Te ʼu Kaugana ʼa Te ʼAtua—Ko He Hahaʼi Fakatokatoka Pea Mo Fiafia
“Manuʼia te hahaʼi ʼaē ko tonatou ʼAtua ko Sehova!”—Pesalemo 144:15.
1, 2. (a) He koʼe koa ʼe matatonu mo Sehova te fakatuʼu ʼo te ʼu lekula ki tana kau kaugana? (b) Koteā te ʼu ʼulugaaga e lua ʼa Sehova ʼe tonu ke tou faʼifaʼitakiʼi tāfito anai?
KO SEHOVA ʼe ko te Tuʼi ʼo te ʼAtulaulau, te ʼAtua māʼoluga, te Tupuʼaga. (Senesi 1:1; Pesalemo 100:3) Koia, ʼe tāu mo ia te fakatuʼu ʼo te ʼu lekula ʼo ʼuhiga mo te aga ki tana ʼu kaugana, ʼi tana ʼiloʼi ʼaē te meʼa ʼaē ʼe lelei age kia nātou. (Pesalemo 143:8) Pea ko ia ko tonatou Faʼifaʼitaki Lahi, ʼaē ʼe ina maʼu te ʼu kalitate ʼaē ʼe ʼaoga kia nātou ke nātou faʼifaʼitakiʼi. Neʼe tohi fēnei e te ʼapositolo: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina.”—Efesi 5:1.
2 Ko te tahi ʼulugaaga ʼo te ʼAtua ʼaē ʼe ʼaoga ke tou faʼifaʼitakiʼi, ʼe ʼalutahi mo tana aga fakatokatoka. Ko ia ʼe ‘mole ko te ʼAtua ʼo te maveuveu.’ (1 Kolonito 14:33) Ka tou fakatokagaʼi fakalelei te meʼa ʼaē neʼe fakatupu e te ʼAtua pea ʼe ina fakatupu ai ia tatou te fakamoʼoni ʼaē ko Ia tokotahi pe ʼe lahi tana fakatokatoka ʼi te ʼatulaulau. Kae, ko te tahi ʼulugaaga ʼo te ʼAtua ʼaē ʼe ina loto ke faʼifaʼitakiʼi e tana ʼu kaugana, ko tana fiafia, koteʼuhi he ko ia ko “te ʼAtua fiafia.” (1 Timoteo 1:11) Koia, ko tana fealagia ʼaē ki te fakatokatoka ʼe fakamatatau ʼaki te fiafia. ʼE mole lahi age he ʼulugaaga e tahi, kae tukunoaʼi he tahi ʼulugaaga.
3. ʼE fakahā feafeaʼi e te lagi ʼaē ʼe fetuʼuʼia, te fealagia ʼaē ki te ʼAtua ʼo ʼuhiga mo te fakatokatoka?
3 ʼE fakamoʼoni e te ʼu meʼa fuli ʼaē neʼe fai e Sehova, mai te meʼa ʼaē ʼe veliveli ʼosi ki te meʼa ʼaē ʼe lahi ʼosi, ko ia ko te ʼAtua ʼo te fakatokatoka. Ohage la, koutou fakatokagaʼi te ʼatulaulau. ʼE maʼu ai te lauʼi afe miliale fetuʼu. Kae ʼe mole hoko mavetevete faka fuanoa pe te ʼu fetuʼu ʼaia. ʼE fakatokagaʼi e te tagata ʼe ina sivisivi te agaaga ʼo te ʼatulaulau ʼe ʼi ai “te motele ki te fakatokatoka ʼo te ʼu fetuʼu.” ʼE fakatokatokaʼi fakapupu ʼo fakahigoaʼi ko te ʼu galaxies, ʼi ʼihi ʼe maʼu ai te ʼu lauʼi teau miliale fetuʼu. Pea ʼe lau ʼe maʼu te ʼu lauʼi miliale galaxies. ʼE toe fakatokatoka foki te ʼu galaxies, (mai he kiʼi fakapupuʼaga ki he lauʼi afe) ʼe fakatahitahiʼi ʼihi galaxies ko he ʼu amas ʼo te ʼu galaxies. Pea ʼe ʼui ko te ʼu amas ʼo te ʼu galaxies ʼe fakatahitahiʼi ki he fakapupu lalahi age ʼe fakahigoaʼi ko te ʼu super-amas.—Pesalemo 19:1; Isaia 40:25, 26.
4, 5. Fakahā he ʼu faʼifaʼitaki ʼo te fakatokatoka ʼo te ʼu meʼa maʼuli ʼi te kele.
4 Ko te fakatokatoka fakaofoofo ʼo te ʼu meʼa ʼaē neʼe fakatupu e te ʼAtua ʼe ʼiloga ʼi te potu fuli, ʼe mole gata pe ʼi te ʼu lagi ʼaē ʼe hā kae ʼe toe feiā pe foki ki te kele, ʼaki te ʼu meʼa maʼuli neʼe fakatupu ʼe mole feala hona lau. ʼO ʼuhiga mo te potu ʼaia, neʼe tohi e te polofesea ko Paul Davies, ko te hahaʼi mamata ʼe nātou “ōfo” ki te “lahi pea mo te fakatokatoka ʼaē ʼe mahino gataʼa ʼo te mālama fakasino.”—Pesalemo 104:24.
5 Koutou fakatokagaʼi he ʼu faʼifaʼitaki ʼo te “fakatokatoka fakamanavahe” ʼaē ʼe maʼu ʼi te ʼu meʼa maʼuli. Neʼe ʼui fēnei e te tōketā ʼe gāue ki te ʼu ivi ko Joseph Evans ʼo ʼuhiga mo te ʼuto ʼo te tagata pea mo te uho ʼo tona hui tuʼa tofu: “ ʼE teitei pe ke fakapuna’maʼuli te moʼoni ʼo te toe tokatoka lelei ʼaia.” Neʼe tala fēnei e te bactériologiste ko H. J. Shaughnessy ʼo ʼuhiga mo te selule ʼaē mole feala ke kita sio mata feiā kiai: “Ko te mahino gataʼa pea mo te fakatuʼutuʼu matalelei ʼo te mikolope ʼe fakaofoofo ʼaupito tona faʼufaʼu, ʼe ʼiloga ai ko he koga ʼo he tuʼu neʼe fakaʼaluʼalu e he ʼatua.” Pea ko Michael Denton, ko he tagata ʼe ina sivisivi te maʼuli ʼo te ʼu molécules, neʼe ina ʼui ʼo ʼuhiga mo te code génétique (ADN) ʼaē ʼi he loto selule: “ ʼE ko he meʼa fakaofoofo ʼaupito ko te logo fuli . . . ʼe ʼaoga ki te fakakeheʼi ʼo te ʼu faʼahiga organismes fuli ʼaē ʼe maʼu ʼi te kele . . . neʼe feala pe ke fakatahiʼi ki he puna veliveli pea ʼe toe feala pe ke toe hona tahi potu ki te ʼu logo fuli ʼe feala ke maʼu mai te ʼu tohi fuli.”—Vakaʼi ia Pesalemo 139:16.
6, 7. Ko te fakatokatoka fea ʼe hā ʼi te ʼu meʼa maʼuli fakalaumālie ʼaē neʼe fakatupu, pea ʼe nātou fakahā feafeaʼi tanatou fakafetaʼi ki tonatou Tupuʼaga?
6 ʼE mole gata pe te fakatokatoka e Sehova te ʼu meʼa fakasino ʼaē neʼe ina fakatupu, kae ʼe ina toe fakatokatoka foki mo te ʼu meʼa fakalaumālie ʼaē neʼe ina fakatupu. ʼE fakahā mai e Taniela 7:10 ko te ʼu ʼaselo e ‘toko hogofulu afe tuʼa hogofulu afe neʼe tutuʼu ia muʼa ʼo Sehova.’ Ko te toko teau miliona meʼa maʼuli neʼe fakatupu ʼe nātou tuʼutuʼu, kua ʼosi tahi hinoʼi ki tana gāue totonu! ʼE fakaofoofo te manatu ʼo ʼuhiga mo te faiva ʼe tonu ke maʼu moʼo fakatokatoka ʼo te ʼu toe kaugamālie ʼaia. Koia ʼe ʼui tonu e te Tohi-Tapu: “Koutou tapuakiʼi ia Sehova, ia koutou ko tana kau ʼaselo, lahi ʼi te mālohi, ʼe koutou fakahoko tana folafola, ʼo fakalogo ki te leʼo ʼo tana folafola. Koutou tapuakiʼi ia Sehova, ia koutou ko tana ʼu kautau fakaʼaselo, ia koutou ko tana kau minisi, ʼe koutou fai tona finegalo.”—Pesalemo 103:20, 21; Fakahā 5:11.
7 ʼI fakaofoofo te fakatokatoka pea mo te fua lelei ʼo te ʼu gāue ʼa te Tupuʼaga! ʼE mole fai ai he fakapuna’maʼuli ki te kalaga ʼa te ʼu meʼa fakalaumālie mālolohi ʼaē neʼe fakatupu ʼi he ʼaluʼaga fakaʼapaʼapa pea mo he fakalogo: “ ʼE tāu mo koe, Sehova, ʼio, tomatou ʼAtua ke ke tali te kolōlia, pea mo te fakaʼapaʼapa, pea mo te mālohi, he ko koe ʼaē neʼe ke fakatupu ia meʼa fuli, pea ʼaki tou finegalo neʼe maʼuʼuli te ʼu meʼa fuli ʼaia pea mo fakatupu ia nātou.”—Fakahā 4:11.
8. Ko te ʼu faʼifaʼitaki fea ʼe nātou fakahā te fakatokatoka e Sehova tana kau kaugana ʼi te kele?
8 ʼE toe fakatokatoka foki e Sehova tana ʼu kaugana ʼi te kele. ʼI te temi ʼaē neʼe ina tuku ifo te Tulivio ʼi te temi ʼo Noe ʼi te taʼu 2370 ʼi muʼa ʼo totatou temi, ko Noe pea mo te toko fitu neʼe hāofaki ohage ko he fakatuʼutuʼu faka famili. ʼI te Mavae ʼaē neʼe hoko ʼi te taʼu 1513 ʼi muʼa ʼo totatou temi, neʼe toʼo mai e Sehova te lauʼi miliona ʼo tana hahaʼi mai te popūla faka Esipito pea neʼe ina foaki age kia nātou te ʼu lao mo tona ʼu fakamahinohino moʼo fakaʼaluʼalu ʼo te ʼu meʼa ʼa nātou ʼo te ʼaho fuli pea mo tanatou tauhi. Pea ki muli mai, ʼi te Kele ʼo te Fakapapau, ko te lauʼi hogofulu afe ʼo nātou neʼe fakatokatoka ki te gāue makehe ʼi te fale lotu. (1 Fakamatala 23:4, 5) ʼI te ʼuluaki sēkulō, neʼe fakatokatoka te ʼu kokelekasio faka Kilisitiano ʼaki te takitaki fakaʼatua: “Neʼe ina foaki ʼihi ko te kau ʼapositolo, ʼihi ko te kau polofeta, ʼihi ko te kau fagonogono ʼo te evaselio, ʼihi ko te kau tauhi ōvi pea mo te kau faiako, moʼo fakatonutonuʼi te kau maʼoniʼoni, ʼo ʼuhiga mo te gāue faka minisitelio.”—Efesi 4:11, 12.
Ko Te ʼu Kaugana ʼo Te Temi Nei ʼe Toe Fakatokatoka Mo Nātou
9, 10. Neʼe fakatokatoka feafeaʼi e Sehova tana hahaʼi ʼi totatou temi?
9 ʼO toe feiā aipe, neʼe fakatokatoka e Sehova tana kau kaugana ʼo te temi nei ke feala hanatou fai lelei tana gāue ʼi totatou temi—ʼo faka mafola te logo lelei ʼo tona Puleʼaga ʼi muʼa ʼo tana molehi te tuʼu ʼo te ʼu faʼahiga meʼa heʼe aga faka lotu ʼaenī. (Mateo 24:14) Koutou fakatokagaʼi te meʼa ʼe pipiki ki te gāue faka malamanei ʼaia pea mo te maʼuhiga ʼo he fakatokatoka lelei. ʼE akoʼi te lauʼi miliona tagata mo fafine, mo te tamaliki ke nātou ako te ʼu moʼoni faka Tohi-Tapu ki niʼihi. Moʼo tokoni ki te ako ʼaia, ko te ʼu tuʼuga Tohi-Tapu pea mo te ʼu tohi faka Tohi-Tapu ʼe tā. Ko te tāʼaga e tahi ʼi te temi nei ki te numelo e tahi ʼo Te Tule Leʼo ʼe fakalaka ʼi te 16 miliona ʼi te ʼu lea e 118, pea ko te nusipepa Réveillez-vous! ʼe teitei pe ko te 13 miliona ʼi te ʼu lea e 73. Teitei pe ko te ʼu numelo fuli ʼe tā ʼi te moʼi lakaga pe e tahi ke feala ai ki te teitei pe ki te kau kaugana fuli ʼa Sehova, ke nātou maʼu te logo ʼe tatau ʼi te moʼi temi pe e tahi.
10 Pea tahi ʼaē meʼa, ko te ʼu kokelekasio e 73 000 tupu ʼo te kau Fakamoʼoni ʼa Sehova ʼe fakatokatoka ia nātou ke nātou fakatahi tuʼumaʼu ki he ako faka Tohi-Tapu. (Hepeleo 10:24, 25) ʼE toe kau ai foki te ʼu fakatahi lalahi ʼe lauʼi afe—ko te ʼu fakatahi fakakolo pea mo te ʼu fakatahi faka tisitilike—ʼi te taʼu fuli. ʼE ʼi ai mo te laga fale ʼe hoko ʼi te malamanei katoa, ko he ʼu laga foʼou peʼe ko he fakalahi ʼo te ʼu Fale ʼo te Puleʼaga, pea mo te Fale ʼo te ʼu fakatahi, te ʼu Petele, pea mo te ʼu fale tā tohi. ʼE ʼi ai mo te ʼu faleako moʼo hikihiki ʼo te ako ʼo te kau fai akonaki ʼo te Tohi-Tapu, ohage la ko te Faleako faka Tohi-Tapu ʼo Kalaate ʼo te Watchtower pea mo te Faleako ki te kau pionie, ʼe fai ʼi te ʼu fenua ʼi te kele katoa.
11. Koteā te tapuakina ʼi he temi ka haʼu ʼe maʼu anai ʼi te ako ʼo te fakatokatoka lelei ʼi te temi nei?
11 Neʼe fakatokatoka lelei e Sehova tana hahaʼi ʼaē ʼi te kele ‘ke nātou fakahoko katoa tanatou minisitelio,’ ʼaki te tokoni ʼa te kau ʼaselo! (2 Timoteo 4:5; Hepeleo 1:13, 14; Fakahā 14:6) ʼAki tana akoʼi tana kau kaugana ʼi te ʼu agaaga ʼo te fakatokatoka lelei ʼi te temi nei, ʼe lolotoga fakahoko e Sehova te tahi age meʼa. ʼI te ʼaluʼaga ʼaē kua lelei ʼaupito te teuteu ʼo nātou ʼi te temi ʼaē ʼe nātou hāo ʼi te fakaʼosi ʼo te tuʼu ʼo te ʼu faʼahiga meʼa ʼaenī, kua lelei anai te fakatokatoka ʼo nātou ke nātou kamata maʼuli ʼi te tuʼu foʼou. Koia, ʼi he ʼaluʼaga neʼe fakatokatoka ʼaki te takitaki ʼa Sehova, ʼe nātou kamata laga anai te Palatiso ʼi te kele katoa. ʼE toe lelei anai mo te teuteuʼi ʼo nātou ke nātou akoʼi te ʼu fakatotonu ʼaē ʼe matala lelei ʼo ʼuhiga mo te maʼuli ki te ʼu lauʼi miliale hahaʼi ʼaē ka tutuʼu ake anai mai te mate.—Isaia 11:9; 54:13; Gāue 24:15; Fakahā 20:12, 13.
Fakatokatoka Kae Fiafia
12, 13. He koʼe koa ʼe feala ke tou ʼui ʼe loto e Sehova ke fiafia tana hahaʼi?
12 Logo aipe ko Sehova ko he tahi ʼe fakamanavahe pea mo fakaofoofo tana gāue pea mo tana fakatokatoka, ʼe mole ko he tahi ia ʼe fefeka, ʼe mole malave he meʼa ki tona loto, peʼe hage ko he masini. Kae, ʼe ko he Tahi ia ʼe tokaga ʼaupito, pea mo fiafia ʼe tokaga ki tatatou fiafia. ʼE tala e 1 Petelo 5:7, ko Ia “ ʼe tokaga kia koutou.” ʼE feala ke tou sio ki tana tokaga pea mo tana loto ke fiafia tana kau kaugana ʼi te meʼa ʼaē neʼe ina fai maʼa te hahaʼi. Ohage la, ʼi te temi ʼaē neʼe fakatupu ai e te ʼAtua te tagata pea mo te fafine haohaoa, neʼe ina ʼai ia nāua ki te palatiso ʼo te fakafiafia. (Senesi 1:26-31; 2:8, 9) Neʼe ina foaki age kia nāua te meʼa fuli neʼe ʼaoga ke nā fiafia lahi ai. Kae neʼe nā pulihi te ʼu meʼa fuli ʼaia ʼaki tana agatuʼu. Ko te fua ʼo tanā agahala, kua tou maʼu te heʼe haohaoa pea mo te mate.—Loma 3:23; 5:12.
13 Logope tatatou heʼe haohaoa ʼi te temi nei, ko tatou tagata ʼe kei feala pe hatatou maʼu te fiafia ʼi te meʼa ʼaē neʼe fai e te ʼAtua. ʼE lahi te ʼu meʼa ʼe nātou ʼaumai kia tatou te fakafiafia—ko te ʼu moʼuga lalahi; ko te ʼu vai, te ʼu vaitafe mo te ʼu moana pea mo te ʼu mata ʼone matamatalelei; te ʼu fisiʼi teu lanu pea mo magoni pea mo ʼihi faʼahiga ʼakau kehekehe ʼe tapuke; ko te mahu ʼo te ʼu meʼa kai lelei; ko te ʼu tō ʼo te laʼā matamatalelei ʼe mole tou fiu ʼi tona mamata; ko te lagi fetuʼuʼia ʼe tou fakafiafia ʼi tona mamata ʼi te pōʼuli; ko te ʼu manu kehekehe pea mo ʼonatou ʼu ʼuhi ʼaē ko tonatou agamāhani ko te gaoʼi; ko he musika ʼe lave ʼi te loto; ko he gāue ʼe kita fia fai ai pea mo ʼaoga; ko te ʼu kaumeʼa agalelei. ʼE ʼiloga mai ia ko Ia ʼaē neʼe ina fakatuʼutuʼu te ʼu meʼa ʼaia ʼe ko he tahi ʼe fiafia pea ʼe ina leleiʼia te fakafiafiaʼi ʼo ʼihi.
14. Ko te fakamatatau fea ʼaē ʼe loto e Sehova ke tou faʼifaʼitakiʼi ai ia ia?
14 Koia, ko he lelei ʼo he gāue kae siʼisiʼi te fakatokatoka ʼe mole ko te meʼa ʼaia ʼe loto kiai te ʼAtua. ʼE ina loto foki ke toe fiafia mo ʼana ʼu kaugana. ʼE mole ina loto ke nātou pipiki fakavale ki te fakatokatoka ʼo te ʼu meʼa kae ʼalunoa ai tonatou fiafia. ʼE tonu ke fakamatatau e te kau kaugana ʼa te ʼAtua tonatou ʼu faiva fakatokatoka mo te fiafia, ohage ko tona fai e ia, koteʼuhi ko te potu ʼaē ʼe nofo ai tona laumālie, ʼe ʼi ai te fiafia. ʼIo, ʼe fakahā e Kalate 5:22 ko te lua fua ʼo te laumālie maʼoniʼoni ʼaē ʼe gāue ʼi tana hahaʼi ko te “fiafia.”
Ko Te ʼOfa ʼe Ina Fakatupu Te Fiafia
15. He koʼe koa ʼe maʼuhiga ʼaupito te ʼofa ki tatatou fiafia?
15 ʼE maʼuhiga ʼaupito ke tou tokagaʼi te meʼa ʼaē ʼe tala e te Tohi-Tapu: “Ko te ʼAtua ʼe ʼofa.” (1 Soane 4:8, 16) ʼE mole ina ʼui ia ʼi he lakaga: “Ko te ʼAtua ʼe fakatokatoka.” Ko te ʼofa ko te kalitate ʼuluaki ʼaia, pea ʼe tonu ke faʼifaʼitakiʼi e tana kau kaugana. Ko te tupuʼaga ʼaia ʼo te hoa mai ʼo te “fiafia” ki te ʼuluaki fua ʼo te laumālie ʼa te ʼAtua ʼaē ʼe tuʼu ia Kalate 5:22, ko te “ ʼofa.” Ko te ʼofa ʼe ina fakatupu te fiafia. Ka tou faʼifaʼitaki te ʼofa ʼo Sehova ʼi totatou ʼu vāhaʼa mo te hahaʼi, ʼe muli mai ʼi ai mo te fiafia, koteʼuhi ko te hahaʼi agaʼofa ko he hahaʼi fiafia.
16. Neʼe fakahā feafeaʼi e Sesu te maʼuhiga ʼo te ʼofa?
16 ʼE fakahāhā lelei te maʼuhiga ʼo te faʼifaʼitakiʼi ʼo te ʼofa fakaʼatua ʼi te ʼu akonaki ʼa Sesu. Neʼe ina ʼui fēnei: “Ohage ko tona akoʼi mai e taku Tāmai kia te ʼau, ʼe ʼau tala feiā te ʼu meʼa ʼaia.” (Soane 8:28) Koteā te potu tāfito ʼaē neʼe akoʼi e Sesu, pea ki muli age, neʼe ina ako ki niʼihi? Ko te ʼu folafola ʼaē e lua ʼe maʼuhiga ʼaupito ko te ʼofa ki te ʼAtua pea mo te ʼofa ʼaē ki te kāiga. (Mateo 22:36-39) Neʼe tuku te faʼifaʼitaki e Sesu ʼo ʼuhiga mo te taʼi ʼofa ʼaia. Neʼe ina ʼui fēnei: “ ʼE ʼau ʼofa ki te Tāmai,” ʼo ina fakamoʼoni te potu ʼaia ʼaki tana fai te finegalo ʼo te ʼAtua ʼo aʼu ki te mate. Pea neʼe ina fakahā tona ʼofa ki te hahaʼi ʼi tana mate ʼaē maʼa nātou. Neʼe tohi fēnei e te ʼapositolo ko Paulo ki te kau Kilisitiano ʼaē ʼi Efesi: ‘Ko Kilisito neʼe ʼofa kia koutou pea neʼe ina foaki ia ia totonu maʼa koutou.’ (Soane 14:31; Efesi 5:2) Koia, neʼe ʼui fēnei age e Sesu ki tana ʼu tisipulo: “Koʼeni taku fakatotonu, ke koutou feʼofaʼofani ohage pe ko taku ʼofa ʼaē kia koutou.”—Soane 15:12, 13.
17. Neʼe fakahā feafeaʼi e Paulo te maʼuhiga ʼaē ʼo te fakahā ʼo te ʼofa ki niʼihi age?
17 Neʼe fakahā e Paulo te maʼuhiga ʼo te ʼofa fakaʼatua ʼaia ʼi tana ʼui ʼaē: “Kapau ʼe ʼau palalau ʼi te ʼu lea ʼo te hahaʼi pea mo ʼaē ʼo te kau ʼaselo kae mole ʼau maʼu te ʼofa, ʼe ʼau liliu ohage ko he kogaʼi ukamea ʼe tagi logoaʼa peʼe ko he nafa ʼe tatagi. Pea kapau ʼe ʼau maʼu te meʼa ʼofa ʼaē ko te fai fakakikite pea mo ʼau ʼiloʼi te ʼu meʼa lilo taputapu fuli pea mo te mālama fuli, pea kapau ʼe ʼau maʼu te tui katoa ke ʼau faʼa hiki ai he ʼu moʼuga, kae mole ʼau maʼu te ʼofa, pea ko ʼau ia ko te meʼa noa pe. Pea kapau ʼe ʼau tufaki toku ʼu koloā fuli moʼo fafaga te hahaʼi māsisiva, pea kapau ʼe ʼau tuku toku sino moʼo ʼoku faka kolōlia, ka mole ʼau maʼu te ʼofa, pea ʼe mole hona ʼaoga kia ʼau. . . . ʼE maʼu te tui, te falala, te ʼofa, te ʼu meʼa ʼaia e tolu; kae ko ʼaē ʼe lahi ake ia nātou toko tolu, ko te ʼofa.”—1 Kolonito 13:1-3, 13.
18. Koteā ʼaē ʼe feala ke tou ʼamanaki ke hilifaki e Sehova ki totatou fiafia?
18 Ka tou faʼifaʼitaki te ʼofa ʼo Sehova, ʼe feala ke tou falala ki tona ʼofa ʼaē kia tatou, tatau aipe mokā tou fai he ʼu hala, koteʼuhi ko te “ ʼAtua agaʼofa pea mo fakamolemole gafua, tuai ʼi te ʼita pea mo mohu ʼi te lotoʼofa pea mo te moʼoni.” (Ekesote 34:6) Kapau ʼe tou fakahemala moʼoni mokā tou fai he ʼu hala, ʼe mole tokagaʼi ia e te ʼAtua kae ʼaki te ʼofa ʼe ina fakamolemole kia tatou. (Pesalemo 103:1-3) ʼIo, “ko Sehova ʼe fonu ʼi te ʼofa pea mo te manavaʼofa.” (Sake 5:11) Ko te ʼiloʼi ʼo te potu ʼaia ʼe ina ʼaumai ai totatou fiafia.
Ko Te Fiafia Faka Temi ʼi Te Temi Nei
19, 20. (a) He koʼe koa ʼe mole feala ke maʼu he fiafia ʼe katoa ʼi te temi nei? (b) ʼE fakahā feafeaʼi e te Tohi-Tapu tatatou lava ʼo maʼu he fiafia faka temi ʼi te temi nei?
19 Ka, ʼe feala koa ke tou fiafia ia ʼaho nei, koteʼuhi ʼe tou maʼuʼuli nei ʼi te ʼaho fakamuli ʼo te mālama ʼaē ʼe puleʼi e Satana, ʼaē ʼe fonu ʼi te fai fakapō, mo te agamālohi pea mo te aga heʼeʼaoga, ʼaia ʼe tou tau ai mo te mahaki pea mo te mate? ʼE mahino papau ia, ʼe mole feala ke tou maʼu he fiafia ʼaē ʼe maʼu anai ʼi te mālama foʼou ʼa te ʼAtua, ʼaia ʼe fakakikite fēnei e tana Folafola: “Koʼeni ʼe ʼau fakatupu te ʼu lagi foʼou pea mo he kele foʼou; pea ʼe mole toe fakamanatuʼi anai te ʼu meʼa muʼa ʼatu, pea ʼe mole toe hake anai ki te loto. Kae ke koutou fakafiafia lahi ʼaupito pea mo loto fiafia ke talu ai ʼi te ʼu meʼa ʼaē ʼe ʼau fakatupu.”—Isaia 65:17, 18.
20 Ko te meʼa ʼaē ʼe feala ke maʼu e te kau kaugana ʼa te ʼAtua ʼe ko he fiafia faka temi koteʼuhi ʼe nātou ʼiloʼi tona finegalo pea mo nātou maʼu te mālama totonu ʼo ʼuhiga mo te ʼu tapuakina ka ʼamanaki hoko ʼi tana tuʼu foʼou faka palatiso. (Soane 17:3; Fakahā 21:4) Ko te tupuʼaga ʼaia ʼo te lava ke ʼui e te Tohi-Tapu: “Ê Sehova ʼo te ʼatu kautau, manuʼia te tagata ʼaē ʼe falala kia te koe,” “manuʼia te tagata fuli pe ʼe manavasiʼi kia Sehova, ʼe haʼele ʼi tona ʼu ala,” “manuʼia ia nātou ʼaē ʼe agamālū, heʼe nātou maʼu anai te kele.” (Pesalemo 84:12; 128:1; Mateo 5:5) Koia, logo aipe te ʼu ʼaluʼaga faigataʼa ʼo te temi nei ʼe tau mo tatou, ʼe feala ke tou maʼu he fiafia lahi. Tatau aipe mokā hoko mai kia tatou he ʼu malaʼia, ʼe mole tou liliu ʼo lotovaivai ohage ko tona fai e nātou ʼaē ʼe mole nātou ʼiloʼi ia Sehova pea mole nātou maʼu te ʼamanaki ʼo te maʼuli heʼegata.—1 Tesalonika 4:13.
21. E feafeaʼi ki te kau kaugana ʼa Sehova hanatou maʼu he fiafia ʼi tanatou foaki ʼo nātou totonu?
21 Ko te fiafia ʼe toe maʼu e te kau kaugana ʼa Sehova koteʼuhi ʼe nātou fakaʼaogaʼi tonatou temi, tonatou mālohi, pea mo ʼonatou ʼu koloā moʼo akoʼi ʼo te ʼu moʼoni faka Tohi-Tapu ki niʼihi, tāfito te hahaʼi ʼaē ʼe ‘toʼetoʼe pea mo fetāgihi ʼo ʼuhiga mo te ʼu meʼa fakalialia fuli’ ʼe hoko ʼi te malamanei ʼa Satana. (Esekiele 9:4) ʼE ʼui fēnei e te Tohi-Tapu: “Manuʼia ia ia ʼaē ʼe tokaga kia ia ʼaē ʼe veliveli! ʼI te ʼaho ʼo te malaʼia, ʼe tuku age anai e Sehova ke hāo. ʼE taupau anai ia ia e Sehova totonu, pea mo ina hāofaki anai. ʼE ina kalagaʼi anai ia ia ʼe manuʼia ʼi te kele.” (Pesalemo 41:1, 2) Ohage pe ko te ʼui ʼa Sesu, “ ʼE lahi age te manuʼia ʼi takita foaki, ʼi te foaki mai ʼaē kia kita.”—Gāue 20:35.
22. (a) ʼO ʼuhiga mo te fiafia, fakakeheʼi te fiafia ʼe maʼu e te kau kaugana ʼa te ʼAtua pea mo nātou ʼaē ʼe mole nātou tauhi kia te ia. (b) Koteā te tupuʼaga makehe ʼaē ʼe tonu ai ke tou fiafia ai?
22 Koia logope ʼe mole lava maʼu e te kau kaugana ʼa te ʼAtua te fiafia lahi ʼi te temi ʼaenī, ʼe feala pe ke nātou maʼu te fiafia ʼaē ʼe mole maʼu e nātou ʼaē ʼe mole tauhi ki te ʼAtua. ʼE tala fēnei e Sehova: “Koʼeni ko ʼaku tagata kaugana ʼe nātou kalaga fakafiafia anai, ʼuhi ko te lelei ʼo te loto, kae ko koutou ʼe koutou kalaga anai, ʼuhi ko te mamahi ʼo te loto, pea ʼe koutou kekē anai, ʼuhi ko te holo ʼo te laumālie.” (Isaia 65:14) Tahi ʼaē, ko nātou ʼaē ʼe tauhi ki te ʼAtua ʼe nātou maʼu te tupuʼaga makehe ke nātou fiafia ai ʼi te temi nei—ʼe nātou maʼu tona laumālie maʼoniʼoni ʼaē “neʼe foaki e te ʼAtua kia nātou ʼaē ʼe fakalogo kia te ia ohage ko hanatou pule.” (Gāue 5:32) Pea ke koutou manatuʼi, ko te potu ʼaē ʼe nofo ai te laumālie ʼo te ʼAtua, ʼe maʼu ai te fiafia.—Kalate 5:22.
23. Koteā anai ka tou vakaʼi ʼi te lua alatike ako?
23 ʼI te kautahi ʼo te kau kaugana ʼa te ʼAtua ʼo te temi ʼaenī, ʼe ko he faʼahi maʼuhiga ʼaē ʼe fai e te “kau tagata ʼāfea,” ʼaē ʼe nātou takitaki te ʼu kokelekasio, ʼo nātou kau ki te fiafia ʼo te hahaʼi ʼa Sehova. (Tito 1:5) ʼE tonu ke feafeaʼi te tokagaʼi e nātou ʼaia tonatou ʼu maʼua pea mo tonatou ʼu vāhaʼa mo ʼonatou ʼu tēhina pea mo tuagaʼane fakalaumālie? ʼE talanoa anai te lua alatike ki te faʼahi ʼaia.
ʼE Feafeaʼi Anai Hakotou Tali?
◻ ʼE fakamoʼoni feafeaʼi e te ʼu meʼa ʼaē neʼe fakatupu, te ʼuhiga fakatokatoka ʼo Sehova?
◻ Neʼe feafeaʼi te fakatokatoka e Sehova tana kau kaugana ʼo te temi ʼāfea pea mo te temi ʼaenī?
◻ Ko te fakamatatau fea ʼaē ʼe loto e Sehova ke tou maʼu?
◻ ʼE maʼuhiga feafeaʼi te ʼofa ki tatatou fiafia?
◻ Ko te faʼahiga fiafia feafeaʼi ʼaē ʼe feala ke tou maʼu ʼi totatou temi?
[Haʼuʼaga ʼo te paki pasina 10]
Top: Courtesy of ROE/Anglo-Australian Observatory, photograph by David Malin