tuli ia ia, pea neʼe natou matehi leva ia ia ʼi Lakisi. 20 Pea neʼe natou toe ʼaumai tona sino ki Selusalemi ʼi he saliote neʼe toho e ni hosi, pea neʼe ʼavaifo ia ia ʼi te Kolo ʼo Tavite,+ ohage ko ʼana kui. 21 Pea neʼe toʼo leva e te hahaʼi fuli ʼo Suta ia Asalia,*+ ʼae neʼe taʼu 16,+ ʼo fakanofo hau moʼo fetogi tana tamai ko Amatesia.+ 22 Neʼe ina toe laga te kolo ko Elati+ ʼo toe maʼu ai e te puleʼaga ʼo Suta te kolo ʼaia, ʼi te ʼosi mate ʼa te hau.*+

23 ʼI te 15 taʼu ʼo te pule ʼa Amatesia, te foha ʼo Seoasi, te hau ʼo Suta, neʼe hau ia Selopoamo,+ te foha ʼo Seoasi, te Hau ʼo Iselaele ʼi Samalia. Pea neʼe pule lolotoga taʼu ʼe 41. 24 Neʼe ina haga fai pe te meʼa ʼae ʼe kovi kia mata ʼo Sehova. Neʼe mole maliu kehe mai te agahala ʼae neʼe uga e Selopoamo, te foha ʼo Nepate, ke fai e Iselaele.+ 25 Neʼe ina toe fakatuʼu te ʼu tuʼakoi ʼo Iselaele mai Lepo-hamate*+ ki te Tai ʼo Alapa,*+ ohage pe ko tona fakaha e Sehova te ʼAtua ʼo Iselaele ʼaki tana tagata faifekau ko Sonasi,+ te polofeta mai Kiete-efele+ pea ko te foha ʼo Amitai. 26 Koteʼuhi neʼe sio ia Sehova ki te mamahi ʼaupito ʼa Iselaele.+ Neʼe mole kei ʼi ai he tahi neʼe lava tokoni ki Iselaele, maʼia mo ia ʼae ʼe mole hona ʼuhiga ʼi Iselaele. 27 Kae neʼe fakapapau e Sehova ʼe mole ina molehi anai te higoa ʼo Iselaele ʼi te kele.+ Koia neʼe ina haofaki ai natou ʼaki ia Selopoamo, te foha ʼo Seoasi.+

28 Pea ko te toe ʼo te hisitolia ʼo Selopoamo, te ʼu meʼa fuli ʼae neʼe ina fai, mo ʼana malo ʼi te tau, mo ʼana tau pea mo tana liufaki ia Tamaso+ mo Hamate+ ki Suta ʼi Iselaele, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 29 Neʼe mate leva ia Selopoamo* pea neʼe ʼavaifo ʼi te koga meʼa ʼae neʼe ʼavaifo ai te ʼu hau ʼo Iselaele. Neʼe hau leva tona foha ko Sakalia+ ʼo fetogi ia ia.

15 Neʼe hau ia Asalia,*+ te foha ʼo Amatesia,+ te Hau ʼo Suta ʼi te 27 taʼu ʼo te pule ʼa Selopoamo,* te Hau ʼo Iselaele. 2 Neʼe hau ʼi tona taʼu 16, pea neʼe pule lolotoga taʼu ʼe 52 ʼi Selusalemi. Neʼe higoa tana faʼe ko Sekolia, ko te fafine mai Selusalemi. 3 Neʼe haga fai pe e Asalia te meʼa ʼae ʼe lelei kia mata ʼo Sehova, ohage pe ko tana tamai ko Amatesia.+ 4 Kae neʼe mole ina pulihi te ʼu faʼahi maʼoluga,+ pea neʼe kei fai pe e te hahaʼi ni sakilifisio mo tutu ke kohu ni sakilifisio ʼi te ʼu faʼahi maʼoluga.+ 5 Neʼe tauteaʼi leva e Sehova te hau, pea neʼe kilia+ ʼo kaku ki te ʼaho ʼae neʼe mate ai. Neʼe nofo ia ʼi he tahi fale,+ pea neʼe ko Sotame,+ te foha ʼo te hau ʼae neʼe tokaga leva ki te fale hau, ʼo ina fakamauʼi te hahaʼi ʼo te fenua.+ 6 Pea ko te toe ʼo te hisitolia ʼo Asalia,+ te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 7 Neʼe mate leva ia Asalia*+ pea neʼe ʼavaifo ʼi te Kolo ʼo Tavite, ohage ko ʼana kui. Pea neʼe hau ia Sotame, tona foha ʼo fetogi ia ia.

8 ʼI te 38 taʼu ʼo te pule ʼa Asalia,+ te Hau ʼo Suta, neʼe hau ia Sakalia,+ te foha ʼo Selopoamo ki Iselaele ʼi Samalia, pea neʼe pule lolotoga mahina ʼe ono. 9 Neʼe ina fai te meʼa ʼae ʼe kovi kia mata ʼo Sehova, ohage pe ko ʼana kui. Neʼe mole maliu kehe ia mai te ʼu agahala ʼae neʼe uga e Selopoamo, te foha ʼo Nepate ke fai e Iselaele.+ 10 Neʼe fakatuʼutuʼu leva e Salume, te foha ʼo Sapesi ke fakafeagai kia ia, pea neʼe ina matehi ia ia+ ʼi Sipeleami.+ ʼI tana ʼosi matehi ia ia, neʼe hau leva ʼo fetogi ia ia. 11 Pea ko te toe ʼo te hisitolia ʼo Sakalia, ʼe tuʼu ʼi te tohi ʼo te hisitolia ʼo te ʼu hau ʼo Iselaele. 12 Neʼe hoko ai te folafola ʼaeni neʼe fakaha e Sehova kia Seu: “ ʼE heka anai ʼou foha ki te hekaʼaga fakahau ʼo Iselaele,+ ʼo kaku ki te fa taʼi tupu.”+ ʼEi, neʼe hoko moʼoni te aluʼaga ʼaia.

13 Neʼe hau ia Salume, te foha ʼo Sapesi ʼi te 39 taʼu ʼo te pule ʼa Osiasi,+ te Hau ʼo Suta, pea neʼe pule ʼi he mahina katoa ʼi Samalia. 14 Pea neʼe mavae ia Menaemi, te foha ʼo Kati mai Tilitesa+ ʼo alu ki Samalia, pea neʼe ina matehi ʼi ai ia Salume,+ te foha ʼo Sapesi. ʼI tana ʼosi matehi ia ia, neʼe hau leva ʼo fetogi ia ia. 15 Ko te toe ʼo te hisitolia ʼo Salume pea mo tana fakafeagai ʼae kia Sakalia, ʼe tuʼu ʼi te tohi ʼo te hisitolia ʼo te ʼu hau ʼo Iselaele. 16 ʼI te temi ʼaia, neʼe haʼu ai ia Menaemi mai Tilitesa ʼo maumauʼi ia Tifesake pea mo ʼona tafaʼaki, ʼo feia mo te hahaʼi fuli ʼae neʼe nonofo ʼi ai, he neʼe mole natou avahi age kia ia te ʼu matapa ʼo te kolo. Neʼe ina maumauʼi te kolo pea mo ina fahiʼi te ʼu fatu ʼo te ʼu fafine faitama.

17 ʼI te 39 taʼu ʼo te pule ʼa Asalia, te Hau ʼo Suta, neʼe hau ia Menaemi, te foha ʼo Kati ki Iselaele, pea neʼe pule lolotoga taʼu ʼe hogofulu ʼi Samalia. 18 Neʼe ina haga fai pe te meʼa ʼae ʼe kovi kia mata ʼo Sehova. ʼI tona maʼuli katoa, neʼe mole maliu kehe mai te ʼu agahala ʼae neʼe uga e Selopoamo, te foha ʼo Nepate ke fai e Iselaele.+ 19 Neʼe haʼu leva ia Pulu,+ te Hau ʼo Asilia ʼo tauʼi te fenua, pea neʼe foaki age e Menaemi ki ai te ʼu taleta* siliva ʼe 1 000 ke tokoni age ki te fakamalohiʼi ʼo tana takitaki te puleʼaga.+ 20 Neʼe maʼu e Menaemi te falā ʼaia neʼe ina foaki ki te hau ʼo Asilia mai te ʼu tagata maʼu koloa ʼo Iselaele.+ Neʼe ina fakamaʼua ke foaki e te tagata takitokotahi ʼe maʼu koloa ni foʼi sikele* siliva ʼe 50. Pea neʼe toe liliu leva te hau ʼo Asilia, neʼe mole nofo ia ʼi te fenua. 21 Pea ko te toe ʼo te hisitolia ʼo Menaemi,+ te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Iselaele? 22 Neʼe mate leva ia Menaemi* pea neʼe hau tona foha ko Pekasia ʼo fetogi ia ia.

23 ʼI te 50 taʼu ʼo te pule ʼa Asalia, te Hau ʼo Suta, neʼe hau ia Pekasia, te foha ʼo Menaemi ki Iselaele ʼi Samalia, pea neʼe pule lolotoga taʼu ʼe lua. 24 Neʼe ina haga fai pe te meʼa ʼae ʼe kovi kia mata ʼo Sehova. Neʼe mole maliu kehe mai te ʼu agahala ʼae neʼe uga e Selopoamo, te foha ʼo Nepate ke fai e Iselaele.+ 25 Neʼe fakatuʼutuʼu leva e tana tagata pule solia ko Pekase,+ te foha ʼo Lemalia, ke fakafeagai kia ia pea neʼe ina matehi ia ia ʼi te tule malohi ʼo te fale hau, mo Alekopi pea mo Alia.* Neʼe fakatahi mo ia te ʼu tagata ʼe toko 50 mai Kileate. Pea ʼi tana ʼosi matehi ia ia, neʼe hau leva ʼo fetogi ia ia. 26 Pea ko te toe ʼo te hisitolia ʼo Pekasia, te ʼu meʼa fuli ʼae neʼe ina fai, ʼe tuʼu ʼi te tohi ʼo te hisitolia ʼo te ʼu hau ʼo Iselaele.

27 ʼI te 52 taʼu ʼo te pule ʼa Asalia, te Hau ʼo Suta, neʼe hau ia Pekase,+ te foha ʼo Lemalia ki Iselaele ʼi Samalia, pea neʼe pule lolotoga taʼu ʼe 20. 28 Neʼe ina haga fai pe te meʼa ʼae ʼe kovi kia mata ʼo Sehova, pea neʼe mole maliu kehe mai te ʼu agahala ʼae neʼe uga e Selopoamo, te foha ʼo Nepate ke fai e Iselaele.+ 29 ʼI te temi pule ʼa Pekase, te Hau ʼo Iselaele, neʼe ʼohofi e Tikalate-pilesele,+ te Hau ʼo Asilia pea neʼe ina maʼu ai te ʼu kolo ko Isone, mo Apele-pete-maaka,+ mo Sanoake, mo Ketesi,+ mo Atesoli, mo Kileate+ pea mo Kalilea, ia te fenua katoa ʼo Nefetali.+ Neʼe ina toe ʼave popula foki ki Asilia+ te hahaʼi ʼae neʼe nonofo ʼi ai. 30 Neʼe fakatuʼutuʼu leva e Oseo,+ te foha ʼo Ela ke fakafeagai kia Pekase, te foha ʼo Lemalia, pea neʼe ina matehi ia ia. Neʼe hau leva ʼo fetogi ia ia ʼi te 20 taʼu ʼo te pule ʼa Sotame,+ te foha ʼo Osiasi. 31 Pea ko te toe ʼo te hisitolia ʼo Pekase, te ʼu meʼa fuli ʼae neʼe ina fai, ʼe tuʼu ʼi te tohi ʼo te hisitolia ʼo te ʼu hau ʼo Iselaele.

32 Neʼe hau ia Sotame,+ te foha ʼo Osiasi,+ te Hau ʼo Suta ʼi te lua taʼu ʼo te pule ʼa Pekase, te foha ʼo Lemalia, te hau ʼo Iselaele. 33 Neʼe hau ʼi tona taʼu 25, pea neʼe pule lolotoga taʼu ʼe 16 ʼi Selusalemi. Neʼe higoa tana faʼe ko Selusa, ko te ʼofafine ʼo Satoke.+ 34 Neʼe haga fai pe e Sotame te meʼa ʼae ʼe lelei kia mata ʼo Sehova, ohage pe ko tana tamai ko Osiasi.+ 35 Kae neʼe mole ina pulihi te ʼu faʼahi maʼoluga, pea neʼe kei fai pe e te hahaʼi ni sakilifisio mo tutu ke kohu ni sakilifisio ʼi te ʼu faʼahi maʼoluga.+ Neʼe ko ia ʼae neʼe ina laga te matapa maʼoluga ʼo te fale ʼo Sehova.+ 36 Pea ko te toe ʼo te hisitolia ʼo Sotame, te ʼu meʼa ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 37 ʼI te temi ʼaia, neʼe fekauʼi e Sehova ia Letisini, te hau ʼo Silia pea mo Pekase,+ te foha ʼo Lemalia, ke nā olo ʼo tauʼi ia Suta.+ 38 Neʼe mate leva ia Sotame* pea neʼe ʼavaifo ohage ko ʼana kui ʼi te Kolo ʼo Tavite, tana kui. Pea neʼe hau tona foha ko Akase, ʼo fetogi ia ia.

16 Neʼe hau ia Akase,+ te foha ʼo Sotame, te Hau ʼo Suta ʼi te 17 taʼu ʼo te pule ʼa Pekase, te foha ʼo Lemalia. 2 Neʼe hau ia Akase ʼi tona taʼu 20, pea neʼe pule lolotoga taʼu ʼe 16 ʼi Selusalemi. Neʼe mole ina fai te meʼa ʼae ʼe lelei kia mata ʼo Sehova, tona ʼAtua, ʼo mole hage ko Tavite, tana kui.+ 3 Kae neʼe ina faʼifaʼitakiʼi te aga ʼa te ʼu hau ʼo Iselaele,+ pea neʼe ina tutu tona foha totonu ohage ko he sakilifisio,+ ʼo mulimuli ki te ʼu aga fakalialia ʼa te ʼu puleʼaga+ ʼae neʼe kapu e Sehova ia muʼa ʼo te kau Iselaele. 4 Neʼe ina toe fai foki mo ni sakilifisio pea mo tutu ke kohu ni sakilifisio ʼi te ʼu faʼahi maʼoluga,+ mo te ʼu moʼuga liliki pea mo te ʼu lalo fuʼu ʼakau fuli ʼae ʼe maʼuli lelei.+

5 ʼI te temi ʼaia, neʼe ʼomai ai ia Letisini, te Hau ʼo Silia pea mo Pekase, te foha ʼo Lemalia, te hau ʼo Iselaele ʼo tauʼi ia Akase. Neʼe nā ʼa takai ia Selusalemi+ kae neʼe mole feala ke nā maʼu. 6 ʼI te temi ʼaia, neʼe liufaki e Letisini, te Hau ʼo Silia te kolo ko Elati+ ki te kau Etome, pea hili ʼaia, neʼe ina fakamavae te kau Sutea* mai Elati. Pea neʼe ulu leva te kau Etome ki Elati, ʼo natou nonofo ai ʼo kaku mai ki te ʼaho nei. 7 Koia, neʼe fekauʼi ai e Akase he ʼu tagata ʼave logo ke olo kia Tikalate-pilesele,+ te Hau ʼo Asilia ʼo ui age ki ai: “Ko au ʼe ko tau tagata faifekau pea mo tou foha. Ke ke haʼu ʼo haofaki au mai te ʼu nima ʼo te hau ʼo Silia pea mo te ʼu nima ʼo te hau ʼo Iselaele, ʼae ʼe nā tauʼi au.” 8 Pea neʼe toʼo leva e Akase te siliva mo te aulo ʼae neʼe tuku ʼi te fale ʼo Sehova pea mo te ʼu tanakiʼaga koloa ʼo te fale hau, ʼo ʼave ki te hau ʼo Asilia ohage ko he meʼa ʼofa neʼe foaki fakakaka.+ 9 Neʼe tali e te hau ʼo Asilia tana kole, ʼo alu ai ʼo tauʼi pea mo maʼu ia Tamaso. Pea neʼe ina ʼave popula te hahaʼi ʼae neʼe maʼuʼuli ʼi ai ki Kile,+ ʼo ina matehi ai ia Letisini.+

10 Neʼe alu leva ia te Hau ko Akase ki Tamaso ʼo fakafelaveʼi kia Tikalate-pilesele, te Hau ʼo Asilia. ʼI te sio ʼa te Hau ko Akase ki te ʼaletale ʼae neʼe tuʼu ʼi Tamaso, neʼe ina momoli kia Ulisa te pelepitelo te pāki ʼae neʼe tuʼu ai te ʼu agaaga fuli ʼo te ʼaletale ʼaia.+ 11 Pea neʼe faʼu e te pelepitelo ko Ulisa+ he ʼaletale,+ ʼo mulimuli ki te ʼu fakatotonu fuli ʼae neʼe fakaha age e te Hau ko Akase mai Tamaso. Neʼe fakaʼosi e te pelepitelo ko Ulisa te faʼu ʼo te ʼaletale ʼi muʼa ʼo te toe liliu age ʼa te Hau ko Akase mai Tamaso. 12 ʼI te toe liliu mai leva ʼa te hau mai Tamaso ʼo sio ki te ʼaletale, neʼe fakaovi ki te ʼaletale pea neʼe ina momoli ʼi ai he ʼu molaga.+ 13 Pea neʼe hoko atu pe tana momoli ʼi te ʼaletale ʼaia ʼana holokoseta pea mo ʼana molaga meʼa kai, ʼo tutu ke kohu. Neʼe ina toe liligi foki ʼi ai ʼana molaga vino pea mo afuhi ki ai te toto ʼo te ʼu sakilifisio ʼo te tokalelei.* 14 Pea neʼe ina toʼo leva te ʼaletale kapa+ ʼae neʼe tuʼu ia muʼa ʼo Sehova, neʼe tuʼu ʼi te muʼa fale, ʼi te vaha ʼo tana ʼaletale pea mo te fale ʼo Sehova, ʼo ina tuku ki te faʼahi noleto ʼo tana ʼaletale. 15 Pea neʼe fakatotonu e te Hau ko Akase ki te pelepitelo ko Ulisa:+ “Ke ke tutu ke kohu te holokoseta ʼo te uhu ʼi te ʼaletale lahi,+ ʼo feia mo te molaga meʼa kai ʼo te afiafi,+ mo te holokoseta ʼa te hau, mo tana molaga meʼa kai, mo te ʼu holokoseta ʼa te hahaʼi fuli, mo ʼanatou molaga meʼa kai pea mo ʼanatou molaga meʼa inu. ʼE tonu foki ke ke afuhi ki ai te toto ʼo te ʼu holokoseta fuli pea mo te toto ʼo te tahi ʼu sakilifisio. Pea ʼo ʼuhiga leva mo te ʼaletale kapa, ʼe hoki au vakaʼi anai te meʼa ʼae ka fai ki ai.” 16 Pea neʼe fai e te pelepitelo ko Ulisa ia te ʼu meʼa fuli ʼae neʼe fakatotonu age e te Hau ko Akase.+

17 Tahi ʼae meʼa, neʼe vete e te Hau ko Akase te ʼu saliote+ pea neʼe ina tuʼusi te ʼu pano ʼae ʼi te ʼu tafaʼaki mo ina toʼo te ʼu foʼi topu kapa ʼae neʼe ʼi ai.+ Neʼe ina toʼo kehe leva te foʼi tane vai lahi, ʼae neʼe higoa ko te Tai, ʼae neʼe hili ʼi te ʼu vitulo kapa+ pea neʼe ina tuku ki he faʼahi neʼe fola maka.+ 18 Pea neʼe ina toʼo mo te fakamalumaluʼaga ʼae neʼe laga ʼi te fale pea neʼe fakaʼaogaʼi ki te Sapato, ʼo feia mo te matapa ʼae neʼe hu ai te ʼu hau ki te fale ʼo Sehova. Neʼe ina fai te ʼu faʼahi ʼaia ʼuhi ko te hau ʼo Asilia.

19 Pea ko te toe ʼo te hisitolia ʼo Akase, te ʼu meʼa ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta?+ 20 Neʼe mate leva ia Akase* pea neʼe ʼavaifo ʼi te Kolo ʼo Tavite, ohage ko ʼana kui. Pea neʼe hau leva tona foha ko Esekiasi*+ ʼo fetogi ia ia.

17 ʼI te 12 taʼu ʼo te pule ʼa Akase, te Hau ʼo Suta, neʼe hau ia Oseo,+ te foha ʼo Ela ki Iselaele ʼi Samalia. Neʼe pule lolotoga taʼu ʼe hiva. 2 Neʼe ina haga fai pe te meʼa ʼae ʼe kovi kia mata ʼo Sehova, kae neʼe mole hage leva ko te ʼu hau ʼo Iselaele ʼae neʼe muʼamuʼa atu ia ia. 3 Pea neʼe tauʼi leva ia ia e Salemanasale, te Hau ʼo Asilia.+ Neʼe liliu ia Oseo ko tana tagata faifekau pea neʼe ina kamata totogi age he tukuhau kia ia.+ 4 Kae neʼe iloʼi leva e te hau ʼo Asilia neʼe fakatuʼutuʼu e Oseo ke agatuʼu kia ia, he neʼe ina fekauʼi ni tagata ʼave logo ke olo kia So, te Hau ʼo Esipito+ pea neʼe mole ina totogi te tukuhau, ohage ko te ʼu taʼu ki muʼa atu. Koia, neʼe tuku ia ia e te hau ʼo Asilia ki te fale pilisoni pea mo ina haʼi ia ia.

5 Neʼe ʼohofi e te hau ʼo Asilia te fenua katoa, pea neʼe alu ʼo ʼa takai ia Samalia lolotoga taʼu ʼe tolu. 6 ʼI te hiva taʼu ʼo te pule ʼa Oseo, neʼe maʼu leva e te hau ʼo Asilia ia Samalia.+ Neʼe ina ʼave popula te hahaʼi ʼo Iselaele+ ki Asilia, ʼo natou nonofo ai ʼi Salaki, mo Sapole, ʼo ovi ki te vai tafe ʼo Kosani+ pea mo te ʼu kolo ʼo te kau Metia.+

7 Neʼe hoko te faʼahi ʼaia he neʼe agahala te hahaʼi ʼo Iselaele kia Sehova, tonatou ʼAtua, ʼae neʼe ina fakamavae natou mai te fenua ʼo Esipito pea mo fakaʼateainaʼi natou mai ia Falaone, te hau ʼo Esipito.+ Neʼe natou tauhi* ki te tahi age ʼu ʼatua,+ 8 mo mulimuli ki te ʼu agaʼi fenua ʼo te ʼu puleʼaga ʼae neʼe kapu e Sehova ia muʼa ʼo te kau Iselaele, ʼo feia mo te ʼu agaʼi fenua ʼae neʼe fakatuʼu e te ʼu hau ʼo Iselaele.

9 Neʼe haga fai pe e te kau Iselaele te ʼu meʼa ʼae ʼe mole lelei kia mata ʼo Sehova, tonatou ʼAtua. Neʼe natou laga he ʼu faʼahi maʼoluga ʼi ʼonatou kolo fuli,+ mai te tule leʼo ki te kolo tau.* 10 Neʼe natou fakatuʼu maʼa natou he ʼu pou maka taputapu pea mo he ʼu pou ʼakau taputapu*+ ʼi te ʼu moʼuga liliki fuli pea mo te ʼu lalo fuʼu ʼakau fuli ʼae ʼe maʼuli lelei.+ 11 Pea neʼe natou tutu ke kohu ni sakilifisio ʼi te ʼu faʼahi maʼoluga fuli, ohage pe ko tona fai e te ʼu puleʼaga ʼae neʼe kapu e Sehova ʼi ʼonatou muʼa.+ Neʼe natou haga fai pe te ʼu meʼa ʼae ʼe kovi moʼo fakatupu ʼaki ai te hauhau ʼo Sehova.

12 Neʼe hoko atu pe tanatou tauhi ki te ʼu fakatata fakalialia,*+ logo la neʼe ui age e Sehova kia natou: “ ʼE mole tonu ke kotou fai te faʼahi ʼaia!”+ 13 Neʼe fai tuʼumaʼu pe e Sehova he ʼu fakatokaga ki Iselaele mo Suta ʼaki ʼana polofeta fuli pea mo te ʼu tagata fuli ʼae ʼe natou iloʼi te ʼu meʼa ʼae neʼe ha,+ ʼo ina ui kia natou: “Kotou tafoki mai ʼi ʼakotou aga ʼae ʼe kovi.+ Kotou taupau ʼaku fakatotonu pea mo ʼaku lao, ia te ʼu meʼa fuli ʼae ʼe tohi ʼi te lao ʼae neʼe au fakatotonu ki ʼakotou kui mo au fakaha atu ʼaki ʼaku tagata faifekau, ia te kau polofeta.” 14 Kae neʼe mole natou fakalogo, pea neʼe natou uigataʼa aipe* ohage pe ko ʼanatou kui ʼae neʼe mole natou fakaha tanatou tui kia Sehova, tonatou ʼAtua.+ 15 Neʼe natou liʼaki tuʼumaʼu pe ʼana fakatotonu, mo tana fuakava+ ʼae neʼe ina fai mo ʼanatou kui pea mo ʼana fakamanatu ʼae neʼe ina fai moʼo fakatokaga ʼo natou.+ Neʼe hoko atu pe tanatou tauhi ki te ʼu fakatata vaʼiganoa,+ pea neʼe natou liliu ko ni hahaʼi ʼe mole honatou ʼuhiga.+ Neʼe natou faʼifaʼitakiʼi ai te ʼu puleʼaga ʼo ʼonatou tafaʼaki ʼae neʼe fakatotonu age e Sehova ke ʼaua naʼa natou faʼifaʼitakiʼi.+

16 Neʼe natou liʼaki te ʼu fakatotonu fuli ʼa Sehova, tonatou ʼAtua, pea neʼe natou faʼu he ʼu fakatata ukamea* ʼe lua ʼo he ʼu ʼuhiʼi pipi+ pea mo he pou ʼakau taputapu.*+ Neʼe natou tulolo ia muʼa ʼo te foʼi kautau katoa ʼo te ʼatu lagi*+ mo tauhi kia Paale.+ 17 Neʼe natou toe tutu foki ʼonatou foha pea mo ʼonatou ʼofafine,+ mo faifakakikite fakatemonio,+ pea mo kumi he ʼu fakailoga. Neʼe natou haga fai pe te meʼa ʼae ʼe kovi kia mata ʼo Sehova, moʼo fakatupu ʼaki ai tona hauhau.

18 Koia, neʼe kovi ʼosi ai te ita ʼo Sehova ki Iselaele, pea neʼe ina fakamamaʼo ai natou mai ia te ia.+ Neʼe mole ina tuku he tahi ke maʼuli ʼi te fenua, gata pe ki te telepi ʼo Suta.

19 Kae maʼiape la mo te hahaʼi ʼo Suta neʼe mole natou taupau te ʼu fakatotonu ʼa Sehova, tonatou ʼAtua.+ Neʼe natou toe faʼifaʼitakiʼi mo te ʼu agaʼi fenua ʼae neʼe fai e Iselaele.+ 20 Pea neʼe liʼaki e Sehova te hakoga fuli ʼo Iselaele, mo ina fakamalaloʼi ifo natou pea mo tuku natou ki te ʼu nima ʼo ʼonatou fili, ʼo ina kapu natou ʼi ʼona muʼa. 21 Neʼe ina toʼo kehe ia Iselaele mai te famili ʼo Tavite, pea neʼe natou fakanofo hau ia Selopoamo, te foha ʼo Nepate.+ Kae neʼe uga e Selopoamo ia Iselaele ke natou fakamamaʼo mai ia Sehova pea ke natou fai he agahala mamafa. 22 Pea neʼe haga fai pe e te hahaʼi ʼo Iselaele te ʼu agahala fuli ʼae neʼe fai e Selopoamo.+ Neʼe mole natou maliu kehe mai ai 23 ʼo kaku ki te fakamamaʼo e Sehova ia Iselaele mai ia te ia, ohage pe ko te meʼa ʼae neʼe ina fakaha ʼaki ʼana tagata faifekau fuli, ia te kau polofeta.+ Neʼe toʼo ai ia Iselaele mai tonatou fenua ʼo ʼave popula ki Asilia,+ pea ʼe natou maʼuʼuli ai ʼo kaku mai ki te ʼaho nei.

24 Neʼe ʼaumai leva e te hau ʼo Asilia ni hahaʼi mai Papiloni, mo Kuta, mo Ava, mo Hamate pea mo Sefalevaimi+ ke natou nonofo ʼi te ʼu kolo ʼo Samalia moʼo fetogi te kau Iselaele. Neʼe natou toʼo maʼa natou ia Samalia pea mo nonofo leva ʼi ʼona kolo. 25 ʼI tanatou kamata nonofo ʼi ai, neʼe mole natou manavasiʼi* kia Sehova. Koia neʼe ʼaumai ai e Sehova he ʼu laione kia natou,+ pea neʼe natou matematehi ʼihi hahaʼi. 26 Pea neʼe fakaha leva ki te hau ʼo Asilia: “Ko te ʼu puleʼaga ʼae neʼe ke ʼave popula pea ke tuku ke nonofo ʼi te ʼu kolo ʼo Samalia, ʼe mole natou iloʼi te lotu* ʼa te ʼAtua ʼo te fenua. Koia ʼe ina ʼaumai tuʼumaʼu pe he ʼu laione kia natou, pea ʼe matehi natou e te ʼu laione, he ʼe mole he tahi ʼe ina iloʼi te lotu ʼa te ʼAtua ʼo te fenua.”

27 Neʼe fakatotonu leva e te hau ʼo Asilia: “Fekauʼi he pelepitelo ʼi te ʼu pelepitelo ʼae neʼe kotou ʼaumai popula mai ai, ke toe liliu ʼo maʼuli ʼi ai pea ke ina akoʼi age kia natou te lotu ʼa te ʼAtua ʼo te fenua.” 28 Koia neʼe toe liliu mai he pelepitelo ʼi te ʼu pelepitelo ʼae neʼe ʼave popula pea neʼe maʼuli leva ʼi Petele.+ Neʼe ina kamata akoʼi age kia natou ke natou manavasiʼi* kia Sehova.+

29 Kae neʼe tahi faʼu pe e te ʼu puleʼaga kehekehe ʼaia tonatou ʼatua,* ʼo natou tuku ʼi te ʼu fale ki te tauhi ʼae neʼe laga e te kau Samalitana ʼi te ʼu faʼahi maʼoluga. Neʼe tahi fai e te ʼu puleʼaga kehekehe ia te meʼa ʼaia ʼi te ʼu kolo ʼae neʼe natou nonofo ai. 30 Koia, neʼe faʼu e te hahaʼi tagata ʼo Papiloni he fakatata ʼo Sukoti-penote, neʼe faʼu e te hahaʼi tagata ʼo Kuti he fakatata ʼo Nelekale, neʼe faʼu e te hahaʼi tagata ʼo Hamate+ he fakatata ʼo Asima, 31 pea neʼe faʼu leva e te hahaʼi ʼo Ava he fakatata ʼo Nipesasi pea mo Taletake. Neʼe tutu e te kau Sefalevaimi ʼonatou foha ohage ko he sakilifisio ki te ʼu ʼatua ʼo Sefalevaimi+ ko Atelameleke pea mo Anameleke. 32 Logo la neʼe natou manavasiʼi kia Sehova, kae neʼe natou fakanofo he kau pelepitelo neʼe filifili mai te hahaʼi ke natou gaue maʼa natou ʼi te ʼu fale tauhi ʼi te ʼu faʼahi maʼoluga.+ 33 Koia, neʼe natou manavasiʼi kia Sehova, kae neʼe natou tauhi pe ki ʼonatou ʼatua, ʼo mulimuli ki te lotu* ʼo te ʼu fenua ʼae neʼe natou ʼomai mai ai.+

34 ʼE natou mulimuli pe ki ʼanatou lotu* ʼafeā ʼo kaku mai ki te ʼaho nei. ʼE mole he tahi ia natou ʼe tauhi* kia Sehova, mo mulimuli ki ʼana lao, mo ʼana fakatotonu, mo ʼana fakamau, mo te Lao pea mo te fakatotonu ʼae neʼe foaki e Sehova ki te ʼu foha ʼo Sakopo, ʼae neʼe ina fakahigoaʼi leva ko Iselaele.+ 35 ʼI te temi ʼae neʼe fai ai e Sehova he fuakava mo Iselaele,+ neʼe ina fakatotonu age kia natou: “ ʼE mole tonu ke kotou manavasiʼi ki he tahi age ʼu ʼatua, mo tulolo ʼi ʼonatou muʼa, peʼe tauhi peʼe fai ni sakilifisio kia natou.+ 36 Kae ko Sehova, ʼae neʼe ina fakamavae koutou mai te fenua ʼo Esipito ʼaki tona malohi lahi mo tona nima mafimafi,+ ʼe ko Ia ʼae ʼe tonu ke kotou manavasiʼi ki ai,+ pea ʼe tonu ke kotou tulolo ʼi ʼona muʼa pea mo fai ni sakilifisio kia te ia. 37 Pea ʼe tonu anai ke kotou haga mulimuli fakalelei ki te ʼu lao, mo te ʼu fakamau, mo te Lao pea mo te fakatotonu ʼae neʼe ina tohi maʼa koutou,+ pea ʼe mole tonu ke kotou manavasiʼi ki he tahi age ʼu ʼatua. 38 ʼE mole tonu ke kotou galoʼi te fuakava ʼae neʼe au fai mo koutou,+ pea ʼe mole tonu ke kotou manavasiʼi ki he tahi age ʼu ʼatua. 39 Kae ʼe ko Sehova, tokotou ʼAtua ʼae ʼe tonu ke kotou manavasiʼi ki ai, he ʼe ko ia ʼae ka ina haofaki koutou mai te ʼu nima ʼo ʼokotou fili fuli.”

40 Kae neʼe mole fakalogo ia te ʼu puleʼaga ʼaia, pea neʼe natou mulimuli pe ki ʼanatou lotu* ʼafeā.+ 41 Koia, neʼe natou manavasiʼi kia Sehova,+ kae neʼe natou toe tauhi foki ki ʼanatou fakatata. Pea neʼe fai pe e ʼonatou foha mo ʼonatou mokopuna te ʼu meʼa ʼae neʼe fai e ʼanatou kui, ʼo kaku mai ki te ʼaho nei.

18 Neʼe hau ia Esekiasi,+ te foha ʼo Akase,+ te Hau ʼo Suta ʼi te tolu taʼu ʼo te pule ʼa Oseo,+ te foha ʼo Ela, te hau ʼo Iselaele. 2 Neʼe hau ʼi tona taʼu 25 pea neʼe pule lolotoga taʼu ʼe 29 ʼi Selusalemi. Neʼe higoa tana faʼe ko Api,* ko te ʼofafine ʼo Sakalia.+ 3 Neʼe haga fai pe e Esekiasi te meʼa ʼae ʼe lelei kia mata ʼo Sehova,+ ohage pe ko tana kui ko Tavite.+ 4 Neʼe ko ia ʼae neʼe ina pulihi te ʼu faʼahi maʼoluga,+ mo maumauʼi te ʼu pou maka taputapu pea mo taʼaga te pou ʼakau taputapu.*+ Neʼe ina toe laliki foki mo te gata kapa ʼae neʼe faʼu e Moisese.+ Koteʼuhi neʼe kei tutu pe e te hahaʼi ʼo Iselaele ke kohu ni sakilifisio ia muʼa ʼo te gata kapa ʼaia ʼo kaku mai ki te temi ʼaia, pea neʼe natou fakahigoaʼi ko te fakatata gata kapa.* 5 Pea neʼe falala kia Sehova,+ te ʼAtua ʼo Iselaele. Neʼe mole he tahi neʼe hage ko ia ʼi te ʼu hau fuli ʼo Suta ʼae neʼe hoa mai kia ia pe neʼe muʼamuʼa atu ia ia. 6 Neʼe nofo agatonu kia Sehova.+ Neʼe mole lituʼa kia te ia. Neʼe hoko atu pe tana taupau te ʼu fakatotonu ʼae neʼe foaki age e Sehova kia Moisese. 7 Pea neʼe nofo ia Sehova mo ia. Neʼe aga fakapotopoto ʼi te ʼu meʼa fuli ʼae neʼe ina fai. Neʼe agatuʼu ki te hau ʼo Asilia pea neʼe mole fia tauhi kia ia.+ 8 Neʼe toe malo foki ʼi te kau Filisitini+ ʼo kaku ki Kasa mo ʼona tafaʼaki, mai te tule leʼo ki te kolo tau.*

9 ʼI te fa taʼu ʼo te pule ʼa te Hau ko Esekiasi, ʼae neʼe ko te fitu taʼu ʼaia ʼo te pule ʼa Oseo,+ te foha ʼo Ela, te hau ʼo Iselaele, neʼe haʼu ia Salemanasale, te Hau ʼo Asilia ʼo tauʼi pea mo ʼa takai ia Samalia.+ 10 Neʼe maʼu leva e te kau Asilia te kolo+ hili taʼu ʼe tolu. Neʼe hoko te faʼahi ʼaia ʼi te ono taʼu ʼo te pule ʼa Esekiasi, ʼae neʼe ko te hiva taʼu ʼo te pule ʼa Oseo, te Hau ʼo Iselaele. 11 Pea neʼe ʼave popula leva e te hau ʼo Asilia te hahaʼi ʼo Iselaele+ ki Asilia, ʼo natou nonofo ai ʼi Salaki, mo Sapole, ʼo ovi ki te vai tafe ʼo Kosani pea mo te ʼu kolo ʼo te kau Metia.+ 12 Neʼe hoko te faʼahi ʼaia he neʼe mole natou fakalogo ki te leʼo ʼo Sehova, tonatou ʼAtua kae neʼe natou haga maumauʼi pe tana fuakava, ia te ʼu meʼa fuli ʼae neʼe fakatotonu age e Moisese, te tagata faifekau ʼa Sehova.+ Neʼe mole he temi neʼe natou fakalogo mo talagafua ai.

13 ʼI te 14 taʼu ʼo te pule ʼa te Hau ko Esekiasi, neʼe haʼu ia Senakelipe, te hau ʼo Asilia+ ʼo tauʼi te ʼu kolo tau fuli ʼo Suta pea neʼe ina maʼu.+ 14 Koia, neʼe fekauʼi ai e Esekiasi, te Hau ʼo Suta he ʼu tagata ʼave logo ke olo ki Lakisi ʼo ui age ki te hau ʼo Asilia: “Neʼe au faihala. Koia, kapau ʼe ke mavae ʼi toku fenua, ʼe au foaki atu anai te ʼu meʼa fuli ʼae ka ke kole mai.” Neʼe fakamaʼua ai e te hau ʼo Asilia ke foaki age e Esekiasi, te Hau ʼo Suta he ʼu taleta* siliva ʼe 300 pea mo he ʼu taleta aulo ʼe 30. 15 Neʼe foaki ai e Esekiasi te siliva fuli ʼae neʼe feala ke ina maʼu ʼi te fale ʼo Sehova pea mo te ʼu tanakiʼaga koloa ʼo te fale hau.+ 16 ʼI te temi ʼaia, neʼe toʼo* e Esekiasi te ʼu matapa ʼo te fale lotu+ ʼo Sehova pea mo te ʼu kaumatapa ʼae neʼe ina ʼaofi e ia totonu ʼaki te aulo,+ pea neʼe ina foaki ki te hau ʼo Asilia.

17 Neʼe fekauʼi leva e te hau ʼo Asilia ia te Taletane,* mo te Lapesalise,* mo te Lapesake* ʼae neʼe natou ʼi Lakisi+ pea mo he foʼi kautau kaugamalie ke natou olo ki Selusalemi, ki te Hau ko Esekiasi.+ Neʼe natou olo ai ki Selusalemi ʼo tutuʼu ovi ki te tafega vai ʼae ʼe haʼu mai te maʼanuʼaga ʼi ʼoluga, ʼi te ala ʼae ʼe alu ki te gaueʼaga ʼa te tagata faifo.+ 18 ʼI tanatou pauʼi ʼae ke haʼu ki tuʼa te hau, neʼe ko Eliakimi,+ te foha ʼo Ilekisa, mo Sepena, pea mo Soake, te foha ʼo Asafe, ʼae neʼe olo age kia natou. Neʼe tokaga ki te fale hau ia Eliakimi, ko Sepena+ neʼe ko te sikalaipe pea ko Soake neʼe ko te sikalaipe ʼa te hau.

19 Pea neʼe ui e te Lapesake kia natou: “Fakalelei siʼokotou loto, kae kotou ui age kia Esekiasi: ‘Koʼeni te meʼa ʼae ʼe ui e te hau lahi, te hau ʼo Asilia: “Kotea koa ʼae ʼe tupu ai tau falala?+ 20 ʼE ke ui ʼe ʼi ai tau fakatuʼutuʼu pea ʼe ke maʼu te malohi ki te tau, kae ʼe mole he ʼuhiga ʼo tau palalau ʼaia. Ko ai koa ʼae ʼe ke falala ki ai, ke ke agatuʼu mai ai kia au?+ 21 ʼE ke falala ki te tokoni ʼa te kaho fasi ʼaena ko Esipito,+ ʼae ka tekeni he tahi ki ai, pea ʼe pu anai tona nima. ʼE fena ia Falaone, te hau ʼo Esipito kia natou ʼae ʼe falala kia ia. 22 Pea kapau ʼe ke ui mai: ‘ ʼE matou falala kia Sehova, tomatou ʼAtua,’+ ʼe mole koa la ko ʼona faʼahi maʼoluga pea mo ʼona ʼaletale ʼae neʼe pulihi e Esekiasi,+ kae neʼe ina ui ki Suta pea mo Selusalemi: ‘ ʼE kotou tulolo anai ʼi te muʼa ʼaletale ʼaeni ʼi Selusalemi’?” ’+ 23 Koia, fakalelei siʼou loto, kae ʼi te lakaga nei, ke ke vakaʼi pe ʼe ke lavaʼi anai te fakatuʼutuʼu ʼaeni ʼo siʼoku ʼaliki, te hau ʼo Asilia: ʼE au foaki atu anai ni hosi ʼe 2 000 mo kapau ʼe ke maʼu feʼauga he ʼu tagata heka hosi ke natou heheka ai.+ 24 ʼE lava feafeaʼi hau kapu te kovana ʼae ʼe veliveli ʼosi ʼi te ʼu hahaʼi faifekau ʼo siʼoku ʼaliki kae ʼe ke falala koe ki te ʼu saliote tau mo te ʼu tagata heka hosi ʼae ka foaki atu e Esipito? 25 Neʼe mole fakagafua mai koa la e Sehova ke au haʼu ʼo tauʼi mo maumauʼi te koga meʼa ʼaeni? Neʼe ui mai e Sehova: ‘Alu ʼo tauʼi mo maumauʼi te fenua ʼaia.’ ”

26 Pea neʼe ui e Eliakimi, te foha ʼo Ilekisa, mo Sepena+ pea mo Soake ki te Lapesake:+ “Fakalelei siʼou loto, kae ke ke palalau mai kia matou ʼi te lea Fakaalamea,*+ koteʼuhi ʼe matou mahino ki ai. ʼAua naʼa ke palalau mai ʼi te lea ʼa te kau Sutea, naʼa logo mai te hahaʼi ʼae ʼe tutuʼu ʼi te kaupa.”+ 27 Kae neʼe tali age e te Lapesake kia natou: “Neʼe mole fekauʼi mai pe au ke au haʼu ʼo fai te ʼu palalau ʼaia ki tokotou ʼaliki pea mo koutou. ʼE mole toe fakahagahaga koa la te ʼu palalau ʼaia ki te ʼu tagata ʼae ʼe heheka ʼi te kaupa, ʼae ka natou kai ʼonatou faifekau pea mo inu ʼonatou livai, ohage pe ko koutou?”

28 Neʼe kalaga leva ia te Lapesake ʼi te lea ʼa te kau Sutea: “Kotou fagono ki te folafola ʼa te hau lahi, te hau ʼo Asilia.+ 29 ʼE ui e te hau: ‘ ʼAua naʼa kakaʼi koutou e Esekiasi, he ʼe mole feala ke ina haofaki koutou mai ʼoku nima.+ 30 Pea ʼaua naʼa uga koutou e Esekiasi ke kotou falala kia Sehova, ʼo ina ui atu: “ ʼE haofaki moʼoni anai tatou e Sehova, pea ʼe mole tuku anai te kolo ʼaeni ki te ʼu nima ʼo te hau ʼo Asilia.”+ 31 ʼAua naʼa kotou fakalogo kia ia, he ʼe koʼeni te meʼa ʼae ʼe ui e te hau ʼo Asilia: “Kotou kumi te tokalelei mo au pea tuku takotou fakafeagai mai kia au, pea ʼe kotou tahi kai anai te fua ʼo tana gaueʼaga vite mo tana fuʼu fiku pea mo tahi inu anai te vai ʼo tana foʼi tane vai. 32 ʼE au haʼu anai ʼo ʼave koutou ki he fenua ʼe hage pe ko tokotou fenua,+ he fenua ʼe maʼu ai te fulumeto, mo te olose pea mo te ʼu vite moʼo fai ʼaki takotou pane mo takotou vino, ko he fenua ʼe maʼu ai he ʼu fuʼu oliveto pea mo te meli. ʼE kotou maʼuʼuli anai kae ʼe mole kotou mamate anai. ʼAua naʼa kotou fakalogo kia Esekiasi, he ʼe ina kakaʼi koutou moka ina ui atu: ‘ ʼE haofaki anai tatou e Sehova.’ 33 Neʼe feala koa ki he ʼatua ʼi te ʼu ʼatua ʼo te ʼu puleʼaga ke ina haofaki tona fenua mai te ʼu nima ʼo te hau ʼo Asilia? 34 ʼE ʼifea te ʼu ʼatua ʼo Hamate+ pea mo Alepate? ʼE ʼifea te ʼu ʼatua ʼo Sefalevaimi,+ mo Ena pea mo Iva? Neʼe feala koa ke natou haofaki ia Samalia mai ʼoku nima?+ 35 Neʼe ʼi ai koa he ʼu ʼatua ʼi te ʼu ʼatua fuli ʼo te ʼu fenua, neʼe feala ke natou haofaki tonatou fenua mai ʼoku nima? Pea ʼe lava haofaki anai koa e Sehova ia Selusalemi mai ʼoku nima?” ’ ”+

36 Kae neʼe nonofo fakalogologo pe te hahaʼi pea neʼe mole natou tali age he meʼa, he neʼe fakatotonu e te hau kia natou: “ ʼAua naʼa kotou tali age he meʼa.”+ 37 Ko Eliakimi, te foha ʼo Ilekisa, ʼae ʼe tokaga ki te fale hau, mo Sepena, te sikalaipe pea mo Soake, te foha ʼo Asafe, te sikalaipe ʼa te hau, neʼe natou hae leva ʼonatou teu. Pea neʼe natou olo leva kia Esekiasi ʼo fakaha te ʼu palalau ʼae neʼe fai e te Lapesake.

19 ʼI te temi pe ʼae neʼe logo ai ia te Hau ko Esekiasi ki te faʼahi ʼaia, neʼe ina hae ʼona kofu, mo ina tui he taga* pea neʼe alu leva ki te fale ʼo Sehova.+ 2 Pea neʼe ina fekauʼi ia Eliakimi, ʼae neʼe tokaga ki te fale hau, mo Sepena, te sikalaipe pea mo te kau takitaki ʼo te ʼu pelepitelo, ke natou olo ki te polofeta ko Esaia,+ te foha ʼo Amote. Neʼe natou tui fuli ai he ʼu taga.* 3 Pea neʼe natou ui age ki te polofeta: “Koʼeni te meʼa ʼae ʼe ui e Esekiasi: ‘Ko te ʼaho ʼaeni ʼe ko he ʼaho ʼo te mamahi, mo te valoki* pea mo te ufiufi. Koteʼuhi ʼe matou hage ko he fafine kua vave fanau, kae ʼe mole ina maʼu feʼauga te malohi ke fanau.+ 4 ʼE lagi logo anai ia Sehova tou ʼAtua ki te ʼu palalau fuli ʼa te Lapesake, ʼae neʼe fekauʼi mai e tona ʼaliki, te hau ʼo Asilia ke haʼu ʼo laga tau ki te ʼAtua maʼuli.+ Pea ʼe ina tauteaʼi anai ia ia ʼuhi ko te ʼu palalau ʼaia neʼe logo ki ai ia Sehova tou ʼAtua. Koia ke ke faikole+ maʼa te toe ʼo te hahaʼi ʼaeni neʼe hao.’ ”

5 ʼI te ʼosi fakaha age e te ʼu tagata faifekau ʼa te Hau ko Esekiasi te logo ʼaia kia Esaia,+ 6 neʼe tali leva e Esaia kia natou: “Koʼeni te meʼa ʼae ʼe tonu ke kotou ui ki tokotou ʼaliki: ‘Koʼeni te folafola ʼa Sehova: “ ʼAua naʼa ke mataku+ ʼuhi ko te ʼu palalau ʼaia neʼe ke logo ki ai, ia te ʼu laukovi ʼae neʼe fai mai kia au e te hahaʼi gaue ʼa te hau ʼo Asilia.+ 7 Koia, ʼe au uga anai tona ʼatamai,* pea ka tau age he logo, ʼe toe liliu anai ki tona fenua. Pea ʼe matehi anai ia ia ʼaki te heleta ʼi tona fenua totonu.” ’ ”+

8 ʼI te logo ʼa te Lapesake neʼe kua mavae te hau ʼo Asilia mai Lakisi,+ neʼe toe liliu ki ai pea neʼe ina maʼu atu ʼe ina tauʼi te kolo ko Lipina.+ 9 Pea neʼe logo te hau ʼo Asilia ki te ui ʼo ʼuhiga mo Tilaka, te Hau ʼo Etiopea: “Koʼeni ʼe haʼu ʼo tauʼi koe.” Neʼe ina toe fekauʼi ai he ʼu tagata ʼave logo+ ke olo kia Esekiasi. Neʼe ina ui age kia natou: 10 “Koʼeni te meʼa ʼae ʼe tonu ke kotou ui kia Esekiasi, te Hau ʼo Suta: ‘ ʼAua naʼa kakaʼi koe e tou ʼAtua ʼae ʼe ke falala ki ai, ʼi tana ui atu: “ ʼE mole tuku anai ia Selusalemi ki te ʼu nima ʼo te hau ʼo Asilia.”+ 11 Neʼe ke logo ki te ʼu meʼa ʼae neʼe fai e te ʼu hau ʼo Asilia ki te ʼu fenua fuli, ʼi tanatou haga ʼae ʼo maumauʼi natou.+ Pea ʼe ke manatu koa la ʼe ko koe pe anai ʼae ka hao? 12 Ko te ʼu puleʼaga ʼae neʼe maumauʼi e ʼaku kui neʼe haofaki koa natou e ʼonatou ʼatua? ʼE ʼifea ia Kosani, mo Halani,+ mo Letesefi pea mo te hahaʼi ʼo Eteni, ʼae neʼe nonofo ʼi Tele-asale? 13 ʼE ʼifea te hau ʼo Hamate, mo te hau ʼo Alepate pea mo te hau ʼo te ʼu kolo ko Sefalevaimi, mo Ena pea mo Iva?’ ”+

14 Pea neʼe toʼo e Esekiasi te ʼu tohi mai te ʼu nima ʼo te ʼu tagata ʼave logo ʼo lau. Neʼe alu leva ia Esekiasi ki te fale ʼo Sehova, ʼo ina folahi te ʼu tohi ʼaia ia muʼa ʼo Sehova.+ 15 Pea neʼe kamata faikole ia Esekiasi+ ia muʼa ʼo Sehova: “Sehova e, te ʼAtua ʼo Iselaele, ʼae ʼe ʼafio ʼi te ʼu fuga* kelupimi,+ ko koe tokotahi pe te ʼAtua moʼoni ʼo te ʼu puleʼaga fuli ʼo te kele.+ Neʼe ke fakatupu te lagi mo te kele. 16 Sehova e, ke ke tokaga mai pea mo ke fagono!+ Sehova e, ke ava ʼou mata+ pea mo ke sio! Ke ke fagono ki te ʼu palalau ʼae neʼe fai e Senakelipe ʼaki ʼana tagata ʼave logo, moʼo laga tau kia te koe, ʼae ko te ʼAtua maʼuli. 17 Sehova e, ʼe moʼoni neʼe maumauʼi e te ʼu hau ʼo Asilia te ʼu puleʼaga mo ʼonatou fenua.+ 18 Pea neʼe natou laku ʼonatou ʼatua ki te afi, he neʼe mole ko he ʼu ʼatua+ kae neʼe ko te gaue ia ʼo te ʼu nima ʼo te tagata,+ neʼe fai ʼaki te ʼakau pea mo te maka. Koia ʼae neʼe feala ai hanatou maumauʼi. 19 Kae, Sehova e, siʼomatou ʼAtua, fakalelei siʼou loto, ke ke haofaki matou mai ʼona nima, ke iloʼi ai e te ʼu puleʼaga fuli ʼo te kele ʼe ko koe tokotahi pe, Sehova e, ia te ʼAtua.”+

20 Pea neʼe fakaha leva e Esaia, te foha ʼo Amote te logo ʼaeni kia Esekiasi: “Koʼeni te folafola ʼa Sehova, te ʼAtua ʼo Iselaele: ‘Neʼe au logo ki te kole+ neʼe ke fai mai ʼo ʼuhiga mo Senakelipe, te Hau ʼo Asilia.+ 21 Pea koʼeni te ʼu palalau ʼae ʼe fai e Sehova ʼo ʼuhiga mo ia:

“Ko te taʼahine ʼo Sione, ʼae kei nofo taupoʼou, ʼe fehiʼa ia koe, ʼe ina manukiʼi koe.

ʼE kalokalo te ʼulu ʼo te taʼahine ʼo Selusalemi kia koe.

22 Ko ai koa ʼae neʼe ke laga tau ki ai pea mo laukoviʼi?+

ʼE ko te Maʼoniʼoni ʼo Iselaele!+

ʼE au taʼaga anai ʼona fuʼu sete lalahi, mo ʼona fuʼu senelie matalelei.

ʼE au ulu anai ki ʼona koga meʼa ʼae ʼe tuʼu mamaʼo, pea mo ʼona vao matuʼa matalelei.

25 Neʼe heʼeki ke logo koa la ki ai? Neʼe kua ʼosi fakatuʼutuʼu* te faʼahi ʼaia talu mai fualoa.+

Talu mai te temi muʼa, neʼe kua au ʼosi teuteuʼi.+

ʼI te temi leva ʼaeni, ʼe au fakahoko anai.+

ʼE ke fakaliliu anai te ʼu kolo tau ko he ʼu kolo maumau ʼe mole kei nofoʼi.+

29 “ ‘Pea Esekiasi, koʼeni leva te fakailoga ʼe au foaki atu anai kia koe: ʼI te taʼu ʼaeni, ʼe kotou kai anai te meʼa ʼae neʼe homo noa ake.* Pea ʼi te taʼu ka haʼu, ʼe kotou kai anai te fulumeto ʼae neʼe homo noa ake.+ Kae ʼi te taʼu leva ʼae ka hoa mai ki ai, ʼe kotou nunusi anai te pulapula pea mo utu anai, pea ʼe kotou to anai he ʼu gaueʼaga vite pea mo kotou kai anai ʼonatou fua.+ 30 Ko natou ʼae ka hao ʼi te hahaʼi ʼo Suta, ia natou ʼae kei toe,+ ʼe natou tauaka anai ohage ko he ʼu fuʼu ʼakau pea mo fua. 31 Koteʼuhi ʼe ʼomai anai mai Selusalemi te toe ʼo te hahaʼi, pea ʼe ʼomai anai mai te Moʼuga ʼo Sione ia natou ʼae ka hao. ʼE fakahoko anai te faʼahi ʼaia e Sehova ʼo te ʼatu kautau ʼaki he faʼafai.+

32 “ ‘Koia, koʼeni te folafola ʼa Sehova ʼo ʼuhiga mo te hau ʼo Asilia:+

35 ʼI te po pe ʼaia, neʼe alu ai te ʼaselo ʼa Sehova ʼo matehi te ʼu tagata ʼe toko 185 000 ʼi te nofoʼaga ʼo te kau Asilia.+ ʼI te ʼaʼala ake ʼa te hahaʼi ʼi te kei uhuuhu, neʼe natou sisio ai ki te ʼu sino mate fuli.+ 36 Pea neʼe toe liliu leva ia Senakelipe, te Hau ʼo Asilia ki Ninive+ ʼo nofo ai.+ 37 Pea ʼi tana lolotoga tulolo ʼi te fale* ʼo tona ʼatua ko Niseloke, neʼe matehi ia ia ʼaki te heleta e ʼona foha totonu ko Atelameleke pea mo Saletesele.+ Neʼe nā feholaki leva ki te fenua ko Alalate.+ Pea neʼe hau tona foha ko Esale-atone+ ʼo fetogi ia ia.

20 ʼI te temi ʼaia, neʼe mahaki leva ia Esekiasi ʼo meihiʼi mate ai.+ Pea neʼe alu te polofeta ko Esaia, te foha ʼo Amote kia ia, ʼo ina ui age: “Koʼeni te folafola ʼa Sehova: ‘Fai he ʼu fakatotonu ki tou loto fale, he ʼe ke mate anai. ʼE mole toe lelei anai tou mahaki.’ ”+ 2 ʼI tana logo ki te ʼu palalau ʼaia, neʼe haga ia Esekiasi ki te kaupa ʼo faikole kia Sehova: 3 “Sehova e, fakalelei siʼou loto, ʼe au kole atu ke ke manatuʼi neʼe au haʼele agatonu ʼi ʼou muʼa mo he loto katoa, pea neʼe au fai te ʼu meʼa ʼae ʼe lelei ki ʼou mata.”+ Pea neʼe tagi mamahi ai ia Esekiasi.

4 Neʼe heʼeki kaku ia Esaia ki te malaʼe ʼae ʼi loto ʼo te fale hau kae neʼe ui age e Sehova kia ia:+ 5 “Toe liliu pea ke ui kia Esekiasi, te pule ʼo taku hahaʼi: ‘Koʼeni te folafola ʼa Sehova, te ʼAtua ʼo Tavite tau kui: “Neʼe au logo ki tau faikole. Neʼe au sio ki ʼou loʼimata.+ Koia, ʼe au fakamalolo anai ia koe.+ Pea hili ʼaho ʼe tolu, ʼe ke alu anai ki te fale ʼo Sehova.+ 6 ʼE au fakatologa anai tou maʼuli* ia taʼu ʼe 15. ʼE au haofaki anai ia koe mo te kolo ʼaeni mai te ʼu nima ʼo te hau ʼo Asilia.+ Pea ʼe au puipui anai te kolo ʼaeni ʼuhi ko toku huafa pea ʼuhi ko taku tagata faifekau ko Tavite.” ’ ”+

7 Neʼe ui leva e Esaia: “ ʼAumai he foʼi keke fiku.” Neʼe ʼaumai ai he foʼi keke ʼo hili ki te foʼi polo. Pea neʼe kamata lelei mamalie ai tona mahaki.+

8 ʼI muʼa atu, neʼe fehuʼi e Esekiasi kia Esaia: “Kotea la te fakailoga+ ʼae ʼe ha ai ʼe fakamalolo anai au e Sehova, pea hili ʼaho ʼe tolu, ʼe au alu anai ki te fale ʼo Sehova?” 9 Neʼe tali age e Esaia: “Koʼeni te fakailoga mai ia Sehova moʼo fakaha atu ʼe fakahoko anai e Sehova te folafola ʼae neʼe ina fakaha: ʼE ke loto koa ke alu ki muʼa te malu ʼae ʼi te mata tuʼuga* ia mata tuʼuga ʼe hogofulu, peʼe ke holomuli ia mata tuʼuga ʼe hogofulu?”+ 10 Neʼe tali age e Esekiasi: “ ʼE faigafua age te alu ki muʼa ʼo te malu ia mata tuʼuga ʼe hogofulu ʼi hana holomuli ia mata tuʼuga ʼe hogofulu.” 11 Neʼe pauʼi ai te polofeta ko Esaia kia Sehova, pea neʼe Ina fakaholomuli te malu ʼae ʼi te mata tuʼuga ʼo Akase ia mata tuʼuga ʼe hogofulu.+

12 ʼI te temi ʼaia, neʼe momoli e te hau ʼo Papiloni, ko Pelotake-palatane, te foha ʼo Palatane, he ʼu tohi pea mo he meʼa ʼofa kia Esekiasi, he neʼe logo neʼe mahaki.+ 13 Neʼe fakatalitali lelei e Esekiasi ia* te ʼu tagata ʼave logo ʼa te hau ʼo Papiloni pea neʼe ina fakaha age te fale ʼae neʼe tanaki ai ʼona koloa:+ te siliva, mo te aulo, mo te lolo neʼe fai ʼaki te ʼu ʼakau fakamagoni, mo te tahi age lolo maʼuhiga, mo ʼana mahafu tau fuli pea mo te ʼu meʼa fuli ʼae neʼe tuku ʼi ʼona fale tanakiʼaga koloa. Neʼe fakaha age e Esekiasi te ʼu meʼa fuli ʼae neʼe ʼi tona fale hau pea mo tona puleʼaga.

14 Hili ʼaia, neʼe alu leva te polofeta ko Esaia ki te Hau ko Esekiasi, ʼo fehuʼi age ki ai: “Kotea ʼae neʼe ui atu e te ʼu tagata ʼaia? Pea neʼe ʼomai maifea?” Neʼe tali age e Esekiasi: “Neʼe ʼomai mai he fenua mamaʼo, mai Papiloni.”+ 15 Pea neʼe ina fehuʼi age ki ai: “Kotea ʼae neʼe natou sisio ki ai ʼi tou fale hau?” Neʼe tali age e Esekiasi: “Neʼe natou sisio ki te ʼu meʼa fuli ʼae ʼi toku fale hau. Neʼe au fakaha age kia natou ia meʼa fuli ʼae ʼi ʼoku fale tanakiʼaga koloa.”

16 Neʼe ui leva e Esaia kia Esekiasi: “Fagono ki te folafola ʼaeni ʼa Sehova:+ 17 ‘Koʼeni, ʼe hoko mai anai te temi ʼae ka ʼave ai ki Papiloni te ʼu meʼa fuli ʼae ʼi tou fale hau pea mo te ʼu meʼa fuli ʼae neʼe tanaki e ʼau kui ʼo kaku mai ki te ʼaho nei.+ ʼE mole tuku anai he meʼa,’ ko te ui ʼaia ʼa Sehova. 18 ‘Pea ko ʼihi ʼo tou hologa ʼe ʼave popula anai+ mo gaue ʼi te fale hau ʼo te hau ʼo Papiloni.’ ”+

19 Neʼe ui e Esekiasi kia Esaia: “ ʼE lelei te folafola ʼa Sehova ʼae neʼe ke fakaha mai.”+ Pea neʼe ina hoko atu: “ ʼE lelei pe ia, mo kapau ʼe maʼu te tokalelei mo te fimalie* lolotoga toku temi maʼuli.”*+

20 Pea ko te toe ʼo te hisitolia ʼo Esekiasi, ʼana malo fuli ʼi te tau pea mo tana faʼu te maʼanuʼaga+ mo te tafega vai ke alu te vai ki te loto kolo,+ ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 21 Neʼe mate leva ia Esekiasi,*+ pea neʼe hau tona foha ko Manase+ ʼo fetogi ia ia.+

21 Neʼe hau ia Manase+ ʼi tona taʼu 12, pea neʼe pule lolotoga taʼu ʼe 55 ʼi Selusalemi.+ Neʼe higoa tana faʼe ko Efesipa. 2 Neʼe fai e Manase te meʼa ʼae ʼe kovi kia mata ʼo Sehova, ʼo mulimuli ki te ʼu aga fakalialia ʼa te ʼu puleʼaga+ ʼae neʼe kapu e Sehova ia muʼa ʼo te hahaʼi ʼo Iselaele.+ 3 Neʼe ina toe laga te ʼu faʼahi maʼoluga ʼae neʼe maumauʼi e tana tamai ko Esekiasi,+ mo fakatuʼu he ʼu ʼaletale kia Paale pea mo fai he pou ʼakau taputapu,*+ ohage pe ko Akapo, te hau ʼo Iselaele.+ Neʼe tulolo ia muʼa ʼo te foʼi kautau katoa ʼo te ʼatu lagi* pea mo atolasio kia natou.+ 4 Neʼe ina toe faʼu foki mo he ʼu ʼaletale ki te ʼu ʼatua hala ʼi te fale ʼo Sehova.+ Kae ʼi muʼa atu, neʼe ui e Sehova ʼo ʼuhiga mo te fale ʼaia: “Neʼe au filifili ke fakamaʼuhigaʼi toku huafa ʼi Selusalemi.”+ 5 Pea neʼe ina faʼu he ʼu ʼaletale maʼa te foʼi kautau katoa ʼo te ʼatu lagi+ ʼi te ʼu malaʼe ʼe lua ʼo te fale ʼo Sehova.+ 6 Pea neʼe ina tutu tona foha totonu ohage ko he sakilifisio. Neʼe gaohi meʼa fakamanamana, mo kumi he ʼu fakailoga,+ pea mo fakanofo ni hahaʼi ʼe felogoi mo te kau mate pea mo ni hahaʼi faifakakikite fakatemonio.+ Neʼe lahi ʼaupito te ʼu meʼa kovi ʼae neʼe ina fai kia mata ʼo Sehova, moʼo fakatupu ʼaki ai tona hauhau.

7 Neʼe ina tuku ki te fale lotu te fakatata ʼae neʼe togi ʼo te pou ʼakau taputapu*+ ʼae neʼe ina fai. Kae ʼi muʼa atu, neʼe ui e Sehova kia Tavite mo tona foha ko Salomone ʼo ʼuhiga mo te fale ʼaia: “Neʼe au filifili ke fakamaʼuhigaʼi toku huafa ʼo talu ai ʼi te fale ʼaeni pea mo Selusalemi, ʼae neʼe au filifili mai te ʼu telepi fuli ʼo Iselaele.+ 8 Pea ʼe mole au toe tuku anai ke hehe ia Iselaele mai te fenua ʼae neʼe au foaki ki ʼanatou kui,+ mo kapau ʼe natou tokakaga fakalelei ʼo mulimuli ki te ʼu meʼa fuli ʼae neʼe au fakatotonu age kia natou,+ ia te Lao katoa ʼae neʼe fakatotonu age e taku tagata faifekau ko Moisese ke natou mulimuli ki ai.” 9 Kae neʼe mole natou fakalogo. Neʼe haga taki pe natou e Manase ke natou fai he ʼu aga ʼe kovi age ʼi te ʼu puleʼaga ʼae neʼe fakaʼauha e Sehova ia muʼa ʼo te kau Iselaele.+

10 Neʼe hoko atu pe te palalau ʼa Sehova ʼaki ʼana tagata faifekau, ia te kau polofeta,+ ʼo ina ui: 11 “Neʼe fai e Manase, te hau ʼo Suta, te ʼu meʼa fakalialia fuli ʼaia. Neʼe agakovi age ia ʼi te kau Amole fuli+ ʼae neʼe muʼamuʼa ia ia,+ pea ʼaki ʼana fakatata fakalialia,* neʼe ina uga ai ia Suta ke agahala. 12 Koia, koʼeni te folafola ʼa Sehova, te ʼAtua ʼo Iselaele: ‘ ʼE au fakahoko anai he toe malaʼia lahi ʼi Selusalemi+ mo Suta pea ka logo he tahi ki ai ʼe kiʼia anai ʼona taliga.+ 13 Pea ʼe au faoʼi anai ki Selusalemi te maea, ia te meʼa fua+ ʼae neʼe fakaʼaogaʼi ki Samalia,+ pea ʼe au fakaʼaogaʼi anai te nivo ʼae neʼe fakaʼaogaʼi ki te famili ʼo Akapo.+ Pea ʼe au fakamaʼa anai ia Selusalemi, ohage pe ko te fufulu ʼo he ipu, ʼe fufulu pea mo fakapulouʼi.+ 14 ʼE au liʼaki anai te toe ʼo toku tofiʼa+ ʼo au tuku natou ki te ʼu nima ʼo ʼonatou fili. ʼE ʼave popula anai natou mo kaihaʼa ʼonatou koloa e ʼonatou fili fuli,+ 15 koteʼuhi neʼe natou fai te meʼa ʼae ʼe kovi ki ʼoku mata pea mo haga fakatupu toku hauhau talu mai te ʼaho ʼae neʼe mavae ai ʼanatou kui mai Esipito ʼo kaku mai ki te ʼaho nei.’ ”+

16 Neʼe toe lahi foki te ligi toto ʼae neʼe fai e Manase. Neʼe ina matehi ia natou ʼae neʼe mole natou fai he meʼa ʼe kovi, mai te tahi potu ʼo Selusalemi ki te tahi potu.+ ʼE hilifaki atu ki ai mo te agahala ʼae neʼe ina fai, ʼi tana uga ia Suta ke agahala, pea ke ina fai te meʼa ʼae ʼe kovi kia mata ʼo Sehova. 17 Pea ko te toe ʼo te hisitolia ʼo Manase, te ʼu meʼa fuli ʼae neʼe ina fai pea mo ʼana agahala, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 18 Neʼe mate leva ia Manase* pea neʼe ʼavaifo ʼi te ʼoloto ʼo tona fale, ʼi te ʼoloto ʼo Usa.+ Pea neʼe hau tona foha ko Amone ʼo fetogi ia ia.

19 Neʼe hau ia Amone+ ʼi tona taʼu 22, pea neʼe pule lolotoga taʼu ʼe lua ʼi Selusalemi.+ Neʼe higoa tana faʼe ko Mesulemete, ko te ʼofafine ʼo Alute mai te kolo ko Sotepa. 20 Neʼe haga fai pe e Amone te meʼa ʼae ʼe kovi kia mata ʼo Sehova, ohage pe ko tana tamai ko Manase.+ 21 Neʼe ina haga faʼifaʼitakiʼi pe te ʼu aga fuli ʼa tana tamai, pea neʼe tauhi mo tulolo ki te ʼu fakatata fakalialia ʼae neʼe tauhi ki ai tana tamai.+ 22 Koia, neʼe ina liʼaki ai ia Sehova, te ʼAtua ʼo ʼana kui pea neʼe mole haʼele ʼi te ala ʼo Sehova.+ 23 Ki muli age, neʼe fonofono te ʼu hahaʼi faifekau ʼa Amone ke natou fakafeagai kia ia, pea neʼe natou matehi leva te hau ʼi tona fale. 24 Kae neʼe matehi e te hahaʼi ʼo te fenua ia natou fuli ʼae neʼe fonofono ke natou fakafeagai ki te Hau ko Amone, pea neʼe fakanofo leva e te hahaʼi tona foha ko Sosiasi ke hau moʼo fetogi ia ia.+ 25 Pea ko te toe ʼo te hisitolia ʼo Amone, te ʼu meʼa ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 26 Neʼe tuku leva tona sino ki tona fale maka ʼae ʼi te ʼoloto ʼo Usa,+ pea neʼe hau tona foha ko Sosiasi+ ʼo fetogi ia ia.

22 Neʼe hau ia Sosiasi+ ʼi tona taʼu valu, pea neʼe pule lolotoga taʼu ʼe 31 ʼi Selusalemi.+ Neʼe higoa tana faʼe ko Setita, ko te ʼofafine ʼo Atasa mai Potisekati.+ 2 Neʼe fai e Sosiasi te meʼa ʼae ʼe lelei kia mata ʼo Sehova pea neʼe ina faʼifaʼitakiʼi te ʼu aga fuli ʼa tana kui ko Tavite,+ pea neʼe mulimuli fakalelei ki te ʼu fakatotonu ʼa te ʼAtua.

3 ʼI te 18 taʼu ʼo te pule ʼa te Hau ko Sosiasi, neʼe fekauʼi e te hau ia te sikalaipe ko Safani, te foha ʼo Atesalia te foha ʼo Mesulame ke alu ki te fale ʼo Sehova.+ Pea neʼe ina ui age ki ai: 4 “Alu ki te pelepitelo lahi ko Ilekisa,+ pea ke ui age kia ia ke ina tanaki te falā fuli ʼae neʼe ʼaumai ki te fale ʼo Sehova,+ ʼae neʼe tanaki e te ʼu tagata leʼo matapa mai te hahaʼi.+ 5 Pea ke fakatoʼo age te falā kia natou ʼae ʼe natou takitaki te gaue ʼae ʼe fai ʼi te fale ʼo Sehova. ʼE hoki foaki leva e natou ki te kau gaue ʼo te fale ʼo Sehova, ʼae ʼe tonu ke natou toe gaohi te ʼu faʼahi ʼae kua maumau* ʼo te fale,+ 6 ia te kau tufuga, mo te kau laga fale pea mo te kau tufuga maka. ʼE natou toe fakaʼaogaʼi anai te falā ʼaia moʼo totogi he ʼu ʼakau pea mo he ʼu maka neʼe kua taʼataʼaga ki te toe gaohi ʼo te fale.+ 7 Kae ʼe mole kumi anai pe neʼe fakaʼaogaʼi feafeaʼi e te ʼu tagata ʼaia te falā ʼae neʼe foaki age, koteʼuhi ʼe natou tuha mo te falala.”+

8 Ki muli age, neʼe ui e te pelepitelo lahi ko Ilekisa kia Safani, te sikalaipe:+ “Neʼe au maʼu te tohi ʼo te Lao+ ʼi te fale ʼo Sehova.” Neʼe fakatoʼo age ai e Ilekisa te tohi kia Safani, ʼo ina kamata lau.+ 9 Neʼe alu leva ia Safani, te sikalaipe ki te hau ʼo ui age ki ai: “Kua toʼo e ʼau tagata faifekau te falā ʼae neʼe tuku ʼi te fale, pea neʼe natou foaki kia natou ʼae ʼe natou takitaki te gaue ʼi te fale ʼo Sehova.”+ 10 Pea neʼe toe ui age e Safani, te sikalaipe ki te hau: “Neʼe foaki mai e te pelepitelo ko Ilekisa ia te tohi ʼaeni.”+ Pea neʼe lau leva e Safani te tohi ia muʼa ʼo te hau.

11 ʼI te logo ʼa te hau ki te lau ʼo te ʼu folafola ʼo te tohi ʼo te Lao, neʼe ina hae atu aipe ʼona kofu.+ 12 Pea neʼe fakatotonu e te hau ki te pelepitelo ko Ilekisa, mo Asikame,+ te foha ʼo Safani, mo Akepole, te foha ʼo Mikaia, mo Safani, te sikalaipe pea mo Asaia, te tagata tokoni gaue ʼa te hau: 13 “Kotou olo ʼo fakafehuʼi ia Sehova maʼaku, pea maʼa te hahaʼi pea mo Suta katoa ʼo ʼuhiga mo te ʼu folafola ʼo te tohi ʼaeni neʼe maʼu. Koteʼuhi kua lahi ʼosi te ita ʼo Sehova kia tatou,+ he neʼe mole fakalogo ʼatatou kui ki te ʼu folafola ʼo te tohi ʼaeni. Neʼe mole natou mulimuli ki te ʼu meʼa fuli ʼae neʼe tohi ai ʼo ʼuhiga mo tatou.”

14 Koia, neʼe olo ai te pelepitelo ko Ilekisa, mo Asikame, mo Akepole, mo Safani pea mo Asaia ki te fafine polofeta ko Ulita.+ Neʼe ʼohoana mo Salume, ʼae neʼe tokaga ki te ʼu mutuʼi meʼa.* Neʼe ko te foha ʼaia ʼo Tikeva, te foha ʼo Halase. Pea neʼe nofo te fafine ʼaia ʼi te Kolo Foʼou ʼo Selusalemi. Neʼe natou palalau mo ia ʼi ai.+ 15 Neʼe ui leva e te fafine polofeta kia natou: “Koʼeni te folafola ʼa Sehova, te ʼAtua ʼo Iselaele: ‘Kotou tala ki te tagata ʼae neʼe ina fekauʼi mai koutou: 16 “Koʼeni te folafola ʼa Sehova: ‘ ʼE au fakahoko anai he malaʼia ki te koga meʼa ʼaeni pea mo te hahaʼi ʼae ʼe nonofo ai, ʼei, te ʼu folafola fuli ʼo te tohi ʼae neʼe lau e te hau ʼo Suta.+ 17 ʼE lahi anai toku ita ʼae ka to ki te koga meʼa ʼaeni pea ʼe mole malū ifo anai,+ he neʼe natou liʼaki au pea neʼe natou tutu ke kohu ni sakilifisio ki he tahi age ʼu ʼatua,+ ʼo fakatupu ai toku hauhau ʼuhi ko te ʼu gaue fuli ʼo ʼonatou nima.’ ”+ 18 Kae koʼeni te meʼa ʼae ʼe tonu ke kotou ui ki te hau ʼo Suta ʼae neʼe ina fekauʼi koutou ke kotou olo ʼo fakafehuʼi ia Sehova: “Koʼeni te folafola ʼa Sehova, te ʼAtua ʼo Iselaele ʼo ʼuhiga mo te ʼu folafola ʼae neʼe ke logo ki ai: 19 ‘ ʼI tau logo ki te meʼa ʼae neʼe au tala ʼo ʼuhiga mo te koga meʼa ʼaeni pea mo te hahaʼi ʼae ʼe nonofo ai, neʼe malave ki* tou loto pea neʼe ke fakamalalo ifo+ ia muʼa ʼo Sehova. Koteʼuhi neʼe au tala ʼe hoko anai kia natou he malaʼia pea ʼe matataku anai te hahaʼi ʼi te aluʼaga ʼaia ka hoko kia natou. Neʼe ke hae ʼou kofu+ pea neʼe ke tagi ʼi ʼoku muʼa. Pea neʼe au toe logo foki mo au ki tau faikole, ʼe ko te ui ʼaia ʼa Sehova. 20 Koia, ʼe au tuku fakatahi anai koe mo ʼau kui,* pea ʼe ʼavaifo anai koe ʼi te tokalelei, pea ʼe mole sio anai ʼou mata ki te ʼu malaʼia fuli ʼae ka au fakahoko ki te koga meʼa ʼaeni.’ ” ’ ” Neʼe natou olo ai leva ʼo fakaha age ki te hau te logo ʼaia.

23 Neʼe pauʼi leva e te hau te kau takitaki fuli ʼo Suta pea mo Selusalemi ke natou fakatahitahi age ki ai.+ 2 Pea neʼe alu te hau ki te fale ʼo Sehova mo te ʼu tagata fuli ʼo Suta, mo te hahaʼi fuli ʼo Selusalemi, mo te kau pelepitelo pea mo te kau polofeta, ʼei, te hahaʼi fuli, mai ia natou liliki kia natou lalahi. Neʼe ina lau age leva kia natou te ʼu folafola fuli ʼo te tohi+ ʼo te fuakava+ ʼae neʼe maʼu ʼi te fale ʼo Sehova.+ 3 Neʼe tuʼu ovi te hau ki te pou pea neʼe ina fai he fuakava* ia muʼa ʼo Sehova.+ Neʼe ina fakapapau ai ke fakalogo kia Sehova pea mo taupau ʼana fakatotonu, mo ʼana fakamanatu pea mo ʼana lao ʼaki tona loto katoa mo tona malohi* katoa, ʼo ina fakahoko te ʼu folafola ʼo te fuakava ʼaia neʼe tohi ʼi te tohi ʼaia. Pea neʼe tali e te hahaʼi fuli ia te fuakava ʼaia.+

4 Neʼe fakatotonu leva e te hau ki te pelepitelo lahi ko Ilekisa,+ mo te tahi age ʼu pelepitelo, pea mo te ʼu tagata leʼo matapa, ke natou toʼo mai ki tuʼa mai te fale lotu ʼo Sehova te ʼu meʼa fuli ʼae neʼe faʼu maʼa Paale, mo te pou ʼakau taputapu*+ pea mo te foʼi kautau katoa ʼo te ʼatu lagi.* Neʼe ina tutu leva te ʼu meʼa ʼaia ʼi te tuʼa kolo ʼo Selusalemi ʼi te ʼu gaueʼaga ʼo Kitelone te vai tafe ʼae kua mamaha, pea neʼe ina ʼave leva ʼonatou lefulefu ki Petele.+ 5 Neʼe ina fakahifo te ʼu pelepitelo ʼo te ʼu ʼatua matapule, ʼae neʼe fakanofo e te ʼu hau ʼo Suta ke natou tutu ke kohu ni sakilifisio ʼi te ʼu faʼahi maʼoluga ʼi te ʼu kolo ʼo Suta pea mo te ʼu tafaʼaki ʼo Selusalemi. Neʼe ina toe fakahifo mo natou ʼae neʼe natou tutu ke kohu ni sakilifisio maʼa Paale, mo te laʼa, mo te mahina, mo te ʼu fetuʼu pea mo te foʼi kautau katoa ʼo te ʼatu lagi.+ 6 Neʼe ina toʼo te pou ʼakau taputapu*+ mai te fale ʼo Sehova ʼo ina ʼave ki te tuʼa kolo ʼo Selusalemi, ki te Vai Tafe* ʼo Kitelone ʼae kua mamaha. Pea neʼe ina tutu+ mo laliki ʼi ai, ʼo ina laku leva te lefulefu ki te ʼu fale maka ʼo te hahaʼi masisiva.+ 7 Neʼe ina toe maumauʼi foki mo te ʼu fale ʼo te hahaʼi paomutu*+ ʼae neʼe tuʼu ʼi te fale ʼo Sehova. Neʼe tui ʼi ai e te hahaʼi fafine he ʼu fale la neʼe fakaʼaogaʼi ohage ko he ʼu sagatualio maʼa te tauhi ʼo te pou ʼakau taputapu.*

8 Neʼe ina fakamavae te ʼu pelepitelo fuli mai te ʼu kolo ʼo Suta, pea neʼe ina ʼulihi te ʼu faʼahi maʼoluga* ʼae neʼe tutu ai e te kau pelepitelo ni sakilifisio ke kohu, ke mole toe fai ai te tauhi, mai Kepa+ ki Pele-sepa.+ Neʼe ina toe maumauʼi foki mo te ʼu faʼahi maʼoluga, ʼae neʼe ʼi te huʼaga ʼo te matapa ʼo Sosue, te pule ʼo te kolo. Neʼe tuʼu te ʼu faʼahi maʼoluga ʼaia ʼi te faʼahi hema moka hu mai ʼi te matapa ʼo te kolo. 9 Neʼe mole tauhi te kau pelepitelo ʼo te ʼu faʼahi maʼoluga ʼi te ʼaletale ʼa Sehova ʼi Selusalemi,+ kae neʼe natou kai te pane hala fakatupu mo ʼonatou tehina. 10 Neʼe ina toe ʼulihi* foki ia Tofete,*+ ʼae ʼe tuʼu ʼi te potu fenua lauveliveli ʼae ko Te ʼu Foha ʼo Hinome,*+ ke mole feala ai ki he tahi ke ina tutu tona foha peʼe ko tona ʼofafine ohage ko he sakilifisio kia Moleke.+ 11 Pea ko te ʼu hosi ʼae neʼe foaki e te ʼu hau ʼo Suta ki te laʼa, neʼe ina toe tapuʼi foki tanatou feulufi ki te fale ʼo Sehova, ʼi te fale kai ʼo Netane-meleke, te tagata ʼae ʼe gaue ʼi te fale hau. Neʼe tuʼu te koga fale ʼaia ʼi te ʼu fakaheketalaʼa. Pea neʼe ina tutu te ʼu saliote ʼae neʼe foaki ki te laʼa.+ 12 Neʼe toe maumauʼi foki e te hau te ʼu ʼaletale ʼae neʼe laga e te ʼu hau ʼo Suta ʼi te fuga fale+ ʼo te koga fale fata ʼo Akase, ʼo toe feia mo te ʼu ʼaletale ʼae neʼe fakatuʼu e Manase ʼi te ʼu malaʼe ʼae ʼe lua ʼo te fale ʼo Sehova.+ Neʼe ina laliki te ʼu meʼa ʼaia pea neʼe ina laku ʼonatou lefulefu ki te Vai Tafe* ʼo Kitelone ʼae kua mamaha. 13 Pea neʼe ʼulihi* e te hau te ʼu faʼahi maʼoluga ʼae neʼe haga ki Selusalemi, ʼi te faʼahi ʼo te Moʼuga ʼo Te Maumau* ʼae ʼe haga ki te potu saute,* ke mole toe fai ai te tauhi. Neʼe laga te ʼu faʼahi maʼoluga ʼaia e Salomone, te hau ʼo Iselaele maʼa te ʼatua fafine fakalialia ʼo te kau Sitoni ko Asetolete, mo te ʼatua fakalialia ʼo te kau Moape ko Kemosi pea mo te ʼatua fakalialia ʼo te kau Amone+ ko Milikome.+ 14 Neʼe ina laliki te ʼu pou maka taputapu mo taʼaga te ʼu pou ʼakau taputapu.*+ Pea neʼe ina fakafonu leva te ʼu tuʼuʼaga ʼo te ʼu pou ʼaia ʼaki ni huiʼi tagata. 15 Neʼe ina toe maumauʼi foki mo te ʼaletale ʼae neʼe ʼi Petele, mo te faʼahi maʼoluga ʼae neʼe laga e Selopoamo, te foha ʼo Nepate, ʼo agahala ai ia Iselaele.+ ʼI tana ʼosi maumauʼi te ʼaletale mo te faʼahi maʼoluga ʼaia, neʼe ina tutu leva te faʼahi maʼoluga, mo laliki pea neʼe ina tutu te pou ʼakau taputapu.*+

16 ʼI te maliu mai ʼa Sosiasi ʼo sio ki te ʼu fale maka ʼae ʼi te moʼuga, neʼe ina fakatotonu ai ke toʼo te ʼu hui mai te ʼu fale maka ʼaia pea ke tutu ʼi te ʼaletale. Neʼe ina ʼulihi leva te ʼaletale, ke mole toe fai ai te tauhi, ohage pe ko te folafola ʼa Sehova ʼae neʼe tala e te tagata ʼa te ʼAtua moʼoni, ʼae neʼe ina fakakikite te ʼu meʼa ʼaia neʼe hoko.+ 17 Neʼe ui leva e te hau: “ ʼE au sio ki he maka fakamanatu ʼi he age. Ko ai ʼae ʼe tanu ai?” Neʼe tali age e te ʼu tagata ʼo te kolo: “ ʼE ko te fale maka ʼo te tagata ʼa te ʼAtua moʼoni ʼae neʼe haʼu mai Suta+ pea neʼe ina fakakikite te ʼu meʼa ʼaeni neʼe ke fai ki te ʼaletale ʼo Petele.” 18 Neʼe ina ui ai: “ ʼAua naʼa kotou fāfā ki ʼona hui, kotou tuku ai.” Neʼe mole natou fāfā ai ki ʼona hui, ʼo feia mo te ʼu hui ʼo te polofeta ʼae neʼe haʼu mai Samalia.+

19 Neʼe toe pulihi foki e Sosiasi te ʼu fale fuli ki te tauhi ʼi te ʼu faʼahi maʼoluga ʼae neʼe tuʼu ʼi te ʼu kolo ʼo Samalia,+ pea neʼe laga e te ʼu hau ʼo Iselaele moʼo fakatupu te hauhau ʼo te ʼAtua. Neʼe tatau te meʼa ʼae neʼe ina fai ki te ʼu fale ʼaia mo te meʼa ʼae neʼe ina fai ʼi Petele.+ 20 Neʼe ina matehi ʼi te ʼu ʼaletale te ʼu pelepitelo fuli ʼo te ʼu faʼahi maʼoluga ʼae neʼe natou gaue ʼi ai, pea neʼe ina tutu ni huiʼi tagata ʼi ai.+ Hili ʼaia, neʼe toe liliu leva ki Selusalemi.

21 Neʼe fakatotonu leva e te hau ki te hahaʼi fuli: “Kotou fai he Pasikate+ maʼa Sehova, tokotou ʼAtua ohage ko tona tuʼu ʼi te tohi ʼaeni ʼo te fuakava.”+ 22 Neʼe heʼeki fai he Pasikate feia talu mai te temi ʼae neʼe fakamauʼi ai ia Iselaele e te ʼu tuʼi fakamau peʼe ʼi te temi ʼo te ʼu hau ʼo Iselaele pea mo te ʼu hau ʼo Suta.+ 23 Kae neʼe fai te Pasikate ʼaia maʼa Sehova ʼi Selusalemi, ʼi te 18 taʼu ʼo te pule ʼa te Hau ko Sosiasi.

24 Neʼe toe pulihi foki e Sosiasi te hahaʼi ʼae ko tanatou gaue ko te felogoi mo te kau mate, mo te hahaʼi ʼae neʼe faifakakikite fakatemonio,+ mo te ʼu taula ʼatua ʼo te ʼu loto fale,*+ mo te ʼu fakatata fakalialia,* pea mo te ʼu meʼa fakalialia fuli ʼae neʼe maʼu ʼi te fenua ʼo Suta pea mo Selusalemi. Neʼe ina fai te ʼu faʼahi ʼaia ke hoko ai te ʼu folafola ʼa te Lao+ ʼae neʼe tuʼu ʼi te tohi ʼae neʼe maʼu e te pelepitelo ko Ilekisa ʼi te fale ʼo Sehova.+ 25 Neʼe mole he hau ʼi muʼa atu neʼe hage ko ia. Neʼe toe liliu kia Sehova ʼaki tona loto katoa, mo tona maʼuli* katoa,+ pea mo tona malohi katoa, ʼo mulimuli ki te Lao katoa ʼa Moisese. Pea ki muli age, neʼe mole he tahi neʼe hage ko ia.

26 Kae neʼe mole malū ifo te ita ʼo Sehova ki Suta. Neʼe lahi ʼosi tona ita ʼuhi ko te ʼu meʼa fuli ʼae neʼe fai e Manase moʼo fakatupu Tona hauhau.+ 27 Neʼe ui e Sehova: “ ʼE au toe toʼo kehe anai mo Suta ke mamaʼo mai ia au,+ ohage pe ko taku toʼo kehe ia Iselaele,+ pea ʼe au liʼaki anai te kolo ʼaeni ko Selusalemi, ʼae neʼe au filifili, ʼo feia mo toku fale. Neʼe au ui ʼi muʼa atu ʼo ʼuhiga mo te fale ʼaia: ‘ ʼE tuʼu tuʼumaʼu pe anai ʼi ai toku huafa.’ ”+

28 Pea ko te toe ʼo te hisitolia ʼo Sosiasi, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta? 29 ʼI te temi pule ʼa Sosiasi, neʼe haʼu te hau ʼo Esipito, ia te Falaone ko Neko, ki te vai tafe ʼo Efalate ʼo tokoni ki te hau ʼo Asilia. Pea neʼe haʼu ia te Hau ko Sosiasi ʼo tauʼi ia ia, kae ʼi te temi pe ʼae neʼe sio ai ia Neko kia Sosiasi ʼe tuʼu ovi ki Mekito, neʼe ina matehi ia ia.+ 30 Neʼe ʼave leva e ʼana hahaʼi faifekau tona sino ʼi he saliote, mai Mekito ki Selusalemi ʼo tuku ki tona fale maka. Pea neʼe toʼo leva e te hahaʼi ʼo te fenua te foha ʼo Sosiasi ko Seoase, ʼo natou fakanofo* hau ia ia moʼo fetogi tana tamai.+

31 Neʼe hau ia Seoase+ ʼi tona taʼu 23, pea neʼe pule lolotoga mahina ʼe tolu ʼi Selusalemi. Neʼe higoa tana faʼe ko Amutale,+ ko te ʼofafine ʼo Selemia mai Lipina. 32 Neʼe kamata fai e Seoase te meʼa ʼae ʼe kovi kia mata ʼo Sehova, ohage pe ko te ʼu meʼa fuli ʼae neʼe fai e ʼana kui.+ 33 Neʼe pilisoniʼi ia ia e te Falaone ko Neko+ ʼi Lipila,+ ʼi te fenua ʼo Hamate ke ʼaua naʼa pule ʼi Selusalemi pea neʼe ina fakamaʼua ki te fenua ke natou totogi he ʼu taleta* siliva ʼe 100 pea mo he taleta aulo ʼe tahi.+ 34 Pea tahi ʼae meʼa, neʼe fakanofo hau e te Falaone ko Neko ia Eliakimi te foha ʼo Sosiasi moʼo fetogi tana tamai, pea neʼe ina fetogi te higoa ʼo Eliakimi ʼaki te higoa ko Soakimi. Kae neʼe ina ʼave ia Seoase ki Esipito,+ pea neʼe mate leva ia Seoase ʼi ai.+ 35 Neʼe foaki e Soakimi te siliva mo te aulo kia Falaone, kae neʼe ina fakamaʼua he tukuhau ki te hahaʼi ʼo te fenua ke feala foki hana foaki te siliva ʼae neʼe fakamaʼua age e Falaone. Neʼe ina fakatuʼutuʼu te lahi ʼo te siliva mo te aulo ʼae neʼe ina fakamaʼua ke foaki e te tagata takitokotahi ʼo te fenua, ke ʼave ki te Falaone ko Neko.

36 Neʼe hau ia Soakimi+ ʼi tona taʼu 25, pea neʼe pule lolotoga taʼu ʼe 11 ʼi Selusalemi.+ Neʼe higoa tana faʼe ko Seputa, ko te ʼofafine ʼo Petasa mai Luma. 37 Neʼe ina haga fai pe te meʼa ʼae ʼe kovi kia mata ʼo Sehova,+ ohage pe ko te ʼu meʼa fuli ʼae neʼe fai e ʼana kui.+

24 ʼI te temi pule ʼo Soakimi, neʼe haʼu ia Nepukanesa,+ te Hau ʼo Papiloni ʼo tauʼi ia ia, pea neʼe liliu leva ia Soakimi ko tana tagata faifekau lolotoga taʼu ʼe tolu. Kae neʼe agatuʼu leva ki te Hau ʼo Papiloni. 2 Pea neʼe fekauʼi e Sehova he ʼu kutuga solia Kaletea,+ mo Silia, mo Moape pea mo Amone ke natou olo ʼo tauʼi ia ia. Neʼe ina fekauʼi tuʼumaʼu pe ia natou ke olo ʼo tauʼi pea mo maumauʼi ia Suta, ohage pe ko te folafola ʼae neʼe fakaha e Sehova+ ʼaki ʼana tagata faifekau, ia te kau polofeta. 3 ʼE mahino ia, neʼe hoko te faʼahi ʼaia ki Suta he neʼe ko te fakatotonu ʼa Sehova, ke ina fakamamaʼo ai natou mai ia te ia+ ʼuhi ko te ʼu agahala fuli ʼae neʼe fai e Manase,+ 4 ʼo feia mo te ligi toto ʼae neʼe ina fai, ʼi tana matehi ia natou ʼae neʼe mole natou fai he meʼa ʼe kovi.+ Neʼe ina fakafonu ai ia Selusalemi ʼaki te toto ʼo natou ʼae neʼe mole natou fai he meʼa ʼe kovi. Neʼe mole fia fakamolemole e Sehova.+

5 Pea ko te toe ʼo te hisitolia ʼo Soakimi, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta?+ 6 Neʼe mate leva ia Soakimi,*+ pea neʼe hau tona foha ko Seoakini ʼo fetogi ia ia.

7 Neʼe mole toe tuku leva e te hau ʼo Esipito tana kau solia ke mavae mai tona fenua, he neʼe toʼo e te hau ʼo Papiloni te ʼu kele fuli ʼa te hau ʼo Esipito,+ mai te Vai Tafe* ʼo Esipito+ ʼo kaku ki te Vai Tafe ʼo Efalate.+

8 Neʼe hau ia Seoakini+ ʼi tona taʼu 18 pea neʼe pule lolotoga mahina ʼe tolu ʼi Selusalemi.+ Neʼe higoa tana faʼe ko Neuseta, ko te ʼofafine ʼo Elenatane mai Selusalemi. 9 Neʼe haga fai pe e Seoakini te meʼa ʼae ʼe kovi kia mata ʼo Sehova, ohage pe ko te ʼu meʼa fuli ʼae neʼe fai e tana tamai. 10 ʼI te temi ʼaia, neʼe ʼomai te kau solia ʼa Nepukanesa, te Hau ʼo Papiloni ki Selusalemi, ʼo natou ʼa takai te kolo.+ 11 Pea neʼe haʼu leva ia Nepukanesa, te Hau ʼo Papiloni kae lolotoga ʼa takai e tana kau solia ia te kolo.

12 Neʼe olo leva ki te hau ʼo Papiloni ia Seoakini, te Hau ʼo Suta,+ mo tana faʼe, mo ʼana hahaʼi faifekau, mo tana kau ʼaliki pea mo te ʼu tagata ʼae neʼe gaue ʼi tona fale hau.+ ʼI te valu taʼu ʼo te pule ʼa te hau ʼo Papiloni, neʼe ina puke ia te hau ʼo Suta ʼo ʼave popula.+ 13 Neʼe ina toʼo mai leva ki tuʼa te ʼu koloa fuli ʼo te fale ʼo Sehova pea mo te ʼu koloa ʼo te fale hau.+ Neʼe ina maumauʼi te ʼu meʼa kehekehe fuli ʼae neʼe fai e Salomone, te hau ʼo Iselaele ʼaki te aulo ʼi te fale lotu ʼo Sehova.+ Neʼe hoko ia meʼa fuli ohage pe ko tona fakakikite e Sehova. 14 Neʼe ina ʼave popula ia Selusalemi katoa, mo te kau ʼaliki fuli,+ mo te kau tagata tau malolohi fuli, pea mo te kau tufuga fuli mo te ʼu tagata tufuga ukamea* fuli.+ Neʼe ina ʼave popula ia te toko 10 000 hahaʼi. Neʼe mole ina tuku he tahi, gata pe ki te hahaʼi masisiva ʼo te fenua.+ 15 Neʼe ina ʼave popula ai ia Seoakini+ ki Papiloni,+ ʼo feia mo te faʼe ʼa te hau, mo te ʼu ʼohoana ʼo te hau, mo te ʼu tagata ʼae neʼe gaue ʼi tona fale hau pea mo te ʼu tagata maʼuhiga ʼo te fenua. Neʼe ina ʼave popula ia natou mai Selusalemi ki Papiloni. 16 Neʼe ʼave popula ki Papiloni e te hau ʼo Papiloni ia te ʼu tagata tau malolohi fuli ʼe toko 7 000, ʼo feia mo te kau tufuga pea mo te ʼu tagata tufuga ukamea* ʼe toko 1 000. Ko natou fuli ʼaia neʼe ko ni tagata malolohi pea neʼe akoʼi ki te tau. 17 Neʼe fakanofo hau leva e te hau ʼo Papiloni ia Matania, te tehina ʼo te tamai ʼa Seoakini,+ ʼo fetogi ia ia pea neʼe ina fetogi te higoa ʼo Matania ʼaki te higoa ko Setesiasi.+

18 Neʼe hau ia Setesiasi ʼi tona taʼu 21, pea neʼe pule lolotoga taʼu ʼe 11 ʼi Selusalemi. Neʼe higoa tana faʼe ko Amutale,+ ko te ʼofafine ʼo Selemia mai Lipina. 19 Neʼe haga fai pe e Setesiasi te meʼa ʼae ʼe kovi kia mata ʼo Sehova, ohage pe ko te ʼu meʼa fuli ʼae neʼe fai e Soakimi.+ 20 Neʼe hoko te ʼu faʼahi ʼaia ʼi Selusalemi pea mo Suta ʼuhi ko te ita ʼo Sehova, ʼo kaku ki tana fakamamaʼo natou mai ia te ia.+ Pea neʼe agatuʼu leva ia Setesiasi ki te hau ʼo Papiloni.+

25 ʼI te hiva taʼu ʼo te pule ʼa Setesiasi, ʼi te ʼaho hogofulu ʼo te hogofulu mahina, neʼe haʼu ia Nepukanesa,+ te Hau ʼo Papiloni mo tana foʼi kautau katoa ʼo tauʼi ia Selusalemi.+ Neʼe ina fakatuʼu leva tona nofoʼaga solia ʼo ovi ki Selusalemi pea neʼe ina laga he kaupa moʼo ʼa takai te kolo.+ 2 Pea neʼe ʼa takai te kolo ʼo kaku ki te 11 taʼu ʼo te pule ʼa te Hau ko Setesiasi. 3 ʼI te ʼaho hiva ʼo te fa mahina, ʼi te kua kovi ʼosi ʼo te hoge+ ʼi te kolo, pea mo te mole kei ʼi ai ʼo he meʼa kai maʼa te hahaʼi ʼo te fenua,+ 4 neʼe fai leva he ava ʼi te kaupa ʼo te kolo.+ ʼI te lolotoga ʼa takai e te kau Kaletea ia te kolo, neʼe feholaki ai te kau solia fuli ʼi te poʼuli. Neʼe natou feulufi ʼi te matapa ʼae ʼe tuʼu ʼi te vaha ʼo te ʼu kaupa ʼe lua, ʼae neʼe ovi ki te ʼoloto ʼo te hau. Pea neʼe alu te hau ko Setesiasi ʼi te ala ʼo te Alapa.+ 5 Kae neʼe tuli e te foʼi kautau Kaletea ia te hau, pea neʼe natou maʼu ia ia ʼi te toafa ʼo Seliko. Neʼe mavetevete ai tana kau solia fuli. 6 Neʼe natou puke leva te hau+ ʼo ʼave ki te hau ʼo Papiloni ʼi Lipila, pea neʼe fakamauʼi ai ia ia. 7 Neʼe matehi te ʼu foha ʼo Setesiasi ʼi ʼona muʼa. Neʼe fakatotonu e Nepukanesa ke kapeʼi te ʼu mata ʼo Setesiasi pea ke haʼi ʼona nima mo ʼona vaʼe ʼaki he ʼu seini kapa, pea ke ʼave leva ki Papiloni.+

8 ʼI te ʼaho fitu ʼo te nima mahina, ʼi te 19 taʼu ʼo te pule ʼa te Hau ko Nepukanesa, te hau ʼo Papiloni, neʼe haʼu ki Selusalemi+ ia Nepusalatane,+ te pule ʼo te kau leʼo pea neʼe ko te tagata faifekau ʼa te hau ʼo Papiloni. 9 Neʼe ina tutu te fale ʼo Sehova,+ mo te fale hau+ pea mo te ʼu fale fuli ʼo Selusalemi.+ Neʼe ina toe tutu foki mo te ʼu fale ʼo te kau tagata maʼuhiga fuli.+ 10 Pea neʼe holoʼi te ʼu kaupa ʼo Selusalemi e te foʼi kautau katoa ʼa te kau Kaletea ʼae neʼe takitaki e te pule ʼo te kau leʼo.+ 11 Pea neʼe ʼave popula e Nepusalatane, te pule ʼo te kau leʼo, ia te hahaʼi ʼae neʼe kei maʼuʼuli ʼi te kolo, mo te hahaʼi ʼae neʼe feholaki ki te hau ʼo Papiloni, pea mo te toe ʼo te hahaʼi.+ 12 Kae neʼe tuku e te pule ʼo te kau leʼo ʼihi hahaʼi ʼo te fenua ʼae neʼe masisiva ʼaupito, ke natou gaue ʼi te ʼu gaueʼaga vite pea mo te tahi ʼu gaueʼaga.+ 13 Pea neʼe laliki leva e te kau Kaletea te ʼu meʼa ʼaeni neʼe tuku ʼi te fale ʼo Sehova: te ʼu pou kapa+ ʼo te fale ʼo Sehova, mo te ʼu saliote,+ pea mo te foʼi tane vai neʼe higoa ko te Tai+ ʼae neʼe fai ʼaki te kapa. Neʼe natou ʼave leva te kapa ki Papiloni.+ 14 Neʼe natou toe ʼave foki mo te ʼu tanakiʼaga lefulefu, mo te ʼu huo takele, mo te ʼu faʼahiga pipi,* mo te ʼu ipu pea mo te ʼu faʼahiga meʼa kehekehe neʼe fai ʼaki te kapa, ʼae neʼe fakaʼaogaʼi ki te tauhi ʼae neʼe fai ʼi te fale lotu. 15 Neʼe toe ʼave e te pule ʼo te kau leʼo te ʼu ʼaiʼaga afi pea mo te ʼu pa loloto ʼae neʼe fai ʼaki te siliva+ pea mo te aulo maʼa.+ 16 Neʼe mole feala ia ke fua te kapa ʼo te ʼu meʼa fuli ʼaeni: te ʼu pou ʼe lua, mo te foʼi tane vai, neʼe higoa ko te Tai pea mo te ʼu saliote ʼae neʼe faʼu e Salomone maʼa te fale ʼo Sehova.+ 17 Ko te maʼoluga ʼo te ʼu pou takitahi neʼe fasiga nima* 18,+ pea neʼe fai te ʼu ʼuluʼi pou ʼaki te kapa. Pea ko te maʼoluga ʼo te ʼu ʼuluʼi pou neʼe fasiga nima tolu, pea ko te meʼa vagavaga mo te ʼu kelenate ʼae neʼe ʼa takai ʼaki te ʼu ʼuluʼi pou, neʼe fai ʼaki te kapa.+ Neʼe tatau te fakamataleleiʼi ʼo te ʼu pou ʼaia ʼe lua.

18 Neʼe toe ʼave foki e te pule ʼo te kau leʼo ia te pelepitelo pule ko Selasa,+ mo Sofoni,+ te pelepitelo ʼae neʼe tokoni kia ia, pea mo te ʼu tagata leʼo matapa ʼe toko tolu.+ 19 Pea neʼe ina toʼo ʼi te kolo he tagata neʼe gaue ʼi te fale hau mo pule ki te kau solia, mo te ʼu tagata ʼe toko nima neʼe kaugā gaue mo te hau. Neʼe ina toe toʼo mo te sikalaipe ʼo te pule ʼo te foʼi kautau ʼae neʼe ina pauʼi te kau solia, ʼo toe feia pe mo te ʼu tagata ʼo te fenua ʼe toko 60 ʼae neʼe kei nonofo ʼi te kolo. 20 Neʼe pilisoniʼi natou e Nepusalatane,+ te pule ʼo te kau leʼo ʼo ina ʼave ki te hau ʼo Papiloni, ʼi Lipila.+ 21 Pea neʼe matehi leva natou e te hau ʼo Papiloni ʼi Lipila ʼi te potu fenua ʼo Hamate.+ Neʼe ʼave popula ai te hahaʼi ʼo Suta mai tonatou fenua.+

22 Pea neʼe fakanofo e Nepukanesa, te Hau ʼo Papiloni ia Ketalia,+ te foha ʼo Asikame+ te foha ʼo Safani+ ke pule ki te hahaʼi ʼae neʼe ina tuku ʼi te fenua ʼo Suta.+ 23 ʼI te logo ʼa te kau pule solia fuli pea mo ʼanatou tagata neʼe fakanofo e te hau ʼo Papiloni ia Ketalia, neʼe natou olo atu aipe kia Ketalia, ʼi Misipa. Neʼe ko Isemaele, te foha ʼo Netania, mo Seonane, te foha ʼo Kalease, mo Selasa, te foha ʼo Tanumete, te tagata Netofa, pea mo Saasania, te foha ʼo te tagata Maakate, pea neʼe olo fakatahi mo tanatou kau tagata.+ 24 Neʼe fakapapau age e Ketalia kia natou pea mo tanatou kau tagata: “ ʼAua naʼa kotou matataku ʼi te faifekau ki te kau Kaletea. Kotou nonofo ʼi te fenua, mo tauhi te hau ʼo Papiloni pea ʼe fua lelei pe anai kia koutou.”+

25 Pea ʼi te fitu mahina, neʼe ʼomai ia Isemaele,+ te foha ʼo Netania te foha ʼo Elisama, ʼae neʼe hifo mai te hologa hau pea mo te tahi age ʼu tagata ʼe toko hogofulu. Pea neʼe natou matehi ia Ketalia, mo te kau Sutea pea mo te kau Kaletea ʼae neʼe nonofo mo ia ʼi Misipa.+ 26 Hili ʼaia, neʼe olo fuli ai te hahaʼi, mai ia natou liliki kia natou lalahi ki Esipito,+ ʼo kau ai mo te kau pule solia, he neʼe natou matataku ʼi te kau Kaletea.+

27 ʼI te taʼu ʼae neʼe hau ai ia Evile-melotake, te hau ʼo Papiloni, neʼe ina fakaʼateainaʼi ia Seoakini,+ te Hau ʼo Suta mai te fale pilisoni. Neʼe hoko te faʼahi ʼaia ʼi te 37 taʼu ʼae neʼe maʼuli popula ai ia Seoakini, te Hau ʼo Suta, ʼi te ʼaho 27 ʼo te 12 mahina.+ 28 Neʼe palalau lelei leva te hau ʼo Papiloni kia ia pea neʼe ina hiki tona tuʼulaga ke maʼoluga age ʼi te tahi ʼu hau ʼae neʼe nonofo mo ia ʼi Papiloni. 29 Pea neʼe huʼi e Seoakini te ʼu mutuʼi meʼa ʼae neʼe ina tui ʼi te fale pilisoni pea neʼe kai tuʼumaʼu pe ʼi te laupapa ʼo te hau ʼo kaku ki tana mate. 30 Neʼe foaki tuʼumaʼu pe kia ia he vaega meʼa kai mai te hau, ʼi te ʼaho fuli pe, ʼo kaku ki tana mate.