Te ʼu Fehuʼi ʼa Te Kau Lautohi

Neʼe tou leleiʼia te ako ʼo te ʼu lea faka polofeta ʼo Taniela ʼaē neʼe talanoa kiai “Te Tule Leʼo.” Kae, he koʼe leva neʼe kehekehe te ʼu ʼaho ʼaē neʼe faka ʼuhiga kiai te ʼu temi e tolu vaelua ʼo te tohi ʼo te Fakahā 11:3 pea mo te ʼu ʼaho ʼaē neʼe faka ʼuhiga kiai ʼi te tohi “La Révélation: le grand dénouement est proche!”?

ʼE moʼoni, neʼe fakahā ʼi Te Tule Leʼo ʼo te ʼaho 1 ʼo Novepeli 1993 te kiʼi fakatonutonuʼi ʼo ʼuhiga mo te ʼaho ʼaē neʼe hoko ai te vaega ʼo Fakahā 11:3 ʼi totatou temi. Koteā tona tupuʼaga?

ʼUluaki, tou vakaʼi muʼa te vaega ʼo Fakahā 11:2, ʼe talanoa te fakaʼosi ʼo te vaega ki te ʼu “māhina e fāgofulu-ma-lua.” Tou hoko atu ʼaki te vaega 3: “ ʼE ʼau fai anai ke fai fakakikite taku ʼu Fakamoʼoni e lua ia ʼaho e 1 260 ʼo nā kofu ki te ʼu taga.” Ko te temi fea ʼaē ʼe hoko ai te vaega ʼaia?

ʼO ʼuhiga mo te faʼahi ʼaia, neʼe kua fualoa pe te ʼiloʼi e te kau Fakamoʼoni ʼa Sehova ko te lea fakakikite ʼaia neʼe hoko ki te kau Kilisitiano fakanofo ʼi te taʼu 1914 ʼi te temi ʼaē neʼe fakaʼosi ai leva “te ʼu temi fakakatofa ʼo te ʼu puleʼaga” (Te ʼu Temi ʼo te kau Senitile). (Luka 21:24; 2 Kolonito 1:21, 22) ʼI tana talanoa ʼo ʼuhiga mo te faʼahi ʼaia ʼe ʼui fēnei e te tohi La Révélation: le grand dénouement est proche!,a (1988) ʼi te pasina 164: “Neʼe ʼi ai te temi neʼe fakaʼiloga ko taʼu e tolu vaelua ʼi te temi ʼaē neʼe hoko ai te ʼu faigataʼaʼia ki te hahaʼi ʼa te ʼAtua ohage ko te ʼu meʼa ʼaē neʼe fakakikite ʼi henī—ʼo kamata mai te hoko fakapuna’maʼuli ʼo te ʼuluaki tau faka malamanei ʼi te lakaga fakaʼosi ʼo te taʼu 1914 pea ʼo hoko atu ki te kamataʼaga ʼo te taʼu 1918.”

Koutou fakatokagaʼi ko te ʼaho ʼaē neʼe fakaʼaogaʼi ko te ʼaho ʼaē neʼe “hoko ai te ʼuluaki tau faka malamanei ʼi te fakaʼosi ʼo te taʼu 1914 [ʼo kaku] ki te kamakamata ʼo te taʼu 1918.” Ko te potu ʼaia ʼe ʼalutahi mo te ʼaho ʼaē neʼe tau fakaʼaogaʼi, ohage la ko tona tuʼu mai ʼi te tohi “Alors sera consommé le mystère de Dieu,” ʼi tona ʼu pasina 281 ki te 283, (1969).*

Kae, neʼe talanoa Te Tule Leʼo ki te ʼu lea faka polofeta ʼa Taniela, ko he tohi ʼe talanoa tuʼa lua ki te temi ʼe feala ke fakatatau mo te temi ʼaē ʼe talanoa kiai te tohi ʼo te Fakahā ki muli age—ko taʼu e 3 1/2, peʼe ko māhina e 42. Ke ʼāsili age tatatou mahino, ʼe fakahā e te vaega ʼo Taniela 7:25 ʼe fakaogosia hoholo anai te kau maʼoniʼoni ʼa te ʼAtua “lolotoga te temi, pea mo he ʼu temi pea mo te vaeluaʼi temi,” pe ko temi e 3 1/2. Ki muli age ʼe fakakikite e Taniela 12:7 “te temi fakakatofa, mo he ʼu temi fakakatofa pea mo te vaeluaʼi temi,” pe ko temi e 3 1/2, ʼe fakaʼosi anai ia ʼaki “he maumauʼi ʼo te mālohi ʼo te hahaʼi maʼoniʼoni.”

Koia ʼe tou maʼu ʼi henī te fakahoko ʼo te ʼu lea faka polofeta pea mo te temi ʼe feala ke fakatatau te ʼu tohi ʼo Taniela 7:25, Taniela 12:7, pea mo te tohi ʼo te Fakahā 11:2, 3, ʼo toe feiā aipe ki te vaega ʼo Fakahā 13:5. Ko ʼatatou ʼu tohi neʼe nātou fakahā ko te ʼu vaega fuli ʼaia neʼe fakahoko lolotoga te ʼu ʼaho, ʼaē neʼe kamata ʼi te taʼu 1914 ʼo fakaʼosi ʼi te taʼu 1918. Kae kapau ʼe akoʼi takitahi te ʼu lea faka polofeta ʼaia, ko te ʼu ʼaho ʼaē kamata ai pea mo te ʼu ʼaho ʼaē ʼe nātou fakaʼosi ai ʼe ai leva tona kiʼi kehekehe.

Kae, neʼe ʼui fēnei e Te Tule Leʼo ʼo te ʼaho 1 ʼo Novepeli 1993: “Neʼe hoko feafeaʼi te ʼu lea faka polofeta fuli ʼaia?” ʼIo, ko te ʼu lea faka polofeta ʼo ʼuhiga mo te ʼu temi e 3 1/2 ʼaē neʼe talanoa kiai te tohi ʼa Taniela 7:25, Taniela 12:7, pea mo te tohi ʼo te Fakahā 11:3, kua ʼiloʼi papau ia ko “he ʼu lea faka polofeta ʼe tatau pe ia.” Koia, ʼe ʼalutahi pe tanatou kamata pea mo tanatou fakaʼosi.

ʼO ʼuhiga mo te fakaʼosi, neʼe fakahā e te nusipepa te agaaga ʼo te fakahoko tāfito ʼo te fakaogosia ki te kau fakanofo ʼa te ʼAtua (Taniela 7:25) ʼi te māhina ʼo Sūnio 1918 ʼi te temi ʼaē neʼe “fakatūʼa ia J. F. Rutherford pea mo te tahi age kau takitaki ʼo te Watch Tower Bible and Tract Society ʼaki te ʼu tukugakoviʼi loi ki te pilisoni loaloaga.” ʼE mahino ia ko te meʼa ʼaia ʼaē neʼe hoko neʼe ko “te fakaʼosi ʼo te fakaogosia ʼo te mālohi ʼa te kau maʼoniʼoni,” ohage ko tona fakahā ia Taniela 12:7.

Ka ʼe tou lau fakaholomuli mai te māhina ʼo Sūnio 1918, ke tou maʼu ai te kamataʼaga ʼo te ʼu temi e 3 1/2, ʼe tou aʼu ki te māhina ʼo Tesepeli 1914. ʼI te māhina totonu ʼaia ʼo te taʼu 1914, neʼe fili e te kau tēhina fakanofo te vaega tāfito ʼo te taʼu ʼaē neʼe ʼamanaki hoko age: “ ‘ ʼE koutou lavaʼi koa te ʼinu ʼo te ipu ʼaē ʼe ʼau ʼinu?’—Mateo 20:20-23.” Neʼe fai te fakatokaga ʼaenī e te alatike ʼaē neʼe ina fakahā te vaega ʼaia: “Ko ai ʼaē ʼe ina ʼiloʼi, kae ʼe lagi hoko anai he ʼahiʼahi makehe, ko he ipu ʼo te ʼu mamahi peʼe ko te ʼu ʼaluʼaga fakaufiufi ki te kau tisipulo agatonu ʼo te Akeno lolotoga te taʼu 1915!” Ohage ko te meʼa neʼe fakakikite e Taniela 7:25 ʼo ʼuhiga mo te ʼu ʼaho ʼaia ʼo te ʼu temi e 3 1/2, ‘ ʼe ina fakaogosia hoholo anai te kau maʼoniʼoni ʼo te ʼAtua Māʼoluga.’ Neʼe faigafua pe te fakaogosia ʼo nātou ʼaki ni ʼu loi koteʼuhi neʼe femili te ʼatu ʼu puleʼaga ia ʼi te ʼUluaki Tau Faka Malamanei. Koʼeni te manatu fakaʼosi: ko te ʼu lea faka polofeta tatau ʼaia e tolu—Taniela 7:25, 12:7, pea mo Fakahā 11:3—neʼe hoko ʼi te ʼu taʼu e 3 1/2, peʼe lolotoga te ʼu māhina e 42, ʼaē ʼe kamata ʼi te māhina ʼo Tesepeli 1914 pea fakaʼosi ʼi te māhina ʼo Sūnio 1918.

Ko te meʼa ʼaia ʼe ina fakaʼāsili fakatonutonuʼi age te ʼu ʼaho ʼaē neʼe hoko ai te vaega ʼo Fakahā 11:3. Ko te fakatonutonuʼi ʼaia ʼe ko he meʼa ʼe feala ke tou taupau maʼu ʼi ʼatatou fakakaukau mokā ʼe tou akoʼi peʼe tou fakaʼaogaʼi te tohi La Révélation: le grand dénouement est proche ʼi te temi ka haʼu.

[Nota ʼi te lalo pasina]