Ko Te Kau Faka Mafola ʼo Te Puleʼaga ʼe Nātou Fakamatala
Ko Te Folafola ʼa Te ʼAtua ʼe Maʼuli Pea ʼe Ina Fakalogoʼi Tana Gāue
“KO TE folafola ʼa te ʼAtua ʼe maʼuli pea ʼe ina fakalogoʼi tana gāue.” (Hepeleo 4:12) Ko te ʼu palalau ʼaia neʼe hoko moʼoni ia nātou ʼaē neʼe lotovaivai ʼuhi ko te lotu hala, ʼi te temi ʼaē neʼe nātou mahino ai ki te ʼu moʼoni ʼo te Tohi-Tapu. Ohage la ko te meʼa neʼe hoko ʼi te République Dominicaine, ʼe hā ʼaki ai ko te Tohi-Tapu ʼe feala ke ina fetogi te maʼuli ʼo te hahaʼi pea mo foaki kia nātou he ʼamanaki.
Neʼe ʼaʼahi e te kau Fakamoʼoni ʼa Sehova te fafine neʼe lelei tona tuʼulaga ʼi te lotu Katolika pea neʼe mole heʼeki faʼa fualoa te mamate ʼo tana ʼu kiʼi toe e lua. Neʼe lotomamahi pea mo lāuga ʼi te ʼaho fuli ʼuhi ko te malaʼia ʼaē neʼe hoko kia ia. Neʼe fakahā age e te ʼu Fakamoʼoni te manatu ʼaē ʼe tuʼu ʼi te Tohi-Tapu ia Soane 5:28, 29 ʼo ʼuhiga mo te ʼamanaki ʼaē ki te toe fakatuʼuake. Hili ʼaia ki tana ʼu felogoi mo te kau Fakamoʼoni, neʼe fīmālie tona loto ʼaki te falala ʼaē ki te toe fakatuʼuake ʼo te kau mate pea neʼe toe mahino pe foki kia ia te fakapōʼuli ʼo te kau takitaki lotu ʼo te lotu Katolika.
Neʼe mole tuai pea mavae mai te ’Ēkelesia Katolika, pea neʼe ina tali ke fai hana ako hoholo ʼo te Tohi-Tapu mo te kau Fakamoʼoni ʼa Sehova. Kae ko tona ʼohoana, neʼe mole manatu tahi mo ia. Koteʼuhi neʼe ʼiloa ia ia ʼi te lotu Katolika, pea neʼe ina kole ki tona ʼu kaumeʼa māʼoluga ʼi te ʼu ʼaluga faka politike pea mo te ʼu ʼaluʼaga faka lotu ke nātou ʼolo ʼo ʼaʼahi tona ʼohoana, ʼo faigaʼi ke toe maliu mai ki te lotu Katolika. Ki muli age neʼe ina fakamatakuʼi ia ia, ʼo ina ʼui age ki ai ʼe nā mavete anai, pea mo ina fakahā aipe ki tona ʼu kāiga pea mo te ʼu hahaʼi ʼo te ʼēkelesia ko nāua ʼe nā ʼamanaki ke nā mavete.
Kae ko tana kākā neʼe mole ʼi ai hona fua. Neʼe ʼāsili age ʼosi te faiga ʼo tona ʼohoana ke hoko atu tana ako ʼo te Tohi-Tapu. ʼAki tana tuputupu ʼaē ʼi te faʼahi fakalaumālie pea mo tana maʼuliʼi ʼo te ʼu kalitate faka Kilisitiano, neʼe fakatotonu leva e tona ʼohoana ʼe mole nā mavete. ʼI te tahi ʼaho neʼe ina tali ke ina vakaʼi mo ia te ʼu tohi faka Tohi-Tapu ʼaē neʼe ina lolotoga ako—mo kapau ʼe ina fakaʼaogaʼi pe tana Tohi-Tapu Katolika.
Meʼa fakapuna’maʼuli kia ia, ʼaki te tohi ʼa te kau Fakamoʼoni ʼa Sehova, neʼe ina kamata ako te ʼu meʼa foʼou mai tana Tohi-Tapu totonu. Neʼe mahino ai leva kia ia ko tona ʼohoana neʼe ina fili te ala ʼaē ʼe totonu, pea neʼe ina muliʼi tana faʼifaʼitaki. ʼIo, neʼe toe mahino pe foki kia ia te maʼuhiga ʼaē ʼo hana fai ʼo ni ʼu fetogi ʼi tona maʼuli. Ko te meʼa ʼaē neʼe faigataʼa kia ia ko tana tuku ʼo tana suluka. ʼI tana ʼosi lau ʼaē ʼo te nusipepa Réveillez-vous! (fakafalani) ʼo te ʼaho 8 ʼo Sūlio 1989 ʼaē ʼe fēnei tona kupu tāfito “Ko he fakatau koloā ʼe fakatupu mate—Ko tokoni e hogofulu moʼo fakagata te suluka,” neʼe ina fakatotonu ai ke ina līaki tana ʼu aga fuli ʼaē ʼe mole ʼalutahi mo te Tohi-Tapu. ʼI te meʼa ʼaē ʼe tuku māhani ai tana pake sikaleti, neʼe ina tuku kiai te nusipepa Réveillez-vous! ʼI te ʼu temi fuli ʼaē neʼe malaga ai hona fia suluka, neʼe ina lau te ʼu alatike ʼaē ki te suluka. Neʼe fua te ʼu tokoni! ʼI tana ʼosi lau liuliuga te ʼu alatike ʼaia, neʼe feala ai leva kia ia ke ina tuku tana suluka.
ʼI te temi nei, ko te taumatuʼa ʼaia ʼe nā gāue kia Sehova, ko te ʼu minisi kua papitema. Ko ia ko te tagata faifekau faka minisitelio ʼi tana kokelekasio, pea ʼi te ʼu temi ʼaē ʼe fealagia lelei ai kia ia, ʼe ina fakaʼaogaʼi he temi lahi ki te fagonogono ʼo te logo lelei ʼo te Puleʼaga ʼo te ʼAtua. Pea kia nāua taumatuʼa ʼe nā fakatalitali ki te toe fakatuʼuake, ki te temi ʼaē ka nā toe felāveʼi ai anai mo tanā ʼu fānau ʼi te mālama foʼou. ʼIo, ko te Folafola ʼa te ʼAtua, ia te Tohi-Tapu, ʼe maʼuli pea ʼe ina fakalogoʼi tana gāue.