Tohi Mai Te Kolesi Pule

Puleʼaga:

Fakakaukauʼi age muʼa ʼe ke kau ʼi te kau apositolo pea ʼe ke ʼi te Moʼuga ʼo Oliveto. ʼE ʼasi atu ia Sesu. Pea ʼi te temi ʼae ʼe hake ai ki te lagi ʼe ina ui fenei: “ ʼE kotou maʼu anai te malohi moka hifo mai ia te laumalie maʼoniʼoni kia koutou, pea ʼe kotou liliu anai ko ʼaku fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:8) Kotea anai ka ke logoʼi?

ʼE lagi ke tuʼania te lahi ʼo te gaue, ʼo ke feuiʼaki: ‘ ʼE feafeaʼi anai hamatou fakahoko te toe gaue ʼaia “ ʼo kaku ki te ʼu potu taupotu ʼo te kele,” kae ʼe matou tokosiʼi?’ ʼE ke manatuʼi te ʼu palalau ʼae neʼe fai e Sesu ʼi muʼa ʼo tana mate: “ ʼE mole lahi age he kaugana ʼi tona pule. Kapau neʼe natou fakatagaʼi au, ʼe natou toe fakatagaʼi anai mo koutou. Kapau neʼe natou mulimuli ki taku folafola, ʼe natou toe mulimuli anai ki takotou folafola. Kae ʼe natou fai anai ia te ʼu meʼa fuli ʼaia kia koutou ʼuhi ko toku huafa, koteʼuhi ʼe mole natou iloʼi ia ia ʼae neʼe ina fekauʼi mai au.” (Soa. 15:20, 21) ʼE lagi ke feuiʼaki: ‘ ʼE feafeaʼi haku fakahoko katoa taku gaue faifakamafola moka hoko mai te fakafeagai mo te fakataga?’

ʼE tou toe fai pe te ʼu fehuʼi ʼaia ia ʼaho nei. Ko tatou ko te kau Fakamoʼoni ʼa Sehova, pea ko tatatou gaue ko te fakamafola ʼo te logo lelei “ ʼo kaku ki te ʼu potu taupotu ʼo te kele,” ki “te hahaʼi ʼo te ʼu fenua fuli pe.” (Mat. 28:19, 20) ʼE feafeaʼi hatatou fakahoko te gaue ʼaia, tafito la moka hoko mai te fakataga?

ʼE fakamatala ʼi te tohi ʼo Gaue pe neʼe tokoni feafeaʼi ia Sehova ki te kau apositolo pea mo te kau Kilisitiano ʼo te ʼuluaki sekulo, ke natou lava fakahoko ia te gaue. Koia ʼe tou vakaʼi anai ʼi te tohi ʼaeni ia te ʼu aluʼaga faigataʼa neʼe hoko ʼi te temi ʼaia. ʼE kotou punamaʼuli anai ʼi te fakatokagaʼi, ko te ʼu aluʼaga ʼae neʼe hoko ki te hahaʼi ʼa Sehova ʼi te ʼuluaki sekulo, koia pe ʼae ʼe toe hoko ʼi totatou temi. Neʼe tatau tatatou gaue, ʼo feia mo tatatou faʼahiga fakatuʼutuʼu ia te gaue. Ka tou fakakaukauʼi te ʼu aluʼaga ʼaia, ʼe tou tui papau ai, ʼe haga takitaki e Sehova ia te koga ʼo tana kautahi ʼae ʼi te kele.

ʼE matou fakaʼamu ʼe kotou maʼu anai he fakalotomalohi ʼi takotou ako ia te tohi ʼo Gaue, mo kotou tui ʼe tokoni atu anai ia Sehova ʼaki tona laumalie maʼoniʼoni. ʼOfa pe ke kotou haga foaki he fakamoʼoni katoa ʼo ʼuhiga mo te Puleʼaga ʼo te ʼAtua pea mo kotou tokoni ki te hahaʼi ke natou maʼu ia te ala ʼae ʼe taki ki te haofaki.​—Gaue 28:23; 1 Tim. 4:16.