Ako 13

ʼE Lava Feafeaʼi Hakotou Maʼu Te Lotu Moʼoni?

ʼE leleiʼia koa e te ʼAtua te ʼu lotu fuli, peʼe ina leleiʼia pe koa ia he lotu e tahi? (1)

He koʼe ʼe lahi te ʼatu ʼu lotu ʼe nātou lau ko nātou ko te kau Kilisitiano? (2)

ʼE lava feafeaʼi hakotou ʼiloʼi te kau Kilisitiano moʼoni? (3-7)

1. Neʼe fakatuʼu e Sesu te lotu faka Kilisitiano moʼoni pe e tahi. Koia ia ʼaho nei, ʼe tonu pe ke ʼi ai he kautahi e tahi, peʼe ko he kūtuga e tahi, ʼo te kau atolasio moʼoni ʼa Sehova ʼAtua. (Soane 4:​23, 24; Efesi 4:​4, 5) ʼE fakahā mai e te Tohi-Tapu ʼe tokosiʼi ia nātou ʼaē ʼe nātou haʼele ʼi te ala fāveliveli.​—⁠Mateo 7:​13, 14.

2. Neʼe fakakikite e te Tohi-Tapu ʼi te hili ʼo te mate ʼa te kau ʼapositolo, ko te ʼu akonaki loi pea mo te ʼu aga ʼaē ʼe mole ko he ʼu aga faka Kilisitiano ʼe hū māmālie anai ki te kokelekasio faka Kilisitiano. Ko te ʼu tagata ʼe nātou toho anai te hahaʼi tui ke nātou muliʼi ia nātou kae mole nātou muliʼi ia Kilisito. (Mateo 7:​15, 21-23; Gāue 20:​29, 30) Ko te tupuʼaga la ʼaia ʼo tatatou sio ki te ʼatu ʼu lotu ʼe nātou lau ko nātou ko te kau Kilisitiano. ʼE lava feafeaʼi hatatou ʼiloʼi te kau Kilisitiano moʼoni?

3. Ko te fakaʼiloga makehe ʼo te kau Kilisitiano moʼoni ʼe ko tanatou feʼofaʼofani moʼoni. (Soane 13:​34, 35) ʼE mole akoʼi nātou ke nātou manatu ʼe nātou maʼuhiga age ʼi ʼihi hahaʼi ʼo he tahi fenua peʼe ʼo he tahi ʼu lanu. ʼE mole akoʼi nātou ke nātou fehiʼa ki te hahaʼi ʼo ʼihi age fenua. (Gāue 10:​34, 35) Pea ʼe mole nātou kau ki te ʼu tau. Ko te kau Kilisitiano moʼoni ʼe nātou fefakatokagaʼaki ia nātou ohage he ʼu tēhina pea mo tuagaʼane.​—⁠1 Soane 4:​20, 21.

4. Ko te tahi fakaʼiloga ʼo nātou ʼaē ʼe nātou kau ki te lotu moʼoni, ʼe ko tanatou fakaʼapaʼapa lahi ki te Tohi-Tapu. ʼE nātou fakamoʼoni ʼe ko te Folafola ʼa te ʼAtua pea ʼe nātou tui ki te ʼu meʼa ʼaē ʼe ina fakahā. (Soane 17:17; 2 Timoteo 3:​16, 17) ʼE maʼuhiga age kia nātou te Folafola ʼa te ʼAtua ʼi te ʼu manatu peʼe ko te ʼu agaʼi fenua fakatagata. (Mateo 15:​1-3, 7-9) ʼE nātou faigaʼi ke nātou mulimuli ki te Tohi-Tapu ʼi te ʼaho fuli. Koia ʼe mole kehe te ʼu meʼa ʼaē ʼe nātou akonakiʼi pea mo te ʼu meʼa ʼaē ʼe nātou fai.​—⁠Tito 1:​15, 16.

5. ʼE toe maʼua foki ki te lotu moʼoni ke fakaʼapaʼapa ki te huafa ʼo te ʼAtua. (Mateo 6:⁠9) Neʼe fakahā e Sesu ki te hahaʼi te huafa ʼo te ʼAtua, ia Sehova. ʼE tonu foki ke toe fai feiā mo te kau Kilisitiano moʼoni. (Soane 17:​6, 26; Loma 10:​13, 14) Ko ai koa te hahaʼi ʼaē ʼi tokotou kolo, ʼe nātou palalau ki ʼihi ʼo ʼuhiga mo te huafa ʼo te ʼAtua?

6. Ko te kau Kilisitiano moʼoni ʼe tonu ke nātou faka mafola te Puleʼaga ʼo te ʼAtua. Neʼe fai e Sesu te faʼahi ʼaia. Neʼe palalau tuʼumaʼu ki te Puleʼaga. (Luka 8:⁠1) Neʼe ina fakatotonu ki tana kau tisipulo ke nātou faka mafola te logo ʼaia ʼi te kele katoa. (Mateo 24:14; 28:​19, 20) ʼE tui te kau Kilisitiano moʼoni ʼe ko te Puleʼaga tokotahi pe ʼo te ʼAtua ʼaē ka ina foaki anai te tokalelei mo te fīmālie moʼoni ki te kele.​—⁠Pesalemo 146:​3-5.

7. Ko te kau tisipulo ʼa Sesu ʼe mole tonu ke nātou kau ki te mālama agakovi ʼaenī. (Soane 17:16) ʼE mole nātou pipiki ki te ʼu meʼa faka politike ʼo te malamanei pea mo te ʼu maveuveu faka sosiale. ʼE nātou tekeʼi te ʼu māmio kovi pea mo te ʼu aga māhani ʼo te malamanei. (Sake 1:27; 4:⁠4) ʼE feala koa hakotou maʼu he kūtuga faka lotu ʼi tokotou koga meʼa ʼe nātou maʼu te ʼu fakaʼiloga ʼaia ʼo te Lotu Faka Kilisitiano moʼoni?

[Paki ʼo te pasina 27]

ʼE feʼofaʼofani te kau Kilisitiano moʼoni, ʼe nātou fakaʼapaʼapa ki te Tohi-Tapu, pea mo nātou faka mafola te Puleʼaga ʼo te ʼAtua