ʼE Maʼuhiga Feafeaʼi Te Maʼuli Kia Koutou?
KO TE tūpulaga neʼe fakamate ʼo hihiki mai te laufata valu ʼo te fale fata. Neʼe ina lau te tohi ʼe ina fakamatalatala te fakamate ʼo hihiki mai te potu māʼoluga ohage “ko he ʼāteaina mai te mamahi peʼe ko te faigataʼaʼia peʼe ko te mataku; kae, ʼe maʼu ai te fīmālie.” Neʼe ʼui e te tagata ʼaē neʼe ina fai te tohi ʼaia, ʼaē neʼe tā ʼi Saponia, neʼe ko tana pe fakahā “te fakamate ohage ko he meʼa ʼe fili ʼi te maʼuli.”
Ko te hahaʼi ʼaē ʼe fakamate ʼe mole ko nātou pe ʼaē ʼe nātou meʼa noaʼi te maʼuli ʼi te temi nei. ʼE kau mo te hahaʼi taki motokā ʼi te mole fakaʼapaʼapa ki te maʼuli. Ko ʼihi ʼe nātou taki motokā kae ʼe nātou konahihia, ko te tokolahi ʼe nātou gaholo ʼi te ala ʼo iku ai ki te mate.
Ko ʼihi ʼe siʼisiʼi tanatou faka maʼuhigaʼi tonatou maʼuli, ʼaki te faka maʼuhiga ʼaupito ʼo te ʼu fakafiafia. Ko nātou ʼaē ʼe suluka, ʼe mole nātou fia tuku te faʼahi ʼaia, logope la ko te suluka ʼe lava fakatupu mate pea neʼe fakahigoaʼi ko te fakamate māmālie kae ʼe hoko moʼoni. Mole ʼui ke nātou taupau tonatou taupoʼou ʼi te mālama ʼaenī ʼaē ʼe faiga fakavale ki te ʼu felāveʼi fakasino, ko te tokolahi ʼe nātou mulimuli ki he maʼuli ʼe faiga mālohi ki te ʼu felāveʼi fakasino pea ʼe ina tau taki ki te mate.
ʼI tanatou mole mahino ki te faʼahi ʼaia, ko ʼihi ʼe nātou fakanounou te loaloaga ʼo tonatou maʼuli ʼaki tanatou fakavalevale ʼi te kai, mo te ʼinu, pea mo te mole feʼauga ʼo te fai gaoʼi, pea mo te faiga ki te ʼu fakafiafia. Neʼe fakatokaga fēnei e te tagata faitohi Saponia ko Shinya Nishimaru: “Ko te ʼu agamāhani ʼo te kai fakavale ʼe ina tāʼofi māmālie te gāue ʼo te sino, pea mo te faiga ʼaē ki te noa kae faiga ki te fakafīfīmālie pea mo te fiafia ʼaē ʼe ina maumauʼi te maʼuli ʼo te hahaʼi.” Ko te hahaʼi ʼe nātou manatu tahi mo nātou ʼo te temi ʼāfea ʼaē neʼe nātou ʼui: “Tou kakai pea mo tou ʼiʼinu, he ko ʼapogipogi ʼe tou mamate anai.”—Isaia 22:13; 1 Kolonito 15:32.
ʼIo, ko te meʼa noaʼi ʼo te maʼuli kua mafola ʼi te temi nei. Koia, e lagi lelei te fehuʼi ʼaenī, ʼE maʼuhiga feafeaʼi te maʼuli kia koutou? ʼE tonu koa ke taupau te maʼuli ʼo mole lauʼia te totogi ʼe feala ke fakaʼau kiai? Pea ʼe ʼi ai koa he meʼa ʼe maʼuhiga age ʼi totatou maʼuli ʼi te temi nei?