Ko Te Tohi-Tapu—Ko He Tohi Neʼe Tā Ke Tou Mahino Kiai

KO ʼIHI ʼe nātou ʼui fakahagatonu ko te Tohi-Tapu ʼe ko te Folafola ʼa te ʼAtua pea ʼe tonu anai ke muliʼi fakalelei. Ki ʼihi, “ko te logo ʼo te Tohi-Tapu ʼe faigataʼa ʼosi ia.” Ko te ʼui ʼaia ʼa te toko 12 ʼo te komite ʼo te tui pea mo te teolosia ʼo te ’Ēkelesia Logo Tahi lahi ʼi Kanata. Ki te manatu ia ʼa te tagata takitaki lotu ʼo te ’Ēkelesia Logo Tahi, ko Clifford Elliott, ki ʼihi “ko te Tohi-Tapu ʼe ko he meʼa ʼe fakapulipuli ia, ʼe mole faka ʼuhiga ki he tahi, ʼe mole kei ʼi ai hona ʼaoga.”

Ko te ʼu manatu ʼaia ʼe nātou lagaʼi te ʼu fehuʼi ʼe tonu ke maʼu kiai he ʼu tali. ʼE ʼi ai te ʼu fehuʼi maʼuhiga ʼi te ʼu fehuʼi ʼaia ohage la, He koʼe koa neʼe tohi ia te Tohi-Tapu? ʼE fakalilo koa ia pea mo faigataʼa ke mole tou mahino kiai? Ko te hahaʼi ʼe feala koa ke nātou mahino ki te Tohi-Tapu? Koteā te tokoni ʼe maʼuhiga kia tatou ke tou maʼu ai te ʼuhiga moʼoni ʼo te Tohi-Tapu? Pea he koʼe koa ko he mālama totonu ʼo te Tohi-Tapu ʼe ʼaoga ʼi te ʼu temi faigataʼa ʼaenī?

He Koʼe Koa Neʼe Tohi Ia Te Tohi-Tapu?

Ko te ako ʼo te Folafola ʼa te ʼAtua neʼe ko he meʼa maʼuhiga tuʼumaʼu kia nātou ʼaē ʼe nātou fia maʼu te ʼofa pea mo te tokaga ʼa te ʼAtua Māʼoluga, ko Sehova. Ko te ʼu hau, ko te kau pelepitelo, ko te ʼu mātuʼa, ko te ʼu tagata, ko te ʼu fafine pea mo te ʼu fānau,—ko te hahaʼi maʼu meʼa pea mo māsisiva—neʼe fakatotonu kia nātou ke nātou faka fealagia ʼi te ʼaho fuli he temi moʼo vakaʼi fakalelei te Folafola ʼa te ʼAtua.—Teutalonome 6:6, 7; 17:18-20; 31:9-12; Nehemia 8:8; Pesalemo 1:1, 2; 119:7-11, 72, 98-100, 104, 142; Tāʼaga Lea 3:13-18.

Ohage la, neʼe ʼui fēnei age kia Sosue: “Lau tuʼumaʼu te ʼu akonaki ʼo te tohi ʼo te Lao ʼi tau tauhi. Akoʼi ʼi te ʼaho mo te po, pea tokaga ʼo fakalogo kia meʼa fuli neʼe tohi ʼi loto. Pea ʼe fua lelei anai tou maʼuli pea mo lava lelei anai tau ʼu meʼa.” (Sosue 1:8, Today’s English Version) Ko te ako fakalelei pea mo te maʼuliʼi ʼo te Lao ʼa te ʼAtua ʼe nātou taki anai ki te meʼa lelei pea mo he manuʼia. Neʼe loto e Sehova ko te ʼu “faʼahiga tagata fuape” ke nātou mahino ki tana Folafola, te Tohi-Tapu, pea ke nātou toe fakalogo pe kia ia, ʼaki te ʼamanaki ʼaē ʼe nātou maʼu te maʼuli.—1 Timoteo 2:3, 4; Soane 17:3.

ʼE Faigataʼa Koa Ke Mole Tou Mahino Kiai?

ʼI muʼa ʼo te hake ʼa Sesu ki selo, neʼe ina fakahā lelei, ko tona finegalo ke hoholo he toe polokalama ako faka Tohi-Tapu ʼi te kele katoa. (Gāue 1:8) Neʼe ina ʼiloʼi ko te Tohi-Tapu neʼe tā ke tou mahino kiai. ʼI tana ʼosi fakamahino ʼaē ko Sehova neʼe ina foaki age kia ia te pule lahi ʼi selo pea mo te kele, neʼe ina fakatotonu fēnei age kia nātou: “Koutou ʼolo pea ke koutou fai ni ʼu tisipulo [peʼe ko he kau ako] ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”—Mateo 28:19, 20.

ʼI muʼa ʼo tonatou papitemaʼi, ko te kau tisipulo foʼou neʼe tonu muʼa ke akoʼi nātou ʼo ʼuhiga mo Sehova, mo tona ʼAlo, pea mo te gāue ʼa te laumālie maʼoniʼoni. ʼO hilifaki atu kiai, neʼe tonu ke akoʼi age kia nātou te lao ʼo te tuʼu ʼo te ʼu faʼahiga meʼa faka Kilisitiano. (1 Kolonito 9:21; Kalate 6:2) Moʼo fakahoko ʼo te faʼahi ʼaia, ko te hahaʼi ʼaē neʼe tāu mo nātou te logo, ʼe ʼaoga muʼa ke nātou faka tui ko te Tohi-Tapu neʼe haʼu mai te ʼAtua pea lua leva, neʼe tā ke mahino kiai.—Mateo 10:11-13.

Koteā koa te meʼa ʼe tonu ke tou fai ke tou mahino ki te Tohi-Tapu? Ko te ʼAlo ʼo te ʼAtua neʼe ina faiga faimate ʼo fakamahino te Tohi-Tapu. Neʼe ina ʼiloʼi ko te ʼu Tohi Taputapu ʼe nātou moʼoni pea ʼe tuʼu ai te finegalo ʼo Sehova. (Soane 17:17) ʼO ʼuhiga mo te gāue ʼaē neʼe hinoʼi age ki ai, neʼe ʼui fēnei e Sesu Kilisito: “Neʼe ʼau tupu pea neʼe ʼau haʼu ki te malamanei ʼo ʼuhiga mo te faʼahi ʼaia, moʼo fakamoʼoni ki te moʼoni. Ko ia ʼaē ʼe kau ki te moʼoni ʼe fagono ia kia te ʼau.” (Soane 18:37, TEV; Luka 4:43) Neʼe akoʼi age e Sesu te ʼu moʼoni kia nātou ʼaē neʼe ko ʼonatou ʼu loto pea mo tonatou ʼatamai neʼe fia fagono. Ia Luka 24:45, ʼe ʼui fēnei ai: “Pea neʼe ina [Kilisito Sesu] avahi katoa ai tonatou ʼatamai ke nātou mahino ki te Tohi-Tapu.”

ʼI te minisitelio ʼo Sesu, neʼe talanoa ʼāteaina pe ia ki te Folafola ʼaē neʼe tohi, ʼo ina fakamahinohino pea mo fakahā age te ʼu vaega ʼi “te lao ʼa Moisese pea mo te kau Polofeta pea mo te ʼu Pesalemo.” (Luka 24:27, 44) Ko nātou ʼaē neʼe nātou fagono ki tana ʼu fakamatalatala faka Tohi-Tapu neʼe malave kia nātou ʼuhi ko tana ʼu fakamatalatala neʼe tāsilo pea neʼe poto ʼi te fai akonaki. (Mateo 7:28, 29; Maleko 1:22; Luka 4:32; 24:32) Kia Sesu, ko te Tohi-Tapu neʼe ko he tohi neʼe faigafua pe hakita mahino kiai.

Ko Te Tohi-Tapu Pea Mo Te Kau Tisipulo ʼa Sesu

Ko te ʼapositolo ko Paulo, ko te faʼifaʼitaki ʼa Sesu Kilisito, neʼe ina ʼiloʼi te maʼuhiga ʼaē ʼo te akoʼi ʼo te Tohi-Tapu ki niʼihi. Neʼe ina toe ʼiloʼi pe foki ko te ʼu tohi ʼaia neʼe tā ke tou mahino kiai. Koia la ʼaē neʼe fai akonaki ʼi te kaugamālie pea neʼe ʼalu ki te ʼu ʼapi ʼo nātou ʼaē neʼe fia fagono ki te Tohi-Tapu, ʼo fakamahinohino kia nātou. Neʼe fakahā e Paulo tana manatu ʼo ʼuhiga mo te faʼahi ʼaia, ʼo fēnei: “ ʼE koutou ʼiloʼi neʼe mole ʼau fakatatāʼofi ia te fakahā atu kia koutou te ʼu meʼa fuli ʼaē ʼe ʼaoga, pe ko he ako ʼo koutou ʼi muʼa ʼo te hahaʼi peʼe ʼi te ʼu fale.” (Gāue 20:20, TEV) ʼI tana ʼu fai palalau, neʼe ina fakakaukauʼi nātou ʼaki te Tohi-Tapu, ʼo ina fakamahino pea mo fakamoʼoni tana ʼu manatu ʼaki te ʼu vaega. (Gāue 17:2, 3) Neʼe tokaga aipe ʼo tokoni niʼihi ke nātou mahino ki te ʼuhiga ʼo te Tohi-Tapu.

ʼE koutou holi fakamalotoloto koa ke koutou mahino ki te ʼu meʼa ʼaē neʼe akoʼi e Sesu pea mo tana kau tisipulo? (1 Petelo 2:2) Ko te hahaʼi ʼo te Pele ʼāfea neʼe nātou maʼu te holi ʼaia, pea neʼe nātou tali lelei te ʼu meʼa ʼaē neʼe nātou ʼiloʼi mai te ʼapositolo ko Paulo ʼo ʼuhiga mo Kilisito. Koia ʼi te ʼaho fuli pe neʼe nātou fia ako te Tohi-Tapu koteʼuhi ke nātou ʼiloʼi papau ko te logo lelei ʼaē neʼe nātou fagono kiai neʼe ko te moʼoni. ʼAki tanatou tali lelei ʼo te logo, “tokolahi neʼe nātou tui.”—Gāue 17:11, 12.

Ko he tahi ʼe fia mahino ki te Tohi-Tapu, ʼe tonu ke lotolelei, ke holi moʼoni ki te ako, ʼo toe feiā aipe ki te ‘maʼuhiga ʼo te ʼu meʼa fakalaumālie.’ (Mateo 5:3) ʼI te temi ʼaē neʼe fehuʼi age kia Sesu: “He koʼe e ke palalau kia nātou ʼaki te ʼu lea fakatātā?” neʼe ina tali fēnei age: “Kua tuku atu kia koutou te mahino ki te ʼu misitelio tapu ʼo te puleʼaga ʼo selo, kaʼe ki te hahaʼi ʼaenā neʼe mole tuku kia nātou.” Neʼe fakakikite ʼe ina ‘avahi anai tona gutu ʼaki he ʼu lea fakatātā, ʼe ina fakahā anai te ʼu meʼa neʼe fufū.’ (Mateo 13:10, 11, 35) Koia neʼe fakaʼaogaʼi e Sesu te ʼu lea fakatātā moʼo fakakehekehe he tahi ʼe lotonoa pea mo fia ʼiloʼi meʼa fuli, mai ia ia ʼaē ʼe fai fehuʼi fakamalotoloto. Neʼe ʼiloga te faiga fakamalotoloto ʼa te kau tisipulo ʼa Sesu ʼi te temi ʼaē neʼe nātou ʼolo ki te loto fale pea mo ia pea ʼui maʼa nātou: “Fakamahino mai kia mātou te lea fakatātā ʼaē ʼo te vao kovi ʼi te gāueʼaga.”—Mateo 13:36.

ʼE ʼiloga lelei, ʼe ʼaoga kia tatou he tokoni mo kapau ʼe tou fia mahino ki te Tohi-Tapu. Ko te tagata takitaki lotu ko Hal Llewellyn, ko te sikalaipe ʼo te teolosia, ʼo te tui pea mo te fakatahiʼi ʼo te ʼatu ʼu lotu kehekehe ʼo te ’Ēkelesia Logo Tahi, neʼe ina ʼui fēnei: “ ʼE maʼuhiga ke mahino kia tatou te ʼuhiga ʼo te Tohi-Tapu pea e feafeaʼi tona lau pea mo tona fakamatala.” Kae, tatau aipe mo kapau ʼe mole ʼiloʼi e te hahaʼi fuli, ko te meʼa ʼe tonu ke tou fakamoʼoni kiai, ʼe mole feala hakita mahino tokotahi ki te Tohi-Tapu. ʼE ʼaoga ke tokoni mai he tahi kia tatou.

Koteā Te Tokoni ʼAē ʼe Feala Ke Tou Maʼu?

ʼE tuʼu ʼi te Tohi-Tapu te ʼu palalau fakalilolilo, te ʼu fehuʼi faigataʼa, pea mo te ʼu talanoa loloto ʼe tonu ke fakamatalatala lelei. E lagi ko te ʼu fehuʼi ʼaia neʼe tonu ke fakapōʼuli, ʼaki he ʼu fakatatau maʼuhiga neʼe mole tonu ke ʼiloʼi ʼi te temi ʼaē neʼe tohi ai. Kae neʼe nātou hinoʼi fuli pe te ʼu fakatuʼutuʼu ʼa Sehova. Ohage la, ʼe ʼui ʼi te tohi ʼo Fakahā 13:18 “ko te numelo ʼo te manu fekai” ʼe ko te “onogeau hogofulu-ma-ono.” ʼE moʼoni, ʼe tou lau fēnei “ ʼi henī ʼe tonu ke maʼu te poto,” kae ko te ʼuhiga ʼo te mataʼi numelo ʼaia neʼe mole foaki ʼi te temi ʼaia. Kae, ko Sehova ʼaki tana kautahi neʼe ina faka fealagia ki tana ʼu kaugana agatonu ke nātou mahino ki tona ʼuhiga ia ʼaho nei. (Vakaʼi te talanoa: “Te Ala ʼAē Ki Te Mālama ʼo Te Tohi-Tapu.”) ʼE feala pe foki kia koutou ke koutou maʼu te mālama ʼaia mai ia nātou ʼaē kua nātou faiva ʼi te “fakaʼaogaʼi ʼo te folafola ʼo te moʼoni.”—2 Timoteo 2:2, 15, 23-25; 4:2-5; Tāʼaga Lea 2:1-5.

Neʼe tautau fakaʼaogaʼi e Sesu te ʼu lea fakatātā moʼo talanoa ki te tali peʼe ko te fakafisi ʼaē ki te logo ʼo te Puleʼaga. Neʼe ina fakahā ko ʼihi ʼe mole nātou tuputupu anai koteʼuhi ʼe nātou lotovaivai anai ʼi te fakafeagai ʼaē ʼo tonatou ʼu kaumeʼa pea mo tonatou ʼu kāiga. Ko ʼihi, ʼuhi ko te “mamahi pe ko he fakataga” ʼe nātou situʼa anai ki te logo ʼo te Puleʼaga. Pea ko ʼihi ʼe nātou tuku anai tonatou ʼu maʼua ʼaē ʼo te ʼaho fuli, “te hoha ki te ʼu faʼahiga meʼa ʼo te tuʼu ʼaenī pea mo te mālohi fakahala ʼo te ʼu koloā,” ke nātou lolomi te ʼofa ʼaē ia nātou ki te logo lelei. Kae ʼi te tahi ia faʼahi, ʼe ʼi ai leva ia nātou ʼaē ʼe nātou tali fakafiafia pea mo fia fagono ki te folafola maʼuhiga pea mo fia mahino ki tona ʼuhiga. ʼE nātou “tagi pea mo goʼegoʼe ʼo ʼuhiga mo te ʼu meʼa fakalialia fuli ʼaē ʼe lolotoga hoko” ʼi te Keletiate, ʼaē ʼe ina takuʼaki ʼe ina fai ʼaki te huafa ʼo Sesu Kilisito. Ko te faʼahiga hahaʼi ʼaia ʼe nātou holi fakamalotoloto ke akoʼi nātou ki te ʼu ala ʼo Sehova pea tahi ʼaē, ke nātou mahino ki te ʼu meʼa ʼaē ʼe nātou lau ʼi te Tohi-Tapu.—Mateo 13:3-9, 18-23; Esekiele 9:4; Isaia 2:2-4.

ʼE feala kia Sehova ke tokaga kia nātou fuli ʼaē ʼe nātou fia mālama ki tana ʼu fakatuʼutuʼu ke nātou maʼu te tokoni ʼaē ʼe ʼaoga kia nātou. Moʼo fakatā ʼo te faʼahi ʼaia, ʼe fakahā e te Tohi-Tapu ko te laumālie ʼo Sehova neʼe ina taki ia te tagata ʼave evaselio ko Filipe, ke ʼalu ʼo tokoni ki te tagata Etiopea neʼe ina lau te tohi ʼo Isaia ʼi tana fagona ʼaē mai Selusalemi. ʼI tana liliu mai ki tona ʼapi, neʼe ina lau te tohi ʼaia ʼi tana saliote. ʼO mulimuli pe ki te taki ʼaē ʼa te laumālie maʼoniʼoni ʼa Sehova, neʼe lele ia Filipe ki te saliote pea mo fehuʼi maʼana: ‘E ke mahino koa ki te meʼa ʼaē e ke lau?’ Neʼe lahi te agavaivai pea mo te agatonu ʼa te tagata ʼaia ke mahino kia ia neʼe ʼaoga kiai he tokoni. ʼAki te loto fiafia, neʼe akoʼi e Filipe te tagata hālofia ʼaia ʼi te faʼahi fakalaumālie pea mo fia logo ki te akonaki. Ko te ako ʼaia neʼe tokoni ki te tagata Etiopea ke mahino ki te ʼu tohi ʼo te Tohi-Tapu. ʼI te temi leva ʼaia, kua mahino kia ia te meʼa ʼaē ʼe tonu ke ina fai, ke ina maʼu ai he felogoi lelei mo Sehova ʼo ina maʼu ai leva te maʼuli heʼegata. Neʼe fiafia, pea neʼe papitema ko te kaugana ʼa Sehova, ʼo ina fai te aga ʼaē ʼe lelei ki te ʼAtua.—Gāue 8:26-39.

ʼE feala ke ʼi ai hakotou Tohi-Tapu ʼi tokotou ʼapi, pea ʼe feala ke koutou lau tuʼumaʼu pe. ʼE mahalo pe neʼe kua koutou tau mo te fihifihia ʼaenī neʼe felāveʼi mo te tagata Etiopea agavaivai pea mo faiga fakamalotoloto. Neʼe mole feala ke mahino ki te meʼa ʼaē ʼe ina lau. Neʼe ʼaoga kia ia he tokoni pea neʼe mole lotolotolua ia ʼo tali te tokoni neʼe foaki fakalelei age e Sehova ʼAtua. Ohage pe ko Filipo, ʼe fiafia te kau Fakamoʼoni ʼa Sehova ʼi hanatou tokoni kia koutou ke koutou mahino ki te ʼu meʼa ʼa te ʼAtua ʼaē neʼe tohi ʼi tana Folafola, ia te Tohi-Tapu. ʼE nātou ʼiloʼi ko Sehova ʼaē neʼe ina foaki te Tohi-Tapu pea neʼe tā ke tou mahino kiai.—1 Kolonito 2:10; Efesi 3:18; 2 Petelo 3:16.

He Koʼe Koa ʼe Maʼuhiga Te Tohi-Tapu?

ʼE tou lolotoga maʼuʼuli nei ʼi te temi fakamataku tāfito ʼo te hisitolia ʼo te tagata. ʼE talanoa te Tohi-Tapu ki te faʼahi ʼaia ohage “ko te fakaʼosi ʼo te ʼu faʼahiga meʼa ʼo te tuʼu ʼaenī.” (Mateo 24:3) Ko te ʼu tuʼuga meʼa neʼe hoko moʼo fakahoko ʼo te lea faka polofeta ʼa te Tohi-Tapu talu mai te taʼu 1914, moʼo fakahā kua vave pe nei te haga ʼa te Puleʼaga ʼo te ʼAtua ʼi selo ʼo ‘molomoloki pea mo fakagata te ʼatu puleʼaga fuli ʼaia.’—Taniela 2:44.

Koutou lau te meʼa ʼaē neʼe fakakikite ʼi te Tohi-Tapu ia Mateo kapite 24, Maleko kapite 13, pea mo Luka kapite 21. ʼE koutou fakatokagaʼi anai ko te ʼu meʼa ʼaē neʼe fakamatalatala ʼe hoko ʼi te kele katoa. ʼE kau aipe foki te ʼu tau faka malamanei—ʼo kehekehe mo te ʼu tau fuli ʼaē neʼe hoko ʼi te ʼu temi muʼa. Talu mai te ʼUluaki Tau Faka Malamanei, ʼo mulimuli pe ki te ʼu lea faka polofeta, neʼe tou sio ki te ʼu hoge, te ʼu mafuike pea mo te manukinuki lahi ʼo te lao kua makehe age ʼosi. Pea ʼi te temi nei, ko te ʼu puleʼaga kua nātou aʼu ki te meʼa ʼaē ka ʼiloga fakalelei ai anai ko te fakaʼauha ʼo te malamanei kua vave pe. ʼO ʼuhiga mo te faʼahi ʼaia, neʼe tohi e te ʼapositolo ko Paulo ʼo fēnei: “Ko te ʼaho ʼo Sehova ʼe haʼu moʼoni ia ohage ko he tagata kaihaʼa ʼi te pōʼuli. Ka nātou ʼui anai: ‘Tokalelei pea mo fīmālie!’ pea ʼe tonu anai ke hoko fakafokifā he fakaʼauha kia nātou; . . . pea ʼe mole nātou hāo anai.” (1 Tesalonika 5:2, 3) Ko ai koa ia nātou ʼaē ka mole hāo? ʼE tali fēnei e Paulo: “Kia nātou ʼaē ʼe mole nātou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼaliki ko Sesu.” (2 Tesalonika 1:7-9) Ko te koga ʼo te fakaʼiloga neʼe tonu ke fakahoko e nātou ʼaē neʼe fakalogo ki te fakatotonu ʼaē neʼe fai ia Mateo 24:14 ʼaē ke faka mafola “te logo lelei ʼaenī ʼo te puleʼaga . . . ʼi te kele katoa.”

Ko te toko miliona kau Fakamoʼoni ʼa Sehova neʼe nātou fakahoko te fakatotonu ʼaia ʼi te ʼu fenua e 231 pea mo te ʼu motu. ʼE nātou ʼolo ki te ʼu ʼapi ʼo te hahaʼi pea mo nātou fakaafe te hahaʼi ke nātou ako te Puleʼaga ʼo Sehova. ʼE nātou fakamahino fakalelei age te aga ʼaē ʼe tonu ke nātou fai, ke nātou hāo mai te ʼu faʼahiga meʼa ʼo te tuʼu ʼaenī pea ke nātou maʼuʼuli ʼi te palatiso ʼaē ʼe mole toe ʼi ai anai he putu, he goʼegoʼe, he mamahi peʼe ko te mate.—Fakahā 21:3, 4.

Kua aʼu mai te temi fakaʼosi ʼo te mālama agakovi ʼaenī, pea ʼe ko he maʼua kia nātou fuli ʼaē ʼe nātou fia hāo ʼi te fakaʼosi ʼo te mālama ʼaenī ke nātou ʼiloʼi te meʼa ʼaē ʼe tonu ke fai moʼo ‘fakalogo ki te logo lelei’ pea ke nātou hāo ʼi te fakaʼauha. Mokā ʼolo atu leva te kau Fakamoʼoni ʼa Sehova ʼo ʼaʼahi koutou, he koʼe koa ʼe mole koutou tali muʼa ke koutou ako te Tohi-Tapu? Ko he tahi meʼa ʼe lelei age, he koʼe koa ʼe mole koutou kole age ke nātou ako te Tohi-Tapu mo koutou koteʼuhi ʼe koutou fia mahino kiai?

[Talanoa ʼo te pasina 8]

TE ALA ʼAĒ KI TE MĀLAMA ʼO TE TOHI-TAPU

NEʼE fakapapau mai e Sesu ʼi te hili ʼo tona mate pea mo tona fakatuʼuake, ʼe ina fakatuʼu anai te “tagata kaugana agatonu mo poto” ʼe gāue anai ko hana meʼa moʼo fakahoko palalau. (Mateo 24:45-47) Neʼe fakahā e te ʼapositolo ko Paulo te meʼa ʼaia ki te kau Kilisitiano ʼo Efesi ʼi tana tohi te meʼa ʼaē “ke ʼiloa ʼaki te kokelekasio, te poto lahi ʼo te ʼAtua, ʼo mulimuli ki te fakatuʼutuʼu heʼegata neʼe ina fakatuʼu ʼo ʼuhiga mo Kilisito, ko Sesu totatou ʼAliki.” (Efesi 3:10, 11) Neʼe ko te kokelekasio ʼo te kau Kilisitiano fakanofo, ʼaē neʼe tupu ʼi te Penikosite ʼo te taʼu 33 ʼo totatou temi, ʼaē neʼe tuku ifo kiai “te ʼu meʼa ke fakahā.” (Teutalonome 29:29) Ohage pe ko he kūtuga, ko te kau Kilisitiano fakanofo ko te kaugana agatonu mo poto. (Luka 12:42-44) Ko tonatou maʼua ʼaē neʼe hinoʼi age e te ʼAtua, ko te foaki ʼo he ʼatamai fakalaumālie ʼo ʼuhiga mo te ʼu “meʼa ʼaē neʼe fakahā.”

Neʼe mole gata ʼaki pe ʼi te hinoʼi ʼaē ʼo te ʼu lea faka polofeta faka Tohi-Tapu ia te Mesia, kae ʼe ina toe fakahaga pe foki ia tatou ki te kau Fakamoʼoni Fakanofo logo tahi ʼaē ʼe gāue nei ʼi tonatou ʼuhiga ko te tagata kaugana agatonu mo poto.* ʼE tokoni ia kia tatou ke tou ako te Folafola ʼa te ʼAtua. Ko nātou ʼaē ʼe nātou fia mahino ki te Tohi-Tapu, ʼe tonu anai ke nātou fakamoʼoni ko te “poto lahi ʼo te ʼAtua” ʼe feala pe ke nātou mahino kiai ʼaki pe te meʼa fakahoko palalau ʼa Sehova, ʼaē ko te kaugana agatonu mo poto.—Soane 6:68.

[Nota ʼi te lalo pasina]

Vakaʼi Te Tule Leʼo (fakafalani) ʼo te ʼaho 1 ʼo Sūnio 1981, ʼu pasina 24 ki te 30.