Neʼe ʼAu Līaki Taku Fialahi ʼo ʼAu Maʼu Ai Leva Ia Te Fīmālie

ʼI TE taʼu 1970, neʼe ko toku taʼu 23 pea neʼe ʼau mānumānu. Neʼe ʼau gāue ʼi te fale motokā ʼi Ivrea, ʼi Italia pea neʼe ʼau pule gāue ai. Neʼe ʼau loto ʼaupito ke ʼiloa ʼau. Kae logope te ʼu meʼa ʼaia neʼe ʼau loto mamahi. Koteā tona tupuʼaga?

Ko toku ʼohoana neʼe lahi pe tana ʼalu ki te ʼu fale kava mo tona ʼu kaumeʼa, pea mo ina tuku ʼau mo te ʼu maʼua tāfito ʼo te famili. Ko tomā vāhaʼa faka taumātuʼa neʼe haʼele kovi. ʼE mā ke pe ki he ʼu kiʼi meʼa noa. Ko tona fua, neʼe ʼau maʼu te ʼu fakakaukau ʼe mole lelei.

‘ ʼE mole ʼi ai he tahi ʼe ʼofa moʼoni kia tatou’, ko taku ʼui ʼaia. ʼE nātou loto pe, ke nātou maʼu te meʼa ʼaē ʼe lelei ʼi tokotou ʼu tuʼulaga. Koʼeni taku ʼui: Ko te ʼAtua ʼe mole maʼuli ia, koteʼuhi ka na pau la ʼe maʼuli, ʼe mole ina tuku anai he ʼu mamahi pea mo he ʼu aga kovi feiā. ʼE mole he ʼuhiga ʼo te maʼuli heʼe ko te lele pe ia ki te mate. ʼE mole ʼau mahino ki te tupuʼaga ʼo te ʼu meʼa fuli ʼaia.

Te kamataʼaga ʼo te fetogi

ʼI te taʼu 1977, ko te ʼu Fakamoʼoni ʼa Sehova e lua neʼe nā fisifisi ʼi tomā matapā. Ko toku ʼohoana, ʼaē ko Giancarlo, neʼe ina fakaafe nāua ke nā hu mai ki fale, pea mo nātou felogoi ai. ʼI tana fakatuʼutuʼu ke ina fakaliliu nāua ke nā hage ko ia, ko te tagata ʼe mole tui ko te ʼAtua ʼaē neʼe ina fakatupu ia te meʼa fuli ʼi te kele. Kae neʼe ko te ʼu Fakamoʼoni ʼa Sehova ʼaē neʼe nā fetogi tana fakakaukau!

ʼE mole tuai foki pea kamata fetogi leva ia te maʼuli ʼo Giancarlo. Kua loto faʼa kātaki, pea kua lahi tona temi ke tokaga ai kia ʼau pea mo tamā tamasiʼi fafine. Ko Giancarlo neʼe tau palalau mai ʼo ʼuhiga mo te ʼu meʼa ʼaē ʼe ina akoʼi, kae neʼe ʼau fakagata te felogoi.

Pea ʼi te tahi ʼaho neʼe felogoi ai mo te ʼu Fakamoʼoni, neʼe ʼau heka ki lalo pea mo ʼau fakalogo lelei. Neʼe nātou palalau ʼo ʼuhiga mo te fakaʼosi ʼo te ʼu faʼahiga meʼa ʼo te tuʼu ʼaenī pea mo te Puleʼaga ʼo te ʼAtua, mo te palatiso ʼi te kele, pea mo te toe fakatuʼuake mai te mate. Neʼe ʼau ʼofolele ʼosi! Neʼe mole ʼau moe ʼi po e tolu! Neʼe ʼau fia ʼiloʼi he tahi age ʼu meʼa, kae ʼi toku fialahi neʼe mole fai he ʼu fehuʼi ki toku ʼohoana. Koia, ʼi te tahi ʼaho neʼe ina ʼui fakamālohi mai kia ʼau: “Ko te ʼaho ʼaenī, ka ke fagono mai kia ʼau. ʼE ʼau maʼu fuli te ʼu tali ʼaē ki tau ʼu fehuʼi.” Pea mo ina fakahā mai te ʼu moʼoni ʼo te Tohi-Tapu.

Neʼe ʼui mai e Giancarlo ko Sehova ko te huafa ʼo te Tupuʼaga, ko tona kalitate tāfito ko te ʼofa, pea neʼe ina fekauʼi mai tona ʼAlo ko he totogi ke feala ai hatatou maʼu te maʼuli heʼegata, pea ʼi Halamaketone ʼe ina faka ʼauha te faʼahiga tuʼu kovi ʼaenī, pea ko Sesu Kilisito ʼi tona temi pule ʼaē ʼi taʼu e afe, ʼe ina fakatuʼuake anai mai te mate te hahaʼi. ʼE ina ʼui foki ko te hahaʼi ʼaē ka fakatuʼuake, ʼe nātou tuputupu anai ki te maʼuli haohaoa fakaʼatamai pea mo fakasino pea mo nātou fealagia ia te maʼu ʼo te maʼuli heʼegata ʼi te kele kua liliu ko te palatiso.

Hili ki ai te ʼaho, neʼe ʼau kaugā fagona mo toku ʼohoana ki te Fale ʼo te Puleʼaga. Pea neʼe ʼau ʼui age kia ia: “Ko te hahaʼi ʼe nātou feʼofaʼofani. ʼE ʼau fia haʼu ki heni heʼe ko te hahaʼi ʼe nātou fiafia moʼoni.” Talu mai te ʼaho ʼaia neʼe tatuʼu tuʼumaʼu ki te ʼu fono, pea mo kamata ai mo taku ako ʼo te Tohi-Tapu. Neʼe ʼau tui ʼaupito ki te ʼu meʼa fuli ʼaē neʼe ʼau ako pea mole ʼau ʼiloʼi papau ai ku ʼau maʼu te hahaʼi moʼoni ʼa te ʼAtua. ʼO mā foaki taumātuʼa tomā maʼuli kia Sehova ʼi tomā papitemaʼi ʼaē ʼi te taʼu 1979 ʼo sanualio.

Ko te minisitelio katoa

Hili ki ai te taʼu katoa, ʼi te fakatahi faka silikosikilipisio, neʼe fai ai ia te akonaki moʼo fakaloto mālohiʼi te minisitelio ʼo te kau ki te pionie katoa. Neʼe ʼau fia kau foki ki te gāue ʼaia, pea neʼe ʼau kole kia Sehova te faʼahi ʼaia. Kae neʼe ʼau faitama leva, pea ko taku ʼu fakatuʼutuʼu neʼe mole iku. ʼI te ʼu taʼu e fā ki muli age, neʼe mā maʼu tamā ʼu tamasiʼi e tolu. Ko te tokolua ia nātou ʼaia, neʼe hoko ki ai te ʼu tuʼutāmaki fakasino. Meʼa lelei pe, neʼe maʼu tonā ʼu faitoʼo.

ʼI te temi nei ʼe mole kei feala haku toe fakahomuli taku ʼu fakatuʼutuʼu ʼo ʼuhiga mo te gāue faka mafola katoa. Heʼe ku ʼau tuku taku gāue fakamālama ke feala ai haku fai fakalelei toku ʼu maʼua ʼi toku loto fale. Ko toku ʼohoana pea mo ʼau ʼe mā maʼuli pe ki te litotogi e tahi, heʼe kua mā līaki te ʼu meʼa ʼaē ʼe mole hona ʼuhiga. Pea ko Sehova neʼe ina tapuaki ʼaupito ia mātou, ʼo mole ina līaki mātou ke mātou masisiva pea mo tokaga aipe ki te ʼu meʼa ʼaē ʼe ʼaoga kia mātou.

ʼI te taʼu 1984 ko taku taʼahine ʼaē neʼe kua taʼu 15 pea neʼe mole heʼeki fualoa tana papitema, neʼe kamata aipe tana kau ki te minisitelio ʼo te pionie katoa. ʼI te temi pe ʼaia, ko toku ʼohoana neʼe fakanofo ko te tagata ʼāfea. Koteā te ʼui ʼo ʼuhiga mo ʼau? Neʼe hage pe kia ʼau ʼe mole heʼeki feala aipe taku pionie, pea neʼe ʼau fakatuʼutuʼu ke ʼau fai te ʼu hola e 30 ʼi te māhina ʼi te fai faka mafola. Neʼe iku taku fakatuʼutuʼu pea koʼeni leva taku ʼui kia ʼau totonu pe: ‘Mālo! Kua lahi ʼosi tau fai.’

Kae ko toku fialahi neʼe liliu ko toku fihifihia (Tāʼaga Lea 16:18). ʼI taku manatu kua lahi te ʼu meʼa ʼaē neʼe ku ʼau fai pea ʼe mole kei ʼaoga haku fai he ʼu meʼa moʼo hikihiki te ʼu meʼa fakalaumālie. ʼO hifohifo mamalie aipe leva toku maʼuli fakalaumālie, feiā aipe mo te ʼu kalitate ʼaē neʼe ʼau maʼu. ʼO aʼu ki te temi neʼe tautea ai ʼau.

ʼI te taʼu 1985 ko te ʼu taupau feʼaluʼaki pea mo tonā ʼu hoa neʼe nātou ʼomai ki tomā ʼapi ohage pe ko tanatou fai ʼaʼahi māhani ʼaē ʼi totatou ʼu kokelekasio. ʼI taku siosioʼi tanatou agavaivai, mo te ʼu sakilifisio faka kilisitiano ʼaē ʼe nātou fai, neʼe uga ai leva ʼau ke ʼau metitasio ki te ʼu meʼa fakalaumālie. ʼI te ʼu tohi ʼo te Sosiete Watch Tower neʼe ʼau kumi ai te talanoa ʼo ʼuhiga mo te agavaivai. Neʼe ʼau manatuʼi ia te agavaivai lahi ʼa Sehova ʼaē neʼe ina fakahā ʼi tana ʼu felogoi mo te tagata agahala (Pesalemo 18:35). Neʼe ʼau mahino ai ʼe tonu ke ʼau fetogi taku manatu.

Neʼe ʼau kolekole kia Sehova ke tokoni mai ke ʼau haga gāueʼi te agavaivai ke feala ke ʼau tauhi kia te ia ʼo mulimuli ki tana finegalo pea ke ina taki ʼau ke ʼau fakaʼaoga toku ʼu koloā mo ʼona faka kolōlia. Neʼe ʼau sinie taku kole ʼo ʼuhiga mo te gāue faka mafola katoa, pea neʼe ʼau kamata gāue katoa kia te ia ʼi te taʼu 1989 ʼo malesio.

Kua feala haku ʼui ʼi te temi nei ku ʼau fiafia moʼoni ʼi taku līaki toku fialahi. Kua ʼi ai te ʼuhiga moʼoni ʼo toku maʼuli: ko te tokoniʼi te hahaʼi ʼaē ʼe ʼaoga ke nātou ʼiloʼi ia Sehova, te ʼAtua moʼoni ʼaē ʼe mole mamaʼo ia nātou ʼaē ʼe nātou kumi ia ia. — Fakamatala e Vera Brandolini.