Ko Te Tohi-Tapu—Koteā Tona ʼUhiga Moʼoni?
“KO TE Tohi-Tapu ʼe ko he misitelio ia, ko he tohi neʼe mole tā ke tou mahino kiai,” ko te ʼui ʼaia ʼa te pule famili. ʼE ʼui fēnei e te tahi: “ ʼE ʼau ʼiloʼi ko te Tohi-Tapu ʼe ko he tohi maʼuhiga, kae ʼe faigataʼa tona mahino kiai.”
“Tokolahi te kau Kilisitiano ʼe mole lahi tanatou mahino ki te Tohi-Tapu,” ko te ʼui ʼaia ʼa te nusipepa (The Toronto Star). Neʼe ʼui fēnei e te fafine Katolika: “ ʼI taku nofo mo taku Tohi-Tapu ʼe ʼau fīmālie. ʼE ina foaki mai te tokalelei ki toku loto.” “ ʼE hage te Tohi-Tapu ko he kāpasā ʼe ina taki he tahi mai he tai ʼe hou pea mo tuʼu kovi ki he koga meʼa tokalelei,” ko te ʼui ʼaia ʼa te tagata tautai. “Ko te Tohi-Tapu ʼe ko te Folafola ʼa te ʼAtua neʼe foaki ki te malamanei pea ko te faitoʼo ʼaia ʼo te ʼu mamahi fakalaumālie,” ko te ʼu palalau ʼa te tagata neʼe kau ʼi muʼa ʼi te lotu Inituisi.
Ko te ʼu manatu ʼo ʼuhiga mo te maʼuhiga moʼoni ʼo te Tohi-Tapu ʼe tapuke pea mo kehekehe. Kae koteā tona ʼuhiga moʼoni?
Ko te Tohi-Tapu ʼe ko te tohi ʼe maʼuhiga age pea mo lahi age tona tufa. ʼE tuʼu ʼi loto te ʼu tali ki te ʼu faigataʼaʼia neʼe felāveʼi mo te tagata peʼe ʼamanaki hoko kia ia. Ko te ʼaoga ʼo tana ʼu tokoni ʼe mole maʼu hona fakatatau. Ko te ʼu lekula ʼo ʼuhiga mo te aga ʼaē ʼe tonu ke fai ʼe mole hona fakatatau. Ko tana logo ʼe mālohi pea mo fua manuʼia. Ko te tohi maʼuhiga makehe ʼaia e tahi ʼe tonu ke tou toʼo mai tatatou ʼu tānakiʼaga tohi, pea ke tou fakasiosioʼi lelei pea mo akoʼi fakalelei.
ʼE feala ke tou avahi te Tohi-Tapu ʼaki te falala katoa ʼe totonu, ʼe tāu mo te falala pea ʼe moʼoni. Ko te ʼu meʼa ʼaē neʼe hoko neʼe fakamatala e te Tohi-Tapu neʼe fakamoʼoni kiai te hisitolia ʼo te malamanei. Neʼe tuʼa lahi te fakahā e te ʼu maʼu faka alekeolosia ko te Tohi-Tapu ʼe mulimuli pe ki te ʼu meʼa ʼaē neʼe hoko pea ʼe moʼoni. Ko te talanoa fakahagatonu ʼa te kau tagata tā tohi e toko 40 ʼo te Tohi-Tapu ʼe fakahā ʼaki ai tanatou mole kākā pea mo tanatou agatonu. ʼAki te talanoa pe ʼaē ʼa te Tohi-Tapu ki te meʼa e tahi, ʼe ʼiloga ai ʼe mole haʼu ia mai he tagata. Ko te ʼu fakamatala ʼaē ʼe tuʼu ʼi loto ʼe moʼoni. Ko te hahaʼi ʼaē ʼe talanoa kiai neʼe maʼuʼuli moʼoni. Ko te ʼu koga meʼa pea mo te ʼu ʼaluʼaga ʼe talanoa kiai ʼe moʼoni. Pea tahi ʼaē, ʼe tuʼu ʼi te Tohi-Tapu te ʼu fakakikite fakaofoofo ʼe nātou fakahā fakalelei ko Sehova ʼAtua ko te Tupuʼaga ʼo te Tohi-Tapu.—2 Petelo 1:21.
Neʼe tokaga totatou Faiako Lahi ke aʼu te mālama ʼo tona finegalo pea mo tana ʼu fakatuʼutuʼu kia nātou ʼaē ʼe nātou fia fagono kiai. ʼIo, ʼe fakahā lelei mai e Sehova ʼe ina loto ko te faʼahiga hahaʼi fuape ke nātou ako tana Folafola pea ke nātou “aʼu ʼo maʼu te mālama totonu ʼo te moʼoni.” (1 Timoteo 2:3, 4; Tāʼaga Lea 1:5, 20-33) ʼE ko he meʼa ia ʼi te ʼu meʼa maʼuhiga tāfito ʼe tonu ke tou fai ʼi totatou maʼuli. Logope la ʼe mole ko he meʼa faigafua, kae ʼe tonu ke tou maʼu te mālama totonu. Neʼe mahino ki te kau ʼuluaki Kilisitiano te faʼahi ʼaia. Ko te tahi ia nātou neʼe ina ʼui fēnei: “Pea ʼe ʼau haga faikole, ke tuputupu aipe tokotou ʼofa ʼaki te mālama totonu pea mo te poto haohaoa; ke koutou fakahū te ʼu meʼa maʼuhiga tāfito.”—Filipe 1:9, 10; Kolose 1:9, 10.
Ko te Tohi-Tapu ʼe ko te meʼa tāfito ʼaia ʼe fakaʼaogaʼi e totatou Tupuʼaga moʼo fakahoko tona finegalo pea mo tana fakatuʼutuʼu ki te hahaʼi ʼo te kele, pea ʼe ina fakahā totatou tuʼulaga takitokotahi ʼi te fakatuʼutuʼu ʼaia. ʼE ina fakamatalatala te ʼu meʼa neʼe hoko ʼi te temi kua hili, pea ʼe talanoa ki te temi ka haʼu. ʼE fakahā e te Tohi-Tapu te akonaki ʼe totonu pea ʼe ina tuku mai te meʼa ʼaē ʼe tonu anai ke tou tui kiai peʼe kailoa. (Gāue 17:11; 2 Timoteo 3:16, 17) ʼE ina foaki mai te ʼu lekula ʼo ʼuhiga mo te aga ʼaē ʼe tonu anai ke muliʼi e te tagata, pea ʼe ina fakahā ki te tagata te ala ʼaē ʼe lelei pea mo manuʼia. (Mateo, ʼu kapite 5 ki te 7) ʼE ina fakahā lelei ko te Puleʼaga ʼo te ʼAtua ʼe ko te falalaʼaga pe ʼaia e tahi ʼo te malamanei pea ko tona puleʼaga ʼe ko te meʼa ʼaia moʼo faka tāpuhā tona huafa pea mo fakatonuhia tona tuʼi faʼitaliha. ʼE fakahā e te Tohi-Tapu, pe ko te ala fea ʼaē ʼe tonu ke tou muliʼi moʼo maʼu ʼo he ʼu felogoi lelei pea mo he ʼofa kia Sehova, ia Ia ʼaē ʼe ina foaki te maʼuli.
Pea tahi ʼaē, ko te Tohi-Tapu ʼe ko te tohi pe ʼaia e tahi ka ina faka fealagia anai kia koutou ke koutou maʼu te toe fakapale taulekaleka ʼaē neʼe fai maʼa te malamanei—ko te maʼuli heʼegata ʼi te palatiso, ʼi tonatou ʼuhiga tagata haohaoa. (Loma 6:23) Ko te ʼAlo ʼulu tokotahi ʼo Sehova ʼe ina ʼui fēnei mai: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, te ʼAtua moʼoni, pea mo ia ʼaē neʼe ke fekauʼi mai, ia Sesu Kilisito.” (Soane 17:3) ʼE mahino papau ia ko te tohi maʼuhiga ʼaia ʼe tonu anai ke ina uga tatou ke tou ako te meʼa ʼaē ʼe tonu ke tou fai moʼo maʼu te totogi, ia te maʼuli heʼegata. Ko te Tohi-Tapu ʼe ko he tohi neʼe tā ke tou mahino kiai, ohage ko tona fakahā anai e te alatike ka hoa mai.