LUA KOLONIKO
1 Neʼe ʼasili malohi age te pule fakahau ʼa Salomone, te foha ʼo Tavite. Neʼe nofo ia Sehova tona ʼAtua mo ia pea neʼe liliu ai ʼo maʼuhiga ʼaupito.+
2 Neʼe pauʼi leva e Salomone ia Iselaele katoa: ia te ʼu pule ʼo he toko afe, mo te ʼu pule ʼo he toko teau, mo te kau tuʼi fakamau, mo te ʼu pule fuli ʼo Iselaele pea mo te ʼu pule famili. 3 Neʼe olo ai leva ia Salomone pea mo te hahaʼi katoa ki te faʼahi maʼoluga ʼae ʼi Kipeone,+ he neʼe tuʼu ʼi ai te fale la ʼo te fono ʼo te ʼAtua moʼoni, ʼae neʼe faʼu e Moisese, te tagata faifekau ʼa Sehova, ʼi te toafa. 4 Kae neʼe toʼo e Tavite te Aleka ʼo te ʼAtua moʼoni ʼae neʼe ʼi Kiliate-sealimi+ ʼo ʼave ki te koga meʼa ʼae neʼe ina teuteuʼi ke tuku ki ai. Neʼe ina fakatuʼu he fale la ʼi Selusalemi ke tuku ki ai te Aleka.+ 5 Pea ko te ʼaletale kapa+ ʼae neʼe faʼu e Petesalele,+ te foha ʼo Uli, te foha ʼo Ulu, neʼe fakatuʼu ʼi te muʼa tapenakulo ʼo Sehova. Pea neʼe faikole ia Salomone mo te hahaʼi ʼi te muʼa tapenakulo.* 6 Neʼe fai leva e Salomone he ʼu sakilifisio ia muʼa ʼo Sehova, pea neʼe ina momoli he ʼu holokoseta* ʼe 1 000 ʼi te ʼaletale kapa+ ʼo te fale la ʼo te fono.
7 ʼI te po ʼaia, neʼe ha ia te ʼAtua kia Salomone pea neʼe ina ui age: “Kole mai te meʼa ʼae ʼe ke loto ke au foaki atu.”+ 8 Pea neʼe ui e Salomone ki te ʼAtua: “Neʼe lahi tau fakaha tou ʼofa agatonu kia Tavite,+ taku tamai, pea neʼe ke fakanofo hau ia au moʼo fetogi ia ia.+ 9 ʼI te temi leva ʼaeni, Sehova e, tomatou ʼAtua, ke hoko te fakapapau+ ʼae neʼe ke fai kia Tavite, taku tamai, koteʼuhi neʼe ke fakanofo ia au ke au pule ki he toe hahaʼi kaugamalie ʼe hage ko te efu ʼo te kele.+ 10 Koia, foaki mai te poto pea mo te ʼatamai+ ke au takitaki te hahaʼi ʼaia. He ʼe ko ai ʼae ʼe feala ke ina fakamauʼi tau hahaʼi, ia te toe hahaʼi kaugamalie ʼaeni?”+
11 Pea neʼe ui leva e te ʼAtua kia Salomone: “Neʼe mole ke kole mai ni koloa, mo ni meʼa lelei, pea mo te fakaʼapaʼapa peʼe ko te mate* ʼo natou ʼae ʼe fehihiʼa kia koe, pea neʼe mole ke kole mai ke ke maʼuli fualoa.* Kae neʼe ke kole mai te poto pea mo te ʼatamai ke ke fakamauʼi taku hahaʼi ʼae neʼe au fakanofo koe ke ke hau kia natou.+ 12 Koia, ʼe au foaki atu anai kia koe te poto pea mo te ʼatamai. Kae ʼe au toe foaki atu anai mo ni koloa, mo ni meʼa lelei pea mo te fakaʼapaʼapa, ʼae neʼe heʼeki maʼu e he hau ʼi muʼa atu pea ʼe mole toe maʼu anai e he hau ʼe hoa mai kia koe.”+
13 Koia, neʼe mavae ai ia Salomone mai te faʼahi maʼoluga ʼae ʼi Kipeone,+ ʼae neʼe tuʼu ai te fale la ʼo te fono, ʼo alu ki Selusalemi. Pea neʼe pule ki Iselaele. 14 Neʼe tanaki aipe e Salomone he ʼu saliote tau pea mo he ʼu hosi.* Neʼe ko ʼana saliote tau ʼe 1 400 pea mo ʼana hosi ʼe* 12 000.+ Neʼe ina tuku ʼihi saliote tau mo hosi ki te ʼu kolo ʼae neʼe kua ina fakatuʼutuʼu ke tau ai+ pea mo ʼihi ʼi Selusalemi, ʼo ovi ki tona nofoʼaga.+ 15 Neʼe lahi ʼaupito te siliva pea mo te aulo ʼae neʼe maʼu ʼi Selusalemi ohage ko te maka,+ pea neʼe lahi ʼaupito te ʼakau ʼae ko te sete ohage ko te ʼu fuʼu sikomole ʼi te Sefela, ʼuhi ko Salomone.+ 16 Neʼe ʼaumai te ʼu hosi ʼa Salomone mai Esipito,+ pea neʼe totogi e te kau tagata faifakatau koloa ʼa te hau te faga hosi ʼaia* ʼo mulimuli ki te totogi neʼe kua ʼosi fakatuʼutuʼu ki ai.+ 17 Ko te totogi ʼo he saliote ʼe tahi neʼe ʼaumai mai Esipito neʼe ko piesi siliva ʼe 600, pea ko te totogi ʼo he hosi neʼe ko piesi siliva ʼe 150. Pea neʼe natou toe fakatau leva ki te ʼu hau fuli ʼo te kau Heti pea mo te ʼu hau ʼo Silia.
2 Neʼe fakatotonu leva e Salomone ke laga he fale ke fakakololiaʼi ai te huafa ʼo Sehova+ pea mo he fale hau.+ 2 Pea neʼe filifili e Salomone he kau gaue* ʼe toko 70 000, mo he ʼu tagata ta maka ʼe toko 80 000 ke gaue ʼi te ʼu moʼuga,+ pea mo he ʼu tagata ʼe toko 3 600 ke tokakaga kia natou.+ 3 Tahi ʼae meʼa, neʼe fakaha e Salomone kia Hilame,+ te hau ʼo Tile: “Ke ke fai mai kia au ohage pe ko tau fai kia Tavite taku tamai, ʼi tau foaki age kia ia te ʼakau ʼae ko te sete moʼo laga hona fale* ke nofo ai.+ 4 ʼE au laga he fale ke fakakololiaʼi ai te huafa ʼo Sehova toku ʼAtua. ʼE au fakamaʼoniʼoniʼi anai te fale ʼaia maʼa ia, mo tutu ai te iseso magoni+ ʼi ʼona muʼa, mo momoli tuʼumaʼu te ʼu pane ʼae ʼe hili fakatuʼuga,*+ ʼo feia mo te ʼu holokoseta, ʼi te uhu mo te afiafi,+ ʼi te ʼu Sapato,+ mo te tuʼu afiafi ʼo te mahina,+ pea lolotoga te ʼu ʼaho lalahi+ ʼo Sehova, tomatou ʼAtua. ʼE ko he fakamaʼua ʼaia ʼe tuku ki Iselaele ʼo talu ai. 5 Ko te fale ʼae ʼe au laga ʼe taulekaleka anai, koteʼuhi ko tomatou ʼAtua ʼe lahi age ʼi te ʼu ʼatua fuli. 6 Pea ko ai ʼae ʼe tuha mo ia ke ina laga he fale maʼa ia? Koteʼuhi ko te lagi ʼo te ʼatu lagi ʼe mole lahi feʼauga ke nofo ai.+ Pea ko ai ia au ke au laga hona fale? Ko te meʼa pe ʼae ʼe feala ke au fai ko te laga ʼo he fale ke tutu ai ni sakilifisio ke kohu ʼi ʼona muʼa. 7 ʼI te lakaga leva ʼaeni, ke ke fekauʼi mai he tagata tufuga ʼe poto ʼi te gaueʼi ʼo te aulo, mo te siliva, mo te kapa,+ mo te ukamea, mo te filo huʼa lotuma fakapoʼuli,* mo te ʼu filo kula fakapoʼuli pea mo ʼuʼui, pea ʼe toe poto foki ʼi te togi ʼo te ʼu meʼa fakateuteu. ʼE gaue anai ʼi Suta pea mo Selusalemi mo ʼaku tagata tufuga faiva, ʼae neʼe filifili e Tavite taku tamai.+ 8 Pea ke ke foaki mai he ʼu ʼakau ʼae ko te sete, mo te senelie+ pea mo te ahi+ ʼae mai Lipane, he ʼe au iloʼi lelei ʼe popoto ʼau hahaʼi faifekau ʼi te tuʼusi te ʼu ʼakau ʼae ʼo Lipane.+ Pea ʼe gaue anai ʼaku hahaʼi faifekau mo ʼau hahaʼi faifekau.+ 9 ʼE lahi anai te ʼakau ʼae ka natou teuteuʼi maʼaku, koteʼuhi ko te fale ʼae ʼe au laga anai ʼe taulekaleka ʼaupito. 10 Pea ʼe au foaki anai he meʼa kai ki ʼau hahaʼi faifekau+ ʼae ʼe natou taʼaga anai te ʼu ʼakau: ko kole* fulumeto ʼe 20 000, mo kole olose ʼe 20 000, mo pate* vino ʼe 20 000, pea mo pate lolo ʼe 20 000.”
11 Pea neʼe tohi e Hilame, te hau ʼo Tile, te ʼu palalau ʼaeni kia Salomone: “ ʼE ʼofa ia Sehova ki tana hahaʼi, koia neʼe ina fakanofo ai koe ke ke liliu ko honatou hau.” 12 Pea neʼe toe hoko atu e Hilame: “Ke vikiʼi ia Sehova te ʼAtua ʼo Iselaele, ʼae neʼe ina fakatupu te lagi mo te kele, koteʼuhi neʼe ina foaki ki te Hau ko Tavite he foha ʼe poto,+ mo fakapotopoto, pea mo ʼatamai,+ ʼae ka ina laga he fale maʼa Sehova pea mo he fale hau. 13 Koia, ʼe au fekauʼi atu ia Ilame-api,+ ko he tagata tufuga faiva pea mo ʼatamai. 14 ʼE ko te tama ʼa he fafine ʼo te telepi ʼo Tane kae ko tana tamai ʼe ko he tagata Tile. Pea ʼe poto lelei ʼi te gaueʼi ʼo te aulo, mo te siliva, mo te kapa, mo te ukamea, mo te maka, mo te ʼakau, mo te filo huʼa lotuma fakapoʼuli, mo te filo ʼuʼui, mo te kie lelei, pea mo te kie kula fakapoʼuli.+ ʼE feala ke ina togi he ʼu meʼa fakateuteu kehekehe pea mo fai he faʼahiga pāki pe ʼe kole age ke ina fai.+ ʼE gaue anai mo ʼau tagata tufuga faiva pea mo te ʼu tagata tufuga faiva ʼo siʼoku ʼaliki ko Tavite, tau tamai. 15 Pea siʼoku ʼaliki, ke ke foaki mai te fulumeto, mo te olose, mo te lolo, pea mo te vino ʼae neʼe ke fakapapau ke ke foaki ki ʼau hahaʼi faifekau.+ 16 Pea ʼe matou taʼaga anai te ʼu ʼakau ʼae mai Lipane,+ ʼo mulimuli pe ki te meʼa ʼae ʼe ke loto ki ai, pea ʼe matou haʼihaʼi anai ke fakatafea atu ʼi te tai ki Sope.+ Pea ʼe ke fetuku anai te ʼu ʼakau ʼaia ki Selusalemi.”+
17 Neʼe lau leva e Salomone te kaugamalie ʼo te ʼu tagata matapule fuli ʼae neʼe nonofo ʼi te fenua ʼo Iselaele,+ ohage ko tona fai e Tavite tana tamai,+ pea neʼe natou toko 153 600. 18 Pea neʼe ina filifili mai ia natou ʼaia he kau gaue* ʼe toko 70 000, mo he ʼu tagata ta maka+ ʼe toko 80 000 ke gaue ʼi te ʼu moʼuga, pea mo he ʼu tagata ʼe toko 3 600 ke tokakaga kia natou.+
3 Neʼe kamata laga leva e Salomone te fale ʼo Sehova+ ʼi Selusalemi ʼi te Moʼuga ʼo Molia,+ ʼae neʼe ha ai ia Sehova ki tana tamai ko Tavite.+ Neʼe ko te koga meʼa ʼae neʼe teuteuʼi e Tavite, ʼi te hahaʼaga fulumeto ʼa Olanane,+ te tagata Sepusi. 2 Neʼe ina kamata laga ʼi te ʼaho lua ʼo te lua mahina, ʼi te fa taʼu ʼo tana pule. 3 Pea ko te fakatafito ʼae neʼe fakatuʼu e Salomone ke laga ai te fale ʼo te ʼAtua moʼoni, neʼe fasiga nima 60 tona loa pea mo fasiga nima 20 tona laulahi,+ ʼo mulimuli ki te faʼahiga fakafuafua ʼo te temi muʼa.* 4 Ko te fakamalumaluʼaga ʼae neʼe tuʼu ʼi muʼa, neʼe fasiga nima 20 tona loa, ʼo tatau mo te laulahi ʼo te fale, pea neʼe fasiga nima 20* tona maʼoluga. Neʼe ina ʼaofi ia loto ʼaki te aulo maʼa.+ 5 Neʼe ina ʼaofi te ʼu kaupa ʼo te koga fale lahi* ʼaki ni lauʼi papa senelie, pea hili ʼaia, neʼe ina ʼaofi leva ʼaki te aulo.+ Neʼe ina fakamataleleiʼi ʼaki te ʼu pāki ʼo he ʼu fuʼu palema+ pea mo ni seini.+ 6 Tahi ʼae meʼa, neʼe ina ʼaofi ia te loto fale ʼaki he ʼu maka maʼuhiga mo matalelei,+ pea neʼe ina fakaʼaogaʼi te aulo+ ʼae mai Palevaime. 7 Neʼe ina ʼaofi ʼaki te aulo ia te loto fale, mo te ʼu lalago, mo te ʼu muʼa matapa, mo te ʼu kaupa pea mo te ʼu matapa.+ Pea neʼe ina togi ni kelupimi ʼi te ʼu kaupa.+
8 Neʼe ina fai leva ia te koga fale* ʼae ko te Potu Taputapu ʼAupito.+ Neʼe tatau tona loa mo te laulahi ʼo te fale, ʼae neʼe fasiga nima 20, pea neʼe fasiga nima 20 tona laulahi. Neʼe ina ʼaofi ia loto ʼaki ni taleta* aulo ʼe 600.+ 9 Ko te mamafa ʼo te aulo ʼo te ʼu faʼo neʼe ko sikele* ʼe 50. Pea neʼe ina ʼaofi ʼaki te aulo ia te ʼu loto koga fale fata.
10 Pea ʼi te koga fale* ʼae ko te Potu Taputapu ʼAupito, neʼe ina fai ai te ʼu fakatata ʼo te ʼu kelupimi ʼe lua, pea neʼe ina ʼaofi ʼaki te aulo.+ 11 Neʼe fasiga nima 20 te loa ʼo te ʼu pakakau ʼo te ʼu kelupimi.+ Ko te pakakau ʼe tahi ʼo te ʼuluaki kelupimi neʼe fasiga nima nima pea neʼe lave ki te kaupa ʼo te fale, pea ko tona tahi pakakau neʼe fasiga nima nima pea neʼe lave ki te pakakau ʼo te tahi kelupimi. 12 Pea ko te pakakau ʼe tahi ʼo te tahi age kelupimi neʼe fasiga nima nima pea neʼe lave ki te tahi kaupa ʼo te fale, pea ko tona tahi pakakau neʼe fasiga nima nima pea neʼe lave ki te pakakau ʼo te ʼuluaki kelupimi. 13 Neʼe folahi te ʼu pakakau ʼo te ʼu kelupimi ʼaia pea neʼe fasiga nima 20. Neʼe nā tutuʼu ʼo haga ki loto.*
14 Neʼe ina toe fai foki te lito+ ʼaki te filo ʼuʼui, mo te filo huʼa lotuma fakapoʼuli,* mo te kie kula fakapoʼuli, pea mo te kie lelei, pea neʼe ina tui fakailoga ʼi ai he ʼu kelupimi.+
15 Neʼe ina fai leva te ʼu pou ʼe lua+ ʼi te muʼa fale, neʼe fasiga nima 35 tonā maʼoluga, pea ko te ʼuluʼi pou ʼo te ʼu pou takitahi ʼaia neʼe fasiga nima nima.+ 16 Pea neʼe ina fai he ʼu seini neʼe hage ko he ʼu kahoa, pea neʼe ina tuku ki te tumutumu ʼo te ʼu pou, pea neʼe ina fai he ʼu kelenate ʼe 100 ʼo ina fakapipiki ki te ʼu seini. 17 Neʼe ina fakatuʼu te ʼu pou ʼi te muʼa fale lotu, ko te tahi ʼi te faʼahi mataʼu* pea ko te tahi ʼi te faʼahi hema.* Neʼe ina fakahigoaʼi te pou ʼi te faʼahi mataʼu ko Sakine,* pea ko te pou ʼi te faʼahi hema ko Poase.*
4 Neʼe ina fai leva te ʼaletale kapa,+ ʼae neʼe fasiga nima 20 tona loa, mo fasiga nima 20 tona laulahi, pea mo fasiga nima 10 tona maʼoluga.
2 Neʼe ina faʼu leva te foʼi tane vai lahi, neʼe higoa ko te Tai.+ Neʼe takafuafua, neʼe fasiga nima 10 mai te tahi faʼahi ki te tahi age faʼahi, pea neʼe fasiga nima 5 tona maʼoluga. Neʼe ʼaoga he maea ʼe fasiga nima 30 moʼo fuafua te takafoli ʼo te foʼi tane vai ʼaia.+ 3 Pea ʼi lalo ifo ʼo te tapaʼi tane vai, neʼe ina fakamataleleiʼi ia tona takafoli ʼaki ni fuaʼi ʼakau takafuafua.+ Neʼe ko fuaʼi ʼakau ʼe hogofulu ʼi he fasiga nima ʼe tahi, pea neʼe ina fai ia ʼatu ʼe lua. Neʼe haka te kapa moʼo faʼu fakatahi ʼaki te foʼi tane mo te ʼu fuaʼi ʼakau ʼaia ʼi he moʼi temi pe ʼe tahi. 4 Neʼe hili te foʼi tane vai ʼi te ʼu vitulo ʼe 12.+ Neʼe haga te ʼu vitulo ʼe 3 ki te potu noleto, neʼe haga te tahi ʼu vitulo ʼe 3 ki te potu uesite, neʼe haga te tahi ʼu vitulo ʼe 3 ki te potu saute pea neʼe haga te tahi ʼu vitulo ʼe 3 ki te potu esite. Neʼe hili te foʼi tane ʼaia ia natou pea neʼe natou felituʼaʼaki. 5 Ko te matolu ʼo te foʼi tane ʼaia neʼe ko te laulahi ʼo te ʼalofi nima ʼe tahi.* Neʼe hage te fai ʼo te tapaʼi tane ʼaia ko he tapaʼi ipu pea mo he lilio. Neʼe feala ke fakafonu ʼaki ia fua pate* vai ʼe 3 000.
6 Tahi ʼae meʼa, neʼe ina fai he ʼu foʼi topu ʼe hogofulu pea neʼe ina tuku he ʼu foʼi topu ʼe nima ʼi te faʼahi mataʼu pea mo he ʼu foʼi topu ʼe nima ʼi te faʼahi hema,+ ke fufulu ai te ʼu meʼa ʼae neʼe fakaʼaogaʼi ki te ʼu holokoseta.+ Kae neʼe fakaʼaogaʼi e te kau pelepitelo te vai ʼo te foʼi tane vai ʼae ʼe higoa ko te Tai, moʼo fanofano pea mo fufulu ʼonatou vaʼe.+
7 Neʼe ina fai leva te ʼu tuʼulaga malama aulo+ ʼe hogofulu, ʼo mulimuli ki te ʼu fakatotonu ʼae neʼe fakaha age.+ Pea neʼe ina fakatuʼu ʼi te fale lotu, ko he ʼu tuʼulaga malama ʼe nima ʼi te faʼahi mataʼu pea mo he ʼu tuʼulaga malama ʼe nima ʼi te faʼahi hema.+
8 Neʼe ina toe fai foki mo te ʼu laupapa ʼe hogofulu pea neʼe ina tuku ki te fale lotu, neʼe ko laupapa ʼe nima ʼi te faʼahi mataʼu pea mo laupapa ʼe nima ʼi te faʼahi hema.+ Pea neʼe ina fai te ʼu ipu aulo ʼe 100.
9 Neʼe ina fai leva te malaʼe+ ʼo te kau pelepitelo+ pea mo te malaʼe lahi,+ ʼo feia mo te ʼu matapa ʼo te malaʼe lahi, pea neʼe ina ʼaofi te ʼu matapa ʼaki te kapa. 10 Pea neʼe ina fakatuʼu te foʼi tane vai ʼae ʼe higoa ko te Tai ʼi te faʼahi mataʼu, ʼo haga ki te potu saute esite.+
11 Neʼe toe fai foki e Hilame te ʼu tanakiʼaga lefulefu, mo te ʼu huo takele pea mo te ʼu ipu lalahi.+
Neʼe fakaʼosi ai e Hilame te ʼu gaue fuli ʼae neʼe ina fai maʼa te Hau ko Salomone ʼi te fale ʼo te ʼAtua moʼoni:+ 12 neʼe ina fai te ʼu pou ʼe lua+ pea mo te ʼu ʼuluʼi pou ʼe lua ʼae neʼe hage ko he ʼu ipu, mo te ʼu meʼa vagavaga ʼe lua+ moʼo fakamataleleiʼi te ʼu ʼuluʼi pou ʼe lua ʼae neʼe hage ko he ʼu ipu. 13 Neʼe ina toe fai mo te ʼu kelenate ʼe 400+ ki te ʼu meʼa vagavaga ʼe lua, ko ʼatu ʼe lua ʼo te ʼu kelenate ki he meʼa vagavaga ʼe tahi, moʼo fakamataleleiʼi te ʼu ʼuluʼi pou ʼe lua ʼae neʼe hage ko he ʼu ipu.+ 14 Neʼe ina toe fai mo te ʼu saliote ʼe hogofulu pea mo te ʼu foʼi topu ʼe hogofulu ʼae neʼe hili ʼi te ʼu saliote.+ 15 Neʼe ina toe fai mo te tane vai ʼae ʼe higoa ko te Tai pea mo te ʼu vitulo ʼe 12 ʼae neʼe hili ki ai te tane vai.+ 16 Neʼe ina toe fai mo te ʼu tanakiʼaga lefulefu, mo te ʼu huo takele, mo te ʼu huki+ pea mo te tahi ʼu meʼa kehekehe fuli, ʼae neʼe fai e Ilame-apive+ ʼaki te kapa gigila maʼa te Hau ko Salomone ʼi te fale ʼo Sehova. 17 Neʼe haka e te hau te kapa ʼo huaʼi ki he ʼu pa kele moʼo faʼu ʼaki te ʼu meʼa ʼaia, ʼi te koga fenua ʼo te Solotane, ʼi te vaha ʼo Sukoti+ mo Teseleta. 18 Neʼe fai e Salomone te ʼu meʼa kehekehe fuli ʼaia ʼo lahi ʼaupito. Pea neʼe mole iloʼi ai te mamafa ʼo te kapa.+
19 Neʼe fai e Salomone te ʼu meʼa fuli ʼaeni+ ʼo te fale ʼo te ʼAtua moʼoni: te ʼaletale aulo,+ mo te ʼu laupapa+ ʼae neʼe hili ki ai te ʼu pane ʼae neʼe molagaʼi,+ 20 mo te ʼu tuʼulaga malama mo ʼonatou malama, ʼae neʼe fai ʼaki te aulo maʼa,+ pea neʼe tutu ia muʼa ʼo te Potu Taputapu ʼAupito,* ʼo mulimuli ki te ʼu fakatotonu, 21 mo te ʼu fisiʼi teu kua mātala, mo te ʼu malama, pea mo te ʼu pipi,* ʼae neʼe fai ʼaki te aulo, ia te aulo maʼa, 22 mo te tahi age ʼu faʼahiga pipi,* mo te ʼu ipu lalahi, mo te tahi age ʼu faʼahiga ipu pea mo te ʼu ʼaiʼaga afi, neʼe fai ʼaki te aulo maʼa, mo te huʼaga ʼo te fale, mo te ʼu matapa ʼo te Potu Taputapu ʼAupito,+ pea mo te ʼu matapa ʼo te fale lotu,* neʼe fai ʼaki te aulo.+
5 Koia, neʼe fakaʼosi ai e Salomone te ʼu gaue fuli ʼae neʼe tonu ke ina fai maʼa te fale ʼo Sehova.+ Neʼe ʼaumai leva e Salomone te ʼu meʼa ʼae neʼe fakamaʼoniʼoniʼi e Tavite, tana tamai,+ pea neʼe ina tuku te siliva, mo te aulo pea mo te ʼu faʼahiga meʼa kehekehe fuli ki te ʼu tanakiʼaga koloa ʼo te fale ʼo te ʼAtua moʼoni.+ 2 ʼI te temi ʼaia, neʼe fakatahiʼi e Salomone te kau takitaki ʼo Iselaele, ia te ʼu pule telepi fuli pea mo te ʼu pule famili ʼo Iselaele. Pea neʼe natou ʼomai ki Selusalemi ke ʼave te aleka ʼo te fuakava ʼa Sehova ʼae neʼe tuku ʼi te Kolo ʼo Tavite,+ ia Sione.+ 3 Neʼe fakatahitahi te ʼu tagata fuli ʼo Iselaele ia muʼa ʼo te hau ʼi te ʼaho lahi* ʼae ʼe fai ʼi te fitu mahina.+
4 Neʼe ʼomai ai te kau takitaki fuli ʼo Iselaele, pea neʼe fata e te kau Levite ia te Aleka.+ 5 Neʼe natou ʼave te Aleka, mo te fale la ʼo te fono+ pea mo te ʼu meʼa taputapu kehekehe fuli ʼae neʼe ʼi te fale la ʼaia. Neʼe ʼave te ʼu meʼa ʼaia e te kau pelepitelo pea mo te kau Levite.* 6 Neʼe pauʼi leva e te Hau ko Salomone ia Iselaele katoa, pea neʼe natou olo fakatahi ai kia muʼa ʼo te Aleka. Neʼe lahi ʼaupito te ʼu ovi mo te ʼu pipi ʼae neʼe sakilifisioʼi,+ ʼo mole feala ai tona lau. 7 Neʼe ʼave leva e te kau pelepitelo ia te aleka ʼo te fuakava ʼa Sehova ki te Potu Taputapu ʼAupito, ia te koga fale taupotu ʼo te fale lotu. Neʼe natou tuku ki tona nofoʼaga, ʼi te ʼu lalo pakakau ʼo te ʼu kelupimi.+ 8 Neʼe folahi te ʼu pakakau ʼo te ʼu kelupimi ʼi ʼoluga ʼo te tuʼuʼaga ʼo te Aleka, koia neʼe ʼaofi ai e te ʼu kelupimi ia te Aleka pea mo ʼona ʼakau ʼamo.+ 9 Neʼe loloa te ʼu ʼakau ʼamo ʼaia ʼo feala ke ha te ʼu muliʼi meʼa ʼo te ʼu ʼakau ʼaia ki te Potu Taputapu ʼae ʼi muʼa ʼo te koga fale taupotu, kae neʼe mole ha ia ki tuʼa. Pea ʼe kei tuʼu ai ʼo kaku mai ki te ʼaho nei. 10 Neʼe mole he meʼa ʼi te loto Aleka, gata pe ki te ʼu lauʼi maka ʼe lua ʼae neʼe tuku e Moisese ki ai ʼi Olepe,+ ʼi te temi ʼae neʼe fai ai e Sehova he fuakava+ mo te hahaʼi ʼo Iselaele ʼi tanatou mavae mai Esipito.+
11 ʼI te temi ʼae neʼe mavae ai te kau pelepitelo mai te fale taputapu (koteʼuhi ko te kau pelepitelo fuli ʼae neʼe ʼi ai neʼe natou fakamaʼa ia natou,+ tatau aipe pe ko te kalasi fea ʼae neʼe natou kau ki ai),+ 12 neʼe kua tui e te kau hiva Levite fuli+ ia he ʼu teu neʼe fai ʼaki te kie lelei. Neʼe fakalogo te kau Levite ʼaia ki te takitaki ʼa Asafe,+ mo Emani+ pea mo Setutune,+ ʼo feia mo ʼonatou foha pea mo ʼonatou tehina. Neʼe natou toʼo he ʼu simepale, mo he ʼu alepa, pea mo he tahi age ʼu meʼa faimaholo. Neʼe natou tutuʼu ʼi te potu esite ʼo te ʼaletale, pea neʼe fakatahi mo natou he kau pelepitelo ʼe toko 120 ʼo natou pupuhi te ʼu fakatagi pupuhi.+ 13 Neʼe fai fakatahi leva e te kau puhi fakatagi mo te kau hiva he fakavikiviki mo he fakafetaʼi kia Sehova. Neʼe logo te tagi ʼo te ʼu fakatagi pupuhi pea mo te ta ʼo te ʼu simepale pea mo te tahi age ʼu meʼa faimaholo. Pea neʼe natou fakavikiviki kia Sehova, “he ʼe agalelei, pea ʼe ina fakaha tona ʼofa agatonu ʼo talu ai.”+ ʼI te temi ʼae neʼe hoko ai te aluʼaga ʼaia, neʼe ʼaofi ai e he ʼao ia te fale ʼo Sehova.+ 14 Neʼe mole feala ke hoko atu e te kau pelepitelo tanatou gaue ʼuhi ko te ʼao, he neʼe fonu te fale ʼo te ʼAtua moʼoni ʼi te kololia ʼo Sehova.+
6 Neʼe ui leva e Salomone: “Sehova e, neʼe ke ui ʼe ke nofo anai ʼi te fakapoʼuli gaogao.+ 2 Neʼe au laga he fale taulekaleka maʼa koe, he koga meʼa ke ke nofo ai ʼo talu ai.”+
3 Koia, neʼe maliu leva te hau ʼo haga ki te hahaʼi katoa ʼo Iselaele, ʼo tapuakiʼi natou, kae natou tutuʼu.+ 4 Neʼe ina ui: “Ke vikiʼi ia Sehova te ʼAtua ʼo Iselaele, ia ia totonu ʼae neʼe ina fai te fakapapau kia Tavite, taku tamai pea neʼe ina fakahoko e ia totonu,* ʼo ina ui: 5 ‘Talu mai te ʼaho ʼae neʼe au fakamavae ai taku hahaʼi mai te fenua ʼo Esipito, neʼe mole au filifili he kolo ʼi te ʼu telepi fuli ʼo Iselaele ke laga ai he fale ke fakamaʼuhigaʼi ai toku huafa,+ pea neʼe mole au filifili he tagata ke ina takitaki ia Iselaele, taku hahaʼi. 6 Kae ʼi te temi leva ʼaeni, kua au filifili ia Selusalemi+ ke fakamaʼuhigaʼi ai toku huafa, pea neʼe au filifili ia Tavite ke pule ki Iselaele, taku hahaʼi.’+ 7 Pea neʼe loto moʼoni ia Tavite, taku tamai ke ina laga he fale ke fakakololiaʼi ai te huafa ʼo Sehova, te ʼAtua ʼo Iselaele.+ 8 Kae neʼe ui e Sehova kia Tavite, taku tamai: ‘Neʼe ke loto moʼoni ke ke laga he fale ke fakakololiaʼi ai toku huafa, pea neʼe ko he meʼa lelei ia. 9 Kae ʼe mole ke laga anai te fale, ʼe ko tou foha totonu ʼae ka tupu anai* ʼae ka ina laga he fale ke fakakololiaʼi ai toku huafa.’+ 10 Pea neʼe fakahoko e Sehova te fakapapau ʼae neʼe ina fai, he neʼe au fetogi ia Tavite, taku tamai ʼo au heka ʼi te hekaʼaga fakahau ʼo Iselaele,+ ohage pe ko tona fakapapauʼi e Sehova.+ Neʼe au toe laga foki he fale ke fakakololiaʼi ai te huafa ʼo Sehova, te ʼAtua ʼo Iselaele, 11 pea neʼe au tuku ki ai te Aleka ʼae neʼe tuku ai ia te ʼu lauʼi maka ʼo te fuakava+ ʼae neʼe fai e Sehova mo te hahaʼi ʼo Iselaele.”
12 Neʼe tuʼu leva ʼi te muʼa ʼaletale ʼo Sehova, ia muʼa ʼo te hahaʼi katoa ʼo Iselaele, pea neʼe ina hiki ake ʼona nima.+ 13 (He neʼe faʼu e Salomone ʼaki te kapa he meʼa maʼoluga ke tuʼu ai, pea neʼe ina fakatuʼu ʼi te lotomalie ʼo te malaʼe.+ Neʼe fasiga nima* nima tona loa, mo fasiga nima nima tona laulahi, pea mo fasiga nima tolu tona maʼoluga. Pea neʼe tuʼu ia Salomone ʼi te meʼa maʼoluga ʼaia.) Neʼe tuʼutuli ifo leva ia muʼa ʼo te hahaʼi katoa ʼo Iselaele pea neʼe ina hiki ake ʼona nima ki te lagi,+ 14 ʼo ina ui: “Sehova e, te ʼAtua ʼo Iselaele, ʼe mole he tahi age ʼAtua ʼe hage ko koe ʼi te lagi peʼe ʼi te kele, ʼi tau taupau te fuakava mo tau fakaha tou ʼofa agatonu ki ʼau hahaʼi faifekau ʼae ʼe haʼele ʼi ʼou muʼa ʼaki ʼonatou loto katoa.+ 15 Neʼe ke fakahoko te fakapapau ʼae neʼe ke fai ki tau tagata faifekau ko Tavite, taku tamai.+ Neʼe ke fai e koe totonu te fakapapau, pea ʼi te ʼaho ʼaeni neʼe ke fakahoko e koe totonu.*+ 16 Pea ʼi te lakaga nei, Sehova e, te ʼAtua ʼo Iselaele, ke ke fakahoko te fakapapau ʼae neʼe ke fai ki tau tagata faifekau ko Tavite, taku tamai, ʼi tau ui age ki ai: ‘Kapau ʼe tokakaga ʼou foha ki ʼanatou aga ʼo natou mulimuli ki ʼaku lao+ ohage pe ko tau haʼele agatonu ʼi ʼoku muʼa,+ ʼe ʼi ai tuʼumaʼu pe anai ʼi ʼoku muʼa he tagata ʼi tou hologa ʼe heka anai ʼi te hekaʼaga fakahau ʼo Iselaele.’ 17 Koia, Sehova e, te ʼAtua ʼo Iselaele, ke hoko moʼoni te fakapapau ʼae neʼe ke fai ki tau tagata faifekau ko Tavite.
18 “Kae ʼe nofo moʼoni anai koa te ʼAtua mo te hahaʼi ʼi te kele?+ Koʼeni, ko te lagi ʼo te ʼatu lagi ʼe mole lahi feʼauga ke ke nofo ai,+ ʼo feafeaʼi age la te fale ʼaeni neʼe au laga!+ 19 ʼI te lakaga nei, Sehova e, siʼoku ʼAtua, ke ke tokagaʼi taku faikole mo taku kole atu tou manavaʼofa, pea ke ke fagono ki taku kole tokoni atu pea mo taku faikole ʼae ʼi ʼou muʼa. 20 ʼOfa pe ke sio ʼou mata ʼi te ʼaho mo te po ki te fale ʼaeni, ke ke fagono ai ki taku faikole moka au haga mai ki te koga meʼa ʼaeni, ʼae neʼe ke ui ʼe tuʼu anai ʼi ai tou huafa.+ 21 Pea ke ke fagono ki taku kole tokoni atu pea mo te ʼu faikole ʼae ʼe fai e Iselaele, tau hahaʼi, moka natou haga mai ki te koga meʼa ʼaeni,+ pea ʼofa pe ke ke logo mai mai tou nofoʼaga ʼae ʼi selo.+ ʼEi, ʼofa pe ke ke logo pea mo ke fakamolemole.+
22 “Kapau ʼe agahala he tagata ki tona tehina pea ʼe tonu ke ina fai he fakapapau,* pea ʼe ʼi ai tona maʼua ʼuhi ko tana fakapapau* ʼaia, pea kapau ʼe haʼu ki tou muʼa ʼaletale ʼi te fale ʼaeni ʼuhi ko te fakapapau ʼaia,+ 23 ʼofa pe ke ke fagono mai mai te lagi pea mo ke fakamauʼi ʼau hahaʼi faifekau, ʼo ke tauteaʼi te tagata agakovi ʼo mulimuli ki te meʼa ʼae neʼe ina fai,+ pea mo tala te faitotonu ʼa te tagata ʼae neʼe mole ina fai he meʼa ʼe kovi* pea mo ke fakapale ia ia ʼo mulimuli ki tana faitotonu.+
24 “Pea kapau neʼe mole malo ia Iselaele, tau hahaʼi ʼi ʼonatou fili he neʼe natou agahala tuʼumaʼu pe kia te koe,+ pea kapau ʼe natou toe liliu atu ʼo fakakololiaʼi tou huafa+ pea mo natou faikole+ mo kole atu ʼi ʼou muʼa tou manavaʼofa ʼi te fale ʼaeni,+ 25 ʼofa pe ke ke fagono mai mai te lagi+ pea mo ke fakamolemole te agahala ʼa Iselaele, tau hahaʼi, pea ke ke toe fakaliliu natou ki te fenua ʼae neʼe ke foaki age kia natou pea mo ʼanatou kui.+
26 “Kapau ʼe mole ava te lagi ʼo mole to te ʼua+ he neʼe natou agahala tuʼumaʼu pe kia te koe,+ pea kapau ʼe natou faikole ʼo haga ki te koga meʼa ʼaeni, mo natou fakakololiaʼi tou huafa pea mo maliu kehe mai tanatou agahala he neʼe ke fakamalaloʼi* natou,+ 27 ʼofa pe ke ke fagono mai mai te lagi pea mo ke fakamolemole te agahala ʼo ʼau hahaʼi faifekau, ia Iselaele, tau hahaʼi, he ʼe ke akoʼi anai kia natou te ala ʼae ʼe lelei pea ʼe tonu ke natou haʼele ai.+ Pea ke ke fakato te ʼua+ ki tou fenua ʼae neʼe ke foaki age ki tau hahaʼi ko he tofiʼa.
28 “Kapau ʼe to ʼi te fenua he hoge,+ peʼe ko he taʼi mahaki,+ peʼe hoko he maumau ʼi te ʼu gaueʼaga ʼuhi ko he ʼu matagi vevela, peʼe ko he mahaki,+ peʼe ko he ʼu tuʼuga heʼe,+ peʼe kapau ʼe ʼohofi e ʼonatou fili he kolo ʼi te ʼu kolo ʼo te fenua,+ peʼe kapau ʼe hoko he tahi age faʼahiga malaʼia peʼe mahaki,+ 29 pea kapau ʼe fai e he tagata peʼe ko Iselaele katoa hanatou faikole,+ peʼe natou kole atu tou manavaʼofa+ (he ʼe tahi iloʼi pe tona faigataʼaʼia pea mo tona mamahi),+ ʼo natou hiki ʼonatou nima ʼo haga mai ki te fale ʼaeni,+ 30 ʼofa pe ke ke fagono mai mai te lagi, mai tou nofoʼaga,+ pea mo ke fakamolemole.+ Pea ke ke fakapale te tagata takitokotahi ʼo mulimuli ki tana aga, he ʼe ke iloʼi tona loto (ko koe tokotahi pe ʼae ʼe ina iloʼi moʼoni te loto ʼo te tagata),+ 31 ke natou manavasiʼi ai kia te koe, ʼo natou haʼele ʼi ʼou ala ʼi te ʼu ʼaho fuli ʼae ʼe natou maʼuʼuli ai ʼi te fenua ʼae neʼe ke foaki ki ʼamatou kui.
32 “Pea ko te matapule ʼae ʼe mole kau ki Iselaele, tau hahaʼi, ʼae ʼe haʼu mai he fenua mamaʼo he neʼe logo ki tou huafa lahi*+ pea mo tou nima mafimafi, pea kapau ʼe haʼu pea mo faikole ʼo haga ki te fale ʼaeni,+ 33 ʼofa pe ke ke fagono mai mai te lagi, mai tou nofoʼaga, pea ke ke fai te ʼu meʼa fuli ʼae ʼe kole atu e te matapule, ke iloʼi ai e te hahaʼi fuli ʼo te kele tou huafa+ pea ke natou manavasiʼi kia te koe, ohage pe ko Iselaele, tau hahaʼi, pea ke natou iloʼi ai ʼe fakakololiaʼi tou huafa ʼi te fale ʼaeni neʼe au laga.
34 “Kapau ʼe olo tau hahaʼi ki he faʼahi pe ʼo tauʼi ʼonatou fili,+ pea kapau ʼe natou faikole+ atu kia te koe ʼo natou haga ki te kolo ʼaeni neʼe ke filifili pea ki te fale ʼae neʼe au laga ke fakakololiaʼi ai tou huafa,+ 35 ke ke fagono mai mai te lagi ki tanatou faikole, mo tanatou kole atu tou manavaʼofa, pea ke ke fakahoko maʼa natou te faitotonu.+
36 “Kapau ʼe natou agahala kia te koe (koteʼuhi ʼe mole he tagata ʼe hao ʼi te agahala),+ ʼo ke ita ai kia natou pea mo tuku natou ki ʼonatou fili, pea ʼave popula ai ia natou e ʼonatou fili ki he fenua, pe ʼe mamaʼo peʼe ovi mai,+ 37 pea kapau ʼe natou fakakaukau poto ʼi te fenua ʼae neʼe ʼave popula natou ki ai, pea mo natou toe liliu atu ʼo kole atu tou manavaʼofa ʼi te fenua ʼae ʼe natou maʼuli popula ai, ʼo natou ui: ‘Neʼe matou agahala pea mo fai te aga ʼae ʼe kovi, neʼe matou agakovi,’+ 38 pea kapau ʼe natou toe liliu atu kia te koe mo tonatou loto katoa+ mo tonatou maʼuli* katoa ʼi te fenua ʼae neʼe ʼave popula natou ki ai,+ pea mo natou faikole atu kia te koe ʼo natou haga ki tonatou fenua ʼae neʼe ke foaki ki ʼanatou kui, mo te kolo ʼae neʼe ke filifili+ pea mo te fale ʼae neʼe au laga ke fakakololiaʼi ai tou huafa, 39 fakalelei siʼou loto, ke ke fagono mai mai te lagi, mai tou nofoʼaga, ki tanatou faikole mo tanatou kole atu tou manavaʼofa, pea ke ke fakahoko maʼa natou te faitotonu+ pea mo ke fakamolemole ki tau hahaʼi ʼae neʼe agahala kia te koe.
40 “ ʼI te temi leva ʼaeni, siʼoku ʼAtua, fakalelei siʼou loto, ke ke sio pea mo fagono lelei ki te ʼu faikole fuli ʼae ʼe fai ʼi* te koga meʼa ʼaeni.+ 41 Pea ʼi te lakaga nei, Sehova e, siʼoku ʼAtua, ke ke tuʼu ake ʼo hu ki tou nofoʼaga,+ ia koe mo te Aleka ʼae ʼe ha ai tou mafimafi. Sehova e, siʼoku ʼAtua, ke fakaha e ʼau pelepitelo ʼe feala ke ke haofaki te hahaʼi, pea ke fakafiafia ʼau hahaʼi agatonu ʼuhi ko tou agalelei.+ 42 Sehova e, siʼoku ʼAtua, ʼaua naʼa ke liʼaki* tau tagata fakanofo.+ ʼOfa pe ke ke manatuʼi tou ʼofa agatonu ʼae kia Tavite, tau tagata faifekau.”+
7 Pea ʼi te ʼosi pe ʼo te faikole ʼa Salomone,+ neʼe hifo mai te lagi he afi+ ʼo tutu te holokoseta pea mo te ʼu sakilifisio, pea neʼe fonu te fale ʼi te kololia ʼo Sehova.+ 2 Neʼe mole feala ke feulufi ia te kau pelepitelo ki te fale ʼo Sehova he neʼe fonu te fale ʼo Sehova ʼi te kololia ʼo Sehova.+ 3 Pea neʼe sisio te hahaʼi fuli ʼo Iselaele ki te hifo mai ʼa te afi pea mo te ha ʼo te kololia ʼo Sehova ʼi te fuga fale. Neʼe natou punonou ai mo tulolo ʼi te tale, ʼae neʼe fola ʼaki te maka pea mo fakafetaʼi kia Sehova, “he ʼe agalelei, pea ʼe ina fakaha tona ʼofa agatonu ʼo talu ai.”
4 Neʼe momoli leva e te hau pea mo te hahaʼi fuli he ʼu sakilifisio ia muʼa ʼo Sehova.+ 5 Neʼe sakilifisioʼi e te Hau ko Salomone he ʼu pipi ʼe 22 000 pea mo he ʼu ovi ʼe 120 000. Neʼe fakatapuʼi ai e te hau pea mo te hahaʼi fuli te fale ʼo te ʼAtua moʼoni.+ 6 Neʼe tutuʼu te kau pelepitelo ʼo fakahoko ʼanatou gaue, ʼo feia mo te kau Levite ʼae neʼe natou puke te ʼu meʼa faimaholo moʼo fakaʼaogaʼi ki te hiva ʼae kia Sehova.+ (Neʼe faʼu e te Hau ko Tavite te ʼu meʼa faimaholo ʼaia moʼo fakafetaʼi kia Sehova, “he ʼe ina fakaha tona ʼofa agatonu ʼo talu ai,” ʼi te temi ʼae neʼe fakavikiviki fakatahi ai mo natou* ki te ʼAtua.) Pea neʼe pupuhi malohi e te kau pelepitelo te ʼu fakatagi pupuhi+ ia muʼa ʼo te kau Levite, kae tutuʼu te kau Iselaele fuli.
7 Neʼe fakamaʼoniʼoniʼi leva e Salomone te lotomalie ʼo te malaʼe ʼae neʼe tuʼu ʼi te muʼa fale ʼo Sehova, he neʼe tonu ke ina momoli ʼi ai te ʼu holokoseta+ pea mo te ʼu koga ʼae ʼe gako ʼo te ʼu sakilifisio ʼo te tokalelei.* ʼEi, neʼe veliveli fau te ʼaletale kapa+ ʼae neʼe faʼu e Salomone ke hili ki ai te ʼu holokoseta, mo te ʼu molaga meʼa kai+ pea mo te ʼu koga ʼae ʼe gako.+ 8 ʼI te temi ʼaia, neʼe fai ai e Salomone te ʼaho lahi mo Iselaele katoa lolotoga ʼaho ʼe fitu.+ Neʼe ko he toe hahaʼi kaugamalie ʼae neʼe kau ki te ʼaho lahi, mai Lepo-hamate* ki te Vai Tafe* ʼo Esipito.+ 9 Neʼe natou fakatapuʼi ia te ʼaletale lolotoga ʼaho ʼe fitu pea mo fai te ʼaho lahi lolotoga ʼaho ʼe fitu, pea ʼi te valu ʼaho* leva neʼe natou fai he fakatahi taputapu.+ 10 Pea ʼi te ʼaho 23 ʼo te fitu mahina, neʼe ina fekauʼi te hahaʼi ke natou toe liliu fiafia+ ki ʼonatou ʼapi pea ke natou lotofiafia ʼuhi ko te ʼu lelei fuli ʼae neʼe fai e Sehova kia Tavite, mo Salomone pea mo Iselaele, tana hahaʼi.+
11 Neʼe fakaʼosi ai e Salomone tana laga ia te fale ʼo Sehova pea mo te fale hau.+ Pea neʼe lava lelei pe te ʼu meʼa fuli ʼae neʼe loto e Salomone ke ina fai maʼa te fale ʼo Sehova pea mo tona fale.+ 12 Neʼe ha leva ia Sehova kia Salomone+ ʼi te poʼuli, ʼo ina ui age ki ai: “Neʼe au logo ki tau faikole, pea neʼe au filifili te fale ʼaeni maʼaku ke liliu ko he koga meʼa ke momoli ai ni sakilifisio.+ 13 Kapau ʼe au pupunu te lagi ke mole to te ʼua, mo fakatotonu ki te ʼu heʼe ke natou maumauʼi te fenua pea mo au fakato he taʼi mahaki ʼi te lotolotoiga ʼo taku hahaʼi, 14 pea kapau ʼe fakamalalo ifo+ taku hahaʼi ʼae ʼe natou fua toku huafa,+ mo natou faikole mai, mo kumi au pea mo tafoki mai ʼanatou aga ʼae ʼe kovi,+ ʼe au fagono anai mai te lagi, mo au fakamolemole ʼanatou agahala pea ʼe au fakaliliu anai tonatou fenua ke toe maʼuli lelei.+ 15 ʼI te temi leva ʼaeni, ʼe au sio anai pea mo fagono lelei ki te ʼu faikole fuli ʼae ʼe fai ʼi te koga meʼa ʼaeni.+ 16 Pea kua au filifili mo fakamaʼoniʼoniʼi te fale ʼaeni ke fakamaʼuhigaʼi ʼi ai toku huafa ʼo talu ai.+ Pea ʼe tuku tuʼumaʼu anai ki ai ʼoku mata mo toku loto.+
17 “Pea kapau ʼe ke haʼele ʼi ʼoku muʼa ohage ko Tavite, tau tamai, ʼo ke fai ia meʼa fuli ʼae neʼe au fakatotonu atu, pea mo ke fakalogo ki ʼaku lao mo ʼaku lekula,+ 18 ʼe au fakatuʼu anai ke malohi tou hekaʼaga fakahau pea mo tau pule,+ ohage pe ko te fuakava ʼae neʼe au fai mo Tavite,+ tau tamai, ʼi taku ui age: ‘ ʼE ʼi ai tuʼumaʼu pe anai he tagata ʼi tou hologa ʼe pule ki Iselaele.’+ 19 Kae kapau leva ʼe kotou lituʼa mai kia au pea mo liʼaki ʼaku lao mo ʼaku fakatotonu ʼae neʼe au tuku atu kia koutou, pea mo kotou tauhi ki he tahi age ʼu ʼatua pea mo tulolo ʼi ʼonatou muʼa,+ 20 ʼe au taʼaki anai ia Iselaele mai te fenua ʼae neʼe au foaki age kia natou,+ pea ko te fale ʼae neʼe au fakamaʼoniʼoniʼi ke fakamaʼuhigaʼi ai toku huafa, ʼe au siʼaki anai ke mamaʼo mai ia au. Pea ʼe fehihiʼa mo manukiʼi anai e te hahaʼi fuli ia te fale ʼaia.+ 21 Pea ʼe liliu anai te fale ʼaeni ko he fale kua maumau. Ko te hahaʼi fuli ʼae ka fakalaka anai ʼi ai, ʼe natou sisio mo punamaʼuli anai+ pea mo ui: ‘He koʼe neʼe fai e Sehova te meʼa ʼaia ki te fenua ʼaeni pea mo te fale ʼaeni?’+ 22 Pea ʼe natou tali anai: ‘He neʼe natou liʼaki ia Sehova+ te ʼAtua ʼo ʼanatou kui, ʼae neʼe ina fakamavae natou mai te fenua ʼo Esipito,+ pea neʼe natou tali he tahi age ʼu ʼatua, mo natou tulolo ʼi ʼonatou muʼa pea mo tauhi kia natou.+ Ko te tupuʼaga la ʼaia ʼo tana fakahoko te ʼu malaʼia fuli ʼaeni kia natou.’ ”+
8 Neʼe laga e Salomone te fale ʼo Sehova pea mo tona fale hau lolotoga taʼu ʼe 20.+ 2 Hili ʼaia, neʼe toe laga e Salomone te ʼu kolo ʼae neʼe foaki age kia ia e Hilame+ pea neʼe ina fakanofo ʼi ai he kau Iselaele.* 3 Tahi ʼae meʼa, neʼe alu ia Salomone ʼo tauʼi te kolo ko Hamate-sopa pea neʼe ina maʼu. 4 Pea neʼe ina laga* ia Tatemoli ʼi te toafa pea mo te ʼu kolo fuli ʼi Hamate+ ʼae neʼe ʼave ki ai ʼona koloa.+ 5 Neʼe ina toe laga foki mo Pete-oloni ʼi ʼOluga+ mo Pete-oloni ʼi Lalo,+ ia te ʼu kolo tau mo ʼonā kaupa, mo ʼonā matapa pea mo ʼonā ʼakau fakamaʼu, 6 mo Paalati,+ ʼo feia mo te ʼu kolo fuli ʼo Salomone ʼae neʼe ʼave ki ai ʼona koloa, mo te ʼu kolo fuli ʼae neʼe tau ai ʼana saliote,+ mo te ʼu kolo ʼae maʼa te ʼu tagata heka hosi, pea mo te ʼu meʼa fuli ʼae neʼe fia laga e Salomone ʼi Selusalemi, mo Lipane pea mo te fenua katoa ʼo tona puleʼaga.
7 Pea neʼe ʼi ai he hahaʼi kaugamalie neʼe toe mai te kau Heti, mo te kau Amole, mo te kau Pelesite, mo te kau Hevi pea mo te kau Sepusi,+ pea neʼe mole kau ki te kau Iselaele.+ 8 Neʼe mole pulihi katoa natou e te kau Iselaele. Koia neʼe maʼuʼuli ai tonatou hologa ʼi te fenua.+ Pea neʼe fakamaʼua e Salomone kia natou ke natou gaue maʼa ia ʼo kaku mai ki te ʼaho nei.+ 9 Kae neʼe mole fakakauganaʼi e Salomone he tagata Iselaele, ke natou fai tana gaue,+ he neʼe ko ʼana tagata tau, mo te ʼu pule ʼo tana kau pule solia, pea mo te ʼu pule ʼo tana kau tagata taki saliote pea mo tagata heka hosi.+ 10 Neʼe ko te ʼu pule ʼe toko 250 ʼo te kau takitaki gaue ʼa te Hau ko Salomone pea neʼe natou tokakaga ki te kau gaue.+
11 Neʼe toe toʼo foki e Salomone te ʼofafine ʼo Falaone+ mai te Kolo ʼo Tavite ʼo ʼave ki te fale ʼae neʼe ina laga maʼa ia,+ he neʼe ina ui: “Logo la ʼe ko toku ʼohoana, kae ʼe mole tonu ke nofo ʼi te fale ʼo Tavite, te Hau ʼo Iselaele, he ʼe maʼoniʼoni te ʼu koga meʼa ʼae neʼe tuku ki ai te Aleka ʼo Sehova.”+
12 Neʼe momoli leva e Salomone he ʼu holokoseta+ kia Sehova ʼi te ʼaletale+ ʼo Sehova ʼae neʼe ina laga ʼi te muʼa fakamalumaluʼaga.+ 13 Neʼe mulimuli pe ki te gaue ʼae neʼe tonu ke fai ʼi te ʼaho takitahi pea neʼe ina fai he ʼu sakilifisio ʼo mulimuli ki te fakatotonu ʼa Moisese, ʼi te ʼu Sapato,+ mo te tuʼu afiafi ʼo te mahina,+ pea mo te ʼu ʼaho lalahi ʼe tolu ʼae neʼe fai ʼi te taʼu fuli:+ te ʼAho Lahi ʼo Te ʼu Pane Hala Fakatupu,+ mo te ʼAho Lahi ʼo Te ʼu Vahaʼa+ pea mo te ʼAho Lahi ʼo Te ʼu Pola.*+ 14 Pea neʼe ina fakatuʼutuʼu te ʼu kalasi ʼa te kau pelepitelo+ ʼo ʼuhiga mo ʼanatou gaue ʼo mulimuli ki te fakatotonu ʼa Tavite tana tamai, ʼo feia mo te kau Levite. Neʼe tonu ke natou fai ʼanatou gaue, mo fakavikiviki ki te ʼAtua+ pea mo tokoni ki* te kau pelepitelo ʼo mulimuli ki te gaue ʼae neʼe tonu ke fai ʼi te ʼaho takitahi. Neʼe ina toe fakatuʼutuʼu foki te ʼu kalasi ʼa te kau tagata leʼo matapa ʼo ʼuhiga mo te ʼu matapa kehekehe,+ he neʼe ko te fakatotonu ʼaia ʼa Tavite, te tagata ʼa te ʼAtua moʼoni. 15 Pea neʼe mulimuli te kau pelepitelo mo te kau Levite ki te fakatotonu ʼae neʼe fai age e te hau kia natou ʼo ʼuhiga mo te ʼu meʼa kehekehe pea mo te ʼu fale tanakiʼaga meʼa.* 16 Koia, neʼe fakatuʼutuʼu lelei* te ʼu gaue fuli ʼa Salomone, mai te ʼaho ʼae neʼe fakatuʼu ai te fakatafito ʼo te fale ʼo Sehova+ ʼo kaku ki tona fakaʼosi. Neʼe fakaʼosi ai te fale ʼo Sehova.+
17 ʼI te temi ʼaia, neʼe alu ai ia Salomone ki Esioni-kepele+ pea mo Elati*+ ʼi te matatai, ʼae ʼi te fenua ʼo Etome.+ 18 Neʼe fekauʼi e Hilame+ ʼana hahaʼi faifekau ke natou ʼave ki ai ni vaka pea mo he ʼu tagata ʼe natou iloʼi lelei te tai. Neʼe natou olo fakatahi mo te hahaʼi faifekau ʼa Salomone ki Ofile+ pea neʼe natou toʼo mai ai te ʼu taleta* aulo ʼe 450+ pea neʼe natou ʼave ki te Hau ko Salomone.+
9 Pea neʼe logo te fineʼaliki ʼo Sepa+ ki te fakamatala ʼo ʼuhiga mo Salomone, koia, neʼe haʼu ai ki Selusalemi ke ina ʼahiʼahiʼi ia Salomone ʼaki ni fehuʼi faigataʼa.* Neʼe alu fakatahi mo he toe hahaʼi kaugamalie ʼosi, pea mo he ʼu kamelo neʼe hili ai te lolo neʼe fai ʼaki te ʼu ʼakau fakamagoni, mo he tuʼuga aulo+ pea mo ni maka maʼuhiga. Pea neʼe alu kia Salomone ʼo fehuʼi age te ʼu meʼa fuli ʼae neʼe ina fia iloʼi.+ 2 Pea neʼe tali e Salomone ki ʼana fehuʼi fuli. Neʼe mole he meʼa neʼe faigataʼa fau* kia Salomone ke ina fakamahino age.
3 Neʼe sio ai te fineʼaliki ʼo Sepa ki te poto ʼo Salomone,+ mo te fale ʼae neʼe ina laga,+ 4 mo te meʼa kai ʼae ʼi tona laupapa,+ mo te fakatuʼutuʼu ʼo te ʼu hekaʼaga ʼo ʼana hahaʼi maʼu tuʼulaga ʼi te laupapa, mo te faiselevisi ʼo ʼana tagata faifekau mo ʼonatou teu, mo ʼana tagata ʼae neʼe tokakaga ki te vino mo ʼonatou teu, pea mo te ʼu holokoseta ʼae neʼe ina momoli tuʼumaʼu ʼi te fale ʼo Sehova.+ Neʼe punamaʼuli ʼaupito ai. 5 Koia, neʼe ina ui ki te hau: “Neʼe moʼoni pe te ʼu fakamatala ʼae neʼe au logo ki ai ʼi toku fenua ʼo ʼuhiga mo ʼau gaue* pea mo tou poto. 6 Kae neʼe mole pe la au tui ki te ʼu fakamatala ʼaia ʼo kaku ki taku hoki haʼu ʼo sio mata ki ai.+ Pea koʼeni, neʼe mole pe la fakamatala fuli mai te lahi ʼo tou poto.+ ʼE fakalaka maumau age ia ʼi te fakamatala ʼae neʼe au logo ki ai.+ 7 Fiafia ʼau tagata, pea mo fiafia ʼau hahaʼi faifekau ʼae ʼe tutuʼu tuʼumaʼu ʼi ʼou muʼa ʼo fakalogo ki tou poto! 8 Ke vikiʼi ia Sehova, tou ʼAtua, ʼae neʼe fiafia ʼo ʼuhiga mo koe ʼo ina fakanofo koe ki tona hekaʼaga fakahau ke ke hau maʼa Sehova, tou ʼAtua. ʼE ʼofa tou ʼAtua ki Iselaele+ pea ʼe ina loto ke tuʼu ʼo talu ai, koia neʼe ina fakanofo ai koe ko te hau, ke ke fakahoko te faitotonu.”
9 Neʼe ina foaki leva ki te hau ia taleta* aulo ʼe 120,+ mo ni tuʼuga lolo neʼe fai ʼaki te ʼu ʼakau fakamagoni pea mo ni maka maʼuhiga. Neʼe mole he temi neʼe toe ʼaumai ki te Hau ko Salomone he lolo feia, ohage ko te lolo ʼae neʼe foaki age e te fineʼaliki ʼo Sepa.+
10 Tahi ʼae meʼa, ko te hahaʼi faifekau ʼa Hilame pea mo te hahaʼi faifekau ʼa Salomone ʼae neʼe natou ʼaumai te aulo mai Ofile,+ neʼe natou toe ʼaumai foki mo te ʼakau ʼae ko te ahi pea mo ni maka maʼuhiga.+ 11 Pea neʼe faʼu e te hau ʼaki te ʼakau ʼae ko te ahi ni mata tuʼuga maʼa te fale ʼo Sehova+ pea mo te fale hau,+ ʼo feia mo ni alepa pea mo he tahi age ʼu meʼa faimaholo maʼa te kau hiva.+ Neʼe heʼeki sisio te hahaʼi ki he ʼu ʼakau feia ʼi muʼa atu, ʼi te fenua ʼo Suta.
12 Neʼe toe foaki foki e te Hau ko Salomone te ʼu meʼa fuli ʼae neʼe loto ki ai pea mo kole age e te fineʼaliki ʼo Sepa, ʼo lahi age ʼi* te ʼu meʼa ʼae neʼe ina ʼaumai maʼa te hau. Hili ʼaia, neʼe mavae leva te fineʼaliki ʼo toe liliu ki tona fenua mo ʼana hahaʼi faifekau.+
13 Pea ʼi te taʼu fuli, neʼe ʼaumai kia Salomone ia taleta aulo ʼe 666,+ 14 ʼo hilifaki atu ki ai mo te ʼu meʼa ʼae neʼe ʼaumai e te hahaʼi faifakatau koloa fuli. Pea neʼe ʼaumai e te ʼu hau fuli ʼo te kau Alape pea mo te ʼu kovana ʼo te fenua te aulo pea mo te siliva kia Salomone.+
15 Neʼe faʼu e te Hau ko Salomone te ʼu meʼa tali tau lalahi ʼe 200 ʼaki te aulo neʼe fio mo he tahi age ukamea+ (neʼe ʼaofi te ʼu meʼa tali tau takitahi ʼaki ia sikele* aulo ʼe 600, neʼe ko he aulo neʼe fio mo he tahi age ukamea)+ 16 pea mo te ʼu meʼa tali tau liliki* ʼe 300 ʼaki te aulo neʼe fio mo he tahi age ukamea (neʼe ʼaofi te ʼu meʼa tali tau takitahi ʼaki ia mina* aulo ʼe tolu). Pea neʼe tuku leva e te hau te ʼu meʼa ʼaia ki te Fale ʼo Te Vao Matuʼa ʼo Lipane.+
17 Neʼe toe fai foki e te hau he toe hekaʼaga fakahau ivuale* lahi pea neʼe ina ʼaofi ʼaki te aulo maʼa.+ 18 Ko te alu ʼae ki te hekaʼaga fakahau neʼe mata tuʼuga ono, pea neʼe ʼi ai he hiliʼaga vaʼe aulo neʼe fakapipiki ki te hekaʼaga fakahau. Neʼe ʼi ai ʼona hiliʼaga nima pea neʼe fakatuʼu te ʼu laione ʼe lua+ ia tafa ʼo te ʼu hiliʼaga nima ʼaia. 19 Pea neʼe fakatuʼu te ʼu laione ʼe 12+ ʼi te ʼu mata tuʼuga ʼe ono, ko he laione ʼe tahi ʼi te ʼu faʼahi lualua ʼo te ʼu mata tuʼuga ʼaia ʼe ono. Neʼe mole he tahi age puleʼaga neʼe ina fai he meʼa feia. 20 Ko te ʼu ipu fuli ʼa te Hau ko Salomone neʼe fai ʼaki te aulo, pea ko te ʼu meʼa kehekehe fuli ʼo te Fale ʼo Te Vao Matuʼa ʼo Lipane neʼe fai ʼaki te aulo maʼa. Neʼe mole he meʼa neʼe fai ʼaki te siliva, he ʼe ʼi te temi ʼo Salomone neʼe mole maʼuhiga te siliva.+ 21 Neʼe olo te hahaʼi faifekau ʼa Hilame+ mo te ʼu vaka ʼo te hau ki Talesisi.+ Tuʼa tahi ʼi te ʼu taʼu ʼe tolu, neʼe ʼomai te ʼu vaka ʼo Talesisi neʼe fonu ko te aulo, mo te siliva, mo te ivuale,+ mo te ʼu geli pea mo te ʼu manulele matalelei.
22 Koia neʼe lahi age te ʼu koloa pea mo te poto ʼo te Hau ko Salomone ʼi te ʼu hau fuli ʼo te kele.+ 23 Pea neʼe faiga ia te ʼu hau fuli ʼo te kele ke natou felogoi mo* Salomone, ke natou logo ki te poto ʼae neʼe tuku e te ʼAtua moʼoni ki tona loto.+ 24 Neʼe natou tahi haʼu mo tana meʼa ʼofa: ko he ʼu meʼa siliva, mo he ʼu meʼa aulo, mo he ʼu teu,+ mo he ʼu mahafu, mo he lolo neʼe fai ʼaki te ʼu ʼakau fakamagoni, mo ni hosi pea mo ni asino lalahi. Neʼe fai feia ʼi te taʼu fuli. 25 Pea neʼe maʼu e Salomone te ʼu fale hosi ʼe 4 000 maʼa ʼana hosi. Neʼe toe ʼi ai mo ʼana saliote tau pea mo ʼana hosi ʼe* 12 000.+ Neʼe ina tuku ʼihi saliote tau mo hosi ki te ʼu kolo ʼae neʼe kua ina fakatuʼutuʼu ke tau ai* pea mo ʼihi ʼi Selusalemi, ʼo ovi ki tona nofoʼaga.+ 26 Pea neʼe pule ki te ʼu hau fuli mai te Vai Tafe* ʼo kaku ki te fenua ʼo te kau Filisitini pea mo te tuʼakoi ʼo Esipito.+ 27 Neʼe lahi ʼaupito te siliva ʼae neʼe maʼu ʼi Selusalemi ohage ko te ʼu maka, pea neʼe lahi ʼaupito te ʼakau ʼae ko te sete ohage ko te ʼu fuʼu sikomole ʼi te Sefela, ʼuhi ko Salomone.+ 28 Neʼe ʼaumai e te hahaʼi kia Salomone te ʼu hosi mai Esipito+ pea mo te tahi atu ʼu fenua.
29 ʼE tuʼu te toe ʼo te hisitolia ʼo Salomone,+ mai tona kamata ki tona fakaʼosi, ʼi te ʼu tohi ʼa Natane,+ te polofeta, mo te lea fakapolofeta ʼa Akisa,+ te tagata Silo, pea mo te ʼu fakamatala ʼa Ito,+ ʼae neʼe sio ki he ʼu meʼa neʼe ha age kia ia ʼo ʼuhiga mo Selopoamo,+ te foha ʼo Nepate. 30 Neʼe pule ia Salomone ʼi Selusalemi ki Iselaele katoa lolotoga taʼu ʼe 40. 31 Neʼe mate leva ia Salomone.* Pea neʼe ʼavaifo ʼi te Kolo ʼo Tavite, tana tamai.+ Neʼe hau leva ia Lopoame, tona foha, ʼo fetogi ia ia.+
10 Neʼe alu leva ia Lopoame ki Sekemi,+ he neʼe ʼomai fuli te kau Iselaele ki Sekemi ke fakanofo hau ia ia.+ 2 Pea neʼe logo ia Selopoamo,+ te foha ʼo Nepate ki ai. (ʼI te temi ʼaia, neʼe kei nofo ʼi Esipito he neʼe hola ʼuhi ko te Hau ko Salomone.)+ Neʼe toe liliu mai leva mai Esipito. 3 Neʼe fekauʼi leva ʼihi tagata ke natou olo ʼo ʼaumai ia ia, pea neʼe haʼu ia Selopoamo mo Iselaele katoa kia Lopoame, ʼo natou ui age: 4 “Neʼe fakamamafa e tau tamai tamatou kavega.+ Kae kapau ʼe ke fakamaʼamaʼa te gaue kinakina mo te kavega mamafa* ʼae neʼe fakamaʼua mai e tau tamai kia matou, ʼe matou tauhi anai kia koe.”
5 Neʼe ina ui kia natou: “Kotou toe liliu mai hili ʼaho ʼe tolu.” Pea neʼe olo ai te hahaʼi.+ 6 Neʼe alu leva te Hau ko Lopoame ʼo kumi tokoni ki te kau matuʼa ʼae neʼe gaue maʼa tana tamai ko Salomone ʼi tana kei maʼuli. Neʼe ina fehuʼi age kia natou: “Kotea la he tali ʼe feala ke au fai ki te hahaʼi ʼaia?” 7 Neʼe natou tali age ki ai: “Kapau ʼe ke agalelei mo te hahaʼi ʼaia, mo ke fakafiafiaʼi ʼonatou loto pea mo ke tali lelei kia natou, ʼe natou liliu anai ko hau hahaʼi faifekau ʼo talu ai.”
8 Kae neʼe ina liʼaki te tokoni ʼae neʼe foaki age e te kau matuʼa kia ia, pea neʼe alu ʼo kumi tokoni ki te kau tupulaga ʼae neʼe lalahi ake mo ia pea neʼe liliu ko tana kau gaue.+ 9 Neʼe ina fehuʼi age kia natou: “Kotea la he tali ʼe tonu ke tou fai ki te hahaʼi ʼae neʼe natou ui mai: ‘Ke ke fakamaʼamaʼa te kavega ʼae neʼe fakamaʼua mai e tau tamai kia matou’?” 10 Neʼe ui age e te kau tupulaga ʼae neʼe lalahi ake mo ia: “Neʼe ui atu e te hahaʼi: ‘Neʼe fakamamafa e tau tamai tamatou kavega, kae ʼe tonu ke ke fakamaʼamaʼa.’ Koʼeni leva te meʼa ʼae ʼe tonu ke ke ui kia natou: ‘ ʼE au toe agafefeka age anai au ʼi taku tamai.* 11 Neʼe fakamaʼua atu e taku tamai he kavega mamafa, kae ʼe au toe fakamamafa age anai takotou kavega. Neʼe tauteaʼi koutou e taku tamai ʼaki ni huipi, kae ʼe au tauteaʼi anai koutou ʼaki ni huipi ʼe haʼi ki ai he ʼu meʼa talatala.’ ”
12 Neʼe haʼu leva ia Selopoamo mo te hahaʼi fuli kia Lopoame ʼi te tolu ʼaho, he neʼe ui age e te hau kia natou: “Kotou toe liliu mai hili ʼaho ʼe tolu.”+ 13 Kae neʼe palalau fefeka age ia te hau kia natou. Neʼe liʼaki e te Hau ko Lopoame te tokoni ʼa te kau matuʼa. 14 Neʼe palalau ki te hahaʼi ʼo mulimuli ki te tokoni ʼa te kau tupulaga, ʼo ina ui: “ ʼE au fakamamafa anai takotou kavega, pea ʼe au toe fakamamafa anai ʼo lahi age. Neʼe tauteaʼi koutou e taku tamai ʼaki ni huipi, kae ʼe au tauteaʼi anai koutou ʼaki ni huipi ʼe haʼi ki ai he ʼu meʼa talatala.” 15 Koia, neʼe mole fakalogo ia te hau ki te hahaʼi, koteʼuhi neʼe takitaki e te ʼAtua moʼoni te ʼu aluʼaga ʼaia,+ ke hoko ai te folafola ʼae neʼe fai e Sehova ʼaki ia Akisa,+ te tagata Silo kia Selopoamo, te foha ʼo Nepate.
16 Neʼe mole fakalogo te hau ki te kau Iselaele fuli, koia neʼe tali age e te hahaʼi ki te hau: “ ʼE ʼi ai koa hotatou vahe ia Tavite? Kailoa, ʼe mole ʼi ai hotatou tofiʼa ʼi te foha ʼo Sese. Koia, hahaʼi ʼo Iselaele, kotou tahi liliu ki ʼona ʼatua. Pea Tavite, ke ke tokaga pe ki tou loto fale!”+ Neʼe toe liliu ai te kau Iselaele fuli ki ʼonatou ʼapi.*+
17 Kae neʼe hoko atu pe e Lopoame tana pule ki te kau Iselaele ʼae neʼe nonofo ʼi te ʼu kolo ʼo Suta.+
18 Neʼe fekauʼi leva e te Hau ko Lopoame ia Hatolame ke alu ki te kau Iselaele. Ko Hatolame+ ʼae neʼe pule ki te hahaʼi ʼae neʼe fakamaʼua e te hau ke natou gaue maʼa ia. Kae neʼe natou tuki makaʼi ia ia, ʼo mate ai. Neʼe lava heka te Hau ko Lopoame ki tana saliote ʼo hola ki Selusalemi.+ 19 Pea neʼe fakafeagai te kau Iselaele ki te fale ʼo Tavite ʼo kaku mai ki te ʼaho nei.
11 ʼI te tau mai ʼa Lopoame ki Selusalemi, neʼe ina fakatahiʼi atu aipe te ʼu tagata ʼo te ʼu telepi ʼo Suta mo Pesamino.+ Neʼe ko te ʼu tagata ʼe toko 180 000 neʼe popoto ʼi* te tau. Neʼe fakatahiʼi natou e Lopoame ke natou tauʼi ia Iselaele pea ke ina toe maʼu ai ia te puleʼaga.+ 2 Kae neʼe ui age e Sehova kia Semaea,+ te tagata ʼa te ʼAtua moʼoni: 3 “ ʼE tonu ke ke ui kia Lopoame te foha ʼo Salomone, te hau ʼo Suta pea mo te kau Iselaele fuli ʼae ʼi Suta mo Pesamino: 4 ‘Koʼeni te folafola ʼa Sehova: “ ʼE mole tonu ke kotou olo ʼo tauʼi ʼokotou tehina. Kotou tahi liliu ki tona ʼapi, he neʼe au takitaki te aluʼaga ʼaia.” ’ ”+ Neʼe natou fakalogo ai ki te folafola ʼa Sehova ʼo natou toe liliu ai, pea neʼe mole natou olo ʼo tauʼi ia Selopoamo.
5 Neʼe nofo ia Lopoame ʼi Selusalemi pea neʼe ina laga ni kolo tau ʼi Suta. 6 Neʼe ina toe laga ia Petelehemi,+ mo Etami, mo Tekoa,+ 7 mo Pete-tesuli, mo Soko,+ mo Atulami,+ 8 mo Kiete,+ mo Malesea, mo Sife,+ 9 mo Atolaimi, mo Lakisi,+ mo Aseka,+ 10 mo Solea, mo Asaloni+ pea mo Hepelone,+ ia te ʼu kolo tau ʼae neʼe ʼi Suta pea mo Pesamino. 11 Tahi ʼae meʼa, neʼe ina fai he ʼu fakatuʼutuʼu ke malohi ai te ʼu kolo tau, ʼo ina fakanofo ʼi ai he kau pule pea mo fetuku ki ai he meʼa kai, mo he lolo pea mo he vino, 12 pea neʼe ina fetuku ki te ʼu kolo kehekehe fuli ni meʼa tali tau lalahi pea mo ni tao. Neʼe lahi ʼaupito te ʼu fakatuʼutuʼu ʼae neʼe ina fai ke malohi ai te ʼu kolo tau. Neʼe haga pule ki Suta pea mo Pesamino.
13 Pea neʼe lagolago kia ia te kau pelepitelo mo te kau Levite ʼae neʼe ʼi Iselaele katoa, ʼo natou mavae mai ʼonatou fenua fuli ʼo ʼomai ki ai. 14 Neʼe tuku e te kau Levite ʼonatou koga meʼa luna’ia pea mo ʼonatou kele,+ kae natou olo ki Suta pea mo Selusalemi, koteʼuhi neʼe tapuʼi e Selopoamo mo ʼona foha ia tanatou gaue ʼi tonatou ʼuhiga pelepitelo ʼa Sehova.+ 15 Neʼe fakanofo leva e Selopoamo ʼana pelepitelo ke natou gaue ʼi te ʼu faʼahi maʼoluga,+ ʼo tauhi ki te ʼu temonio ʼae neʼe hage ko he ’u tao*+ pea mo te ʼu fakatata ʼo he ʼu ʼuhiʼi pipi ʼae neʼe ina fai.+ 16 Pea ko natou ʼo te ʼu telepi fuli ʼo Iselaele ʼae neʼe natou loto moʼoni ke natou kumi ia Sehova te ʼAtua ʼo Iselaele, neʼe natou muliʼi te kau pelepitelo mo te kau Levite ki Selusalemi ke natou fai ni sakilifisio kia Sehova, te ʼAtua ʼo ʼanatou kui.+ 17 Neʼe natou lagolago ki te puleʼaga ʼo Suta ke tuʼu malohi, ʼo feia mo te pule ʼa Lopoame te foha ʼo Salomone lolotoga taʼu ʼe tolu. ʼEi, neʼe natou faʼifaʼitakiʼi te aga ʼa Tavite pea mo Salomone lolotoga taʼu ʼe tolu.
18 Neʼe ʼohoana leva ia Lopoame mo Maalate. Ko te tamai ʼa Maalate neʼe ko Selimote, te foha ʼo Tavite pea ko tana faʼe neʼe ko Apihaile, te ʼofafine ʼo Eliape, te foha ʼo Sese.+ 19 ʼAki te temi, neʼe ina fanauʼi leva he ʼu tama: ko Seuse, mo Semalia pea mo Saame. 20 Hili ʼaia, neʼe toe ʼohoana ia Lopoame mo Maaka, te mokopuna ʼo Apesalone.+ Pea neʼe fanauʼi leva e tona ʼohoana ia Apisa,+ mo Atai, mo Sesia pea mo Selomita. 21 Neʼe ʼofa ia Lopoame ia Maaka te mokopuna ʼo Apesalone. Neʼe lahi age tona ʼofa ki ai ʼi ʼona ʼohoana pea mo ʼana fafine fuli.+ Neʼe ko ʼona ʼohoana ʼe toko 18 pea mo ʼana fafine ʼe toko 60, pea mo ʼona foha ʼe toko 28 pea mo ʼona ʼofafine ʼe toko 60. 22 Koia neʼe hinoʼi ai e Lopoame ia Apisa, te tama ʼa Maaka, ke pule pea mo ina takitaki ʼona tehina, he neʼe ina fia fakanofo ia ia ke hau. 23 Kae neʼe poto he neʼe ina fekauʼi ʼihi ʼo ʼona foha ke olo ki* te ʼu potu fenua fuli ʼo Suta mo Pesamino, mo te ʼu kolo tau fuli,+ pea neʼe ina foaki age kia natou he tuʼuga meʼa kai pea mo ni ʼonatou ʼohoana.
12 Hili pe te fakatuʼu ʼae ke malohi te pule fakahau ʼa Lopoame+ pea mo tana liliu ʼo malohi, neʼe ina liʼaki leva te Lao ʼa Sehova,+ pea neʼe toe fai feia foki mo Iselaele katoa. 2 ʼI te nima taʼu ʼo te pule ʼa te Hau ko Lopoame, neʼe haʼu ia te Hau ʼo Esipito ko Sisake+ ʼo tauʼi ia Selusalemi, he neʼe mole nonofo agatonu te kau Iselaele kia Sehova. 3 Neʼe haʼu mai Esipito mo ʼana saliote tau ʼe 1 200, mo ʼana tagata heka hosi ʼe toko 60 000, pea mo he kau solia neʼe mole feala tona lau, neʼe ko te kau Lipi, mo te kau Sukime pea mo te kau Etiopea.+ 4 Neʼe ina maʼu ai te ʼu kolo tau ʼo Suta pea neʼe tau atu leva ki Selusalemi.
5 Neʼe alu te polofeta ko Semaea+ kia Lopoame mo te kau ʼaliki ʼo Suta, ʼae neʼe fakatahitahi ʼi Selusalemi he neʼe natou matataku ia Sisake. Neʼe ina ui age kia natou: “Koʼeni te folafola ʼa Sehova: ‘Neʼe kotou liʼaki au, koia ʼe au toe liʼaki anai mo koutou+ ʼo au tuku koutou ki te ʼu nima ʼo Sisake.’ ” 6 Pea neʼe fakamalalo ifo ia te kau ʼaliki ʼo Iselaele pea mo te hau ia muʼa ʼo te ʼAtua,+ ʼo natou ui: “ ʼE faitotonu ia Sehova.” 7 ʼI te sio ʼa Sehova ki tanatou fakamalalo ifo ʼi ʼona muʼa, neʼe ui leva e Sehova kia Semaea: “Neʼe natou fakamalalo ifo ʼi ʼoku muʼa. Koia, ʼe mole au fakaʼauha anai ia natou,+ pea ʼe vave pe anai taku haofaki ia natou. ʼE mole au fakaʼaogaʼi anai ia Sisake ke to ai toku hauhau ki Selusalemi. 8 Kae ʼe natou liliu anai ko ʼana hahaʼi faifekau, ke natou iloʼi ai te kehekehe ʼo te tauhi kia te au pea mo te tauhi ʼae ki te ʼu hau* ʼo te tahi ʼu fenua.”
9 Koia neʼe haʼu te Hau ʼo Esipito ko Sisake ʼo tauʼi ia Selusalemi. Neʼe ina toʼo te ʼu koloa ʼo te fale ʼo Sehova+ pea mo te ʼu koloa ʼo te fale hau. Neʼe ina toʼo ia meʼa fuli, ʼo kau ki ai te ʼu meʼa tali tau aulo ʼae neʼe faʼu e Salomone.+ 10 Koia, neʼe faʼu ai e te Hau ko Lopoame he ʼu meʼa tali tau kapa moʼonatou fetogi, pea neʼe ina tuku leva ki te ʼu pule ʼo te kau leʼo,* ʼae neʼe natou leʼo te huʼaga ʼo te fale hau. 11 ʼI te temi fuli pe ʼae neʼe haʼu ai te hau ki te fale ʼo Sehova, neʼe olo ai te kau leʼo ʼo ʼaumai te ʼu meʼa tali tau ʼaia, pea neʼe natou toe ʼave leva ki te koga fale ʼo te kau leʼo. 12 Neʼe malū ifo te ita ʼo Sehova he ʼe ʼi muʼa atu neʼe fakamalalo ifo ia te hau ʼi ʼona muʼa.+ Koia neʼe mole ina fakaʼauha katoa ia ia mo tana hahaʼi.+ Pea tahi ʼae meʼa, neʼe kei ʼi ai pe niʼihi hahaʼi ʼo Suta neʼe natou fai he ʼu aga ʼe lelei.+
13 Neʼe ʼaʼasili age te malohi ʼae neʼe maʼu e te Hau ko Lopoame ʼi Selusalemi pea neʼe hoko atu pe tana pule. Neʼe hau ia Lopoame ʼi tona taʼu 41, pea neʼe pule lolotoga taʼu ʼe 17 ʼi Selusalemi, te kolo ʼae neʼe filifili e Sehova ʼi te ʼu telepi fuli ʼo Iselaele ke fakamaʼuhigaʼi ai tona huafa. Neʼe higoa te faʼe ʼa te hau ko Naama, ko he fafine Amone.+ 14 Kae neʼe fai e te hau te meʼa ʼae ʼe kovi, he neʼe mole ina fakatotonu ʼi tona loto ke ina kumi ia Sehova.+
15 ʼE tuʼu te hisitolia ʼo Lopoame, mai tona kamata ki tona fakaʼosi, ʼi te ʼu tohi ʼa te polofeta ko Semaea,+ pea mo ʼae ʼa Ito,+ te tagata ʼae ʼe ina iloʼi te ʼu meʼa ʼae neʼe ha, pea ʼe maʼu ʼi te ʼu tohi hako. Pea neʼe fetauʼaki tuʼumaʼu pe ia Lopoame mo Selopoamo.+ 16 Neʼe mate leva ia Lopoame* pea neʼe ʼavaifo ʼi te Kolo ʼo Tavite.+ Pea neʼe hau tona foha ko Apisa+ ʼo fetogi ia ia.
13 ʼI te 18 taʼu ʼo te pule ʼa te Hau ko Selopoamo, neʼe hau leva ia Apisa ki Suta.+ 2 Neʼe pule lolotoga taʼu ʼe tolu ʼi Selusalemi. Neʼe higoa tana faʼe ko Mikaia,+ te ʼofafine ʼo Uliele mai Kipease.+ Pea neʼe fetauʼaki ia Apisa mo Selopoamo.+
3 Neʼe alu ai ia Apisa ki te tau mo tana foʼi kautau, neʼe ko te ʼu tagata tau malolohi ʼe toko 400 000, neʼe popoto ʼi* te tau.+ Neʼe fakaʼatu e Selopoamo tana foʼi kautau ke natou tauʼi ia Apisa, neʼe ko ʼana tagata tau malolohi ʼe toko 800 000, neʼe popoto ʼi* te tau. 4 Neʼe tuʼu leva ia Apisa ʼi te Moʼuga ʼo Semalaimi ʼae ʼi te potu moʼugaʼia ʼo Efalaimi, pea neʼe ina ui: “Kotou fagono mai, Selopoamo pea mo Iselaele katoa! 5 ʼE mole kotou iloʼi koa la neʼe foaki e Sehova te ʼAtua ʼo Iselaele kia Tavite te puleʼaga ʼo Iselaele ʼo talu ai,+ kia ia mo ʼona foha,+ ʼaki tana fai he fuakava ʼo te masima?*+ 6 Kae neʼe tuʼu ake ia Selopoamo,+ te foha ʼo Nepate, te tagata faifekau ʼa Salomone, te foha ʼo Tavite ʼo agatuʼu ki tona ʼaliki.+ 7 Pea neʼe fakatahi age ki ai he ʼu tagata ʼe tataka noa pea ʼe mole honatou ʼuhiga. Koia, neʼe lava tanatou agatuʼu kia Lopoame, te foha ʼo Salomone, ʼae neʼe kei tupulaga pea mo mataku, pea neʼe mole feala ke ina taʼofi tanatou agatuʼu ʼaia.
8 “Pea ʼi te temi nei, ʼe kotou manatu ʼe feala hakotou fakafeagai ki te puleʼaga ʼo Sehova ʼae ʼe ʼi te ʼu nima ʼo te ʼu foha ʼo Tavite, he ʼe kotou kaugamalie ʼaupito pea ʼe kotou maʼu te ʼu ʼuhiʼi pipi aulo ʼae neʼe faʼu e Selopoamo ke kotou ʼatua ki ai.+ 9 Neʼe mole koa la kotou kapu te kau pelepitelo ʼa Sehova,+ ia te hologa ʼo Alone pea mo te kau Levite? Pea neʼe mole koa la kotou fakanofo ʼakotou pelepitelo, ohage ko tona fai e te hahaʼi ʼo te tahi ʼu fenua?+ Ko he tahi pe neʼe haʼu mo he vitulo kei mui pea mo he ʼu ovi tagata ʼe fitu, neʼe feala ke liliu ko he pelepitelo ʼo te ʼu fakatata ʼae ʼe mole ko he ʼu ʼatua. 10 Kae kia matou, ko Sehova ʼe ko tomatou ʼAtua,+ pea neʼe mole matou liʼaki ia ia. ʼE tauhi ʼamatou pelepitelo, ia te hologa ʼo Alone kia Sehova, pea ʼe tokoni te kau Levite ki tanatou gaue. 11 ʼE natou tutu ke kohu ni holokoseta kia Sehova ʼi te uhu fuli mo te afiafi fuli,+ ʼo feia mo te iseso magoni,+ mo natou hili fakatuʼuga te ʼu pane*+ ʼi te laupapa ʼae neʼe fai ʼaki te aulo maʼa. Pea ʼi te afiafi fuli,+ ʼe natou tutu te ʼu tuʼulaga malama ʼae neʼe fai ʼaki te aulo+ mo ʼanatou malama, he ʼe matou fakahoko tomatou maʼua kia Sehova tomatou ʼAtua. Kae neʼe kotou liʼaki koutou ia ia. 12 Koʼeni, ʼe nofo te ʼAtua moʼoni mo matou, pea ʼe ina takitaki matou ʼaki ʼana pelepitelo, ʼae ʼe natou toʼo te ʼu fakatagi pupuhi pea mo pupuhi ke matou olo ai ʼo tauʼi koutou. Koia, ʼu tagata ʼo Iselaele, ʼaua naʼa kotou tauʼi ia Sehova te ʼAtua ʼo ʼakotou kui, he ʼe mole kotou malo anai.”+
13 Kae neʼe fakatuʼu e Selopoamo he kutuga solia ke natou ʼohofi natou mai muli. Koia neʼe tauʼi ai e tana foʼi kautau ia Suta mai muʼa, kae tauʼi e te kau solia ʼae neʼe fenonoʼi mai muli. 14 ʼI te maliu ʼa te ʼu tagata ʼo Suta, ʼo sio ki te tauʼi ʼo natou mai muʼa pea mai muli, neʼe natou kalaga ai kia Sehova.+ Pea neʼe pupuhi malohi e te kau pelepitelo te ʼu fakatagi pupuhi. 15 Neʼe fai e te ʼu tagata ʼo Suta he kalaga tau, pea ʼi tanatou fai te kalaga tau ʼaia, neʼe foaki e te ʼAtua moʼoni ia te malo kia Apisa mo te ʼu tagata ʼo Suta, ke natou malo ia Selopoamo pea mo Iselaele katoa. 16 Neʼe feholaki te kau Iselaele ia muʼa ʼo te ʼu tagata ʼo Suta, pea neʼe tuku natou e te ʼAtua ki ʼonatou nima. 17 Neʼe kaugamalie te kau solia ʼae neʼe matehi e Apisa mo tana foʼi kautau, ʼo natou matehi ai te ʼu tagata Iselaele ʼe toko 500 000, neʼe popoto ʼi* te tau. 18 Koia, ʼi te temi ʼaia, neʼe fakalainoaʼi ai te ʼu tagata ʼo Iselaele, kae neʼe malolohi age te ʼu tagata ʼo Suta he neʼe natou falala* kia Sehova te ʼAtua ʼo ʼanatou kui.+ 19 Neʼe hoko atu pe e Apisa tana tuli ia Selopoamo. Pea neʼe ina maʼu ʼona kolo ʼae ko Petele+ mo ʼona kolo liliki, mo Sekana mo ʼona kolo liliki, pea mo Efelaini+ mo ʼona kolo liliki. 20 Neʼe mole toe maʼu leva e Selopoamo tona malohi ʼi te temi ʼo Apisa. Neʼe tauteaʼi ia ia e Sehova pea neʼe mate leva.+
21 Kae neʼe ʼaʼasili age te malohi ʼo Apisa. ʼAki te temi, neʼe ʼohoana mo he ʼu fafine ʼe toko 14,+ pea neʼe ko ʼona foha ʼe toko 22 mo ʼona ʼofafine ʼe toko 16. 22 Pea ʼe tuʼu te toe ʼo te hisitolia ʼo Apisa, ʼana gaue mo ʼana folafola, ʼi te ʼu tohi* ʼa te polofeta ko Ito.+
14 Neʼe mate leva ia Apisa* pea neʼe ʼavaifo ʼi te Kolo ʼo Tavite.+ Neʼe hau tona foha ko Asa ʼo fetogi ia ia. Pea ʼi tona temi pule, neʼe maʼuli te fenua ʼi te tokalelei lolotoga taʼu ʼe hogofulu.
2 Neʼe fai e Asa te meʼa ʼae ʼe lelei mo totonu kia mata ʼo Sehova, tona ʼAtua. 3 Neʼe ina pulihi te ʼu ʼaletale ʼo te ʼu ʼatua matapule+ pea mo te ʼu faʼahi maʼoluga, mo ina maumauʼi te ʼu pou maka taputapu+ pea mo taʼaga te ʼu pou ʼakau taputapu.*+ 4 Tahi ʼae meʼa, neʼe ina fakatotonu ki te hahaʼi ʼo Suta ke natou kumi ia Sehova, te ʼAtua ʼo ʼanatou kui pea mo mulimuli ki te Lao pea mo te ʼu fakatotonu. 5 Neʼe ina pulihi ai ʼi te ʼu kolo fuli ʼo Suta ia te ʼu faʼahi maʼoluga pea mo te ʼu tuʼulaga iseso.+ Pea ʼi tona temi pule, neʼe mole hoko ai ni maveuveu ʼi tona puleʼaga. 6 Neʼe ina laga he ʼu kolo tau ʼi Suta,+ he neʼe mole hoko ni maveuveu ʼi te fenua pea neʼe mole laga tau he tahi kia ia lolotoga te ʼu taʼu ʼaia, he neʼe foaki e Sehova kia ia te tokalelei.+ 7 Neʼe ina ui ki te hahaʼi ʼo Suta: “Tou laga te ʼu kolo ʼaia pea mo ʼa takai ʼaki he ʼu kaupa, mo he ʼu tule,+ mo he ʼu matapa* pea mo he ʼu ʼakau fakamaʼu. Koteʼuhi ʼe kei tou maʼu ia te fenua he neʼe tou kumi ia Sehova totatou ʼAtua. Neʼe tou kumi ia ia pea neʼe ina foaki mai te tokalelei ʼi ʼotatou tafaʼaki fuli.” Neʼe maui mālie ai tanatou laga te ʼu kolo ʼaia.+
8 Neʼe maʼu e Asa he foʼi kautau, neʼe ko te toko 300 000 tagata mai Suta, mo ʼanatou meʼa tali tau lalahi pea mo te ʼu tao. Pea neʼe ko he ʼu tagata tau malolohi ʼe toko 280 000 mai te telepi ʼo Pesamino, mo ʼanatou meʼa tali tau liliki* pea mo he ʼu nahau.+
9 Ki muli age, neʼe haʼu ia Sela te tagata Etiopea, ʼo tauʼi natou mo tana foʼi kautau, neʼe ko te toko tahi miliona tagata pea mo te ʼu saliote tau ʼe 300.+ ʼI tana tau atu ki Malesea,+ 10 neʼe haʼu ia Asa ʼo tauʼi ia ia, pea neʼe nā fakaʼatu ʼanā foʼi kautau ki te tau ʼi te Potu Fenua ʼo Tesefata, ʼi Malesea. 11 Neʼe pauʼi leva ia Asa kia Sehova tona ʼAtua,+ ʼo ina ui: “Sehova e, ʼe tatau pe kia koe pe ʼe kaugamalie ia natou ʼae ʼe ke tokoni ki ai peʼe mole honatou malohi.+ Sehova e, tomatou ʼAtua, tokoni mai, he ʼe matou falala* kia te koe,+ pea ʼe matou ʼomai ʼo tauʼi te toe hahaʼi kaugamalie ʼaeni ʼi tou huafa.+ Sehova e, ʼe ko koe tomatou ʼAtua. Ke ʼaua naʼa malo ia koe te tagata efu.”+
12 Pea neʼe foaki leva e Sehova ia te malo kia Asa pea mo te ʼu tagata ʼo Suta, ke natou malo ʼi te kau Etiopea. Pea neʼe feholaki leva ia te kau Etiopea.+ 13 Kae neʼe tuli natou e Asa pea mo tana hahaʼi ʼo kaku ki Kelali.+ Pea neʼe hoko atu pe tanatou matehi ia te kau Etiopea pea neʼe mole hao he tahi ia natou, he neʼe fakaʼauha natou e Sehova pea mo tana foʼi kautau. Hili ʼaia, neʼe toʼo leva e te ʼu tagata ʼo Suta he toe koloa lahi mai ia natou. 14 Tahi ʼae meʼa, neʼe natou ʼohofi te ʼu kolo fuli ʼi te ʼu tafaʼaki ʼo Kelali, he neʼe matataku ʼaupito te hahaʼi ʼo te ʼu kolo ʼaia ia Sehova. Pea neʼe natou toʼo te ʼu koloa ʼo te ʼu kolo fuli ʼaia, he neʼe lahi ʼaupito. 15 Neʼe natou toe ʼohofi foki mo te ʼu fale la ʼo natou ʼae neʼe ʼi ai ʼanatou faga manu, pea neʼe lahi ʼaupito te ʼu ovi pea mo te ʼu kamelo ʼae neʼe natou toʼo. Hili ʼaia, neʼe natou toe liliu leva ki Selusalemi.
15 Neʼe hifo leva te laumalie ʼo te ʼAtua kia Asalia, te foha ʼo Oteto. 2 Koia, neʼe alu ai ʼo fakafelaveʼi kia Asa pea neʼe ina ui age ki ai: “Kotou fagono mai, Asa pea mo Suta mo Pesamino katoa! ʼE nofo ia Sehova mo koutou mo kapau ʼe kotou nonofo mo ia.+ Kapau ʼe kotou kumi ia ia, ʼe ina tuku anai ke kotou maʼu ia ia,+ kae kapau ʼe kotou liʼaki ia ia, ʼe ina liʼaki anai koutou.+ 3 Neʼe fualoa te nofo mamaʼo ʼa Iselaele mai te ʼAtua moʼoni, neʼe mole he pelepitelo moʼo akoʼi ʼo natou, pea neʼe mole he lao.+ 4 Kae ʼi tanatou toe liliu mai kia Sehova, te ʼAtua ʼo Iselaele ʼi te temi ʼae neʼe natou mamahi ai, mo natou kumi ai ia ia, neʼe ina tuku leva ke natou maʼu ia ia.+ 5 ʼI te ʼu temi ʼaia, neʼe mole feala ke faifagona he tahi ʼi te fimalie, he neʼe lahi te ʼu maveuveu ʼae neʼe hoko ʼi te lotolotoiga ʼo te hahaʼi fuli ʼo te ʼu potu fenua kehekehe. 6 Neʼe maumauʼi e he puleʼaga he tahi age puleʼaga pea mo he kolo he tahi age kolo, he neʼe fakatupu e te ʼAtua he ʼu maveuveu ia natou ʼaki he ʼu faʼahiga faigataʼaʼia kehekehe.+ 7 Kae ke kotou lotomalohi pea ʼaua naʼa kotou lotovaivai,+ he ʼe fakapale anai ʼakotou gaue.”
8 ʼI te logo pe ʼa Asa ki te ʼu folafola ʼaia pea mo te lea fakapolofeta ʼa Oteto, te polofeta, neʼe lotomalohi ai pea neʼe ina pulihi te ʼu fakatata fakalialia ʼi te fenua katoa ʼo Suta+ mo Pesamino, pea mo te ʼu kolo ʼae neʼe ina maʼu ʼi te potu moʼugaʼia ʼo Efalaimi. Pea neʼe ina toe gaohi te ʼaletale ʼo Sehova ʼae neʼe tuʼu ʼi te muʼa fakamalumaluʼaga ʼo te fale ʼo Sehova.+ 9 Pea neʼe ina fakatahiʼi ia Suta mo Pesamino katoa pea mo te kau matapule ʼae neʼe fakatahi age kia natou. Neʼe ko he ʼu hahaʼi mai Efalaimi, mo Manase pea mo Simeone,+ he neʼe natou kaugamalie ʼi tanatou mavae ʼi Iselaele ʼo olo kia ia, ʼi tanatou sisio ʼae neʼe nofo ia Sehova tona ʼAtua mo ia. 10 Neʼe natou fakatahitahi ai ki Selusalemi ʼi te tolu mahina ʼo te 15 taʼu ʼo te pule ʼa Asa. 11 ʼI te ʼaho ʼaia, neʼe natou sakilifisioʼi kia Sehova he ʼu pipi ʼe 700 pea mo he ʼu ovi ʼe 7 000, neʼe natou toʼo mai te ʼu koloa ʼae neʼe natou ʼaumai. 12 Tahi ʼae meʼa, neʼe natou fai he fuakava, ʼo natou fakapapau ai ke natou kumi ia Sehova te ʼAtua ʼo ʼanatou kui ʼaki tonatou loto katoa pea mo tonatou maʼuli* katoa.+ 13 Ko ia ʼae ʼe mole ina kumi ia Sehova te ʼAtua ʼo Iselaele, ʼe tonu anai ke matehi, pe ʼe tupulaga peʼe matuʼa,* peʼe ko he tagata peʼe ko he fafine.+ 14 Neʼe natou fai te fakapapau ʼaia kia Sehova mo he leʼo lahi, mo he ʼu kalaga fakafiafia, pea mo natou pupuhi he ʼu fakatagi pupuhi kehekehe. 15 Pea neʼe fakafiafia ia Suta katoa ʼo ʼuhiga mo te fuakava ʼaia, he neʼe natou fai te fuakava ʼaia ʼaki tonatou loto katoa pea neʼe natou kumi fakamalotoloto ia ia, pea neʼe ina tuku leva ke natou maʼu ia ia.+ Pea neʼe haga foaki aipe e Sehova kia natou te tokalelei ʼi ʼonatou tafaʼaki fuli.+
16 Neʼe toe fakahifo foki e te hau ko Asa ia Maaka,+ tana kui fafine mai tona tuʼulaga fineʼaliki, he neʼe ina fai he fakatata fakalialia maʼa te tauhi ʼo te pou ʼakau taputapu.*+ Neʼe maumauʼi leva e Asa te fakatata fakalialia ʼaia, mo ina laliki pea neʼe ina tutu ʼi te Vai Tafe* ʼo Kitelone ʼae kua mamaha.+ 17 Kae neʼe mole ina pulihi te ʼu faʼahi maʼoluga+ ʼae ʼi Iselaele.+ Logo la te faʼahi ʼaia, kae neʼe katoa* pe te loto ʼo Asa ki te ʼAtua ʼi tona maʼuli katoa.*+ 18 Pea neʼe ina ʼaumai ki te fale ʼo te ʼAtua moʼoni te ʼu meʼa ʼaeni neʼe ina fakamaʼoniʼoniʼi mo tana tamai: te siliva, mo te aulo pea mo te ʼu faʼahiga meʼa kehekehe.+ 19 Neʼe mole hoko he tau ʼo kaku ki te 35 taʼu ʼo te pule ʼa Asa.+
16 ʼI te 36 taʼu ʼo te pule ʼa Asa, neʼe haʼu ai ia Paesa+ te Hau ʼo Iselaele ʼo tauʼi ia Suta, pea neʼe ina toe laga* leva ia Lama,+ ke ʼaua naʼa mavae he tahi mai te fenua ʼo Asa, te Hau ʼo Suta peʼe ke hu ki ai.+ 2 Neʼe toʼo leva e Asa he siliva mo he aulo mai te ʼu tanakiʼaga koloa ʼo te fale ʼo Sehova+ pea mo te fale hau. Pea neʼe ina ʼave kia Pene-atate, te Hau ʼo Silia,+ ʼae neʼe nofo ʼi Tamaso, pea neʼe ina ui age ki ai: 3 “Neʼe ta fai he fuakava, pea neʼe fai e taku tamai he fuakava mo tau tamai. ʼE au momoli atu he siliva mo he aulo. Kae ʼe au kole atu ke ke maumauʼi te fuakava ʼae neʼe ke fai mo Paesa, te Hau ʼo Iselaele, ke mavae ʼi toku fenua.”
4 Neʼe fakalogo ia Pene-atate ki te Hau ko Asa, ʼo ina fekauʼi ai te ʼu pule ʼo ʼana foʼi kautau ke natou olo ʼo tauʼi te ʼu kolo ʼo Iselaele. Pea neʼe natou toʼo ia Isone,+ mo Tane,+ mo Apele-maime, pea mo te ʼu tanakiʼaga meʼa fuli ʼae ʼi te ʼu kolo ʼo Nefetali.+ 5 ʼI te logo ʼa Paesa ki ai, neʼe ina tuku atu aipe tana toe laga* ia Lama pea neʼe ina taʼofi tana gaue. 6 Neʼe alu leva te Hau ko Asa pea mo Suta katoa ʼo fetuku te ʼu foʼi maka mo te ʼu lalago ʼae neʼe laga* ʼaki e Paesa ia Lama.+ Pea neʼe fakaʼaogaʼi e Asa te ʼu meʼa ʼaia moʼo toe laga* ia Kepa+ pea mo Misipa.+
7 ʼI te temi ʼaia, neʼe alu ia Hanani,+ te tagata ʼae ʼe ina iloʼi te ʼu meʼa ʼae neʼe ha, kia Asa te Hau ʼo Suta, ʼo ina ui age ki ai: “Neʼe mole tuku te kautau ʼa te hau ʼo Silia ki ʼou nima koteʼuhi neʼe mole ke falala* kia Sehova tou ʼAtua kae neʼe ke falala* ki te hau ʼo Silia.+ 8 Neʼe mole koa la kaugamalie ʼaupito age te foʼi kautau ʼa te kau Etiopea mo te kau Lipi, mo lahi ʼanatou saliote tau pea mo ʼanatou tagata heka hosi? Kae neʼe ke falala kia Sehova, koia neʼe ina tuku ai natou ki ʼou nima.+ 9 Koteʼuhi ʼe taka te ʼu mata ʼo Sehova ʼi te kele katoa+ ke ina fakaha tona malohi* kia natou ʼae ʼe katoa* ʼonatou loto kia te ia.+ ʼE mole ko he meʼa fakapotopoto ʼaena neʼe ke fai. Koia, ʼe tauʼi tuʼumaʼu pe anai koe ʼo kamata atu ʼi te ʼaho nei.”+
10 Kae neʼe ita ia Asa ki te tagata ʼae ʼe ina iloʼi te ʼu meʼa ʼae neʼe ha pea neʼe ina tuku ia ia ki te fale pilisoni, he neʼe mole ina leleiʼia te ʼu palalau ʼae neʼe ina fai. Pea ʼi te temi ʼaia, neʼe gaohi koviʼi e Asa niʼihi ʼo te hahaʼi. 11 ʼE tuʼu te hisitolia ʼo Asa, mai tona kamata ki tona fakaʼosi, ʼi te Tohi ʼo Te ʼu Hau ʼo Suta Pea Mo Iselaele.+
12 ʼI te 39 taʼu ʼo tana pule, neʼe mahaki leva ia Asa, neʼe ko ʼona vaʼe pea neʼe fakaalu ʼo kovi ʼosi. Kae ʼi tana mahaki ʼaia, neʼe mole kumi tokoni pe la kia Sehova kae ki te hahaʼi faifaitoʼo. 13 Neʼe mate leva ia Asa*+ ʼi te 41 taʼu ʼo tana pule. 14 Neʼe tuku tona sino ʼi te fale maka lahi ʼae neʼe ina keli maʼa ia ʼi te Kolo ʼo Tavite,+ ki he palepale neʼe fonu ai ko te lolo neʼe fai ʼaki te ʼu ʼakau fakamagoni pea mo he lolo magoni makehe neʼe fai ʼaki te ʼu faʼahiga meʼa fakamagoni kehekehe.+ Tahi ʼae meʼa, neʼe tutu he afi lahi maʼa ia* ʼi tona ʼavaifo.
17 Pea neʼe hau leva ia Sosafate+ tona foha ʼo fetogi ia ia, pea neʼe ʼaʼasili malohi age tana pule ki Iselaele. 2 Neʼe ina fakatuʼu he ʼu kutuga solia ʼi te ʼu kolo tau fuli ʼo Suta, pea mo he ʼu nofoʼaga solia ʼi te fenua ʼo Suta mo te ʼu kolo ʼo Efalaimi, ʼae neʼe maʼu e Asa tana tamai.+ 3 Neʼe nofo tuʼumaʼu pe ia Sehova mo Sosafate he neʼe ina faʼifaʼitakiʼi te aga ʼa tana kui ko Tavite+ pea neʼe mole ina kumi te ʼu Paale. 4 Kae neʼe ina kumi ia te ʼAtua ʼo tana tamai+ pea neʼe mulimuli ki* ʼana fakatotonu, kae neʼe mole ina faʼifaʼitakiʼi te ʼu aga ʼa Iselaele.+ 5 Neʼe fakatuʼu e Sehova ke malohi tona tuʼulaga fakahau.+ Neʼe haga foaki aipe e Suta katoa ni meʼa ʼofa kia Sosafate, pea neʼe lahi ʼaupito ʼona koloa pea mo tona kololia.+ 6 Neʼe lototoʼa ʼo mulimuli ʼi te ʼu ala ʼo Sehova, pea neʼe ina pulihi mo te ʼu faʼahi maʼoluga+ mo te ʼu pou ʼakau taputapu*+ ʼae neʼe ʼi Suta.
7 ʼI te tolu taʼu ʼo tana pule, neʼe ina pauʼi tana kau ʼaliki, ʼae ko Pene-aile, mo Apetiasi, mo Sakalia, mo Netanele pea mo Mikaia, pea neʼe ina fekauʼi natou ke olo ʼo akoʼi te hahaʼi ʼi te ʼu kolo ʼo Suta. 8 Neʼe olo mo natou he kau Levite: neʼe ko Semaea, mo Netania, mo Sepatesa, mo Asaele, mo Semilamote, mo Seonatane, mo Atonisa, mo Topisa pea mo Tope-atonisa, ʼo feia mo te ʼu pelepitelo ko Elisama pea mo Solame.+ 9 Neʼe natou kamata akoʼi te hahaʼi ʼi Suta. Neʼe natou ʼave te tohi ʼo te Lao ʼa Sehova,+ pea neʼe natou olo ʼi te ʼu kolo fuli ʼo Suta ʼo akoʼi ai te hahaʼi.
10 Pea neʼe matataku te ʼu puleʼaga fuli ʼo te ʼu fenua ʼae neʼe ʼi te ʼu tafaʼaki ʼo Suta ia Sehova, pea neʼe mole natou tauʼi ia Sosafate. 11 Pea neʼe ʼaumai e te kau Filisitini kia Sosafate ni meʼa ʼofa pea mo he falā ke natou totogi te tukuhau. Neʼe ʼaumai e te kau Alape kia ia he ʼu ovi tagata ʼe 7 700 pea mo he ʼu tao tagata ʼe 7 700 neʼe natou toʼo mai ʼanatou faga manu.
12 Neʼe ʼaʼasili age te malohi ʼo Sosafate,+ pea neʼe hoko atu pe tana laga ʼi Suta he ʼu fale ke tuʼu malohi+ mo he ʼu kolo ke tanaki ai ʼona koloa.+ 13 Neʼe ina fai he ʼu gaue lalahi ʼi te ʼu kolo ʼo Suta, pea neʼe ʼi ai tana kau solia, ko he ʼu tagata tau malolohi ʼi Selusalemi. 14 Neʼe fakatuʼutuʼu fakakutuga ia natou ʼaia, ʼo mulimuli ki ʼonatou famili: Mai Suta, ʼi te ʼu pule ʼo he toko afe, ko te ʼuluaki neʼe ko Atana te pule, pea neʼe fakatahi mo ia te ʼu tagata tau malolohi ʼe toko 300 000.+ 15 Pea neʼe fakalogo kia ia ia Sokanane te pule, pea neʼe fakatahi mo ia te ʼu tagata ʼe toko 280 000. 16 Neʼe toe fakalogo kia ia ia Amasia, te foha ʼo Sikili, pea neʼe lotolelei ke gaue maʼa Sehova, pea neʼe fakatahi mo ia te ʼu tagata tau malolohi ʼe toko 200 000. 17 Pea mai Pesamino,+ neʼe ko Eliata, ia te tagata tau malohi, pea neʼe fakatahi mo ia te ʼu tagata ʼe toko 200 000 mo ʼanatou nahau pea mo ʼanatou meʼa tali tau.+ 18 Pea neʼe fakalogo kia ia ia Seosapate, pea neʼe fakatahi mo ia te ʼu tagata ʼe toko 180 000, neʼe ʼi ai ʼanatou mahafu ki te tau. 19 Neʼe hilifaki kia natou ʼae neʼe kua fakanofo e te hau ʼi te ʼu kolo tau ʼo Suta katoa ia natou ʼaia neʼe tauhi ki te hau.+
18 Neʼe lahi ʼaupito te ʼu koloa ʼo Sosafate pea mo tona kololia,+ kae neʼe ina fakatuʼutuʼu ke ʼohoana he tahi ʼo tona famili mo he tahi ʼo te famili ʼo Akapo.+ 2 Pea hili ki ai ni taʼu, neʼe alu kia Akapo ʼi Samalia.+ Neʼe lahi ʼaupito te ʼu ovi mo te ʼu pipi ʼae neʼe sakilifisioʼi e Akapo maʼa ia pea mo te hahaʼi ʼae neʼe ʼomai mo ia. Pea neʼe ina uga* ia ia ke nā olo fakatahi ʼo tauʼi ia Lamoti-kileate.+ 3 Neʼe ui age e Akapo, te Hau ʼo Iselaele kia Sosafate, te Hau ʼo Suta: “ ʼE ke haʼu anai koa mo au ki Lamoti-kileate?” Neʼe ina tali age: “ ʼE au hage pe ko koe, pea ʼe hage pe taku hahaʼi ko tau hahaʼi pea ʼe matou tokoni atu anai ʼi te tau.”
4 Kae neʼe ui e Sosafate ki te hau ʼo Iselaele: “Fakalelei siʼou loto, kae ke ke fakafehuʼi muʼa ia Sehova ʼo ʼuhiga mo te faʼahi ʼaia.”+ 5 Neʼe fakatahiʼi ai e te hau ʼo Iselaele te kau polofeta, ʼae neʼe ko tagata ʼe toko 400, pea neʼe ina ui age kia natou: “ ʼE tonu koa ke ma olo ʼo tauʼi ia Lamoti-kileate peʼe kailoa?” Neʼe natou tali age: “Alu pea ʼe tuku anai e te ʼAtua moʼoni te kolo ki ʼou nima.”
6 Neʼe ui leva e Sosafate: “ ʼE mole ʼi ai koa la he polofeta ʼa Sehova ʼi heni?+ Ta toe fakafehuʼi te ʼAtua ʼaki ia ia.”+ 7 Pea neʼe ui e te hau ʼo Iselaele kia Sosafate: “ ʼE kei ʼi ai pe te tagata+ ʼe feala ke ta fakafehuʼi ia Sehova ʼaki ia ia. Kae ʼe au fehiʼa ia ia he ʼe mole pe he temi ʼe ina fakakikite ai he ʼu meʼa ʼe lelei ʼo ʼuhiga mo au, kae ʼe ina fakakikite tuʼumaʼu pe he ʼu meʼa ʼe kovi.+ ʼE ko Mikaia, te foha ʼo Simila.” Kae neʼe ui age e Sosafate: “ ʼE mole tonu ke palalau feia te hau.”
8 Koia, neʼe pauʼi ai e te hau ʼo Iselaele he tagata ʼe gaue ʼi tona fale hau ʼo ina ui age: “Foimo ʼaumai ia Mikaia, te foha ʼo Simila.”+ 9 Neʼe tahi heka leva te hau ʼo Iselaele pea mo Sosafate, te hau ʼo Suta ki tona hekaʼaga fakahau, mo ʼonā teu fakahau. Neʼe nā heheka ai, ʼi te hahaʼaga fulumeto ʼae ʼi te huʼaga ʼo te matapa ʼo Samalia. Pea neʼe faifakakikite te kau polofeta fuli ʼi ʼonā muʼa. 10 Pea neʼe faʼu e Setesiasi, te foha ʼo Kenaana he ʼu tala ukamea pea neʼe ina ui: “Koʼeni te folafola ʼa Sehova: ‘ ʼE ke hukiʼi* anai te kau Silia ʼaki te ʼu tala ʼaeni, ʼo kaku ki tau pulihi katoa natou.’ ” 11 Neʼe toe faifakakikite feia pe te tahi ʼu polofeta, ʼo natou ui: “Alu ki Lamoti-kileate pea ʼe ke malo anai.+ ʼE tuku anai e Sehova te kolo ki te ʼu nima ʼo te hau.”
12 Pea ko te tagata ʼave logo ʼae neʼe alu ʼo kumi mai ia Mikaia, neʼe ina ui ki ai: “ ʼE fakakikite e te kau polofeta fuli he ʼu meʼa ʼe lelei ʼo ʼuhiga mo te hau. Koia, fakalelei siʼou loto, ke ke toe fai feia mo koe,+ ke ke fakakikite he ʼu meʼa ʼe lelei.”+ 13 Kae neʼe ui age e Mikaia: “ ʼE au tala moʼoni atu ia muʼa ʼo Sehova, te ʼAtua maʼuli, ko te meʼa pe ʼae ʼe ui mai e toku ʼAtua, ʼe ko te meʼa pe ʼaia ka au fakaha.”+ 14 Pea neʼe haʼu leva kia muʼa ʼo te hau, pea neʼe fehuʼi age e te hau: “Mikaia, ʼe tonu koa ke matou olo ʼo tauʼi ia Lamoti-kileate peʼe mole au kau ai au?” Neʼe ina tali atu aipe: “Alu pea ʼe ke malo anai. ʼE tuku anai natou ki ʼokotou nima.” 15 Pea neʼe ui age e te hau ki ai: “ ʼE au kole atu ke ke fakapapauʼi mai ʼe ke fakaha mai anai te moʼoni ʼi te huafa ʼo Sehova. ʼE tonu koa ke au kole tuʼa fia atu?” 16 Koia, neʼe ui leva e Mikaia: “ ʼE au sio ki te mavetevete ʼa te kau Iselaele fuli ʼi te ʼu moʼuga, ohage ko ni ovi ʼe mole honatou tagata tauhi ovi.+ Neʼe ui e Sehova: ‘ ʼE mole honatou pule. Ke tahi liliu ki tona ʼapi ʼi te tokalelei.’ ”
17 Neʼe ui leva e te hau ʼo Iselaele kia Sosafate: “Neʼe mole au ui atu koa la ʼe mole ina fakakikite anai he ʼu meʼa ʼe lelei ʼo ʼuhiga mo au, gata pe ki he ʼu meʼa ʼe kovi?”+
18 Neʼe ui leva e Mikaia: “Koia, ke ke fagono ki te folafola ʼaeni ʼa Sehova: Neʼe au sio kia Sehova ʼe ʼafio ʼi tona hekaʼaga fakahau+ pea mo te tutuʼu ʼo te foʼi kautau katoa ʼo te ʼatu lagi+ ʼi tona toʼomataʼu mo tona toʼohema.+ 19 Neʼe ui leva e Sehova: ‘Ko ai ʼae ka ina kakaʼi anai ia Akapo, te Hau ʼo Iselaele, ke alu ki Lamoti-kileate pea ke mate ai?’ Pea neʼe tali e he ʼaselo te tahi meʼa kae ui e te tahi age ʼaselo te tahi meʼa. 20 Pea neʼe haʼu leva he ʼaselo*+ ʼo tuʼu ia muʼa ʼo Sehova pea neʼe ina ui age: ‘ ʼE au kakaʼi anai ia ia.’ Neʼe fehuʼi age e Sehova: ‘ ʼO feafeaʼi?’ 21 Neʼe ina tali age: ‘ ʼE au alu anai ʼo uga ʼana polofeta fuli ke natou tala ni loi.’ Pea neʼe ui age e te ʼAtua: ‘ ʼE ke kakaʼi anai ia ia, pea ʼe ke fakahoko anai. Alu pea ke fai te meʼa ʼaia.’ 22 Koia, neʼe fakagafua ai e Sehova ke uga e he ʼaselo tau kau polofeta ʼaeni ke natou tala ni loi,+ kae kua ʼosi fakatuʼutuʼu e Sehova ke ina fakahoko kia koe he malaʼia.”
23 Neʼe fakaovi age leva ia Setesiasi,+ te foha ʼo Kenaana kia Mikaia,+ ʼo pāki ia ia+ pea mo ui age: “ ʼE ke ui koa neʼe mavae te laumalie ʼo Sehova ia au pea neʼe alu atu ʼo palalau kia koe?”+ 24 Neʼe tali age e Mikaia: “ ʼE hoki ke mahino pe anai ʼi te ʼaho ʼae ka ke alu ai ʼo nono ʼi te koga fale taupotu.” 25 Neʼe ui leva e te hau ʼo Iselaele: “Kotou toʼo ia Mikaia ʼo ʼave kia Amone, te pule ʼo te kolo pea mo Soasi, te foha ʼo te hau. 26 Pea kotou ui kia naua: ‘Koʼeni te meʼa ʼae ʼe ui e te hau: “Kolua tuku te tagata ʼaeni ki te fale pilisoni+ pea kolua fafaga ia ia ʼaki he kiʼi moʼi pane pea mo he moʼi vai ʼo kaku ki taku toe liliu mai ʼi te tokalelei.” ’ ” 27 Kae neʼe ui e Mikaia: “Kapau ʼe ke toe liliu mai ʼi te tokalelei, pea neʼe mole palalau ia Sehova mo au.”+ Neʼe ina toe ui: “ ʼU hahaʼi, ke kotou logo fuli ki ai.”
28 Pea neʼe olo ai leva te hau ʼo Iselaele mo Sosafate, te hau ʼo Suta ki Lamoti-kileate.+ 29 Neʼe ui leva e te hau ʼo Iselaele kia Sosafate: “ ʼE au tui anai he tahi age ʼu teu ke mole iloʼi au e he tahi pea ʼe au alu anai ki te tau, kae ko koe ʼe ke tui anai ʼou teu fakahau.” Koia, neʼe tui ai e te hau ʼo Iselaele he tahi age ʼu teu pea neʼe nā olo ai leva ki te tau. 30 Pea neʼe fakatotonu age e te hau ʼo Silia ki ʼana tagata pule saliote tau: “ ʼAua naʼa kotou tauʼi ʼanatou tagata solia peʼe ko ʼonatou pule, kae ke kotou tauʼi pe te hau ʼo Iselaele.” 31 Pea ʼi te temi pe ʼae neʼe sisio ai ia te kau tagata pule saliote tau kia Sosafate, neʼe natou manatu: “ ʼE ko te hau ʼaeni ʼo Iselaele.” Neʼe natou olo ai ʼo tauʼi ia ia. Pea neʼe kalaga leva ia Sosafate ke tokoni age he tahi,+ pea neʼe tokoni ia Sehova kia ia, ʼo ina fakamamaʼo atu aipe ia natou mai ia ia. 32 ʼI te sisio leva ʼa te kau tagata pule saliote tau neʼe mole ko te hau ʼo Iselaele, neʼe natou tuku atu aipe tanatou tuli ia ia.
33 Kae neʼe hoko fanahi feia pe e he tagata he kauʼi nahau, ʼo lavea ai te hau ʼo Iselaele. Neʼe tau te kauʼi nahau ʼi te vaha ʼo he ʼu faʼahi ʼe lua ʼo tona teu tau. Pea neʼe ui e te hau ki te tagata ʼae neʼe ina taki tana saliote: “Maliu he ʼe tonu ke au mavae ʼi te tau, he ʼe kua au lavea kovi.”+ 34 Neʼe malohi ʼosi te tau ʼi te ʼaho katoa ʼaia, pea neʼe puke e ʼihi ia te hau ʼo Iselaele ke tuʼu maʼu ʼi tana saliote tau, ʼo haga ki te kau Silia ʼo kaku ki te afiafi. Pea neʼe mate leva ʼi te to ʼo te laʼa.+
19 Pea neʼe toe liliu haohaoa* ia Sosafate,+ te Hau ʼo Suta ki tona fale hau ʼi Selusalemi. 2 Neʼe alu ia Seu,+ te foha ʼo Hanani,+ te tagata ʼae ʼe ina iloʼi te ʼu meʼa ʼae neʼe ha, ʼo fakafelaveʼi ki ai. Pea neʼe ina ui age ki te Hau ko Sosafate: “Neʼe tonu koa ke ke tokoni kia ia ʼae ʼe agakovi?+ Pea ʼe tonu koa ke ke ʼofa kia natou ʼae ʼe fehihiʼa kia Sehova?+ ʼE ita ia Sehova kia koe ʼuhi ko te faʼahi ʼaia. 3 Kae neʼe sio ia te ʼAtua ki he ʼu meʼa ʼe lelei ia koe,+ he neʼe ke pulihi ʼi te fenua te ʼu pou ʼakau taputapu* pea neʼe ke fakatotonu ʼi tou loto ke ke kumi ia te ʼAtua moʼoni.”+
4 Neʼe maʼuli ia Sosafate ʼi Selusalemi, pea neʼe toe alu ki te hahaʼi, mai Pele-sepa ki te potu moʼugaʼia ʼo Efalaimi,+ ʼo fakalotomalohiʼi te hahaʼi ke natou toe liliu mai kia Sehova, te ʼAtua ʼo ʼanatou kui.+ 5 Neʼe ina toe fakanofo foki he ʼu tuʼi fakamau ʼi te fenua katoa, ʼi te ʼu kolo tau fuli ʼo Suta, ʼi te ʼu kolo takitahi.+ 6 Pea neʼe ina ui ki te ʼu tuʼi fakamau: “Kotou tokakaga ki te ʼu meʼa ʼae ʼe kotou fai, he ʼe mole kotou faifakamau maʼa he tagata, kae maʼa Sehova, pea ʼe nofo mo koutou moka kotou faifakamau.+ 7 Koia, kotou manavasiʼi kia Sehova.+ Kotou tokakaga fakalelei ki te ʼu meʼa ʼae ʼe kotou fai, koteʼuhi ʼe mole heʼe faitotonu ia Sehova totatou ʼAtua,+ ʼe mole fakapalatahi+ pea ʼe mole ina tali he meʼa ʼofa neʼe foaki fakakaka.”+
8 Neʼe toe fakanofo foki e Sosafate ʼi Selusalemi he ʼu Levite pea mo he ʼu pelepitelo pea mo he ʼu pule famili ʼo Iselaele ke natou faifakamau maʼa Sehova pea mo fakatokatoka te ʼu fihifihia ʼo te hahaʼi ʼo Selusalemi.+ 9 Pea neʼe ina fakatotonu age kia natou: “ ʼE tonu ke kotou manavasiʼi kia Sehova ʼo kotou fakahoko ʼokotou maʼua, pea mo fai ʼaki he agatonu pea mo he loto katoa.* 10 Ka olo atu ʼokotou tehina ʼae ʼe maʼuʼuli ʼi ʼonatou kolo ʼo fakaha atu he fihifihia ʼo ʼuhiga mo he ligi toto,+ peʼe ko he aluʼaga ʼo ʼuhiga mo he lao, peʼe ko he fakatotonu, peʼe ko he ʼu lekula, peʼe ko he ʼu faifakamau, ʼe tonu ke kotou fakatokaga ia natou, naʼa natou lakahala ia muʼa ʼo Sehova. ʼE ita anai kia koutou mo ʼokotou tehina mo kapau ʼe mole kotou fai te faʼahi ʼaia. Koʼena te meʼa ʼae ʼe tonu ke kotou fai, ke ʼaua naʼa kotou lakahala. 11 Koʼeni ia Amalia te pelepitelo pule ʼae ʼe ina takitaki koutou, pea ʼe tokoni atu anai ke kotou iloʼi te finegalo ʼo Sehova ʼo ʼuhiga mo te ʼu faʼahi fuli.+ Ko Sepatesa, te foha ʼo Isemaele, ʼe ko te pule ʼo te telepi ʼo Suta pea ʼe ina takitaki te gaue ʼa te hau. Pea ʼe tokoni anai te kau Levite kia koutou. Kotou lotomalohi pea mo fakahoko te gaue, pea ke nofo ia Sehova mo natou ʼae ʼe natou fai te meʼa ʼae ʼe lelei.”*+
20 Hili ʼaia, neʼe olo te kau Moape,+ mo te kau Amone+ pea mo ʼihi Amonime* ʼo tauʼi ia Sosafate. 2 Pea neʼe fakaha te logo ʼaeni kia Sosafate: “ ʼE ʼomai he toe hahaʼi kaugamalie mai te potu fenua ʼo te tai,* mai Etome+ ʼo tauʼi koe, pea ʼe natou nonofo nei ʼi Asasoni-tamale, ʼae ko Ene-keti.”+ 3 Neʼe mataku leva ia Sosafate, pea neʼe ina fakatotonu ʼi tona loto* ke ina kumi ia Sehova.+ Koia, neʼe ina tala ai ke fai he sesunio ʼi Suta katoa. 4 Neʼe fakatahitahi leva te hahaʼi ʼo Suta ke natou kole te tokoni ʼa Sehova.+ Neʼe natou ʼomai mai te ʼu kolo fuli ʼo Suta ke natou kole te takitaki ʼa Sehova.
5 Neʼe tuʼu ake leva ia Sosafate ia muʼa ʼo te hahaʼi ʼo Suta pea mo Selusalemi, ʼi te fale ʼo Sehova ʼi te muʼa malaʼe foʼou, 6 ʼo ina ui:
“Sehova e, te ʼAtua ʼo ʼamatou kui, ʼe mole ke ʼAtua koa la ʼi te lagi?+ ʼE mole ke pule koa la ki te ʼu puleʼaga fuli?+ ʼE maʼu ʼi tou nima te malohi mo te mafimafi, pea ʼe mole he tahi ʼe feala ke fakafeagai kia te koe.+ 7 Siʼomatou ʼAtua, neʼe mole ke kapu koa la te hahaʼi ʼo te fenua ʼaeni ia muʼa ʼo Iselaele, tau hahaʼi? Pea neʼe mole ke foaki age koa la ki te hakoga ʼo tou kaumeʼa ko Apalahamo+ ʼo talu ai? 8 Neʼe natou nonofo ai, pea mo laga ʼi ai he sagatualio maʼa koe ke fakamaʼuhigaʼi ai tou huafa,+ ʼo natou ui: 9 ‘Kapau ʼe hoko mai he malaʼia kia matou, peʼe ʼaki te heleta, peʼe ko he fakamau, peʼe ko he taʼi mahaki, peʼe ko he hoge, ʼe matou tutuʼu anai ʼi ʼou muʼa pea ia muʼa ʼo te fale ʼaeni (he ʼe tuʼu tou huafa ʼi te fale ʼaeni)+ pea mo kole tokoni atu ʼi tomatou mamahi. Pea ʼofa pe ke ke logo mai pea mo ke haofaki matou.’+ 10 Pea ʼi te temi nei, koʼeni te ʼu tagata ʼo Amone, mo Moape pea mo te potu moʼugaʼia ʼo Seili+ ʼe ʼomai. Ko natou ʼaia neʼe mole ke fakagafua ki Iselaele ke natou maʼu ʼonatou fenua, ʼi tanatou mavae mai te fenua ʼo Esipito. Neʼe natou maliu kehe mai ia natou pea neʼe mole natou pulihi katoa ia natou.+ 11 Kae koʼeni ʼe natou liufaki mai te kovi ʼi tanatou ʼomai ʼo kapu matou mai tou fenua ʼae neʼe ke foaki mai ko homatou tofiʼa.+ 12 Siʼomatou ʼAtua, ʼe mole ke tauteaʼi anai koa ia natou?+ Koteʼuhi ʼe mole kei ʼi ai homatou malohi ia muʼa ʼo te toe hahaʼi kaugamalie ʼaeni ʼe ʼomai ʼo tauʼi matou. Pea ʼe mole matou iloʼi te meʼa ʼae ʼe tonu ke matou fai,+ kae ʼe haga atu ʼomatou mata kia te koe.”+
13 ʼI te temi ʼaia, neʼe tutuʼu ia muʼa ʼo Sehova ia te hahaʼi fuli ʼo Suta, mo ʼonatou ʼohoana, pea mo ʼanatou fanau,* ʼo kau ai mo ʼanatou fanau liliki.
14 Pea ʼi te lotolotoiga ʼo te hahaʼi, neʼe hifo te laumalie ʼo Sehova kia Sakasiele, te foha ʼo Sakalia, te foha ʼo Penaia, te foha ʼo Seiele, te foha ʼo Matania, ia te tagata Levite mai te ʼu foha ʼo Asafe. 15 Pea neʼe ina ui: “Kotou fagono mai, ia koutou fuli ʼo Suta, mo hahaʼi ʼo Selusalemi pea mo koe, Hau ko Sosafate! ʼE ui atu e Sehova kia koutou: ‘ ʼAua naʼa kotou matataku ʼi te toe hahaʼi kaugamalie ʼaia, koteʼuhi ʼe mole ko koutou anai ʼae ka tau kae ʼe ko te ʼAtua.+ 16 Apogipogi, kotou olo kia natou. ʼE natou ʼomai anai ʼi te ala ʼo Tesipe, pea ʼe kotou maʼu anai natou ʼi te gataʼaga ʼo te vai tafe,* ʼae ʼe ovi ki te toafa ʼo Seluele. 17 ʼE mole kotou tau anai. Kotou olo, mo tutuʼu maʼu+ pea kotou sisio ki tokotou haofaki e Sehova.+ Hahaʼi ʼo Suta mo Selusalemi, ʼaua naʼa kotou matataku.+ Apogipogi, kotou olo kia natou, pea ʼe nofo anai ia Sehova mo koutou.’ ”+
18 ʼI te temi pe ʼaia, neʼe tulolo ia Sosafate ki te kele, pea neʼe punonou ia Suta katoa pea mo te hahaʼi ʼo Selusalemi ia muʼa ʼo Sehova, ʼo atolasio kia Sehova. 19 Pea neʼe tutuʼu ake te kau Levite, ʼae neʼe hifo mai te kau Keate,+ pea mo te kau Kole ʼo fakavikiviki ʼaki he leʼo lahi kia Sehova, te ʼAtua ʼo Iselaele.+
20 ʼI te ʼaho ake, neʼe natou ʼala uhuuhu, ʼo natou olo ki te toafa ʼo Tekoa.+ ʼI tanatou olo ʼaia, neʼe tuʼu leva ia Sosafate pea neʼe ina ui: “Kotou fagono mai, Suta pea mo koutou, hahaʼi ʼo Selusalemi! Kotou tui kia Sehova tokotou ʼAtua, pea ʼe kotou tutuʼu malohi* anai. Kotou tui ki ʼana polofeta,+ pea ʼe fua lelei anai kia koutou ia meʼa fuli.”
21 ʼI tana ʼosi felogoi mo te hahaʼi, neʼe ina fakanofo leva he ʼu tagata ke natou hiva+ he ʼu fakavikiviki kia Sehova. Neʼe tonu ke natou tui he ʼu teu taputapu pea mo haʼele ʼi muʼa ʼo te kau solia, ʼo ui: “Kotou fakafetaʼi kia Sehova he ʼe ina fakaha tona ʼofa agatonu ʼo talu ai.”+
22 ʼI te temi ʼae neʼe natou kamata hiva fakafiafia ai he ʼu fakavikiviki, neʼe fakatuʼutuʼu e Sehova ke ʼohofi fakapunamaʼuli te ʼu tagata ʼo Amone, mo Moape pea mo te potu moʼugaʼia ʼo Seili, ʼae neʼe ʼomai ʼo ʼohofi ia Suta, pea neʼe natou fematematehiʼaki pe ia natou.+ 23 Pea neʼe tauʼi e te kau Amone mo te kau Moape ia te hahaʼi ʼo te potu moʼugaʼia ʼo Seili,+ ʼo natou maumauʼi pea mo matematehi ia natou fuli. ʼI tanatou ʼosi tamateʼi te hahaʼi ʼo Seili, neʼe natou fematematehiʼaki pe ia natou.+
24 Kae ʼi te temi ʼae neʼe tau atu ai ia te hahaʼi ʼo Suta ki te tule leʼo ʼae ʼi te toafa,+ pea mo sisio ki te faʼahi ʼae neʼe nonofo ai te hahaʼi kaugamalie, neʼe natou sisio ai ki te leta mai ʼi te kele te ʼu sino mate.+ Neʼe mole he tahi neʼe hao. 25 Pea neʼe alu ia Sosafate mo tana hahaʼi ʼo toʼo ʼonatou koloa, pea neʼe lahi ʼaupito te ʼu koloa, mo te ʼu mutuʼi meʼa pea mo te ʼu meʼa maʼuhiga ʼae neʼe natou maʼu. Neʼe ʼaho tolu tanatou tae te ʼu koloa, koteʼuhi neʼe lahi ʼaupito. Kae neʼe mole feala ke natou toʼo te ʼu koloa fuli.+ 26 ʼI te fa ʼaho, neʼe natou fakatahitahi ʼi te Potu Fenua Laulelei ʼo Pelaka, ke natou fakavikiviki ai kia Sehova. Ko te tupuʼaga la ʼaia ʼo tanatou fakahigoaʼi te koga meʼa ʼaia ko te Potu Fenua Laulelei ʼo Pelaka,*+ pea ʼe ko tona higoa ʼaia ʼo kaku mai ki te ʼaho nei.
27 Neʼe toe liliu leva ki Selusalemi ia te ʼu tagata fuli ʼo Suta mo Selusalemi, pea neʼe takitaki natou e Sosafate. Neʼe natou fakafiafia he neʼe foaki e Sehova kia natou te malo ʼi ʼonatou fili.+ 28 Neʼe natou hu ai ki Selusalemi ʼo natou ta he ʼu alepa,+ mo he tahi age ʼu meʼa faimaholo pea mo natou pupuhi he ʼu fakatagi pupuhi,+ pea neʼe natou olo ki te fale ʼo Sehova.+ 29 Pea neʼe matataku leva te ʼu puleʼaga fuli ki te ʼAtua, ʼi tanatou logo ʼae neʼe tauʼi e Sehova te ʼu fili ʼo Iselaele.+ 30 Neʼe mole hoko ai ni maveuveu ʼi te puleʼaga ʼo Sosafate, pea neʼe haga foaki aipe e tona ʼAtua kia ia te tokalelei ʼi ʼona tafaʼaki fuli.+
31 Pea neʼe hoko atu pe te pule ʼa Sosafate ki Suta. Neʼe hau ʼi tona taʼu 35, pea neʼe pule lolotoga taʼu ʼe 25 ʼi Selusalemi. Neʼe higoa tana faʼe ko Asupea, ko te ʼofafine ʼo Silesi.+ 32 Neʼe faʼifaʼitakiʼi pe e Sosafate te ʼu aga ʼa Asa, tana tamai.+ Neʼe mole maliu kehe mai ai, pea neʼe ina fai te meʼa ʼae ʼe lelei kia mata ʼo Sehova.+ 33 Kae neʼe mole ina pulihi te ʼu faʼahi maʼoluga,+ pea neʼe heʼeki fakatotonu e te hahaʼi ʼi ʼonatou loto ke natou tauhi ki te ʼAtua ʼo ʼanatou kui.+
34 ʼE tuʼu te toe ʼo te hisitolia ʼo Sosafate, mai tona kamata ki tona fakaʼosi, ʼi te ʼu tohi ʼa Seu,+ te foha ʼo Hanani,+ ʼae ʼe kau ki te Tohi ʼo Te ʼu Hau ʼo Iselaele. 35 Hili ʼaia, neʼe fai e Sosafate, te Hau ʼo Suta he fuakava mo Akasia, te Hau ʼo Iselaele, ʼae neʼe agakovi.+ 36 Neʼe fakatahi mo ia ke nā faʼu te ʼu vaka ʼae ka olo ki Talesisi,+ pea neʼe nā faʼu te ʼu vaka ʼaia ʼi Esioni-kepele.+ 37 Kae neʼe faifakakikite ia Eliesele, te foha ʼo Totava mai Malesa ʼo ʼuhiga mo Sosafate, ʼo ina ui: “ ʼE maumauʼi anai e Sehova ʼau gaue he neʼe ke fai he fuakava mo Akasia.”+ Neʼe mou ai te ʼu vaka+ pea neʼe mole feala ke olo ki Talesisi.
21 Neʼe mate leva ia Sosafate* pea neʼe ʼavaifo ʼi te Kolo ʼo Tavite, ohage pe ko ʼana kui. Pea neʼe hau leva ia Solame, tona foha ʼo fetogi ia ia.+ 2 Ko ʼona tehina, ia te ʼu foha ʼo Sosafate, neʼe ko Asalia, mo Sehiele, mo Sakalia, mo Asalia, mo Mikaele pea mo Sefatia. Neʼe ko te ʼu foha fuli ʼaia ʼo Sosafate, te Hau ʼo Iselaele. 3 Neʼe foaki age e tanatou tamai kia natou he ʼu meʼa ʼofa siliva mo aulo ʼe lahi ʼaupito, mo he ʼu meʼa maʼuhiga, ʼo feia mo he ʼu kolo tau ʼi Suta.+ Kae neʼe ina foaki age te puleʼaga kia Solame,+ he neʼe ko tona ʼuluaki foha ʼaia.
4 ʼI te kua pule ʼa Solame ʼi te puleʼaga ʼo tana tamai, neʼe ina matehi ʼona tehina fuli+ ʼaki te heleta, ʼo feia mo ʼihi kau ʼaliki ʼo Iselaele ke ʼaʼasili ai tona malohi. 5 Neʼe hau ia Solame ʼi tona taʼu 32, pea neʼe pule lolotoga taʼu ʼe valu ʼi Selusalemi.+ 6 Neʼe ina faʼifaʼitakiʼi te ʼu aga ʼa te ʼu hau ʼo Iselaele,+ ohage pe ko natou ʼae ʼo te famili ʼo Akapo koteʼuhi neʼe ʼohoana mo te ʼofafine ʼo Akapo.+ Pea neʼe ina haga fai pe te meʼa ʼae ʼe kovi kia mata ʼo Sehova. 7 Kae neʼe mole fia pulihi e Sehova te fale ʼo Tavite ʼuhi ko te fuakava ʼae neʼe ina fai mo Tavite.+ Koteʼuhi neʼe ina fakapapauʼi age ʼe ina foaki anai he malama* ki ai pea mo ʼona foha ʼo talu ai.+
8 ʼI te temi ʼo te hau ko Solame, neʼe agatuʼu ia Etome ki Suta+ pea neʼe natou fakanofo honatou hau.+ 9 Neʼe alu ai ia Solame, mo tana kau pule pea mo ʼana saliote tau fuli kia natou. Pea neʼe tuʼu ake ʼi te poʼuli ʼo alu ʼo tauʼi te kau Etome ʼae neʼe natou ʼa takai ia ia mo te kau tagata pule saliote tau, pea neʼe malo ai. 10 Kae neʼe hoko atu pe te agatuʼu ʼa te kau Etome ki Suta ʼo kaku mai ki te ʼaho nei. ʼI te temi ʼaia, neʼe toe agatuʼu foki mo te hahaʼi ʼo Lipina+ kia Solame, he neʼe ina liʼaki ia Sehova, te ʼAtua ʼo ʼana kui.+ 11 Neʼe ina toe fai foki mo he ʼu faʼahi maʼoluga+ ʼi te ʼu moʼuga ʼo Suta, moʼo uga te hahaʼi ʼo Selusalemi ke natou heʼe agatonu ki te ʼAtua.* Pea neʼe ina fakaheʼi ia Suta.
12 Ki muli age, neʼe fakatoʼo age ki ai he tohi mai te polofeta ko Elia.+ Neʼe tuʼu ai te logo ʼaeni: “Koʼeni te folafola ʼa Sehova te ʼAtua ʼo Tavite tau kui: ‘Neʼe mole ke faʼifaʼitakiʼi te ʼu aga ʼa Sosafate+ tau tamai pea mo te ʼu aga ʼa Asa,+ te Hau ʼo Suta. 13 Kae neʼe ke faʼifaʼitakiʼi te ʼu aga ʼa te ʼu hau ʼo Iselaele+ pea neʼe ke uga ia Suta mo te hahaʼi ʼo Selusalemi ke natou heʼe agatonu ki te ʼAtua,*+ ohage ko te famili ʼo Akapo.+ Pea neʼe ke toe matehi foki mo ʼou tehina totonu,+ te ʼu foha ʼo tau tamai, ʼae neʼe lelei age tanatou aga ia koe. 14 Koia, ʼe tauteaʼi lahi anai e Sehova tau hahaʼi, mo ʼou foha, mo ʼou ʼohoana pea ʼe ina pulihi anai ʼou koloa fuli. 15 ʼE lahi te ʼu mahaki ʼe ke tau anai mo ia, ʼo kau ki ai te mahaki ʼo te gākau, pea ʼe lelesili kovi anai ʼi te ʼaho fuli ʼo kaku ki te haʼu ki tuʼa ʼo tou gākau ʼuhi ko te mahaki ʼaia.’ ”
16 Neʼe uga leva e Sehova+ ia te kau Filisitini+ pea mo te kau Alape,+ ʼae neʼe nonofo ovi ki te kau Etiopea, ke natou tauʼi ia Solame. 17 Neʼe natou olo ai ʼo tauʼi ia Suta, mo ʼohofi ia te fenua pea neʼe natou toʼo te ʼu koloa fuli ʼae neʼe natou maʼu ʼi te fale hau,+ ʼo feia mo te ʼu foha pea mo te ʼu ʼohoana ʼo te hau. Neʼe kei toe pe tona foha ʼe tahi, neʼe ko Seoase,*+ tona foha muli. 18 Pea hili te ʼu meʼa fuli ʼaia, neʼe fakato e Sehova kia ia he mahaki ʼo te gākau, pea neʼe mole feala ke faitoʼo.+ 19 Ki muli age, hili ki ai taʼu ʼe lua, neʼe haʼu tona gākau ki tuʼa ʼuhi ko te mahaki ʼaia. Neʼe kovi ʼosi tona mamahi ʼuhi ko tona mahaki pea neʼe mate ai leva. Neʼe mole tutu e tana hahaʼi he afi* maʼa ia, ohage ko tona fai ki ʼana kui.+ 20 Neʼe hau ʼi tona taʼu 32, pea neʼe pule lolotoga taʼu ʼe valu ʼi Selusalemi. Neʼe mole lotomamahi he tahi ʼi tana mate. Neʼe ʼavaifo ia ia ʼi te Kolo ʼo Tavite,+ kae neʼe mole tuku tona sino ʼi te tanuma ʼo te ʼu hau.+
22 Neʼe fakanofo leva e te hahaʼi ʼo Selusalemi ia tona foha muli ko Akasia ke hau ʼo fetogi ia ia, he neʼe matehi e te kutuga solia ʼae neʼe ʼomai mo te kau Alape ki te fenua ʼo Suta ʼona taʼokete fuli.+ Koia, neʼe kamata hau ai ia Akasia, te foha ʼo Solame ki Suta.+ 2 Neʼe hau ia Akasia ʼi tona taʼu 22, pea neʼe pule lolotoga he taʼu katoa ʼi Selusalemi. Neʼe higoa tana faʼe ko Atelia,+ te mokopuna* ʼo Omeli.+
3 Neʼe toe faʼifaʼitakiʼi e Akasia te ʼu aga ʼo te famili ʼo Akapo+ he neʼe foaki e tana faʼe kia ia ni tokoni ke ina fai ni aga ʼe kovi. 4 Pea neʼe ina haga fai pe te meʼa ʼae ʼe kovi kia mata ʼo Sehova, ohage pe ko te famili ʼo Akapo, koteʼuhi neʼe natou liliu ko ʼana tagata faitokoni hili te mate ʼo tana tamai, ʼo tupu ai tona matehi. 5 Neʼe fakalogo ki ʼanatou tokoni pea neʼe alu mo Solame, te foha ʼo Akapo, te Hau ʼo Iselaele ʼo tauʼi ia te Hau ʼo Silia ko Hasaele+ ʼi Lamoti-kileate,+ ʼae neʼe lavea ai ia Solame ʼi te kau fainahau. 6 Neʼe toe liliu ai ki Siseleele+ ʼo faitoʼo ʼona lavea he neʼe lavea ʼi Lama ʼi tana tauʼi ia Hasaele, te Hau ʼo Silia.+
Neʼe alu ia Akasia,* te hau ʼo Suta, te foha ʼo Solame,+ ki Siseleele ʼo fakasiosio ia Solame,+ te foha ʼo Akapo he neʼe lavea.*+ 7 Neʼe fakatuʼutuʼu e te ʼAtua ke matehi ia Akasia ʼi te temi ʼae neʼe alu ai ʼo fakasiosio ia Solame. ʼI tana tau atu ki ai, neʼe toe alu ia mo Solame ʼo fakafelaveʼi kia Seu+ te mokopuna* ʼo Nimesi, ʼae neʼe filifili* e Sehova ke ina pulihi te famili ʼo Akapo.+ 8 ʼI te kamata fakahoko e Seu te tautea ki te famili ʼo Akapo, neʼe sio leva ki te kau ʼaliki ʼo Suta pea mo te ʼu foha ʼo te ʼu tehina ʼo Akasia, ia te ʼu minisi ʼa Akasia. Pea neʼe ina matehi leva ia natou.+ 9 Neʼe ina kumi leva ia Akasia, pea neʼe puke ia ia e te ʼu tagata faifekau ʼa Seu ʼi te koga meʼa ʼae neʼe nono ai ʼi Samalia. Pea neʼe natou ʼaumai ai ia ia kia Seu pea neʼe natou matehi ai. Neʼe natou ʼavaifo leva ia ia+ he neʼe natou ui: “ ʼE ko te mokopuna ʼaeni ʼo Sosafate, ʼae neʼe ina kumi ia Sehova mo tona loto katoa.”+ Pea neʼe mole ʼi ai he tahi ʼi te famili ʼo Akasia neʼe feala ke hau ʼi te puleʼaga.
10 ʼI te sio leva ʼa Atelia,+ te faʼe ʼa Akasia ki te kua mate ʼo tana tama, neʼe alu ai ʼo pulihi katoa te hologa hau ʼo Suta.+ 11 Kae neʼe toʼo fakafufu leva e Sokapeta te ʼofafine ʼo te hau ko Seoasi+ te foha ʼo Akasia mai te ʼu foha ʼo te hau ʼae neʼe tonu ke matehi. Pea neʼe ina tuku ia ia mo tana fafine taupau ki he koga fale taupotu. Ko Sokapeta neʼe ko te ʼofafine ʼo te Hau ko Solame.+ Neʼe ko te ʼohoana ʼaia ʼo Seosata,+ te pelepitelo pea neʼe ko he tokolua ʼo Akasia. Neʼe ina lava fakanono ia Seoasi, ʼo mole feala ai kia Atelia hana matehi ia ia.+ 12 Neʼe fakanono ia Seoasi ʼi te fale ʼo te ʼAtua moʼoni lolotoga taʼu ʼe ono, kae lolotoga pule ia Atelia ʼi te fenua.
23 ʼI te fitu taʼu, neʼe lototoʼa leva ia Seosata ʼo fai he fuakava mo te kau pule ʼo he toko teau:+ neʼe ko Asalia te foha ʼo Seloame, mo Isemaele te foha ʼo Sokanane, mo Asalia te foha ʼo Opete, mo Maasesa te foha ʼo Atasa pea mo Elisapate te foha ʼo Sikili. 2 Neʼe natou olo leva ʼi Suta katoa pea neʼe natou fakatahiʼi te kau Levite+ mai te ʼu kolo fuli ʼo Suta, ʼo feia mo te ʼu pule famili ʼo Iselaele. ʼI tanatou tau atu ki Selusalemi, 3 neʼe fai e te hahaʼi katoa he fuakava+ mo te hau ʼi te fale ʼo te ʼAtua moʼoni. Pea hili ʼaia, neʼe ui e Seosata kia natou:
“Koʼeni, ʼe hau anai te foha ʼo te hau ohage pe ko tona fakapapau e Sehova ʼo ʼuhiga mo te ʼu foha ʼo Tavite.+ 4 Koʼeni te meʼa ʼae ʼe tonu ke kotou fai: Kotou fai ni kutuga ʼe tolu ʼi te kau pelepitelo mo te kau Levite ʼae ʼe gaue anai+ ʼi te ʼaho ʼo te Sapato. ʼE leʼo matapa anai te tahi kutuga,+ 5 kae tuʼu te tahi kutuga ʼi te fale hau,+ pea ʼe tuʼu te tahi kutuga ʼi te Matapa ʼo Te Fakatafito pea ko te hahaʼi katoa ʼe natou tutuʼu anai ʼi te ʼu malaʼe ʼo te fale ʼo Sehova.+ 6 Ke ʼaua naʼa hu he tahi ki te fale ʼo Sehova, gata pe ki te kau pelepitelo pea mo te kau Levite ʼae ʼe gaue.+ ʼE feala anai hanatou hu ki loto he ʼe ko he kutuga maʼoniʼoni natou pea ʼe fakahoko anai e te hahaʼi fuli ʼonatou maʼua ʼae kia Sehova. 7 ʼE tonu anai ke ʼa takai e te kau Levite te hau, ʼo natou tahi toʼo ʼana mahafu. Ko he tahi pe ʼe hu ki te fale ʼe matehi anai. Kotou nonofo mo te hau ʼi te ʼu faʼahi fuli pe ʼae ʼe alu anai ki ai.”
8 Neʼe mulimuli fakalelei te kau Levite mo Suta katoa ki te ʼu meʼa ʼae neʼe fakatotonu age e te pelepitelo ko Seosata. Koia, neʼe natou tahi toʼo ai ʼana tagata ʼae neʼe tonu ke gaue ʼi te ʼaho ʼo te Sapato, ʼo feia mo natou ʼae neʼe mole gaue ʼi te ʼaho ʼo te Sapato,+ he neʼe mole fakagafua e te pelepitelo ko Seosata ki te ʼu kalasi ke tuku tanatou gaue.+ 9 Neʼe foaki age e te pelepitelo ko Seosata ki te kau pule ʼo he toko teau+ te ʼu tao pea mo te ʼu meʼa tali tau liliki* mo te ʼu meʼa tali tau takafuafua ʼa te Hau ko Tavite,+ ʼae neʼe tuku ʼi te fale ʼo te ʼAtua moʼoni.+ 10 Pea neʼe ina fakatuʼu leva te hahaʼi fuli mai te faʼahi mataʼu ʼo te fale ki te faʼahi hema, ʼo ovi ki te ʼaletale pea mo te fale. Neʼe natou tahi toʼo tana mahafu pea neʼe natou ʼa takai ai te hau. 11 Neʼe natou ʼaumai leva te foha ʼo te hau+ ki tuʼa pea neʼe natou hili ki tona ʼulu te pale pea mo te Lao.*+ Neʼe natou fakanofo hau ai ia ia pea neʼe tākai leva e Seosata mo ʼona foha ia ia ʼaki te lolo. Pea neʼe natou ui: “Ke fua manuʼia te ʼafio ʼo totatou hau!”+
12 ʼI te logo ʼa Atelia ki te feleleʼi ʼa te hahaʼi pea mo tanatou fakavikiviki ki te hau, neʼe alu atu aipe ki te hahaʼi ʼi te fale ʼo Sehova.+ 13 Neʼe sio ai ki te tuʼu ʼa te hau ʼo ovi ki te pou,* ʼae ʼi te huʼaga. Neʼe fakatahi te kau ʼaliki+ mo te kau puhi fakatagi pupuhi mo te hau, pea neʼe fakafiafia te hahaʼi fuli ʼo te fenua+ pea mo pupuhi te ʼu fakatagi pupuhi. Neʼe taki e te kau hiva mo ʼanatou meʼa faimaholo te ʼu hiva fakavikiviki. Neʼe hae leva e Atelia ʼona kofu pea mo kalaga: “Ko he kaka! Ko he kaka!” 14 Kae neʼe fekauʼi e te pelepitelo ko Seosata ia te kau pule ʼo he toko teau, ʼae neʼe natou takitaki te foʼi kautau ke olo ki tuʼa pea neʼe ina ui age kia natou: “Kotou ʼave ki tuʼa, pea ko he tahi pe ʼe mulimuli ia ia, kotou matehi ʼaki te heleta!” Koteʼuhi neʼe ui e te pelepitelo: “ ʼAua naʼa kotou matehi ia ia ʼi te fale ʼo Sehova.” 15 Neʼe natou puke ai, pea ʼi tana aʼu ki te huʼaga ʼo te Matapa ʼo Te ʼu Hosi ʼo te fale hau, neʼe natou foimo matehi ia ia ʼi ai.
16 Neʼe fai leva e Seosata he fuakava neʼe kau ai ia ia, mo te hahaʼi katoa pea mo te hau, ke natou faʼufaʼu tuʼumaʼu pe te hahaʼi ʼa Sehova.+ 17 Hili ʼaia, neʼe olo te hahaʼi fuli ʼo maumauʼi te fale lotu ʼo Paale+ pea neʼe natou laliki ʼona ʼaletale mo ʼana fakatata.+ Pea neʼe natou matehi ia Matani, te pelepitelo ʼa Paale+ ia muʼa ʼo te ʼu ʼaletale. 18 Pea ko te tokaga ki te fale ʼo Sehova, neʼe tuku leva e Seosata kia nima ʼo te kau pelepitelo mo te kau Levite. Ko natou ʼaia neʼe fakatuʼutuʼu fakakutuga e Tavite ke natou tokakaga ki te fale ʼo Sehova pea ke natou momoli te ʼu holokoseta ʼa Sehova+ ʼo mulimuli ki te meʼa ʼae ʼe tohi ʼi te Lao ʼa Moisese,+ ʼaki ni fakafiafia mo ni hiva, ohage ko tona fakatotonu e Tavite. 19 Neʼe toe fakatuʼu e Seosata he ʼu tagata leʼo matapa+ ʼi te ʼu matapa ʼo te fale ʼo Sehova ke mole hu ai ki loto he tahi ʼe heʼe maʼa. 20 Neʼe ina toʼo leva te kau pule ʼo he toko teau,+ mo te kau ʼaliki, mo te kau pule ʼo te hahaʼi, pea mo te hahaʼi fuli ʼo te fenua ke natou olo fakatahi mo te hau mai te fale ʼo Sehova ki te fale hau. Neʼe natou fakalaka ʼi te matapa maʼoluga pea neʼe natou fakanofo leva te hau ki tona hekaʼaga fakahau.+ 21 Neʼe fakafiafia ai te hahaʼi fuli ʼo te fenua pea neʼe fimalie leva te kolo he neʼe matehi ia Atelia.
24 Neʼe hau ia Seoasi ʼi tona taʼu fitu,+ pea neʼe pule lolotoga taʼu ʼe 40 ʼi Selusalemi. Neʼe higoa tana faʼe ko Tesipesa, mai Pele-sepa.+ 2 Neʼe haga fai pe e Seoasi te meʼa ʼae ʼe lelei kia mata ʼo Sehova ʼi te temi ʼae neʼe kei maʼuli ai te pelepitelo ko Seosata.+ 3 Neʼe filifili e Seosata he ʼu ʼohoana ʼe lua ʼo Seoasi pea neʼe ina maʼu ʼona foha pea mo ʼona ʼofafine.
4 Hili ʼaia, neʼe loto e Seoasi ke toe faʼu te fale ʼo Sehova.+ 5 Neʼe ina fakatahiʼi ai te kau pelepitelo mo te kau Levite, pea neʼe ina ui age kia natou: “Kotou olo ki te ʼu kolo ʼo Suta pea kotou tanaki he falā ʼi Iselaele katoa ke toe faʼu te fale ʼo tokotou ʼAtua,+ ʼi te taʼu fuli. Pea ke kotou fai fakavilivili te faʼahi ʼaia.” Kae neʼe mole fai fakavilivili e te kau Levite te faʼahi ʼaia.+ 6 Koia, neʼe pauʼi ai e te hau ia Seosata, te pule pea neʼe ina ui age ki ai:+ “He koʼe neʼe mole ke fakamaʼua ki te kau Levite ke natou ʼaumai mai Suta mo Selusalemi te tukuhau taputapu? ʼE ko te tukuhau ʼae neʼe fakatotonu e Moisese,+ te tagata faifekau ʼa Sehova. ʼEi, ʼe ko te tukuhau taputapu ʼaia ʼa te hahaʼi ʼo Iselaele ki te fale la ʼo te Fakamoʼoni.+ 7 Koteʼuhi ko te ʼu tama ʼa Atelia,+ ia te fafine agakovi ʼaia, neʼe natou ulufi te fale ʼo te ʼAtua moʼoni,+ pea neʼe natou fakaʼaogaʼi te ʼu meʼa taputapu fuli ʼo te fale ʼo Sehova maʼa te tauhi ki te ʼu Paale.” 8 Pea neʼe fakatotonu e te hau ke fai he puha+ pea ke tuku ʼi tuʼa ʼi te matapa ʼo te fale ʼo Sehova.+ 9 Hili ʼaia, neʼe logologo leva ʼi Suta mo Selusalemi katoa ke ʼaumai kia Sehova te tukuhau taputapu+ ʼae neʼe fakamaʼua e Moisese, te tagata faifekau ʼa te ʼAtua moʼoni, ki Iselaele ʼi te toafa. 10 Neʼe fiafia te kau ʼaliki fuli pea mo te hahaʼi fuli.+ Pea neʼe natou ʼaumai ni meʼa ʼofa ʼo ʼai ki te puha ʼo kaku ki tona kua fonu.*
11 Ka sisio te kau Levite kua lahi te falā ʼae ʼi te puha, neʼe natou toʼo ʼo ʼave ki te hau. Pea neʼe haʼu te sikalaipe ʼa te hau pea mo te tagata fakafofoga ʼa te pelepitelo pule ʼo huaʼi te puha+ pea neʼe nā toe olo ʼo tuku ki tona tuʼuʼaga. Neʼe nā fai feia ʼi te ʼaho fuli pea neʼe lahi ʼaupito te falā ʼae neʼe nā tanaki. 12 Pea neʼe foaki leva e te hau pea mo Seosata te falā ʼaia kia natou ʼae ʼe natou takitaki te gaue ʼo te fale ʼo Sehova, pea neʼe natou totogi ni hahaʼi ta maka pea mo he kau tufuga ke natou toe faʼu te fale ʼo Sehova.+ Neʼe natou toe totogi foki he kau gaue ʼe popoto ʼi te gaueʼi ʼo te ukamea mo te kapa ke natou toe faʼu te fale ʼo Sehova. 13 Pea ko natou ʼae neʼe natou takitaki te gaue ʼaia, neʼe natou fakatotonu ke kamata te gaue pea neʼe lakalaka ki muʼa te toe faʼu ʼo te fale ʼi tanatou takitaki te gaue ʼaia. Neʼe natou toe laga te fale ʼo te ʼAtua moʼoni ke tuʼu malohi, ohage pe ko tona faʼu ʼi te kamata. 14 ʼI te ʼosi pe ʼo tanatou gaue, neʼe natou ʼaumai te toe ʼo te falā ki te hau pea mo Seosata. Neʼe fakaʼaogaʼi te falā ʼaia moʼo fai ʼaki te ʼu meʼa kehekehe ʼo te fale ʼo Sehova, ʼo kau ai te ʼu meʼa ʼae neʼe fakaʼaogaʼi ki te gaue mo te ʼu sakilifisio, mo te ʼu ipu pea mo te ʼu meʼa ʼae neʼe fai ʼaki te aulo mo te siliva.+ Pea neʼe momoli tuʼumaʼu ni holokoseta+ ʼi te fale ʼo Sehova ʼi te temi ʼae neʼe kei maʼuli ai ia Seosata.
15 Neʼe mate leva ia Seosata ʼi tona temi matuʼa, pea neʼe fiafia ʼi te loaloaga ʼo tona maʼuli. Neʼe mate ʼi tona taʼu 130. 16 Neʼe ʼavaifo leva ia ia ʼi te Kolo ʼo Tavite ohage ko te ʼu hau,+ he neʼe ina fai ni meʼa lelei ki te hahaʼi ʼo Iselaele,+ mo te ʼAtua moʼoni pea mo Tona fale.
17 Hili te mate ʼa Seosata, neʼe ʼomai leva te kau ʼaliki ʼo Suta ʼo tulolo ia muʼa ʼo te hau, pea neʼe fakalogo leva te hau ki te meʼa ʼae neʼe natou ui age. 18 Neʼe natou liʼaki te fale ʼo Sehova, te ʼAtua ʼo ʼanatou kui pea mo kamata tauhi ki te ʼu pou ʼakau taputapu* mo te ʼu taula ʼatua. Koia, neʼe to ai te hauhau ʼo te ʼAtua ki Suta mo Selusalemi ʼuhi ko ʼanatou agahala. 19 Neʼe ina fekauʼi leva ni polofeta ke olo kia natou ke natou toe liliu mai kia Sehova. Pea neʼe fakatokaga natou e te kau polofeta kae neʼe mole natou fia fakalogo.+
20 Neʼe hifo te laumalie ʼo te ʼAtua kia Sakalia, te foha ʼo Seosata,+ te pelepitelo pea neʼe tuʼu ʼi he potu maʼoluga ʼo ui ki te hahaʼi: “Koʼeni te meʼa ʼae ʼe ui e te ʼAtua moʼoni: ‘He koʼe ʼe kotou maumauʼi te ʼu fakatotonu ʼa Sehova? ʼE mole fua lelei anai kia koutou! Koteʼuhi neʼe kotou liʼaki ia Sehova pea ʼe ina toe liʼaki anai koutou.’ ”+ 21 Kae neʼe natou fonofono ke natou fakafeagai kia ia+ pea neʼe natou tuki makaʼi ia ia, ʼo mulimuli pe ki te fakatotonu ʼa te hau. Neʼe hoko te faʼahi ʼaia ʼi te malaʼe ʼo te fale ʼo Sehova.+ 22 Koia, neʼe mole kei manatuʼi e te Hau ko Seoasi te ʼofa agatonu ʼae neʼe fakaha age e Seosata, tana tamai.* Neʼe ina matehi tona foha, ʼae neʼe ina ui ʼi tana kua vave mate: “Ke vakaʼi e Sehova te aluʼaga ʼaia pea ke ina tauteaʼi koe ʼuhi ko tau aga.”+
23 ʼI te kamata ʼo te taʼu, neʼe tauʼi e te kautau Silia ia Seoasi, pea neʼe natou ulufi ia Suta mo Selusalemi.+ Neʼe natou matehi te kau ʼaliki fuli+ ʼo te fenua pea mo ʼave ʼonatou koloa fuli ki te hau ʼo Tamaso. 24 Logo la neʼe tokosiʼi te kau solia Silia ʼae neʼe natou ulufi te fenua, kae neʼe tokoni ia Sehova kia natou ke natou malo ʼi he kautau ʼe kaugamalie ʼaupito,+ koteʼuhi neʼe liʼaki e te hahaʼi ia Sehova, te ʼAtua ʼo ʼanatou kui. Koia ʼae neʼe natou* fakahoko ai te tautea ʼo ʼuhiga mo Seoasi. 25 ʼI tanatou olo leva, (he neʼe natou tuku ia ia kae neʼe lavea kovi*) neʼe fonofono ʼana tagata faifekau ke natou fakafeagai kia ia koteʼuhi neʼe ina fai he ligi toto ʼi tana matehi te ʼu foha* ʼo Seosata,+ te pelepitelo. Neʼe natou matehi ai ia ia ʼi tona palepale.+ Neʼe mate leva pea neʼe ʼavaifo ʼi te Kolo ʼo Tavite,+ kae neʼe mole tuku tona sino ki te tanuma ʼo te ʼu hau.+
26 Koʼeni ia naua ʼae neʼe fonofono+ ke fakafeagai kia ia: ko Sapati te tama ʼa Simeate, te fafine Amone pea mo Seosapate te tama ʼa Simelite, te fafine Moape. 27 ʼE tuʼu te hisitolia ʼo ʼona foha, mo te ʼu tuʼuga tautea ʼae neʼe tala ʼo ʼuhiga mo ia+ pea mo te toe faʼu* ʼo te fale ʼo te ʼAtua moʼoni,+ ʼi te ʼu tohi* ʼae ʼe maʼu ʼi te Tohi ʼo Te ʼu Hau. Pea neʼe hau leva tona foha ko Amatesia ʼo fetogi ia ia.
25 Neʼe hau ia Amatesia ʼi tona taʼu 25 pea neʼe pule lolotoga taʼu ʼe 29 ʼi Selusalemi. Neʼe higoa tana faʼe ko Soatana, te fafine mai Selusalemi.+ 2 Neʼe haga fai pe e Amatesia te meʼa ʼae ʼe lelei kia mata ʼo Sehova, kae neʼe mole ina fai ʼaki he loto katoa. 3 ʼI te temi pe ʼae neʼe malohi ai te puleʼaga ʼi tana takitaki, neʼe ina matehi ʼana hahaʼi faifekau ʼae neʼe natou matehi tana tamai, te hau.+ 4 Kae neʼe mole ina matehi ʼonatou foha koteʼuhi neʼe mulimuli ki te meʼa ʼae ʼe tohi ʼi te Lao, ʼi te tohi ʼa Moisese, ʼae neʼe fakatotonu e Sehova: “ ʼE mole tonu ke mamate te ʼu tamai ʼuhi ko ʼonatou foha, pea ʼe mole tonu ke mamate te ʼu foha ʼuhi ko ʼanatou tamai. Kae ʼe mate pe anai te tagata takitokotahi ʼo mulimuli ki tana agahala.”+
5 Neʼe fakatahiʼi leva e Amatesia ia te hahaʼi ʼo Suta pea neʼe ina vaevae fakakutuga ia natou ʼo mulimuli ki te ʼu famili, mo te kau pule ʼo he toko afe, mo te kau pule ʼo he toko teau. Neʼe ina fai feia ʼi Suta mo Pesamino katoa.+ Pea neʼe ina tohi leva ia natou ʼae neʼe taʼu 20 ʼo fai ki ʼoluga.+ Neʼe ina maʼu ai ia te toko 300 000 tagata neʼe popoto ʼi* te tau ke natou faʼufaʼu he foʼi kautau, pea neʼe natou faiva ʼi te fakaʼaogaʼi ʼo te tao pea mo te meʼa tali tau lahi. 6 Pea tahi ʼae meʼa, neʼe ina totogi ʼi Iselaele ni tagata tau malolohi ʼe toko 100 000 kia taleta* siliva ʼe 100. 7 Kae neʼe haʼu te tagata ʼa te ʼAtua moʼoni ki ai, ʼo ui age: “Siʼoku hau, ʼaua naʼa alu te kautau ʼa Iselaele mo koe he ʼe mole nofo ia Sehova mo Iselaele,+ peʼe ko he tahi ʼi te kau Efalaimi. 8 Kae alu pe koe pea ke ke lototoʼa ʼi te tau. ʼE maʼu e te ʼAtua moʼoni te malohi ke tokoni atu kia koe.+ Kae kapau ʼe natou olo mo koe, ʼe feala anai ke ina tuku ʼou fili ke malo ia koe.” 9 Neʼe ui e Amatesia ki te tagata ʼa te ʼAtua moʼoni: “Kae ʼe feafeaʼi ki te ʼu taleta ʼe 100 ʼae neʼe au foaki ki te kau solia ʼo Iselaele?” Neʼe tali age e te tagata ʼa te ʼAtua moʼoni: “ ʼE lava foaki atu e Sehova ʼo lahi age ʼi te meʼa ʼaia.”+ 10 Koia, neʼe fekauʼi leva e Amatesia te kau solia ʼo Efalaimi ʼae neʼe ʼomai ki ai ke natou toe liliu ki ʼonatou ʼapi. Kae neʼe kovi ʼosi tonatou iita ki te hahaʼi ʼo Suta, koia neʼe natou toe liliu ai ki ʼonatou ʼapi mo he toe ita lahi.
11 Pea neʼe lotomalohi ia Amatesia pea neʼe ina taki ai tana kau solia ki te Potu Fenua ʼo Te Masima.+ Neʼe ina matehi te toko 10 000 tagata ʼo Seili.+ 12 Neʼe puke e te ʼu tagata ʼo Suta te toko 10 000 tagata. Neʼe natou ʼave natou ki he mata mato pea mo li natou ki lalo, ʼo lailai ai ʼonatou sino. 13 Kae ko te kau solia ʼae neʼe fakaliliu e Amatesia ke mole natou olo mo ia ki te tau,+ neʼe natou ʼohofi te ʼu kolo ʼo Suta, mai Samalia+ ki Pete-oloni.+ Neʼe natou matehi ai te toko 3 000 tagata pea neʼe lahi te ʼu koloa ʼae neʼe natou ʼave.
14 Kae ʼi te toe liliu mai ʼa Amatesia ʼi tana ʼosi matehi te kau Etome, neʼe ina ʼaumai leva te ʼu ʼatua ʼo te kau Seili pea neʼe liliu ai ko ʼona ʼatua.+ Neʼe kamata tulolo ai ʼi ʼonatou muʼa pea neʼe ina tutu ke kohu ni sakilifisio maʼa natou. 15 Neʼe lahi ʼosi te ita ʼo Sehova kia Amatesia, pea neʼe ina fekauʼi he polofeta ke alu ki ai ʼo ui age: “He koʼe ʼe ke atolasio ki te ʼu ʼatua ʼo te hahaʼi ʼaia kae neʼe mole natou haofaki tanatou hahaʼi mai ʼou nima?”+ 16 ʼI tana palalau ki ai, neʼe ui age e te hau: “Neʼe matou fakanofo koa koe ke ke liliu ko he tagata faitokoni ʼa te hau?+ Tuku ʼosi,+ naʼa matou matehi koe!” Kae, ʼi muʼa ʼo te alu ʼa te polofeta, neʼe ina ui age: “ ʼE au iloʼi kua fakatotonu e te ʼAtua ke matehi koe, he neʼe ke fai te faʼahi ʼaia pea neʼe mole ke fakalogo ki taku tokoni.”+
17 Hili tana felogoi mo ʼana tagata faitokoni, neʼe fekauʼi leva e Amatesia, te Hau ʼo Suta he tahi ke alu ʼo ui kia Seoasi, te foha ʼo Seoase, foha ʼo Seu, te hau ʼo Iselaele: “Haʼu ke ta tau.”+ 18 Neʼe fekauʼi leva e Seoasi, te Hau ʼo Iselaele he tahi ke alu ʼo fakaha kia Amatesia, te Hau ʼo Suta: “Neʼe poapoaki e te vao talatala ʼo Lipane ki te fuʼu sete ʼo Lipane: ‘Foaki mai tou ʼofafine ke ʼohoana mo toku foha.’ Kae neʼe fakalaka he manu fekai ʼo Lipane ʼo ina malamalaki te vao talatala. 19 Neʼe ke ui: ‘Koʼeni, neʼe au* matehi te kau Etome.’+ Koia, neʼe ke liliu ai ʼo fiameʼalahi pea neʼe ke loto ke fakakololiaʼi koe. Kae ke ke nofo ʼi tou fale hau. He koʼe koa ʼe ke kumi anai tou malaʼia kae ʼe ke to anai, ʼo feia mo Suta?”
20 Kae neʼe mole fakalogo ia Amatesia,+ he neʼe ko te finegalo ʼaia ʼo te ʼAtua moʼoni. Neʼe ina loto ke tuku ia Amatesia mo tana hahaʼi ki te ʼu nima ʼo te ʼu fili+ he neʼe natou atolasio ki te ʼu ʼatua ʼo te kau Etome.+ 21 Koia, neʼe alu ai ia Seoasi, te Hau ʼo Iselaele ʼo tau mo Amatesia, te Hau ʼo Suta ʼi Pete-semesi,+ ʼae ʼi Suta. 22 Neʼe malo leva ia Iselaele ʼi Suta, pea neʼe tahi feholaki te kau solia ʼo Suta ki tona ʼapi.* 23 Pea ʼi Pete-semesi neʼe puke ai e Seoasi, te Hau ʼo Iselaele ia Amatesia, te Hau ʼo Suta, te foha ʼo Seoasi, foha ʼo Seoase.* Neʼe ina ʼaumai ai ia ia ki Selusalemi, pea neʼe ina maumauʼi te kaupa ʼo Selusalemi, mai te Matapa ʼo Efalaimi+ ʼo kaku ki te Matapa ʼo Te Tuliki,+ neʼe fasiga nima 400.* 24 Neʼe ina toʼo te aulo mo te siliva fuli pea mo te ʼu meʼa kehekehe fuli ʼae neʼe tuku ʼi te fale ʼo te ʼAtua moʼoni pea neʼe tokaga ki ai ia Opeto-etome. Neʼe ina toe toʼo mo te ʼu meʼa ʼae neʼe ʼi te ʼu tanakiʼaga koloa ʼo te fale hau,+ mo ina toe ʼave popula mo niʼihi. Pea neʼe toe liliu leva ki Samalia.
25 Neʼe maʼuli leva ia Amatesia,+ te foha ʼo Seoasi, te hau ʼo Suta lolotoga taʼu ʼe 15 ʼi te ʼosi mate ʼa Seoasi,+ te foha ʼo Seoase, te hau ʼo Iselaele.+ 26 Pea ʼe tuʼu te toe ʼo te hisitolia ʼo Amatesia, mai tona kamata ki tona fakaʼosi, ʼi te Tohi ʼo Te ʼu Hau ʼo Suta Pea Mo Iselaele. 27 ʼI te lituʼa ʼa Amatesia kia Sehova, neʼe fonofono ai niʼihi+ ʼi Selusalemi ke natou fakafeagai kia ia. Neʼe hola ai ki Lakisi, kae neʼe natou fekauʼi he ʼu tagata ke natou tuli ia ia, pea neʼe natou matehi leva ia ia ʼi Lakisi. 28 Pea neʼe natou toe ʼaumai tona sino ʼi he saliote neʼe toho e ni hosi, pea neʼe ʼavaifo ia ia ʼi te kolo ʼo Suta, ohage ko ʼana kui.
26 Pea neʼe toʼo leva e te hahaʼi fuli ʼo Suta ia Osiasi,+ ʼae neʼe taʼu 16, ʼo fakanofo hau moʼo fetogi tana tamai ko Amatesia.+ 2 Neʼe ina toe laga te kolo ko Elati*+ ʼo toe maʼu ai e te puleʼaga ʼo Suta te kolo ʼaia, ʼi te ʼosi mate ʼa te hau.*+ 3 Neʼe hau ia Osiasi+ ʼi tona taʼu 16, pea neʼe pule lolotoga taʼu ʼe 52 ʼi Selusalemi. Neʼe higoa tana faʼe ko Sekolia, ko te fafine mai Selusalemi.+ 4 Neʼe haga fai pe e Osiasi te meʼa ʼae ʼe lelei kia mata ʼo Sehova, ohage pe ko tana tamai ko Amatesia.+ 5 Neʼe ina haga kumi ia te ʼAtua ʼi te temi ʼo Sakalia, ʼae neʼe ina akoʼi age kia ia te manavasiʼi ki te ʼAtua moʼoni. ʼI te temi ʼae neʼe ina kumi ai ia Sehova, neʼe tapuakiʼi ia ia e te ʼAtua moʼoni.+
6 Neʼe alu leva ʼo tauʼi te kau Filisitini+ pea neʼe ina fai he ava ʼi te kaupa ʼo Kiete,+ mo te kaupa ʼo Sapene+ pea mo te kaupa ʼo Asoti+ pea neʼe hu leva ki te ʼu kolo ʼaia. Pea neʼe ina laga he tahi ʼu kolo neʼe ovi ki Asoti pea mo he ʼu kolo ʼi te fenua ʼo te kau Filisitini. 7 Neʼe tokoni ia te ʼAtua moʼoni kia ia ke malo ʼi te kau Filisitini, mo te kau Alape+ ʼae neʼe nonofo ʼi Kulepaale, pea mo te kau Meunime. 8 Neʼe kamata totogi leva e te kau Amone+ te tukuhau kia Osiasi. Pea neʼe kaku tona logologona ki Esipito, he neʼe liliu ʼo malohi ʼaupito. 9 Pea tahi ʼae meʼa, neʼe laga e Osiasi he ʼu tule+ ke tuʼu malohi ʼi Selusalemi ʼo ovi ki te Matapa ʼo Te Tuliki,+ mo te Matapa ʼo Te Potu Fenua Lauveliveli+ pea mo te Pou Lalago. 10 Neʼe ina toe laga foki mo he ʼu tule+ ʼi te toafa pea mo keli* ni tuʼuga vai keli (he neʼe lahi tana faga manu). Neʼe ina toe fai feia ʼi te Sefela pea mo te potu fenua laulelei. Pea neʼe ʼi ai ʼana hahaʼi gaue kele pea mo ʼana hahaʼi gaue vite ʼi te ʼu moʼuga pea mo Kalemelo, he neʼe ina leleiʼia te gaue kele.
11 Pea tahi ʼae meʼa, neʼe maʼu leva e Osiasi tana foʼi solia neʼe ʼi ai ʼanatou mahafu ki te tau. Neʼe fakatuʼutuʼu fakakutuga natou ʼi tanatou olo ʼae ki te tau. Neʼe lau e Seiele, te sikalaipe+ pea mo Maasesa tonatou kaugamalie pea mo tohi ʼonatou higoa.+ Neʼe fakalogo te ʼu tagata ʼaia ʼe toko lua kia Hanania, ko he tahi ʼo te kau ʼaliki ʼa te hau. 12 Ko te kaugamalie ʼo te ʼu pule famili ʼae neʼe pule ki te ʼu tagata tau malolohi ʼaia neʼe ko te toko 2 600. 13 Neʼe natou puleʼi he kau tagata solia ʼe toko 307 500 neʼe kua tokalelei ki te tau. Neʼe ko he foʼi kautau malohi neʼe tokoni ki te hau ke ina tauʼi ʼona fili.+ 14 Neʼe foaki e Osiasi ki te foʼi kautau katoa he ʼu meʼa tali tau, mo he ʼu tao,+ mo he ʼu puloga tau, mo he ʼu kofu tau,+ mo he ʼu nahau, pea mo he ʼu maka ki te ʼu makamaka.+ 15 Pea neʼe ina faʼu ʼi Selusalemi he ʼu masini tau neʼe fakakaukauʼi e he kau tagata popoto. Neʼe natou fakatuʼu te ʼu masini ʼaia ʼi te ʼu tule+ pea mo te ʼu tuliki ʼo te ʼu kaupa, ke fana ʼaki te ʼu kauʼi nahau pea mo te ʼu foʼi maka lalahi. Neʼe liliu ai ʼo iloa, he neʼe lahi ʼaupito te tokoni ʼae neʼe foaki age kia ia pea neʼe liliu ʼo malohi.
16 Kae ʼi tana kua malohi, neʼe liliu ai leva ʼo fiameʼalahi, ʼo iku ai ki tona malaʼia, pea neʼe heʼe agatonu kia Sehova tona ʼAtua, he neʼe hu ki te fale lotu ʼo Sehova ʼo tutu te iseso ʼi te ʼaletale ʼo te iseso.+ 17 ʼI te moʼi temi pe ʼaia, neʼe muliʼi mai ia ia e te pelepitelo ko Asalia pea mo te tahi ʼu pelepitelo lototoʼa ʼa Sehova ʼe toko 80. 18 Neʼe natou fakafeagai ki te Hau ko Osiasi ʼo natou ui age ki ai: “Osiasi, ʼe mole tonu ke ke tutu te iseso maʼa Sehova!+ ʼE gata pe ki te kau pelepitelo ke natou tutu te iseso, koteʼuhi ʼe ko natou te hologa ʼo Alone,+ ʼae neʼe fakamaʼoniʼoniʼi. Mavae ʼi te sagatualio, he neʼe ke heʼe agatonu ʼi tau fai te meʼa ʼaeni pea ʼe mole ke maʼu anai he kololia mai ia Sehova ʼAtua.”
19 Kae neʼe ita leva ia Osiasi, pea neʼe ina toʼo ʼi tona nima he tutuʼaga iseso ke ina tutu te iseso.+ Pea ʼi tana ita ʼaia ki te kau pelepitelo, neʼe ha leva ʼi tona laʼe te kilia+ ʼi tana tuʼu ia muʼa ʼo te kau pelepitelo, ʼo ovi ki te ʼaletale ʼo te iseso, ʼi te fale ʼo Sehova. 20 ʼI te sio ʼa Asalia, te pelepitelo pule pea mo te kau pelepitelo fuli kia ia, neʼe natou tokagaʼi te ha ʼo te kilia ʼi tona laʼe! Neʼe natou foimo ʼave ai ia ia ki tuʼa, pea neʼe toe lele fakavilivili foki mo ia ki tuʼa, he neʼe tauteaʼi ia ia e Sehova.
21 Neʼe kilia ia te Hau ko Osiasi ʼo kaku ki te ʼaho ʼae neʼe mate ai. Neʼe nofo ʼi he tahi age fale he neʼe kilia,+ pea neʼe mole kei fakagafua age ke alu ki te fale ʼo Sehova. Ko tona foha ko Sotame ʼae neʼe tokaga leva ki te fale hau, ʼo ina fakamauʼi te hahaʼi ʼo te fenua.+
22 Pea neʼe fakamatala e te polofeta ko Esaia,+ te foha ʼo Amote, ia te toe ʼo te hisitolia ʼo Osiasi, mai tona kamata ki tona fakaʼosi. 23 Neʼe mate leva ia Osiasi,* pea neʼe tanu ovi ʼi te ʼu fale maka ʼo ʼana kui, ʼi te tanuma ʼo te ʼu hau, he neʼe ui: “ ʼE ko he tagata kilia.” Pea neʼe hau leva ia Sotame,+ tona foha ʼo fetogi ia ia.
27 Neʼe hau ia Sotame+ ʼi tona taʼu 25, pea neʼe pule lolotoga taʼu ʼe 16 ʼi Selusalemi. Neʼe higoa tana faʼe ko Selusa, ko te ʼofafine ʼo Satoke.+ 2 Neʼe haga fai pe e Sotame te meʼa ʼae ʼe lelei kia mata ʼo Sehova, ohage pe ko tana tamai ko Osiasi,+ kae neʼe mole hu ki te fale lotu ʼo Sehova.+ Kae neʼe kei hoko atu pe te agakovi ʼa te hahaʼi. 3 Neʼe ina laga te matapa maʼoluga ʼo te fale ʼo Sehova,+ pea neʼe lahi te ʼu meʼa neʼe ina laga ʼi te kaupa ʼo Ofeli.+ 4 Neʼe ina toe laga foki mo he ʼu kolo+ ʼi te potu moʼugaʼia ʼo Suta,+ pea mo he ʼu fale ke tuʼu malohi+ mo he ʼu tule+ ʼi te ʼu vao matuʼa. 5 Neʼe ina tauʼi te hau ʼo te kau Amone+ pea neʼe malo leva ia natou. Koia, ʼi te taʼu ʼaia, neʼe foaki age e te kau Amone kia ia he ʼu taleta* siliva ʼe 100, mo fua kole* fulumeto ʼe 10 000, pea mo fua kole olose ʼe 10 000. Neʼe toe foaki age foki e te kau Amone te ʼu meʼa ʼaia kia ia ʼi te lua pea mo te tolu taʼu.+ 6 Neʼe ʼaʼasili malohi ai ia Sotame, he neʼe ina fakatotonu ʼi tona loto ke haʼele ʼi te ʼu ala ʼo Sehova tona ʼAtua.
7 Pea ʼe tuʼu te toe ʼo te hisitolia ʼo Sotame, ʼana tau fuli pea mo ʼana gaue, ʼi te Tohi ʼo Te ʼu Hau ʼo Iselaele Pea Mo Suta.+ 8 Neʼe hau ʼi tona taʼu 25, pea neʼe pule lolotoga taʼu ʼe 16 ʼi Selusalemi.+ 9 Neʼe mate leva ia Sotame* pea neʼe ʼavaifo ʼi te Kolo ʼo Tavite.+ Pea neʼe hau tona foha ko Akase, ʼo fetogi ia ia.+
28 Neʼe hau ia Akase+ ʼi tona taʼu 20, pea neʼe pule lolotoga taʼu ʼe 16 ʼi Selusalemi. Neʼe mole ina fai te meʼa ʼae ʼe lelei kia mata ʼo Sehova, ʼo mole hage ko Tavite, tana kui.+ 2 Kae neʼe ina faʼifaʼitakiʼi te aga ʼa te ʼu hau ʼo Iselaele,+ pea neʼe ina fai he ʼu fakatata ukamea*+ ʼo te ʼu Paale. 3 Tahi ʼae meʼa, neʼe ina tutu ke kohu ni sakilifisio ʼi te potu fenua lauveliveli ʼae ko Te Foha ʼo Hinome,* pea neʼe ina tutu ʼona foha ohage ko he ʼu sakilifisio,+ ʼo mulimuli ki te ʼu aga fakalialia ʼa te ʼu puleʼaga+ ʼae neʼe kapu e Sehova ia muʼa ʼo te kau Iselaele. 4 Neʼe ina toe fai foki mo ni sakilifisio pea mo tutu ke kohu ni sakilifisio ʼi te ʼu faʼahi maʼoluga,+ mo te ʼu moʼuga liliki pea mo te ʼu lalo fuʼu ʼakau fuli ʼae ʼe maʼuli lelei.+
5 Koia, neʼe tuku ai ia ia e Sehova tona ʼAtua ki te ʼu nima ʼo te hau ʼo Silia.+ Neʼe malo te kau Silia ia ia pea neʼe natou ʼave popula he tokolahi ki Tamaso.+ Neʼe toe tuku foki e te ʼAtua ia ia ki te ʼu nima ʼo te hau ʼo Iselaele, ʼae neʼe ina fakahoko kia ia mo tana hahaʼi he toe mātea lahi. 6 Neʼe matehi e Pekase,+ te foha ʼo Lemalia ia te toko 120 000 ʼu tagata ʼi Suta, ʼi te ʼaho pe ʼe tahi, he neʼe liʼaki e Suta ia Sehova te ʼAtua ʼo ʼanatou kui.+ Ko te ʼu tagata ʼaia neʼe matehi, neʼe ko te ʼu tagata toʼa fuli. 7 Pea neʼe matehi e Sikili, ʼae ko te tagata tau Efalaimi, ia Maasesa, te foha ʼo te hau, pea mo Aselikame, ʼae neʼe tokaga ki te fale hau,* pea mo Elekana, ʼae neʼe tuʼulaga lua ʼo hoa atu ki te hau. 8 Pea tahi ʼae meʼa, neʼe ʼave popula e te kau Iselaele ia te toko 200 000 hahaʼi fafine pea mo tamaliki tagata mo fafine mai Suta. Neʼe toe lahi foki mo te ʼu koloa ʼae neʼe natou toʼo ʼo ʼave ki Samalia.+
9 Kae neʼe nofo ʼi ai he polofeta ʼa Sehova neʼe higoa ko Oteto. Neʼe alu ʼo tuʼu ia muʼa ʼo te foʼi kautau ʼae neʼe toe liliu ki Samalia pea neʼe ina ui age kia natou: “Neʼe ita ia Sehova te ʼAtua ʼo ʼakotou kui ki Suta, koia neʼe ina tuku ai ia natou ki ʼokotou nima.+ Kae neʼe kotou tamateʼi natou mo he toe ita lahi, ʼo iloʼi ai e te ʼAtua. 10 Pea ʼi te lakaga ʼaeni, ʼe kotou loto ke liliu te hahaʼi ʼo Suta pea mo Selusalemi ko ʼakotou tagata mo fafine faifekau.+ Kae ʼe mole koa la kotou toe lakahala mo koutou ia muʼa ʼo Sehova tokotou ʼAtua? 11 Koia, kotou fakalogo mai pea kotou fakaliliu te hahaʼi popula ʼaeni neʼe kotou toʼo mai ʼokotou tehina, he ʼe kua kovi ʼosi te ita ʼo Sehova kia koutou.”
12 Koia, ko ʼihi ʼo te ʼu pule ʼo te kau Efalaimi, mo Asalia, te foha ʼo Sokanane, mo Pelekia, te foha ʼo Mesilemote, mo Seikiasi, te foha ʼo Salume, pea mo Amasa, te foha ʼo Atalai, neʼe natou fakafeagai kia natou ʼaia neʼe toe liliu mai te tau, 13 pea mo natou ui age kia natou: “ ʼAua naʼa kotou ʼaumai te hahaʼi popula ʼaia ki heni, koteʼuhi ʼe matou lakahala anai ia muʼa ʼo Sehova. ʼE toe lahi age anai ʼamatou agahala pea mo ʼamatou lakahala ʼuhi ko te meʼa ʼae ʼe kotou fia fai, he ʼe kua lahi tamatou lakahala pea kua kovi ʼosi te ita ʼo te ʼAtua ki Iselaele.” 14 Koia, neʼe tuku ai e te kau solia te hahaʼi popula pea mo te ʼu koloa+ ki te kau ʼaliki pea mo te hahaʼi katoa. 15 Neʼe tutuʼu ake ai te ʼu tagata ʼae neʼe hinoʼi age ʼonatou higoa ʼo olo ʼo tokakaga ki te hahaʼi popula, pea neʼe natou foaki kia natou fuli ʼae neʼe telefua he ʼu mutuʼi meʼa neʼe toʼo mai te ʼu koloa ʼaia. Koia, neʼe natou foaki age kia natou he ʼu mutuʼi meʼa, mo he ʼu sulie, mo he meʼa kai, mo he meʼa inu pea mo he lolo ki ʼonatou sino. Pea neʼe natou fakaheka te kau vaivavai ki he ʼu asino, ʼo natou ʼave leva natou ki ʼonatou tehina ʼae ʼi Seliko, te kolo ʼo te ʼu fuʼu palema. Hili ʼaia, neʼe natou toe liliu leva ki Samalia.
16 ʼI te temi ʼaia, neʼe kole tokoni ia te Hau ko Akase ki te ʼu hau ʼo Asilia.+ 17 Neʼe toe ʼohofi pea mo tauʼi e te kau Etome ia Suta pea neʼe natou ʼave popula ni hahaʼi. 18 Neʼe toe tauʼi foki e te kau Filisitini+ ia te ʼu kolo ʼo te Sefela+ pea mo te Nekepe, ʼae ʼi Suta pea neʼe natou toʼo ia Pete-semesi,+ mo Asaloni,+ mo Keteloti, mo Soko mo te ʼu kolo ʼae ʼi ʼona tafaʼaki, mo Timenea+ mo te ʼu kolo ʼae ʼi ʼona tafaʼaki, pea mo Kimeso mo te ʼu kolo ʼae ʼi ʼona tafaʼaki. Pea neʼe natou nonofo leva ʼi ai. 19 Neʼe fakamalaloʼi e Sehova ia Suta ʼuhi ko Akase, te Hau ʼo Iselaele, he neʼe ina tuku ke fai fakavalevale e Suta he ʼu aga ʼe mole lelei, ʼo lahi ai te ʼu agahala ʼae neʼe natou fai kia Sehova.
20 Ki muli age, neʼe haʼu ia Tilekate-pilenesele+ te Hau ʼo Asilia ʼo tauʼi ia ia, pea neʼe ina fakamamahiʼi ia ia+ kae neʼe mole tokoni ki ai. 21 Koteʼuhi neʼe toʼo e Akase te ʼu koloa ʼae neʼe ʼi te fale ʼo Sehova, mo te fale hau+ pea mo te ʼu fale ʼo te kau ʼaliki ʼo ina foaki ohage ko hana meʼa ʼofa ki te hau ʼo Asilia. Kae neʼe mole fua lelei kia ia. 22 Pea lolotoga te temi ʼae neʼe fakamamahiʼi ai, neʼe lahi age te ʼu agahala ʼae neʼe fai e te Hau ko Akase kia Sehova. 23 Neʼe ina fai ni sakilifisio ki te ʼu ʼatua ʼo Tamaso+ ʼae neʼe malo ia ia,+ pea neʼe ina ui: “ ʼE tokoni te ʼu ʼatua ʼo te ʼu hau ʼo Silia kia natou, koia ʼe au fai anai ni sakilifisio kia natou ke natou toe tokoni mai foki kia au.”+ Kae neʼe iku ai ki tona malaʼia ʼo feia mo Iselaele katoa. 24 Tahi ʼae meʼa, neʼe tanaki e Akase te ʼu meʼa kehekehe ʼo te fale ʼo te ʼAtua moʼoni. Neʼe ina maumauʼi leva te ʼu meʼa kehekehe ʼo te fale ʼo te ʼAtua moʼoni,+ mo pupunu te ʼu matapa ʼo te fale ʼo Sehova,+ pea mo ina faʼu maʼa ia he ʼu ʼaletale ʼi te ʼu magaʼi ala fuli ʼo Selusalemi. 25 Pea neʼe ina fakatuʼu he ʼu faʼahi maʼoluga ʼi te ʼu kolo fuli ʼo Suta ke tutu ke kohu ai ni sakilifisio ki te tahi ʼu ʼatua.+ Neʼe ina fakatupu ai te hauhau ʼo Sehova, te ʼAtua ʼo ʼana kui.
26 Pea ʼe tuʼu te toe ʼo tona hisitolia, te ʼu meʼa fuli ʼae neʼe ina fai, mai tona kamata ki tona fakaʼosi, ʼi te Tohi ʼo Te ʼu Hau ʼo Suta Pea Mo Iselaele.+ 27 Neʼe mate leva ia Akase,* pea neʼe ʼavaifo ʼi te kolo, ʼi Selusalemi, he neʼe mole tuku tona sino ʼi te tanuma ʼo te ʼu hau ʼo Iselaele.+ Pea neʼe hau leva tona foha ko Esekiasi ʼo fetogi ia ia.
29 Neʼe hau ia Esekiasi+ ʼi tona taʼu 25, pea neʼe pule lolotoga taʼu ʼe 29 ʼi Selusalemi. Neʼe higoa tana faʼe ko Apisa, ko te ʼofafine ʼo Sakalia.+ 2 Neʼe haga fai pe e Esekiasi te meʼa ʼae ʼe lelei kia mata ʼo Sehova,+ ohage pe ko tana kui ko Tavite.+ 3 ʼI te ʼuluaki mahina ʼo te ʼuluaki taʼu ʼo tana pule, neʼe ina avahi te ʼu matapa ʼo te fale ʼo Sehova pea neʼe ina toe faʼu.+ 4 Neʼe ina ʼaumai leva te kau pelepitelo mo te kau Levite pea neʼe ina fakatahiʼi natou ʼi te malaʼe ʼae ʼi te potu esite. 5 Pea neʼe ina ui age kia natou: “Kau Levite, kotou fakalogo mai. ʼI te temi nei, kotou fakamaʼa ia koutou+ pea mo fakamaʼoniʼoniʼi te fale ʼo Sehova, te ʼAtua ʼo ʼakotou kui, pea kotou toʼo te meʼa ʼae ʼe heʼe maʼa mai te fale taputapu.+ 6 Koteʼuhi neʼe heʼe agatonu ʼatatou tamai, pea neʼe natou fai te ʼu meʼa ʼae ʼe kovi kia mata ʼo Sehova totatou ʼAtua.+ Neʼe natou liʼaki ia ia, pea neʼe mole natou fakaʼapaʼapa ki te tapenakulo ʼo Sehova pea neʼe natou lituʼa kia te ia.+ 7 Neʼe natou toe pupunu foki mo te ʼu matapa ʼo te fakamalumaluʼaga+ pea mo matehi te ʼu malama.+ Neʼe tuku tanatou tutu te iseso+ pea mo momoli ni holokoseta+ ki te ʼAtua ʼo Iselaele, ʼi te fale taputapu. 8 Koia, neʼe ita ai ia Sehova ki Suta mo Selusalemi,+ ʼo ina fakahoko ai he malaʼia kia natou, pea ko natou ʼae ʼe sisio ki ai, ʼe natou fakalialia anai, mo punamaʼuli pea mo manukiʼi natou,* ohage pe ko takotou sio mata ki ai.+ 9 Ko te tupuʼaga la ʼaia ʼo te matehi ʼo ʼatatou kui ʼaki te heleta+ pea mo te ʼave popula ʼo ʼotatou foha, mo ʼotatou ʼofafine pea mo ʼotatou ʼohoana.+ 10 ʼI te temi nei, ʼe au loto ke fai he fuakava mo Sehova te ʼAtua ʼo Iselaele,+ ke maliu kehe ai tona hauhau mai ia tatou. 11 Siʼoku ʼu foha, ʼe mole ko te temi ʼaeni ke kotou fakaʼaoʼaoganoa* ai, he neʼe filifili koutou e Sehova ke kotou tutuʼu ʼi ʼona muʼa, ke kotou tauhi kia te ia ohage ko ʼana tagata faifekau,+ pea ke kotou tutu ke kohu ʼana sakilifisio.”+
12 Neʼe tutuʼu ake ai te kau Levite: neʼe ko Makate, te foha ʼo Amasai pea mo Soele, te foha ʼo Asalia mai te kau Keate,+ ʼi te kau Melali,+ neʼe ko Kisi, te foha ʼo Apeti pea mo Asalia, te foha ʼo Seleleele, ʼi te kau Kelesoni,+ neʼe ko Soake, te foha ʼo Sima pea mo Eteni, te foha ʼo Soake, 13 ʼi te ʼu foha ʼo Elisafani, neʼe ko Simeli pea mo Seuele, ʼi te ʼu foha ʼo Asafe,+ neʼe ko Sakalia pea mo Matania, 14 ʼi te ʼu foha ʼo Emani,+ neʼe ko Sehiele pea mo Simei, pea ʼi te ʼu foha ʼo Setutune,+ neʼe ko Semaea pea mo Usiele. 15 Neʼe natou fakatahitahiʼi leva ʼonatou tehina, mo natou fakamaʼa ia natou totonu ʼo feia mo ʼonatou tehina, pea neʼe natou olo ai leva ʼo fakamaʼa te fale ʼo Sehova, ohage ko tona fakatotonu e te hau, ʼo mulimuli ki te folafola ʼa Sehova.+ 16 Neʼe feulufi te kau pelepitelo ki te fale ʼo Sehova ʼo fakamaʼa pea neʼe natou ʼaumai ki tuʼa te ʼu meʼa heʼe maʼa fuli ʼae neʼe natou maʼu ʼi te fale lotu ʼo Sehova ʼo ʼave ki te malaʼe+ ʼo te fale ʼo Sehova. Pea neʼe toʼo leva e te kau Levite te ʼu meʼa ʼaia ʼo ʼave ki te Vai Tafe* ʼo Kitelone ʼae kua mamaha, ʼi te tuʼa kolo.+ 17 Koia, neʼe natou kamata fakamaʼoniʼoniʼi leva te fale lotu ʼi te ʼuluaki ʼaho ʼo te ʼuluaki mahina, pea ʼi te valu ʼaho ʼo te mahina neʼe kaku tanatou fakamaʼoniʼoniʼi ʼaia ki te fakamalumaluʼaga ʼo Sehova.+ Neʼe natou fakamaʼoniʼoniʼi te fale ʼo Sehova lolotoga ʼaho ʼe valu, pea neʼe natou fakaʼosi leva ʼi te 16 ʼaho ʼo te ʼuluaki mahina.
18 Hili ʼaia, neʼe natou olo leva ki te Hau ko Esekiasi ʼo ui age ki ai: “Kua matou fakamaʼa te fale katoa ʼo Sehova, mo te ʼaletale ʼo te holokoseta+ pea mo ʼona meʼa kehekehe fuli,+ pea mo te laupapa ʼo te ʼu pane ʼae ʼe hili fakatuʼuga*+ mo ʼona meʼa kehekehe fuli. 19 Pea neʼe kua ʼosi matou teuteuʼi pea mo fakamaʼoniʼoniʼi+ te ʼu meʼa kehekehe fuli ʼae neʼe toʼo e te Hau heʼe agatonu ko Akase+ mai te fale lotu lolotoga tana pule, pea kua tuku nei ʼi te muʼa ʼaletale ʼo Sehova.”
20 Pea neʼe ʼala uhuuhu ia te Hau ko Esekiasi ʼo fakatahiʼi te kau ʼaliki ʼo te kolo, pea neʼe natou olo ai leva ki te fale ʼo Sehova. 21 Neʼe natou ʼave he ʼu vitulo ʼe fitu, mo he ʼu ovi tagata ʼe fitu, mo he ʼu akeno tagata ʼe fitu, pea mo he ʼu tao tagata ʼe fitu ke fai ʼaki he molaga ʼo te agahala ʼo te puleʼaga, mo te sagatualio pea mo Suta.+ Neʼe ina ui leva ki te kau pelepitelo, ia te hologa ʼo Alone, ke natou momoli ʼi te ʼaletale ʼo Sehova. 22 Neʼe natou matehi te ʼu vitulo,+ pea neʼe toʼo e te ʼu pelepitelo te toto ʼo afuhi ʼi te ʼaletale.+ Pea neʼe natou matehi te ʼu ovi tagata pea mo afuhi te toto ʼi te ʼaletale, pea neʼe natou matehi te ʼu akeno tagata pea mo afuhi te toto ʼi te ʼaletale. 23 Neʼe natou ʼaumai leva te ʼu tao tagata ʼo te molaga ʼo te agahala kia muʼa ʼo te hau pea mo te hahaʼi, pea neʼe natou hili ʼonatou nima ki te ʼu manu ʼaia. 24 Neʼe ui e te hau ʼe tonu ke momoli te holokoseta pea mo te molaga ʼo te agahala maʼa Iselaele katoa. Koia neʼe matehi ai e te kau pelepitelo te ʼu tao tagata ʼaia pea neʼe natou momoli ai te molaga ʼo te agahala mo te toto ʼi te ʼaletale. Pea neʼe feala ke fakamolemole ai te ʼu agahala ʼa Iselaele katoa ʼaki te toto ʼaia.
25 Lolotoga te temi ʼaia, neʼe ina fakatuʼutuʼu te kau Levite ʼi te fale ʼo Sehova mo ʼanatou simepale, mo ʼanatou alepa+ pea mo ʼanatou tahi age ʼu meʼa faimaholo. Neʼe ina fai ʼo mulimuli ki te fakatotonu ʼa Tavite,+ mo Kate,+ te tagata ʼae ʼe ina fakaha ki te hau te ʼu meʼa ʼae neʼe ha pea mo Natane,+ te polofeta. Neʼe ko te fakatotonu ʼaia neʼe fai e Sehova ʼaki ʼana polofeta. 26 Koia, neʼe tutuʼu ai te kau Levite mo te ʼu meʼa faimaholo ʼa Tavite, ʼo feia mo te kau pelepitelo mo ʼanatou fakatagi pupuhi.+
27 Pea neʼe fakatotonu leva e Esekiasi ke momoli te holokoseta ʼi te ʼaletale.+ ʼI te temi ʼae neʼe momoli ai te holokoseta, neʼe toʼo ake ai te hiva ʼo Sehova pea mo toe pupuhi foki te ʼu fakatagi pupuhi, ʼo mulimuli ki te ʼu meʼa faimaholo ʼa Tavite, te Hau ʼo Iselaele. 28 Pea neʼe tulolo te hahaʼi katoa lolotoga te fai ʼo te hiva ʼaia pea mo te pupuhi ʼo te ʼu fakatagi pupuhi. Neʼe hoko atu pe te fai ʼo te faʼahi ʼaia ʼo kaku ki te kua ʼosi momoli ʼo te holokoseta. 29 Pea ʼi tanatou ʼosi momoli pe ia te holokoseta, neʼe punou mo tulolo ia te hau pea mo natou fuli ʼae neʼe fakatahi mo ia. 30 Neʼe ui e te Hau ko Esekiasi pea mo te kau ʼaliki ki te kau Levite ke natou fakavikiviki kia Sehova, ʼo natou fakaʼaogaʼi te ʼu folafola ʼa Tavite+ pea mo Asafe,+ te tagata ʼae ʼe ina iloʼi te ʼu meʼa ʼae neʼe ha. Neʼe natou fai ai he ʼu fakavikiviki mo he toe fiafia lahi, pea neʼe natou punonou mo tulolo.
31 Neʼe ui leva e Esekiasi: “ ʼE kua tuku keheʼi koutou* maʼa Sehova. Koia kotou ʼomai ki te fale ʼo Sehova mo te ʼu sakilifisio pea mo te ʼu molaga fakafetaʼi.” Neʼe kamata ʼaumai ai e te hahaʼi te ʼu sakilifisio pea mo te ʼu molaga fakafetaʼi, pea ko natou fuli ʼae neʼe lotolelei ki ai, neʼe natou ʼaumai te ʼu holokoseta.+ 32 Ko te lahi ʼo te ʼu manu ʼae neʼe ʼaumai e te hahaʼi ki te holokoseta, neʼe ko vitulo ʼe 70, mo ovi tagata ʼe 100 pea mo akeno tagata ʼe 200, pea ko te ʼu manu fuli ʼaia neʼe momoli ohage ko he holokoseta maʼa Sehova.+ 33 Pea ko te ʼu molaga taputapu neʼe ko vitulo ʼe 600 pea mo ovi ʼe 3 000. 34 Kae neʼe mole hahaʼi te kau pelepitelo ʼae neʼe natou toʼo te kili ʼo te ʼu manu fuli ʼae ki te ʼu holokoseta. Koia neʼe tokoni age ʼonatou tehina, ia te kau Levite+ ʼo kaku ki te ʼosi ʼo te gaue pea mo te kua fakamaʼa ʼo te kau pelepitelo,+ he neʼe tokakaga lelei age* te kau Levite ki te fakamaʼa ʼo natou totonu ʼi te kau pelepitelo. 35 Neʼe toe lahi ʼaupito foki mo te ʼu holokoseta,+ ʼo feia mo te ʼu koga ʼae ʼe gako ʼo te ʼu sakilifisio ʼo te tokalelei+ pea mo te ʼu molaga vino ʼae neʼe momoli fakatahi mo te ʼu holokoseta.+ Neʼe toe kamata* ai ia te gaue ʼae neʼe fai ʼi te fale ʼo Sehova. 36 Koia, neʼe fiafia ai ia Esekiasi mo te hahaʼi fuli ʼo ʼuhiga mo te ʼu fakatuʼutuʼu ʼae neʼe fai e te ʼAtua moʼoni maʼa te hahaʼi,+ koteʼuhi neʼe hoko fakavilivili te ʼu meʼa fuli ʼaia.
30 Neʼe fekauʼi e Esekiasi he ʼu tagata ke olo ʼi Iselaele katoa+ pea mo Suta, pea neʼe ina fai foki mo he ʼu tohi maʼa te ʼu telepi ʼo Efalaimi mo Manase,+ ke natou ʼomai ki te fale ʼo Sehova ʼi Selusalemi ke fai ai te Pasikate maʼa Sehova, te ʼAtua ʼo Iselaele.+ 2 Kae ko te hau, mo tana kau ʼaliki pea mo te hahaʼi katoa ʼae ʼi Selusalemi, neʼe natou fai te tonu ʼae ke fai te Pasikate ʼi te lua mahina.+ 3 Neʼe natou toʼo te tonu ʼaia he neʼe mole feala ke natou fai ʼi te ʼaho ʼae neʼe fakatuʼutuʼu ki ai,+ koteʼuhi neʼe mole hahaʼi te kau pelepitelo ʼae neʼe natou fakamaʼa ia natou+ pea neʼe mole fakatahi te hahaʼi ʼi Selusalemi. 4 Neʼe leleiʼia e te hau mo te hahaʼi katoa ia te fakatuʼutuʼu ʼaia. 5 Koia, neʼe natou fai ai te tonu ʼae ke tala ʼi Iselaele katoa, mai Pele-sepa ki Tane,+ ke ʼomai te hahaʼi ʼo fai te Pasikate maʼa Sehova, te ʼAtua ʼo Iselaele ʼi Selusalemi, koteʼuhi ʼi muʼa atu, neʼe mole natou fai fakatahi ia te ʼaho ʼaia ohage ko tona fakamaʼua ʼi te lao.+
6 Neʼe olo ai leva te ʼu tagata ʼave logo* ʼi Iselaele katoa pea mo Suta, mo te ʼu tohi ʼa te hau mo tana kau ʼaliki, ohage pe ko tona fakatotonu age e te hau. Neʼe natou ui: “Hahaʼi ʼo Iselaele, kotou toe liliu mai kia Sehova, te ʼAtua ʼo Apalahamo, mo Isaake, pea mo Iselaele. Pea ʼe toe liliu mai anai kia koutou ʼae ʼe kei toe pea neʼe haofaki mai te ʼu nima ʼo te ʼu hau ʼo Asilia.+ 7 ʼAua naʼa kotou hage ko ʼakotou kui pea mo ʼokotou tehina ʼae neʼe heʼe agatonu kia Sehova, te ʼAtua ʼo ʼanatou kui. Neʼe fakahoko ai e te ʼAtua he malaʼia kia natou ʼuhi ko te faʼahi ʼaia, pea ko natou ʼae ka sisio mo logo ki ai, ʼe natou fakalialia anai, ohage pe ko takotou sio mata ki ai.+ 8 Koia, ʼi te temi nei, ʼaua naʼa kotou uigataʼa ohage ko ʼakotou kui.+ Kotou fakalogo kia Sehova pea kotou ʼomai ki tona sagatualio+ ʼae neʼe ina fakamaʼoniʼoniʼi ʼo talu ai, pea kotou tauhi kia Sehova tokotou ʼAtua, ke maliu kehe ai tona hauhau mai ia koutou.+ 9 Koteʼuhi ka kotou toe liliu mai kia Sehova, ʼe manavaʼofa anai te hahaʼi ʼae ʼe natou fakapopulaʼi ʼokotou tehina pea mo ʼokotou foha kia natou,+ pea ʼe natou tuku anai ke natou toe liliu mai ki te fenua ʼaeni,+ he ʼe ko Sehova tokotou ʼAtua ʼe manavaʼofa,+ pea ʼe mole lituʼa anai kia koutou mo kapau ʼe kotou toe liliu mai kia te ia.”+
10 Neʼe olo ai te ʼu tagata ʼave logo* ki te ʼu kolo fuli ʼo te fenua ʼo Efalaimi pea mo Manase,+ ʼo kaku ki Sepulone, kae neʼe manukiʼi mo vaʼi natou e te hahaʼi.+ 11 Kae neʼe ʼi ai pe ʼihi mai Asele, mo Manase pea mo Sepulone neʼe natou fakamalalo ifo ʼo olo ki Selusalemi.+ 12 Neʼe toe tapuakiʼi foki e te ʼAtua moʼoni te hahaʼi ʼo Suta, pea neʼe natou fakahoko fakatahi ai* te ʼu meʼa ʼae neʼe fakatotonu e te hau mo tana kau ʼaliki, ʼo mulimuli ki te folafola ʼa Sehova.
13 Neʼe fakatahitahi he hahaʼi tokolahi ʼi Selusalemi ke natou fai te ʼAho Lahi ʼo Te ʼu Pane Hala Fakatupu+ ʼi te lua mahina.+ Neʼe ko he hahaʼi kaugamalie ʼaupito. 14 Neʼe natou tutuʼu ake ʼo toʼo te ʼu ʼaletale ʼo te ʼu ʼatua hala pea mo te ʼu ʼaletale fuli ʼo te iseso+ ʼae neʼe ʼi Selusalemi,+ ʼo liʼaki ki te Vai Tafe* ʼo Kitelone ʼae kua mamaha. 15 Neʼe natou matehi leva te ʼu manu ki te Pasikate ʼi te ʼaho 14 ʼo te lua mahina. Neʼe ufiufi te kau pelepitelo mo te kau Levite, pea neʼe natou fakamaʼa leva ia natou pea mo ʼaumai te ʼu holokoseta ki te fale ʼo Sehova. 16 Neʼe natou tutuʼu ʼi ʼonatou tuʼulaga mahani, ʼo mulimuli ki te Lao ʼa Moisese, te tagata ʼa te ʼAtua moʼoni. Pea neʼe afuhi leva e te kau pelepitelo te toto+ ʼae neʼe fakatoʼo age e te kau Levite. 17 Tokolahi ʼi te hahaʼi neʼe mole natou fakamaʼa ia natou, koia neʼe tonu ai ki te kau Levite ke natou matehi te ʼu manu ki te Pasikate maʼa natou fuli ʼae neʼe heʼe maʼa,+ ke fakamaʼa ai natou ia muʼa ʼo Sehova. 18 Koteʼuhi neʼe kaugamalie ʼaupito te hahaʼi, tafito ia natou mai Efalaimi, mo Manase,+ mo Isakale pea mo Sepulone ʼae neʼe mole natou fakamaʼa ia natou kae neʼe natou kai pe te Pasikate, logo la neʼe mole mulimuli te faʼahi ʼaia ki te meʼa ʼae neʼe fakamaʼua ʼi te Lao. Kae neʼe hufakiʼi natou e Esekiasi, ʼo ina ui: “ ʼE agalelei ia Sehova,+ pea ʼofa pe ke fakamolemole 19 ki ʼae neʼe ina fakatotonu ʼi tona loto ke ina kumi ia te ʼAtua moʼoni+ ko Sehova, te ʼAtua ʼo ʼana kui, logo la neʼe mole ina fakamaʼa ia ia ʼo mulimuli ki te ʼu lekula ʼo ʼuhiga mo te maʼoniʼoni.”+ 20 Neʼe fagono leva ia Sehova kia Esekiasi pea neʼe fakamolemole leva ki* te hahaʼi.
21 Koia, neʼe fai e te kau Iselaele ʼae neʼe ʼi Selusalemi te ʼAho Lahi ʼo Te ʼu Pane Hala Fakatupu+ lolotoga ʼaho ʼe fitu mo he toe fiafia lahi.+ Pea neʼe fakavikiviki ia te kau Levite mo te kau pelepitelo kia Sehova ʼi te ʼaho fuli, ʼo logo lahi ai ʼanatou meʼa faimaholo ʼi tanatou vikiʼi ia Sehova.+ 22 Pea neʼe palalau ia Esekiasi ʼo ina fakalotomalohiʼi ia* te kau Levite fuli ʼae neʼe aga fakapotopoto ʼi tanatou tauhi kia Sehova. Pea neʼe natou kakai lolotoga te ʼu ʼaho ʼaia ʼe fitu neʼe fai ai te ʼaho lahi ʼaia,+ mo natou momoli te ʼu sakilifisio ʼo te tokalelei+ pea mo fakafetaʼi kia Sehova, te ʼAtua ʼo ʼanatou kui.
23 Neʼe fai leva e te hahaʼi katoa te tonu ʼae ke toe hoko atu te ʼaho lahi ʼaia ia ʼaho ʼe fitu, koia neʼe toe hoko atu tanatou fai te ʼaho lahi ʼaia ia ʼaho ʼe fitu pea neʼe natou fakafiafia.+ 24 Pea neʼe foaki e Esekiasi, te Hau ʼo Suta ki te hahaʼi te ʼu vitulo ʼe 1 000 pea mo te ʼu ovi ʼe 7 000, pea neʼe foaki e te kau ʼaliki ki te hahaʼi te ʼu vitulo ʼe 1 000 pea mo te ʼu ovi ʼe 10 000.+ Pea neʼe kaugamalie te kau pelepitelo ʼae neʼe natou fakamaʼa ia natou totonu.+ 25 Pea neʼe hoko atu pe te fakafiafia ʼa te hahaʼi katoa ʼo Suta, mo te kau pelepitelo, mo te kau Levite, mo te hahaʼi katoa ʼae neʼe ʼomai mai Iselaele,+ pea mo te kau matapule+ ʼae neʼe ʼomai mai te fenua ʼo Iselaele mo natou ʼae neʼe nonofo ʼi Suta. 26 Pea neʼe ʼi ai he toe fiafia lahi ʼi Selusalemi, koteʼuhi neʼe heʼeki hoko he meʼa feia ʼi Selusalemi talu mai te temi ʼo Salomone, te hau ʼo Iselaele, te foha ʼo Tavite.+ 27 Neʼe tutuʼu leva te kau pelepitelo Levite ʼo tapuakiʼi te hahaʼi.+ Pea neʼe logo ia te ʼAtua ki ʼonatou leʼo, pea neʼe kaku tanatou faikole ki selo, ia tona nofoʼaga taputapu.
31 Hili pe te ʼaho lahi ʼaia, neʼe olo leva te kau Iselaele fuli ʼae neʼe kau ai ki te ʼu kolo ʼo Suta. Pea neʼe natou maumauʼi te ʼu pou maka taputapu,+ mo taʼaga te ʼu pou ʼakau taputapu,*+ mo maumauʼi te ʼu faʼahi maʼoluga+ pea mo te ʼu ʼaletale.+ Neʼe natou fai te faʼahi ʼaia ʼi Suta mo Pesamino katoa, ʼo feia mo Efalaimi pea mo Manase,+ ʼo kaku ki tanatou maumauʼi te ʼu meʼa fuli ʼaia. Hili ʼaia, neʼe toe liliu leva te kau Iselaele ki ʼonatou kolo, ʼo tahi alu ki tona ʼapi.
2 Neʼe fakanofo leva e Esekiasi te kau pelepitelo ʼi ʼanatou kalasi+ pea mo te kau Levite ʼi ʼanatou kalasi,+ ke feala hanatou fakahoko ʼonatou maʼua.+ Neʼe natou momoli ai te ʼu holokoseta mo te ʼu sakilifisio ʼo te tokalelei, mo fai te ʼu gaue ʼa te ʼAtua, pea mo fai he ʼu fakafetaʼi mo he ʼu fakavikiviki ʼi te ʼu matapa ʼo te ʼu malaʼe ʼo Sehova.+ 3 Neʼe foaki he vahe ʼo te ʼu koloa ʼo te hau ki te ʼu holokoseta,+ ʼo kau ki ai te ʼu molaga ʼo te uhu mo te afiafi,+ pea mo te ʼu holokoseta ʼae neʼe momoli ʼi te ʼu Sapato,+ mo te tuʼu afiafi ʼo te mahina,+ pea mo te ʼu ʼaho lalahi.+ Neʼe fai ʼo mulimuli pe ki te ʼu meʼa ʼae ʼe tohi ʼi te Lao ʼa Sehova.
4 Tahi ʼae meʼa, neʼe ina fakatotonu ki te hahaʼi ʼae neʼe nonofo ʼi Selusalemi ke natou foaki te vahe ʼae neʼe tonu ke foaki ki te kau pelepitelo mo te kau Levite,+ ke feala ai hanatou mulimuli* fakalelei ki te lao ʼa Sehova. 5 ʼI te temi pe ʼae neʼe fakaha ai te fakatotonu ʼaia, neʼe lahi ʼaupito te ʼu ʼuluaki fua ʼo te fulumeto* ʼae neʼe foaki e te kau Iselaele, ʼo feia mo te vino foʼou, mo te lolo,+ mo te meli pea mo te ʼu fua fuli ʼo ʼanatou gaueʼaga.+ Neʼe lahi ʼaupito te vahe tahi ki te hogofulu ʼo te ʼu meʼa fuli ʼae neʼe natou ʼaumai.+ 6 Pea neʼe toe ʼaumai foki e te hahaʼi ʼo Iselaele pea mo Suta, ʼae neʼe nonofo ʼi te ʼu kolo ʼo Suta ʼonatou meʼa ʼofa. Neʼe ko te vahe tahi ki te hogofulu ʼo te ʼu pipi mo te ʼu ovi, mo te vahe tahi ki te hogofulu ʼo te ʼu meʼa taputapu+ ʼae neʼe fakamaʼoniʼoniʼi maʼa Sehova tonatou ʼAtua. Neʼe natou tanaki ai he ʼu tuʼuga meʼa ʼofa. 7 ʼI te tolu mahina,+ neʼe natou kamata tuku ki he faʼahi te ʼu meʼa ʼofa fuli ʼae neʼe ʼaumai e te hahaʼi, pea neʼe fakaʼosi ai leva ʼi te fitu mahina.+ 8 ʼI te ʼomai ʼa Esekiasi mo te kau ʼaliki ʼo sisio ki te ʼu tuʼuga meʼa ʼofa ʼaia, neʼe natou vikiʼi ai ia Sehova pea mo tapuakiʼi ia Iselaele, tana hahaʼi.
9 Neʼe fakafehuʼi e Esekiasi te kau pelepitelo mo te kau Levite ʼo ʼuhiga mo te ʼu meʼa ʼofa ʼae neʼe ʼaumai e te hahaʼi, 10 pea neʼe tali age e Asalia, te pelepitelo pule ʼo te famili ʼo Satoke ki ai: “Talu mai te ʼaho ʼae neʼe ʼaumai ai e te hahaʼi te ʼu meʼa ʼofa ki te fale ʼo Sehova,+ neʼe kakai te hahaʼi ʼo makokona pea ʼe kei toe lahi te meʼa kai, he neʼe tapuakiʼi e Sehova tana hahaʼi, pea koʼeni, ʼe lahi ʼaupito te ʼu meʼa ʼae ʼe toe.”+
11 Neʼe ui age e Esekiasi ke natou teuteuʼi he ʼu fale tanakiʼaga meʼa*+ ʼi te fale ʼo Sehova. Pea neʼe natou teuteuʼi ai. 12 Neʼe hoko atu pe te ʼaumai ʼo te ʼu meʼa ʼofa, mo te ʼu meʼa taputapu, pea mo te vahe tahi ki te hogofulu ʼo te ʼu meʼa ʼae neʼe maʼua ke foaki.+ Neʼe tokaga ia Konania, te tagata Levite ki te ʼu meʼa fuli ʼaia, pea neʼe hoa ki ai tona tehina ko Simei. 13 Neʼe ʼi ai te ʼu tagata neʼe tokoni kia Konania mo tona tehina ko Simei, ohage pe ko tona fakatotonu e te Hau ko Esekiasi. Neʼe ko Sehiele, mo Asasia, mo Naate, mo Asaele, mo Selimote, mo Sosapate, mo Eliele, mo Sisemakia, mo Makate pea mo Penaia. Pea neʼe tokaga ia Asalia ki te fale ʼo te ʼAtua moʼoni. 14 Pea ko Koli, te foha ʼo Imina, te tagata Levite pea mo tagata leʼo matapa ʼo te potu esite,+ neʼe tokaga ki te ʼu meʼa ʼofa ʼae neʼe foaki ʼaki he lotolelei+ ki te ʼAtua moʼoni. Pea neʼe ina tufa te ʼu meʼa ʼofa ʼae neʼe fai kia Sehova+ ʼo feia mo te ʼu meʼa taputapu ʼaupito.+ 15 Pea neʼe fakalogo kia ia ia Eteni, mo Minesamino, mo Sesua, mo Semaea, mo Amalia pea mo Sekania. Neʼe natou nonofo ʼi te ʼu kolo ʼo te kau pelepitelo+ pea neʼe natou tuha mo te falala. Neʼe tonu ke natou tufa fakatatau ki ʼonatou tehina tonatou vahe, ʼi ʼanatou kalasi,+ ia te kau tupulaga pea mo te kau matuʼa. 16 Neʼe toe tufa foki te ʼu meʼa ʼofa ʼaia kia natou ʼae neʼe tohi ʼonatou higoa ʼi te tohi hako, ia te ʼu tagata ʼae neʼe ʼomai ʼo gaue ʼi te ʼaho fuli ʼi te fale ʼo Sehova pea mo fakahoko te ʼu gaue ʼo ʼanatou kalasi, ʼo feia mo ʼonatou foha ʼae neʼe taʼu 3 ʼo fai ki ʼoluga.
17 Neʼe tohi te ʼu higoa ʼo te kau pelepitelo ʼi te tohi hako ʼo mulimuli ki ʼonatou famili,+ ʼo feia mo te kau Levite ʼae neʼe taʼu 20 ʼo fai ki ʼoluga,+ ʼo mulimuli ki te ʼu gaue ʼo ʼanatou kalasi.+ 18 Neʼe toe tohi foki ʼi te tohi hako ia te ʼu higoa ʼo ʼonatou ʼohoana fuli, mo ʼonatou foha, pea mo ʼonatou ʼofafine, maʼia mo natou ʼae kei liliki, ʼei, neʼe ko te kau Levite mo ʼonatou famili fuli, he neʼe natou tokakaga tuʼumaʼu pe ke natou fakamaʼa ia natou totonu koteʼuhi neʼe natou fakahoko he ʼu gaue taputapu. 19 Pea neʼe toe tohi ʼi te tohi hako te hologa ʼo Alone, ia te kau pelepitelo ʼae neʼe nonofo ʼi te ʼu kele ʼae ʼi te ʼu tafaʼaki ʼo ʼonatou kolo.+ ʼI te ʼu kolo fuli ʼaia, neʼe filifili he ʼu tagata ke natou foaki te ʼu vahe ʼo te kau pelepitelo pea mo natou fuli ʼae neʼe tuʼu ʼonatou higoa ʼi te tohi hako ʼo te kau Levite.
20 Neʼe fai e Esekiasi te faʼahi ʼaia ʼi Suta katoa, pea neʼe ina haga fai pe te meʼa ʼae ʼe lelei mo totonu kia mata ʼo Sehova tona ʼAtua, pea neʼe agatonu kia te ia. 21 Pea ko te ʼu gaue fuli ʼae neʼe ina fai moʼo kumi tona ʼAtua, ia te ʼu gaue ʼae ʼi te fale ʼo te ʼAtua moʼoni+ peʼe ko tana fakalogo ki te Lao mo te ʼu fakatotonu, neʼe ina fai ʼaki tona loto katoa, ʼo maui mālie ai.
32 Hili te ʼu meʼa ʼaia pea mo te ʼu gaue ʼae neʼe fakaha ai e Esekiasi tana agatonu,+ neʼe haʼu ia Senakelipe, te Hau ʼo Asilia ʼo ʼohofi ia Suta. Neʼe ina ʼa takai te ʼu kolo tau, he neʼe ina loto ke maumauʼi te ʼu kaupa ʼo te ʼu kolo ʼaia pea ke ina maʼu.+
2 ʼI te sio ʼa Esekiasi kua haʼu ia Senakelipe ʼo tauʼi ia Selusalemi, 3 neʼe felogoi mo tana kau ʼaliki pea mo ʼana tagata tau. Pea neʼe natou lototahi leva ke natou tokoni ki ai ki te pupunu ʼo te ʼu matapuna vai ʼae ʼi te tuʼa kolo.+ 4 Neʼe fakatahitahi leva he hahaʼi tokolahi, pea neʼe natou pupunu te ʼu matapuna vai fuli ʼo feia mo te ʼu vai tafe ʼo te fenua, he neʼe natou ui: “ ʼE mole matou loto ke lahi te vai ʼae ka maʼu e te ʼu hau ʼo Asilia moka natou tau mai.”
5 Tahi ʼae meʼa, neʼe ina toe laga ʼaki he lotomalohi te kaupa katoa ʼae neʼe maumau pea mo fakatuʼu he ʼu tule ʼi ai, pea neʼe ina laga he tahi age kaupa ʼi tuʼa atu. Neʼe ina toe gaohi ia Milo,*+ ʼae ʼi te Kolo ʼo Tavite, pea neʼe ina faʼu he ʼu mahafu* pea mo he ʼu meʼa tali tau ʼe lahi ʼaupito. 6 Neʼe ina fakanofo leva he kau takitaki solia ke natou pule ki te hahaʼi pea neʼe ina fakatahiʼi natou ʼi te malaʼe lahi ʼo te matapa ʼo te kolo. Neʼe ina fakalotomalohiʼi natou,* ʼo ina ui age: 7 “Kotou lotomalohi mo lototoʼa. ʼAua naʼa kotou matataku ʼuhi ko te hau ʼo Asilia+ pea mo te hahaʼi kaugamalie ʼae ʼe fakatahi mo ia, he ʼe kaugamalie age natou ʼae ʼe kau mo tatou ia natou ʼae ʼe kau mo ia.+ 8 ʼE falala ia ki te malohi fakatagata,* kae ʼe falala tatou kia Sehova totatou ʼAtua, ʼae ka tokoni mai kia tatou pea mo ina tauʼi anai ʼotatou fili.”+ Pea neʼe lotomalohi ai te hahaʼi ʼi te ʼu palalau ʼae neʼe fai e Esekiasi, te Hau ʼo Suta.+
9 Hili ʼaia, neʼe kei nofo ia Senakelipe, te Hau ʼo Asilia ʼi Lakisi+ mo tana kau solia malolohi fuli. Neʼe ina fekauʼi leva ʼana tagata faifekau ke olo ki Selusalemi, kia Esekiasi, te Hau ʼo Suta mo te kau Sutea fuli ʼae ʼi Selusalemi,+ pea ke natou ui age:
10 “Koʼeni te meʼa ʼae ʼe ui e Senakelipe, te Hau ʼo Asilia: ‘Ko ai ʼae ʼe kotou falala ki ai ke kotou nonofo ai ʼi Selusalemi kae ʼa takai te kolo?+ 11 ʼE mole koa la kakaʼi koutou e Esekiasi ʼi tana ui atu ʼae ʼe haofaki anai koutou e Sehova tokotou ʼAtua mai te ʼu nima ʼo te hau ʼo Asilia? ʼE ina loto ke kotou mamate ʼi te fia kai mo te fia inu.+ 12 Neʼe mole maumauʼi koa la e Esekiasi te ʼu faʼahi maʼoluga ʼo tokotou ʼAtua*+ ʼo feia mo ʼOna ʼaletale,+ pea mo ina ui leva ki Suta mo Selusalemi: “ ʼE kotou tulolo anai ʼi he muʼa ʼaletale pe ʼe tahi pea ʼe kotou tutu anai ke kohu ʼi ai ʼakotou sakilifisio”?+ 13 ʼE mole koa la kotou iloʼi te meʼa ʼae neʼe au fai mo ʼaku kui ki te hahaʼi fuli ʼo te tahi age ʼu fenua?+ Neʼe feala koa ki te ʼu ʼatua ʼo te ʼu puleʼaga ʼo te ʼu fenua ʼaia ke natou haofaki tonatou fenua mai ʼoku nima?+ 14 ʼI te ʼu ʼatua fuli ʼo te ʼu puleʼaga ʼaia ʼae neʼe maumauʼi katoa e ʼaku kui, ko te ʼatua fea ʼae neʼe feala ke ina haofaki tana hahaʼi mai ʼoku nima? Pea ʼe kotou manatu koa ʼe feala ki tokotou ʼAtua ke ina haofaki koutou mai ʼoku nima?+ 15 Koia, ʼaua naʼa kakaʼi peʼe fakahalaʼi koutou e Esekiasi!+ ʼAua naʼa kotou falala kia ia, he neʼe mole he ʼatua ʼo te ʼu puleʼaga neʼe feala ke ina haofaki tana hahaʼi mai ʼoku nima pea mo te ʼu nima ʼo ʼaku kui. Pea ko ai leva tokotou ʼAtua ke ina haofaki koutou mai ʼoku nima?’ ”+
16 Neʼe toe leakoviʼi e ʼana hahaʼi faifekau ia Sehova, te ʼAtua moʼoni, pea mo Esekiasi tana tagata faifekau. 17 Neʼe fai e Senakelipe mo he ʼu tohi+ neʼe ina leakoviʼi ai ia Sehova, te ʼAtua ʼo Iselaele+ pea mo palalau kovi ʼo ʼuhiga mo ia, ʼo ina ui: “ ʼE hage pe te ʼAtua ʼo Esekiasi ko te ʼu ʼatua ʼo te ʼu puleʼaga ʼo te tahi age ʼu fenua, ʼae neʼe mole feala ke natou haofaki tanatou hahaʼi mai ʼoku nima.+ ʼE mole feala anai ke ina haofaki tana hahaʼi mai ʼoku nima.” 18 Neʼe hoko atu pe tanatou kalaga leʼo lahi ʼi te lea ʼa te kau Sutea ki te hahaʼi ʼo Selusalemi ʼae neʼe tutuʼu ʼi te kaupa, ke tupu ai hanatou matataku, pea ke feala ai hanatou maʼu te kolo.+ 19 Neʼe natou laukovi ki te ʼAtua ʼo Selusalemi ohage pe ko tanatou fai ki te ʼu ʼatua ʼo te hahaʼi ʼo te kele, ʼae ko te gaue ia ʼo te ʼu nima ʼo te tagata. 20 Kae neʼe haga faikole aipe ia te Hau ko Esekiasi pea mo Esaia+ te polofeta, te foha ʼo Amote ʼo ʼuhiga mo te faʼahi ʼaia pea mo kalaga ki te ʼAtua ʼae ʼi selo ke tokoni age.+
21 Neʼe fekauʼi leva e Sehova he ʼaselo ke ina matehi te ʼu tagata tau malolohi fuli,+ mo te kau takitaki fuli pea mo te ʼu pule fuli ʼae neʼe nonofo ʼi te nofoʼaga ʼo te hau ʼo Asilia. Pea neʼe toe liliu leva te hau ʼo Asilia ki tona fenua mo he toe ufiufi lahi. Ki muli age, neʼe hu ki te fale* ʼo tona ʼatua, pea neʼe matehi ai e ʼihi ʼo ʼona foha ʼaki te heleta.+ 22 Koia, neʼe haofaki ai e Sehova ia Esekiasi mo te hahaʼi ʼo Selusalemi mai te ʼu nima ʼo Senakelipe, te Hau ʼo Asilia pea mo te ʼu nima ʼo te hahaʼi fuli, pea neʼe ina foaki kia natou te tokalelei ʼi ʼonatou tafaʼaki fuli. 23 Pea neʼe ʼaumai e te hahaʼi tokolahi ni meʼa ʼofa kia Sehova ʼi Selusalemi pea mo ni meʼa maʼuhiga kia Esekiasi, te Hau ʼo Suta.+ Pea hili ʼaia, neʼe fakaʼapaʼapaʼi lahi ia ia e te ʼu puleʼaga fuli.
24 ʼI te temi ʼaia, neʼe mahaki leva ia Esekiasi ʼo meihiʼi mate ai. Neʼe faikole kia Sehova,+ pea neʼe tali age ki ai ʼaki he fakailoga.*+ 25 Kae neʼe mole lotofakafetaʼi ia Esekiasi ki te ʼu lelei ʼae neʼe fai age kia ia, koteʼuhi neʼe liliu ʼo fiameʼalahi, ʼo to ai te ita ʼo te ʼAtua kia ia, mo Suta pea mo Selusalemi. 26 Kae neʼe fakahemala ia Esekiasi ʼi tona fiameʼalahi+ ʼo feia mo te hahaʼi ʼo Selusalemi, pea neʼe mole to ai te ita ʼo Sehova kia natou ʼi te temi ʼo Esekiasi.+
27 Pea neʼe lahi te ʼu koloa pea mo te kololia ʼae neʼe maʼu e Esekiasi.+ Neʼe ina laga maʼa ia he ʼu fale ke tanaki ki ai+ te siliva, mo te aulo, mo te ʼu maka maʼuhiga, mo te lolo ʼae neʼe fai ʼaki te ʼu ʼakau fakamagoni, mo te ʼu meʼa tali tau pea mo te ʼu meʼa maʼuhiga fuli. 28 Neʼe ina toe laga foki he ʼu fale tanakiʼaga meʼa ke tuku ki ai te fulumeto,* mo te vino foʼou pea mo te lolo. Pea neʼe ina toe laga mo ni fale manu ki te faga manu kehekehe pea mo ni fale manu ki te faga ovi. 29 Neʼe ina laga maʼa ia he ʼu kolo, pea neʼe lahi te faga pipi pea mo te faga ovi ʼae neʼe ina maʼu, he neʼe lahi ʼaupito te ʼu koloa ʼae neʼe foaki age e te ʼAtua. 30 Neʼe ko Esekiasi ʼae neʼe ina pupunu te matapuna vai ʼae ʼi ʼoluga+ ʼo Kioni+ ke tafe fakahagatonu te vai ki te potu uesite ʼo te Kolo ʼo Tavite.+ Pea neʼe lava lelei te ʼu gaue fuli ʼae neʼe fai e Esekiasi. 31 Kae ʼi te temi ʼae neʼe fekauʼi ai e te kau ʼaliki ʼo Papiloni he ʼu tagata ʼave logo ke olo ʼo fakafehuʼi ia ia ʼo ʼuhiga mo te fakailoga*+ ʼae neʼe hoko ʼi te fenua,+ neʼe tuku ai e te ʼAtua ia ia ke ina fai te meʼa ʼae ʼe loto ki ai, he neʼe ina fia ʼahiʼahiʼi ia ia+ pea mo iloʼi te ʼu meʼa fuli ʼae ʼi tona loto.+
32 Pea ʼe tuʼu te toe ʼo te hisitolia ʼo Esekiasi pea mo ʼana gaue ʼae neʼe ina fakaha ai tona ʼofa agatonu,+ ʼi te fakamatala ʼo te ʼu meʼa ʼae neʼe ha ki te polofeta ko Esaia,+ te foha ʼo Amote, ʼi te Tohi ʼo Te ʼu Hau ʼo Suta Pea Mo Iselaele.+ 33 Neʼe mate leva ia Esekiasi* pea neʼe ʼavaifo ʼi te mahake ʼae ʼe alu ki te tanuma ʼo te ʼu foha ʼo Tavite.+ ʼI tana mate, neʼe fakaʼapaʼapaʼi ia ia e Suta katoa pea mo te hahaʼi ʼo Selusalemi. Neʼe hau tona foha ko Manase ʼo fetogi ia ia.
33 Neʼe hau ia Manase+ ʼi tona taʼu 12, pea neʼe pule lolotoga taʼu ʼe 55 ʼi Selusalemi.+
2 Neʼe ina fai te meʼa ʼae ʼe kovi kia mata ʼo Sehova, ʼo mulimuli ki te ʼu aga fakalialia ʼa te ʼu puleʼaga ʼae neʼe kapu e Sehova, ia muʼa ʼo te hahaʼi ʼo Iselaele.+ 3 Neʼe ina toe laga te ʼu faʼahi maʼoluga ʼae neʼe maumauʼi e tana tamai ko Esekiasi,+ mo fakatuʼu he ʼu ʼaletale ki te ʼu Paale pea mo fai he ʼu pou ʼakau taputapu.* Pea neʼe tulolo ia muʼa ʼo te foʼi kautau katoa ʼo te ʼatu lagi* pea mo atolasio kia natou.+ 4 Neʼe ina toe faʼu foki mo he ʼu ʼaletale ki te ʼu ʼatua hala ʼi te fale ʼo Sehova.+ Kae ʼi muʼa atu, neʼe ui e Sehova ʼo ʼuhiga mo te fale ʼaia: “Neʼe au filifili ke tuʼu toku huafa ʼi Selusalemi ʼo talu ai.”+ 5 Pea neʼe ina faʼu he ʼu ʼaletale maʼa te foʼi kautau katoa ʼo te ʼatu lagi ʼi te ʼu malaʼe ʼe lua ʼo te fale ʼo Sehova.+ 6 Pea neʼe ina tutu ʼona foha totonu ohage ko he ʼu sakilifisio+ ʼi te potu fenua lauveliveli ʼae ko Te Foha ʼo Hinome.+ Neʼe gaohi meʼa fakamanamana,+ mo faifakakikite fakatemonio, mo faifakalauʼakau, pea neʼe ina fakanofo ni hahaʼi ʼe felogoi mo te kau mate pea mo ni hahaʼi faifakakikite fakatemonio.+ Neʼe lahi ʼaupito te ʼu meʼa kovi ʼae neʼe ina fai kia mata ʼo Sehova, moʼo fakatupu ai tona hauhau.
7 Neʼe ina tuku ki te fale ʼo te ʼAtua moʼoni te fakatata ʼae neʼe ina togi.+ Kae ʼi muʼa atu, neʼe ui age e te ʼAtua kia Tavite mo tona foha ko Salomone ʼo ʼuhiga mo te fale ʼaia: “Neʼe au filifili ke fakamaʼuhigaʼi toku huafa ʼo talu ai ʼi te fale ʼaeni pea mo Selusalemi, ʼae neʼe au filifili mai te ʼu telepi fuli ʼo Iselaele.+ 8 Pea ʼe mole au toe kapu anai ia Iselaele mai te fenua ʼae neʼe au foaki ki ʼanatou kui, mo kapau ʼe natou tokakaga fakalelei ʼo mulimuli ki te ʼu meʼa fuli ʼae neʼe au fakatotonu age kia natou, ia te Lao katoa, mo te ʼu lekula pea mo te ʼu lao ʼae neʼe foaki age kia natou ʼaki ia Moisese.” 9 Neʼe haga fakaneke pe e Manase ia Suta mo te hahaʼi ʼo Selusalemi ke natou fai he ʼu aga ʼe kovi age ʼi te ʼu puleʼaga ʼae neʼe fakaʼauha e Sehova ia muʼa ʼo te kau Iselaele.+
10 Neʼe haga palalau aipe ia Sehova kia Manase mo tana hahaʼi, kae neʼe mole natou fia fakalogo.+ 11 Koia neʼe uga ai e Sehova te ʼu pule ʼo te foʼi kautau ʼa te hau ʼo Asilia ke natou tauʼi ia natou, pea neʼe natou puke leva ia Manase ʼaki he ʼu mātaʼu,* mo haʼi ia ia ʼaki he ʼu seini kapa ʼe lua ʼo ʼave ki Papiloni. 12 ʼI tana mamahi ʼaia, neʼe ina kole mamahi leva ia te manavaʼofa* ʼo Sehova, tona ʼAtua pea neʼe fakamalalo ʼaupito ifo ia muʼa ʼo te ʼAtua ʼo ʼana kui. 13 Neʼe haga faikole kia te Ia, pea neʼe malave ki Tona loto ia tana tagi pea neʼe fagono ki tana kole age tona manavaʼofa. Pea neʼe Ina toe fakanofo ia ia ki tona tuʼulaga fakahau+ ʼi Selusalemi. Neʼe iloʼi ai leva e Manase ko Sehova ʼe ko te ʼAtua moʼoni.+
14 Hili ʼaia neʼe ina laga he kaupa maʼoluga ʼi tuʼa maʼa te Kolo ʼo Tavite,+ ʼi te potu uesite ʼo Kioni,+ ʼae ʼi te vai tafe* pea neʼe kaku ki te Matapa ʼo Te ʼu Ika.+ Neʼe ina hoko atu te laga ʼo te kaupa ʼaia ʼo kaku ki Ofeli.+ Tahi ʼae meʼa, neʼe ina fakanofo he kau pule solia ʼi te ʼu kolo tau fuli ʼae ʼi Suta. 15 Neʼe ina pulihi leva te ʼu ʼatua matapule pea mo te fakatata ʼae neʼe ʼi te fale ʼo Sehova+ pea mo te ʼu ʼaletale fuli ʼae neʼe ina laga ʼi te moʼuga ʼo te fale ʼo Sehova+ pea mo Selusalemi, pea neʼe ina fakatotonu ke liʼaki ki te tuʼa kolo. 16 Neʼe ina toe gaohi foki te ʼaletale ʼo Sehova,+ pea mo momoli ʼi ai te ʼu sakilifisio ʼo te tokalelei+ pea mo te ʼu sakilifisio fakafetaʼi,+ pea neʼe ina kole ki Suta ke natou tauhi kia Sehova, te ʼAtua ʼo Iselaele. 17 Neʼe kei fai pe e te hahaʼi he ʼu sakilifisio ʼi te ʼu faʼahi maʼoluga, kae neʼe natou fai pe kia Sehova tonatou ʼAtua.
18 ʼE tuʼu te toe ʼo te hisitolia ʼo Manase, tana faikole ki tona ʼAtua pea mo te ʼu folafola ʼae neʼe fakaha age kia ia e te kau polofeta* ʼi te huafa ʼo Sehova te ʼAtua ʼo Iselaele, ʼi te hisitolia ʼo te ʼu hau ʼo Iselaele. 19 Pea ʼe tuʼu tana faikole+ pea mo te tali ʼae ki tana kole mamahi, mo te ʼu agahala fuli ʼae neʼe ina fai pea mo tana heʼe agatonu+ ʼi te ʼu tohi ʼo ʼana tagata ʼae ʼe natou fakaha age ki ai te ʼu meʼa ʼae neʼe ha. ʼE toe fakamatala ai mo te ʼu potu ʼae neʼe ina laga ai te ʼu faʼahi maʼoluga mo fakatuʼu ai te ʼu pou ʼakau taputapu*+ pea mo te ʼu fakatata ʼi muʼa ʼo tana fakamalalo ifo. 20 Neʼe mate leva ia Manase* pea neʼe ʼavaifo ʼo ovi age pe ki tona ʼapi. Pea neʼe hau leva tona foha ko Amone ʼo fetogi ia ia.+
21 Neʼe hau ia Amone+ ʼi tona taʼu 22, pea neʼe pule lolotoga taʼu ʼe lua ʼi Selusalemi.+ 22 Pea neʼe ina haga fai pe te meʼa ʼae ʼe kovi kia mata ʼo Sehova, ohage pe ko tana tamai ko Manase.+ Pea neʼe fai e Amone he ʼu sakilifisio ki te ʼu fakatata fuli ʼae neʼe fai e tana tamai ko Manase,+ pea neʼe haga tauhi kia natou. 23 Kae neʼe mole fakamalalo ifo ia muʼa ʼo Sehova,+ ohage ko tona fai e tana tamai ko Manase.+ Kae neʼe kovi age te lakahala ʼa Amone. 24 Ki muli age, neʼe fonofono ʼana hahaʼi faifekau ke natou fakafeagai kia ia,+ pea neʼe natou matehi leva ia ia ʼi tona fale. 25 Kae neʼe matehi e te hahaʼi ʼo te fenua ia natou fuli ʼae neʼe fonofono ke natou fakafeagai ki te Hau ko Amone.+ Pea neʼe fakanofo leva e te hahaʼi tona foha ko Sosiasi+ ke hau moʼo fetogi ia ia.
34 Neʼe hau ia Sosiasi+ ʼi tona taʼu valu, pea neʼe pule lolotoga taʼu ʼe 31 ʼi Selusalemi.+ 2 Neʼe ina fai te meʼa ʼae ʼe lelei kia mata ʼo Sehova pea neʼe ina faʼifaʼitakiʼi te ʼu aga fuli ʼa tana kui ko Tavite, pea neʼe mulimuli fakalelei ki te ʼu fakatotonu ʼa te ʼAtua.
3 ʼI te 8 taʼu ʼo tana pule, ʼi tana kei tupulaga, neʼe ina kamata kumi ai te ʼAtua ʼo Tavite tana kui.+ Pea ʼi te 12 taʼu ʼo tana pule, neʼe ina kamata fakamaʼa ia Suta mo Selusalemi,+ ʼo ina pulihi te ʼu faʼahi maʼoluga,+ mo te ʼu pou ʼakau taputapu* pea mo te ʼu fakatata.+ 4 Tahi ʼae meʼa, neʼe maumauʼi ʼi ʼona muʼa te ʼu ʼaletale ʼo te ʼu Paale, pea neʼe ina maumauʼi te ʼu tuʼulaga iseso ʼae neʼe ʼi ʼoluga ʼo te ʼu ʼaletale. Neʼe ina toe laliki foki mo te ʼu pou ʼakau taputapu* pea mo te ʼu fakatata, pea neʼe ina laku leva te lefulefu ki te ʼu fale maka ʼo natou ʼae neʼe faisakilifisio ki te ʼu meʼa ʼaia.+ 5 Pea neʼe ina tutu te ʼu hui ʼo te kau pelepitelo ʼi ʼonatou ʼaletale.+ Neʼe ina fakamaʼa ai ia Suta pea mo Selusalemi.
6 Pea ʼi te ʼu kolo ʼo Manase, mo Efalaimi,+ mo Simeone ʼo kaku ki Nefetali, ʼi te ʼu koga meʼa ʼae kua maumauʼi ʼi ʼonatou tafaʼaki, 7 neʼe ina maumauʼi te ʼu ʼaletale pea mo laliki te ʼu pou ʼakau taputapu* pea mo te ʼu fakatata,+ ʼo natou liliu ai ko he lefulefu. Pea neʼe ina maumauʼi te ʼu tuʼulaga iseso fuli ʼi Iselaele katoa.+ Hili ʼaia, neʼe toe liliu leva ki Selusalemi.
8 ʼI te 18 taʼu ʼo tana pule, ʼi tana kua fakamaʼa ia te fenua pea mo te fale lotu,* neʼe ina fekauʼi leva ia Safani,+ te foha ʼo Atesalia, mo Maasesa, te pule ʼo te kolo, pea mo Soake, te foha ʼo Soakase te sikalaipe ke natou toe faʼu te fale ʼo Sehova, tona ʼAtua.+ 9 Neʼe natou olo ai ki te pelepitelo lahi ko Ilekisa ʼo foaki age te falā ʼae neʼe ʼaumai ki te fale ʼo te ʼAtua. Neʼe tanaki te falā ʼaia e te kau Levite ʼae neʼe leʼo matapa, mai te hahaʼi ʼo Manase, mo Efalaimi pea mo te hahaʼi ʼo Iselaele katoa,+ ʼo feia mo Suta, mo Pesamino pea mo te hahaʼi ʼo Selusalemi. 10 Pea neʼe fakatoʼo leva te falā ʼaia ki te kau takitaki gaue ʼo te fale ʼo Sehova. Pea neʼe fakaʼaogaʼi leva e te kau gaue ʼo te fale ʼo Sehova te falā ʼaia moʼo toe faʼu te fale. 11 Neʼe foaki te falā ki te kau tufuga pea mo te kau laga fale, ke natou totogi he ʼu maka kua taʼataʼaga pea mo he ʼu ʼakau moʼo fakamalohiʼi te fale pea mo fetogi te ʼu lalago ʼo te ʼu fale ʼae neʼe tuku e te ʼu hau ʼo Suta ke maumau.+
12 Pea neʼe agatonu te ʼu tagata ʼaia ʼi tanatou gaue.+ Neʼe hinoʼi te kau Levite ʼaeni ke natou takitaki ia natou: ʼi te kau Melali,+ neʼe ko Sakate mo Apetiasi, pea ʼi te kau Keate,+ neʼe ko Sakalia pea mo Mesulame. Pea ko te kau Levite, ia natou fuli ʼae neʼe faiva ʼi te faimaholo,+ 13 neʼe natou tokakaga ki te kau gaue* pea mo takitaki ia natou fuli ʼae neʼe natou fakahoko he ʼu faʼahiga gaue kehekehe. Pea ko ʼihi Levite neʼe ko he ʼu sikalaipe, mo he kau pule pea mo he ʼu tagata leʼo matapa.+
14 ʼI tanatou olo ʼo toʼo te falā ʼae neʼe ʼaumai ki te fale ʼo Sehova,+ neʼe maʼu e te pelepitelo ko Ilekisa te tohi ʼo te Lao ʼa Sehova+ ʼae neʼe foaki ʼaki ia* Moisese.+ 15 Pea neʼe ui e Ilekisa kia Safani, te sikalaipe: “Neʼe au maʼu te tohi ʼo te Lao ʼi te fale ʼo Sehova.” Neʼe fakatoʼo age leva e Ilekisa te tohi kia Safani. 16 Pea neʼe ʼave e Safani te tohi ki te hau pea neʼe ina ui age: “ ʼE lolotoga fai nei e ʼau hahaʼi faifekau te ʼu meʼa fuli ʼae neʼe ke fakatotonu age kia natou. 17 Neʼe kua natou toʼo te falā ʼae neʼe tuku ʼi te fale ʼo Sehova, pea neʼe natou foaki ki te kau takitaki gaue pea mo natou ʼae ʼe natou fakahoko te gaue.” 18 Pea neʼe toe ui age e Safani, te sikalaipe ki te hau: “Neʼe foaki mai e te pelepitelo ko Ilekisa ia te tohi ʼaeni.”+ Pea neʼe lau leva e Safani te tohi ia muʼa ʼo te hau.+
19 Pea ʼi te logo ʼa te hau ki te lau ʼo te ʼu folafola ʼo te Lao, neʼe ina hae atu aipe ʼona kofu.+ 20 Pea neʼe fakatotonu e te hau kia Ilekisa, mo Asikame,+ te foha ʼo Safani, mo Apitoni, te foha ʼo Mikea, mo Safani, te sikalaipe pea mo Asaia, te tagata tokoni gaue ʼa te hau: 21 “Kotou olo ʼo fakafehuʼi ia Sehova maʼaku pea maʼa natou ʼae kei toe ʼi Iselaele pea mo Suta, ʼo ʼuhiga mo te ʼu folafola ʼo te tohi ʼaeni neʼe maʼu. ʼE lahi anai te ita ʼo Sehova ʼae ka to kia tatou, he neʼe mole fakahoko e ʼatatou kui te ʼu folafola ʼa Sehova. Neʼe mole natou mulimuli ki te ʼu meʼa fuli ʼae ʼe tuʼu ʼi te tohi ʼaeni.”+
22 Koia, neʼe alu ai ia Ilekisa pea mo natou ʼae neʼe fekauʼi e te hau ke olo mo ia, ki te fafine polofeta ko Ulita.+ Neʼe ʼohoana mo Salume, ʼae neʼe tokaga ki te ʼu mutuʼi meʼa.* Neʼe ko te foha ʼaia ʼo Tikeva, te foha ʼo Halase. Pea neʼe nofo te fafine ʼaia ʼi te Kolo Foʼou ʼo Selusalemi. Neʼe natou palalau mo ia ʼi ai.+ 23 Neʼe ui leva e te fafine polofeta kia natou: “Koʼeni te folafola ʼa Sehova, te ʼAtua ʼo Iselaele: ‘Kotou tala ki te tagata ʼae neʼe ina fekauʼi mai koutou: 24 “Koʼeni te folafola ʼa Sehova: ‘ ʼE au fakahoko anai he malaʼia ki te koga meʼa ʼaeni pea mo te hahaʼi ʼae ʼe nonofo ai,+ ʼei, te ʼu malaʼia fuli ʼae ʼe tuʼu ʼi te tohi+ ʼae neʼe lau ia muʼa ʼo te hau ʼo Suta. 25 ʼE lahi anai toku ita ʼae ka to ki te koga meʼa ʼaeni pea ʼe mole malū ifo anai,+ he neʼe natou liʼaki au+ pea neʼe natou tutu ke kohu ni sakilifisio ki he tahi age ʼu ʼatua, ʼo fakatupu ai toku hauhau+ ʼuhi ko te ʼu gaue fuli ʼo ʼonatou nima.’ ” 26 Kae koʼeni te meʼa ʼae ʼe tonu ke kotou ui ki te hau ʼo Suta ʼae neʼe ina fekauʼi koutou ke kotou olo ʼo fakafehuʼi ia Sehova: “Koʼeni te folafola ʼa Sehova, te ʼAtua ʼo Iselaele ʼo ʼuhiga mo te ʼu folafola ʼae neʼe ke logo ki ai:+ 27 ‘Neʼe ke logo ki te meʼa ʼae neʼe au tala ʼo ʼuhiga mo te koga meʼa ʼaeni pea mo te hahaʼi ʼae ʼe nonofo ai, pea neʼe malave ki* tou loto. Pea neʼe ke fakamalalo ifo ia muʼa ʼo te ʼAtua. ʼEi, neʼe ke fakamalalo ifo ʼi ʼoku muʼa, mo ke hae ʼou kofu pea mo ke tagi ʼi ʼoku muʼa. Koia, neʼe au toe logo foki mo au ki tau faikole,+ ʼe ko te ui ʼaia ʼa Sehova. 28 Koia, ʼe au tuku fakatahi anai koe mo ʼau kui,* pea ʼe ʼavaifo anai koe ʼi te tokalelei, pea ʼe mole sio anai ʼou mata ki te ʼu malaʼia fuli ʼae ka au fakahoko ki te koga meʼa ʼaeni pea mo te hahaʼi ʼae ʼe nonofo ai.’ ” ’ ”+
Neʼe natou olo ai leva ʼo fakaha age ki te hau te logo ʼaia. 29 Neʼe pauʼi leva e te hau te kau takitaki fuli ʼo Suta pea mo Selusalemi ke natou fakatahitahi age ki ai.+ 30 Pea neʼe alu te hau ki te fale ʼo Sehova mo te ʼu tagata fuli ʼo Suta, mo te hahaʼi ʼo Selusalemi, mo te kau pelepitelo pea mo te kau Levite, ʼei te hahaʼi fuli, mai ia natou liliki kia natou lalahi. Neʼe ina lau age leva kia natou te ʼu folafola fuli ʼo te tohi ʼo te fuakava ʼae neʼe maʼu ʼi te fale ʼo Sehova.+ 31 Neʼe tuʼu te hau ʼi tona tuʼuʼaga pea neʼe ina fai he fuakava*+ ia muʼa ʼo Sehova. Neʼe ina fakapapau ai ke fakalogo kia Sehova pea mo taupau ʼana fakatotonu, mo ʼana fakamanatu pea mo ʼana lekula ʼaki tona loto katoa mo tona malohi* katoa,+ ʼo ina fakahoko te ʼu folafola ʼo te fuakava ʼae neʼe tohi ʼi te tohi ʼaia.+ 32 Pea tahi ʼae meʼa, neʼe ina fakalotomalohiʼi ia natou fuli ʼae neʼe ʼi Selusalemi pea mo Pesamino ke natou taupau te fuakava ʼaia. Pea neʼe fai e te hahaʼi ʼo Selusalemi ʼo mulimuli pe ki te fuakava ʼa te ʼAtua, te ʼAtua ʼo ʼanatou kui.+ 33 Neʼe pulihi leva e Sosiasi te ʼu meʼa fakalialia* fuli ʼi te ʼu fenua fuli ʼo te kau Iselaele,+ pea neʼe tokoni ki te hahaʼi fuli ʼae ʼi Iselaele ke natou tauhi kia Sehova tonatou ʼAtua. ʼI te maʼuli katoa ʼo Sosiasi,* neʼe mole maliu kehe te hahaʼi mai te tauhi ʼae kia Sehova, te ʼAtua ʼo ʼanatou kui.
35 Neʼe fai e Sosiasi he Pasikate+ maʼa Sehova ʼi Selusalemi, pea neʼe matehi te ʼu manu ki te Pasikate+ ʼi te ʼaho 14 ʼo te ʼuluaki mahina.+ 2 Neʼe ina fakanofo te kau pelepitelo ki ʼanatou gaue pea neʼe ina fakalotomalohiʼi natou ke natou fakahoko ʼanatou gaue ʼi te fale ʼo Sehova.+ 3 Neʼe ina ui leva ki te kau Levite, ʼae neʼe natou akoʼi ki Iselaele katoa+ te Lao ʼa te ʼAtua pea neʼe natou maʼoniʼoni maʼa Sehova: “Kotou tuku te Aleka maʼoniʼoni ki te fale ʼae neʼe laga e Salomone, te foha ʼo Tavite, te hau ʼo Iselaele.+ ʼE mole kotou toe fata anai te Aleka.+ Pea ʼi te temi nei, kotou tauhi kia Sehova tokotou ʼAtua pea mo Iselaele, tana hahaʼi. 4 Pea kotou teuteu ki te gaue ʼo mulimuli ki ʼokotou famili pea mo ʼakotou kalasi, ohage pe ko te meʼa ʼae neʼe tohi e Tavite,+ te Hau ʼo Iselaele pea mo tona foha ko Salomone.+ 5 Kotou tutuʼu fakakutuga ʼi te koga meʼa taputapu ʼo mulimuli ki te ʼu famili ʼo ʼokotou tehina, ke feala ki te ʼu famili takitahi hanatou maʼu he kutuga Levite ʼe tokoni kia natou. 6 Kotou matehi te ʼu manu ki te Pasikate,+ mo kotou fakamaʼa ia koutou pea mo fai he ʼu teuteu maʼa ʼokotou tehina ke hoko ai te ʼu folafola ʼae neʼe fai e Sehova ʼaki ia Moisese.”
7 Neʼe foaki e Sosiasi ki te hahaʼi he ʼu akeno tagata pea mo he ʼu tao tagata kei mui, ko te ʼu manu ʼaia ki te Pasikate maʼa natou fuli ʼae neʼe kau ki ai. Neʼe ko manu ʼe 30 000 pea mo pipi ʼe 3 000. Neʼe toʼo e te hau te ʼu manu ʼaia mai ʼona koloa.+ 8 Neʼe toe foaki foki e tana kau ʼaliki ki te hahaʼi, mo te kau pelepitelo pea mo te kau Levite he meʼa ʼofa neʼe fai ʼaki he lotolelei. Ko Ilekisa,+ mo Sakalia pea mo Sehiele neʼe ko te kau takitaki ʼaia ʼo te fale ʼo te ʼAtua moʼoni. Neʼe natou foaki ki te kau pelepitelo he ʼu manu ʼe 2 600 pea mo he ʼu pipi ʼe 300 ʼae neʼe tonu ke sakilifisioʼi ki te Pasikate. 9 Ko Konania mo ʼona tehina ko Semaea pea mo Netanele, ʼo feia mo te kau pule ʼo te kau Levite, ia Asapea, mo Seiele pea mo Sosapate, neʼe natou foaki ki te kau Levite he ʼu manu ʼe 5 000 pea mo he ʼu pipi ʼe 500 ke sakilifisioʼi ki te Pasikate.
10 Neʼe kua ʼosi leva te ʼu teuteu ʼae neʼe fai, pea neʼe tutuʼu te kau pelepitelo ʼi ʼonatou tuʼuʼaga pea mo te kau Levite ʼo mulimuli ki ʼanatou kalasi,+ ohage pe ko tona fakatotonu e te hau. 11 Neʼe natou matehi te ʼu manu ki te Pasikate,+ pea neʼe afuhi e te kau pelepitelo ki te ʼaletale te toto ʼae neʼe fakatoʼo age e te kau Levite kia natou,+ kae lolotoga fohi e te kau Levite te ʼu kiliʼi manu.+ 12 Hili ʼaia, neʼe natou teuteuʼi te ʼu holokoseta ke tufa ki te hahaʼi, ʼae neʼe fakatuʼutuʼu fakakutuga ʼo mulimuli ki ʼonatou famili, ke feala hanatou momoli kia Sehova ohage pe ko tona tuʼu ʼi te tohi ʼa Moisese. Pea neʼe natou toe fai feia mo te ʼu pipi. 13 Neʼe natou fakamoho* ʼi te afi te ʼu molaga ʼo te Pasikate ohage pe ko te agamahani.+ Pea neʼe natou fakamoho ʼi te ʼu kulo mo te ʼu fakapaku ia te ʼu molaga taputapu, pea neʼe natou foimo ʼave ki te hahaʼi. 14 Neʼe natou teuteuʼi leva te kai ʼo te Pasikate maʼa natou pea mo te kau pelepitelo, koteʼuhi neʼe momoli e te kau pelepitelo, ia te hologa ʼo Alone, te ʼu holokoseta pea mo te ʼu koga ʼae ʼe gako ʼo kaku ki te poʼuli. Koia neʼe teuteuʼi ai e te kau Levite te kai ʼo te Pasikate maʼa natou pea mo te kau pelepitelo, ia te hologa ʼo Alone.
15 Pea neʼe tutuʼu te kau hiva, ia te ʼu foha ʼo Asafe,+ ʼi ʼonatou tuʼuʼaga ʼo mulimuli ki te fakatotonu ʼa Tavite,+ mo Asafe,+ mo Emani pea mo Setutune,+ te tagata ʼae neʼe ina fakaha ki te hau te ʼu meʼa ʼae neʼe ha. Pea neʼe tutuʼu te ʼu tagata leʼo matapa ʼi te ʼu matapa kehekehe.+ Neʼe mole ʼaoga ke natou mavae ʼi tanatou gaue, he neʼe teuteuʼi e ʼonatou tehina, ia te kau Levite te kai ʼo te Pasikate maʼa natou. 16 Koia, ʼi te ʼaho ʼaia, neʼe teuteuʼi leva te ʼu meʼa fuli ʼae neʼe fakamaʼua e Sehova ke fai ki te Pasikate+ pea mo momoli te ʼu holokoseta ʼi te ʼaletale ʼo Sehova, ʼo mulimuli ki te fakatotonu ʼa te Hau ko Sosiasi.+
17 ʼI te temi ʼaia, neʼe fai e te kau Iselaele ʼae neʼe nonofo ʼi ai te Pasikate pea mo te ʼAho Lahi ʼo Te ʼu Pane Hala Fakatupu lolotoga ʼaho ʼe fitu.+ 18 Neʼe heʼeki fai he Pasikate feia ʼi Iselaele talu mai te temi ʼo te polofeta ko Samuele. Pea neʼe mole he tahi age hau ʼi Iselaele neʼe ina fai he Pasikate ohage ko tona fai e Sosiasi,+ mo te kau pelepitelo, mo te kau Levite, mo Suta pea mo Iselaele katoa ʼae neʼe nonofo ʼi ai, pea mo te hahaʼi ʼo Selusalemi. 19 Neʼe fai te Pasikate ʼaia ʼi te 18 taʼu ʼo te pule ʼa Sosiasi.
20 Hili te ʼu meʼa fuli ʼaia, ʼi te kua toe gaohi e Sosiasi ia te fale lotu,* neʼe alu ia Neko,+ te Hau ʼo Esipito ʼo tau ʼi Kalekemisi, ʼae ʼe ʼi te Efalate. Neʼe alu leva ia Sosiasi ʼo tauʼi ia ia.+ 21 Koia neʼe fekauʼi ai e te hau ko Neko he ʼu tagata ʼave logo ke olo ʼo ui age ki ai: “Hau ʼo Suta, he koʼe ʼe ke haʼu ʼo tauʼi au? ʼE mole au haʼu ʼo tauʼi koe ʼi te ʼaho nei, kae ʼe au haʼu ʼo tauʼi he tahi age puleʼaga, pea ʼe ui mai e te ʼAtua ke au fakavilivili. ʼAua naʼa ke fakafeagai ki te ʼAtua ʼae ʼe nofo mo au, naʼa ina pulihi koe.” 22 Kae neʼe alu pe ia Sosiasi. Pea neʼe ina tui he tahi age ʼu teu ke mole iloʼi ia ia+ pea neʼe alu ʼo tauʼi ia ia, pea neʼe mole fakalogo ki te ʼu palalau ʼa Neko, ʼae neʼe fakaha age e te ʼAtua. Koia neʼe haʼu ai ʼo tauʼi te hau ʼo Esipito ʼi te Potu Fenua Laulelei ʼo Mekito.+
23 Pea neʼe fana e te kau fainahau te Hau ko Sosiasi, pea neʼe ui e te hau ki ʼana hahaʼi faifekau: “Kotou ʼave kehe au, he ʼe kua au lavea kovi.” 24 Koia, neʼe fakahifo ai ia ia e ʼana hahaʼi faifekau mai tana saliote tau ʼo tuku ki tana lua saliote tau, pea neʼe ʼave leva ki Selusalemi. Neʼe mate leva pea neʼe ʼavaifo ʼi te fale maka ʼo ʼana kui,+ pea neʼe fetagihi ia Suta mo Selusalemi katoa ʼo ʼuhiga mo Sosiasi. 25 Pea neʼe hiva e Selemia+ ia te hiva mate ʼo Sosiasi, pea ʼi te ʼu hiva mate ʼa te ʼu tagata mo fafine hiva fuli,+ ʼe kei talanoa aipe ʼo ʼuhiga mo Sosiasi ʼo kaku mai ki te ʼaho nei. Pea neʼe fai te tonu ʼae ke hiva te ʼu hiva mate ʼaia ʼi Iselaele, pea ʼe tuʼu te ʼu hiva ʼaia ʼi te tohi ʼo te ʼu hiva mate.
26 Pea ʼe tuʼu te toe ʼo te hisitolia ʼo Sosiasi pea mo te ʼu gaue ʼae neʼe ina fakaha ai tona ʼofa agatonu, ʼo mulimuli ki te ʼu meʼa ʼae ʼe tohi ʼi te Lao ʼa Sehova, 27 pea mo te ʼu meʼa ʼae neʼe ina fai, mai tona kamata ki tona fakaʼosi, ʼi te Tohi ʼo Te ʼu Hau ʼo Iselaele Pea Mo Suta.+
36 Neʼe toʼo leva e te hahaʼi ʼo te fenua te foha ʼo Sosiasi ko Seoase,+ ʼo natou fakanofo hau ia ia ʼi Selusalemi moʼo fetogi tana tamai.+ 2 Neʼe hau ia Seoase ʼi tona taʼu 23, pea neʼe pule lolotoga mahina ʼe tolu ʼi Selusalemi. 3 Kae neʼe fakahifo ia ia e te hau ʼo Esipito mai tona tuʼulaga hau ʼi Selusalemi, pea neʼe ina fakamaʼua ki te fenua ke natou totogi he ʼu taleta* siliva ʼe 100 pea mo he taleta aulo ʼe tahi.+ 4 Pea tahi ʼae meʼa, neʼe fakanofo e te hau ʼo Esipito ia Eliakimi, te tehina ʼo Seoase ke hau ki Suta mo Selusalemi, pea neʼe ina fetogi te higoa ʼo Eliakimi ʼaki te higoa ko Soakimi. Kae neʼe ʼave e Neko+ ia Seoase ki Esipito.+
5 Neʼe hau ia Soakimi+ ʼi tona taʼu 25, pea neʼe pule lolotoga taʼu ʼe 11 ʼi Selusalemi. Neʼe ina haga fai pe te meʼa ʼae ʼe kovi kia mata ʼo Sehova, tona ʼAtua.+ 6 Neʼe haʼu leva ia Nepukanesa,+ te Hau ʼo Papiloni ʼo tauʼi ia ia. Neʼe ko tana fakatuʼutuʼu ke ina haʼi ia ia ʼaki he ʼu seini kapa ʼe lua pea mo ʼave ki Papiloni.+ 7 Pea neʼe toʼo e Nepukanesa he ʼu meʼa kehekehe ʼo te fale ʼo Sehova ʼo ʼave ki tona fale hau ʼae ʼi Papiloni.+ 8 Pea ʼe tuʼu te toe ʼo te hisitolia ʼo Soakimi, te ʼu meʼa fakalialia ʼae neʼe ina fai pea mo te ʼu meʼa kovi fuli ʼo ʼuhiga mo ia, ʼi te Tohi ʼo Te ʼu Hau ʼo Iselaele Pea Mo Suta. Pea neʼe hau tona foha ko Seoakini ʼo fetogi ia ia.+
9 Neʼe hau ia Seoakini+ ʼi tona taʼu 18, pea neʼe pule lolotoga mahina ʼe tolu pea mo ʼaho ʼe hogofulu ʼi Selusalemi. Neʼe ina haga fai pe te meʼa ʼae ʼe kovi kia mata ʼo Sehova.+ 10 ʼI te kamata ʼo te taʼu,* neʼe fekauʼi e te Hau ko Nepukanesa hana ʼu tagata ke olo ʼo ʼaumai ia ia ki Papiloni,+ ʼo feia mo he ʼu meʼa maʼuhiga ʼo te fale ʼo Sehova.+ Pea neʼe ina fakanofo ia Setesiasi, te tehina ʼo te tamai ʼa Seoakini, ke hau ki Suta pea mo Selusalemi.+
11 Neʼe hau ia Setesiasi+ ʼi tona taʼu 21, pea neʼe pule lolotoga taʼu ʼe 11 ʼi Selusalemi.+ 12 Neʼe ina haga fai pe te meʼa ʼae ʼe kovi kia mata ʼo Sehova, tona ʼAtua. Neʼe mole fakamalalo ifo ia muʼa ʼo te polofeta ko Selemia,+ ʼae neʼe palalau ohage ko tona fakatotonu age e Sehova. 13 Neʼe toe agatuʼu foki ki te Hau ko Nepukanesa,+ ʼae neʼe ina fakatotonu age ke ina fai he fakapapau ʼi te huafa ʼo te ʼAtua. Kae neʼe uigataʼa aipe* mo lotofefeka, pea neʼe mole fia liliu mai kia Sehova, te ʼAtua ʼo Iselaele. 14 Neʼe heʼe agatonu ʼaupito te kau pule fuli ʼo te kau pelepitelo ʼo feia mo te hahaʼi, he neʼe natou fai te ʼu meʼa fakalialia fuli ʼo te ʼu puleʼaga, pea mo ʼulihi te fale ʼo Sehova+ ʼae neʼe ina fakamaʼoniʼoniʼi ʼi Selusalemi.
15 Neʼe fakatokaga natou e Sehova, te ʼAtua ʼo ʼanatou kui ʼaki ʼana tagata ʼave logo, ʼo ina fakatokaga tuʼumaʼu pe ia natou, he neʼe manavaʼofa ki tana hahaʼi pea neʼe mole loto ke maumauʼi tona fale lotu.* 16 Kae neʼe natou manukiʼi te ʼu tagata ʼave logo ʼa te ʼAtua moʼoni,+ mo natou fehihiʼa ki ʼana folafola+ pea mo vaʼi ʼana polofeta,+ ʼo kaku ki te hoko mai ʼo te hauhau ʼo Sehova ki tana hahaʼi,+ ʼo mole kei feala ai honatou fakamalolo.
17 Neʼe ina uga ai te hau ʼo te kau Kaletea+ ke ina tauʼi natou. Neʼe matehi e te hau tanatou kau tupulaga ʼaki te heleta+ ʼi te sagatualio.+ Neʼe mole manavaʼofa ia ki he tama, peʼe ko he taʼahine, peʼe ko he matuʼa, peʼe ko he maʼimoa.+ Neʼe tuku e te ʼAtua ia meʼa fuli ki ʼona nima.+ 18 Neʼe ina ʼave ki Papiloni te ʼu meʼa kehekehe fuli ʼo te fale ʼo te ʼAtua moʼoni, ʼae ʼe lalahi mo liliki, ʼo feia mo te ʼu koloa ʼo te fale ʼo Sehova pea mo te ʼu koloa ʼo te hau pea mo tana kau ʼaliki.+ 19 Neʼe ina tutu te fale ʼo te ʼAtua moʼoni,+ mo holoʼi te kaupa ʼo Selusalemi,+ mo tutu te ʼu kolo tau fuli, pea mo maumauʼi te ʼu meʼa maʼuhiga fuli.+ 20 Neʼe ina ʼave popula ki Papiloni ia natou ʼae neʼe mole matehi ʼaki te heleta,+ pea neʼe natou liliu ko he hahaʼi faifekau ʼa ia+ mo ʼona foha, ʼo kaku ki te kamata pule ʼo te puleʼaga ʼo Pelesia,+ 21 ke hoko ai te folafola ʼa Sehova ʼae neʼe fakaha e Selemia,+ ʼo kaku ki te ʼosi fai e te fenua te ʼu sapato ʼae neʼe tonu ke fai.+ ʼI te temi katoa ʼae neʼe siʼaki ai te fenua, neʼe fai te sapato ʼo kaku ki te ʼosi ʼo taʼu ʼe 70.+
22 ʼI te ʼuluaki taʼu ʼo te pule ʼa Siliusi+ te Hau ʼo Pelesia, neʼe hoko ai leva te folafola ʼa Sehova ʼae neʼe fakaha e Selemia.+ Neʼe uga e Sehova te ʼatamai ʼo Siliusi te Hau ʼo Pelesia ke ina tala ʼi tona puleʼaga katoa, pea ke ina toe tohi+ foki te faʼahi ʼaeni: 23 “Koʼeni te folafola ʼa Siliusi te Hau ʼo Pelesia: ‘Neʼe foaki mai kia au e Sehova, te ʼAtua ʼo te ʼatu lagi ia te ʼu puleʼaga fuli ʼo te kele,+ pea neʼe ina fakatotonu mai ke au laga he fale maʼa ia ʼi Selusalemi, ʼi Suta.+ Ko he tahi pe ia koutou ʼe kau ki tana hahaʼi, ke nofo ia Sehova tona ʼAtua mo ia, pea ke hake ki Selusalemi.’ ”+
Peʼe “fakafehuʼi e Salomone mo te hahaʼi ia Ia ʼi ai.”
Vakaʼi Te ʼu Kupu.
Hep. nèphèsh. Vakaʼi Te ʼu Kupu.
Hep. “he tuʼuga ʼaho.”
Peʼe “tagata heka hosi.”
Peʼe “tagata heka hosi ʼe toko.”
Peʼe lagi “mai Esipito mo Kue, pea neʼe totogi e te kau tagata faifakatau koloa ʼa te hau te ʼu hosi ʼaia mai Kue,” ʼe lagi fakaʼuhiga ki Silisia.
Peʼe “hahaʼi fetuku meʼa mamafa.”
Peʼe “fale hau.”
ʼE fakaʼuhiga ki te ʼu pane ʼae neʼe molagaʼi.
Peʼe “filo huʼa lotuma fakapoʼuli neʼe fai ʼaki te fuluʼi akeno.”
Ko he kole ʼe tahi, neʼe ko lite ʼe 220. Vakaʼi Te ʼu Fakamahino 2.14.
Ko he pate ʼe tahi, neʼe ko lite ʼe 22. Vakaʼi Te ʼu Fakamahino 2.14.
Peʼe “hahaʼi fetuku meʼa mamafa.”
Neʼe satimeta 44,5 te fasiga nima ʼe tahi, kae ʼe manatu ʼihi ko te “faʼahiga fakafuafua ʼo te temi muʼa” neʼe ko ni toe fasiga nima neʼe satimeta 51,8. Vakaʼi Te ʼu Fakamahino 2.14.
ʼE ui “120” ʼi ni tohi ʼafeā kae ui ʼi ni tahi age ʼu tohi mo ni fakaliliu “neʼe fasiga nima 20.”
Hep. “te fale lahi.” ʼE lagi fakaʼuhiga ki te Potu Taputapu.
Hep. “te fale.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
Ko te mamafa ʼo he sikele ʼe tahi, neʼe ko kalame ʼe 11,4. Vakaʼi Te ʼu Fakamahino 2.14.
Hep. “te fale.”
Ko tona fakaʼuhiga, ki te Potu Taputapu.
Peʼe “filo huʼa lotuma fakapoʼuli neʼe fai ʼaki te fuluʼi akeno.”
Peʼe “potu saute.”
Peʼe “potu noleto.”
Ko tona fakaʼuhiga “Ke Ina [ia Sehova] Fakatuʼu Ke Malohi.”
ʼE lagi fakaʼuhiga “ ʼAki Te Malohi.”
Ko teitei satimeta ʼe 7,4. Vakaʼi Te ʼu Fakamahino 2.14.
Ko he pate ʼe tahi, neʼe ko lite ʼe 22. Vakaʼi Te ʼu Fakamahino 2.14.
Hep. “te koga fale ʼae ʼi te taupotu.”
ʼE lagi hage tonatou agaaga ko he haga, pea neʼe fakaʼaogaʼi moʼo toʼo ʼaki te ʼu vavae ʼae neʼe tutu ʼo te ʼu malama.
Vakaʼi Te ʼu Kupu.
ʼE fakaʼuhiga ʼi heni ki te Potu Taputapu.
ʼE fakaʼuhiga ki te ʼAho Lahi ʼo Te ʼu Pola.
Peʼe “e te kau pelepitelo Levite.”
Hep. “ ʼaki tona nima.”
Hep. “tou foha ʼae ka tupu mai anai mai ʼou ifiifi.”
Neʼe satimeta 44,5 te fasiga nima ʼe tahi. Vakaʼi Te ʼu Fakamahino 2.14.
Hep. “ ʼaki tou nima.”
Peʼe “pea ʼe fakamaʼua ki ai e tona tehina ke faitutuku ʼo ʼuhiga mo ia totonu.” Ko tona fakaʼuhiga, kapau neʼe fai he fakapapau loi peʼe mole fakahoko he fakapapau, neʼe tonu ke hoko he malaʼia, he neʼe ko tona fakatuʼā ʼaia.
Hep. “te faitutuku.”
Hep. “neʼe faitotonu.”
Peʼe “fakamamahiʼi.”
Peʼe “matagafua.”
Hep. nèphèsh. Vakaʼi Te ʼu Kupu.
Peʼe “ ʼo ʼuhiga mo.”
Hep. “fakahaga kehe te fofoga ʼo.”
ʼE lagi fakaʼuhiga ki te kau Levite.
Vakaʼi Te ʼu Kupu.
Peʼe “te huʼaga ʼo Hamate.”
Vakaʼi Te ʼu Kupu.
ʼE ko te ʼaho ʼae neʼe hoa atu ki te ʼaho lahi, ia te 15 ʼaho.
Hep. “he ʼu foha ʼo Iselaele.”
Peʼe “toe laga.”
Vakaʼi Te ʼu Kupu.
Peʼe “gaue ia muʼa ʼo.”
Peʼe “tanakiʼaga koloa.”
Peʼe “fakaʼosi.”
Hep. “Eloti.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
Peʼe “he ʼu matetea.”
Hep. “neʼe fufu.”
Peʼe “folafola.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
Peʼe lagi “ ʼo hilifaki ki te ʼu meʼa ʼofa ʼae neʼe tatau tonatou maʼuhiga mo.”
Ko te mamafa ʼo he sikele ʼe tahi, neʼe ko kalame ʼe 11,4. Vakaʼi Te ʼu Fakamahino 2.14.
Neʼe tau fakaʼaogaʼi te ʼu meʼa tali tau ʼaia e te kau fainahau.
ʼI te ʼu Tohi Fakahepeleo, ko te mamafa ʼo he mina ʼe tahi, neʼe ko kalame ʼe 570. Vakaʼi Te ʼu Fakamahino 2.14.
ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
Hep. “kumi te fofoga ʼo.”
Peʼe “tagata heka hosi ʼe toko.”
Hep. “te ʼu kolo ʼae ke tau ai te ʼu saliote tau.”
ʼE fakaʼuhiga ki te Efalate.
Hep. “Neʼe ʼave leva ia Salomone ke takoto fakatahi mo ʼana kui.”
Peʼe “mamahi.”
Hep. “ ʼE liliu anai toku kauʼi tuhi veliveli ʼo matolu age ʼi te koga loto ʼo taku tamai.”
Hep. “fale la.”
Hep. “filifili ki.”
Hep. “ki te ʼu tao.”
Peʼe “neʼe ina fakamavetevete ʼihi ʼo ʼona foha ʼi.”
Hep. “puleʼaga.”
Hep. “te kau tagata lele.”
Hep. “Neʼe ʼave leva ia Lopoame ke takoto fakatahi mo ʼana kui.”
Hep. “filifili ki.”
Hep. “filifili ki.”
ʼE fakaʼuhiga ki he fuakava ʼe heʼe gata pea ʼe mole feala ke fetogi.
ʼE fakaʼuhiga ki te ʼu pane ʼae neʼe molagaʼi.
Hep. “filifili ki.”
Hep. “falanaki.”
Peʼe “fakamahino.”
Hep. “Neʼe ʼave leva ia Apisa ke takoto fakatahi mo ʼana kui.”
Vakaʼi Te ʼu Kupu.
Hep. “kaumatapa ʼe lua.”
Neʼe tau fakaʼaogaʼi te ʼu meʼa tali tau ʼaia e te kau fainahau.
Hep. “falanaki.”
Hep. nèphèsh. Vakaʼi Te ʼu Kupu.
Peʼe “maʼuhiga peʼe mole maʼuhiga.”
Vakaʼi Te ʼu Kupu.
Vakaʼi Te ʼu Kupu.
Peʼe “pipiki ʼateaina.”
Hep. “ ʼi ʼona ʼaho fuli.”
Hep. “neʼe ina laga.”
Hep. “tana laga.”
Peʼe “toe laga.”
Hep. “moʼo laga.”
Hep. “falanaki.”
Hep. “falanaki.”
Peʼe “tana lagolago.”
Peʼe “pipiki ʼateaina.”
Hep. “Neʼe ʼave leva ia Asa ke takoto fakatahi mo ʼana kui.”
ʼE mahino ia, neʼe mole ko te sino ʼo Asa ʼae neʼe tutu kae neʼe ko he ʼu meʼa fakamagoni.
Hep. “haʼele ʼi.”
Vakaʼi Te ʼu Kupu.
Peʼe “fakalotoʼi.”
Peʼe “leʼei.”
Hep. “laumalie.”
Peʼe “ ʼi te tokalelei.”
Vakaʼi Te ʼu Kupu.
Peʼe “pipiki ʼateaina ki te ʼAtua.”
Peʼe “mo te meʼa ʼae ʼe lelei.”
Peʼe lagi “Meunite.”
ʼE mahino ia, ʼe ko te Tai Mate.
Hep. “fakahaga tona fofoga.”
Hep. “ ʼonatou foha.”
Vakaʼi Te ʼu Kupu.
Peʼe “faʼa kataki.”
Ko tona fakaʼuhiga “Tapuakina.”
Hep. “Neʼe ʼave leva ia Sosafate ke takoto fakatahi mo ʼana kui.”
ʼE fakaʼuhiga ki he hakoga.
Peʼe “faiaga ʼi te faʼahi fakalaumalie.”
Peʼe “faiaga ʼi te faʼahi fakalaumalie.”
ʼE toe higoa foki ko Akasia.
Neʼe lagi fakaʼuhiga ki te tutu ʼo he ʼu ʼakau fakamagoni peʼe ko te iseso.
Hep. “ ʼofafine.”
Ko “Asalia” ʼi ʼihi tohi Fakahepeleo.
Peʼe “mahaki.”
Hep. “foha.”
Peʼe “fakanofo.” Vakaʼi Te ʼu Kupu.
Neʼe tau fakaʼaogaʼi te ʼu meʼa tali tau ʼaia e te kau fainahau.
Neʼe lagi ko he takaiga tohi neʼe tohi ai te Lao ʼa te ʼAtua.
Hep. “tona pou.”
Peʼe lagi “ ʼo kaku ki te kua foaki e te hahaʼi fuli tanatou tukuhau.”
Vakaʼi Te ʼu Kupu.
ʼE ko te tamai ʼa Sakalia.
ʼE fakaʼuhiga ki te kau Silia.
Peʼe “neʼe lahi ʼona mahaki.”
Peʼe “te foha.” Neʼe lagi ko “te ʼu foha” ʼi te Fakahepeleo moʼo fakaha te maʼuhiga ʼo te foha ʼo Seosata.
Hep. “te fakatuʼu ʼo te fakatafito.”
Peʼe “fakamahino.”
Hep. “filifili ki.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
Hep. “neʼe ke.”
Hep. “fale la.”
ʼE toe higoa foki ko Akasia.
ʼE teitei meta 178. Vakaʼi Te ʼu Fakamahino 2.14.
Hep. “Eloti.”
ʼE fakaʼuhiga kia Amatesia, tana tamai.
Lagi ʼi te maka.
Hep. “Neʼe ʼave leva ia Osiasi ke takoto fakatahi mo ʼana kui.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
Ko he kole ʼe tahi, neʼe ko lite ʼe 220. Vakaʼi Te ʼu Fakamahino 2.14.
Hep. “Neʼe ʼave leva ia Sotame ke takoto fakatahi mo ʼana kui.”
Peʼe “ukamea neʼe haka.”
Vakaʼi te kupu “Seʼeni” ʼi Te ʼu Kupu.
Hep. “fale.”
Hep. “Neʼe ʼave leva ia Akase ke takoto fakatahi mo ʼana kui.”
Hep. “veka anai.”
Peʼe “malolo.”
Vakaʼi Te ʼu Kupu.
ʼE fakaʼuhiga ki te ʼu pane ʼae neʼe molagaʼi.
Hep. “ ʼE kua fakafonu ʼokotou nima.”
Hep. “faitotonu age te loto ʼo.”
Peʼe “teuteuʼi.”
Hep. “tagata lele.”
Hep. “tagata lele.”
Hep. “neʼe foaki kia natou he loto ʼe tahi ke natou fakahoko.”
Vakaʼi Te ʼu Kupu.
Hep. “fakamalolo.”
Hep. “neʼe palalau ia Esekiasi ki te loto ʼo.”
Vakaʼi Te ʼu Kupu.
Peʼe “tokakaga.”
Peʼe lagi ko te olose.
Peʼe “fale kai.”
Ko he kupu Fakahepeleo ʼe ko tona fakaʼuhiga “fakafonu.”
Peʼe “tao.”
Hep. “Neʼe palalau ki ʼonatou loto.”
Hep. “he nima kakano.”
Hep. “ ʼona faʼahi maʼoluga.”
Peʼe “fale lotu.”
Peʼe “fakamelomelo.”
Peʼe lagi ko te olose.
Peʼe “fakamelomelo.”
Hep. “Neʼe ʼave leva ia Esekiasi ke takoto fakatahi mo ʼana kui.”
Vakaʼi Te ʼu Kupu.
ʼE fakaʼuhiga ki te ʼu fetuʼu.
Peʼe lagi “ ʼi he luo.”
Peʼe “fakamalū ifo te fofoga.”
Vakaʼi Te ʼu Kupu.
Peʼe “te ʼu tagata ʼae ʼe natou iloʼi te ʼu meʼa ʼae neʼe ha.”
Vakaʼi Te ʼu Kupu.
Hep. “Neʼe ʼave leva ia Manase ke takoto fakatahi mo ʼana kui.”
Vakaʼi Te ʼu Kupu.
Vakaʼi Te ʼu Kupu.
Vakaʼi Te ʼu Kupu.
Hep. “fale.”
Peʼe “hahaʼi fetuku meʼa mamafa.”
Hep. “ ʼaki te nima ʼo.”
ʼE mahino ia, neʼe tokaga ki te ʼu mutuʼi meʼa ʼo te kau pelepitelo peʼe ʼo te hau.
Hep. “malū ifo.”
Ko he ʼu palalau fakatuketuke ʼo ʼuhiga mo te mate.
Peʼe “toe fai te fuakava.”
Hep. nèphèsh. Vakaʼi Te ʼu Kupu.
Peʼe “taula ʼatua.”
Hep. “ ʼI ʼona ʼaho fuli.”
Peʼe lagi “taʼo.”
Hep. “fale.”
Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
ʼE lagi ko te temi ʼae ʼe mātala ai te ʼu fisiʼi ʼakau.
Hep. “neʼe ina fakafefeka tona kia.”
Hep. “nofoʼaga.”