Ko Te Tohi-Tapu Katoa ʼe ʼAoga Moʼo Akoʼi
1 ʼE lahi pea mo kehekehe te ʼu manatu ʼaē ʼo ʼuhiga mo te maʼuhiga ʼo te Tohi-Tapu. Kae, ʼe tou ʼiloʼi papau ʼe tuʼu ʼi te Tohi-Tapu te ʼu tali ʼo ʼuhiga mo te ʼu faigataʼaʼia ʼaē ʼe felāveʼi mo te hahaʼi, ʼo feiā aipe mo te takitaki ʼe tau mo ʼaoga ki totatou maʼuli takitokotahi. (Taag. 3:5, 6) Ko te fakapotopoto ʼo tana ʼu tokoni ʼe mole hona fakatatau. Ko te ʼu lekula ʼaē ʼe lagolago kiai ʼo ʼuhiga mo te aga ʼaē ʼe tonu ke fai ʼe mole hona fakatatau. Ko tana logo ʼe mālohi, pea “ ʼe feala ke ina ʼiloʼi lelei te ʼu manatu pea mo te ʼu fakatuʼutuʼu ʼaē ʼi te loto.” (Hep. 4:12) ʼE lava feafeaʼi koa hatatou tokoni ki niʼihi ke nātou ʼiloʼi, ʼe ʼaoga ke nātou toʼo te tohi ʼaia mai tanatou tānakiʼaga tohi, pea ke nātou fakasiosioʼi lelei pea mo akoʼi fakalelei? E lagi koutou fia mulimuli ki te ʼu manatu ʼaenī mokā ʼe koutou tufa anai Te ʼu Koga ʼo Te ʼu Tohi Faka Keleka Faka Kilisitiano pea mo te tohi Te Tagata ʼaē ʼe lahi tokotahi ʼo te ʼu temi fuli ʼi Novepeli.
2 Mai tona ʼaluʼaga ʼaē ʼe lahi te hahaʼi ʼe nātou tuʼania ʼo ʼuhiga mo te ʼu meʼa tāfito ʼaē ʼe ʼaoga kia nātou, e lagi ko te faʼahiga palalau ʼaenī ʼe uga anai tanatou tokaga:
◼ “Neʼe ʼau palalau mo te hahaʼi tokolahi ʼi te ʼu ʼaho ʼaenī, pea ʼe nātou tuʼania ʼo ʼuhiga mo te ʼu meʼa ʼaē ʼe tonu ke nātou totogi. Tokolahi ʼe nātou faiga ki te ʼu meʼa fakasino, pea ʼe tupu ai tanatou lotohoha. Kofea koa ʼaē ʼe feala ai ke koutou maʼu he ʼu tokoni lelei ʼo ʼuhiga mo te ʼu faʼahi ʼaia? [Koutou tuku ke ina fai atu hana tali.] Neʼe ʼau fakatokagaʼi ʼe foaki mai e te Tohi-Tapu te ʼu tokoni ʼe ʼaoga, ke feala ai hatatou tekeʼi te ʼu fihifihia ʼaia. Tuku muʼa ke ʼau fakahā atu he faʼifaʼitaki.” Tou fuli age te pasina 11 ʼo te kapite 35 ʼo te tohi Te Tagata ʼaē ʼe lahi tokotahi pea tou lau ia Mateo 6:25-26 ʼaē ʼe tuʼu ʼi te palakalafe 2. Tou fai he tahi fakamatala ʼo ʼuhiga mo te palakalafe 1 ʼo te pasina 12 ʼo te kapite ʼaia pea tou tuku ake te tohi.
3 Koʼeni te tahi manatu ʼe feala ke koutou fakaʼaogaʼi:
◼ “Tokolahi te hahaʼi ʼe hage ʼe nātou tui ki te ʼAtua pea mo nātou fakaʼapaʼapa kia te ia, kae ʼe mole nātou maʼu he ʼatamai mālama lelei ʼo ʼuhiga mo Tana Folafola, te Tohi-Tapu. Ko ʼihi neʼe mole heʼeki nātou sio ki he Tohi-Tapu lolotoga tonatou maʼuli. ʼI te taʼu 1983 neʼe ʼui fēnei e te pelesita ʼo Amelika ko Ronald Reagan, ʼe tuʼu ʼi te Tohi-Tapu te logo maʼuhiga ʼaupito pea ʼe tuʼu ʼi ‘loto te ʼu tali ʼo ʼuhiga mo te ʼu faigataʼaʼia fuli ʼaē ʼe hoko tuʼumaʼu ki te tagata.’ Ko te meʼa ʼaē neʼe ina ʼui, ʼe ina fakamanatuʼi mai kia tatou te ʼu meʼa ʼaē neʼe ʼui tonu e Sesu. [Lau ia Mateo 4:4.] ʼE koutou tali koa la te manatu ʼaia? [Koutou tuku ke ina fai atu hana tali.] Neʼe fakaʼaogaʼi tuʼumaʼu e Sesu te Tohi-Tapu ʼi tana ʼu faiakonaki. [Fakahā age te paki ʼi te kapite 21 ʼo te tohi Te Tagata ʼaē ʼe lahi tokotahi pea koutou lau te palakalafe 2 mo te 3] ʼI te temi nei kua fakaliliu te ʼu Evaselio ʼo Mateo, Maleko, pea mo Luka ʼi te lea Fakaʼuvea. Kapau ʼe koutou fia lau te ʼu Evaselio ʼaia, ʼe mātou tufa ki te hahaʼi mo te tohi ʼaenī heʼe tokoni kia tatou ke tou mahino ki te maʼuli ʼo Sesu ʼi te kele, ko tona totogi fakaʼofa pe ko te 650.”
4 Kapau ʼe maʼumaʼua ia ia ʼaē ʼe palalau mo koutou, ʼe feala hakotou fakahā fakanounou age te kiʼi pepa lotu ʼaē “Ko Te Malamanei ʼo Te Temi ʼAenī ʼe Hāo Anai Koa?” pea ke koutou fakatafito kiai he tahi ʼaʼahi, ʼo koutou ʼui fēnei age:
◼ “Koutou tokagaʼi te ʼu paki ʼaenī e lua, ko te tahi paki ʼo te vakalele ʼe ina fakatō ifo te ʼu pulu ʼi te temi tau, pea ko te tahi paki ʼo te kiʼi tamasiʼi ʼe pakupaku. [Tou fuli age te pasina 5] Koutou sio ki te ʼu paki ʼaenī ʼo te mafuike pea mo te tagata mahaki ʼi te lopitali. ʼE fakahā mai e te Tohi-Tapu ko te ʼu faʼahiga meʼa fakamataku ʼaia kua ʼamanaki ke pulihi. ʼI taku toe liliu mai, ʼe ʼau fia fakahā atu anai he meʼa maʼuhiga ʼe ʼaoga anai kia koe ʼo ʼuhiga mo te temi ʼaē ka hoko moʼoni anai te faʼahi ʼaia.” Tou tokakaga ʼo tohi te ʼaʼahi ki he moʼi pepa pea mo te meʼa ʼaē neʼe fia logo kiai.
5 Ko tatatou Faiako Lahi neʼe ina fakatuʼutuʼu ke maʼu e te hahaʼi fuli ʼaē ʼe nātou fia maʼu te ʼatamai mālama ʼo ʼuhiga mo tona finegalo. Ko te tokoni ki niʼihi ke nātou mahino ki te maʼuhiga moʼoni ʼo te Tohi-Tapu, ʼe ko he meʼa ʼe lelei ʼaupito ke tou fai moʼo tokoni kia nātou; heʼe ko te Tohi-Tapu ʼe feala ke ina hāofaki tonatou maʼuli.—Taag. 1:32, 33.