Ko Te Taumafa ʼAia ʼe Maʼuhiga Koa Kia Koutou?
KO TE māhina lafalafa ʼe ina fakamālamaʼi te kele ʼaki te mālama fakaʼofaʼofa. ʼI te koga fale ʼo te fale fata ʼi Selusalemi, ko te ʼu tagata e toko 12 neʼe nātou fakatahi kiai. Ko te toko hogofulu-ma-tahi neʼe nātou fagono fakalelei ʼi te temi ʼaē neʼe fai ai e tonatou Tagata Faiako te taumafa maʼuhiga pea mo ina fai te ʼu palalau maʼuhiga. ʼE ʼui fēnei e te fakamatala:
“Neʼe toʼo e Sesu [Kilisito] te pane, pea ʼi tana ʼosi fai te tapuaki, neʼe ina tofi leva, pea neʼe ina tufa ki te kau tisipulo, ʼo ʼui maʼana: ‘Koutou toʼo atu, koutou kai. Ko te meʼa ʼaenī ʼe ina fakatā toku sino.’ Pea neʼe ina toʼo te kalise pea, ʼi te ʼosi ʼo tana fakafetaʼi, neʼe ina foaki age kia nātou, ʼo ʼui maʼana: ‘Koutou ʼiʼinu fuli kiai; koteʼuhi ʼe ina fakatā toku “taʼataʼa ʼo te fuakava”, ʼaē ʼe tonu ke liligi maʼa te tokolahi ʼo ʼuhiga mo te fakamolemole ʼo te ʼu agahala. Kae ʼau tala atu kia koutou: Kailoa, ʼe molemo kei ʼau ʼinu anai ki te huʼa vite ʼaia ʼo aʼu ki te ʼaho ʼe ʼau ʼinu foʼou ai mo koutou ʼi te puleʼaga ʼo taku Tāmai.’ Pea ʼi te ʼosi ʼo tanatou hiva te ʼu fakavikiviki, neʼe nātou ʼolo ki te moʼuga ʼo te ʼu Oliveto.” — Mateo 26:26-30.
Neʼe hoko te taumafa ʼaia ʼi te ʼosi to ʼo te laʼā, ʼi te ʼaho 14 ʼo Nisani ʼo te māhina faka sutea ʼi te taʼu 33 ʼo totatou temi. Neʼe ʼuluaki fai e Sesu pea mo tana kau tisipulo te Pāsikate ʼaē ko te toʼotoʼoga mo fakamanatu te hāofaki ʼo Iselaele ʼi tana nofo popūla ʼi Esipito ʼi te sēkulō 16 ʼi muʼa ʼo totatou temi. Neʼe kapu e Kilisito ia Sutasi Isikaliote, ia ia ʼaē neʼe fakatuʼutuʼu ke ina kakaʼi. Koia ʼaē, ko Sesu tefua pe mo tana kau tisipulo agatonu e toko 11 ʼaē neʼe fai te taumafa ʼaia.
Ko te taumafa ʼaia neʼe mole ko he toʼotoʼoga moʼo faka ʼuhigaʼi ke taupau te Pāsikate faka sutea. Neʼe ko he meʼa foʼou ia ʼaē neʼe fakahigoaʼi leva ko te Taumafa ʼo te ʼAliki. ʼO ʼuhiga mo te toʼotoʼoga ʼaia, neʼe fakatotonu e Sesu ki tana kau tisipulo te meʼa ʼaenī: “Koutou haga fai te meʼa ʼaenī moʼo fakamanatu kia te ʼau.” (Luka 22:19, 20; 1 Kolonito 11:24-26). Koteā te tupuʼaga ʼo tana fai te palalau ʼaia? Pea ʼe feafeaʼi koa hona faka ʼuhiga kia tatou te meʼa ʼaia neʼe hoko ʼi te ʼu sēkulō ʼāfea?